𑐄𑐲𑐵 𑐰𑐖𑑂𑐬𑐵𑐔𑐵𑐬𑑂𑐫
𑐱𑐶𑐎𑐵𑐬 𑐩𑐵𑐩𑐵𑑄 𑐄𑐏𑐾𑑄𑐠𑐸𑐏𑐾𑑄 𑐔𑐵𑑅𑐴𑐶𑐮𑐵 𑐔𑑂𑐰𑑄𑐩𑑂𑐴 𑐔𑑄𑐏𑐾𑐔𑐵 𑐢𑑀𑑄𑐫𑐵 𑐁𑐎𑐵𑐗𑐵𑐎𑐵𑑄 𑐐𑐸𑐮𑐸𑐮𑐸𑐮𑐸 𑐟𑐸𑐮𑐵𑐰𑐫𑐵𑐔𑑂𑐰𑑄𑐐𑐸 𑐟𑐐𑑂𑐰𑑅𑐐𑐸 𑐜𑑂𑐬𑐩 𑐕𑐐𑐮𑐫𑑂 𑐩𑐶𑐏𑐵 𑐖𑐹𑐰𑐣 𑑋 𑐜𑑂𑐬𑐩𑐫𑑂 𑐥𑐸𑐳𑐵 𑐟𑐫𑐵𑐟𑑅𑐐𑐸 𑐡𑐸𑑋 𑐜𑑂𑐬𑐩𑐫𑑂 𑐡𑐸𑐣𑐾 𑐕𑐸𑑄 𑐩𑐡𑐸 𑑋
𑐜𑑂𑐬𑐩 𑐳𑑂𑐰𑐳𑑂𑐰𑑄 𑐔𑑄𑐏𑐾𑐔𑐵𑑄 𑐑𑑁𑐥𑐮𑐏 𑐳𑐸𑐩𑑂𑐎 𑐔𑑂𑐰𑐣𑐵𑑅 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑐣 𑑋 𑐣𑑂𑐴𑑂𑐫𑐥𑐸𑐂 𑐕𑐸𑑄 𑐧𑐶𑐔𑐵𑑅 𑐧𑐸𑐫𑐵𑐰𑐫𑐾𑐰𑑄 𑐮𑐫𑑂𑐟𑐵𑐫𑐵𑑅 𑐰 𑐟𑐶𑑄𑐎 𑐣𑑂𑐴𑐸𑐮 𑑋 𑐰 𑐫𑐵𑐎𑑅𑐔𑐵 𑐴𑐾 𑐨𑐸𑐣𑐸𑐨𑐸𑐣𑐸 𑐴𑐵𑐮, ‘𑐖𑐶𑐐𑐸 𑐠𑑂𑐰 𑐄𑐥𑐵𑐫 𑐖𑑂𑐫𑐵 𑐰𑐮 𑐢𑐵𑑅𑐳𑐵 𑐮𑐵 𑐠𑑁𑑄 𑐖𑐶𑑄 𑐥𑑂𑐰𑐵𑑅 𑐖𑐵𑐫𑐾𑐎 𑐮𑐵 𑐣𑐫𑐾 𑐏𑐣𑐷 𑐧𑐵𑑅 𑐳𑐵 !’
