𑐕𑐐𑐹 𑐧𑑂𑐰𑐣𑐾 𑐴𑐾 𑐩𑐵𑑅𑐐𑐸 𑐳𑐦𑐹 “𑐣𑐾𑐥𑐵𑐮 𑐳𑑄𑐰𑐟 𑐰 𑐨𑐶𑐣𑑂𑐟𑐸𑐣𑐵 𑐁𑐣𑑂𑐡𑑀𑐮𑐣 : 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐫𑑂”

𑐣𑐾𑐥𑐵𑐮 𑐳𑑄𑐰𑐟𑐫𑐵 𑐁𑐣𑑂𑐡𑑀𑐮𑐣 𑐰 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣𑐫𑐵𑐟 𑐎𑐫𑐵𑑅 𑐄𑐐𑐸 𑐁𑐣𑑂𑐡𑑀𑐮𑐣𑐫𑐵 𑐳𑑄𑐳𑑂𑐠𑐵𑐥𑐎𑐩𑐢𑑂𑐫𑐾 𑐕𑐩𑑂𑐴 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 “𑐣𑐾𑐥𑐵𑐮 𑐳𑑄𑐰𑐟 𑐰 𑐨𑐶𑐣𑑂𑐟𑐸𑐣𑐵 𑐁𑐣𑑂𑐡𑑀𑐮𑐣 : 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐫𑑂” 𑐳𑐦𑐹 𑐥𑐶𑐡𑑄𑐐𑐸 𑐡𑐸 𑑋

𑐣𑐾.𑐳𑑄. 𑑑𑑑𑑔𑑔 𑐧𑐕𑐮𑐵𑐐𑐵 𑐟𑐺𑐟𑐷𑐫𑐵 (𑑒𑑐𑑘𑑑 𑐖𑐾𑐲𑑂𑐛 𑑑𑑓 𑐐𑐟𑐾) 𑐁𑐂𑐟𑐰𑐵𑑅 𑐫𑐾𑑃𑐫𑐵 𑐐𑑀𑑄𑐐𑑅𑐧𑐸𑐂𑑃 𑐔𑑂𑐰𑑄𑐐𑐸 𑐧𑐶𑐖𑐷 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐖𑐹𑐐𑐸 𑐣𑐾𑐥𑐵𑐮 𑐳𑑄𑐰𑐟𑐫𑐵 𑐬𑐵𑐲𑑂𑐚𑑂𑐬𑐶𑐫 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐷𑐂 𑐣𑑂𑐴𑑂𑐫𑐮𑐸𑐰𑐵𑑅 𑐳𑐸𑐣𑑂𑐡𑐬𑐫𑐵𑐟 𑐐𑑂𑐰𑐳𑐵𑑅 𑐏𑐮𑑅 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐮𑐶𑐳𑐾𑑄 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵𑑄 𑐎𑐵𑐬𑑂𑐫𑐥𑐟𑑂𑐬 𑐣𑑂𑐴𑑂𑐫𑐧𑑂𑐰𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐏𑑅 𑑋 𑐟𑐬, 𑐣𑐾𑐥𑐵𑐮 𑐳𑑄𑐰𑐟𑐫𑐵 𑐎𑐵𑐬𑑂𑐫𑐥𑐟𑑂𑐬 𑐟𑐫𑐵𑐬 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐩𑑂𑐴𑑀 𑐂𑐮𑐫𑑂 𑐰𑐫𑑂𑐎𑐮𑑄 𑐣𑐾𑐥𑐵𑐮 𑐳𑑄𑐰𑐟𑐫𑐵𑐟 𑐎𑐫𑐵𑑅 𑐳𑐦𑐹 𑐴𑐾 𑐟𑐫𑐵𑐬 𑐫𑐵𑐣𑐵𑐡𑐶𑐮 𑑋 𑐠𑑂𑐰 𑐗𑐷𑐐𑐸 𑐣𑐶𑐟𑐶𑑄 𑐟𑑅𑐢𑑄𑐐𑐸 𑐴𑐾 𑐄𑐥𑐮𑐧𑑂𑐢𑐷 𑐰 𑐴𑑂𑐰𑐟𑐵𑑅 𑐖𑐸𑐮 𑑋

𑐟𑐵𑑅𑐃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐣𑐾𑐥𑐵𑐮 𑐳𑑄𑐰𑐟 𑐣𑑂𑐴𑐹𑐡𑑃 𑐬𑐵𑐲𑑂𑐚𑑂𑐬𑐶𑐫 𑐳𑐩𑐵𑐬𑑀𑐴 𑐳𑐩𑐶𑐟𑐶𑑄 𑐠𑐸𑐐𑐸 𑐁𑐣𑑂𑐡𑑀𑐮𑐣𑐫𑐵𑐟 𑐎𑐫𑐵𑑅 𑐀𑐨𑐶𑐮𑐾𑐏𑐷𑐎𑐬𑐞 𑐫𑐵𑐫𑐾𑐩𑐵𑑅𑐐𑐸 𑐰𑐵𑑅𑐔𑐵𑐫𑐾𑐎𑐵𑑅 𑐀𑐨𑐶𑐮𑐾𑐏𑐷𑐎𑐬𑐞 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐐𑐸𑐐𑐸 𑐣𑐶𑐬𑑂𑐞𑐫 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐣𑐵𑐧𑐶𑐂𑐐𑐸 𑐖𑑂𑐫𑐵 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅 𑐳𑐸𑐣𑑂𑐡𑐬𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮 𑐳𑑄𑐰𑐟𑐫𑐵 𑐁𑐣𑑂𑐡𑑀𑐮𑐣 𑐐𑐸𑐎𑐠𑑄 𑐣𑑂𑐴𑑂𑐫𑐵𑐟 ? 𑐠𑐸𑐐𑐸 𑐁𑐣𑑂𑐡𑑀𑐮𑐣𑐫𑑂 𑐐𑐸𑐖𑑂𑐰𑑅𑐐𑐸 𑐎𑐠𑑄𑐫𑐵 𑐑𑐚𑐣𑐵𑐟 𑐖𑐸𑐮 ? 𑐬𑐵𑐖𑑂𑐫𑑄 𑐐𑐸𑐎𑐠𑑄 𑐡𑐩𑐣 𑐫𑐵𑐟 ? 𑐁𑑅𑐟𑐎𑐫𑐵 𑐄𑐮𑐧𑑂𑐢𑐷 𑐕𑐸 𑐏𑑅 ? 𑐰 𑐎𑐣𑑂𑐴𑐫𑑂𑐫𑐵 𑐮𑑃𑐥𑐸 𑐕𑐸 𑐏 ? 