𑐔𑐸𑐮𑐶𑐔𑐶𑐫𑐵 𑐔𑐮𑐵𑐏𑐷

• 𑐄𑐲𑐵 𑐰𑐖𑑂𑐬𑐵𑐔𑐵𑐬𑑂𑐫

𑐔𑐸𑐮𑐶𑐔𑐵 𑐐𑑂𑐰𑑄𑐐𑑅 𑐮𑑃 𑐡𑐵𑐥𑐵 𑐖𑐸𑐫𑐵𑑅 𑐦𑑂𑐫𑐵𑐎𑐢𑑀𑑄𑐟𑐫𑑂𑐐𑐸 𑐧𑐳𑑂𑐟𑐷𑐂 𑐮𑐵𑑅𑐰𑐣 𑑋 𑐡𑑂𑐫𑑅 𑐏𑐶𑐄𑑃𑐏𑐶𑐄𑑃 𑐢𑐵𑐫𑐵𑐰𑐫𑐾 𑐢𑐸𑑄𑐎𑐮 𑑋 “𑐁𑑅 𑐐𑐣 𑐰𑐣𑐾𑐐𑐸 …” 𑐧𑐶𑐔𑐵𑑅 𑐫𑐵𑐫𑐵𑑄 𑐰𑐫𑐵 𑐨𑐸𑐂𑐔𑑅𑐟𑐶 𑐴𑐵𑐮 𑑋 𑐠𑐸𑐧𑐮𑐫𑑂 𑐮𑐵𑐎 𑐴𑐾 𑐐𑑀𑐮𑐾𑐔𑐵 𑐦𑑂𑐫𑐵𑐎𑐢𑑀𑑄 𑐀𑐣 𑐠𑑂𑐫𑑄𑐎𑑅 𑐰𑐮 𑑋 𑐔𑐸𑐮𑐶𑐔𑐵 𑐐𑑂𑐰𑑄𑐐𑑅𑐫𑐵𑐟 𑐏𑑄𑐧𑐮𑐫𑑂 𑐰𑐫𑐵 𑐃 𑐔𑐸𑐎𑐸𑐔𑐸𑐎𑐸 𑐰𑐣 𑑋

“𑐖𑐶 𑐔𑐸𑐮𑐶𑐔𑐵 𑐏𑑅 𑑋 𑐖𑐶𑐟𑑅 𑐔𑐕𑐶 𑐠𑐣 𑐔𑑂𑐰𑐣𑐾 𑐧𑐶𑐫𑐵𑐡𑐶𑐳𑑃 𑑋” 𑐔𑐸𑐮𑐶𑐔𑐵𑑄 𑐐𑑂𑐫𑐵𑐐𑑂𑐫𑐵𑑄 𑐣𑐰𑐵𑐟 𑑋

“𑐔𑐸𑐮𑐶𑐔𑐵 𑐐𑑂𑐰𑑄𑐐𑑅𑐫𑐵𑐟 𑐏𑑄𑐧𑐮𑐫𑑂 𑐴𑐵𑐎𑐸𑐔𑐵, 𑐨𑐸𑐫𑐹𑐔𑐵, 𑐳𑐶𑐫𑐹𑐔𑐵 𑐦𑑂𑐫𑐵𑐎𑐢𑑀𑑄𑐟𑐫𑑂 𑐣𑑄 𑐩𑑂𑐴𑐸𑐟𑐸𑐂 𑐃 𑐧𑐸𑐫𑐵𑐰𑐮 𑑋 𑐂𑐥𑐶𑑄 𑐔𑐸𑐮𑐶𑐔𑐶𑐫𑐵 𑐣𑑂𑐴𑑂𑐫𑑅𑐣𑐾 𑐰𑐣 𑐀𑐮𑐾 𑐰𑐫𑐵𑐟 𑐣𑐫𑐾𑐠𑐾𑑄 𑐫𑐵𑐣𑐵𑑅 𑐳𑑂𑐰𑐫𑐵𑐔𑑂𑐰𑐣 𑑋 𑐔𑐸𑐮𑐶𑐔𑐵𑑄 𑐁𑑅 𑐧𑐵𑑄𑐮𑐵𑐎 𑐴𑐾 𑐠𑐸𑐂 𑐢𑐸𑑄𑐎𑐮 𑐎𑐶 𑐰𑐫𑐵𑐐𑐸 𑐣𑐶𑑄𑐟𑐶𑑄 𑐟𑑅𑐢𑑄𑐐𑐸 𑐴𑐾 𑐳𑑄𑐎𑐚 𑐰𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐨𑐔𑐵 𑐖𑐵𑑅𑐧𑐮𑐫𑑂 𑐧𑐳𑑂𑐟𑐷𑐂 𑐔𑑂𑐰𑑄𑐥𑐶𑑄 𑐦𑑂𑐫𑐵𑐎𑐢𑑀𑑄𑐟 𑐡𑐎𑑂𑐰 𑐴𑐾 𑐀𑐣 𑐩𑐸𑑄𑐰𑐫𑐾 𑐢𑐸𑑄𑐎𑐮 𑑋