𑐢𑑀𑑄𑐔𑐵𑑄 𑐜𑑂𑐬𑐩𑐫𑐵 𑐥𑐸𑐳𑐵 𑐮𑐶𑐎𑐫𑐵𑑅 𑐄𑐎𑐶𑐫𑐵𑐟 𑐑𑑃𑐖𑐵 𑐰 𑐳𑑂𑐫𑐵𑐄𑐮𑐵 𑐴𑐫𑐵𑑅 𑐟𑑂𑐰𑐥𑐸𑐫𑐵𑐧𑐶𑐮 𑑋 𑐁𑑅 𑐜𑑂𑐬𑐩 𑐐𑐸𑐦𑐵 𑐠𑐾𑑄 𑐏𑐣𑐾𑐡𑐟 𑑋
‘𑐁𑑅 𑐕𑐟𑐵 𑐴𑐾 𑐖𑐎 𑐖𑑂𑐫𑐵 𑐮𑑂𑐫𑑄𑐡𑐣𑐶 𑑋’ 𑐠𑐠𑐾 𑐨𑐸𑐣𑐸𑐨𑐸𑐣𑐸 𑐴𑐵𑐴𑐵𑑄 𑐔𑑄𑐏𑐾𑐔𑐵𑑄 𑐦𑐮𑐦𑐹𑐮 𑐨𑐔𑐵 𑐜𑑂𑐬𑐩𑐫𑑂 𑐟𑐫𑐾𑐴𑐮 𑑋
‘𑐁𑑅 𑐠𑐣 𑐏𑐬𑐵𑐔𑐵𑐳𑐵𑑄, 𑐔𑐮𑑂𑐮𑐵𑐳𑐵𑑄 𑐦𑐮𑐦𑐹𑐮 𑐣𑐫𑐾𑐟 𑐡𑐸𑐴𑐵𑑄 𑐰𑐣𑐷, 𑐖𑐶𑑄 𑐎𑐵𑐔𑐵𑐎𑐵𑐔𑐵𑑄 𑐜𑑂𑐬𑐩𑐫𑑂 𑐥𑐸𑐳𑐵 𑐟𑐫𑐵𑑅 𑐐𑐸𑐮𑐸𑐮𑐸𑐮𑐸 𑐟𑐸𑐂𑐎𑐵𑐕𑑂𑐰𑐫𑐾, 𑐀𑐮𑐾 𑐜𑑂𑐬𑐩 𑐐𑑂𑐰𑐵𑐬𑐵 𑐐𑑂𑐰𑐵𑐬𑐵 𑐟𑐸𑐮𑐵𑐰𑐣𑐵𑑅 𑐂𑐥𑐶𑑄 𑐳𑐷 𑑋 𑐜𑑂𑐬𑐩 𑐟𑐸𑐮𑐵𑐰𑐣𑐾𑐐𑐸 𑐡𑐶𑐟 𑐎𑐶 𑐖𑐶𑑄 𑐀𑐮𑐾 𑐩𑐖𑑂𑐖𑐵𑑄 𑐰 𑐱𑐶𑐎𑐵𑐬 𑐣𑐫𑐾 𑑋’
𑐠𑐸𑐧𑐮𑐫𑑂 𑐴𑐾 𑐟𑐸𑐂𑐔𑐵 𑐏𑐬𑐵𑐔𑐵 𑐔𑐵𑑅𑐔𑐵𑑅𑐴𑐶𑐴𑐶𑐄𑑃 𑐀𑐣 𑐴𑐾 𑐠𑑂𑐫𑑄𑐎𑑅𑐰𑐮 𑑋 ‘𑐀𑐫𑑂 𑐠𑑂𑐰 𑐐𑐸𑐦𑐵 𑐐𑐣𑑄 𑐰𑐮? 𑐣𑑂𑐴𑐵𑐥𑐵 𑐮𑐵 𑐠𑑂𑐰 𑐠𑐵𑐳𑐫𑑂 𑐐𑐸𑐦𑐵 𑐴𑐾 𑐩𑐡𑐸𑐐𑐸,’ 𑐟𑐸𑐂𑐔𑐵 𑐀𑐖𑐹 𑐔𑐵𑐮 𑑋 𑐀𑐣𑑄𑐮𑐶 𑐨𑐔𑐵 𑐣𑑂𑐴𑑂𑐫𑑅𑐣𑐾 𑐰𑑄𑐧𑐮𑐫𑑂 𑐰𑑄 𑐜𑑂𑐬𑐩𑐫𑑂 𑐟𑐫𑐵𑐟𑑅𑐐𑐸 𑐦𑐮𑐦𑐹𑐮 𑐏𑐣 𑑋