𑐠𑑂𑐰 𑐳𑐎𑐟𑐵𑑄 𑐏𑑃 𑐣𑑂𑐴𑑂𑐫𑐮𑐸𑐰𑐵𑑅 𑐳𑐸𑐣𑑂𑐡𑐬𑑄 𑐠𑑅𑐐𑐸 𑐳𑐦𑐹 “𑐣𑐾𑐥𑐵𑐮 𑐳𑑄𑐰𑐟 𑐰 𑐨𑐶𑐣𑑂𑐟𑐸𑐣𑐵 𑐁𑐣𑑂𑐡𑑀𑐮𑐣 : 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐫𑑂” 𑐡𑐸𑐣𑐾 𑐣𑑂𑐴𑑂𑐫𑐠𑐣𑐵𑐡𑐷𑐐𑐸 𑐡𑐸, 𑐀𑐨𑐶𑐮𑐾𑐏𑐷𑐎𑐬𑐞 𑐄𑐐𑐸 𑐳𑐦𑐹𑐥𑐵𑐏𑐾𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐎𑐵𑐬𑑂𑐫𑐥𑐟𑑂𑐬 𑐟𑐫𑐵𑐬 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐳𑐦𑐹 𑐎𑐠𑑄 𑐥𑐶𑐡𑑄𑐐𑐸 𑐄𑐐𑐸 𑐳𑐦𑐹 𑐡𑐸𑐣𑐾 𑐣𑑂𑐴𑑂𑐫𑐮𑐸𑐰𑐵𑑅 𑐳𑐸𑐣𑑂𑐡𑐬𑑄 𑐠𑐸𑐐𑐸 𑐳𑐦𑐹 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣𑐫𑐵 𑐀𑐨𑐶𑐮𑐾𑐏𑐷𑐎𑐬𑐞 𑐎𑐸𑐟𑑅 𑐖𑐹𑐐𑐸 𑐰𑐶𑐔𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐄𑐐𑐸 𑐳𑐦𑐹 𑐡𑐸𑐣𑐾 “𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣𑐫𑐵 𑐟𑐵𑑅𑐴𑐵𑐎𑑅𑐐𑐸 𑐧𑐵𑐏𑑃 𑐡𑐸– 𑐕𑐏𑐾 𑐣𑐾𑐥𑐵𑐮 𑐡𑐾𑐳𑐫𑐵 𑐐𑑁𑐬𑐰 𑐰 𑐥𑑂𑐬𑐟𑐶𑐲𑑂𑐛𑐵𑐫𑐵 𑐥𑑂𑐬𑐟𑐷𑐎 𑐖𑐸𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮 𑐳𑑄𑐰𑐟𑐫𑐵𑐟 𑐬𑐵𑐖𑑂𑐫𑐥𑐵𑐏𑐾𑑄 𑐩𑐵𑐣𑑂𑐫𑐟𑐵 𑐧𑐶𑐂𑐎𑐾𑐐𑐸 𑐳𑑄𑐑𑐬𑑂𑐲𑐰 𑐩𑐾𑐏𑐾 𑐠𑐸𑐎𑐶𑐫𑐵 𑐣𑐶𑐟𑐶𑑄 𑐩𑐵𑑅𑐐𑐸 𑐰𑐵𑐟𑐵𑐰𑐬𑐞 𑐡𑐫𑐾𑐎𑐾𑐐𑐸 , 𑐖𑐣𑐳𑑂𑐟𑐬𑑄 𑐳𑐴𑐫𑑀𑐐 𑐰 𑐳𑐩𑐬𑑂𑐠𑐣 𑐎𑑂𑐰𑐵𑐟𑐸𑐎𑐾𑐐𑐸 𑐴𑐵𑐠𑑂𑐫𑐵 𑑋 𑐠𑐸𑐐𑐸 𑐴𑐾 𑐡𑐵𑐫𑐶𑐟𑑂𑐰 𑐥𑐹𑐰𑑄𑐎𑐾𑐐𑐸 𑐎𑐠𑑄 𑐣𑑂𑐴𑑂𑐫𑐖𑑂𑐫𑐵𑑅𑐐𑐸 𑐏𑑅 