“𑐴𑐾 𑐨𑐐𑐰𑐵𑐣, 𑐁𑑅 𑐖𑐶𑑄 𑐠𑑅𑐟 𑐠𑐸𑐩𑐶𑐐𑐸 𑐮𑑂𑐴𑐵𑐟𑐫𑑂 𑐮𑐵𑐎𑐾 𑐩𑐧𑐷𑐐𑐸 𑐐𑐠𑐾 𑐫𑐵𑐣𑐵𑑅 𑑋” 𑐔𑐸𑐮𑐶𑐔𑐵𑑄 𑐧𑐶𑐔𑐵𑑅 𑐫𑐵𑐟 𑑋 𑐰𑐫𑐵 𑐩𑑂𑐴 𑐠𑐸𑐬𑐸𑐠𑐸𑐬𑐸 𑐏𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

“𑐡𑐵𑐂𑐥𑐶𑑄, 𑐖𑐶 𑐁𑐥𑐟𑐫𑑂 𑐡𑐸 𑑋 𑐔𑐕𑐶 𑐔𑑂𑐰𑐣𑐾𑐟 𑐠𑐵𑐫𑑂 𑐕𑐎𑐹 𑐧𑐶𑐄𑐳𑐵 𑐕𑐶𑐎𑐥𑐶𑐣𑐶 𑐖𑐫 𑐖𑐸𑐂 𑑋 𑐕𑐶𑐎𑐥𑐶𑑄 𑐳𑐸𑐣𑐵𑐣𑑄 𑐴𑐾 𑐖𑐶𑑄 𑐳𑑂𑐰𑐫𑐾, 𑐐𑑂𑐰𑑄𑐐𑑅 𑐴𑐵𑑅𑐐𑐸 𑐣𑑂𑐫𑐣𑐾 𑐩𑐣𑑄𑐣𑐶 𑐖𑐸𑐂 𑑋 𑐖𑐶𑑄 ‘𑐎𑐸𑐎𑐸𑐮𑑂𑐫𑐵𑑄𑐎𑐹’ 𑐫𑐵𑐟 𑐎𑐶 𑐏𑐶𑐄𑑃 𑐧𑐶𑐳𑐶𑐄𑑃 𑐰𑐣𑐷, 𑐳𑐸𑐬𑑂𑐡𑑂𑐫𑑅 𑐥𑐶𑐴𑐵𑑄 𑐰𑐂, 𑐥𑐵𑐮𑐵𑐥𑐵𑐮𑐵 𑐠𑐶𑐣𑐵𑑅 𑑋” 𑐔𑐸𑐮𑐶𑐔𑐵𑑄 𑐢𑐵𑐮 𑑋 𑐠𑐸𑐧𑐮𑐫𑑂 𑐮𑐵𑐎 𑐴𑐾 𑐴𑐵𑐎𑐸𑐔𑐵𑑄 𑐐𑑀𑐮𑐾𑐔𑐶𑐫𑐵 𑐣𑑂𑐴𑐵𑐫𑑂𑐥𑐣𑐫𑑂 𑐏𑐸𑐳𑐸𑐎𑑂𑐎 𑐢𑐵𑐮, “𑐱𑐶𑐎𑐵𑐬 𑐁𑑅 𑐗𑐷𑐐𑐸 𑐴𑐾 𑐮𑑂𑐴𑐵𑐟𑐫𑑂 𑐡𑐸 𑑋 𑐐𑐧𑐮𑐫𑑂 𑐫𑐮, 𑐀𑐧𑐮𑐫𑑂 𑐣𑐫𑐾𑐦𑐸 𑑋 𑐄𑐎𑐶𑑄 𑐰𑐫𑐵𑐟 𑐣𑐫𑐾 𑐣𑑂𑐴𑑂𑐫𑑅 𑐰 𑐴𑐵𑑅𑐐𑐸 𑐕𑐎𑑂𑐰𑑅 𑐕𑐵𑐫𑑂 𑐩𑐣𑑂𑐫𑐣𑐾𑐐𑐸 ? 𑐗𑐷𑐳𑑄 𑐐𑐧𑐮𑐾𑑄 𑐣𑑄 𑐐𑑂𑐰𑑄𑐐𑑅 ‘𑐎𑐸𑐎𑐸𑐮𑑂𑐫𑐵𑑄𑐎𑐹’ 𑐴𑐵𑐮𑐷𑐐𑐸 𑐢𑐵𑑅𑐐𑐸 𑐣𑑂𑐫𑐣𑐾 𑐩𑐣𑑄𑐣𑐶 𑑋”

