𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐂 𑐧𑑁𑐡𑑂𑐢 𑐰𑐎𑑂𑐟𑐺𑐟𑑂𑐰𑐎𑐮𑐵 𑐥𑐬𑑂𑐰

 

𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑐥𑐬𑐶𑐫𑐟𑑂𑐟𑐶 𑐎𑐾𑐣𑑂𑐡𑑂𑐬𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐱𑐣𑐶𑐰𑐵𑑅 𑐧𑑁𑐡𑑂𑐢 𑐰𑐎𑑂𑐟𑐺𑐟𑑂𑐰𑐎𑐮𑐵 𑐥𑐬𑑂𑐰 𑐖𑐸𑐮 𑑋 𑐣𑐾𑐥𑐵𑐮𑐩𑐞𑑂𑐜𑐮𑐰𑑂𑐫𑐵𑐥𑐷 𑐧𑑁𑐡𑑂𑐢 𑐰𑐎𑑂𑐟𑐺𑐟𑑂𑐰𑐎𑐮𑐵 𑐥𑐬𑑂𑐰 𑐩𑐹𑐐𑐸𑐠𑐶𑐫𑐵 𑐂𑐣𑐵𑐥𑐫𑑂 𑐎𑐾𑐣𑑂𑐡𑑂𑐬𑐫𑐵 𑐐𑑂𑐰𑐳𑐵𑐮𑐫𑑂 𑐣𑐷𑐐𑐸𑐎𑑂𑐰𑑅𑐐𑐸 𑐣𑐾𑐥𑐵𑐮𑐩𑐞𑑂𑐜𑐮𑐰𑑂𑐫𑐵𑐥𑐷 𑐧𑑁𑐡𑑂𑐢 𑐰𑐎𑑂𑐟𑐺𑐟𑑂𑐰𑐎𑐮𑐵 𑐥𑐬𑑂𑐰 𑐖𑐹𑐐𑐸 𑐏𑑅 𑑋

𑐎𑐾𑐣𑑂𑐡𑑂𑐬𑐫𑐵 𑐎𑐾𑐣𑑂𑐡𑑂𑐬𑐵𑐢𑑂𑐫𑐎𑑂𑐲 𑐩𑐵𑐫𑐵 𑐩𑐵𑐣𑐣𑑂𑐢𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐱𑑂𑐬𑐡𑑂𑐢𑐾𑐫 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫 𑐩𑐴𑐵𑐳𑑂𑐠𑐰𑐶𑐬 𑐩𑐹𑐥𑐵𑐴𑐵𑑄𑐎𑐠𑑄 𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑐸𑐮𑐵𑑄𑐩𑑂𑐴 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐎𑑂𑐟𑐺𑐟𑑂𑐰𑐎𑐮𑐵 𑐥𑐬𑑂𑐰 𑐩𑐹 𑐐𑐸𑐠𑐶𑐫𑐵 𑐣𑐵𑐫𑑅 𑐰𑐶𑐳𑐣𑑂𑐟𑐬 𑐱𑐵𑐎𑑂𑐫, 𑐩𑐹 𑐐𑐸𑐠𑐶𑐫𑐵 𑐳𑐮𑑂𑐮𑐵𑐴𑐎𑐵𑐬 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐜𑐵. 𑐐𑑁𑐟𑐩𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐣𑐶𑐰𑐬𑑂𑐟𑐩𑐵𑐣 𑐣𑐵𑐫𑑅 𑐥𑐹𑐬𑑂𑐞𑐬𑐵𑐖 𑐱𑐵𑐎𑑂𑐫, 𑐩𑐹 𑐐𑐸𑐠𑐶𑐫𑐵 𑐩𑐹𑐕𑑂𑐫𑐵𑐘𑑂𑐖𑐾 𑐩𑐡𑐣𑐧𑐴𑐵𑐡𑐸𑐬 𑐟𑐸𑐮𑐵𑐢𑐬, 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐡𑐾𑐰𑐾𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐧𑑂𑐰𑐣𑐾𑐎𑐸𑐠𑐶 𑐳𑑄𑐔𑐵𑐮𑐎 