𑐕𑐎𑑂𑐰𑐮𑑄 𑑖𑑐 𑐐𑐹 𑐳𑐦𑐹 𑐀𑐣𑐸𑐰𑐵𑐡

𑐫𑐾𑑃 – 𑐏𑐳 𑐣𑐾𑐥𑐵𑐮𑐷 𑐰 𑐀𑑄𑐐𑑂𑐬𑐾𑐖𑐷 𑐨𑐵𑐳𑑄 𑐔𑑂𑐰𑐫𑐵𑐟𑑅𑐐𑐸 𑐩𑐔𑐵 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑑖𑑐 𑐐𑐹 𑐳𑐦𑐹 𑐩𑑂𑐴𑐶𑐐𑑅 𑐕𑐎𑑂𑐰𑐮𑑄 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐰𑐵𑐡 𑐫𑐵𑐫𑐾𑐐𑐸 𑐖𑑂𑐫𑐵 𑐎𑑂𑐰𑐔𑐵𑐮 𑑋 𑐊𑐱𑐶𑐫𑐵 𑐦𑐵𑐄𑐞𑑂𑐜𑐾𑐱𑐣𑐫𑐵 ‘𑐮𑐾𑐚𑑂𑐳 𑐬𑐶𑐜’ 𑐎𑐵𑐬𑑂𑐫𑐎𑑂𑐬𑐩 𑐀𑐣𑑂𑐟𑐬𑑂𑐐𑐟 𑐠𑑂𑐰 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶 𑐰 𑐴𑐵𑐩𑑂𑐬𑑀 𑐥𑐵𑐟𑑂𑐬𑑀𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐩𑑂𑐴𑐶𑐐𑑅 𑐣𑑂𑐴𑐶𑐕𑐶 𑐴𑐾 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐠𑑂𑐰 𑑖𑑐 𑐐𑐹 𑐩𑐔𑐵 𑐳𑐦𑐹𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐰𑐵𑐡 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐩𑑂𑐴𑐶𑐐𑑅 𑐀𑐣𑐸𑐰𑐵𑐡 𑐖𑐹𑐐𑐸 𑐦𑐸𑐎𑑂𑐎𑑄 𑐳𑐦𑐹𑐫𑐵𑐟 𑐠𑑁𑑄 𑐳𑐩𑑂𑐥𑐵𑐡𑐣 𑐫𑐵𑐣𑐵𑑅 𑐕𑐵𑐥𑐾 𑐫𑐵𑐫𑐾𑐟 𑐫𑑀𑐐𑑂𑐫 𑐡𑐫𑐾𑐎𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐰𑐵𑐡 𑐖𑐹𑐐𑐸 𑐠𑑂𑐰 𑐩𑐔𑐵 𑐳𑐦𑐹 𑐥𑑂𑐬𑐎𑐵𑐱𑐣 𑐖𑐸𑐂𑐧𑐮𑐫𑑂 𑐄𑐎𑐷 𑐣𑐾𑐥𑐵𑐮 𑐮𑐶𑐥𑐶 𑐣𑑄 𑐥𑑂𑐬𑐫𑑀𑐐 𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐖𑐹𑐐𑐸 𑐠𑑂𑐰 𑐀𑐣𑐸𑐰𑐵𑐡 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐮𑐶𑐳𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑑄𑐖𑐣 𑐟𑐵𑐩𑑂𑐬𑐎𑐵𑐬, 𑐣𑐾𑐥𑐵𑑅𑐳𑑂𑐠𑐶𑐟 𑐀𑐩𑐾𑐬𑐶𑐎𑐷 𑐬𑐵𑐖𑐡𑐹𑐟𑐵𑐰𑐵𑐳𑐫𑐵 𑐥𑑂𑐬𑐟𑐶𑐣𑐶𑐢𑐶 𑐥𑐵𑐄𑐮 𑐠𑑀𑐩𑐳, 𑐩𑐔𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐖𑑂𑐘 𑐰𑐶𑐣𑐫 𑐎𑐳𑐖𑐸, 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫𑐫𑐵 𑐀𑐢𑐶𑐎𑐵𑐬𑐷 𑐫𑐵𑐡𑐰𑐔𑐣𑑂𑐡𑑂𑐬 𑐣𑐶𑐬𑑁𑐮𑐵𑐥𑐶𑑄𑐳𑑄 𑐣𑑄 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐊𑐱𑐶𑐫𑐵 𑐦𑐵𑐄𑐞𑑂𑐜𑐾𑐱𑐣𑐥𑐵𑐏𑐾𑑄 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐔𑐵 𑐎𑐰𑐶𑐟𑐵𑐫𑐵𑐟 𑐏𑐳 𑐣𑐾𑐥𑐵𑐮𑐷𑑄 𑐀𑐣𑐸𑐰𑐵𑐣 𑐫𑐵𑐣𑐵𑑅 𑐥𑐶𑐎𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐰𑐫𑑂𑐎𑑅𑐫𑐵 𑐄𑐐𑐸 𑐀𑐣𑐸𑐰𑐵𑐡 𑐳𑐦𑐹𑐫𑐵𑐟 𑐁𑑅 𑐏𑐩𑐾𑐬, 𑐨𑐶𑐫𑐟𑐣𑐵𑐩𑐷 𑐰 𑐮𑐵𑐌𑐳𑐫𑐵 𑐨𑐵𑐲𑐵𑑄 𑐣𑑄 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐳𑐦𑐹 𑐥𑐶𑐠𑐣𑐾 𑐢𑐸𑑄𑐎𑐹𑐐𑐸 𑐡𑐸𑐳𑐵 𑐄𑐎𑐶𑐫𑐵𑐟 𑐁𑑅 𑐰𑐬𑑂𑐩𑐶𑐖 𑐨𑐵𑐳𑑄 𑐀𑐣𑐸𑐰𑐵𑐡 𑐫𑐵𑐣𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐀𑐣 𑐧𑐶𑐄𑐐𑐸 𑐏𑑅 𑑋
𑐩𑑂𑐴𑐶𑐐𑑅 𑐠𑑂𑐰 𑑖𑑐 𑐐𑐹 𑐳𑐦𑐹 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐰𑐵𑐡 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐔𑐵 𑐳𑐵𑐴𑐶𑐟𑑂𑐫 𑐮𑐶𑐳𑐾𑑄 𑐱𑐶𑐎𑑂𑐲𑐞 𑐏𑑂𑐫𑑅𑐮𑐶𑐳𑐾 𑐳𑐩𑑂𑐧𑐣𑑂𑐢𑐶𑐟 𑐔𑑂𑐰𑐩𑐶 𑐰 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐳𑐴𑐨𑐵𑐐𑐷 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐠𑑂𑐰 𑐢𑐸𑑄𑐎𑐵𑑅 𑐁𑑅 𑐩𑐾𑐩𑐾𑐐𑐸 𑐳𑐦𑐹 𑐣𑑄 𑐀𑐣𑐸𑐰𑐵𑐡 𑐫𑐵𑐫𑐾𑐐𑐸 𑐮𑐎𑑂𑐲𑑂𑐫 𑐡𑐸𑐐𑐸 𑐏𑑃 𑐦𑐵𑐄𑐞𑑂𑐜𑐾𑐱𑐣𑐫𑐵 𑐩𑐫𑑂𑐖𑐸 𑐳𑐩𑐶𑐬𑐵 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