𑐂𑐥𑐶𑑄 𑐏𑐸𑐳𑐸𑐏𑐸𑐳𑐸 𑐏𑑃 𑐮𑑂𑐴𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐴𑐾 𑐔𑐸𑐮𑐶𑐔𑐵𑑄 𑐳𑐷𑐎𑐮 𑐎𑐶 𑐦𑑂𑐫𑐵𑐎𑐢𑑀𑑄𑐟𑐫𑑂𑐟 𑐰𑐫𑐵𑐐𑐸 𑐏𑑃𑐫𑐵 𑐥𑑂𑐬𑐨𑐵𑐰 𑐮𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋

“𑐕 𑐖𑐶𑐩𑐶𑐠𑐵𑐫𑑂 𑐠𑐣 𑐔𑑂𑐰𑐣𑐾𑐦𑐸 𑑋 𑐟𑐬 𑐕𑑄 ‘𑐎𑐸𑐎𑐸𑐮𑑂𑐫𑐵𑑄𑐎𑐹’ 𑐴𑐵𑐮𑐵𑑅 𑐏𑐶𑐄𑑃 𑐔𑐶𑐂𑐎𑐵 𑐕𑑂𑐰𑐫𑐵𑑅 𑐳𑐸𑐠 𑐖𑐹𑐐𑐸 𑐎𑑂𑐫𑐣𑐾 𑐴𑐾 𑐩𑐵𑑅 𑑋” 𑐦𑑂𑐫𑐵𑐎𑐢𑑀𑑄𑐟𑐫𑑂𑐳𑑄 𑐢𑐵𑐮 𑑋

