𑐖𑐐𑐟 𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐫𑐵 𑑓𑑓 𑐡𑑃 𑐧𑐸𑐣𑑂𑐴𑐶

𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐟𑐵𑐟𑐸𑐣𑐵𑑅 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐔𑐵𑐫𑐾𑐎𑐹𑐐𑐸 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑑓𑑓 𑐡𑑃 𑐎𑑂𑐫𑑄𑐐𑐸 𑐡𑐸 𑑋 𑐠𑑂𑐰 𑐮𑐳𑐟𑐵𑐫𑑂 𑐰𑑄𑐐𑐸 𑐦𑐵𑐐𑐸𑐣 𑑑𑑒 𑐐𑐟𑐾 𑐱𑐸𑐎𑑂𑐬𑐰𑐵𑑅 𑐧𑑂𑐰𑐣𑐾𑐎𑐸𑐠𑐶𑐫𑐵 𑐠𑑅𑐐𑐸 𑐴𑐾 𑐳𑐨𑐵𑐎𑐎𑑂𑐲𑐵𑐫𑑂 𑐧𑐸𑐣𑑂𑐴𑐶 𑐴𑐣𑐵 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋

𑐧𑑂𑐰𑐣𑐾𑐎𑐸𑐠𑐶 𑐳𑑄𑐔𑐵𑐮𑐎 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐥𑑂𑐬𑐵. 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐧𑐸𑐣𑑂𑐴𑐶 𑐴𑐣𑐵 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐮𑐸𑐩𑑂𑐧𑐶𑐣𑐷 𑐧𑑁𑐡𑑂𑐢 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐥𑐸𑐮𑐵𑑄𑐩𑑂𑐴 𑐄𑐥𑐎𑐸𑐮𑐥𑐟𑐶𑐮𑐶, 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣𑐮𑐶𑐳𑐾𑑄 𑐂𑐟𑐶𑐴𑐵𑐳𑐰𑐶𑐡𑑂 𑐥𑑂𑐬𑐵. 𑐜𑐵. 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄𑐥𑐵𑐏𑐾𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐳𑐸𑐣𑐶𑐟𑐵 𑐩𑐵𑐣𑐣𑑂𑐢𑐬𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐣𑐾𑐎𑐸𑐠𑐶𑐂 𑐣𑐷𑐣𑑂𑐫𑐵𑐡𑑃 𑐟𑐎 𑐳𑐾𑐰𑐵 𑐫𑐵𑐣𑐵𑐡𑐷𑐩𑑂𑐴 𑐮𑐾𑐏𑐵𑐥𑐵𑐮 𑐰𑐶𑐖𑐫𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐳𑑂𑐫𑐣𑐵𑐩𑐶 𑐬𑑀𑐱𑐣𑐵 𑐱𑐵𑐎𑑂𑐫𑐫𑐵𑐟 𑐩𑑂𑐴𑐟𑐶𑑄 𑐕𑐐𑐹 𑐕𑐐𑐹 𑐮𑐏 𑐰 𑐣𑐷𑐡𑑃 𑐟𑐎 𑐱𑐶𑐎𑑂𑐲𑐞𑐫𑑂 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐩𑑂𑐴 𑐣𑐵𑐬𑐵𑐫𑐞𑐡𑐾𑐰𑐷 𑐩𑐵𑐣𑐣𑑂𑐢𑐬𑐫𑐵𑐟 𑐔𑐫𑑂𑐡𑑂𑐰𑑅 𑐟𑐎𑐵 𑐡𑐵𑑄𑐮𑐶𑐳𑐾𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑑄𑐟 𑐩𑐹𑐥𑐵𑐴𑐵𑑄 𑐥𑑂𑐬𑐵. 𑐜𑐵. 