𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐱𑑂𑐬𑐷𑐮𑐎𑑂𑐲𑑂𑐩𑐷𑐫𑐵 𑐄𑐥𑐣𑑂𑐫𑐵𑐳 𑐰𑐵𑐔𑐣

𑐎𑑂𑐫𑐵𑐣𑐵𑐜𑐵𑐫𑐵 𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐢𑐬𑑂𑐩 𑐀𑐢𑑂𑐫𑐫𑐣 𑐰𑐶𑐨𑐵𑐐𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐵𑑄𑐖𑐵𑑅𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛𑐫𑐵 𑐄𑐥𑐣𑑂𑐫𑐵𑐳 ‘𑐎𑑀𑐬𑑀𑐣𑐵𑐫𑐵 𑐎𑐶𑐔𑐮𑐫𑑂’ 𑐰𑐵𑐔𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐰𑐶𑐨𑐵𑐐𑐫𑐵 𑐠𑑅𑐐𑐸 𑐴𑐾 𑐎𑐎𑑂𑐲𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐮𑐶𑐥𑐵𑑄𑐐𑐸 𑐄𑐥𑐣𑑂𑐫𑐵𑐳𑐫𑐵 𑐳𑑂𑐰𑑄𑐐𑐹 𑐀𑐢𑑂𑐫𑐵𑐫 𑐰𑐵𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐶𑐨𑐵𑐐𑐫𑐵 𑐐𑑂𑐰𑐳𑐵𑐮𑐫𑑂 𑐧𑐵𑑅𑐕𑐶𑐫𑑄𑐎𑑄 𑐖𑐹𑐐𑐸 ‘𑐐𑐺𑐲𑑂𑐩𑐎𑐵𑐮𑐷𑐣 𑐣𑐾𑐰𑐵𑑅 𑐨𑐵𑐫𑑂 𑐥𑑂𑐬𑐱𑐶𑐎𑑂𑐲𑐞’ 𑐖𑑂𑐫𑐵𑐗𑑂𑐰𑐮𑐫𑑂 𑐳𑐴𑐨𑐵𑐐𑐶 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐄𑐥𑐣𑑂𑐫𑐵𑐳 𑐰𑐵𑐔𑐣 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐥𑑂𑐬𑐟𑑂𑐫𑐎𑑂𑐲 𑐰 𑐀𑐣𑐮𑐵𑐂𑐣𑐫𑐵 𑐩𑐵𑐢𑑂𑐫𑐩𑑄 𑐖𑐹𑐐𑐸 𑐄𑐥𑐣𑑂𑐫𑐵𑐳 𑐰𑐵𑐔𑐣 𑐣𑐾𑐥𑐵𑐮𑐨𑐵𑐲𑐵𑐮𑐶𑐳𑐾𑑄 𑐀𑑄𑐐𑐾𑑂𑐬𑐖𑐷 𑐨𑐵𑐳𑑄 𑐣𑑄 𑐰𑐵𑐔𑐣 𑐫𑐵𑑅𑐐𑐸 𑐏𑑅 𑑋

𑐄𑐥𑐣𑑂𑐫𑐵𑐳 𑐰𑐵𑐔𑐣𑐮𑐶𑐥𑐵 𑐳𑐴𑐨𑐵𑐐𑐶𑐟𑐫𑑂 𑐖𑐶𑐖𑑂𑐘𑐵𑐳𑐵 𑐰 𑐣𑑂𑐴𑑂𑐫𑐳𑑅𑐫𑐵 𑐮𑐶𑐳𑑅 𑐧𑐶𑐫𑐵𑐡𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐱𑑂𑐬𑐾𑐲𑑂𑐛𑑄 𑐠𑐩𑑂𑐴𑑄 𑐣𑑂𑐴𑐵𑐥𑐵 𑐧𑐵𑐏𑑄, 𑐔𑐶𑐧𑐵𑐏𑑄 𑐰 𑐔𑐶𑐣𑐵𑐏𑑃 𑐖𑐎 𑐔𑑂𑐰𑐫𑐾𑐐𑐸 𑐫𑐵𑐣𑐵𑐔𑑂𑐰𑐣𑐵𑐐𑐸 𑐰 𑐄𑐥𑐣𑑂𑐫𑐵𑐳 𑐔𑑂𑐰𑐫𑐾𑐐𑐸 𑐂𑐔𑑂𑐕𑐵 𑐡𑐸𑐳𑐵𑑄 𑐥𑐹𑐰𑑄𑐎𑐾 𑐩𑐦𑐫𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐳𑐎𑐳𑐶𑐐𑐸𑑄 𑐥𑐾𑑂𑐬𑐬𑐞𑐵, 𑐴𑑅𑐥𑐵𑑅 𑐟𑐶𑐧𑐮𑑄 𑐴𑐾 𑐎𑑀𑐬𑑀𑐣𑐵 𑐠𑐾𑑄𑐖𑑂𑐫𑐵𑑅𑐐𑐸 𑐩𑐴𑐵𑐩𑐵𑐬𑐷 𑐣𑑂𑐫𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐥𑑂𑐫𑐮𑐵𑐫𑐵 𑐡𑐸𑐣𑐾 𑐄𑐥𑐣𑑂𑐫𑐵𑐳 𑐥𑐹𑐰𑑄𑐎𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐥𑑂𑐬𑐵. 