𑐖𑐶𑐐𑐸 𑐥𑑂𑐬𑐾𑐬𑐞𑐵𑐫𑐵 𑐕𑐐𑐹 𑐳𑑂𑐬𑑀𑐟 ‘𑐀𑐞𑐸’

𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑒𑑒 𑐳𑐵𑐮 𑐢𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐣𑑂𑐡𑑀𑐮𑐣𑐫𑐵 𑐃 𑐏𑑅 𑑋 𑐬𑐾𑐜𑐶𑐫𑑀 𑐣𑐾𑐥𑐵𑐮𑑄 𑐠𑑂𑐰𑐫𑐵𑐟 𑐥𑐶𑐟𑑂𑐫𑐸𑐐𑐸𑐮𑐶𑑄 𑐱𑐣𑐶𑐰𑐵𑑅𑐥𑐟𑐶𑐎𑑄 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐖𑐸𑐂𑐐𑐸𑑋 𑐖𑐶 𑐠𑑅 𑐣𑑄 𑐀𑐧𑐮𑐫𑑂 𑐐𑐧𑐮𑐾𑑄 𑐐𑐧𑐮𑐾𑑄 𑐠𑑂𑐫𑑄 𑑋 𑐕𑐎𑑅 𑐕𑐐𑐹 𑐡𑐧𑐸𑐮𑐶𑐂 𑐳𑐶𑐟𑑂𑐫𑐵𑑄𑐔𑐵𑐩𑑂𑐴 𑐮𑑂𑐫𑐵𑐫𑑂 𑐩𑑂𑐴𑐩𑑂𑐴 𑐎𑐰𑐶𑑄 𑐎𑐰𑐶𑐟𑐵 𑐣𑑂𑐫𑑄𑐎𑐮 𑐠𑐸𑐎𑐠𑑄 –

𑐢𑑃𑐫𑑂 𑐎𑐸𑐳𑐶 𑐥𑐟𑐶𑐟, 𑐖𑐶𑐐𑐸 𑐡𑐾𑐫𑑂𑐫𑐵 𑐩𑐶𑐟𑑂𑐬𑐸𑐟
𑐩𑑄𑐎𑐵𑑅 𑐐𑐸𑐠𑐶 𑐣𑑂𑐫𑐵𑐟 𑐂𑐩𑐶, 𑐩𑐵𑑅𑐩𑐵𑑅𑐕𑐶 𑐴𑐶 𑐟𑑂𑐰𑐣𑐾𑐟

𑐰𑐫𑑂𑐎𑑅𑐫𑐵 𑐎𑐰𑐶𑐟𑐵 𑐧𑑂𑐰𑐣𑐾𑐐𑐸 𑐥𑐴𑑅 𑐣𑑄 𑐴𑐶𑐳𑐶 𑐡𑐸𑑋 𑐣𑑂𑐫𑐣𑐾𑐧𑐮𑐫𑑂 𑐣𑑂𑐴𑑂𑐫𑐵𑐂𑐥𑐸𑐳𑐾 𑐔𑑂𑐰𑑄 𑑋 𑐐𑐠𑐾 𑐴𑐣𑐾𑐧𑐴𑐩𑑂𑐴 𑐡𑐸𑐬𑑂𑐐𑐵𑐮𑐵𑐮𑐖𑐸𑑄 𑐎𑐰𑐶𑐟𑐵 𑐣𑑂𑐫𑑄𑐎𑐵𑐡𑐷𑐧𑐮𑐫𑑂 𑐩𑐣𑐹𑐟𑐫𑑂𑐟 𑐁𑐎𑐬𑑂𑐲𑐶𑐟 𑐫𑐵𑐫𑐾𑐦𑐸, 𑐀𑐖𑑂𑐫𑐵𑑅𑐐𑐸 𑐴𑐾 𑐏𑐸𑐧𑐷 𑐰𑐫𑑂𑐎𑑅𑐫𑐵𑐎𑐾 𑐣𑑄 𑐡𑐸 𑐏𑐣𑐷 𑑋 𑐰𑐫𑑂𑐎𑑅 𑐏𑑅 𑐣𑐵𑑄𑐖𑐵𑑅𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐎𑐮𑐵𑐎𑐵𑐬 𑐨𑐵𑐖𑐸 𑐱𑑂𑐬𑐷𑐎𑐺𑐲𑑂𑐞 ‘𑐀𑐞𑐸’ 𑑋 𑐰𑐫𑑂𑐎𑑅𑐥𑐶𑑄𑐳𑑄 𑐎𑐰𑐶𑐟𑐵 𑐧𑑂𑐰𑐣𑐵𑐡𑐷𑐧𑐮𑐫𑑂 𑐣𑑂𑐫𑐣𑑂𑐫𑑄 𑐖𑐶 𑐠𑑅 𑐣𑑄 𑐀𑐠𑐾 𑐴𑐾 𑐎𑐰𑐶 𑐖𑐸𑐂𑐡𑑅𑐳𑐵 𑐖𑑂𑐫𑐹 𑐠𑐾𑑄 𑐔𑑂𑐰𑐣𑐵 𑐰𑐂𑐐𑐸, 𑐫𑐡𑑂𑐫𑐥𑐶 𑐖𑐶 𑐠𑑅 𑐕𑐸𑑄 𑐔𑑂𑐰𑐫𑐾𑐳𑑅𑐩𑑂𑐴 𑐩𑐏𑐸 𑑋

𑐡𑐸𑑅𑐏𑐫𑐵 𑐏𑑃, 𑐐𑐸𑐩𑑂𑐴 𑐩𑐣𑐹𑐥𑐵𑐏𑐾𑑄 𑐖𑐶 𑐥𑑂𑐬𑐨𑐵𑐰𑐶𑐟 𑐖𑐸𑐮, 𑐰𑐫𑑂𑐎𑑅 𑐮𑐵 𑐠𑐣𑐶𑑄 𑐣𑑂𑐫𑐵𑐡𑑃 𑐣𑑂𑐴𑑂𑐫𑑅 𑐴𑐾 𑐠𑑂𑐰 𑐳𑑄𑐳𑐵𑐬𑐫𑑂 𑐩𑐡𑐫𑐾 𑐢𑐸𑑄𑐎𑐮 𑑋 𑐰𑐫𑑂𑐎𑑅 𑐖𑐶𑐩𑑂𑐴 𑐕𑐩𑑂𑐴 𑐀𑐐𑑂𑐬𑐖 𑐰 𑐥𑐵𑐳𑐵 𑐏𑑅𑐳𑐵𑑄 𑐣𑑄 𑐖𑐶 𑐠𑑅 𑐣𑑄 𑐩𑐦𑐫𑐵 𑐔𑑂𑐰𑑄𑐐𑐸𑐮𑐶𑑄 𑐰𑐫𑑂𑐎𑑅 𑐩𑐡𑐸𑐐𑐸 𑐐𑐸𑐮𑐶𑐏𑐾 𑐮𑐶𑐥𑐵 𑐟𑐶𑐣𑐶 𑐖𑐶𑑄 𑐳𑐶𑐮 𑑋 𑐰𑐫𑑂𑐎𑑅𑐫𑐵 𑐩𑐺𑐟𑑂𑐫𑐸𑐫𑐵 𑐧𑐸𑐏𑑄 𑐖𑐶𑐟𑑅 𑐟𑑅𑐣𑑂𑐴𑐸 𑐟𑐎 𑐳𑑂𑐟𑐧𑑂𑐢 𑐫𑐵𑐣𑐵𑐧𑐶𑐮 𑑋 𑐐𑐸𑐐𑐸 𑐔𑑀𑐚 𑐠𑑅𑐟 𑐮𑐵𑐟, 𑐄𑐎𑐶𑐫𑐵𑐟 𑐰𑑂𑐫𑐎𑑂𑐟 𑐫𑐵𑐫𑐾𑐟 𑐖𑐶𑐎𑐾 𑐏𑑃𑐐𑑂𑐰𑑅 𑐩𑐡𑐸𑑋 𑐐𑐧𑐮𑐾𑑄 𑐖𑐶𑐐𑐸 𑐦𑐸𑐬𑑂𑐳𑐡 𑐡𑐂, 𑐰 𑐮𑐸𑐩𑑄𑐟𑐶𑐟 𑐢𑐵𑑅𑐳𑐵 𑐀𑐠𑐾𑑄 𑐴𑐾 𑐗𑑂𑐰𑑅𑐕𑐸𑐣𑐵 𑐰𑐫𑐵𑐔𑑂𑐰𑐣𑐷 𑑋

𑐰𑐫𑑂𑐎𑑅 𑐱𑑂𑐬𑐷𑐎𑐺𑐲𑑂𑐞 ‘𑐀𑐞𑐸’ 𑐧𑐹𑐐𑐸 𑐡𑐶𑐣 𑐏𑑅 𑐰𑐶𑐎𑑂𑐬𑐩 𑐳𑑄𑐰𑐟𑑂 𑑑𑑙𑑙𑑙 𑐳𑐵𑐮 𑐎𑐵𑐬𑑂𑐟𑐶𑐎 𑑑𑑓 𑐐𑐟𑐾 𑑋 𑐳𑐵𑐴𑐶𑐟𑑂𑐫𑐶𑐎 𑐖𑐣𑑂𑐩 𑐢𑐵𑑅𑐳𑐵 𑐄𑐧𑐮𑐫𑑂 𑐖𑐹𑐐𑐸 𑐏𑑅 𑐐𑐧𑐮𑐾 (𑐩𑐔𑐵𑐧𑐮𑐫𑑂) 𑐰𑐫𑑂𑐎𑑅𑐫𑐵 𑐣𑐸𑐐𑐮𑐫𑑂 𑐡𑐸𑐐𑑂𑐫𑑄𑐎 𑐑𑐵𑑅 𑐮𑐵𑐟 𑑋 𑐰𑐫𑑂𑐎𑐮𑑄 𑐴𑐾 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑐠𑑂𑐰 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑐖𑐸𑐫𑐵𑐟 𑐖𑐹𑐐𑐸 𑐑𑐚𑐣𑐵 𑐣𑐵𑐥 𑐠𑑂𑐫𑐵𑐎𑑂𑐎 𑐴𑐾 𑐖𑑂𑐰𑑅𑐮𑐵𑑅 𑐰𑑅 𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂 𑐩𑐔𑐵𑐧𑐮𑐫𑑂 𑐫𑐾𑑃𑐫𑑂 𑐠𑐵𑐫𑑂𑐩𑐡𑐸 𑐟𑑂𑐰𑐵𑑅𑐫𑐵 𑐕𑐐𑐹 𑐧𑐴𑐵𑐮𑐫𑑂 𑐕𑐐𑐹 𑐎𑑂𑐰𑐠𑐵𑐫𑐵 𑐡𑐸𑐣𑐾 𑐕𑐐𑐹 𑐥𑑂𑐫𑐵𑐏𑑄𑐫𑐵 𑐬𑐶𑐴𑐬𑑂𑐳𑐮 𑐖𑐸𑐫𑐵𑐔𑑂𑐰𑑄𑐐𑐸𑑋 𑐬𑐶𑐴𑐬𑑂𑐳𑐮 𑐖𑐹𑐐𑐸 𑐎𑑂𑐰𑐠𑐵𑐫𑐵 𑐏𑐵𑐥𑐵 𑐟𑐶𑐣𑐵𑐟𑑅𑐐𑐸𑐮𑐶𑑄 𑐰𑐫𑑂𑐎𑑅 𑐩𑐔𑐵𑐩𑑂𑐴𑐾𑐳𑐶𑐣𑑄 𑐏𑐵𑐥𑐵𑐫𑐵 𑐎𑑂𑐰𑑃𑐫𑑂𑐥𑑂𑐰𑐵𑑅 𑐴𑑂𑐰𑐟𑑄 𑐳𑑂𑐰𑐫𑐵𑐧𑐶𑐮 𑑋 𑐄𑐧𑐮𑐫𑑂 𑐡𑐸𑐣𑐾𑑄 𑐕𑐩𑑂𑐴𑐾𑐳𑐶𑐣𑑄 𑐥𑐟𑐶𑑄𑐔𑐵𑑄 𑐗𑑂𑐰𑐵𑐎𑑂𑐎 𑐳𑐸𑐫𑐵𑐴𑐮 𑑋 𑐰𑐫𑑂𑐎𑑅𑐫𑐵 𑐩𑐶𑐏𑐵𑐫𑑂 𑐔𑑀𑐚 𑐮𑐵𑑅𑐐𑐸𑐮𑐶𑑄 𑐁𑐂𑐫𑐵𑐧𑐵𑐧𑐵 𑐢𑐎𑐵𑑅 𑐴𑑂𑐰𑐵𑑃𑐫𑑂 𑐴𑑂𑐰𑐵𑑃𑐫𑑂 𑐏𑑂𑐰𑐮 𑑋 𑐰 𑐴𑐾 𑐔𑑀𑐚 𑐰 𑐀𑐥𑐩𑐵𑐣𑑄 𑐫𑐵𑐣𑐵𑑅 𑐰𑐫𑑂 𑐎𑐮𑑄 𑐥𑑂𑐫𑐵𑐏𑑄 𑐔𑑂𑐰𑐫𑐵𑑅 𑐩𑑂𑐴𑐶𑐟𑐎𑐾𑐐𑐸 𑐫𑐵𑐣𑐵𑐡𑐶𑐮 𑑋 𑐰 𑐣𑑄 𑑑𑑒 𑐡𑑃𑐫𑐵 𑐄𑐩𑐾𑐬𑐫𑑂, 𑐐𑐧𑐮𑐾 𑐎𑐶 𑐰𑐫𑑂𑐎𑐮𑑄 𑐥𑑂𑐫𑐵𑐏𑑄 𑐢𑐫𑐵𑐐𑐸 𑐐𑐫𑑂𑐔𑑂𑐰𑐫𑐾𑐐𑐸 𑐢𑐫𑐵𑐐𑐸 𑐩𑐳𑐶𑐄𑐣𑐶 𑑋

