𑐖𑐶𑑄 𑐎𑐫𑐵𑐐𑐸 𑐧𑐵𑐏𑑄𑐥𑐵𑑅

𑐥𑑂𑐬𑐟𑐶𑐳𑐬𑐵 𑐳𑐵𑐫𑑂𑐩𑐶

𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐱𑐣 𑐀𑐦 𑐀𑐩𑐾𑐬𑐶𑐎𑐵, 𑐫𑐹.𑐊𑐳.𑐊. 𑐔𑑂𑐫𑐵𑐥𑑂𑐚𑐬𑐫𑐵 𑐐𑑂𑐰𑐳𑐵𑐮𑐫𑑂 𑐎𑑀𑐨𑐶𑐜-𑑑𑑙 𑐫𑐵 𑐐𑑂𑐫𑐵𑑅𑐔𑐶𑐎𑐸𑑄 𑐡𑐶𑐎𑑂𑐎 𑐖𑐸𑐫𑐵𑑅, 𑐩𑑂𑐴𑐵𑐂𑐥𑐸𑐎𑑂𑐎 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐧𑐵𑐏𑑄 𑐔𑑂𑐰𑐩𑐶 𑐩𑐫𑐖𑐸𑐥𑐶𑑄𑐟 𑐧𑐵𑐏𑑄 𑐔𑑂𑐰𑐫𑐵𑑅 𑐣𑑂𑐫𑑄𑐎𑐾𑐐𑐸 𑐖𑑂𑐫𑐵𑐫𑑂 𑐟𑐎𑑂𑐫𑑄𑐎𑐵 𑐧𑐶𑐮 𑑋 𑐣𑑀𑐨𑐾𑐩𑑂𑐧𑐬 𑐩𑐴𑐶𑐣𑐵𑐫𑑂 𑐖𑐹𑐐𑐸 𑐖𑐹𑐩 𑐀𑐣𑐮𑐵𑐂𑐣 𑐣𑐾𑐥𑐵𑐮𑐨𑐵𑐲𑐵𑐫𑐵 𑐎𑐰𑐶 𑐐𑑀𑐲𑑂𑐛𑐷 𑐳𑑂𑐰𑐫𑐵𑑅 𑐟𑐳𑐎𑑄 𑐧𑐵𑑄𑐮𑐵𑐎 𑐰𑐶𑐡𑑂𑐫𑐸𑐟𑐷𑐫 𑐥𑑂𑐬𑐰𑐶𑐢𑐶𑑄 𑐳𑑂𑐰𑑄𑐐𑐹 𑐥𑐸𑐔𑑅 𑐫𑐵𑐣𑐵𑑅 𑐳𑑂𑐰𑐰𑐵𑑅 𑐟𑐎 𑐎𑐠𑐴𑑄 𑐳𑑂𑐰𑐎𑑅 𑐫𑐵𑐣𑐵𑑅 𑐧𑐵𑐏𑑄 𑐩𑐸𑑃𑐖𑑂𑐫𑐵 𑐣𑑂𑐴𑑂𑐫𑐵𑐟𑑋 𑐣𑑂𑐫𑑃𑐩𑐶𑐥𑐶𑐣𑑂𑐟 𑐮𑐵 𑐰𑐵𑑅𑐥𑐟𑐶𑑄 𑐣𑐏𑑅 𑐰𑑅𑐠𑐾𑑄 𑐣𑑂𑐴𑑂𑐫𑐂𑐥𑐸𑐎 𑐧𑐵𑐏𑑄 𑐣𑑂𑐫𑐣𑐾𑐡𑐸𑐐𑐸𑐮𑐶𑑄 𑐣𑑂𑐴𑑂𑐫𑐂𑐥𑐸𑐮 𑑋

𑐐𑑂𑐰𑐳𑐵𑑅 𑐏𑐮𑑅𑐫𑐵 𑐴𑐣𑐾𑐧𑐴𑑅𑐥𑐶𑑄 𑐨𑐵𑐖𑐸𑐥𑐶𑑄 𑐎𑐾𑐱𑐬𑐩𑐵𑐣 𑐟𑐵𑐩𑑂𑐬𑐵𑐎𑐵𑐬, 𑐥𑑂𑐬𑐩𑐾𑐱 𑐱𑑂𑐬𑐾𑐲𑑂𑐛, 𑐰𑐵𑐳𑐰 𑐖𑐸𑐖𑐸 𑐬𑐵𑐖𑑀𑐥𑐵𑐢𑑂𑐫𑐵𑐫 𑐣𑐵𑐥𑑄 𑐳𑐎𑐮 𑐡𑐸𑐖𑑅𑐥𑐶𑐣𑐶𑐐𑐸 𑐎𑐸𑐟𑐮𑐫𑑂 𑑑𑑗 𑐩𑑂𑐴 𑐴𑐣𑐾𑐧𑐴𑑅𑐥𑐶𑑄 𑐧𑐵𑐏𑑄 𑐔𑑂𑐰𑐩𑐶 𑐩𑐫𑑂𑐖𑐸𑐥𑐶𑑄𑐳𑑄 𑐧𑐵𑐏𑑄 𑐡𑐸𑐠𑑂𑐫𑐵𑐎𑐵𑐡𑐶𑐮 𑑋 𑐰𑐫𑑂𑐎𑑅𑐥𑐶𑐣𑐶 𑐣𑐵𑑄 𑐢𑐮𑑅 𑐠𑐸𑐎𑐠𑑄 𑐖𑐸𑐮 – 𑑑) 𑐬𑐷𑐣𑐵 𑐟𑐸𑐮𑐵𑐢𑐬, 𑑒) 𑐮𑑀𑐔𑐣𑐟𑐵𑐬𑐵 𑐟𑐸𑐮𑐵𑐢𑐬, 𑑓) 𑐣𑐶𑐖𑐶𑐬𑑀𑐳 𑐱𑑂𑐬𑐾𑐲𑑂𑐛, 𑑔) 𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, 𑑕) 𑐬𑐷𑐟𑐵 𑐩𑐴𑐬𑑂𑐖𑐣𑐥𑐶𑑄𑐳𑑄 𑑒𑑓 𑐩𑐾 𑑒𑑐𑑒𑑐 𑐎𑐸𑐣𑑂𑐴𑐸, 𑑖) 𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, 𑑗) 𑐬𑐷𑐟𑐵 𑐥𑑂𑐬𑐢𑐵𑐣 𑐖𑑀𑐱𑐷, 𑑘) 𑐃𑐱𑑂𑐰𑐬𑐷𑐩𑐿𑑃𑐫𑐵 𑐱𑑂𑐬𑐾𑐲𑑂𑐛, 𑑙) 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛, 𑑑𑑐) 𑐳𑐬𑐳𑑂𑐰𑐟𑐷 𑐟𑐸𑐮𑐵𑐢𑐬, 𑑑𑑑) 𑐬𑐾𑐞𑐸 𑐱𑑂𑐬𑐾𑐲𑑂𑐛𑐥𑐶𑑄𑐳𑑄 𑑓𑑐 𑐩𑐾 𑑒𑑐𑑒𑑐 𑐎𑐸𑐣𑑂𑐴𑐸 𑐰 𑑑𑑒) 𑐥𑑂𑐬𑐩𑐶𑐮𑐵 𑐳𑐵𑐫𑑂𑐩𑐶, 𑑑𑑓) 𑐀𑐬𑑂𑐔𑐣𑐵 𑐱𑐵𑐎𑑂𑐫, 𑑑𑑔) 𑐳𑐸𑐣𑐶𑐟𑐵 𑐩𑐴𑐬𑑂𑐖𑐣, 𑑑𑑕) 𑐩𑐣𑐡𑐾𑐰𑐷 𑐟𑐵𑐩𑑂𑐬𑐵𑐎𑐵𑐬,
𑑑𑑖) 𑐩𑑀𑐟𑐶𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, 𑑑𑑗) 𑐀𑐩𑐶𑐬𑐩𑐿𑑃𑐫𑐵 𑐬𑑄𑐖𑐶𑐟𑐥𑐶𑑄𑐳𑑄 𑑖 𑐖𑐹𑐣 𑑒𑑐𑑒𑑐 𑐎𑐸𑐣𑑂𑐴𑐸𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐫𑐵𑐡𑐶𑐮 𑑋

𑐳𑑂𑐰𑑄𑐐𑐹 𑐧𑑂𑐰𑐫𑑂 𑐧𑑂𑐰𑐠𑐮𑐵𑑅 𑐣𑑂𑐴𑑂𑐫𑐧𑑂𑐰𑐫𑐾𑐖𑑂𑐫𑐵 𑐖𑐹𑐐𑐸 𑐄𑐐𑐸 𑐧𑐵𑐏𑑄 𑐧𑑂𑐰𑐣𑐾 𑐖𑑂𑐫𑐵𑐗𑑂𑐰𑑅𑐫𑐵𑐟 𑐳𑑂𑐰𑐩𑑂𑐴 𑐳𑐩𑐷𑐎𑑂𑐲𑐎𑐖𑐸𑐥𑐶𑑄 𑐣𑐰𑐷𑐣 𑐔𑐶𑐟𑑂𑐬𑐎𑐵𑐬, 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬 𑐰 𑐥𑑂𑐬𑐵.𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑐥𑐶𑐣𑑂𑐟 𑐳𑐩𑐷𑐎𑑂𑐲𑐵 𑐫𑐵𑐫𑐾𑐐𑐸 𑐨𑐵𑐮𑐵 𑐧𑐶𑐄𑐐𑐸 𑐖𑐸𑐮 𑑋