𑐩𑐵𑐣𑐣𑑂𑐢𑐬𑑄 𑐴𑐣𑐵𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑐨𑐵𑐣𑐵𑐫𑑅 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐡𑐵𑑄 𑐰 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴 𑐥𑑂𑐬𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷𑑄 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐠𑐸𑐎𑐠𑑄 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐮𑐵𑐫𑐣𑑂𑐳 𑐎𑑂𑐮𑐧 𑐀𑐦 𑐴𑐵𑐬𑐟𑐷𑐩𑐵𑐟𑐵𑐫𑐵 𑐳𑐩𑐣𑑂𑐰𑐫𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐶𑑄𑐟𑐶𑑄 𑐧𑐖𑐾𑐚 𑐰𑐶𑐣𑐶𑐫𑑀𑐖𑐣 𑐫𑐵𑐣𑐵𑐡𑐷𑐩𑑂𑐴 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐶𑐬𑑂𑐡𑐾𑐱𑐎𑐮𑐶𑐳𑐾𑑄 𑐰𑐶𑐟𑑂𑐟 𑐰𑐶𑐨𑐵𑐐 𑐥𑑂𑐬𑐩𑐸𑐏 𑐧𑐸𑐡𑑂𑐢𑐬𑐟𑑂𑐣 𑐩𑐵𑐣𑐣𑑂𑐢𑐬𑐫𑐵𑐟 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐀𑐠𑐾 𑐴𑐾 𑑒𑑐𑑗𑑘 𑐳𑐵𑐮𑐫𑐵 𑐊𑐳𑐂𑐂 𑐥𑐬𑐷𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑐫𑐵𑐡𑐷𑐩𑑂𑐴 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑐹𑐬𑑂𑐞𑐶𑐩𑐵 𑐟𑐸𑐮𑐵𑐢𑐬 𑐰 𑐮𑐹𑐖𑑅 𑐏𑐜𑑂𑐐𑐷𑐫𑐵𑐟 𑐰𑐶𑐬𑐘𑑂𑐔𑐷 𑐩𑑀𑐟𑐶𑐩𑐵𑐫𑐵 𑐰 𑐱𑐵𑐣𑑂𑐟𑐶 𑐳𑐶𑐬𑐥𑐵𑑅 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑑄𑐟 𑐩𑐹𑐥𑐵𑐴𑐵𑑄𑐥𑐵𑐏𑐾𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅𑐳𑐵 𑐡𑐵𑐟𑐵 𑐐𑐸𑐴𑑂𑐫𑐾𑐱𑑂𑐰𑐬𑐷𑐬𑐵𑐖 𑐩𑐵𑐣𑐣𑑂𑐢𑐬 𑐰 𑐡𑐵𑐟𑐵 𑐱𑐵𑐣𑑂𑐟𑐶 𑐩𑐵𑐣𑐣𑑂𑐢𑐬𑐫𑐵𑐥𑐵𑐏𑐾𑑄 𑐖𑑂𑐘𑐵𑐣𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬 𑐡𑐵𑑄 𑐳𑐶𑐬𑐥𑐵𑑅 𑐰 𑐐𑐸𑐠𑐶𑐫𑐵 𑐩𑐵𑐫𑐵 𑐩𑐵𑐣𑐣𑑂𑐢𑐬𑑄 𑐥𑐡𑐎 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑑒𑑐𑑗𑑘 𑐳𑐵𑐮𑐫𑐵 𑐊𑐳𑐂𑐂 𑐥𑐬𑐷𑐎𑑂𑐲𑐵 𑐄𑐟𑑂𑐟𑐷𑐬𑑂𑐞 𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑑄𑐟 𑐮𑐸𑐩𑐣𑑂𑐟𑐶 𑐔𑐶𑑄 𑐰 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐠𑐷𑐠𑐷 𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐣𑑄 𑐳𑐸𑐨𑐵𑐫𑑂 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄 𑐥𑑂𑐬𑐵. 𑐜𑐵. 𑐩𑐵𑐣𑐣𑑂𑐢𑐬, 𑐰𑐶𑐱𑐾𑐲 𑐥𑐵𑐴𑐵𑑄 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴 𑐥𑑂𑐬𑐵. 𑐖𑑀𑐱𑐷, 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵𑐥𑐶𑑄𑐳𑑄 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐠𑐷𑐠𑐷 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