𑐴𑐾𑐮𑐵 𑐰 𑐀𑐥𑐩𑐵𑐣 𑐢𑐫𑐵𑐐𑐸 𑐣𑑄 𑐔𑐵𑑅𑐔𑐹𑐫𑐵 𑐏𑑃 𑐩𑐏𑐸 𑐐𑐸𑐎𑐶𑑄 𑐳𑑂𑐫𑐮𑑂𑐮𑐵𑑅𑐩𑑂𑐴 𑐳𑐬𑑂𑐖𑐎𑐫𑐵 𑐖𑐣𑑂𑐩 𑐖𑐸𑐂 𑑋 𑐩𑐟𑐶𑐣𑐵𑐫𑑂 𑐢𑑀𑐎𑐵 𑐣𑐫𑐵𑑅 𑐐𑐸𑐮𑐶𑐳𑐶𑐣𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐡𑐸𑐳𑐵 𑐐𑐸𑐮𑐶𑑄 𑐎𑐰𑐶 𑐖𑐹𑐐𑐸 𑐮𑐵 𑐗𑐷𑐳𑑄 𑐐𑐧𑐮𑐾𑑄 𑐐𑐧𑐮𑐾𑑄 𑐣𑑂𑐫𑐣𑐵𑐐𑐸 𑐡𑐸, 𑐧𑑂𑐰𑐣𑐵𑐐𑐸 𑐡𑐸𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂𑐫𑐵𑐟 𑐠𑐾𑑄𑐖𑑂𑐫𑐵𑑅𑐐𑐸 𑐴𑐾 𑐀𑐥𑐩𑐵𑐣 𑐰 𑐔𑑀𑐚 𑐱𑑂𑐬𑐷𑐎𑐺𑐲𑑂𑐞 𑐀𑐞𑐸 𑐖𑐸𑑄 𑐣𑑄 𑐦𑐫𑐾𑐩𑐵𑐮, 𑐐𑐸𑐎𑐶𑑄 𑐰𑐫𑑂𑐎𑑅𑐫𑐵 𑐳𑐵𑐴𑐶𑐟𑑂𑐫𑐶𑐎 𑐰 𑐎𑐮𑐵𑐎𑐵𑐬𑐶𑐎 𑐖𑐣𑑂𑐩 𑐖𑐸𑐮 𑑋 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑐𑑗𑑗 𑐳 𑐨𑐵𑐖𑐸 𑐴𑐬𑐶𑐴𑐬𑐵𑐣𑐣𑑂𑐡 𑐰𑐿𑐡𑑂𑐫𑑄 𑐔𑑂𑐰𑐫𑐵𑐡𑐷𑐐𑐸 ‘𑐩𑐶𑐳𑐵𑐐𑐸𑐮𑐸’ 𑐏𑑂𑐫𑐵𑐮𑑅 𑐩𑑂𑐴𑐶𑐟𑐎𑐸𑐳𑐵𑑄𑐣𑐶𑐳𑐾𑑄 𑐰𑐫𑑂 𑐎𑑅 𑐀𑐞𑐸𑐖𑐸𑑄 𑐏𑑂𑐫𑐵𑐮𑑅 𑐳𑑂𑐫𑐣𑐾𑐐𑐸 𑐰 𑐩𑑂𑐴𑐶𑐟𑐾𑐐𑐸 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐴𑐬𑐶𑐴𑐬𑐵𑐣𑐣𑑂𑐡𑐖𑐸𑐫𑐵 𑐳𑑂𑐰𑑄𑐐𑐹 𑐏𑑂𑐫𑐵𑐮𑑅 𑐡𑐸, ‘𑐩𑐶𑐳𑐵𑐐𑐸𑐮𑐸’, ‘𑐏𑐶𑐐𑐸𑐮𑐶𑐰𑐿𑐡𑑂𑐫’ 𑐰 ‘𑐳𑑂𑐰𑐎𑑄𑐐𑐸𑐞𑑂𑐜𑐵’ 𑑋 𑐠𑐸𑐥𑐶𑑄 𑐳𑑂𑐰𑑄𑐐𑐸𑐮𑐶𑐂 𑐣𑑄 ‘𑐀𑐞𑐸’𑐖𑐸𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋 𑐰𑐫𑐵𑑄 𑐮𑐶𑐥𑐵 ‘𑐀𑐞𑐸’𑐖𑐸 𑐠𑐩𑑂𑐴𑑄 𑐴𑐾 ‘𑐴𑐵𑐂 𑐴𑐵𑐂 𑐰𑐿𑐡𑑂𑐫’ 𑐣𑐵𑑄𑐐𑐸 𑐏𑑂𑐫𑐵𑐮𑑅 𑐔𑑂𑐰𑐫𑐵𑑅 𑐠𑐩𑑂𑐴𑑄 𑐴𑐾 𑐩𑑂𑐴𑐶𑐟𑐎𑐵𑐡𑐶𑐮 𑑋 𑐗𑐷𑐐𑐸 𑐳𑐵𑐴𑐶𑐟𑑂𑐫𑐫𑑂 𑐏𑑂𑐫𑐵𑐮𑑅 𑐔𑑂𑐰𑐩𑐶 𑐰 𑐏𑑂𑐫𑐵𑐮𑑅𑐩𑑂𑐰𑑅 𑐎𑐠𑑄 𑐠𑐸𑐎𑐠𑑄 𑐟𑐵𑐫𑑂𑐟𑐶𑐟𑐶 𑐫𑐵𑐣𑐵𑐡𑐶𑐮 𑑋

𑐰𑐶.𑐳𑑄. 𑑒𑑐𑑑𑑙 𑐳𑐵𑐮 𑐣𑐶𑐳𑐾𑑄 𑐰𑐫𑑂𑐎𑐮𑑄 𑐎𑐰𑐶𑐟𑐵 𑐔𑑂𑐰𑐫𑐾𑐐𑐸 𑐣𑑄 𑐫𑐵𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐧𑐵𑐏𑑄 𑐣𑑄 𑐔𑑂𑐰𑐫𑐡𑐷𑐐𑐸 𑐡𑐸𑑋 𑐰𑐫𑑂𑐎𑑅𑐫𑐵 𑐖𑐩𑑂𑐩𑐵 𑐥𑑂𑐫𑑄𑐐𑐹 𑐳𑐦𑐹 𑐥𑐶𑐴𑐵𑑄𑐰𑑅𑐐𑐸 𑐡𑐸 – ‘𑐡𑐸𑐳’, ‘𑐟𑐵𑐫𑑂𑐟𑐶𑐟𑐶’, ‘𑐏𑐣𑐾𑐩𑐬𑐸𑐩𑐬𑐸’ 𑐰 ‘𑐏𑑅 𑐮𑐵 𑐩𑐏𑐸𑐮𑐵’ 𑑋 ‘𑐏𑑅𑐮𑐵 𑐩𑐏𑐸𑐮𑐵’ 𑐕𑐐𑐹 𑐰𑐫𑑂𑐎𑑅𑐫𑐵 𑐏𑑂𑐫𑐵𑐮𑑅 𑐩𑐸𑐣𑐵 𑐏𑑅𑐳𑐵 𑐩𑐾𑐐𑐸 𑐳𑑂𑐰𑑄𑐐𑐹 𑐰𑐫𑑂𑐎𑑅𑐫𑐵 𑐳𑐩𑑂𑐥𑐡𑐵𑐣𑐫𑑂 𑐥𑐶𑐴𑐵𑑄 𑐰𑑅𑐐𑐸 𑐰𑐫𑑂𑐎𑑅𑐫𑐵 𑐮𑐶𑐳𑐾𑑄 𑐩𑐾𑐩𑐾𑐥𑐶𑐣𑐶𑐐𑐸 𑐣𑑄 𑐏𑑂𑐫𑐵𑐮𑑅 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑐦𑐹 𑐏𑑅 𑑋 𑐖𑐶𑑄 𑐧𑑂𑐰𑐣𑐵𑐐𑐸 𑐰𑐫𑑂𑐎𑑅𑐫𑐵 𑐳𑐦𑐹 𑐢𑐫𑐵𑐐𑐸 ‘𑐏𑑅 𑐮𑐵 𑐩𑐏𑐸𑐮𑐵’ 𑐕𑐐𑐹 𑐖𑐎 𑐏𑑅 𑑋 𑐰 𑐣𑑄 𑐧𑐖𑐵𑐬𑐫𑑂 𑐐𑐣𑑄 𑐴𑐾 𑐩𑐡𑐸𑑋 𑐔𑑂𑐰𑐩𑐶𑐫𑐵 𑐕𑐾𑑃𑐖𑑅𑐥𑐶𑑄𑐳𑑄 𑐖𑐶𑐟𑑅 𑐰 𑐔𑐹𑐮𑐵𑐎𑐵𑐧𑐶𑐮 𑑋 𑐰𑐫𑑂𑐎𑑅𑐥𑐶𑑄𑐟 𑐳𑐸𑐨𑐵𑐫𑑂 𑐧𑐷𑐩𑐵𑑅𑑋

𑐳𑐟𑑂𑐫 𑐏𑑃 𑐕𑐸 𑐢𑐵𑑅𑐳𑐵 𑐴𑐣𑐾𑐧𑐴𑐩𑑂𑐴 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐖𑐸𑐫𑐵 𑐣𑐵𑑄 𑐩𑐎𑐵𑐫𑐾𑐎𑑄 𑐰𑐫𑑂𑐎𑑅 ‘𑐀𑐞𑐸’ 𑐖𑐸𑐫𑐵 𑐩𑑂𑐴𑐳𑐷𑐎𑐵 𑐥𑐹𑐰𑐣𑐷 𑐴𑐾 𑐩𑐏𑐸𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂 𑐣𑐵𑑄𑐖𑐵𑑅𑐩𑑂𑐴 𑐎𑐰𑐶 𑐖𑐎 𑐩𑐏𑐸, 𑐳𑑂𑐫𑐮𑑂𑐮𑐵𑐩𑑂𑐴 𑐣𑐵𑐚𑐎𑐎𑐵𑐬 𑐣𑑄 𑐏𑑅 𑐢𑐫𑐵𑐐𑐸 𑐏𑑃 𑐮𑐵 𑐡𑐎𑑂𑐰𑐳𑐶𑐣𑑄 𑐳𑑂𑐫𑐹 𑑋 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐀𑐬𑑂𑐠𑐵𑐟 𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑐𑑔 𑐳𑐵𑐮 𑐣𑐶𑐳𑐾𑑄 𑐡𑐧𑐹 𑐥𑑂𑐫𑐵𑐏𑑄 𑐔𑑂𑐰𑐫𑐵𑑅 𑐩𑑂𑐴𑐶𑐟𑐎𑐾𑐐𑐸 𑐫𑐵𑐣𑐵𑐡𑐷𑐩𑑂𑐴 𑐰𑐫𑑂𑐎𑐮𑑄 𑐕𑐐𑐹 𑐡𑐬𑑂𑐖𑐣𑑄 𑐩𑐫𑐵𑐎 𑐕𑐢𑐵𑑅𑐥𑑂𑐫𑐵𑐏𑑄 𑐣𑑄 𑐔𑑂𑐰𑐫𑐵𑐡𑐷𑐐𑐸 𑐡𑐸𑑋 𑐰𑐫𑑂 𑐎𑑅𑐫𑐵 𑐡𑐧𑐹 𑐥𑑂𑐫𑐵𑐏𑐣𑐫𑑂 𑐩𑐸𑐏𑑂𑐫 𑐨𑐹𑐩𑐶𑐎𑐵 (𑐔𑑂𑐫𑐵𑐮𑐾𑐣𑑂𑐖𑐶𑐒𑑂𑐐 𑐬𑑀𑐮) 𑐎𑐫𑐵𑑅 𑐩𑑂𑐴𑐶𑐟𑐵𑐡𑐷𑐩𑑂𑐴 𑐴𑐣𑐾𑐧𑐴𑐩𑑂𑐴 𑐨𑐺𑐐𑐸𑐬𑐵𑐩 𑐱𑑂𑐬𑐾𑐲𑑂𑐛 𑐏𑑅𑐳𑐵 𑐕𑐢𑐵𑑅 𑐥𑑂𑐫𑐵𑐏𑐣𑐫𑑂 𑐀𑐖𑑂𑐫𑐵𑑅𑐐𑐸 𑐴𑐾 𑐨𑐹𑐩𑐶𑐎𑐵 𑐀𑐬𑑂𑐠𑐵𑐟 𑐐𑐸𑐐𑐸𑑄𑐮𑐶𑐂 𑐣𑐵𑐫𑐎 𑐐𑐸𑐐𑐸𑑄𑐮𑐶𑐂 𑐏𑐮𑐣𑐵𑐫𑐎 𑐖𑐸𑐫𑐵𑑅 𑐩𑑂𑐴𑐶𑐟𑐵𑐡𑐷𑐩𑑂𑐴 𑐨𑐵𑐖𑐸 𑐱𑑂𑐬𑐷𑐎𑐺𑐲𑑂𑐞 ‘𑐀𑐞𑐸’ 𑐏𑑅 𑑋 𑐀𑐗 ‘𑐀𑐞𑐸’𑐖𑐸 𑐠𑑅𑐐𑐸 𑐴𑐾 𑐏𑑂𑐫𑐵𑐮𑐎𑐫𑑂 𑐣𑑄 𑐫𑐎𑑂𑐰 𑐩𑑂𑐴𑐶𑐟𑐵𑐡𑐷𑐐𑐸 𑐗𑐷𑐳𑑄 𑐳𑐶𑐄 𑑋