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫 𑐩𑐴𑐵𑐳𑑂𑐠𑐰𑐶𑐬𑐥𑐵𑐏𑐾𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐥𑑄𑐔𑐱𑐷𑐮 𑐧𑐶𑐫𑐵𑐧𑐶𑐖𑑂𑐫𑐵𑐳𑐾 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑐬𑐶𑐫𑐟𑑂𑐟𑐶 𑐎𑐾𑐣𑑂𑐡𑑂𑐬𑐫𑐵 𑐣𑐵𑐫𑑅 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐷𑐠𑐷 𑐥𑐬𑐶𑐫𑐟𑑂𑐟𑐶 𑐎𑐾𑐣𑑂𑐡𑑂𑐬, 𑐰𑐶𑐴𑐵𑐬, 𑐥𑐸𑐳𑑂𑐟𑐎𑐵𑐮𑐫 𑐫𑐵𑐣𑐵𑑅 𑐗𑐶𑑄𑐕𑐩𑑂𑐴𑐾𑐳𑐶𑐣𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐬𑐩𑐷 𑐱𑐵𑐎𑑂𑐫 (𑐡𑐷𑐥𑐵𑐰𑐟𑐶 𑐥𑐸𑐳𑑂𑐟𑐎𑐵𑐮) 𑐣𑑂𑐴𑐵𑐥, 𑐥𑑂𑐬𑐟𑐶𑐳𑑂𑐠𑐵 𑐱𑐵𑐎𑑂𑐫 (𑐢𑐩𑑂𑐩 𑐳𑐵𑐎𑐔𑑂𑐕𑐵) 𑐮𑐶𑐄, 𑐳𑐮𑑀𑐣𑐵𑐷 𑐱𑐵𑐎𑑂𑐫 (𑐱𑑂𑐬𑐷 𑐱𑐵𑐎𑑂𑐫𑐳𑐶𑑄𑐴 𑐰𑐶𑐴𑐵𑐬 𑐟𑐠𑐵 𑐥𑐬𑐶𑐫𑐟𑑂𑐟𑐶 𑐎𑐾𑐣𑑂𑐡𑑂𑐬) 𑐮𑐶𑐫𑐵𑑄𑐮𑐶𑐄 𑐰 𑐩𑐟𑐶𑐣𑐵 𑐩𑐵𑐣𑐣𑑂𑐢𑐬 (𑐫𑐸𑐰𑐵 𑐧𑑁𑐡𑑂𑐢 𑐳𑐩𑐹𑐴) 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋

𑐎𑐵𑐳𑐵𑐫𑑂 𑐣𑑂𑐴𑐵𑐥𑐫𑐵𑐟 𑐣𑑂𑐫𑐫𑑂𑐡𑑂𑐰𑑅𑐟𑐎𑐵, 𑐮𑐶𑐄𑐫𑐵𑐟 𑐗𑐶𑐡𑑂𑐰𑑅, 𑐮𑐶𑐫𑐵𑑄𑐮𑐶𑐄𑐫𑐵𑐟 𑐣𑑂𑐴𑐫𑑂𑐡𑑂𑐰𑑅 𑐰 𑐴𑑅𑐥𑐵𑑅𑐫𑐵𑐟 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄𑐮𑐶𑐳𑐾𑑄 𑐡𑐳𑐶𑐥𑑁 𑐰 𑐄𑐥𑐴𑐵𑐬 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐰𑐶𑐖𑐫𑐷 𑐎𑐵𑐳𑐵𑐩𑐶𑐥𑐶𑑄𑐟 𑐩𑐹𑐥𑐵𑐴𑐵𑑄𑐥𑐵𑐏𑐾𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅𑐳𑐵 𑐰𑐶𑐱𑐾𑐲 𑐥𑐵𑐴𑐵𑑄 𑐱𑐵𑐎𑑂𑐫𑑄 𑐄𑐥𑐴𑐵𑐬 𑐰 𑐡𑐵𑐟𑐵𑐥𑐵𑐏𑐾𑑄 𑐱𑑂𑐬𑐷𑐖𑐾𑐱𑐮𑐵𑐮 𑐱𑐶𑐮𑑂𑐥𑐎𑐵𑐬𑑄 𑐡𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐸𑐐𑐸𑐳𑐷 𑐣𑑂𑐴𑐵𑐥𑐵𑑄𑐏𑐸𑐳𑐷 𑐣𑑂𑐴𑐵𑐥𑐫𑐵𑐟 𑐣𑑂𑐫𑐫𑑂𑐡𑑂𑐰𑑅 𑐟𑐎𑐵 