𑐳𑐩𑐷𑐎𑑂𑐲𑐎 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑐫𑐵 𑐨𑐵𑐳𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐣𑐾𑐥𑐵𑐮𑐨𑐵𑐲𑐵 𑐧𑐵𑐏𑑄 𑐏𑑂𑐫𑑅𑐫𑐵 𑐰𑐫𑑂𑐎𑑅𑐥𑐶𑑄 𑑑𑑗 𑐐𑑅 𑐣𑐐𑐸 𑐏𑑅 𑑋 𑐢𑐵𑐟𑑂𑐠𑐾𑑄 𑐰𑐫𑑂𑐎𑑅𑐥𑐶𑐣𑐶𑐐𑐸 𑐧𑐵𑐏𑑄 𑐣𑑂𑐫𑐣𑐾 𑐢𑐸𑑄𑐎𑐵𑑅 𑐖𑐶𑐟𑑅 𑐎𑑂𑐰𑐫𑑂 𑐣𑑂𑐴𑑂𑐫𑐠𑐣𑐵𑐠𑐾𑑄 𑐧𑐵𑐏𑑄𑐥𑐵𑑅 𑐮𑐸𑐂𑐎𑐵 𑐎𑐫𑐵 𑑋

𑐧𑐵𑐏𑑄𑐫𑐵 𑐏𑑃𑐔𑐸 :
𑐩𑐫𑐖𑐸𑐥𑐶𑑄 𑐜𑐵. 𑐬𑐷𑐣𑐵 𑐟𑐸𑐮𑐵𑐢𑐬 𑐰 𑐩𑐫𑑂𑐖𑐸 𑐳𑐸𑐣𑐶𑐟𑐵 𑐩𑐴𑐬𑑂𑐖𑐣𑐥𑐶𑐳𑑄 𑐳𑐩𑐵𑐖𑐫𑑂 𑐩𑐶𑐖𑑄𑐥𑐶𑐣𑐶𑐐𑐸 𑐳𑐩𑐳𑑂𑐫𑐵𑐫𑑂 𑐰𑐎𑐵𑐮𑐟 𑐫𑐵𑐣𑐵𑐡𑐶𑐮 𑑋 𑐬𑐷𑐣𑐵𑐖𑐸𑑄 𑐠𑑅 𑐎𑐮𑐵𑑅𑐥𑐵𑐏𑐾𑑄 𑐥𑐷𑐜𑐶𑐟𑐩𑑂𑐴 𑐩𑐶𑐖𑐣𑑄 𑐥𑐵𑐬𑐥𑐵𑐔𑐸𑐎𑐾 𑐠𑑂𑐫𑑄𑐎𑐫𑐵 𑐏𑑃𑐔𑐸𑐂 𑐎𑐾𑐣𑑂𑐡𑑂𑐬𑐶𑐟 𑐧𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 𑑋

𑐩𑐾𑐏𑐾 𑐠𑑁𑑄𑐎𑐣𑑂𑐴𑐫𑑂𑐫𑐵 𑐰𑐶𑐎𑐬𑐵𑐮 𑐳𑐩𑐳𑑂𑐫𑐵 𑐢𑑂𑐫𑐧𑐵𑐫𑐵 𑐳𑐶𑐩𑐵 𑐴𑐾 𑐳𑐂𑐐𑐸 𑐠𑐵𑐫𑑂 𑐏𑑅𑐮𑐵 𑐢𑐂𑐠𑐾𑑄 𑐀𑐩𑐾𑐬𑐶𑐎𑐵, 𑐀𑐲𑑂𑐚𑑂𑐬𑐾𑐮𑐶𑐫𑐵 𑐰𑐣𑐾𑐐𑐸 𑐦𑐾𑐳𑐣𑐫𑐵𑐟 𑐎𑐫𑐵𑑅 𑐩𑐫𑐖𑐸 𑐳𑐸𑐣𑐶𑐟𑐵 𑐩𑐴𑐬𑑂𑐖𑐣𑑄 𑐰𑐣𑐾 𑐖𑐎 𑐡𑐟 𑐢𑐵𑑅𑐳𑐵 𑐩𑐶𑐖𑑄𑐟𑐫𑑂𑐟 𑐳𑑂𑐰𑐵𑐴𑐵𑐣𑐾𑐫𑐵 𑐮𑑂𑐫𑐵𑐏𑐫𑑂 𑐕𑑂𑐫𑑅𑐐𑐸 𑐣𑑂𑐴𑐹𑐐𑐸 𑐰𑐶𑐲𑐫 𑐣𑑄 𑐣𑑂𑐫𑐣𑐾 𑐡𑐟𑑋 𑐩𑐫𑑂𑐖𑐸𑐥𑐶𑑄 𑐮𑑀𑐔𑐣𑐟𑐵𑐬𑐵, 𑐩𑐣𑐡𑐾𑐰𑐷𑐥𑐶𑐣𑐶𑐐𑐸 𑐧𑐵𑐏𑐣𑐫𑑂 𑐢𑐵𑑅𑐳𑐵 𑐩𑐶𑐳𑐵𑐥𑐶𑑄𑐟
𑐣𑑄 𑐳𑐩𑐵𑐣 𑐖𑑂𑐫𑐵𑐫𑐵𑐟 𑐳𑐩𑐵𑐣 𑐖𑑂𑐫𑐵𑐮𑐵 𑐡𑐫𑐾 𑐴𑐾 𑐩𑐵𑑅 𑐢𑐂𑐐𑐸 𑐳𑑅 𑐟𑐵𑐫𑐾 𑐡𑐟 𑑋

𑐀𑐠𑐾𑐴𑐾 ‘𑐰𑐮 𑐩𑐏𑐸𑐮𑐵 𑐀𑐩𑐾𑐬𑐶𑐎𑐵’ 𑐢𑐎𑐵𑑅 𑐮𑐎𑐜𑐵𑐄𑐣𑑄 𑐫𑐵𑐣𑐵𑑅 𑐩𑐔𑐵 𑐧𑐸𑐂 𑐟𑑂𑐫𑐣𑑄 𑐣𑑄 𑐠𑑅𑐠𑐶𑐟𑐶 𑐳𑐸𑑄 𑐳𑑅𑐟𑐾 𑐩𑐖𑐶𑐄𑐐𑐸 𑐎𑑀𑐬𑑀𑐣𑐵𑐫𑐵 𑐰𑐶𑐎𑐬𑐵𑐮 𑐳𑐩𑐳𑑂𑐫𑐵𑐫𑑂 𑐟𑐎𑑂𑐫𑑄𑐥𑐶𑑄 𑐟𑑂𑐫𑐥𑐹𑐥𑐶𑐣𑐶𑐐𑐸 𑐳𑐩𑐳𑑂𑐫𑐵 𑐩𑐫𑑂𑐖𑐸 𑐥𑑂𑐬𑐩𑐶𑐮𑐵 𑐳𑐵𑐫𑑂𑐩𑐶𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 𑑋

𑐂𑐮𑑄 𑐴𑑂𑐰𑐵𑑅𑐐𑐸 𑐏𑑃𑐔𑐸 𑐎𑑀𑐬𑑀𑐣𑐵𑐫𑐵𑐟 𑐎𑐫𑐵𑑅 𑐩𑐫𑐖𑐸𑐥𑐶𑑄 𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, 𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛, 𑐳𑐬𑐳𑑂𑐰𑐟𑐷 𑐟𑐸𑐮𑐵𑐢𑐬, 𑐃𑐱𑑂𑐰𑐬𑐷𑐩𑐿𑑃𑐫𑐵 𑐱𑑂𑐬𑐾𑐲𑑂𑐛, 𑐩𑐣𑐡𑐾𑐰𑐷 𑐟𑐵𑐩𑑂𑐬𑐵𑐎𑐵𑐬, 𑐥𑑂𑐬𑐩𑐶𑐮𑐵 𑐳𑐵𑐫𑑂𑐩𑐶 𑐰 𑐀𑐩𑐶𑐬𑐩𑐿𑑃𑐫𑐵 𑐬𑑄𑐖𑐶𑐟𑐥𑐶𑐳𑑄 𑐎𑐸𑐮𑐵𑐡𑐷𑐐𑐸 𑐣𑑂𑐫𑐣𑐾 𑐏𑐣 𑑋

𑐩𑐫𑑂𑐖𑐸 𑐣𑐶𑐖𑐶𑐬𑑀𑐳𑑄 𑐕𑐐𑐹 𑐧𑐶𑐳𑑂𑐎𑑄 𑐰𑐶𑐲𑐫 𑐩𑐶𑐖𑑄𑐥𑐶𑑄 𑐠𑑅 𑐫𑐟𑑂𑐠𑐾𑑄 𑐫𑑅𑐫𑑅𑐠𑐾 𑐳𑐣𑐵 𑐖𑐸𑐂 𑐖𑐶𑐄 𑐢𑐵𑑅𑐳𑐵 𑐩𑐶𑐳𑐵𑐥𑐶𑑄𑐳𑑄 𑐖𑐎 𑐀𑐖𑑂𑐫𑐵𑑅𑐐𑐸 𑐳𑑂𑐰𑐟𑐣𑑂𑐟𑑂𑐬𑐟𑐵 𑐕𑐵𑐫𑑂 𑐎𑐵𑐫𑐾 𑐩𑐖𑐶𑐄 𑐢𑐎𑐵𑑅 𑐩𑐟𑐖𑐮𑐫𑑂 𑐠𑑅 𑐩𑐶𑐖𑑄𑐫𑐵𑐟 𑐂𑐟𑐶𑐩𑐶𑐟𑐶 𑐎𑑄𑐎 𑐎𑑂𑐫𑐣𑐵 𑐧𑐶𑐄𑐐𑐸 𑐣𑑂𑐫𑐣𑐾𑐡𑐟𑑋 𑐩𑐫𑑂𑐖𑐸 𑐬𑐷𑐟𑐵𑐡𑐾𑐰𑐷 𑐥𑑂𑐬𑐢𑐵𑐣 𑐖𑑀𑐱𑐷𑑄 𑐩𑐟𑐶𑐣𑐵𑐫𑐵 𑐠𑑅𑐐𑐸 𑐧𑐶𑐳𑑂𑐎𑑄 𑐥𑐴𑐫𑐵 𑐧𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 𑑋