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣 𑑋 𑐬𑐵𑐖𑑂𑐫𑐫𑐵 𑐡𑐩𑐣 , 𑐥𑑂𑐬𑐴𑐬𑐷 𑐥𑑂𑐬𑐱𑐵𑐳𑐣𑐫𑐵 𑐁𑐟𑑄𑐎𑐫𑐵 𑐰𑐵𑐟𑐵𑐰𑐬𑐞𑐫𑑂 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣𑐫𑐵𑐟 𑐠𑑁𑑄𑐟𑐎 𑐣𑑂𑐴𑑂𑐫𑐵𑐎𑐵𑑅 𑐟𑐫𑐾𑐦𑐟 𑑋 𑐠𑐸𑐎𑐶𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐣𑐾𑐥𑐵𑐮 𑐳𑑄𑐰𑐟𑐫𑐵𑐟 𑐎𑐫𑐵𑑅 𑐬𑐵𑐖𑑂𑐫 𑐥𑐎𑑂𑐲𑐫𑐵 𑐣𑐷𑐟𑐶 𑐰 𑐰𑑂𑐫𑐰𑐴𑐵𑐬 𑐴𑐶𑐮 𑑋 𑐕𑐐𑐹 𑐳𑐎𑐵𑐬𑐵𑐟𑑂𑐩𑐎 𑐄𑐥𑐮𑐧𑑂𑐢𑐷 𑐖𑐹𑐐𑐸 𑐡𑐸 𑑋 𑐏𑐟𑐸𑑄 𑐀𑐗 𑐁𑐥𑐵𑐮𑑄 𑐫𑐵𑐫𑐾𑐩𑐵𑐣𑐷𑐐𑐸 𑐀𑐗 𑐟𑐵𑑅𑐴𑐵𑐎𑑅𑐐𑐸 𑐮𑑃𑐥𑐸 𑐣𑑂𑐴𑑂𑐫𑐖𑑂𑐫𑐵𑐫𑐾𑐩𑐵𑐣𑐷 𑑋”

𑐨𑐵𑐖𑐸 𑐳𑐸𑐣𑑂𑐡𑐬𑑄 𑐳𑐦𑐹𑐫𑐵𑐟 𑐎𑐫𑐵𑑅 𑐟𑐫𑐵𑐡𑐷𑐐𑐸 𑐰𑐶𑐔𑐵𑑅 𑐳𑑄𑐎𑑂𑐲𑐶𑐥𑑂𑐟𑐫𑑂 𑐠𑐸𑐎𑐠𑑄 𑐡𑐸 𑑋

𑐠𑐸𑐐𑐸 𑐳𑐦𑐹 𑐡𑐸𑐣𑐾 𑐣𑑂𑐴𑐵𑐥𑐵𑑄𑐐𑐸 𑐧𑑂𑐰𑐫𑑂 𑐠𑐷𑐠𑐷 𑐳𑑄𑐰𑐟 𑐰 𑐰𑐶𑐎𑐵𑐳𑐫𑐵𑐟 𑐎𑐫𑐵𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐠𑐷𑐠𑐷 𑐳𑑄𑐰𑐟 𑐡𑐸𑐣𑐾 𑐡𑐎𑐮𑐾 𑐣𑑂𑐴𑐵𑐥𑐵𑑄𑐐𑐸 𑐥𑐵𑐟𑑂𑐬𑑀, 𑐳𑑂𑐎𑐚𑐮𑑂𑐫𑐵𑐞𑑂𑐜𑐫𑐵 𑐨𑐶𑑄𑐣𑐶𑐐𑑅 𑐠𑐵𑑄, 𑐩𑐵𑐫𑐵 𑐥𑐵𑐟𑑂𑐬𑑀, 𑐴𑐾𑐧𑑂𑐬𑐸 𑐳𑑄𑐰𑐟, 𑐴𑐶𑐖𑐬𑐷 𑐳𑑄𑐰𑐟𑐮𑐶𑐳𑐾𑑄 𑐣𑐷𑐕𑐐𑐹 𑐳𑑄𑐰𑐟𑐫𑐵 𑐳𑑄𑐎𑑂𑐲𑐶𑐥𑑂𑐟 𑐩𑑂𑐴𑐳𑐷𑐎𑐵 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 𑑋