𑐜𑐵. 𑐎𑑂𑐬𑐶𑐳𑑂𑐚𑑀𑐦 𑐊𑐩𑐬𑐶𑐎𑑄 𑐳𑐎𑐳𑐶𑐟𑑄 𑐮𑐳𑐎𑐸𑐳 𑐫𑐵𑐣𑐵𑐡𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐄𑐥𑐣𑑂𑐫𑐵𑐳 𑐰𑐵𑐔𑐣 𑐫𑐵𑐎𑐾 𑐏𑑄𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐮𑐶𑐳𑐾𑑄 𑐰𑐫𑑂𑐎𑐮𑑄 𑐄𑐥𑐣𑑂𑐫𑐵𑐳 𑐳𑐩𑐐𑑂𑐬 𑐬𑐸𑐥𑐫𑑂 𑐳𑐱𑐎𑑂𑐟 𑐖𑐹𑐐𑐸 𑐰𑐶𑐔𑐵𑑅 𑐟𑐫𑐵𑐡𑐶𑐳𑐾𑑄 𑐰𑐵𑐔𑐣 𑐫𑐵𑐣𑐵𑐡𑐷𑐐𑐸𑐮𑐶𑑄 𑐔𑑂𑐰𑐩𑐶 𑐱𑑂𑐬𑐾𑐲𑑂𑐛𑐥𑑂𑐬𑐟𑐶 𑐁𑐨𑐵𑐬 𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋 𑐄𑐐𑐸 𑐂𑐮𑐫𑑂 𑐰𑐶𑐨𑐵𑐐𑐷𑐫 𑐥𑑂𑐬𑐩𑐸𑐏 𑐊𑐩𑐬𑐶𑐎𑑄 𑐳𑐴𑐨𑐵𑐐𑐶𑐟𑐫𑑂 𑐖𑐶𑐖𑑂𑐘𑐵𑐳𑐵 𑐰 𑐮𑐶𑐳𑑅𑐫𑐵𑐟 𑐀𑐣𑐸𑐰𑐵𑐡 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑑅 𑐣𑑄 𑐠𑑅𑐐𑐸 𑐡𑐾𑐫𑑂𑐫𑐵 𑐮𑐎𑐳, 𑐳𑐩𑐳𑐵𑐩𑐫𑐶𑐎𑐟𑐵, 𑐣𑐾𑐰𑐵𑑅 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐠𑐵𑐫𑑂𑐧𑐵𑐫𑑂𑐫𑐵 𑐰𑐶𑐱𑐾𑐲𑐟𑐵𑐫𑐵𑐟 𑐎𑑅𑐑𑐵𑐣𑐵𑑅 𑐄𑐥𑐣𑑂𑐫𑐵𑐳 𑐔𑑂𑐰𑐫𑐵𑐡𑐷𑐐𑐸𑐮𑐶𑑄 𑐳𑐴𑐨𑐵𑐐𑐶𑐟𑐫𑑂𑐳𑑄 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾 𑐫𑐵𑐎𑐣𑑄 𑐩𑐾𑐐𑐸 𑐎𑐺𑐟𑐶 𑐥𑐶𑐠𑐣𑐾 𑐦𑐫𑐾𑐩𑐵 𑐢𑐎𑐵𑑅 𑐨𑐶𑑄𑐟𑐸𑐣𑐵 𑐣𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬𑐮𑐶𑐳𑐾𑑄 𑐩𑐵𑐣𑐰𑐱𑐵𑐳𑑂𑐟𑑂𑐬𑐷 𑐜𑐵. 𑐧𑐵𑐮𑐐𑑀𑐥𑐵𑐮 𑐱𑑂𑐬𑐾𑐲𑑂𑐛, 𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐰𑐵𑑅 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐧𑐵𑐬𑐾 𑐰𑐶𑐡𑑂𑐫𑐵𑐰𑐵𑐬𑐶𑐢𑐷 𑐫𑐵𑐣𑐵 𑐔𑑂𑐰𑐣𑐵𑐡𑐷𑐩𑑂𑐴 𑐂𑐫𑐵𑐣 𑐚𑐬𑑂𑐣𑐬, 𑐜𑐵. 𑐀𑐮𑐵𑐣𑐵 𑐳𑑁𑐖𑐵 𑐮𑐐𑐵𑐫𑐟𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