𑐩𑐫𑑂𑐖𑐸 𑐩𑑀𑐟𑐶𑐮𑐎𑑂𑐲𑑂𑐩𑐷𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐧𑐵𑐏𑑄𑐔𑐸 𑐖𑑂𑐫𑐵𑐠𑐖𑐶𑐠𑐶 𑐖𑐸𑐫𑐵𑐰𑐮 𑐎𑐶 𑐩𑐣 𑐡𑐫𑐵𑑅 𑐣𑑄 𑐢𑐣 𑐩𑐡𑐫𑐵𑑅 𑐗𑐷𑐐𑐸 𑐳𑑄𑐳𑑂𑐎𑐵𑐬 𑐎𑐠𑑄 𑐡𑐵𑐣 𑐟𑐎𑑄 𑐫𑐵𑐫𑐾 𑐩𑐏𑑄𑐎𑐵𑐔𑑂𑐰𑑄𑐥𑐶𑑄 𑐗𑐷 𑐀𑐖𑐶𑐥𑐶𑐣𑐶𑐐𑐸 𑐡𑐸𑐣𑐸𑐐𑑅𑐫𑐵 𑐂𑐔𑑂𑐕𑐵 𑐥𑐹𑐰𑑄𑐎𑐵 𑐧𑐶𑐄𑐩𑑂𑐴 𑐕𑐫𑑂𑐩𑐔𑐵𑐫𑐵 𑐰𑐶𑐡𑑂𑐰𑐟𑐵 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋

𑐣𑑂𑐴𑑂𑐫𑐥𑐸 𑐰𑐵𑐂𑑃𑐫𑐵 𑐩𑐶𑐣𑐶𑐂𑐐𑐸 𑐎𑑂𑐮𑐵𑐂𑐩𑐾𑐎𑑂𑐳 :
𑐩𑐫𑐖𑐸 𑐬𑐾𑐞𑐸 𑐱𑑂𑐬𑐾𑐲𑑂𑐛𑐫𑐵 ‘𑐡𑐺𑐲𑑂𑐚𑐷𑐎𑑀𑐞’ 𑐧𑐵𑐏𑑄𑐫𑐵 𑐮𑐶𑐥𑐵𑑄𑐐𑐸 𑐧𑑂𑐰𑐫𑑂 𑐏𑑃 𑐴𑐾 𑐩𑐠𑐸𑐂𑐎 𑐳𑐩𑐵𑐖𑑄 𑐕𑐩𑑂𑐴 𑐩𑐫𑑂 𑐖𑐸𑐫𑐵𑐟 𑐧𑐶𑐄𑐐𑐸 𑐡𑑂𑐰𑐥𑑄 𑐰 𑐕𑑂𑐫𑑅𑐐𑐸 𑐏𑑃𑐐𑑂𑐰𑑅 ‘𑐣𑐎𑐔𑑂𑐔𑐬𑐷’ 𑐗𑐷 𑐳𑐎𑐳𑐶𑐟𑑄 𑐧𑐶𑐔𑐵𑑅 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐣𑐵 𑐧𑐶𑐄𑑋 𑐩𑐫𑐖𑐸 𑐣𑐶𑐖𑐶𑐬𑑀𑐳𑑄 ‘𑐩𑐟𑐖𑐮𑐫𑑂’ 𑐩𑐶𑐖𑑄𑐟 𑐳𑑂𑐰𑐔𑑂𑐕𑐣𑑂𑐡 𑐬𑐸𑐥𑑄 𑐨𑐩𑑂𑐧𑑅 𑐖𑐸𑐫𑐵𑑅 𑐧𑑂𑐰𑐫𑐵 𑐖𑐸𑐂 𑐖𑐶𑐄𑐳𑐵 𑐩𑐶𑐳𑐵𑐥𑐶𑑄 𑐖𑐎 𑐕𑐸 𑐎𑐩 𑐢𑐎𑐵𑑅 𑐎𑐮𑐵𑑅𑐩𑑂𑐴𑐾𑐳𑑂𑐫𑐵𑑄 𑐎𑐬𑐾𑐣𑑂𑐚𑑄 𑐖𑑂𑐰𑑄 𑐠𑐾𑑄 𑐔𑑂𑐰𑑄𑐎 𑐨𑐵𑑅𑐟𑐩𑑂𑐴𑐾𑐳𑐶𑐟 𑐔𑐟𑑂𑐟𑐵𑐰𑐵𑐎𑐵 𑐧𑐶𑐄𑐐𑐸 𑐔𑐶𑐟𑑂𑐬𑐞𑑄 𑐗𑐷𑐟 𑐕𑐗𑐵𑑅 𑐎𑐹 𑐣𑐎𑐵 𑐧𑐶𑐄 𑑋

𑐩𑐫𑐖𑐸 𑐡𑐶𑐧𑑂𑐫𑐵𑐫𑐵 𑐔𑐷𑐩𑐶𑐩𑑂𑐴 𑐥𑐵𑐟𑑂𑐬 𑐢𑐣𑐷𑐬𑐵𑐩𑑄 𑐠𑑅𑐐𑐸 𑐕𑐾𑑃𑐫𑑂 𑐠𑑂𑐫𑐣𑐷𑐠𑐾𑑄 𑐔𑑂𑐰𑑄𑐎𑐵𑑅 𑐟𑐫𑐵𑐟𑑅𑐐𑐸 𑐥𑑄𑐐𑑅 𑐏𑐣𑐾𑐰𑑄 𑐳𑐸𑐡𑑂𑐰𑑃𑐫𑑂 𑐳𑐮𑐵𑐃 𑐎𑐶𑐫𑐵𑑅 𑐰𑐵𑑄𑐕𑑂𑐰𑐫𑐵 𑐧𑐶𑐂𑐰𑑄 𑐴𑑂𑐰𑐵𑐣𑐵𑐎𑑂𑐎 𑐔𑑂𑐫𑐵𑑅𑐐𑐸 𑐰𑐫𑐵 𑐟𑐩𑑄 𑐥𑑂𑐫𑑄𑐎𑐹𑐐𑐸 𑐥𑐮𑐵𑐏𑑄 𑐧𑐵𑐏𑑄 𑐣𑑂𑐫𑐣𑐵𑐔𑑂𑐰𑑄𑐥𑐶𑐣𑑂𑐟 𑐣𑐫𑐾 𑐥𑐶𑐟𑑂𑐫𑐵𑑅𑐧𑐮𑐫𑑂 𑐮𑐸𑐢𑑄𑐎 𑐮𑑂𑐰𑐳𑐵𑐑𑐵𑐳𑐵 𑐟𑐫𑐵𑑅 𑐎𑑁𑐮𑐵 𑐫𑐵𑐎𑐾 𑐴𑑅𑐠𑐾𑑄 𑐔𑑂𑐰𑑄 𑑋

𑐁𑑅 𑐐𑐫𑑂 𑐖𑐸𑐂, 𑐐𑐠𑐾 𑐖𑐸𑐂, 𑐰𑑅𑐣𑑂𑐴𑐸𑐩𑐕𑐶 𑐧𑐶𑐎𑐵𑑅 𑐣𑑂𑐫𑐵𑐳𑐶 𑐰𑐣𑐵𑑅 𑐣𑑄 𑐕𑐾𑑃𑐫𑑂 𑐠𑑂𑐫𑑄𑐎𑐾 𑐦𑐂 𑐰𑐵 𑐩𑐦𑐂 𑐢𑐂𑐐𑐸 𑐐𑐸𑐐𑐸 𑐧𑑂𑐰𑑃𑐩𑐶𑐥𑐶𑐣𑐶 𑐣𑐸𑐐𑑅𑐫𑐵 𑐎𑑁𑐟𑐸𑐴𑐮𑐟𑐵 𑐏𑑅 𑐰 𑐢𑐣𑐷𑐬𑐵𑐩𑑄 𑐟𑐵𑐬𑐫𑐵 𑐧𑐵𑐬𑐫𑐵𑐟 𑐥𑑂𑐫𑑄𑐎𑐹𑐐𑐸 𑐮𑐵𑐎𑐩𑑄 𑐧𑑂𑐰𑑃𑐩𑐶𑐥𑐶𑐣𑑂𑐟 𑐮𑐸𑐢𑑄𑐎𑐵 𑐧𑐶𑐄𑐐𑐸 𑐡𑐸 𑑋