𑐀𑐠𑐾𑐴𑐾, 𑐂𑐟𑐶𑐴𑐵𑐳 𑐰 𑐣𑐾𑐥𑐵𑐮 𑐳𑑄𑐰𑐟, 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅, 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐠𑐷𑐠𑐷 𑐣𑐵𑑄, 𑐣𑐾𑐥𑐵𑐮 𑐳𑑄𑐰𑐟𑐫𑐵 𑐕𑑂𑐫𑐮𑐵𑐫𑐵 𑐰𑐶𑐲𑐫 𑐎𑑅𑐑𑐵𑐣𑐵𑐡𑐷𑐐𑐸 𑐡𑐸 𑑋

𑐀𑐠𑐾𑐴𑐾, 𑐣𑐶𑐐𑐹𑐐𑐸 𑐧𑑂𑐰𑐫𑑂 𑐬𑐵𑐖𑑂𑐫𑐫𑐵 𑐧𑐴𑐶𑐲𑑂𑐎𑐬𑐞, 𑐡𑐩𑐣 𑐀𑐮𑐾 𑐖𑐣𑐥𑑂𑐬𑐟𑐶𑐬𑑀𑐢 𑐱𑐷𑐬𑑂𑐲𑐎𑐫𑑂 𑐬𑐵𑐖𑑂𑐫𑐫𑐵 𑐧𑐴𑐶𑐲𑑂𑐎𑐬𑐞, 𑐁𑐣𑑂𑐡𑑀𑐮𑐣𑐫𑐵 𑐬𑐸𑐥𑐫𑑂 𑐨𑐶𑑄𑐟𑐸𑐣𑐵, 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣–𑐳𑐸𑐮𑐵𑐔𑑂𑐰𑑄𑐐𑐸 𑐨𑐵𑐰𑐣𑐵, 𑐩𑑄𑐎𑐵𑑅 𑐏𑐮𑑅 𑐰 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣, 𑐳𑐬𑐎𑐵𑐬𑐷 𑐡𑐩𑐣 𑐰 𑐨𑑂𑐬𑐩 𑐧𑑂𑐰𑐮𑑄𑐎𑐾𑐐𑐸 𑐎𑐸𑐟𑑅, 𑐰𑐿𑐔𑐵𑐬𑐶𑐎 𑐁𑐎𑑂𑐬𑐩𑐞, 𑐥𑑂𑐬𑐴𑐬𑐷 𑐥𑑂𑐬𑐱𑐵𑐳𑐣𑐫𑐵 𑐡𑐩𑐣, 𑐱𑑄𑐏𑐢𑐬𑐫𑐵 𑐎𑐶𑐥𑐵𑑅, 𑐱𑐵𑐮𑐶𑐎 𑐰 𑐎𑑂𑐫𑐵𑐮𑐾𑐣𑑂𑐜𑐬𑐫𑐵𑐟 𑐎𑐫𑐵𑑅 𑐁𑑅𑐟𑐎𑐫𑐵 𑐀𑐨𑐶𑐮𑐾𑐏𑐷𑐎𑐬𑐞 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐀𑐠𑐾𑐴𑐾, 𑐳𑑂𑐰𑑄𑐐𑐹𑐐𑐸 𑐧𑑂𑐰𑐫𑑂 𑐠𑑁𑑄𑐟𑐎𑐫𑐵 𑐄𑐥𑐮𑐧𑑂𑐢𑐷 𑐱𑐷𑐬𑑂𑐲𑐎𑐫𑑂 𑐁𑐣𑑂𑐡𑑀𑐮𑐣𑐫𑐵 𑐄𑐥𑐮𑐧𑑂𑐢𑐷, 𑐨𑐶𑑄𑐟𑐸𑐣𑐵 𑐁𑐣𑑂𑐡𑑀𑐮𑐣𑐫𑐵 𑐮𑐶𑐔𑑂𑐰𑑅, 𑐮𑑀𑐎𑐎𑐮𑑂𑐫𑐵𑐞𑐎𑐵𑐬𑐷 𑐳𑐵𑐩𑐵𑐖𑐶𑐎 𑐩𑐹𑐮𑑂𑐫𑐫𑐵𑐟 𑐎𑐫𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 𑑋

