𑐕𑑄𑐐𑐸 𑐮𑐵𑐮𑐩𑑀𑐴𑐬 𑐏𑐸𑐂𑐧𑑂𑐫𑐸 𑐖𑐶𑐟𑑅

𑐕𑑄𑐐𑐸 𑐮𑐵𑐮𑐩𑑀𑐴𑐬 𑐏𑐸𑐂𑐧𑑂𑐫𑐸 𑐖𑐶𑐟𑑅

– 𑐧𑐡𑑂𑐢 𑐳𑐵𑐫𑑂𑐩𑐶

𑐠𑑅 𑐧𑑁𑐫𑐵 𑐩𑐺𑐟𑑂𑐫𑐸𑐂 𑐴𑐬𑑂𑐲𑑀𑐮𑑂𑐮𑐵𑐳 𑐖𑐸𑐂𑐟
𑐖𑐶 𑐬𑐵𑐖𑐎𑐸𑐩𑐵𑐬 𑐩𑐏𑐸 𑑋

𑐏𑑅, 𑐖𑐶 𑐀𑐳𑑄𑐟𑐸𑐲𑑂𑐚
𑐖𑐶𑐐𑐸 𑐎𑐸𑑄 𑐖𑐵:𑐐𑐸 𑐎𑑂𑐰𑐠𑐵𑐣𑐵𑐥
𑐏𑑅, 𑐖𑐶𑐎𑐾 𑐧𑐶𑐡𑑂𑐬𑑀𑐴 𑐡𑐸
𑐳𑑂𑐰𑐫𑐵𑑅 𑐣𑑄 𑐨𑐏𑑄𑐕𑐹 𑐫𑐵𑐣𑐵𑑅
𑐐𑐸𑐥𑐔𑐸𑐥 𑐩𑑂𑐰𑐵𑐫𑐾𑐐𑐸
𑐥𑑂𑐬𑐰𑐺𑐟𑑂𑐟𑐶𑐣𑐵𑐥 𑑋

𑐧𑐮𑐵𑐟𑑂𑐎𑐵𑐬𑐫𑐵 𑐑𑐵𑑅
𑐧𑐵 𑐮𑐳𑐥𑐳𑐫𑐵 𑐳𑑂𑐰𑐷𑐎𑐵𑐬𑐵𑐟𑑂𑐩𑐎 𑐔𑐶𑑄
𑐖𑐶𑐩𑐶 𑐩𑐵𑑄𑐫𑐵 𑐖𑐶
𑐖𑐶 𑐄𑐟𑑂𑐥𑐟𑐶𑐫𑐵 𑐎𑐵𑐬𑐞
𑐖𑐶 𑐧𑐵 !
𑐖𑐶 𑐕𑑄𑐐𑐸 𑐣𑑂𑐴𑐹𑐐𑐸 𑐳𑑄𑐳𑑂𑐎𑐬𑐞 𑐩𑐏𑐸
𑐦𑐐𑐟 𑐏𑑂𑐰𑐵:𑐥𑐵𑑅 𑐖𑐎 𑐴𑑂𑐫𑐹𑐐𑐸 𑑋