𑐀𑐠𑐾𑐴𑐾, 𑐩𑐫𑑂𑐖𑐸 𑐩𑐣𑐡𑐾𑐰𑐷𑐫𑐵 𑐨𑐸𑐫𑐹𑐔𑐵 𑐰 𑐔𑐶𑐬𑐶𑐩𑐿𑑃 𑐣𑐶𑐩𑑂𑐴𑑄 𑐮𑐎𑐜𑐵𑐄𑐣𑐫𑐵 𑐂𑐮𑐫𑑂 𑐫𑐾𑑃𑐣𑐶𑐳𑐾𑑄 𑐐𑑀𑐡𑐵𑐰𑐬𑐷 𑐠𑑂𑐫𑑄𑐎 𑐣𑑂𑐫𑐵𑐳𑐶 𑐰𑐣𑐵𑑅 𑐣𑑄 𑐛𑐾𑐎𑐾𑐡𑐵𑐬 𑐩𑑀𑐚𑐬𑐳𑐵𑐂𑐎𑐮 𑐐𑐫𑐾𑐟 𑐛𑐶𑐎𑑂𑐎 𑐖𑐸𑐫𑐵𑐔𑑂𑐰𑑄𑐧𑐮𑐫𑑂 𑐂𑐩𑐶𑐐𑐸 𑐖𑑂𑐫𑐵𑐮𑐵 𑐎𑐵𑐫𑐾 𑐏𑐣𑐷𑐮𑐵 𑐩𑐏𑐣𑐷𑐮𑐵 𑐰𑐵 𑐩𑐏𑑄𑐕𑐸 𑐫𑐵𑐣𑐵𑑅 𑐎𑐸𑐂𑑃𑐔 𑐖𑐸𑐂𑐎 𑐧𑐶𑐳𑐶𑐄𑑃 𑐖𑐎𑑄 𑐰𑐣𑐷𑐐𑐸 𑐏𑑅𑐮𑐵 𑐢𑐂𑐠𑐾𑑄 𑐣𑐸𑐐𑑅 𑐎𑐫𑑂𑐎𑐫𑑂𑐔𑑂𑐫𑐵𑐎𑐵 𑐧𑐶𑐄𑑋 𑐄𑐎𑐶𑐳𑐣𑑄 𑐂𑐥𑐶𑑄 𑐣𑐶𑐩𑑂𑐴𑐾𑐳𑐶𑐟 𑐣𑐶𑐐𑐹 𑐴𑐾 𑐨𑐵𑐰𑑄 𑐩𑑂𑐫𑐾𑐫𑑂 𑐩𑐶𑐏𑐵𑑄 𑐳𑑂𑐰𑐫𑐵𑑅 𑐟𑐩𑑄𑐟𑐩𑑄 𑐧𑐶𑐄𑐐𑐸 𑐖𑑂𑐫𑐵𑐮𑐵𑑄 𑐴𑐶𑐳𑑂𑐳 𑐖𑐹𑐩𑑂𑐴 𑐔𑐶𑐬𑐶𑐩𑐿𑑃𑐔𑐶𑐫𑐵 𑐩𑐶 𑐔𑑂𑐫𑐵𑑅𑐐𑐸 𑐏𑑂𑐰𑐵𑑅 𑐐𑐠𑐾 𑐔𑑂𑐰𑐣 𑐖𑐸𑐂 𑐗𑐷𑐟 𑐧𑐶𑐔𑐵𑑅𑐫𑐵 𑐥𑐸𑐏𑐸𑐮𑐷 𑐮𑐵𑐮 𑐎𑐵𑐫𑐾𑐎𑑅 𑐕𑑂𑐰𑐫𑐾𑐟 𑐔𑑂𑐰𑐩𑐶 𑐟𑐵𑑅𑐮𑐵𑑅𑐐𑐸 𑐡𑐸 𑑋

𑐥𑐵𑐮𑑂𑐥𑐵𑐫𑐵 𑐳𑑄𑐔𑐵𑐬𑐎𑑅𑐩𑐶 𑐩𑐫𑑂𑐖𑐸 𑐀𑐬𑑂𑐔𑐣𑐵 𑐱𑐵𑐎𑑂𑐫𑐫𑐵 𑐧𑐵𑐏𑑄𑐫𑐵 𑐖𑑂𑐫𑐵𑐠𑑅𑐩𑑂𑐴 𑐥𑐵𑐟𑑂𑐬 𑐧𑐵𑐖𑑂𑐫𑐵𑑄 𑐩𑐫𑑂𑐖𑐸𑐫𑐵𑐟 𑐄𑐩𑐾𑐬 𑐨𑐔𑐵 𑐩𑐐𑐵𑐟 𑐎𑐵 𑐴𑐮𑐵 𑐢𑐂𑐐𑐸 𑐮𑐶𑐳𑐮𑑄 𑐠𑐵𑐬𑐵𑐣𑑂𑐴𑐹𑐩𑑂𑐴 𑐔𑑂𑐰𑐩𑐶𑐫𑐵 𑐨𑐵𑐰𑑄 𑐗𑐷𑐟 𑐣𑑄 𑐕𑐗𑐵𑑅 𑐎𑐬𑐾𑐣𑑂𑐚𑑄 𑐖𑑂𑐰𑑄𑐎𑐵 𑐧𑐶𑐄 𑑋 𑐖𑑂𑐫𑐵𑐠𑑅𑐐𑐸 𑐰𑐿𑑃𑐳𑐫𑑂 𑐎𑐮𑐵𑑅 𑐩𑐡𑐫𑐾𑐎𑐵𑑅 𑐔𑑂𑐰𑐣𑐾𑐩𑐵𑑅𑐥𑐶𑑄 𑐖𑑂𑐫𑐵𑐠𑐥𑐶𑐣𑐶𑐐𑐸 𑐫𑑁𑐣 𑐩𑐣𑑀𑐰𑐶𑐖𑑂𑐘𑐵𑐣, 𑐩𑐔𑐵𑐏𑐵𑐔𑐵𑑄 𑐔𑐶𑐄𑐟𑐵𑑅 𑐩𑐟𑐂𑐐𑐸 𑐠𑑁𑑄𑐫𑐵 𑐦𑐫𑑂 𑐰 𑐕𑐾𑑃𑐖𑑂𑐫𑐵𑐫𑐵 𑐣𑐶𑑄𑐟𑐶𑑄 𑐎𑐮𑐵𑑅𑐫𑐵 𑐁𑐰𑐱𑑂𑐫𑐎𑐟𑐵𑐫𑐵 𑐄𑐟𑑂𑐎𑐺𑐲𑑂𑐚 𑐀𑐨𑐶𑐮𑐵𑐲𑐵𑑄 𑐗𑐷𑐐𑐸 𑐣𑑂𑐴𑑂𑐫𑐥𑐸 𑐴𑐾 𑐰𑐵𑐬𑐵𑐎𑑂𑐰𑐵𑐬𑐵 𑐫𑐵𑐣𑐵 𑐧𑐶𑐄 𑑋 𑐩𑐫𑑂𑐖𑐸 𑐳𑐬𑐳𑑂𑐰𑐟𑐷 𑐟𑐸𑐮𑐵𑐢𑐬𑐫𑐵 ‘𑐕𑐥𑑂𑐫𑐾 𑐖𑐵’ 𑐣𑐫𑐾𑐟 𑐥𑐶𑐟𑑂𑐫𑐵𑑅𑐐𑐸 𑐩𑑂𑐴𑐸𑐟𑐸𑐔𑐵𑐟𑐫𑑂 𑐖𑐵 𑐣𑐫𑐾 𑐡𑐂𑐣 𑐢𑐎𑐵𑑅 𑐖𑐵𑐎𑐶 𑐴𑐵𑐫𑐵𑑅 𑐳𑑂𑐰𑑅𑐧𑐮𑐫𑑂 𑐢𑑂𑐰𑐐𑑂𑐐𑐷𑐐𑐸 𑐖𑐵𑐎𑐶 𑐂𑐣𑐵𑑅 𑐬𑐵𑐴𑐟 𑐧𑐶𑐄𑐩𑑂𑐴 𑐳𑐩𑐵𑐖𑐳𑐾𑐰𑐷𑐫𑐵𑐟 𑐮𑐵𑐦𑑅 𑐥𑐶𑐄 𑐰𑐣𑐾 𑐩𑐵𑐳𑑂𑐟𑐶 𑐰𑐫𑐾𑐎𑐾𑐟 𑐰𑐫𑑂𑐎𑑅 𑐟𑐵𑑅𑐮𑐵𑑅 𑑋 𑐩𑐫𑐖𑐸 𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬𑐫𑐵 𑐧𑐵𑐏𑑄𑐫𑐵 𑐥𑐵𑐟𑑂𑐬𑐟𑐳𑐾𑑄 𑐡𑑂𑐫𑑅𑐎𑐸𑐠𑐶𑐂 𑐔𑑂𑐰𑑄𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐱𑐎𑑂𑐟𑐶𑐫𑐵 𑐥𑑂𑐬𑐟𑐷𑐎 𑐏𑐜𑑂𑐐 𑐖𑑂𑐰𑐣𑐵𑑅 𑐴𑐹𑐮𑐫𑑂 𑐖𑐵𑑅𑐰𑐣𑐷𑐐𑐸 𑐮𑐸 𑐣𑑄 𑐮𑐸𑐩𑑄𑐎𑐾𑐧𑐴𑑅 𑐖𑐹 𑑋 𑐩𑐫𑑂𑐖𑐸 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛𑐫𑐵 ‘𑐎𑑀𑐬𑑀𑐣𑐵𑑄 𑐡𑐫𑐾𑐎𑐹𑐩𑑂𑐴 𑐱𑐴𑐷𑐡’ 𑐫𑐵 𑐖𑑂𑐫𑐵𑐠𑐩𑑂𑐴 𑐮𑑂𑐰𑐐𑐶𑐫𑐵 𑐳𑐩𑐬𑑂𑐥𑐞𑑄 𑐠𑑅 𑐳𑐶𑐣𑐵𑑅 𑐣𑑄 𑐩𑐾𑐥𑐶𑐣𑑂𑐟 𑐩𑑂𑐰𑐵𑐎𑐾 𑐢𑐂𑐐𑐸 𑐩𑐵𑐣𑐰𑐷𑐫 𑐢𑐬𑑂𑐩 𑐡𑐸𑐥𑐶𑑄 𑐴𑐮𑐶𑐩𑐫𑑂 𑐀𑐗𑑄 𑐡𑐣𑐶 𑐢𑐂𑐐𑐸 𑐏𑑃 𑐎𑑂𑐫𑐣𑐵 𑐧𑐶𑐄𑐐𑐸 𑐡𑐸𑑋 𑐩𑐫𑑂𑐖𑐸 𑐳𑐸𑐣𑐶𑐟𑐵 𑐩𑐴𑐬𑑂𑐖𑐣𑐫𑐵 ‘𑐗𑑂𑐰𑐵𑑅 𑐖𑐹𑐐𑐸 𑐕𑐦𑑂𑐰𑑅 𑐳𑑂𑐰𑐵𑑄’ 𑐫𑐵 𑐩𑐶𑐖𑑄 𑐥𑐵𑐟𑑂𑐬𑐫𑐵𑐟 𑐀𑐩𑐾𑐬𑐶𑐎𑐵 𑐰𑐣𑐾𑐟 𑐳𑑂𑐰𑐵𑐴𑐵𑐣𑐾 𑐖𑐎 𑐫𑐵𑐣𑐵𑑅 𑐣𑑂𑐴𑑂𑐫𑐂𑐥𑐸𑐎 𑐣𑐫𑐾-𑐟𑑂𑐰𑐣𑐾-𑐔𑑂𑐰𑐣𑐾 𑐫𑐵𑐟𑑋 𑐩𑐾𑐩𑑂𑐴 𑐩𑐣𑐹𑐥𑐵𑐏𑐾 𑐣𑐸𑐐𑑅 𑐎𑑂𑐰𑐳𑐵𑐫𑐾𑐎𑐮 𑐢𑐎𑐵𑑅 𑐩𑐶𑐖𑐣𑑄 𑐟𑑄𑐫𑐵 𑐗𑑀𑑄𑐎𑐫𑑂 𑐗𑐵𑐟𑐵𑐥𑐵𑐟𑐵 𑐫𑐵𑐟 𑐢𑐎𑐵𑑅 𑐩𑐶𑐳𑐵𑑄 𑐧𑐮𑐵𑐟𑑂𑐎𑐵𑐬𑐫𑐵 𑐡𑑂𑐰𑐥𑐣𑐫𑑂 𑐖𑐾𑐮𑐫𑑂 𑐟𑐫𑐵 𑐧𑐷𑐰𑑄 𑐀𑐣 𑐴𑐾 𑐁𑐟𑑂𑐩𑐴𑐟𑑂𑐫𑐵 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐣𑐵 𑐧𑐶𑐮 𑑋