𑐰𑐫𑑂𑐎𑑅 𑐐𑐖𑑂𑐫𑐵𑑅𑐩𑑂𑐴 𑐢𑐵𑑅𑐳𑐵 𑐖𑐧 𑐰𑐫𑑂𑐎𑑅𑐫𑐵𑐟 (𑐀𑐳𑑄𑐫𑐵 𑐥𑐵𑐳𑐵 𑐥𑐸𑐔𑑅𑐫𑐵 𑐮𑐵𑐐𑐶𑑄) 𑐣𑐵𑐚𑐎 𑐩𑐵𑐮𑐷, 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂𑐫𑐵𑐠𑐵𑐫𑑂 𑐧𑑂𑐰𑐵𑑃𑐫𑑂 𑐗𑐵𑐂 𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂𑐫𑐵 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐕𑐢𑐵𑑅𑐥𑑂𑐫𑐵𑐏𑑄𑐟 ‘𑐀𑐞𑐸’𑐖𑐸𑑄 𑐴𑐾 𑐜𑐶𑐎𑑂𑐚𑐾𑐜 𑐫𑐵𑐣𑐵𑐧𑐶𑐄𑐐𑐸 𑐏𑑅 𑑋 𑐥𑑂𑐫𑐵𑐏𑑄𑐫𑐵 𑐣𑐶𑐬𑑂𑐡𑐾𑐱𑐎 𑐰 𑐥𑑂𑐫𑐵𑐏𑑄𑐩𑑂𑐰𑑅 𑐣𑑄 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐰𑐫𑑂𑐎𑑅 ‘𑐀𑐞𑐸’ 𑐴𑐾 𑑋 𑐕𑐐𑐹 𑐀𑐣𑑂𑐟𑐬𑑂𑐰𑐵𑐬𑑂𑐟𑐵𑐫𑑂 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂𑐣𑑄 𑐢𑐫𑐵𑐡𑐷𑐐𑐸 𑐖𑐶𑐟𑑅 𑐮𑐸𑐩𑑄𑐣𑐶, ‘𑐠𑑂𑐰 𑐥𑐵𑐳𑐵𑑄 (𑐱𑑂𑐬𑐷𑐎𑐺𑐲𑑂𑐞 ‘𑐀𑐞𑐸𑑄’) 𑐠𑑅𑐐𑐸 – 𑐥𑐵𑐳𑐵 𑐥𑐸𑐔𑑅𑐫𑐵) 𑐣𑐶𑑄𑐟𑐶𑑄 𑐖𑐶𑐟𑑅 𑐔𑑂𑐰𑐎𑐮, 𑐔𑑂𑐰𑐎𑐮 𑑋 𑐰𑑄 𑐖𑐶𑐟𑑅 𑐮𑐵 𑐣𑐾𑐥𑐵𑐮𑐨𑐵𑐲𑐵𑐫𑐵𑐩𑑂𑐴 𑐣𑐵𑐚𑐎𑐎𑐵𑐬 𑐴𑐾 𑐡𑐫𑐾𑐎𑐵𑐧𑐶𑐮 𑑋 𑐰 𑐣𑐵𑐥𑐫𑐵 𑐖𑐶𑐐𑐸 𑐳𑑂𑐰𑐵𑐥𑐹 𑐠𑐸𑐮𑐶 𑐎𑑂𑐰𑐵𑐟𑑂𑐟𑐸𑐎 𑐰 𑐡𑐸𑐐𑑂𑐫𑑄𑐎 𑐧𑑂𑐫𑐣𑐵𑐰𑐣, 𑐖𑐶 𑐨𑐵𑐰𑐫𑑂 𑐡𑐸𑐣𑐵𑑅 𑐴𑐵𑐮𑐵 𑐖𑐎 𑐧𑐷𑐩𑐵𑑅, 𑐰𑐫𑐵𑐐𑐸 𑐎𑐵𑐥𑐶𑐂 𑐰 𑐏𑑃 𑐣𑐵𑐚𑐎 𑐖𑐸𑐫𑐵𑐔𑑂𑐰𑐣𑐾 𑐢𑐸𑑄𑐎𑐷 … 𑐖𑐶𑐐𑐸 𑐣𑐵𑐚𑐎𑐫𑐵𑐟 𑐎𑐫𑐵𑑅 𑐳𑐸𑐣𑐵𑐣𑑄 𑐎𑐸𑑄𑐏𑐶𑐄𑑃𑐳𑐵 𑐖𑐎 𑐰 𑐩𑐸𑐎𑑂𑐎𑑄 𑐖𑐶𑐐𑐸 𑐫𑐵𑐣𑐵𑑅 𑐖𑐶𑑄 𑐎𑐵𑐫𑐾 𑐠𑑂𑐫𑐵𑑅, 𑐫𑐡𑐶 𑐳𑐸𑐣𑐵𑐣𑑄 𑐔𑑂𑐰𑐕𑐵𑐮 𑐢𑐵𑑅𑐳𑐵 𑐰 𑐩𑐸𑐎𑑂𑐎𑑄 𑐖𑐶𑐐𑐸 𑐴𑐾 𑐢𑐎𑐵𑑅 𑐑𑐫𑑂𑐳𑐸𑐂 𑐖𑐶 𑐩𑐕𑐵𑑅 𑑋’ (𑐡𑐸𑐬𑑂𑐐𑐵𑐮𑐵𑐮 𑐖𑐸𑐫𑐵𑐐𑐸 𑐕𑐢𑐵𑑅 𑐥𑑂𑐫𑐵𑐏𑑄 𑐳𑐩𑑂𑐧𑐣𑑂𑐢𑐷 𑐠𑐸𑐐𑐸 𑐥𑑄𑐎𑑂𑐟𑐶𑐫𑐵 𑐮𑐾𑐏𑐎𑐫𑐵 𑐱𑑀𑐢𑐐𑑂𑐬𑐣𑑂𑐠𑐫𑐵 𑐣𑐶𑐩𑑂𑐟𑐶 𑐧𑐶𑐫𑐵𑐡𑐷𑐐𑐸 𑐀𑐣𑑂𑐟𑐬𑑂𑐰𑐵𑐬𑑂𑐟𑐵𑐫𑑂 𑐄𑐮𑑂𑐮𑐾𑐏𑐶𑐟) 𑐩𑐾𑐐𑐸
𑐏𑑃, 𑐣𑑀𑐚𑐎𑐫𑐵 𑐜𑐶𑐎𑑂𑐚𑐾𑐜 𑐫𑐵𑐂𑐧𑐮𑐫𑑂 𑐠𑑅𑐟 𑐨𑐟𑐷𑐔𑐵 𑐔𑐶𑐟𑑂𑐟 𑐧𑐸𑐗𑐫𑑂 𑐩𑐖𑐹𑐐𑐸 𑐜𑐵𑐂𑐮𑐐 𑐰𑐮𑐎𑐶 𑐔𑑂𑐰𑐫𑐾𑐐𑐸 𑐴𑐾 𑐟𑐎𑑂𑐎 𑐡𑐶𑐣𑐵𑑅 𑐣𑑂𑐴𑑂𑐫𑐳𑑅 𑐟𑐫𑐾𑐐𑐸 𑐫𑐵𑐣𑐵𑐡𑐷 𑑋 𑐀𑐮𑐾 𑐡𑐸𑐬𑑂𑐐𑐵𑐮𑐵𑐮𑐖𑐸𑑄 𑐄𑐎𑐶𑐫𑐵𑐟 𑐨𑐶𑑄𑐎𑐾𑐐𑐸 𑐫𑐵𑐣𑐵𑐡𑐷 𑑋 ‘𑐀𑐞𑐸’𑐖𑐸𑐫𑐵 𑐠𑑂𑐰 𑐕𑐐𑐹 𑐧𑐵𑑄𑐮𑐵𑑅𑐐𑐸 𑐧𑐵𑐣𑐷 𑐏𑑅, 𑐐𑐸𑐎𑐶𑑄 𑐣𑐵𑐚𑐎𑐎𑐵𑐬 𑐡𑐸𑐬𑑂𑐐𑐵𑐮𑐵𑐮𑐖𑐸𑐫𑐵𑐟 𑐜𑐵𑐂𑐮𑐐 𑐡𑐫𑐾𑐎𑐾𑐐𑐸𑐮𑐷 𑐳𑐟𑐬𑑂𑐎 (𑐀𑐮𑐬𑑂𑐚) 𑐫𑐵𑐣𑐵𑐧𑐶𑐮 𑑋

𑐐𑐣 𑐟𑐎 𑐀𑐨𑐶𑐣𑐫𑐫𑐵 𑐏𑑃 𑐡𑐸, 𑐄𑐎𑐷 𑐣𑑄 𑐰𑐫𑑂𑐎𑑅 𑐥𑐹𑐰𑑄𑐎 𑐴𑐾 𑐳𑐦𑐮 𑐖𑐹𑐐𑐸 𑐏𑐣𑐾𑐡𑐸𑑋 𑐡𑐸𑐬𑑂𑐐𑐵𑐮𑐵𑐮𑐖𑐸𑐫𑐵𑐐𑐸 𑐕𑐢𑐵𑑅 𑐥𑑂𑐫𑐵𑐏𑑄𑐟 ‘𑐬𑐵𑐩𑐧𑐴𑐵𑐡𑐸𑐬 𑐳𑑄𑐳𑐵𑐬’ 𑐫𑑂 𑐩𑐵𑐳𑑂𑐚𑐬, 𑐖𑐐𑐡𑐷𑐱, ‘𑐟𑐟𑑅𑐖𑐵𑑅𑐐𑐸 𑐩𑐾𑐔’ 𑐫𑑂 𑐣𑑄 𑐕𑐩𑑂𑐴 𑐩𑐵𑐳𑑂𑐚𑐬, ‘𑐣𑐎𑐟𑐶𑐣𑐶 𑐮𑐹𑐐𑐸 𑐣𑐶𑐨𑐵𑑅’𑐮𑐫𑑂 𑐕𑐩𑑂𑐴 𑐧𑑂𑐬𑐩𑑂𑐴𑐸 𑐰 𑐰𑐫𑑂𑐎𑑅𑐫𑐵 𑐠𑑅𑐐𑐸 𑐴𑐾 𑐏𑑂𑐫𑐵𑐮𑑅 ‘𑐏𑑅𑐮𑐵 𑐩𑐏𑐸𑐮𑐵’𑐫𑑂 𑐏𑑂𑐫𑐵𑐮𑑅𑐩𑑂𑐰𑑅 𑐰𑐶𑐱𑑂𑐰𑐵𑐳 𑐖𑐸𑐫𑐵𑑅 𑐩𑑂𑐴𑐶𑐟𑐵𑐡𑐷𑐐𑐸 𑐖𑐶 𑐠𑐩𑑂𑐴𑑄 𑐴𑐾 𑐳𑑂𑐰𑐫𑐵𑐐𑐸 𑐡𑐸𑑋 𑐕𑐸𑑄 𑐴𑐾 𑐎𑐸𑑄𑐏𑐶𑐣𑐾𑐐𑐸 𑐠𑐵𑐫𑑂 𑐩𑐏𑐣𑐵, 𑐰𑐫𑑂𑐎𑑅𑐫𑐵 𑐀𑐨𑐶𑐣𑐫𑐫𑐵𑐟 𑐎𑐫𑐵𑑅 𑑋 𑐰𑐫𑑂𑐎𑑅 𑐠𑑅 𑐴𑐾 𑐣𑑄 𑐣𑐵𑐚𑐎 𑐰 𑐏𑑂𑐫𑐵𑐮𑑅𑐫𑐵 𑐳𑑂𑐫𑐮𑑂𑐮𑐵𑑅𑐩𑑂𑐴 𑐣𑐶𑐬𑑂𑐡𑐾𑐱𑐎 𑐖𑐹𑐐𑐸𑐮𑐶𑑄 𑐰𑐫𑑂𑐎𑑅𑐫𑐵 𑐀𑐨𑐶𑐣𑐫 𑐖𑐷𑐰𑐣𑑂𑐟 𑐖𑐹𑐐𑐸 𑐢𑐵𑐫𑐾𑐩𑐵𑑅 𑑋

𑐮𑐸𑐩𑑄𑐎𑐾𑐧𑐴𑐐𑐸 𑐕𑐟𑐵 𑐏𑑃 𑐕𑐸 𑐢𑐵𑑅𑐳𑐵 𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑔𑑘 𑐳𑐵𑐮𑐫𑑂 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 (𑐟𑐟𑑂𑐎𑐵𑐮𑐶𑐣 𑐬𑑀𑐫𑐮 𑐣𑐾𑐥𑐵𑐮 𑐊𑐎𑐾𑐡𑐾𑐩𑐶)𑐫𑐵 𑐡𑐧𑐸𑐮𑐷 𑐖𑐹𑐐𑐸 𑐕𑐢𑐵𑑅 𑐥𑑂𑐫𑐵𑐏𑑄𑐫𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐡𑐸𑐬𑑂𑐐𑐵𑐮𑐵𑐮𑐖𑐸𑐫𑐵𑐐𑐸 ‘𑐀𑐨𑑂𑐫𑐣𑑂𑐟𑐬𑐫𑐵 𑐔𑐶𑐮𑑂𑐮𑐵𑐫𑑂’ 𑐩𑑂𑐴𑐶𑐟𑐎𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐰 𑐥𑑂𑐫𑐵𑐏𑑄𑐫𑐵 𑐣𑐶𑐬𑑂𑐡𑐾𑐱𑐎 𑐰 𑐕𑐩𑑂𑐴 𑐥𑑂𑐫𑐵𑐏𑑄𑐩𑑂𑐰𑑅 𑐗𑐷 ‘𑐀𑐞𑐸’𑐖𑐸 𑐴𑐾 𑐖𑐸𑐫𑐵𑐔𑑂𑐰𑐣 𑑋 𑐄𑐐𑐸 𑐎𑐵𑐳𑐵𑐫𑑂 𑐊𑐎𑐾𑐡𑐾𑐩𑐷 𑐧𑐷𑐐𑐸 𑐣𑑂𑐫𑐵𑐐𑐹 𑐥𑐸𑐬𑐳𑑂𑐎𑐵𑐬 𑐩𑐢𑑂𑐫𑐾 𑐥𑑂𑐫𑑄𑐐𑐹 𑐥𑐸𑐬𑐳𑑂𑐎𑐵𑐬 𑐮𑐵 𑐰 𑐴𑐾 𑐥𑑂𑐫𑐵𑐏𑐣𑑄 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐖𑐵𑐣𑐎𑐵𑐬𑐷 𑐖𑐶𑐟𑑅 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐡𑐸𑑋 𑐥𑑂𑐫𑐵𑐏𑑄𑐫𑐵𑐟 𑐎𑐫𑐵𑑅 𑐔𑑂𑐰𑐂𑐩𑑂𑐴𑐾𑐳𑐶𑐣𑑄 𑐰 𑐥𑑂𑐫𑐵𑐏𑑄 𑐕𑐎𑑅 𑐳𑑂𑐰𑐫𑐾 𑐴𑐾 𑐩𑐵𑑅𑐐𑐸 𑐢𑐎𑐵𑑅 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐁𑑅 𑐣𑑄 𑐖𑐶𑐟𑑅 𑐗𑐮𑐗𑐮 𑐰𑑅 𑑋

𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑓𑑖 𑐳𑐵𑐮𑐫𑑂 𑐴𑐣𑐾𑐧𑐴𑐩𑑂𑐴 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐣𑐷𑐳𑑂𑐰𑐣 𑑋 𑐄𑐎𑐶𑐫𑐵𑐩𑑂𑐴 𑐕𑐩𑑂𑐴 𑐳𑐎𑑂𑐬𑐶𑐫 𑐡𑐸𑐖𑑅 𑐱𑑂𑐬𑐷𑐎𑐺𑐲𑑂𑐞 𑐡𑐵𑐂 𑐏𑑅 𑑋 𑐮𑐶𑐳𑑂𑐳𑐾𑑄 𑐰 𑐴𑐾 𑐳𑐵𑐮 𑐥𑐵𑐏𑐾 𑐬𑐑𑐸𑐖𑐷 𑐥𑐣𑑂𑐟𑐫𑐵 𑐳𑑄𑐬𑐎𑑂𑐲𑐎𑐟𑑂𑐰𑐫𑑂 𑐥𑑂𑐬𑐐𑐟𑐶𑐱𑐷𑐮 𑐮𑐾𑐏𑐎 𑐎𑐮𑐵𑐎𑐵𑐬 𑐳𑑄𑐑 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐄𑐎𑐶𑐫𑐵 𑐀𑐣𑑂𑐟𑐬𑑂𑐐𑐟 𑐱𑑂𑐬𑐷𑐎𑐺𑐲𑑂𑐞 𑐡𑐵𑐂𑐫𑐵𑐐𑐸 𑐳𑑄𑐫𑑀𑐖𑐎𑐟𑑂𑐰𑐫𑑂 𑐧𑐵𑐐𑐩𑐟𑐶 𑐀𑐘𑑂𑐔𑐮 𑐟𑐫𑐵𑐬𑐷 𑐳𑐩𑐶𑐟𑐶 𑐣𑐷𑐳𑑂𑐰𑐣 𑑋 𑐖𑐶 𑐠𑑅 𑐄𑐐𑐸 𑐳𑐩𑐶𑐟𑐶𑐫𑐵 𑐕𑐩𑑂𑐴 𑐡𑐸𑐖𑑅 𑐖𑐹𑐐𑐸𑐮𑐶𑑄 𑐰𑐫𑑂𑐎𑑅𑐫𑐵𑐟 𑐂𑐮𑐫𑑂𑐧𑑂𑐫𑐮𑐫𑑂 𑐣𑐵𑐥𑐮𑐵𑐫𑐾 𑐩𑐵𑑅𑐐𑐸 𑐖𑐹𑐰𑐣 𑑋 𑐰𑐫𑑂𑐎𑑅𑐮𑐶𑐳𑐾 𑐖𑐶𑐐𑐸 𑐳𑑂𑐰𑐵𑐥𑐹 𑐄𑐧𑐮𑐫𑑂 𑐣𑐶𑐳𑐾𑑄 𑐎𑑂𑐰𑐵𑐟𑐸𑐫𑐵𑐰𑑄𑐐𑐸 𑐏𑑅 𑑋 𑐕𑐸𑑄 𑐡𑑃 𑐮𑐶𑐥𑐵 𑐄𑐐𑐸 𑐳𑑄𑐑𑐫𑐵 𑐐𑐸𑐮𑐶𑑄 𑐣𑑂𑐴𑑂𑐫𑐮𑐸𑐰𑐵 𑐬𑐵𑐖𑐣𑐷𑐟𑐶𑐥𑐵𑐏𑐾𑑄 𑐰𑑄𑐐𑐸𑐮𑐶𑑄 𑐖𑐸𑐂𑐦𑐸, 𑐳𑑄𑐑 𑐣𑐶𑐳𑑂𑐎𑐺𑐫 𑐖𑐸𑐮 𑑋 𑐟𑐬 𑐣𑑂𑐴𑑂𑐫𑐵𑐐𑐸 𑐏𑑂𑐫𑐮𑐫𑑂 𑐮𑐐𑐫𑑂 𑐖𑐹𑐳𑐵𑑄 𑐳𑐶𑐬𑐶𑐫𑐳 𑐴𑐾 𑐖𑐸𑐂𑐩𑐵𑑅, 𑐏𑑂𑐫𑐵𑑅 𑐠𑐾𑑄 𑐣𑐷 𑐠𑐾𑑄 𑐩𑐏𑐸 𑐢𑐫𑐵𑐐𑐸 𑐰𑐫𑑂𑐎𑑅 ‘𑐀𑐞𑐸’ 𑐖𑐸𑐫𑐵 𑐐𑐸𑐐𑐸 𑐧𑐶𑐔𑐵𑑅 𑐏𑑅, 𑐰 𑐢𑐵𑑅𑐳𑐵 𑐖𑐶𑐎𑐾 𑐁𑑅 𑐣𑑄 𑐠𑑂𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐩𑐵𑑄𑐨𑐵𑐫𑑂𑐫𑐵 𑐳𑐾𑐰𑐵 𑐫𑐵𑐫𑐾𑐐𑐸𑐮𑐷 𑐖𑐶𑐟𑑅 𑐣𑑂𑐴𑑂𑐫𑐵𑐧𑑂𑐮𑐾𑑄 𑐴𑑅𑐥𑐵𑑅𑐧𑐶𑐫𑐵𑐔𑑂𑐰𑐣𑐷𑐥𑐶𑑄 𑐩𑐢𑑂𑐫𑐾 𑐕𑐩𑑂𑐴 𑐰𑐫𑑂𑐎𑑅 𑐣𑑄 𑐏𑑅 𑑋 𑐀𑐬𑑂𑐠𑐵𑐟 𑐖𑐶𑐐𑐸 𑐥𑑂𑐬𑐾𑐬𑐞𑐵𑐫𑐵 𑐕𑐐𑐹 𑐳𑑂𑐬𑑀𑐟 𑑋

𑐰𑐫𑑂𑐎𑐮𑑄 𑐠𑑅𑐟 𑐧𑐸𑐂𑐎𑐵𑐟𑑅𑐩𑑂𑐴 𑐩𑐵𑑄𑐫𑐵 𑐐𑐸𑐮𑐶 𑐳𑐾𑐰𑐵 𑐫𑐵𑐫𑐾𑐏𑐣, 𑐰 𑐖𑐶𑑄 𑐩𑐳𑐶𑐄, 𑐟𑐬 𑐨𑐵𑐲𑐵 – 𑐩𑐵𑑄 (𑐩𑐵𑑄𑐨𑐵𑐫𑑂) 𑐫𑐵 𑐳𑐾𑐰𑐵 𑐫𑐵𑐫𑐾𑐐𑐸𑐮𑐷 𑐢𑐵𑑅𑐳𑐵 𑐣𑑂𑐫𑐵𑐎𑑂𑐎 𑐴𑐾 𑐳𑐶𑐬𑐶𑐫𑐳 𑑋 𑐠𑐸𑐠𑐵𑐫𑑂 𑐮𑐸𑐩𑑄𑐎𑐾𑐧𑐴𑐐𑐸 𑐕𑐟𑐵 𑐏𑑃 𑐡𑐸, 𑐰𑐫𑑂𑐎𑐮𑑄 𑐴𑐾 𑐎𑐣𑐵𑐡𑐷𑐐𑐸 𑐰𑐶.𑐳𑑄. 𑑒𑑐𑑒𑑕 𑐳𑐵𑐮𑐥𑐵𑐏𑐾𑐫𑐵𑐐𑐸 𑐏𑑃 𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂𑐫𑐵𑐐𑐸 𑐕𑐢𑐵𑑅 𑐥𑑂𑐫𑐵𑐏𑑄 𑑋𑑋𑑋𑐬𑐵𑐩𑐧𑐴𑐵𑐡𑐸𑐬𑐫𑐵 𑐳𑑄𑐳𑐵𑐬’ 𑐠𑐵𑐫𑑂 𑐠𑐵𑐳𑐫𑑂 𑐎𑑂𑐫𑐣𑐵𑐔𑑂𑐰𑑄𑐐𑐸 𑐃 𑑋 𑐫𑐮𑐫𑑂 𑐥𑐡𑑂𑐩𑐎𑐣𑑂𑐫𑐵 𑐰𑐶𑐡𑑂𑐫𑐵𑐱𑑂𑐬𑐩 𑐰 𑐩𑐾𑐩𑐾𑐠𑐵𑐫𑑂 𑐫𑐵𑐣𑐵𑑅 𑐳𑑂𑐰𑐠𑐵𑐫𑑂 𑐟𑐶 𑐎𑑂𑐫𑐣𑐾 𑐢𑐸𑑄𑐎𑐵𑑅 𑐕𑐐𑐹 𑐥𑐸𑐳𑑂𑐟𑐎𑐵𑐮𑐫𑐫𑐵 𑐐𑑂𑐰𑐳𑐵𑐮𑐫𑑂 𑐰 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐥𑐵𑑅 𑐰𑐮 𑑋 𑐰 𑐎𑐸𑐣𑑂𑐴𑐸𑐫𑐵𑐐𑐸 𑐴𑐾 𑐡𑐶𑐣𑐫𑑂 𑐰𑐫𑑂𑐎𑑅 𑐄𑐐𑐸 𑐥𑑂𑐫𑐵𑐏𑑄𑐫𑐵 𑐖𑐐𑐡𑐷𑐱 𑐖𑐸𑐫𑐵𑑅 𑐩𑑂𑐴𑐶𑐟𑐾𑐩𑐵𑑅𑐩𑑂𑐴𑐾𑐳𑐶𑐟 𑐕𑐐𑐹 𑐧𑐖𑑂𑐬𑑄 𑐎𑑅𑐰𑐮 𑑋 𑐣𑐶𑐩𑑂𑐴𑑄 𑐣𑐵𑐥𑑄 𑐧𑐹𑐥𑐶𑑄 𑐩𑑂𑐴𑑂𑐫𑐵𑐫𑑂𑐥𑐶𑑄 𑐩𑐵𑐫𑐵 𑐰 𑐩𑐩𑐟𑐵 𑐩𑐢𑑂𑐫𑐾 𑐡𑐕𑐶 𑐡𑐸𑐩𑑂𑐴 𑐩𑐵𑐫𑐵 𑐩𑐣𑑂𑐟 𑑋 𑐗𑐵𑐬𑐵𑐧𑐵𑐣𑑂𑐟𑐵 𑐖𑐹𑐩𑑂𑐴 𑐰 𑐩𑐔𑐵𑐫𑐵𑐟 𑐳𑐸𑐠𑐫𑑂 𑐎𑑂𑐰𑐴𑐶𑐟𑐶𑐂 𑐢𑐬𑑂𑐩𑐵𑐣𑐣𑑂𑐡 𑐐𑐸𑐬𑐸𑐖𑐸𑐫𑐵 𑐠𑐵𑐫𑑂 𑐎𑑂𑐫𑐣𑐵𑑅 𑐰𑐫𑑂𑐎𑑅 𑐮𑐶𑐴𑐵𑑄 𑐗𑐵𑑅𑐐𑐸𑑋 𑐁𑑅 𑐮𑐵 𑐮𑑂𑐰𑐫𑑂 𑐎𑑂𑐰𑐮𑐵𑐂 𑐢𑐎𑐵𑑅 𑐐𑐸𑐬𑐸𑐖𑐸𑑄 𑐢𑐵𑑅𑐠𑐾 𑐰𑐫𑑂𑐎𑑅 𑐳𑑂𑐎𑐹𑐮 𑐣𑑄 𑐗𑐵𑑅𑐐𑐸𑑋 𑐟𑐬 𑐳𑑂𑐎𑐹𑐮𑑄 𑐮𑐶𑐴𑐵𑑄 𑐗𑐵𑑅𑐧𑐮𑐫𑑂 𑐰 𑐩𑐔𑐵 𑐩𑐡𑐫𑐵𑐔𑑂𑐰𑐣 𑐏𑐣𑐷 𑑋 𑐜𑐵𑐎𑑂𑐚𑐬 𑐣𑑄 𑐎𑑂𑐫𑐣𑐾 𑐴𑐾 𑐩𑐏𑐣 𑑋 𑐰 𑐎𑐸𑐣𑑂𑐴𑐸 𑐴𑐾 𑐣𑐵𑐚𑐎 𑐣𑑄 𑐎𑑂𑐫𑐣𑐾𑐩𑐵𑑅𑐐𑐸𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂 𑐗𑐵𑐮 𑑋 𑐁𑑅 𑐕𑐸 𑐫𑐵𑐫𑐾𑐐𑐸 𑐨𑐵𑐂 𑐢𑐫𑐵𑐡𑐶𑐮 𑑋 𑐥𑑂𑐫𑐵𑐏𑑄 𑐣𑐶𑑄 𑐎𑑂𑐫𑐣𑐾𑐐𑐸, 𑐀𑐮𑐾 𑐩𑐔𑐵 𑐳𑐶𑐠𑑄 𑐫𑑄𑐎𑐾𑐐𑐸 – ‘𑐀𑐞𑐸’𑐖𑐸𑑄 𑐮𑐶𑐳𑑅 𑐧𑐶𑐫𑐵𑐡𑐶𑐮 𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂𑐣𑑄,’ 𑐀𑐫𑑂 𑐨𑐵𑐂, 𑐩𑐏𑐸, 𑐣𑐵𑐚𑐎 𑐎𑑂𑐫𑐣𑐾 𑐩𑐏𑐸𑐟’ 𑐢𑐎𑐵𑑅 𑐖𑑂𑐫𑐵𑐗𑑂𑐰𑑅 𑐳𑑂𑐠𑐐𑐶𑐟 𑐫𑐵𑐣𑐵𑐡𑐶𑐮 𑑋 𑐠𑑂𑐰 𑐕𑐐𑐹 𑐰𑐫𑑂𑐎𑑅𑐫𑐵𑐐𑐸 𑐖𑐶𑐣𑑂𑐡𑐐𑐷𑐫𑐵 𑐀𑐰𑐶𑐳𑑂𑐩𑐬𑐞𑐷𑐫 𑐑𑐚𑐣𑐵 𑐏𑑅 𑑋