‘𑐰𑐵𑐴 ! 𑐦𑐮,’ 𑐠𑐸𑐮𑐶 𑐢𑐫𑐵𑐎𑐠𑑄 𑐣𑐫𑐾𑐟 𑐣𑑂𑐴𑑂𑐫𑑅𑐣𑐾 𑐰𑑄𑐧𑐮𑐫𑑂 𑐰𑐫𑐵𑐟 𑐗𑐳𑑄𑐐 𑐰𑐣𑑋 𑐰𑑄 𑐧𑐶𑐔𑐵𑑅 𑐫𑐵𑐟 𑐎𑐶 𑐕𑐟𑐵 𑐮𑐵 𑐠𑐣 𑐐𑐸𑐦𑐵 𑐴𑐾 𑐩𑐡𑐸𑐠𑐵𑐫𑑂 𑐐𑐸𑐦𑐵 𑐡𑐫𑐵𑐔𑑂𑐰𑐣, 𑐄𑐎𑐶𑐳𑐣𑑄 𑐴𑐵𑐣𑑄 𑐟𑐵𑐖𑐵 𑐦𑐮𑐦𑐹𑐮, 𑐥𑐎𑑂𑐎𑐵 𑐣𑑄 𑐠𑐣 𑐕𑐸𑑄 𑐜𑐧𑐜 𑐡𑐸𑑋 𑐟𑐸𑐂𑐔𑐵𑑄 𑐳𑐟𑐬𑑂𑐎 𑐖𑐸𑐫𑐵𑑅 𑐜𑑂𑐬𑐩𑐫𑐵 𑐖𑑅𑐏𑑅 𑐩𑐶𑐏𑐵 𑐧𑑂𑐰𑑅𑐧𑐮𑐫𑑂 𑐰𑑄 𑐔𑑄𑐏𑐾𑐔𑐶𑐫𑐵 𑐣𑑂𑐴𑐶𑐥𑑂𑐫𑑄 𑐕𑐎𑐹𑐔𑐵 𑐏𑐣𑑋 𑐁𑑅 𑐰𑑄 𑐏𑑃 𑐠𑐸𑐮 𑑋
‘𑐔𑑄𑐏𑐾𑐔𑐵 𑐖𑐣𑐵𑐰𑐬𑐟 𑐳𑑂𑐫𑐵𑐫𑐾𑐟 𑐠𑑂𑐰 𑐔𑐵𑐮 𑐩𑑂𑐴𑐶𑐟𑐹𑐐𑐸 𑐖𑐸𑐮 𑐎𑐵, 𑐩𑐏𑐸𑐮𑐵 𑐀𑐫𑑂𑐳𑐵 𑑋 𑐁𑑅 𑐳𑑂𑐰𑐂 𑐎𑐵 𑐠𑑂𑐰𑑄 𑑋’ 𑐠𑐠𑐾 𑐧𑐶𑐔𑐵𑑅 𑐫𑐵𑐣𑐵𑑅 𑐟𑐸𑐂𑐔𑐵 𑐦𑐸𑐚𑑂𑐚 𑐦𑐸𑐚𑑂𑐚 𑐟𑐶𑑄𑐣𑑂𑐴𑐸𑐫𑐵𑑅 𑐩𑐞𑐶 𑐐𑐿𑑄𑐜𑐵𑐫𑐵𑐠𑐵𑐫𑑂 𑐰𑐣 𑑋 𑐳𑑂𑐫𑐾𑑄𑐳𑑂𑐫𑐾𑑄 𑐦𑐸𑑄𑐦𑐸𑑄 𑐩𑐶𑑄𑐎𑐵𑑅 𑐰𑑄 𑐢𑐵𑐮, ‘𑐩𑐞𑐶 𑐡𑐵𑐂, 𑐕𑐶 𑐮𑐵 𑐠𑐣 𑐢𑐎𑐵𑑅𑐳𑐵 𑐮𑐵𑐣𑐵𑐔𑑂𑐰𑐣 𑑋 𑐖𑐶𑑄 𑐕𑐶𑐟𑑅 𑐐𑐣 𑐐𑐣 𑐩𑐵𑐮𑐵𑐰𑐫𑐾 𑐢𑐸𑐣 𑐎𑐵 𑑋’
‘𑐕𑐵𑐫𑑂 𑐮𑐾 𑐟𑐸𑐂𑐔𑐵 ?’