𑐏𑑃𑐟𑑂𑐰𑐵𑑅 𑐏𑑃𑐨𑐵𑐫𑑂𑐫𑐵 𑐕𑑂𑐫𑐮𑐵 :
– 𑐳𑑂𑐰𑑅𑐐𑐸 𑐳𑐸𑐎𑐵 𑐥𑑂𑐰𑐵𑑃𑐔𑐫𑑂 𑐔𑑂𑐰𑑅 𑐮𑐸𑐂𑐎𑐾 𑐩𑐦𑐸𑐟 (𑐜𑐵.𑐬𑐷𑐣𑐵 𑐟𑐸𑐮𑐵𑐢𑐬, ‘𑐰𑐫𑐵𑐐𑐸 𑐣𑐵𑐬𑐵 𑐐𑐧𑐮𑐾 𑐠𑑂𑐰𑐂’)
– 𑐥𑐬𑑂𑐳𑐶 𑐳𑑂𑐫𑐹𑐩𑑂𑐴𑐾𑐳𑑂𑐫𑐵𑑄 𑐐𑑄 𑐠𑐵𑐣𑐵𑑅 𑐢𑐮𑑄 𑐡𑑄𑐎𑐾𑐐𑐸 (𑐮𑑀𑐔𑐣𑐟𑐵𑐬𑐵 𑐟𑐸𑐮𑐵𑐢𑐬, ‘𑐣𑑂𑐴𑑂𑐫𑐳𑑅𑐔𑐶𑑄’)
– 𑐥𑐵𑐎𑑅 𑐏𑑂𑐰𑐵𑑅𑐥𑐵𑐮𑑄 𑐥𑐸𑐫𑐵𑑅 𑐳𑑂𑐰𑐎𑑅 𑐎𑑁𑐮𑐵 𑐫𑐵𑐫𑐾 𑐳𑑅𑐥𑐶𑑄 𑐗𑐷 𑐩𑐏𑐸
– 𑐟𑑄𑐥𑑂𑐰𑑅 𑐡𑐎𑑂𑐰𑑄 𑐠𑑅𑐎𑐾, 𑐢𑐣𑐥𑑂𑐰𑑅 𑐡𑐎𑑂𑐰𑑄 𑐎𑐬𑑂𑐎𑐶𑐫𑐵𑐎𑐾 (𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, ‘𑐥𑐶𑐟𑑂𑐫𑐵𑑅𑐫𑐵 𑐥𑐮𑐵𑑅’)
– 𑐩𑐣𑐫𑑂 𑐏𑑃, 𑐎𑐵 𑐳𑑂𑐰𑑅𑐠𑐾𑑄 𑐳𑑂𑐰𑐟𑑂𑐟𑐸 𑐳𑑂𑐰𑐫𑐾𑐎𑐵𑑅
– 𑐔𑐵𑑅𑐐𑐸 𑐴𑐶𑐟𑐶𑐠𑐾𑑄 𑐏𑑃 𑐧𑐵𑑅 𑐰𑐮 (𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, ‘𑐎𑐶𑐳𑐶 𑐡𑑂𑐰𑐩𑑂𑐧𑑅’)
– 𑐎𑐷𑐐𑑅 𑐟𑐶𑐣𑐾𑐮𑐵, 𑐥𑐸𑐂𑑃 𑐴𑐵𑐫𑐾 𑐮𑐵 ?
– 𑐴𑐶𑑄 𑐣 𑐴𑐮𑐹 𑐖𑐸𑐂𑐎, 𑐥𑑂𑐫𑐵𑑅𑐔𑐵𑑅𑐩𑑂𑐴𑐾𑐳𑐶𑐟 𑐔𑐩𑑂𑐔𑐵𑑄 𑐮𑑅 𑐟𑑂𑐰𑑄𑐎𑐾 𑐠𑐾𑑄
– 𑐳𑐶𑐣𑑂𑐴𑐵𑐖𑑂𑐫𑐵𑐫𑐵 𑐟𑑂𑐰𑐵𑐟𑐶 𑐴𑐵𑑅𑐠𑐾𑑄
– 𑐡𑑂𑐰𑐎𑐫𑑂 𑐮𑑅 𑐥𑑂𑐰𑑄𑐎𑐾 𑐠𑐾𑑄
– 𑐩𑑂𑐫𑐾𑐫𑑂 𑐩𑐶𑐏𑐵𑑄 𑐳𑑂𑐰𑐫𑐵𑑅
– 𑐎𑑅𑐣𑐶 𑐩𑐹𑐠𑐾𑑄 𑐏𑑃 𑐩𑐸𑐂𑐎𑐵𑑅
– 𑐣𑑂𑐫𑐵 𑐮𑐵𑐫𑑂 𑐳𑑂𑐰𑐫𑐵𑑄 𑐟𑐔𑑂𑐰𑑅
– 𑐰𑐵𑑄 𑐴𑐶 𑐥𑑂𑐫𑐵𑐴𑐵𑑃 𑐰𑐂𑐠𑐾𑑄 (𑐩𑐣𑐡𑐾𑐰𑐷 𑐟𑐵𑐩𑑂𑐬𑐵𑐎𑐵𑐬, ‘𑐖𑐸𑐳𑑂𑐫𑐾𑑃 𑐰 𑐫𑐮𑐵𑑅’)
– 𑐎𑑅𑐳𑐶 𑐴𑐾 𑐟𑐶𑐬𑑂𑐠, 𑐎𑑅𑐳𑐶 𑐴𑐾 𑐔𑐵𑐬𑐢𑐵𑐩 (𑐩𑑀𑐟𑐶𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, ‘𑐀𑐖𑐶𑐫𑐵 𑐳𑐸𑐰𑐵𑑅𑐫𑐵 𑐮𑐶𑐳𑐰𑐵𑑅’)

𑐔𑑂𑐰𑐫𑑂 𑐣𑑂𑐴𑑂𑐫𑐠𑐣𑐵 𑐠𑐾𑑄𑐖𑑂𑐫𑐵𑑅𑐐𑐸 𑐏𑑃𑐟𑑂𑐰𑐵𑑅 𑐰 𑐏𑑃𑐨𑐵𑐫𑑂𑐫𑐵 𑐕𑑂𑐫𑐮𑐵𑑄 𑐧𑐵𑐏𑑄𑐟 𑐀𑐗 𑐣𑑂𑐫𑐣𑐾 𑐫𑐂𑐥𑐸𑐎𑐵 𑐧𑐶𑐄𑑋 𑐧𑐵𑐏𑑄𑐫𑐵𑐟 𑐗𑑅𑐗𑑅 𑐢𑐵𑐫𑐾𑐎 𑐟𑐶𑐳𑐵𑑄 𑐟𑐶𑐂𑐎𑐾 𑐠𑐾𑑄 𑐖𑐹 𑑋

