𑐥𑐵𑐬𑐵𑐐𑑀𑐣 𑐥𑑂𑐬𑑀𑐚𑐵𑐮𑐳 𑐦𑐵𑐄𑐞𑑂𑐜𑐾𑐱𑐣 (𑐥𑐶𑐥𑐶𑐊𑐦𑑄) 𑐎𑑂𑐬𑐵𑐣𑑂𑐟𑐶𑐎𑐵𑐬𑐷 𑐕𑐵𑐟𑑂𑐬𑐰𑐺𑐟𑑂𑐟𑐶 𑐎𑑀𑐲 “𑐁𑐱𑐵 𑐡𑐶 𑐴𑑀𑐥” 𑐱𑐣𑐶𑐧𑐵𑑅 𑐑𑑀𑐲𑐞𑐵 𑐫𑐵𑑅𑐐𑐸 𑐡𑐸 𑑋 𑐠𑐸𑐐𑐸 𑐎𑑀𑐲𑑄 𑐣𑐾𑐥𑐵𑑅𑐫𑐵 𑐨𑐰𑐶𑐲𑑂𑐫 𑐴𑐷𑐮𑐶𑐐𑐸 𑐡𑐵𑐧𑐷 𑐟𑐎𑑄 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑑑𑑘𑑐𑐩𑑂𑐴 𑐮𑑂𑐫𑐹𑐣𑐾 𑐮𑐵𑑅𑐥𑐶𑑄 𑐣𑐵𑐥𑑄 𑐡𑐫𑑂𑐩𑐵𑑅𑐥𑐶𑑄 𑐩𑐶𑐳𑐵𑐩𑐳𑑂𑐟𑐫𑑂𑐟𑑄 𑐣𑐶𑐳𑐾𑑄 𑐳𑐸𑐬𑐸 𑐫𑐵𑐣𑐵 𑐥𑑂𑐫𑐡𑑃 𑐡𑐸𑐣𑐾 𑐡𑑂𑐰𑐕𑐶 𑐕𑐵𑐟𑑂𑐬𑐰𑐺𑐟𑐶 𑐧𑐶𑐂𑐐𑐸 𑐥𑐶𑐥𑐶𑐊𑐦𑐫𑐵 𑐁𑐖𑑂𑐖𑐹 𑐡𑐸 𑑋 𑐩𑐵𑐂𑐟𑐶 𑐣𑐾𑐥𑐵𑐮, 𑐜𑑀𑐮𑑂𑐥𑑀, 𑐧𑐵𑐬𑐵, 𑐖𑐣𑐎𑐥𑐸𑐬, 𑐀𑐕𑐵𑐩 𑐰 𑐩𑐾𑐩𑐾𑐐𑐸 𑐖𑐶𑐮𑑂𑐮𑐵𑑄𑐫𑐵𑐥𑐶𑑄 𑐑𑐬𑐾𑐮𑐸 𑐴𑐶𑑄𑐳𑐵, 𑐧𑐮𑐵𑐟𑑂𑐎𑐵𑐬, 𑐟𑐶𑐬𑐳𑑂𑐎𑐵𑐬, 𑐧𑐾𑐔𑐧𑐶𑐏𑐣 𑐰 𑐰𑐶𑐥𑐣𑑂𑐣 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵𑐫𑐵 𑐩𑐶𑐳𑐵𑐩𑐳𑑂𑐟 𑐠𑐸𑐐𑐸 𑐕𑐵𑐟𑑂𑐬𑐰𑐺𑐟𑐶𑐫𑐵 𑐣𑐶𑐟𑐶𑑄 𑐮𑑂𑐫𑐫𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐩𑐟𑐶𑐣𑐵𑑄 𑐴𑐮𑐶𑐩𑐫𑑂 𑐴𑑂𑐫𑐹𑐥𑐵 𑐴𑐫𑑂𑐦𑐹 𑐢𑐿𑐐𑐸 𑐰𑐶𑐱𑑂𑐰𑐵𑐳𑑄 𑐥𑑀𑐬𑑂𑐚𑐵𑐮𑐳, 𑐥𑑀𑐬𑑂𑐚𑐮𑑂𑐫𑐵𑐞𑑂𑐜𑐫𑐵 𑐎𑑂𑐬𑐶𑐳𑑂𑐚𑑀𑐦𑐬 𑐧𑐎 𑐰 𑐫𑐾𑑃𑐫𑐵 