‘𑐡𑐵𑐂, 𑐕𑐶𑐟𑑅 𑐔𑑂𑐰𑐣𑐾𑐟 𑐧𑐵𑑄𑐮𑐵𑑅𑐐𑐸 𑐧𑐵𑐫𑑂 𑐕𑐎𑐹 𑐩𑐵𑑅𑐐𑐸 𑐩𑐏𑐸𑐮𑐵 ? 𑐔𑑄𑐏𑐾𑐔𑐵 𑐢𑑀𑑄𑐣𑑄 𑐕𑐶𑐟𑑅 𑐢𑐎𑐵𑑅 𑐕𑐐𑐹 𑐧𑐵𑑄𑐮𑐵𑑅𑐐𑐸 𑐐𑐸𑐦𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑑅𑐐𑐸 𑐡𑐸𑑋 𑐰𑑄 𑐕𑐶𑐟𑑅 𑐧𑑂𑐰𑐣𑐵𑐴𑐶𑑃 𑐢𑐎𑐵𑑅 𑐖𑐶𑐟𑑅 𑐳𑑅𑐟𑐎𑐾𑐴𑑅𑐐𑐸 𑑋’
‘𑐠𑑂𑐰 𑐮𑐵 𑐟𑐳𑐎𑑄 𑐮𑐫𑑂𑐟𑐵𑐫𑐾𑐧𑐴𑐐𑐸 𑐏𑑃 𑐖𑐸𑐮,’ 𑐠𑐸𑐮𑐶 𑐢𑐫𑐵𑑅 𑐩𑐞𑐶 𑐐𑐿𑑄𑐜𑐵 𑐟𑐸𑐂𑐔𑐵 𑐏𑐬𑐵𑐔𑐵 𑐮𑐶𑐳𑐾𑑄 𑐰𑐣𑐵𑐕𑑂𑐰𑐟𑑋 𑐟𑐸𑐂𑐔𑐵𑑄 𑐟𑐵𑐥𑐵𑐎𑑄 𑐴𑐾 𑐜𑑂𑐬𑐩 𑐎𑑂𑐫𑑃𑐎𑑂𑐫𑑄 𑐢𑐵𑐮, ‘𑐄 𑐎𑐵 𑐐𑐸𑐦𑐵 𑑋 𑐁𑑅 𑐖𑐶𑐐𑐸 𑐖𑑂𑐫𑐵 𑐳𑐶𑐢𑐮 𑑋’
‘𑐳𑐸𑐨𑐵𑐫𑑂 𑐡𑐸, 𑐟𑐸𑐂𑐔𑐵,’ 𑐩𑐞𑐶 𑐠𑐸𑐮𑐶 𑐢𑐫𑐵𑑅 𑐟𑐸𑐬𑐣𑑂𑐟 𑐴𑐾 𑐜𑑂𑐬𑐩𑐫𑑂 𑐡𑐸𑐴𑐵𑑄 𑐰𑐣 𑑋 𑐜𑑂𑐬𑐩𑐫𑑂 𑐳𑐸𑑄 𑐡𑐸𑐴𑐵𑑄 𑐰𑑄 𑐠𑐾𑑄 𑐔𑑂𑐰𑐣𑐵𑑅 𑐔𑑄𑐏𑐾𑐔𑐵𑑄 𑐎𑐵𑐔𑐵𑐎𑐵𑐔𑐵 𑐥𑐸𑐳𑐵 𑐎𑑂𑐰𑐵𑐟𑐸𑐎𑐵𑑅 𑐟𑐫𑐵𑐧𑐶𑐮 𑐀𑐮𑐾 𑐨𑑂𑐰𑐵𑐎𑑂𑐎 𑐥𑑂𑐫𑑄𑐎𑐵𑑅 𑐜𑑂𑐬𑐩 𑐐𑐸𑐮𑐸𑐮𑐸𑐮𑐸 𑐟𑐸𑐂𑐎𑐵𑐕𑑂𑐰𑐟𑑋 𑐜𑑂𑐬𑐩 𑐟𑐸𑐮𑐵𑐰𑐣𑐵𑑅 𑐕𑐠𑐵𑐫𑑂 𑐠𑑂𑐫𑑄𑐎𑐵𑑅 𑐡𑐶𑐟 𑑋