𑐀𑐳𑐣𑐫𑑂 𑐨𑑂𑐰𑐵𑐠𑑅𑐐𑐸 𑐕𑐾𑑃𑐫𑑂 𑐔𑑂𑐰𑑄𑐔𑑂𑐰𑐣𑐵𑐩𑑂𑐴 𑐖𑐶 𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑕𑑕 𑐳𑐵𑐮𑐥𑐵𑐏𑐾 𑐫𑐾𑑃𑐫𑑂 𑐐𑐮𑑂𑐎𑑀𑐥𑐵𑐏𑐵𑐫𑑂 𑐳𑐬𑐫𑑂 𑐖𑐸𑐫𑐵 𑑋 𑐰𑐫𑑂𑐎𑑅 𑐱𑑂𑐬𑐷𑐎𑐺𑐲𑑂𑐞 𑐡𑐵𑐂 𑐮𑐵 𑐗𑐣 𑐖𑐩𑐵𑐣𑐵𑐣𑐶𑐳𑐾𑑄 𑐟𑐥𑐶𑑄𑐟𑐵𑐫𑑂 𑐔𑑂𑐰𑑄𑐐𑐸 𑐣𑑂𑐴𑐹𑐐𑐸 𑐕𑐾𑑃𑐫𑑂 𑐔𑑂𑐰𑑄𑐗𑐵𑐫𑐾 𑐢𑐸𑑄𑐎𑐮 𑐏𑐣𑐷 𑑋 𑐮𑐶𑐥𑐵 𑐖𑐹𑐮𑐶𑐳𑐾 𑐰𑐫𑑂𑐎𑑅𑐫𑐵𑐟 𑐣𑐵𑐥𑐮𑐵𑐫𑐾𑐐𑐸 𑐣𑑄 𑐟𑐵𑐥𑐵𑐣𑐵 𑐰𑐣 𑑋 𑐳𑐣𑑂 𑑒𑑐𑑐𑑘 𑐳𑐾𑐥𑑂𑐚𑐾𑐩𑑂𑐧𑐬 𑐩𑐴𑐶𑐣𑐵𑐫𑑂 𑐖𑐶 𑐨𑐸𑐂𑐖𑑅𑐳𑐶𑐂 𑐰𑐶𑐥𑐱𑑂𑐫𑐣𑐵 𑐢𑑂𑐫𑐵𑐣 𑐫𑐵𑑅𑐰𑐣𑐵 𑑋 𑐀𑐣 𑐗𑐶𑐣𑑂𑐴𑐸 𑐟𑐎 𑐳𑐵𑐢𑐎𑐥𑐶𑑄𑐳𑑄 𑐣𑑂𑐰𑐰𑐵𑐫𑐾 𑐩𑐖𑐶𑐄 𑑋 𑐨𑑀𑐖𑐣 𑐫𑐵𑑅𑐰𑐣𑐾𑐠𑐵𑐫𑑂 𑐣𑑂𑐴𑐶𑑄 𑐣𑑂𑐴𑐶𑑄 𑐕𑐩𑑂𑐴 𑐮𑑂𑐫𑐵𑐫𑑂𑐩𑑂𑐴𑐔𑐵𑐩𑑂𑐴 𑐳𑐵𑐢𑐎 𑐟𑐸𑐐𑐸𑐬𑐸𑐎𑑂𑐎 𑐣𑐵𑐥𑐮𑐵𑐂 𑑋 𑐰𑑄 𑐖𑐶𑐟𑑅 𑐥𑐸𑐮𑐸𑐥𑐸𑐮𑐸 𑐳𑑂𑐰𑐫𑐵𑐔𑑂𑐰𑐣𑐷 𑑋 𑐮𑐶𑐥𑐵 𑐟𑐶𑐣𑐶 𑐳𑐶𑐮, 𑐰 𑐮𑐵 𑐱𑑂𑐬𑐷𑐎𑐺𑐲𑑂𑐞 ‘𑐀𑐞𑐸’𑐫𑐵 𑐎𑐵𑐣𑑂𑐕𑐵𑐩𑑂𑐴 𑐎𑐵𑐫 𑐳𑐐𑐸𑐣 𑐣𑐎𑐬𑑂𑐩𑐶 𑐖𑐸𑐫𑐵𑐔𑑂𑐰𑐣 𑐏𑐣𑐷 𑑋 𑐠𑑅 𑐀𑐧𑐸 𑐩𑑂𑐴𑑄 𑐩𑐦𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐖𑐶𑐟𑑅 𑐰 𑐩𑐔𑐵𑑄 𑐧𑐶𑐮 𑑋

𑐕𑐸𑑄 𑐡𑐶𑐣 𑐮𑐶𑐥𑐵 𑐖𑐶 𑐰𑐫𑑂𑐎𑑅𑐥𑐶𑐣𑐶𑐐𑐸 𑐕𑐾𑑃𑐫𑑂 𑐠𑑂𑐫𑐣 𑑋 𑐖𑐶𑐟𑑅 𑐏𑐣𑐾𑐰𑑄 𑐱𑑂𑐬𑐷𑐎𑐺𑐲𑑂𑐞 𑐡𑐵𑐂𑐫𑐵 𑐕𑐾𑑃𑐖𑑅𑐥𑐶𑑄 𑐮𑐫𑑂𑐟𑐵𑐫𑐵𑐡𑐶𑐮 𑑋 𑐡𑐸𑐬𑑂𑐐𑐵𑐮𑐵𑐮 𑐡𑐵𑐂 𑐰 𑐩𑐮𑑂𑐮𑐥𑐶𑑄 (𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬) 𑐣𑑄 𑐀𑐣 𑐗𑐵𑑅 𑐢𑐫𑐵𑐐𑐸 𑐖𑐶𑑄 𑐳𑐶𑐮 𑑋 𑐱𑑂𑐬𑐷𑐎𑐺𑐲𑑂𑐞 𑐡𑐵𑐂𑐫𑐵 𑐧𑐵𑐠𑐬𑐸𑐩𑐫𑑂 𑐩𑑂𑐰𑑅 𑐮𑑂𑐴𑐹𑐗𑐵𑑅𑐧𑐮𑐫𑑂 𑐡𑐫𑐵𑑅 𑐀𑐔𑐵𑐎𑐮𑐶𑑄 𑐡𑐵𑑅𑐐𑐸 (𑐥𑐵𑐬𑐵𑐮𑐵𑐂𑐳𑐶𑐳 𑐖𑐹𑐐𑐸) 𑐖𑐸𑐫𑐵𑐔𑑂𑐰𑐣 𑑋 𑐰𑐫𑑂𑐎𑑅𑐫𑐵 𑐧𑑀𑐮𑐶 𑐥𑑂𑐬𑐲𑑂𑐚 𑐩𑐖𑐹 𑑋 𑐣𑑂𑐫𑐵𑐳𑐶 𑐣𑑄 𑐰𑐣𑐾 𑐩𑐦𑐸𑑋 𑐎𑐵𑐫𑐩𑑂𑐴𑑄 𑐖𑑂𑐰𑐣𑐵𑑅 𑐣𑑂𑐫𑐵𑐳𑐶𑐎𑐷𑐧𑐮𑐫𑑂 𑐣𑑄 𑐏𑐸𑐟𑑂𑐫𑐵𑑄 𑐏𑐸𑐟𑑂𑐫𑐵𑑄 𑐎𑐵𑑅 𑑋 𑐕𑐥𑐵 𑐟𑐸𑐟𑐶 𑐔𑐮𑐫𑑂 𑐩𑐖𑐹𑑋 ‘𑐧𑐵𑐫𑐵 𑐥𑐵𑐳𑐵 𑐩𑐵𑐢𑐰 𑐥𑑂𑐬𑐢𑐵𑐣’ 𑐢𑐎𑐵𑑅 𑐖𑐶𑐐𑐸 𑐩𑑂𑐴𑐳𑐷𑐎𑐵 𑐧𑐶𑐮 𑐳𑐐𑐸𑐣𑑄 𑑋 𑐐𑐬𑑂𑐏𑐾𑐳𑐾 𑐏𑑂𑐰𑐵𑑅 𑐟𑐫𑐵𑐔𑑂𑐰𑑄𑐩𑑂𑐴 𑐰𑐫𑑂𑐎𑑅𑐫𑐵 𑐏𑑂𑐰𑐵𑑅 𑐕𑐟𑑂𑐠𑐸𑑄 𑐔𑐎𑐣𑐵𑐰𑐮 𑑋 𑐣𑑂𑐴𑐶𑐮𑐵𑑅 𑐮𑑂𑐴𑐵𑑅 𑐩𑐶𑐮𑐫𑑂 𑐫𑐵𑐟, 𑐩𑐵𑐣𑑀𑑄 𑐖𑐶𑐣𑐵𑐥 𑐰𑐫𑑂𑐎𑑅𑐫𑐵 𑐐𑐧𑐮𑐾𑑄 𑐔𑐩𑐧𑐸𑐂𑐐𑐸 𑐁𑐟𑑂𑐩𑐷𑐫𑐟𑐵 𑐡𑐸𑑋 𑐰𑐫𑑂𑐎𑐮𑑄 𑐣𑑂𑐰𑐰𑐵𑐣𑐵𑐡𑐷𑐐𑐸 𑐣𑑄 𑐏𑑅, 𑐟𑐬 𑐖𑐶𑑄 𑐢𑑂𑐰𑐵𑐠𑐸𑐂𑐎𑐾𑐩𑐦𑐸 𑑋 𑐟𑑅𑐢𑐶𑐎𑑅𑐩𑑂𑐴 𑐎𑐵𑐫 𑐳𑑄𑐖𑐫 𑐣𑑄 𑐰𑐫𑑂𑐎𑑅𑐫𑐵𑐟 𑐖𑑂𑐰𑐣𑐵𑑅 𑐎𑑂𑐰𑐠𑐵𑐫𑑂 𑐂𑐬𑐸𑐠𑐶𑐬𑐸 𑐫𑐵𑐎𑐵𑑅 𑐧𑑂𑐫𑐵𑐫𑐵𑐩 𑐫𑐵𑐎𑐮 𑑋 𑐴𑑂𑐫𑐵𑐄𑑃𑐩𑐳𑑂𑐟𑐫𑑂𑐟 𑐎 𑐏 𑐐 𑐑 𑐧𑑂𑐰𑑄𑐎𑐷 𑐠𑐾𑑄 𑐄𑐔𑑂𑐔𑐵𑐬𑐞 𑐫𑐵𑐎𑐵𑑅 𑐣𑑂𑐰𑐰𑐵𑐫𑐾𑐐𑐸 𑐀𑐨𑑂𑐫𑐵𑐳 𑐣𑑄 𑐫𑐵𑐎𑐮 𑑋 𑐑𑑁𑐕𑐶𑑄 𑐩𑐫𑐵𑐎 𑐖𑐶 𑐀𑐣 𑐔𑑂𑐰𑐣𑐵𑑅 𑐐𑐦 𑐫𑐵𑐣𑐵𑐔𑑂𑐰𑐣𑐵 𑑋 𑐥𑐶𑐴𑐵𑑄 𑐰𑐫𑐾 𑐟𑑂𑐫𑐫𑐾𑐎𑐵𑑅 𑐱𑑂𑐬𑐷𑐎𑐺𑐲𑑂𑐞 𑐡𑐵𑐂𑐫𑐵𑐎𑐾 𑐧𑐶𑐡𑐵 𑐦𑑂𑐰𑐣𑐵 𑑋 𑐮𑑂𑐴𑐵𑑅 𑐩𑐶𑐮𑐫𑑂 𑐫𑐵𑐣𑐵 𑑋 𑐰𑐫𑑂𑐎𑐮𑑄 𑐐𑐧𑐵𑐫𑑂𑐟 𑐖𑐶𑐐𑐸 𑐮𑑂𑐴𑐵𑑅 𑐎𑑂𑐰𑐵𑐟𑑂𑐟𑐸𑐎 𑐖𑑂𑐰𑐣𑐵𑐟𑐮 𑑋 𑐳𑐵𑐫𑐡 𑐖𑐶𑐥𑐶𑑄 𑐐𑐧𑐮𑐾𑑄 𑐧𑐵𑐫𑐾𑐩𑑂𑐰𑐵𑑅𑐮𑐾𑐩𑐵 𑐢𑐎𑐵𑑅 𑐳𑑄𑐎𑐮𑑂𑐥 𑐫𑐵𑐣𑐵𑐡𑐷𑐐𑐸 𑐖𑐸𑐂𑐦𑐸 𑑋