𑐟𑐶𑐮𑐐𑑄𑐐𑐵𑐫𑑂 𑐔𑑂𑐰𑑄𑐐𑐸 𑐥𑐵𑐬𑐵𑐐𑐣 𑐥𑐧𑑂𑐮𑐶𑐎 𑐳𑑂𑐎𑐸𑐮𑐫𑐵 𑐣𑐶𑐬𑑂𑐡𑐾𑐱𑐣 𑐱𑐵𑐎𑐶𑐬 𑐄𑐡𑑂𑐡𑐶𑐣𑑄 𑐳𑐣𑑂 𑑒𑑐𑑑𑑙𑐫𑑂 𑐥𑐶𑐥𑐶𑐊𑐦 𑐔𑐵𑐫𑑂𑐎𑐸𑐐𑐸 𑐏𑑅 𑑋 𑐩𑐶𑐳𑑂𑐟𑐫𑑂𑐟 𑐳𑑂𑐰𑐵𑐢𑐶𑐣 𑐡𑐫𑑂𑐎𑐵 𑐨𑐰𑐶𑐲𑑂𑐫𑐫𑑂 𑐣𑐾𑐥𑐵𑑅𑐫𑐵𑐟 𑐣𑐾𑐟𑐺𑐟𑑂𑐰 𑐧𑐷 𑐦𑐫𑐾𑐎𑐾𑐐𑐸 𑐁𑐖𑑂𑐖𑐸 𑐖𑑂𑐰𑐣𑐵 𑐔𑐵𑐫𑑂𑐎𑐸𑐐𑐸 𑐏𑑅 𑑋 𑐠𑑂𑐰 𑐖𑑂𑐫𑐵𑐗𑑂𑐰𑐮𑑄 𑐳𑐬𑐎𑐵𑐬𑐫𑐵 𑐦𑐸𑐎𑑂𑐎 𑐩𑐳𑑂𑐟𑐫𑑂𑐟 𑐱𑐶𑐎𑑂𑐲𑐵 𑐧𑐷𑐐𑐸 𑐣𑐶𑐟𑐶𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐳𑐵𑐩𑐵𑐖𑐶𑐎, 𑐨𑐵𑐰𑐣𑐵𑐟𑑂𑐩𑐎 𑐣𑐵𑐥𑑄 𑐣𑐿𑐟𑐶𑐎 𑐱𑐶𑐎𑑂𑐲𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐎𑐾𑐖𑐷 𑐣𑐶𑐳𑐾𑑄 𑑑𑑒 𑐟𑐎𑐫𑐵 𑐎𑐎𑑂𑐲𑐵 𑐎𑐵𑐫𑑂𑐟𑑂𑐫𑑄𑐐𑐸 𑐡𑐸 𑑋
𑐖𑐷𑐰𑐣𑐫𑑂 𑐩𑐳𑑂𑐟𑐫𑑂𑐐𑐸 𑐩𑐶𑐏𑐵𑐫𑑂 𑐁𑐱𑐵 𑐰 𑐂𑐩𑐶𑐐𑐸 𑐔𑐵𑐴𑐣𑐵𑑄 𑐴𑐾 𑐠𑐸𑐐𑐸 𑐕𑐵𑐟𑑂𑐬𑐰𑐺𑐟𑑂𑐟𑐶 𑐣𑐶𑐬𑑂𑐢𑐵𑐬𑐞 𑐫𑐵𑐂𑐐𑐸 𑐧𑐎𑑄 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐥𑐶𑐥𑐶𑐊𑐦𑑄 𑐩𑐳𑑂𑐟𑐫𑑂𑐟 𑐠𑑅𑐐𑐸 𑐖𑐷𑐰𑐣 𑐣𑐵𑐥𑑄 𑐳𑐩𑐵𑐖 𑐰 𑐡𑐾𑐳𑐫𑑂 𑐴𑑂𑐫𑐹𑐥𑐵 𑐴𑐫𑑂𑐟 𑐴𑑂𑐰𑑅𑐟𑐵 𑐧𑑂𑐫𑐹𑐐𑐸 𑐰 𑐠𑐸𑐎𑐶𑑄 𑐳𑐎𑐵𑐬𑐵𑐟𑑂𑐩𑐎 𑐴𑑂𑐫𑐹𑐥𑐵 𑐰𑐂𑐐𑐸 𑐁𑐱𑐵 𑐟𑐎𑑄 𑐫𑐵𑐣𑐵𑐡𑐶𑐮 𑑋