𑐎𑐵𑐰𑑂𑐫𑐵𑐟𑑂𑐩𑐎 𑐀𑐨𑐶𑐰𑑂𑐫𑐎𑑂𑐟𑐶 :
– 𑐗𑑂𑐫𑐵𑐟𑑂𑐟𑐸𑐐𑐸 𑐠𑐵𑐫𑑂 𑐖𑐶𑐮𑑂𑐮𑐵 𑐎𑐵𑐬𑑂𑐫𑐵𑐮𑐫
– 𑐠𑑅 𑐡𑐸𑐣𑐾 𑐴𑐾 𑐟𑐣𑐵𑐰𑐣
– 𑐩𑐵𑐫𑐵 𑐩𑐟𑐶𑐣𑐵 𑐣𑐸𑐐𑐮𑑄 𑐧𑐸𑐫𑐵𑐰𑐫𑐾 𑐩𑐵𑑅𑐐𑐸
– 𑐖𑐶𑐟𑑅 𑐏𑑂𑐰𑐵𑐄𑑃𑐎𑐵 𑐧𑐶𑐂𑐐𑐸
– 𑐩𑐟𑐶𑐣𑐵𑐫𑐵 𑐔𑐸𑐮𑐶 𑐴𑐾 𑐴𑑂𑐰𑐫𑐵 𑐩𑐰𑑅
– 𑐖𑐶 𑐑𑑂𑐫𑑅𑐠𑐾𑑄 𑐣𑐵𑐫𑐹𑐩𑑂𑐴, 𑐕 𑐕𑐸𑐔𑐸𑑄𑐠𑐾𑑄 𑐟𑐸𑐫𑐹𑐩𑑂𑐴
– 𑐜𑐵. 𑐬𑐷𑐣𑐵 𑐟𑐸𑐮𑐵𑐢𑐬, ‘𑐰𑐫𑐵𑐐𑐸 𑐣𑐵𑐬𑐵 𑐐𑐧𑐮𑐾 𑐠𑑂𑐰𑐂?’
– 𑐟𑐵𑐥𑐵𑐎𑑂𑐎𑑄 𑐮𑑃𑐫𑑂 𑐮𑐵𑐫𑐵𑐟𑑅𑐐𑐸 𑐏𑐶𑐥𑑅𑐠𑐾𑑄 𑐏𑐣𑐾𑐡𑐸𑐐𑐸 𑐕𑐧𑐵𑐮𑐵𑐔𑐵𑐐𑐸 𑐮𑑃
– 𑐖𑐣𑐷 𑐧𑐵𑐮𑐵𑐔𑐵𑐐𑐸 𑐏𑐸𑐳𑐶
– 𑐥𑐶𑐟𑑂𑐫𑐵𑑅𑐫𑐵 𑐥𑑂𑐫𑐵𑐫𑑂𑐔𑐵𑑅 𑐟𑑄𑐎𑐾𑐟
– 𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, ‘𑐥𑐶𑐟𑑂𑐫𑐵𑑅𑐫𑐵 𑐥𑐮𑐵𑑅’
– 𑐧𑐸𑐮𑐸𑐩𑐶 𑐖𑐸𑐫𑐵𑐔𑑂𑐰𑑄𑐐𑐸 𑐟𑑄
– 𑐚𑑂𑐬𑐾𑐜𑐩𑐶𑐮𑐫𑑂 𑐧𑑂𑐰𑐵𑑃𑐫𑑂 𑐰𑐣𑐵𑐔𑑂𑐰𑑄𑐐𑐸 𑐥𑐮𑐵𑑅
– 𑐣𑐸𑐐𑐮𑐫𑑂 𑐣𑑂𑐴𑐫𑑂𑐧𑑅 𑐏𑐳𑐸𑑄 𑐨𑐸𑐣𑐵𑐔𑑂𑐰𑐣
– 𑐂𑐩𑐹𑐔𑐵𑑄 𑐣𑐳𑐵 𑐮𑑂𑐴𑑂𑐫𑐫𑐾 𑐠𑐾𑑄
– 𑐐𑑂𑐰𑐵𑐬𑐵𑐎𑐵𑑅𑐐𑐸 𑐮𑑅𑐫𑐵 𑐧𑐵𑐦
– 𑐩𑑂𑐴𑐸𑐟𑐸𑑄 𑐎𑑅𑐣𑐶 𑐩𑐹𑐠𑐾𑑄
– 𑐳𑐶𑐣𑑂𑐴𑐵𑐖𑑂𑐫𑐵𑐫𑐵 𑐟𑑂𑐰𑐵𑐟𑐶 𑐠𑐾𑑄
– 𑐩𑐣𑐡𑐾𑐰𑐷 𑐟𑐵𑐩𑑂𑐬𑐵𑐎𑐵𑐬, ‘𑐖𑐸𑐳𑑂𑐫𑐾𑑃 𑐰 𑐫𑐮𑐵𑑅’
– 𑐔𑐵 𑐕𑐵𑐣𑐵 𑐰𑑅𑐮𑐶𑐳𑐾 𑐮𑑂𑐰𑐐𑐶𑐟 𑐀𑐥𑑂𑐰𑐫𑐵 𑐰𑐮
– 𑐖𑐶 𑐧𑐷𑐣𑐶𑐨𑐵𑑅 𑐰 𑐮𑐹𑐣𑐶𑐨𑐵𑑅
– 𑐩𑐺𑐟𑑂𑐫𑐸𑐫𑐵 𑐩𑑂𑐴𑐸𑐟𑐸𑐂 𑐰𑐣𑐾𑐟 𑐗𑑂𑐰𑑅𑐕𑐸𑐣𑐵𑐔𑑂𑐰𑑄𑐥𑐶𑑄
– 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛, ‘𑐎𑑀𑐬𑑀𑐣𑐵𑑄 𑐡𑐫𑐾𑐎𑐹𑐩𑑂𑐴 𑐱𑐴𑐷𑐡’
– 𑐂𑐟𑐵𑑅 𑐢𑑄𑐎𑐵𑐟𑐫𑐾 𑐢𑐸𑑄𑐎𑐹𑐐𑐸 𑐡𑐾𑐰𑐵
– 𑐥𑐶𑐣𑐾𑐫𑐵 𑐨𑐵𑐂𑐬𑐳𑑄 𑐠𑐶𑐂𑐩𑐦𑐸𑐐𑐸 𑐀𑐖𑐶𑐫𑐵 𑐏𑑃
– 𑐩𑑀𑐟𑐶𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, ‘𑐀𑐖𑐶𑐫𑐵 𑐳𑐸𑐰𑐵𑑅𑐫𑐵 𑐮𑐶𑐳𑐰𑐵𑑅’
– 𑐮𑐣𑐾 𑐣𑑄 𑐩𑑂𑐰𑐵𑑅𑐐𑐸, 𑐡𑐵𑐫𑐾 𑐣𑑄 𑐩𑑂𑐰𑐵𑑅𑐐𑐸
– 𑐣𑐶𑐥𑐵𑑅 𑐏𑑂𑐰𑐵𑑅𑐥𑐵𑐮𑑄 𑐥𑐸𑐫𑐵𑐔𑑂𑐰𑑄𑐥𑐶𑑄
– 𑐎𑐾𑐬𑐵𑐩𑐵𑐫𑐵 𑐴𑑅𑐮𑐫𑑂𑐳𑐵𑑄 𑐩𑐵𑐟𑑂𑐬 𑐕𑐥𑑂𑐫𑐫𑑂 𑐖𑐵 (𑐳𑐬𑐳𑑂𑐰𑐟𑐷 𑐟𑐸𑐮𑐵𑐢𑐬, ‘𑐕𑐥𑑂𑐫𑐫𑑂 𑐖𑐵’)
– 𑐣𑐸𑐐𑐮𑐫𑑂 𑐟𑐵𑐣𑐵𑑄𑐟𑐵𑐣𑐵𑑄 𑐐𑑄 𑐠𑐵𑐮
– 𑐥𑐬𑑂𑐳𑐶 𑐳𑑂𑐫𑐹𑐩𑑂𑐴𑑄 𑐐𑑄 𑐠𑐵𑐣𑐵𑑅 𑐥𑐸𑐖𑐵 𑐫𑐵𑐎𑐾𑐐𑐸 (𑐮𑑀𑐔𑐣𑐟𑐵𑐬𑐵 𑐟𑐸𑐮𑐵𑐢𑐬, (‘𑐣𑑂𑐴𑑂𑐫𑐳𑑅𑐔𑐶𑑄’)
– 𑐬𑑀𑐩 𑐴𑑂𑐰𑐵𑐣𑐵𑐴𑑂𑐰𑐵𑐣𑐵 𑐔𑑂𑐫𑐵𑐣𑐵𑐔𑑂𑐰𑑄𑐠𑐵𑐫𑑂 𑐨𑑂𑐰𑐵𑐫𑐮𑐶𑐣 𑐠𑐵𑐣𑐵𑐔𑑂𑐰𑑄𑐩𑑂𑐴 𑐬𑑀𑐩𑐮𑐳
– 𑐳𑑄𑐎𑐚 𑐏𑐣𑐾𑐩𑐡𑐸𑐐𑐸 𑐴𑐵𑐎𑐸𑐐𑐸 𑐳𑐸𑐮𑐔𑑄
– 𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, ‘𑐎𑐶𑐳𑐶𑐡𑑂𑐰𑐩𑑂𑐧𑑅’
– 𑐥𑑂𑐬𑐎𑐺𑐟𑐶𑑄 𑐣𑐎𑐹𑐐𑐸 𑐢𑑂𑐫𑐵𑐔𑐹
– 𑐧𑐮𑐶 𑐧𑐶𑐫𑐵𑑅 𑐨𑑂𑐰𑐫𑑂 𑐣𑑂𑐫𑐵𑐫𑐎𑐾𑐩𑐵𑑅𑐠𑐾𑑄
– 𑐃𑐱𑑂𑐰𑐬𑐷𑐩𑐿𑑃𑐫𑐵 𑐱𑑂𑐬𑐾𑐲𑑂𑐛, ‘𑐴𑐷𑐩𑐴𑐷 𑐔𑐵𑑅𑐐𑐸 𑐮𑐎𑐳 𑐣𑑂𑐴𑑂𑐫𑐧𑑂𑐰𑐫𑐵’
– 𑐗𑐷𑐳𑑄 𑐨𑑀𑐚 𑐧𑐶𑐫𑐵𑐐𑐸 𑐳𑐬𑐎𑐵𑐬 𑐢𑐵𑑅𑐥𑐶𑑄 𑐠𑐸𑐥𑐶𑑄 𑐴𑐾 𑐏𑑅𑐮𑐵?
– 𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬
– 𑐟𑐾𑐟𑐶𑐳𑐎𑐵𑐚𑐷 𑐡𑑂𑐫𑑅𑐥𑐶𑑄𑐳𑑄 𑐴𑐾 𑐬𑐎𑑂𑐲𑐵 𑐫𑐵𑐫𑐾 𑐩𑐦𑐸𑐐𑐸 𑐐𑐖𑑂𑐫𑐵𑑅𑐐𑐸 𑐮𑑂𑐰𑐫𑑂?
– 𑐰𑐵𑐳𑑅 𑐕𑐐𑐹 𑐴𑐾 𑐡𑐫𑐾𑐎𑐾 𑐩𑐦𑐸𑐥𑐶𑑄 𑐐𑐖𑑂𑐫𑐵𑑅𑐥𑐶𑑄?
– 𑐡𑑂𑐫𑐵𑑄 𑐮𑐵𑐣𑐵𑑅 𑐳𑐶𑐂𑐩𑐵𑐮𑐶𑐂𑐐𑐸 𑐨𑐫
– 𑐣 𑐣𑐫𑐵𑐫𑐵 𑐳𑐸𑐏, 𑐣 𑐔𑑂𑐰𑐣𑐵𑐫𑐵 𑐳𑐸𑐏
– 𑐣𑐫𑐾𑐏𑑄𑐥𑐶𑐣𑑂𑐟𑑄 𑐩𑐖𑑂𑐫𑐹, 𑐣𑐫𑐾𑐩𑐏𑑄𑐥𑐶𑐣𑑂𑐟𑑄 𑐩𑐖𑑂𑐫𑐹
– 𑐄𑐮𑐶 𑐧𑐮𑑂𑐮𑐵𑑅𑐥𑐶𑑄 𑐡𑑂𑐫𑑅𑐥𑐶𑑄𑐳𑑄 𑐴𑐾 𑐕𑐸𑑄 𑐫𑐵𑐫𑐾 𑐩𑐦𑐸𑐥𑐶𑑄
– 𑐃𑐱𑑂𑐰𑐬𑐷𑐩𑐿𑑃𑐫𑐵 𑐱𑑂𑐬𑐾𑐲𑑂𑐛, ‘𑐮𑐎𑐜𑐵𑐄𑐣’
– 𑐣 𑐳𑐸𑐫𑐵𑐟𑑄 𑐳𑑅𑐟𑐾 𑐖𑑂𑐫𑐹, 𑐣 𑐠𑑅𑐥𑐶𑑄 𑐴𑐾 𑐰𑐣𑐾𑐖𑑂𑐫𑐹 𑐐𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵? 𑐰𑐮 𑐩𑐏𑐸𑐮𑐵 𑐀𑐩𑐾𑐬𑐶𑐎𑐵?
– 𑐥𑑂𑐬𑐩𑐶𑐮𑐵 𑐳𑐵𑐫𑑂𑐩𑐶, ‘𑐎𑐸𑐮𑐵𑑄𑐐𑐵𑐬 𑐎𑑀𑐬𑑀𑐣𑐵’
– 𑐳𑑂𑐰𑐷𑐚𑐬 𑐠𑐵𑐫𑐾𑐧𑐮𑐫𑑂 𑐀𑐣𑐾𑐎 𑐧𑐸𑐚𑑂𑐚𑐵 𑐟𑐫𑐾𑐖𑑂𑐫𑐹 𑐠𑐾𑑄
– 𑐀𑐩𑐶𑐬𑐩𑐿𑑃𑐫𑐵 𑐬𑑄𑐖𑐶𑐟, ‘𑐫𑐸𑐡𑑂𑐢 𑐐𑐧𑐮𑐾 𑐎𑑂𑐰𑐔𑐵𑐂?’