𑐮𑐶𑐥𑐵 𑐖𑐶𑐐𑐸 𑐮𑑂𑐴𑐵𑑅𑐥𑐵 𑐨𑐵𑐐𑐶 𑐫𑐵𑐣𑐵𑑅𑐟𑐶𑐣𑐶 𑐟𑑂𑐰𑑅𑐟𑐵𑐡𑐶𑐮 𑑋 𑐰𑐫𑑂𑐎𑑅𑐫𑐵 𑐕𑐾𑐖𑑅𑐥𑐶𑑄𑐳𑑄 𑐧𑐬𑑀𑐧𑐬 𑐗𑐵𑐳𑑃 𑐢𑐫𑐵𑐡𑐶𑐮 𑑋 𑐀𑐧𑐮𑐫𑑂 𑐖𑐶𑑄 𑐩𑐟𑐶𑐂 𑐴𑐾 𑐩𑐟𑐫𑐵 𑐎𑐶 𑐰𑐫𑑂𑐎𑑅𑐣𑐵𑐥𑐫𑐵 𑐖𑐶𑐐𑐸 𑐨𑐾𑐚𑐑𑐵𑐚 𑐰 𑐴𑐾 𑐀𑐣𑑂𑐟𑐶𑐩 𑐖𑐸𑐂 𑐢𑐎𑐵𑑅 𑑋 𑐰𑐫𑑂𑐎𑑅𑐫𑐵𑐟 𑐥𑐵𑐬𑐵𑐮𑐵𑐂𑐳𑐶𑐳 𑐖𑐹𑐐𑐸 𑐔𑑂𑐫𑐵𑐡𑑃 𑐦𑐸𑐣𑐵𑑅 𑐐𑐸𑐡𑑃 𑐎𑑂𑐫𑑄𑐧𑐮𑐫𑑂 𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑗𑑒 𑐳𑐵𑐮 𑐁𑐲𑐵𑐝 𑑒𑑗 𑐐𑐟𑐾 𑑗𑑒 𑐡𑑃𑐫𑐵 𑐄𑐩𑐾𑐬𑐫𑑂 𑐩𑐡𑐸𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐀𑐣𑑂𑐟𑐶𑐩 𑐀𑐰𑐳𑑂𑐠𑐵𑐫𑑂 𑐨𑐔𑐵 𑐳𑐵𑐳𑑂𑐟𑐶 𑐣𑐫𑐾𑐩𑐵𑐮 𑑋 𑐏𑑂𑐫𑐵𑐮𑐎𑑄 𑐴𑐾 𑐖𑐶𑐣𑑂𑐡𑐐𑐷 𑐣𑑂𑐴𑑂𑐫𑐵𑐎𑐵𑑅 𑐡𑐸𑐣𑐶𑐫𑐵𑑃𑐫𑐵𑐟 𑐣𑑂𑐴𑐷𑐎𑐾𑐦𑐸𑐩𑑂𑐴 𑐰𑐫𑑂𑐎𑑅𑐫𑐵𑐟 𑐡𑐿𑐰𑑄𑐣𑑄 𑐏𑑂𑐰𑐫𑐾𑐎𑐮 𑑋 𑐩𑑂𑐴 𑐳𑐵𑑅𑐥 𑐴𑐾 𑐐𑐮𑐫𑑂 𑐖𑐹𑐐𑐸𑐮𑐶𑑄 𑐮𑐵𑐳𑐵𑐫𑑂 𑐖𑐎 𑐐𑑂𑐰𑐵𑐬𑐵𑐟𑐸𑐮𑐵 𑐔𑑂𑐰𑐣𑐾𑐩𑐵𑐮 𑑋 𑐕𑐐𑐹 𑐴𑐾 𑐥𑑀𑐖𑐶𑐳𑐣𑐫𑑂 𑐖𑐎 𑐐𑑂𑐰𑐵𑐬𑐵𑐟𑐸𑐟𑐸𑑄 𑐐𑑂𑐰𑐵𑐬𑐵𑐟𑐸𑐟𑐸. 𑐩𑑂𑐴𑐫𑑂 𑐑𑐵𑑅𑐑𑐵𑑅 𑐖𑐸𑐮 𑑋 𑐮𑐶𑐥𑐵 𑐣𑐶𑐩𑑀𑐣𑐶𑐫𑐵 𑐖𑐸𑐫𑐵𑑅 𑐱𑐸𑐨𑐾𑐎𑑂𑐲𑐵 𑐀𑐳𑑂𑐥𑐟𑐵𑐮𑐫𑑂 𑐥𑑂𑐬𑐵𑐞 𑐟𑑂𑐫𑐵𑐐 𑐫𑐵𑐫𑐾𑐩𑐵𑐮 𑑋 𑐰𑐫𑑂𑐎𑑅 𑐩𑐡𑐸𑐐𑐸 𑐮𑐟𑑂𑐫𑐵𑐫𑐵 𑐟𑐶𑐠𑐶𑐂 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐖𑐸𑐫𑐵 𑐩𑐵𑐬𑑂𑐩𑐶𑐎 𑐎𑐰𑐶𑐟𑐵 ‘𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳’ 𑐥𑐟𑐶𑐂 𑐥𑐶𑐴𑐵𑑄𑐰𑑅𑐐𑐸 𑐖𑐸𑐫𑐵𑐔𑑂𑐰𑐣, 𑐐𑐸𑐐𑐸 𑐠𑐠𑐾 𑐡𑐸 :

𑐮𑑅 𑐕𑐥𑐵𑐳𑑅 𑐖𑐶𑐐𑐸 𑐕𑐣𑑂𑐟 ‘𑐀𑐞𑐸’
𑐏𑑅 𑐖𑐶𑑄 𑐔𑐵𑐫𑑂𑐎𑑄 𑐴𑐾 𑐩𑐔𑑂𑐰𑐫𑐵 𑐏𑑅
𑐕𑐣𑑂𑐟 𑐎𑐫𑐵𑑅 𑐱𑑂𑐬𑐷 𑐎𑐺𑐲𑑂𑐞 ‘𑐀𑐞𑐸’
𑐔𑑂𑐰𑐫𑐵𑑄 𑐧𑑂𑐰𑐣𑐷𑐥𑐶., 𑐏𑑂𑐰𑐫𑐵𑑄 𑐣𑑂𑐫𑐣𑐷𑐥𑐶𑑄
𑐩𑐏𑐣𑐵 𑐠𑐣 𑐖𑐶𑑄 𑐳𑐸 𑐡𑐸 𑐩𑐣𑐹

𑐮𑑂𑐰𑐴𑑃𑐟𑐫𑑂 𑐖𑐎 𑐴𑐾 𑐏𑑂𑐰𑐧𑐶 𑐴𑐵𑐫𑑂𑐎𑐹𑐳𑐵𑑄
𑐖𑐸𑐮 𑐖𑑂𑐰𑐷𑐩𑐵𑑅 𑐀𑐰𑐱𑑂𑐫 𑐥𑐸𑐏𑐹
𑐟𑐬 𑐠𑐣 𑐣𑐸𑐐𑐮𑐫𑑂 𑐐𑑂𑐰𑑅𑐐𑐸 𑐳𑐸𑐫𑐵𑑄 𑐣𑑄
𑐔𑐵𑑅𑐐𑐸 𑐕𑐟𑐶𑑄 𑐩𑐏𑐸 𑐐𑐫𑑂 𑐰 𑐔𑐸𑐎𑐹 𑑋

𑐩𑑂𑐰𑐵𑐣𑐵𑑅 𑐖𑐎 𑐴𑐾 𑐳𑐶𑐟 𑐏𑑅𑐳𑐵 𑐣𑑄
𑐐𑐫𑑂 𑐕 𑐟𑐬𑐫𑑂 𑐖𑑂𑐰𑐷 𑐱𑑂𑐬𑐷𑐎𑐺𑐲𑑂𑐞
𑐠𑐸𑐥𑐶𑑄, 𑐠𑐸𑐥𑐶𑑄 𑐩𑑂𑐰𑐵𑑅𑐠𑐾𑑄 𑐖𑐎 𑐔𑑂𑐰𑑄𑐥𑐶𑑄
𑐀𑐐𑐟𑐶 𑐳𑐩𑐵𑐖 𑐠𑐷𑐎𑑄 𑐣𑑄
𑐏𑑅 𑐣𑐶𑐱𑑂𑐔𑐶𑐫 𑐣𑑄 𑐡𑐾 𑐨𑐖𑑂𑐫𑐣 𑐏𑑅

𑐟𑐬 𑐐𑐧𑐮𑐾𑑄 𑐣𑑄 𑐩𑐣𑑂𑐟 𑐩𑐏𑐸
𑐩𑐣𑑂𑐟 𑐕 𑐏𑑅𑐳𑐵𑑄 𑐣𑑄 𑐕𑑄𑐐𑐸 𑐩𑑂𑐴𑐐𑐳𑐫𑐵
𑐩𑐏𑐸 𑐠𑑂𑐰 𑐏 𑐴𑐾 𑐩𑐏𑐸, 𑐀𑐣𑑂𑐟 𑐩𑐏𑐸

𑐴𑐶𑐬𑑀𑐱𑐶𑐩𑐵𑐫𑐵 𑐧𑑃𑐫𑑂𑐮𑐵 𑐴𑐵𑐣𑑄
𑐴𑑂𑐰𑐂 𑐴𑐾 𑐰𑐮 𑐳𑐵 𑐄𑐮𑐶 𑐴𑐾 𑐳𑑂𑐰𑐵𑑄
𑐖𑑂𑐰𑐷 𑐣𑐾𑐥𑐵𑑅 𑐣𑑄 𑐣𑐾𑐥𑐵𑑅 𑐴𑐾 𑐖𑑂𑐰𑐷
𑐕𑑄𑐐𑐸 𑐩𑑂𑐴𑐐𑐳𑐫𑐵 𑐨𑐶𑑄𑐐𑐸 𑐥𑐸𑐳𑐵𑑄 𑑋

𑐔𑐶𑐣𑐵𑐏𑑃 𑐧𑑂𑐰𑐣𑐵𑑅 𑐖𑐶𑐐𑐸 𑐩𑐶𑐏𑐵𑐫𑑂 𑐮𑑅 𑐖𑐵𑐫𑐵𑐰𑐮 𑑋 𑐕𑐗𑐵𑑅 𑐖𑐶 𑐣𑑄 𑐣𑐬𑐨𑐳𑑂 𑑋 𑐄𑐐𑐸 𑐔𑐶𑐣𑐵𑐏𑑃𑐫𑐵𑐟 𑐦𑑂𑐬𑐾𑐩𑐫𑑂 𑐔𑐚𑑂𑐚 𑐟𑐫𑐵𑑅 𑐳𑑄𑐖𑐫𑑄 𑐎𑑂𑐰𑐠𑐵𑐫𑑂 𑐧𑑂𑐰𑐫𑐵𑐟𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑑅𑐐𑐸 𑐕𑐾𑑃𑐫𑐵 𑐴𑐵𑐩𑐵𑐫𑐵𑐟 𑐠𑐸𑐎𑐠𑑄 𑐱𑑂𑐬𑐡𑑂𑐢𑐵 𑐟𑐫𑐵𑑅 𑐮𑐸𑐩𑑄𑐎𑐾𑐐𑐸 𑐟𑐳𑐎𑑄 𑐧𑐵𑑄𑐮𑐵𑑅𑐐𑐸 𑐏𑑅 𑑋 𑐖𑐶 𑐣𑑄 𑐰𑐫𑑂𑐎𑑅 ‘𑐀𑐞𑐸’𑐖𑐸𑐫𑐵 𑐡𑐾𑐣𑐫𑐵𑐟 𑐮𑐸𑐩𑑄𑐎𑐵 𑐰𑐫𑑂𑐎𑑅𑐫𑐵 𑐎𑐺𑐟𑐶𑐫 𑐕𑐎𑑅 𑐩𑐶𑐏𑐵 𑐧𑑂𑐰𑐫𑐵 𑑋

‘𑐏𑑅 𑐮𑐵 𑐩𑐏𑐸𑐮𑐵’
𑐣𑐾𑐥𑐵𑐮 𑐳𑐩𑑂𑐰𑐟 𑑑𑑐𑑙𑑗 𑐳 𑐐𑐸𑑄𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐫𑐾𑑃𑐫𑐵 𑐥𑐵𑐳𑐵𑐥𑐸𑐔𑑅 𑐥𑐵𑐏𑐾𑑄 ‘𑐀𑐞𑐸’𑐖𑐸𑐫𑐵 𑐏𑑅𑐮𑐵 𑐩𑐏𑐸𑐮𑐵 𑐏𑑂𑐫𑐵𑐮𑐶𑐥𑑂𑐰𑐵𑑃𑐫𑑂 𑐥𑐶𑐴𑐵𑑄𑐰𑑅𑐐𑐸 𑐏𑑅 𑑋 𑐗𑐶𑐥𑐸 𑐏𑑂𑐫𑐵𑐮𑑅 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑐠𑐸𑐎𑐷 𑑋 𑐡𑐎𑑂𑐰𑑄 𑐰𑐶.𑐳𑑄. 𑑒𑑐𑑒𑑓 𑐳𑐵𑐮 𑐣𑐶𑐳𑐾𑑄 𑑒𑑐𑑓𑑔 𑐟𑐎 𑐀𑐬𑑂𑐠𑐵𑐟 𑐥𑐘𑑂𑐔𑐵𑐫𑐟 𑐎𑐵𑐮𑐫𑑂 𑐔𑑂𑐰𑐫𑐵𑐟𑑅𑐐𑐸 𑐏𑑅 𑑋 𑐳𑐦𑐸𑐮𑐶𑐂 𑐥𑑂𑐬𑐎𑐵𑐱𑐎 𑐥𑐵𑐳𑐵 𑐥𑐸𑐔𑐮𑑄 𑐠𑐸𑐎𑐠𑑄 𑐮𑐳𑐟𑐵 𑐥𑑂𑐰𑑄𑐎𑐵𑐟𑐮, 𑑋 ‘𑐀𑐞𑐸’𑐖𑐸𑐫𑐵 𑐠𑑂𑐰 𑐏𑑂𑐫𑐵𑐮𑑅 𑐎𑑂𑐰𑐵𑐟𑐶𑑄 𑐖𑐶𑐩𑐶𑐟 𑐰𑐶𑐱𑑂𑐰𑐵𑐳 𑐡𑐸, 𑐐𑐸𑐮𑐶𑐳𑐶𑐟𑑄 𑐥𑐴𑐮𑐩𑐵𑐣𑐫𑐵 𑐑𑐵𑑃𑐫𑑂𑐑𑐵𑑃𑐫𑑂 𑐧𑐵𑐖𑑂𑐫𑐵 𑐴𑐮𑐩𑐵𑐣 𑐫𑐵𑐣𑐵𑐧𑐶𑐄𑐳𑐵 𑐐𑐸𑐮𑐶𑐳𑐶𑐟𑑄 𑐁𑑄𑐐𑑂𑐳𑐵𑑄 𑐣𑐶𑐳𑐾𑑄 𑐎𑐫𑑂𑐟𑐵 𑐟𑐎 𑐨𑐸𑐂𑐔𑑅𑐟𑐶 𑐣 𑐴𑐵𑐫𑐾𑐎𑐾 𑐩𑐵𑐫𑐾𑐎 𑐳𑐵𑐟𑑂𑐟𑐸 𑐰𑑄𑐎𑐵 𑐧𑐷𑐦𑐸 𑑋 𑐀𑐠𑐾 𑐴𑐾 𑑋𑑋𑑋𑐀𑐞𑐸’𑐖𑐸𑑄 𑐠𑑂𑐰 𑐳𑐦𑐹𑐫𑐵𑐟 𑐖𑐶𑐐𑐸 𑐗𑐶𑑄𑐣𑑂𑐴𑐫𑑂𑐡𑑃𑐫𑐵 𑐥𑐮𑐵𑐏𑑂𑐰𑐵𑑃𑐫𑑂 𑐢𑐫𑐵𑐡𑐷𑐐𑐸 𑐡𑐸𑑋 𑐠𑐖𑑂𑐫𑐵𑑅𑐐𑐸 𑐳𑐦𑐹 𑐴𑐵𑐣𑑄 𑐕𑐵𑐥𑐫𑑂 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋

‘𑐏𑑅 𑐮𑐵 𑐩𑐏𑐸𑐮𑐵’ 𑐰𑐫𑑂𑐎𑑅𑐫𑐵𑐟 𑐣𑐵𑑄𑐖𑐵𑑅𑐩𑑂𑐴 𑐏𑑂𑐫𑐵𑐮𑑅 𑐔𑑂𑐰𑐩𑐶 𑐎𑐠𑑄 𑐩𑑂𑐴𑐳𑐷𑐎𑐵 𑐧𑐶𑐄𑐐𑐸 𑐡𑐸𑑋 𑐄𑐐𑐸 𑐏𑑂𑐫𑐵𑐮𑐶𑐥𑑂𑐰𑐵𑑃𑐫𑑂 𑐩𑐢𑑂𑐫𑐾 ‘𑐐𑑂𑐰𑐵𑐫𑑂 𑐥𑐶𑐫𑐵 𑐳𑐸𑐏𑑂𑐢𑑂𑐫𑐵𑑄’, ‘𑐏𑐶𑐏𑐵𑑄𑐩𑐸𑐐𑑅’, ‘𑐟𑑄𑐧𑐿𑑄𑐎’, ‘𑐮𑑂𑐫𑐵𑑅𑐔𑐵𑑅’, ‘𑐏𑑅𑐮𑐵 𑐩𑐏𑐸𑐮𑐵’ 𑐁𑐡𑐶 𑐔𑐬𑑂𑐔𑐶𑐟 𑐏𑑂𑐫𑐵𑐮𑑅 𑐏𑑅 𑑋 ‘𑐐𑑂𑐰𑐵𑐫𑑂 𑐥𑐶𑐫𑐵𑑅 𑐳𑐸𑐏𑑂𑐢𑑂𑐫𑐵𑑄𑐫𑑂𑐮𑐫𑑂 𑐣𑑂𑐴𑐷𑐎𑐷𑐐𑐸 𑐏𑑃 𑐫𑐎𑑂𑐰 𑐡𑐸, 𑐟𑐬 𑐐𑐸𑐎𑐶𑐫𑐵𑐟 𑐢𑑂𑐫𑐵𑐔𑐹 𑐣𑐎𑐹𑐐𑐸 𑐏𑑅 𑐰 𑐢𑐵𑑅𑐳𑐵 𑐨𑐔𑐵 𑐥𑑂𑐬𑐲𑑂𑐚 𑐩𑐖𑐹𑐐𑐸 𑐡𑐸𑑋 𑐥𑑂𑐬𑑁𑐝 𑐳𑑂𑐎𑐹𑐮𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟 𑐐𑐠𑐾 𑐖𑐸𑐂 𑐢𑐵𑑅𑐳𑐵 𑐨𑐔𑐵 𑐥𑑂𑐬𑐲𑑂𑐚 𑐩𑐖𑐹𑐐𑐸 𑐡𑐸𑑋 𑐣𑐾𑐥𑐵𑐮 𑐳𑑄𑐰𑐟𑑂 𑐫𑐵 𑐮𑐵 (𑐩𑐴𑐶𑐣𑐵) 𑐫𑐵 𑐣𑐵𑑄 𑐢𑐵 𑐢𑐵𑐂𑐧𑐮𑐫𑑂 𑐳𑐸𑐣𑐵𑐣𑑄 𑐢𑐵𑐫𑐾 𑐦𑐂𑐩𑐏𑐸𑑋 𑐐𑐸𑐮𑐶𑐳𑐶𑐣𑑄 𑐣𑐫𑐾𑐐𑐸 𑐮𑐵𑐫𑐵 𑐣𑐵𑑄 𑐢𑐵𑐂, 𑐎𑐔𑐶𑐮𑐵, 𑐥𑐸𑐎𑐵𑐮𑐵, 𑐡𑐵𑐫𑐾𑐎𑐵𑐮𑐵 𑐁𑐡𑐶 𑐢𑐫𑐵𑑅 𑐐𑐸𑐮𑐶𑐳𑐶𑐣𑑄 𑐩𑐶𑐳𑑂𑐟𑐫𑑂𑐐𑐸 𑐣𑐵𑑄 𑐎𑐵𑐂, 𑐬𑐩𑐮𑐵, 𑐰𑐶𑐩𑐮𑐵, 𑐀𑐩𑐮𑐵 𑐁𑐡𑐶 𑐢𑐵𑐂 𑑋 𑐁𑐏𑐶𑐬𑐫𑑂 𑐩𑐵𑐳𑑂𑐚𑐬𑑄 𑐴𑐾 𑐣𑑂𑐫𑑃 𑐧𑐵𑐄𑐥𑐶𑑄 𑐢𑐎𑐵𑑅 𑐎𑐣𑐷𑐧𑐮𑐫𑑂 𑐩𑐵𑐳𑑂𑐟𑐬𑐫𑐵𑐎𑐾 𑐣𑑄 𑐧𑐵𑑄𑐮𑐵𑐎 𑐰𑐂𑐩𑐏𑐸𑑋 𑐠𑑂𑐰 𑐣𑑄 𑐕𑐐𑐹 𑐢𑑂𑐫𑐵𑐔𑐹 𑐏𑑅 𑑋 𑐠𑑅𑐎𑐾 𑐣𑑄 𑐮𑐵 (𑐩𑐴𑐶𑐣𑐵) 𑐫𑐵 𑐣𑐵𑑄 𑐩𑐰𑐫𑐾𑐰𑑄 𑐥𑑂𑐰𑐵𑑅 𑐳𑑂𑐫𑐵𑐟 𑐢𑐎𑐵𑑅 𑐔𑑅𑐧𑐶𑐂 𑐧𑑂𑐰𑐵𑑄𑐰𑐣𑐷 𑑋 𑐮𑐶𑐥𑐵 𑐡𑐸𑐴𑐵𑑄 𑐰𑐂𑐧𑐮𑐫𑑂 𑐴𑐣𑐸𑐩𑐵𑐣 𑐌𑐫𑐵 𑐧𑐵𑐏𑑄 𑐎𑑃𑐎𑑄 𑐮𑐶𑐦𑑅 𑐳𑑂𑐰𑐂𑐧𑐮𑐫𑑂 𑐧𑑀𑐬𑑂𑐜𑐫𑑂 𑐔𑑂𑐰𑐫𑐵𑐟𑑅𑐐𑐸 𑐮𑑂𑐫𑐵𑐳𑐾𑐫𑐵 𑐎𑐶𑐥𑐵 𑐏𑐣𑐷 𑑋 𑐠𑑅𑐟 𑐩𑐳𑑂𑐟𑐫𑑂𑐳𑑄 𑐴𑐾𑐥𑐫𑑂 𑐫𑐵𑐟 𑐟𑐷𑐳 𑐳𑐵𑐮 𑐰𑐮𑐎𑐶 𑐳𑐶𑐂𑐎𑐵 𑐟𑐷𑐳 𑐳𑐵𑐮𑑄 𑐁𑐏𑐮𑐫𑑂 𑐨𑑂𑐰𑐏𑐵𑐫𑑂 𑐧𑑂𑐰𑐂 𑐢𑐎𑐵𑑅 𑐟𑑄𑐔𑐵𑐫𑐵 𑐰𑐣𑐷 𑑋 𑐰𑐶𑐡𑑂𑐫𑐵𑐬𑑂𑐠𑐷𑐟 𑐢𑐵𑑅𑐳𑐵 𑐁𑑅 𑐁𑐏𑑅 𑐴𑐾 𑐧𑑂𑐰𑐣𑐾 𑐩𑑂𑐰𑐵𑑅𑐮 𑐢𑐎𑐵𑑅 𑐗𑐣 𑐮𑐫𑑂𑐟𑐵𑐫𑐵𑑅 𑐩𑑂𑐫𑐾 𑐴𑐵𑐴𑐵𑑄 𑐥𑐶𑐴𑐵𑑄 𑐰𑐣𑐷 𑑋

𑐟𑐷𑐳𑑄 𑐳𑐵𑐮𑑄 𑐱𑐶𑐎𑑂𑐲𑐵𑐫𑑂 𑐨𑐸𑐏𑐵𑐫𑑂 𑐧𑑂𑐰𑐂 𑐢𑐎𑐵𑑅 𑐐𑐸𑐐𑐸 𑐩𑐵𑐳𑑂𑐚𑐬𑐫𑐵𑐟 𑐢𑐵𑐫𑐾𑐎𑐵 𑐟𑐮, 𑐰 𑐢𑐵𑑅𑐳𑐵 𑐨𑐔𑐵 𑐥𑑂𑐬𑐳𑑂𑐚 𑐩𑐖𑐹𑐐𑐸 𑐳𑐷𑐡𑐸𑑋 𑐏𑑃 𑐕𑐸 𑐢𑐵𑑅𑐳𑐵 𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑓𑑐 𑐳𑐵𑐮𑐫𑑂 𑐣𑑂𑐴𑐹𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶 𑐢𑐫𑐵𑐐𑐸 𑐮𑐵𑐐𑐹 𑐖𑐸𑐮 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐀𑐥𑑂𑐳𑐣𑐮 𑐰𑐶𑐲𑐫𑐫𑐵 𑐬𑐸𑐥𑐫𑑂 𑐟𑐫𑐵𑑅 𑐳𑑂𑐎𑐹𑐮 𑐱𑐶𑐎𑑂𑐲𑐵𑑄 𑐥𑐶𑐟𑐶𑐣𑐾𑐐𑐸 𑐠𑑂𑐰 𑐲𑐜𑐫𑐣𑑂𑐟𑑂𑐬 𑐏𑑅 𑑋

𑐩𑐾𑐏𑐾, ‘𑐏𑐶𑐏𑐵𑑄𑐩𑐸𑐐𑑅’ 𑐣𑐵𑑄𑐐𑐸 𑐏𑑂𑐫𑐵𑐮𑑅 𑐬𑐵𑐖𑐣𑐿𑐟𑐶𑐎 𑐰𑐶𑐲𑐫𑐣𑐵𑐥 𑐳𑐩𑑂𑐧𑐣𑑂𑐢𑐶𑐟 𑐏𑑅 𑑋 𑐄𑐐𑐸 𑐂𑐮𑐫𑑂 (𑐥𑑄𑐔𑐵𑐫𑐟 𑐎𑐵𑐮𑐫𑑂) 𑐐𑐸𑐮𑐶 𑐣𑑄 𑐰𑐶𑐎𑐵𑐳 𑐰 𑐥𑑂𑐬𑐐𑐟𑐶𑐫𑐵 𑐳𑐩𑐵𑐔𑐵𑐬 𑐥𑑂𑐬𑐱𑐵𑐬𑐞 𑐖𑐸𑐮, 𑐰𑐵𑐳𑑂𑐟𑐰𑐫𑑂 𑐥𑐶𑐣𑐾 𑐀𑐖𑑂𑐫𑐵𑑅𑐐𑐸 𑐕𑐸𑑄 𑐏𑐣𑐾𑐩𑐡𑐸𑑋 𑐰 𑐡𑐎𑑂𑐰𑑄 𑐰 𑐩𑐵𑐂𑐎𑐫𑑂 𑐏𑐶𑐏𑐵𑑄𑐩𑐸𑐐𑑅 𑐖𑐸𑐫𑐵𑑅 𑐠𑐵𑐣𑐵𑐔𑑂𑐰𑐣 𑐢𑐎𑐵𑑅 𑐄𑐎𑐶𑐫𑐵𑐟 𑐟𑐕𑑂𑐫𑐵𑐂𑐐𑐸 𑐏𑑅 𑑋 𑐀𑐠𑐾𑐴𑐾 ‘𑐮𑑂𑐫𑐵𑑅𑐔𑐵𑑅’ 𑐏𑑂𑐫𑐵𑐮𑐎𑐫𑑂 𑐢𑑂𑐰𑑄𑐮𑐵𑑅 𑐢𑐂𑐩𑑂𑐴 𑐳𑐵𑐴𑐸𑐣𑑄 𑐠𑑅𑐠𑐵𑐫𑑂 𑐣𑑀𑐎𑐬𑐷 𑐟𑑂𑐰𑑅𑐟𑐵 𑐰𑐣𑐾𑐟𑑂𑐫𑑄𑐩𑑂𑐴 𑐢𑑂𑐰𑐵𑑄𑐖𑐸𑐫𑐵𑐟 𑐮𑑂𑐫𑐵𑑅𑐔𑐵𑐮𑐫𑑂 𑐢𑑂𑐰𑑄 𑐮𑐵𑐣𑐵𑑅 𑐴𑐵𑐣𑑄 𑐠𑑅𑐠𑐵𑐫𑑂 𑐴𑐾 𑐟𑐫𑐾𑐟 𑐳𑑂𑐰𑐂𑐐𑐸 𑐏𑑅 𑑋