𑐔𑐸𑐮𑐶𑐔𑐵 𑐬𑐵𑐖𑐷 𑐖𑐸𑐮 𑑋

“𑐖𑐶𑐥𑐶𑑄 𑐕 𑐴𑐵𑐮𑐷𑐐𑐸 𑐥𑐶𑐫𑐵𑐔𑑂𑐰𑐣𑐾 𑑋 𑐕𑑄 𑐧𑐳𑑂𑐟𑐷𑐫𑐵 𑐡𑐠𑐸𑐂 𑐮𑐵𑐎 𑐔𑑂𑐰𑑄𑐐𑐸 𑐳𑐶𑐩𑐵𑐫𑑂 𑐔𑑂𑐰𑐣𑐵𑑅 𑐔𑐵 𑐧𑐶𑐎𑐶 𑑋 𑐳𑐶𑐩𑐵𑐫𑑂 𑐔𑑂𑐰𑐣𑐵𑑅 𑐎𑐸𑐎𑐸𑐮𑑂𑐫𑐵𑑄𑐎𑐹 𑐴𑐵𑐮 𑐢𑐵𑑅𑐳𑐵 𑐕 𑐴𑐵𑑅𑐐𑐸 𑐖𑐶𑐩𑐶𑐳𑑄 𑐧𑐵𑑄𑐮𑐵𑐎 𑐟𑐵𑐫𑐾𑐎𑐾𑐦𑐂 𑑋 𑐎𑐵 𑐳𑐶𑐩𑐵𑐫𑑂 𑐔𑑂𑐰𑑄 𑐴𑐸𑑃 𑑋” 𑐳𑐶𑐫𑐸𑐔𑐵 𑐦𑑂𑐫𑐵𑐎𑐢𑑀𑐣𑑄 𑐢𑐵𑐮 𑑋 𑐧𑐴𑐣𑐷 𑐖𑐸𑐫𑐵𑐰𑐮 𑑋 𑐀𑐠𑐾 𑐖𑐸𑐫𑐵𑑅 𑐦𑑂𑐫𑐵𑐎𑐢𑑀𑑄𑐟 𑐳𑐎𑐮𑐾𑑄 𑐠𑑅𑐠𑑅𑐐𑐸 𑐕𑐾𑑃𑐫𑑂 𑐮𑐶𑐴𑐵𑑄 𑐰𑐣𑐵𑐕𑑂𑐰𑐟 𑑋

𑐔𑐸𑐮𑐶𑐔𑐵 𑐣𑑄 𑐳𑐶𑐩𑐵𑐫𑐵 𑐕𑐎𑐔𑐵𑐫𑑂 𑐐𑐫𑐵𑑅 𑐠𑐴𑐵𑑄 𑐰𑐣𑑋𑐡𑑂𑐫𑑅 𑐣𑑂𑐫𑐵𑐎𑑂𑐎 𑐴𑐾 𑐏𑐶𑐄𑑃𑐫𑐵𑐰𑐮 𑑋 𑐧𑐳𑑂𑐟𑐷 𑐳𑐸𑐣𑐳𑐵𑐣 𑐖𑐸𑐫𑐵𑐰𑐮 𑑋

𑐔𑐸𑐮𑐶𑐔𑐵𑑄 𑐧𑐶𑐔𑐵𑑅 𑐫𑐵𑐟, “𑐁𑑅 𑐮𑐸𑐳𑐸𑐎𑑂𑐎 𑐧𑐶𑐳𑐶𑐄𑑃 𑐰𑐣𑐾𑐩𑐵𑐮”, 𑐟𑐬 𑐩𑐾𑐐𑐸 𑐩𑐣𑑄 𑐢𑐵𑐮, “𑐦𑑂𑐫𑐵𑐎𑐢𑑀𑑄𑐟 𑐟𑐳𑐎𑑄 𑐔𑐮𑐵𑐏 𑐖𑐸𑐂 𑑋 𑐐𑐣𑑄 𑐳𑐸𑐮𑐵𑐔𑑂𑐰𑑄𑐐𑐸 𑐣𑑄 𑐖𑐸𑐂𑐦𑐸 𑑋”

𑐔𑐸𑐮𑐶𑐔𑐵 𑐁𑑅 𑐐𑐧𑐮𑐫𑑂 𑐧𑐵𑐔𑐵𑐃 𑐖𑐸𑐂 𑐢𑐎𑐵𑑅 𑐥𑐶𑐫𑐵𑐔𑑂𑐰𑐣 𑑋 𑐰𑑄 𑐳𑐶𑐄 𑐎𑐶 𑐧𑐵𑐔𑐵 𑐖𑐵𑐮𑐎𑐶 𑐦𑑂𑐫𑐵𑐎𑐢𑑀𑑄𑐟𑐫𑑂𑐳𑑄 𑐳𑑂𑐫𑐵𑐎𑑂𑐎 𑐴𑐾 𑐣𑑂𑐴𑑂𑐫𑑅 𑐰𑐫𑐾𑐎𑐷 𑑋 𑐠𑐸𑐧𑐮𑐫𑑂 𑐮𑐵𑐎 𑐴𑐾 𑐦𑑂𑐫𑐵𑐎𑐢𑑀𑑄𑐟𑐫𑑂𑐐𑐸 𑐧𑐳𑑂𑐟𑐷𑐂 𑐱𑐶𑐎𑐵𑐬𑐷𑐟𑐫𑑂𑐐𑐸 𑐥𑐸𑐔𑑅 𑐏𑐣𑐾 𑐡𑐫𑐾𑐎𑑅 𑐰𑐮 𑑋 𑐂𑐥𑐶𑑄 𑐦𑑂𑐫𑐵𑐎𑐢𑑀𑑄𑐟 𑐮𑐵𑐣𑐵𑑅 𑐔𑐶𑐜𑐶𑐫𑐵𑐏𑐵𑐣𑐵𑐫𑑂 𑐩𑐷 𑐫𑑄𑐎𑐷𑐥𑐶𑑄 𑐏𑑅 𑑋