𑐧𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐥𑐴𑑅
𑐁𑐥𑐵𑐮𑑄 𑐧𑐵𑐏𑑄 𑐔𑑂𑐰𑐩𑐶 𑐩𑐫𑑂𑐖𑐸𑐥𑐶𑑄 𑐁𑐏𑑅𑐐𑑂𑐰𑑅 𑐟𑑂𑐰𑑅𑐦𑐷𑐨𑐣𑑄 𑐀𑐥𑑂𑐰𑑅 𑐢𑑂𑐫𑐵𑐣 𑐧𑑂𑐰𑐣𑐾𑐐𑐸𑐮𑐶𑐂 𑐧𑑂𑐫𑐳𑑂𑐟 𑐏𑐣𑐾𑐡𑐸𑑋 𑐕𑐐𑐹𑐎𑐠𑑄 𑐥𑐵𑐫𑑂𑐕𑐶 𑐴𑐾 𑐏𑑅𑐳𑐵𑑄 𑐐𑐣𑑄 𑐥𑐵𑐟𑑂𑐬𑐟𑐫𑑂 𑐡𑐠𑐸𑐂 𑐳𑑄𑐰𑐵𑐡 𑐡𑐸𑐳𑐵 𑐄𑐎𑐶𑐫𑐵𑐟 𑐣𑑂𑐴𑑂𑐫𑐂𑐥𑐸𑐎 𑐣𑐵𑐚𑐎𑐫𑐵 𑐥𑐵𑐟𑑂𑐬𑑄 𑐠𑐾𑑄 𑐳𑑄𑐰𑐵𑐡 𑐣𑐰𑐵𑐣𑐵𑑅 𑐧𑑂𑐰𑐣𑐵 𑐧𑐶𑐮 𑐢𑐵𑑅𑐳𑐵 𑐧𑐵𑐏𑑄 𑐣𑑂𑐫𑐣𑐾𑐧𑐮𑐫𑑂 𑐀𑐗𑑄 𑐣𑑂𑐴𑑂𑐫𑐂𑐥𑐸𑐂, 𑐣𑑂𑐫𑑃𑐩𑐶𑐥𑐶𑐣𑐶𑐐𑐸 𑐣𑐸𑐐𑑅 𑐳𑐵𑐮𑐵 𑐟𑐫𑐾𑐦𑐂 𑑋 𑐁𑐎𑐬𑑂𑐲𑐎 𑐰𑐵𑐔𑐣𑐎𑐮𑐵𑑄 𑐧𑐵𑐏𑑄𑐫𑐵𑐟 𑐳𑐦𑐮 𑐫𑐵𑐫𑐾𑐐𑐸𑐮𑐷 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐷 𑑋 𑑑𑑗 𑐥𑐸 𑐧𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐥𑐶𑑄 𑐩𑐢𑑂𑐫𑐾 𑐬𑐷𑐟𑐵𑐡𑐾𑐰𑐷 𑐥𑑂𑐬𑐢𑐵𑐣 𑐖𑑀𑐱𑐷𑐫𑐵 𑐧𑐵𑐏𑑄 𑐰𑐵𑐔𑐣 𑐎𑐮𑐵 𑐩𑐾𑐥𑐶𑑄 𑐳𑑂𑐰𑐫𑐵𑑄 𑐧𑐶𑐳𑑂𑐎𑑄 𑐏𑐣𑐾𑐡𑐸 𑑋