𑐳𑐦𑐹𑐫𑐵 𑐥𑑂𑐫𑑄𑐐𑐹𑐐𑐸 𑐧𑑂𑐰𑐫𑐵 𑐎𑐣𑑂𑐴𑐫𑑂𑐫𑐵 𑐮𑑃𑐥𑐸 𑐱𑐷𑐬𑑂𑐲𑐎𑐫𑑂 𑐁𑑅 𑐁𑐣𑑂𑐡𑑀𑐮𑐣𑐫𑐵 𑐡𑐵𑐫𑐶𑐟𑑂𑐰𑐮𑐶𑐳𑐾𑑄 𑐠𑐷𑐠𑐷 𑐮𑐶𑐢𑑃𑐳𑐵 𑐖𑑂𑐰𑐮𑑄 𑐰 𑐟𑐳𑐵 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 𑑋

𑐠𑐸𑐐𑐸 “𑐣𑐾𑐥𑐵𑐮 𑐳𑑄𑐰𑐟 𑐰 𑐨𑐶𑐣𑑂𑐟𑐸𑐣𑐵 𑐁𑐣𑑂𑐡𑑀𑐮𑐣 : 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐫𑑂” 𑐳𑐦𑐹 𑐡𑐸𑐣𑐾𑐫𑐵 𑐥𑑂𑐫𑑄𑐐𑐹𑐐𑐸 𑐧𑑂𑐰 𑐎𑐣𑑂𑐴𑐫𑑂𑐫𑐵 𑐮𑑃𑐥𑐸𑐂 𑐣𑐾𑐥𑐵𑐮 𑐳𑑄𑐰𑐟 𑐁𑐣𑑂𑐡𑑀𑐮𑐣𑐫𑐵𑐟 𑐎𑐫𑐵𑑅 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐠𑐷𑐠𑐷 𑐏𑑃𑐟 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐀𑐠𑐾𑐴𑐾, 𑐣𑐾𑐥𑐵𑐮 𑐳𑑄𑐰𑐟𑐫𑐵𑐟 𑐎𑐫𑐵𑑅 𑐳𑐬𑐎𑐵𑐬𑑄 𑐠𑐸𑐐𑐸 𑐳𑑄𑐰𑐟 𑐬𑐵𑐲𑑂𑐚𑑂𑐬𑐶𑐫 𑐳𑑄𑐰𑐟 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐳𑑂𑐠𑐶𑐟𑐶𑐂 𑐣𑐾𑐥𑐵𑑅𑐫𑐵 𑐩𑐸𑐡𑑂𑐬𑐵𑐫𑑂 𑐣𑐾𑐥𑐵𑐮 𑐳𑑄𑐰𑐟 𑐔𑑂𑐰𑐎𑐾𑐧𑐶𑐂𑐩𑐵𑑅𑐐𑐸, 𑐳𑐬𑐎𑐵𑐬𑐥𑐵𑐏𑐾𑑄 𑐧𑐶𑐂𑐐𑐸 𑐣𑐵𑐐𑐬𑐶𑐎𑐟𑐵, 𑐬𑐵𑐴𑐡𑐵𑐣𑐷, 𑐳𑐰𑐵𑐬𑐷 𑐔𑐵𑐮𑐎 𑐂𑐖𑐵𑐖𑐟 𑐥𑐟𑑂𑐬𑐫𑑂 𑐣𑐾𑐥𑐵𑐮 𑐳𑑄𑐰𑐟 𑐕𑑂𑐫𑐫𑐾𑐎𑐾 𑐧𑐶𑐂𑐩𑐵𑑅𑐐𑐸, 𑐠𑐷𑐠𑐷 𑐧𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐂𑐣𑐷𑐐𑐸 𑐡𑐳𑐶𑐥𑑁 𑐡𑐸𑐣𑐾 𑐣𑐾𑐥𑐵𑐮 𑐳𑑄𑐰𑐟 𑐔𑑂𑐰𑐎𑐾𑐧𑐶𑐂𑐩𑐵𑑅𑐐𑐸, 𑐐𑐿𑐬𑐳𑐬𑐎𑐵𑐬𑐷 𑐏𑑂𑐫𑑅𑐫𑐵 𑐳𑐵𑐬𑑂𑐰𑐖𑐣𑐶𑐎 𑐳𑐬𑑀𑐎𑐵𑐬𑐫𑐵 𑐖𑑂𑐫𑐵𑐫𑑂 𑐣𑑄 𑐣𑐾𑐥𑐵𑐮 𑐳𑑄𑐰𑐟 𑐕𑑂𑐫𑐮𑐾𑐟 𑐂𑐣𑐵𑐥 𑐫𑐵𑐫𑐾𑐩𑐵𑑅𑐐𑐸, 𑐱𑐿𑐎𑑂𑐲𑐶𑐎 𑐥𑐵𑐛𑑂𑐫 