‘𑐁𑐴𑐵, 𑐠𑐸𑐎𑐷 𑐮𑐵 𑐔𑑂𑐫𑐵𑐩𑑂𑐴 𑐗𑐶𑐩𑑂𑐴 𑐏𑐬𑐵𑐔𑐵𑐟 𑐕𑐎𑑂𑐰𑐮𑑄 𑐴𑐾 𑐡𑐸𑐴𑐵𑑄 𑐰𑑄 𑐠𑐾𑑄 𑐔𑑂𑐰𑑄, 𑐏𑐹𑐧 𑐩𑑀𑐖 𑐫𑐵𑐫𑐾𑐡𑐂𑐐𑐸 𑐖𑐸𑐮 𑐎𑐵,’ 𑐠𑐠𑐾 𑐩𑐟𑐷 𑐟𑐫𑐵𑑅 𑐰𑑄 𑐥𑐸𑐳𑐵 𑐔𑐵𑐫𑐾𑐎𑐮 𑑋
𑐥𑐸𑐳𑐵 𑐔𑐵𑐮𑐾𑐰𑑄 𑐩𑐞𑐶 𑐐𑐿𑑄𑐜𑐵 𑐎𑐵𑐔𑐵𑐎𑐵𑐔𑐵𑑄 𑐥𑐶𑐴𑐵𑑄 𑐰𑐮 𑐀𑐮𑐾 𑐟𑑄 𑐥𑐶𑐎𑐫𑐵𑑅 𑐴𑐵𑐮, ‘𑐡𑐸𑐲𑑂𑐚 𑐔𑑄𑐏𑐾𑐔𑐵 𑐖𑐶𑐮𑐶𑐳𑐾 𑐠𑐖𑑂𑐫𑐵𑑅𑐐𑐸 𑐏𑑂𑐫𑐵𑑅 𑐫𑐵𑐫𑐾𑐐𑐸 𑐎𑐵 𑐩𑐏𑐸𑐮𑐵 𑐕𑑄 ?’ 𑐀𑐣𑑄𑐮𑐶 𑐐𑐿𑐜𑐵𑑄 𑐠𑑅𑐐𑐸 𑐣𑑂𑐫𑐎𑐸𑐟𑐶𑑄 𑐔𑑂𑐰𑐫𑐵𑑅 𑐔𑑄𑐏𑐾𑐔𑐶𑐟 𑐨𑑁𑑄 𑐨𑑁𑑄 𑐧𑐳𑑂𑐰𑐵𑐟𑑋 𑐔𑑄𑐏𑐾𑐔𑐵 𑐰𑐵𑐠𑐵𑐰𑐵𑐠𑐵 𑐎𑐣 𑑋
𑐧𑐮𑑂𑐮 𑐧𑐮𑑂𑐮 𑐩𑐵𑐦𑐶 𑐦𑑂𑐰𑐣𑐵𑑅 𑐖𑑂𑐫𑐵𑐣 𑐧𑐔𑐾 𑐫𑐵𑐣𑐵𑑅 𑐰 𑐏𑐸𑐟𑑂𑐫𑐵𑑄 𑐏𑐸𑐟𑑂𑐫𑐵𑑄 𑐎𑐫𑐵𑑅 𑐀𑐣𑑄 𑐰𑐣𑐵𑐕𑑂𑐰𑐟𑑋 𑐰𑐫𑐵𑐐𑐸 𑐡𑐸𑐲𑑂𑐚𑐟𑐵𑐫𑐵 𑐳𑐖𑐵𑑃𑐫𑑂 𑐰𑑄 𑐐𑐵𑐎𑑂𑐎 𑐴𑐾 𑐦𑐫𑐾𑐩𑐵𑐮 𑑋