𑐳𑑂𑐫𑐵𑐴𑐵 𑐳𑑂𑐬𑐾𑐳𑑂𑐟𑐵𑑄 𑐠𑐾𑑄 𑐋𑐖𑐣 𑐋𑐖𑐣 𑐫𑐵𑐣𑐵𑑅
𑐮𑑂𑐴𑑂𑐫𑐫𑐵 𑐎𑐵𑐫𑐾 𑐩𑐦𑐸 𑐕𑑄𑐐𑐸 𑐖𑐷𑐰𑐣 𑑋
𑐳𑐵𑐳 𑐮𑑂𑐴𑐵𑐫𑐾 𑐩𑐦𑐸 𑐖𑐶𑑄
𑐕𑑄𑐐𑐸 𑐥𑐸𑐖𑐎𑐸𑐠𑐶𑐂𑑋
𑐐𑐣 𑐴𑐟𑑂𑐫𑐵 𑐴𑐟𑑂𑐫𑐫𑐵 𑐡𑐸𑐬𑑂𑐐𑐣𑑂𑐢 𑐖𑐎 𑐡𑐸 𑑋
𑐩𑐹𑐬𑑂𑐟𑐶𑐟 𑐕𑑄𑐐𑐸 𑐱𑑂𑐬𑐡𑑂𑐢𑐫𑐵
𑐠𑑁𑑄 𑐥𑑄𑐐𑐮𑑅- 𑐖𑐶𑐐𑐸 𑐥𑐮𑐵𑑅𑐫𑐵,
𑐕𑑄𑐐𑐸 𑐀𑐵𑐥𑐵𑐮𑑄 𑐰𑐳𑑂𑐟𑐸𑐟𑐫𑑂𑐐𑐸
𑐖𑐶𑐐𑐸 𑐩𑐶𑐏𑐫𑑂 𑐩𑐹 𑐴𑑂𑐫𑐹𑐐𑐸 𑐡𑐸 𑑋
𑐧𑐵 ! 𑐕𑑄𑐐𑐸 𑐁𑐩 𑐕𑐵𑐟𑐶𑐫𑐵 𑐟𑐎𑑂𑐩𑐵𑐫𑑂
𑐕𑐵𑐫𑑂 𑐖𑐶𑑄 𑐠𑑁𑑄 𑐳𑐸𑐮𑐸𑐥𑑂𑐫𑐵 𑐏𑐣𑐵𑐔𑑂𑐰𑑄𑐐𑐸 ?

𑐠𑑅𑐐𑐸 𑐧𑐳𑑂𑐟𑐸𑐟 𑐐𑐶𑐡𑑂𑐢𑑄 𑐡𑐵𑐫𑐾𑐎𑐵𑑅
𑐃 𑐑𑐸𑐟𑑂𑐎𑐵𑑅 𑐑𑐸𑐟𑑂𑐎𑐵𑑅
𑐧𑐵 ! 𑐖𑐶 𑐩𑑂𑐰𑐵𑐫𑐾𑐩𑐦𑐸 𑐕 𑐠𑐾𑑄
𑐠:𑐐𑐸 𑐂𑐔𑑂𑐕𑐵𑐟 𑐣𑐫𑐵𑑅 𑑋
𑐠𑑁𑑄 𑐖𑐶𑐐𑐸 𑐟𑐸𑐟𑐶𑐂 𑐀𑐮𑑂𑐫𑐵𑐏 𑐮𑑃𑐟
𑐂𑐟𑐶𑐩𑐶𑐟𑐶 𑐎𑐣𑐵𑐔𑑂𑐰𑐐𑐸 𑐡𑐸 𑑋
𑐥𑐶𑐧𑑂𑐰𑐫𑐾𑐟 𑐠:𑐟
𑐠𑑁𑑄 𑐖𑐶𑐐𑐸 𑐎𑐠𑐸 𑐳𑐎𑐳𑐎 𑐩𑐶𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐕 𑐩𑐏𑐸 𑐧𑐵
𑐕𑑄𑐐𑐸 𑐳𑑄𑐳𑑂𑐎𑐵𑐬 𑐰 𑐩𑐣𑑀𑐰𑐺𑐟𑑂𑐟𑐶𑐫𑐵 𑐮𑐵𑐮𑐩𑑀𑐴𑐬 𑐏𑐸𑐂𑐧𑑂𑐫𑐸 𑐖𑐶𑐟𑑅
𑐖𑐶 𑐮𑐵 𑐀𑐣 𑐴𑐾 𑐎𑐸𑐣𑐵𑐔𑑂𑐰𑑄𑐐𑐸 𑐡𑐸 𑑋

– 𑐖𑐶: 𑐖𑐶𑐐𑐸 𑐰𑐬𑑂𑐟𑐩𑐵𑐣𑑄