𑐳𑐵𑐩𑐵𑐐𑑂𑐬𑐷𑐂 𑐎𑐎𑑂𑐲𑐵𑐳𑑂𑐟𑐬 𑐎𑐠𑑄 𑐣𑐾𑐥𑐵𑐮 𑐳𑑄𑐰𑐟 𑐰 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐳𑐩𑑂𑐧𑐣𑑂𑐢𑐫𑑂 𑐡𑐸𑐠𑑂𑐫𑐵𑐎𑐾𑐧𑐶𑐂𑐩𑐵𑑅𑐐𑐸, 𑐣𑐾𑐥𑐵𑐮 𑐳𑑄𑐰𑐟 𑐰 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐣𑐵𑐩𑑄 𑐬𑐵𑐖𑑂𑐫𑐳𑑂𑐟𑐬𑐥𑐵𑐏𑐾𑑄 𑐳𑐶𑐬𑐥𑐵𑑅 𑐰 𑐳𑐩𑑂𑐩𑐵𑐣𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐎𑐾 𑐧𑐶𑐂𑐩𑐵𑑅𑐐𑐸 𑐡𑐵𑐫𑐶𑐟𑑂𑐰 𑐁𑑅 𑐁𑐣𑑂𑐡𑑀𑐮𑐣𑐎𑐵𑐬𑐷𑐥𑐶𑐣𑐶𑐐𑐸 𑐖𑐹𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐥𑐶𑐠𑐣𑐵 𑐎𑐠𑑄 𑐥𑐶𑐡𑑄𑐐𑐸 𑐠𑐸𑐐𑐸 “𑐣𑐾𑐥𑐵𑐮 𑐳𑑄𑐰𑐟 𑐰 𑐨𑐶𑐣𑑂𑐟𑐸𑐣𑐵 𑐁𑐣𑑂𑐡𑑀𑐮𑐣 : 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐫𑑂” 𑐳𑐦𑐹 𑐩𑐸𑐎𑑂𑐎𑑄 𑐳𑐔𑑂𑐕𑐶𑐐𑐸 𑐥𑐾𑐖𑐫𑐵 𑐏𑑅 𑑋

𑐣𑐾𑐥𑐵𑐮 𑐳𑑄𑐰𑐟𑐫𑐵 𑐁𑑅𑐟𑐎𑐫𑐵 𑐳𑐎𑐟𑐵𑑄 𑐐𑐟𑐶𑐰𑐶𑐢𑐶 𑐎𑑅𑐑𑐵𑐣𑐵𑐟𑑅𑐐𑐸 𑐠𑐸𑐐𑐸 “𑐣𑐾𑐥𑐵𑐮 𑐳𑑄𑐰𑐟 𑐰 𑐨𑐶𑐣𑑂𑐟𑐸𑐣𑐵 𑐁𑐣𑑂𑐡𑑀𑐮𑐣 : 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐫𑑂” 𑐳𑐦𑐹 𑐢𑐵𑐟𑑂𑐠𑐾𑑄 𑐴𑐾 𑐠𑐸𑐐𑐸 𑐁𑐣𑑂𑐡𑑀𑐮𑐣𑐫𑐵 𑐀𑐨𑐶𑐫𑐣𑑂𑐟𑐵𑐥𑐶𑐣𑑂𑐳𑑄 𑐧𑑂𑐰𑐣𑐾 𑐴𑐾 𑐩𑐵𑑅𑐐𑐸 𑐳𑐦𑐹 𑐖𑐹𑐐𑐸 𑐡𑐸𑐳𑐵 𑐠𑑂𑐰 𑐣𑐶𑐩𑐶𑐟𑑂𑐟 𑐳𑐦𑐹 𑐖𑐎 𑐩𑐏𑐸𑐳𑐾𑐣𑐾𑐥𑐵𑐮 𑐳𑑄𑐰𑐟 𑐁𑐣𑑂𑐡𑑀𑐮𑐣𑐫𑐵 𑐕𑐐𑐹 𑐡𑐳𑑂𑐟𑐵𑐰𑐾𑐖 𑐎𑐠𑑄 𑐗𑐷𑐐𑐸 𑐣𑑂𑐴𑑂𑐫𑑅𑐣𑐾 𑐰𑑅𑐐𑐸 𑐡𑐸 𑑋