𑐧𑐵𑐏𑑄 𑐔𑑂𑐰𑐩𑐶𑐥𑐶𑑄𑐳𑑄 𑐠𑑅𑐥𑐶𑐣𑐶 𑐧𑐵𑐏𑐣𑐫𑑂 𑐣𑑂𑐴𑐹 𑐥𑑂𑐬𑐰𑐶𑐢𑐶 𑐰 𑐥𑐸𑐮𑐵𑑄𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐏𑑃𑐐𑑂𑐰𑑅𑐟 𑐣𑑄 𑐫𑐎𑑂𑐰 𑐕𑑂𑐫𑐮𑐵𑐧𑐸𑐮𑐵 𑐫𑐵𑐣𑐵𑐡𑐷𑐐𑐸 𑐏𑐣𑐾𑐡𑐸𑑋 𑐐𑐠𑐾 𑐎𑐶 𑐣𑑂𑐴𑐹 𑐥𑑂𑐬𑐰𑐶𑐢𑐶𑐫𑐵 𑐏𑑃𑐐𑑂𑐰𑑅𑐟 𑐜𑐶𑐨𑑀𑐬𑑂𑐳, 𑐎𑐥𑐸𑐔𑐶𑐣𑑀 𑐎𑐦𑐷, 𑐩𑐾𑐳𑐾𑐣𑑂𑐖𑐬, 𑐦𑐾𑐳𑐧𑐹𑐎, 𑐧𑑂𑐮𑐎, 𑐚𑐷𑐥𑐷𑐊𑐳, 𑐮𑐎𑐜𑐵𑐄𑐣, 𑐎𑑀𑐬𑑀𑐣𑐵 𑐁𑐡𑐶 𑑋 𑐀𑐠𑐾 𑐴𑐾 𑐥𑐸𑐮𑐵𑑄𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐏𑑃𑐐𑑂𑐰𑑅𑐟 𑐥𑐸𑐣𑑂𑐴𑐵𑐫𑑂𑐔𑐵, 𑐟𑐸𑐟𑐵𑑄, 𑐡𑐾𑐰𑐵, 𑐂𑐟𑐵𑑅, 𑐮𑐶𑐳𑐰𑐵𑑅 (𑐩𑑀𑐟𑐶𑐮𑐎𑑂𑐲𑑂𑐩𑐷 𑐱𑐵𑐎𑑂𑐫), 𑐰𑐳𑐶𑐧𑑃, 𑐫𑐩𑑂𑐴𑐫𑑂 !, 𑐩𑐖𑑂𑐫𑐹𑐏𑐾 !, 𑐟𑐣𑐶𑐐𑑅, 𑐧𑑅𑐣𑐶𑐐𑑅, 𑐳𑐟𑑂𑐰𑐥𑐸𑐖𑐵, 𑐟𑐶𑐣𑑂𑐔𑐵, 𑐐𑐸𑐮𑑂𑐥𑐵𑑅 ,𑐟𑑀𑐬𑑂𑐩𑐵, 𑐐𑑄, 𑐐𑑂𑐰𑑅𑐖𑐵, 𑐖𑐖𑑄𑐎𑐵, 𑐣𑑂𑐴𑐶𑐎𑑄 (𑐮𑑀𑐔𑐣𑐟𑐵𑐬𑐵 𑐟𑐸𑐮𑐵𑐢𑐬), 𑐧𑐮𑐶𑑄 𑐥𑐶𑐫𑐵𑑅 𑐡𑐸𑐎𑐵𑑅𑐥𑐶𑑄, 𑐳𑐷 𑐩𑐸𑐎𑐵𑑅 𑐡𑐸𑐴𑐵𑑄 𑐰𑑅𑐥𑐶𑑄, 𑐳𑐶𑐠𑑄 𑐴𑑅𑐐𑐸 𑐳𑑂𑐰𑐫𑐵𑐰𑑅𑐥𑐶𑑄 (𑐀𑐩𑐶𑐬𑐩𑐿𑑃𑐫𑐵 𑐬𑑄𑐖𑐶𑐟), 𑐎𑐸𑐮𑐵𑑄𑐐𑐵𑐬 (𑐥𑑂𑐬𑐩𑐶𑐮𑐵 𑐳𑐵𑐫𑑂𑐩𑐶), 𑐖𑐸𑐳𑑂𑐫𑐾𑑃, 𑐫𑐮𑐵𑑅, 𑐥𑐸𑐂𑑃, 𑐜𑐎𑐷𑐐𑑅, 𑐣𑐶𑐳𑐮𑐵𑑅, 𑐏𑐳𑐸, 𑐧𑐸𑐮𑐸𑐩𑐶, 𑐳𑐶𑐣𑑂𑐴𑐵𑐖𑑂𑐫𑐵, 𑐟𑑂𑐰𑐵𑐟𑐶, 𑐴𑐶𑑄, 𑐴𑐮𑐹, 𑐡𑑂𑐰𑐎 (𑐩𑐣𑐡𑐾𑐰𑐷 𑐟𑐵𑐩𑑂𑐬𑐵𑐎𑐵𑐬), 𑐎𑐶𑐳𑐶𑐡𑑂𑐰𑑄𑐧𑑅, 𑐏𑐜𑑂𑐐 (𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬), 𑐖𑐣𑐷, 𑐏𑐶𑐥𑑅, 𑐥𑐵𑐎𑑅 𑐏𑑂𑐰𑐵𑑅𑐥𑐵𑑅, 𑐎𑑁𑐮𑐵 (𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬) 𑑋

𑐠𑐸𑐎𑐠𑑄 𑐣𑑂𑐴𑐹𑐐𑐸 𑐥𑐸𑐮𑐵𑑄𑐐𑐸 𑐏𑑃𑐔𑐸𑐟, 𑐮𑑂𑐰𑑅𑐩𑐣𑐾 𑐢𑐸𑑄𑐎𑐹𑐐𑐸 𑐏𑑃𑐐𑑂𑐰𑑅𑐟, 𑐠𑑁𑑄𑐎𑐣𑑂𑐴𑐫𑑂𑐫𑐵 𑐟𑐳𑐎𑑄 𑐔𑐬𑑂𑐔𑐶𑐟 𑐑𑐚𑐣𑐵 𑐎𑑀𑐨𑐶𑐜-𑑑𑑙 𑐮𑐶𑐳𑐾𑑄 𑐗𑐷 𑐧𑐵𑐏𑑄 𑐔𑑂𑐰𑐩𑐶 𑐩𑐫𑑂𑐖𑐸𑐥𑐶𑑄 𑐐𑐸𑐮𑐶 𑐳𑐔𑐾𑐟 𑐢𑐂𑐐𑐸 𑐏𑑃 𑐠𑐸𑐐𑐸 𑐧𑐵𑐏𑑄 𑐩𑐸𑑃𑐖𑑂𑐫𑐵𑑄 𑐫𑐔𑑂𑐔𑐸𑐎 𑐎𑑂𑐫𑐣𑐵 𑐧𑐶𑐄𑐐𑐸 𑐡𑐸𑑋 𑐳𑑂𑐰𑑄𑐐𑐹 𑐥𑑂𑐫𑑄𑐐𑐹 𑐡𑐱𑐎 𑐟𑐎 𑐠𑐷𑐠𑐷 𑐴𑐸𑐣𑐶𑑄 𑐫𑐵𑐣𑐵𑑅 𑐔𑑂𑐰𑐳𑐵 𑐡𑐶𑐎𑐵 𑐔𑑂𑐰𑐣𑐵𑐡𑐷𑐥𑐶𑑄 𑐔𑑂𑐰𑐩𑐶 𑐩𑐫𑐖𑐸𑐥𑐶𑐣𑑂𑐟 𑐴𑐵𑐎𑐣𑑄 𑐔𑑂𑐰𑐳𑐵 𑐖𑑂𑐰𑑄𑐎𑐾𑐟 𑐣𑑄 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐳𑐣 𑐀𑐦 𑐀𑐩𑐾𑐬𑐶𑐎𑐵, 𑐫𑐸𑐊𑐳𑐊 𑐔𑑂𑐫𑐵𑐥𑑂𑐚𑐬 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐠𑑅𑐐𑐸 𑐡𑐾𑐱𑑄 𑐟𑐵𑐥𑐵𑐎𑑂𑐎 𑐔𑑂𑐰𑐣𑐵𑑅 𑐣𑑄 𑐠𑐖𑑂𑐫𑐵𑑅𑐐𑐸 𑐨𑐫𑐵𑐰𑐴 𑐮𑐎𑐜𑐵𑐄𑐣𑐫𑐵 𑐂𑐮𑐫𑑂 𑐧𑐵𑐏𑑄 𑐔𑑂𑐰𑐩𑐶 𑐩𑐫𑐖𑐸𑐥𑐶𑐣𑑂𑐟 𑐕𑐠𑐵𑐳𑑄 𑐩𑐸𑐣𑐵𑑅, 𑐠𑑅𑐠𑑅𑐐𑐸 𑐕𑐾𑑃𑐫𑑂 𑐔𑑂𑐰𑐣𑐵𑑅 𑐳𑐎𑐳𑐶𑐣𑑄 𑐳𑐎𑐳𑐶𑐟𑑄 𑐳𑑂𑐰𑐫𑐾𑐏𑑄𑐎, 𑐣𑑂𑐫𑐣𑐾𑐏𑑄𑐎 𑐴𑐮𑐶𑐩𑐫𑑂 𑐰𑐶𑐎𑐵𑐳 𑐖𑐹𑐩 𑐥𑑂𑐬𑐰𑐶𑐢𑐶𑐥𑐵𑐏𑐾𑑄 𑐕𑐠𑐵𑐳𑑄 𑐩𑐸𑑄𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸𑑋

𑐗𑐷 𑐣𑑂𑐫𑑃𑐩𑐶𑐥𑐶𑐣𑑂𑐟 𑐮𑐎𑐜𑐵𑐄𑐣𑐫𑐵 𑐂𑐮𑐫𑑂 𑐐𑐣𑑄 𑐳𑐨𑐵 𑐐𑑀𑐲𑑂𑐛𑐷𑐳 𑐰𑐣𑐾 𑐩𑑂𑐰𑐵𑐫𑐾𑐎 𑐕𑐾𑑃𑐫𑑂 𑐴𑐾 𑐔𑑂𑐰𑐣𑐵𑑅 𑐧𑐵𑑄𑐮𑐵𑑅𑐐𑐸 𑐧𑐵𑐏𑑄 𑐣𑑂𑐫𑐣𑐾𑐐𑐸 𑐮𑐎𑐳 𑐧𑐶𑐄𑐐𑐸𑐮𑐶𑑄 𑐐𑑂𑐰𑐳𑐵𑑅 𑐏𑐮𑑅𑐫𑐵𑐟 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵 𑑋