𑐩𑐾𑐐𑐸 𑐏𑑂𑐫𑐵𑐮𑑅 𑐟𑑄𑐧𑐿𑑄𑐎 𑐮𑐵 𑐚𑐾𑐮𑐶𑐨𑐶𑐖𑐣𑑄 𑐴𑐾 𑐥𑑂𑐬𑐱𑐵𑐬𑐞 𑐣𑑄 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸𑑋 𑐡𑐾𑐱𑐫𑑂 𑐐𑐸𑐮𑐶𑐳𑐶𑐫𑐵𑑄 𑐟𑑄 𑐳𑐶𑐎𑑂𑐎 𑐀𑐥𑑂𑐰, 𑐐𑐸𑐮𑐶𑐳𑐶𑐫𑐵𑑄 𑐠𑐸𑐮𑐶 𑐟𑑄 𑐩𑑂𑐴𑑀 𑐎𑐶 𑐕𑑂𑐫𑐣𑐫𑑂 𑐏𑑁 𑐕𑑂𑐫𑐵𑑅𑐳𑐵𑑄 𑐣𑑂𑐴𑐶𑐮𑐵𑐔𑑂𑐰𑐣𑐷 𑑋 𑐟𑑄𑐫𑐵𑐐𑐸 𑐴𑐾 𑐰𑐶𑐲𑐫𑐫𑑂 𑐖𑐹𑐐𑐸 𑐕𑐟𑑂𑐰𑐵𑑅𑐔𑐵 𑐏𑑃𑐮𑑂𑐴𑐵𑐧𑐮𑑂𑐴𑐵 𑐐𑐠𑐾 𑐡𑐸 ” 𑐥𑐵𑐬𑑂𑐚𑐣𑐬 : 𑐖𑐶𑐩𑐶 𑐕𑐾𑑃𑐫𑐵𑐩𑑂𑐴 𑐕𑐩𑑂𑐴 𑐣𑑄 𑐕𑐸𑑄 𑐴𑐾 𑐢𑐵𑐫𑐾 𑐖𑐶𑐄𑐐𑐸 𑐩𑐏𑐸 𑐟𑑄 𑐔𑐵𑐂𑐐𑐸𑑋 𑐰𑑄 𑐕𑐠𑐸 𑐕𑐠𑐸
𑐟𑑄 𑐥𑐶𑐎𑐵𑐂𑐧𑐮𑐫𑑂 𑐎𑐶𑐩𑐶 𑐳𑐷𑐐𑐸 𑐰𑐵𑐳𑑅 𑐴𑐾 𑐣𑐫𑐾𑐩𑑂𑐰𑐵𑑅 𑐖𑐶 𑐜𑐵. 𑐳𑐵. :𑐀𑐫𑑂𑐳𑐵 𑐁𑐫𑐣𑑂𑐚𑐶𑐥𑐵𑐫𑑂𑐬 𑐎𑐵 𑐕𑐶𑐎𑐥𑐶𑐣𑐶 𑐖𑐴𑐵𑐣 𑐥𑐵𑐬𑑂𑐚𑐣𑐬 : 𑐐𑐣 𑐁𑐫𑑂𑐣𑑂𑐚𑐶𑐥𑐵𑐫𑑂𑐬𑐫𑐵 𑐏𑑃, 𑐳𑐵𑐂𑐣𑑂𑐚𑑀𑐮𑐵𑐂𑐣 𑐳𑐶𑐧𑐾𑑄 𑐣𑑄 𑐔𑐬𑑂𑐎𑑀 𑐎𑐵 𑑋 𑐰𑑄 𑐩𑐶𑐏𑐵𑑄 𑐕𑐎𑑅 𑐠𑐫𑑂𑐎 𑐖𑑂𑐰𑐫𑑂𑐥𑐶𑐫𑐵𑑅 𑐳𑑂𑐰𑐂𑐧𑐮𑐫𑑂 𑐥𑑂𑐰𑐵𑑅 𑐕𑐐𑐮𑑄 𑐳𑐬𑑂𑐐𑐟𑐫𑑂 𑐣𑑃 𑐣𑑂𑐫𑐵𑑅 𑐠𑐾𑑄 𑐑𑐸𑐬𑑂𑐬𑐬𑑂𑐬 𑐑𑐵𑐬𑑂𑐬𑐬 𑐣𑑂𑐫𑐵𑐣𑐵𑑅 𑐎𑐣𑑂𑐴𑐫𑑂 𑐐𑑂𑐰𑑄𑐐𑑅 𑐩𑐴𑐵𑑅𑐣𑐶𑐧𑐮𑐫𑑂 𑐴𑐾 𑐕𑐾𑐬𑐥𑐵𑐟 𑐎𑐵 – 𑐩𑐴𑐵𑐨𑐵𑐬𑐟𑐫𑐵 𑐫𑐸𑐡𑑂𑐢𑐫𑑂 𑐎𑑁𑐬𑐰𑐟 𑐳𑐶𑐣𑐵𑐔𑑂𑐰𑐣𑐷 𑐠𑐾𑑄 𑐥𑐵𑐂𑐏𑐵𑐣𑐵 𑐕𑐐𑐸𑐮𑐶𑑄 𑐎𑐶𑐩𑐶𑐫𑐵 𑐎𑐶𑐩𑐶 𑐔𑐟𑐵𑐰𑐵𑐣𑐵 𑐔𑑂𑐰𑐣𑐷𑐐𑐸 𑑋

𑐠𑑂𑐰 𑐏𑑂𑐫𑐵𑐮𑑅𑐫𑐵 𑐣𑐵𑐚𑐎𑐷𑐫𑐟𑐵 𑐥𑐹𑐰𑑄𑐎 𑐣𑐶𑐬𑑂𑐰𑐵𑐴 𑐖𑐹𑐐𑐸𑐮𑐶𑑄 𑐳𑑂𑐰𑐫𑐾𑐧𑐮𑐫𑑂 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 𑐏𑑂𑐫𑐵𑐮𑑅𑐫𑐵 𑐀𑐣𑑂𑐟𑐥𑐵𑐏𑐾 𑐟𑑄 𑐖𑑂𑐰𑐫𑐵𑑅 𑐩𑐶𑑄 𑐣𑐮 𑐢𑐎𑐵𑑅 𑐴𑐮𑑂𑐮𑐵 𑐫𑐵𑐂 𑑋 𑐡𑐩𑐎𑐮 𑐳𑑅𑐟𑐹𑐳𑐵𑑄 𑐰𑐂𑐩𑐏𑐸, 𑐟𑑄 𑐳𑑂𑐫𑐵𑐫𑐾𑐐𑐸 𑐖𑑂𑐫𑐵 𑐡𑐩𑐎𑐮𑑄 𑐫𑐵𑐂𑐩𑐏𑐸 𑐢𑐎𑐵𑑅 𑑋 𑐡𑐩𑐎𑐮𑑄 𑐎𑐩𑐞𑑂𑐜𑐮 𑐎𑑂𑐫𑐣 𑐢𑐎𑐵𑑅 𑐏𑑂𑐫𑐵𑐮𑑅𑐩𑑂𑐰𑑅𑐟 𑐧𑐶𑐳𑑂𑐫𑐸𑑄 𑐰𑐣𑐷 𑑋

𑐰 𑐳𑐶𑐧𑐾𑑄 𑐣𑑄 𑐧𑐶𑐳𑑂𑐎𑑄𑐐𑐸 𑐏𑑂𑐫𑐵𑐮𑑅 ‘𑐏𑑅 𑐮𑐵 𑐩𑐏𑐸𑐮𑐵’ 𑐏𑑅 𑑋 𑐔𑑂𑐰𑐩𑐶 ‘𑐀𑐞𑐸’𑐖𑐸𑐫𑐵𑐟 𑐡𑐎𑐮𑐫𑑂 𑐫𑑅𑐐𑐸 𑐏𑑂𑐫𑐵𑐮𑑅 𑐣𑑄 𑐠𑑂𑐰 𑐴𑐾 𑐖𑐸𑐂𑐦𑐸, 𑐕𑐵𑐫𑑂𑐎𑐶 𑐳𑐦𑐹𑐫𑐵 𑐣𑑄 𑐴𑐾 ‘𑐏𑑅 𑐮𑐵 𑐩𑐏𑐸𑐮𑐵’ 𑐟𑐫𑐵𑐡𑐶𑐮 𑑋 𑐩𑐵𑐟𑑂𑐬 𑐣𑐶𑐩𑑂𑐴 𑐥𑐵𑐟𑑂𑐬 𑐰𑐶𑐱𑑂𑐰𑐵𑐳 𑐰 𑐰𑐶𑐰𑐾𑐎𑐫𑐵 𑐏𑑃𑐮𑑂𑐴𑐵𑐧𑐮𑑂𑐴𑐵𑑄 𑐠𑑂𑐰 𑐏𑑂𑐫𑐵𑐮𑑅 𑐣𑑂𑐴𑑂𑐫𑐵𑐎𑐵𑐟𑑅𑐐𑐸 𑐏𑑅 𑑋 𑐰𑐶𑐱𑑂𑐰𑐵𑐳 𑐢𑐫𑐵𑐩𑑂𑐴 𑐏𑑂𑐫𑐵𑐮𑑅𑐩𑑂𑐰𑑅 𑐠𑐸𑐮𑐶 𑐐𑑂𑐰𑐵𑐖𑑂𑐫𑑅 𑐎𑐶 𑐰𑐫𑐵𑐟 𑐣𑑂𑐴𑑂𑐫𑐵𑐐𑐸𑑄 𑐏𑑅 𑐮𑐵 𑐩𑐏𑐸𑐮𑐵 𑐖𑐸𑐂𑐐𑐸𑑋 𑐰𑐫𑐵𑐟 𑐮𑑂𑐫𑐵𑐫𑑂𑐩𑑂𑐴 𑐖𑐹𑐐𑐸, 𑐩𑐶𑐳𑐵 𑐳𑑂𑐰𑑅 𑐰𑐣𑐵𑐐𑐸, 𑐧𑑂𑐫𑐵𑐴𑐵 𑐫𑐵𑐣𑐵𑐐𑐸, 𑐩𑐔𑐵𑐫𑐵 𑐀𑐧𑐸 𑐖𑐹𑐐𑐸, 𑐡𑐾𑐱𑐫𑑂 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑑅𑐐𑐸, 𑐩𑐶𑐳𑐵𑑄 𑐮𑐨 𑐫𑐵𑑅𑐐𑐸 𑐟𑐬 𑐢𑑂𑐫𑐧𑐵 𑐡𑐸𑐩𑑂𑐴𑐾𑐳𑐶𑐎𑐾 𑐥𑐫𑑂𑐣𑑄 𑐰𑑄𑐐𑐸 𑐁𑐡𑐶 𑐡𑐎𑑂𑐰 𑐡𑐎𑑂𑐰𑑄 𑐏𑑅 𑐮𑐵 𑐩𑐏𑐸𑐮𑐵 𑐖𑐸𑐮 𑐢𑐎𑐵𑑅 𑐢𑑂𑐫𑐵𑐔𑐹 𑐧𑑂𑐰𑐫𑐵𑐟𑑅𑐐𑐸 𑐡𑐸𑑋 𑐩𑐾𑐩𑑂𑐴 𑐏𑑂𑐫𑐵𑐮𑑅𑐩𑑂𑐰𑑅 𑐰𑐫𑐵 𑐴𑐾 𑐥𑐵𑐳𑐵 𑐰𑐶𑐰𑐾𑐎𑑄 𑐰𑐫𑐵𑐟 𑐮𑑂𑐰𑐫𑑂 𑐟𑐟𑑅𑐐𑑂𑐰𑑅𑐐𑐸 𑐣𑑂𑐴𑑂𑐫𑐥𑐸𑐟𑐳𑐾𑑄 𑐠𑑅𑐠𑑅𑐐𑐸 𑐳𑑂𑐰𑐵𑐬𑑂𑐠 𑐳𑐶𑐡𑑂𑐢 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐖𑐎 𑐨𑐖𑐣 𑐫𑐵𑐂𑐐𑐸𑐮𑐶𑑄 𑐂𑐩𑐶𑐐𑐸 𑐐𑐖𑐶𑐫𑐵 𑐎𑐸𑑄 𑐰𑐶𑐱𑑂𑐰𑐵𑐳𑐫𑐵𑐟 𑐰 𑐮𑑂𑐰𑐫𑑂 𑐖𑐹𑐐𑐸 𑐢𑐵𑐂 𑑋

𑐥𑑂𑐬𑐳𑑂𑐟𑐸𑐟 𑐳𑐦𑐸𑐮𑐶𑐂 𑐡𑐸𑐠𑑂𑐫𑐵𑑅𑐐𑐸 𑐟𑑅𑐐𑐹 𑐏𑑂𑐫𑐵𑐮𑑅 𑐩𑑂𑐴𑐶𑐟𑐎𑐵𑑅 𑐳𑐶𑐬𑐥𑐵𑑅 𑐣𑑄 𑐟𑑂𑐫𑐵𑐎𑐹𑐐𑐸 𑐡𑐸𑑋 𑐠𑑂𑐰 𑐮𑑂𑐫𑐵𑐏𑑄 𑐣𑑄 𑐀𑐞𑐸𑐖𑐸 𑐕𑐩𑑂𑐴 𑐣𑐵𑑄𑐖𑐵𑑅𑐩𑑂𑐴 𑐮𑑀𑐎𑑄𑐴𑑂𑐰𑐵𑑅𑐩𑑂𑐴 𑐏𑑂𑐫𑐵𑐮𑑅 𑐔𑑂𑐰𑐩𑐶 𑐎𑐠𑑄 𑐳𑑂𑐠𑐵𑐥𑐶𑐟 𑐖𑐹𑐐𑐸 𑐡𑐸 𑐢𑐵𑐫𑐾𑐩𑐵𑑅 𑑋 𑐀𑐣𑑂𑐟𑐫𑑂, 𑐰𑐫𑑂𑐎𑑅𑐫𑐵 ‘𑐏𑑅 𑐮𑐵 𑐩𑐏𑐸𑐮𑐵’ 𑐧𑑂𑐰𑐣𑐵𑑅 𑐖𑐶𑐟𑑅 𑐰𑐫𑑂𑐎𑑅 𑐩𑐡𑐸𑐐𑐸 𑐣𑑄 𑐏𑑅 𑐮𑐵 𑐩𑐏𑐸𑐮𑐵 𑐖𑐸𑐫𑐵𑐰𑐮 𑑋

 

𑐩𑐵𑐢𑐰𑐮𑐵𑐮 𑐥𑑂𑐬𑐢𑐵𑐣