𑐡𑐵𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅𑐳𑐵 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄𑐮𑐶𑐄 𑐰 𑐴𑑅𑐥𑐵𑑅 𑐮𑐵𑑅𑐩𑑂𑐴𑐾𑐳𑐶𑐟 𑐩𑐹𑐐𑐸𑐠𑐶𑐥𑐵𑐏𑐾𑑄 𑐡𑐵𑑄 𑐳𑐶𑐬𑐥𑐵𑑅𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑑅𑐐𑐸 𑐏𑑅𑐳𑐵 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐳𑐎𑐳𑐶𑐟𑑄 𑐩𑑀𑐟𑐶𑐮𑐵𑐮 𑐱𑐶𑐮𑑂𑐥𑐎𑐵𑐬 𑐡𑑂𑐰𑑅𑐕𑐶 𑐡𑑂𑐰𑑅𑐕𑐶 𑐟𑐎𑐵 𑐣𑐐𑐡𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐎𑐵𑐳𑐵𑐫𑑂 𑐰𑐶𑐖𑐫𑐷 𑐖𑐸𑐫𑐵𑐡𑐷𑐥𑐶𑑄𑐟 𑐄𑐥𑐴𑐵𑐬𑐫𑐵 𑐰𑑂𑐫𑐰𑐳𑑂𑐠𑐵 𑐩𑐹 𑐐𑐸𑐠𑐶𑐫𑐵 𑐩𑐹𑐕𑑂𑐫𑐵𑐘𑑂𑐖𑐾 𑐟𑐸𑐮𑐵𑐢𑐬𑑄 𑐫𑐵𑐣𑐵𑐡𑐷𑐐𑐸 𑐏𑑅𑑋 𑐎𑐵𑐳𑐵𑐫𑐵 𑐣𑐶𑐬𑑂𑐞𑐵𑐫𑐎𑐫𑑂 𑐜𑐵. 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬, 𑐬𑐟𑑂𑐣𑐳𑐸𑐣𑑂𑐡𑐬 𑐱𑐵𑐎𑑂𑐫 𑐰 𑐜𑐵. 𑐖𑐸𑐣𑐸 𑐧𑐵𑐳𑐸𑐎𑐮𑐵 𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐹 𑐥𑐵𑐴𑐵𑑄 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫, 𑐰𑐶𑐱𑐾𑐲 𑐥𑐵𑐴𑐵𑑄 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫, 𑐩𑐹𑐐𑐸𑐠𑐶𑐫𑐵 𑐣𑐵𑐫𑑅 𑐱𑐵𑐎𑑂𑐫 𑐮𑐐𑐵𑐫𑐟𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐁𑐎𑐶𑐰𑑄 𑑓𑑐 𑐎𑑂𑐰𑑅𑐐𑐸 𑐰𑐎𑑂𑐟𑐺𑐟𑑂𑐰𑐎𑐮𑐵 𑐥𑐬𑑂𑐰𑐫𑐵 𑐐𑑂𑐰𑐳𑐵𑑅 𑐐𑑂𑐰𑐂𑐐𑐸 𑐡𑐷𑐥𑐵𑐰𑐟𑐶 𑐥𑐸𑐳𑑂𑐟𑐎𑐵𑐮𑐫 𑐥𑐬𑐶𑐫𑐟𑑂𑐟𑐶 𑐎𑐾𑐣𑑂𑐡𑑂𑐬𑐫𑐵 𑐣𑐵𑐫𑑅 𑐂𑐣𑑂𑐡𑑂𑐬𑐎𑐸𑐩𑐵𑐬𑐷 𑐱𑐵𑐎𑑂𑐫𑐫𑐵𑐟 𑐖𑐐𑐟𑐳𑐸𑐣𑑂𑐡𑐬 𑐥𑐬𑐶𑐫𑐟𑑂𑐟𑐶 𑐎𑐾𑐣𑑂𑐡𑑂𑐬𑐫𑐵 𑐣𑐵𑐫𑑅 𑐩𑐵𑐫𑐵 𑐩𑐵𑐣𑐣𑑂𑐢𑐬𑑄 𑐥𑐵𑑅𑐧𑑂𑐰 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