𑐱𑐶𑐎𑐵𑐬𑐷𑐟 𑐦𑑂𑐫𑐵𑐎𑐢𑑀𑑄𑐟𑐫𑑂𑐐𑐸 𑐕𑐾𑑃𑐫𑐵 𑐥𑐶𑐣𑐾 𑐥𑐶𑐣𑐾 𑐔𑑂𑐰𑐣𑐵𑑅 𑐟𑐵𑐎 𑐳𑑂𑐰𑐫𑐵𑐔𑑂𑐰𑐣 𑑋 𑐳𑐎𑐳𑐶𑐎𑐾𑑄 𑐕𑐐𑐹 𑐕𑐐𑐹 𑐖𑐵𑐮 𑐡𑐸𑑋 𑐔𑐸𑐮𑐶𑐔𑐵𑑄 𑐱𑐶𑐎𑐵𑐬𑐷𑐟𑐫𑑂𑐳𑑄 𑐕𑐸 𑐫𑐵𑐫𑐾𑐟𑑂𑐫𑐣 𑐢𑐵𑐫𑐐𑐸 𑐏𑑃 𑐠𑐸𑐂𑐎𑐾 𑐢𑐸𑑄𑐎𑐮 𑑋 𑐟𑐬 𑐳𑐸𑐠 𑐖𑐸𑐂 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐦𑑂𑐫𑐵𑐎𑐢𑑀𑑄𑐟 𑐥𑐶𑐴𑐵𑑄 𑐰𑐂𑐐𑐸 𑐏𑐣𑐾 𑐩𑐡𑐸 𑑋 𑐦𑑂𑐫𑐵𑐎𑐢𑑀𑑄𑐟𑐫𑑂𑐟 𑐱𑐶𑐎𑐵𑐬𑐷𑐟𑐫𑑂𑐐𑐸 𑐖𑐵𑐮𑐫𑑂 𑐎𑑂𑐫𑑄𑐎𑐾𑐐𑐸 𑐄𑐥𑐵𑐫 𑐔𑐸𑐮𑐶𑐔𑐵𑑄 𑐧𑐶𑐔𑐵𑑅 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐰𑑄 𑐰 𑐴𑐾 𑐂𑐮𑐫𑑂 ‘𑐎𑐸𑐎𑐸𑐮𑑂𑐫𑐵𑑄𑐎𑐹’ 𑐴𑐵𑐮𑐵𑐧𑐶𑐮 𑑋

𑐠𑐸𑐎𑐶𑑄 𑐫𑐵𑐣𑐵𑑅 𑐦𑑂𑐫𑐵𑐎𑐢𑑀𑑄𑐟𑐫𑑂 𑐣𑑂𑐴𑑂𑐫𑑅 𑐳𑑂𑐫𑐣 𑑋 𑐂𑐩𑐶 𑐳𑑂𑐰𑐫𑐾 𑐳𑐸𑐠 𑐖𑐸𑐮 𑐢𑐎𑐵𑑅 𑐔𑑂𑐰𑐣 𑑋 𑐳𑐸𑐠 𑐖𑐹𑐐𑐸 𑐳𑑂𑐰𑐫𑐾𑐟 𑐂𑐥𑐶𑑄 𑐰𑐵𑐠𑐵𑐂𑐠𑐶𑑄 𑐡𑐣 𑑋 𑐩𑐶𑐏𑐵 𑐐𑐶𑐮𑐶𑐐𑐶𑐮𑐶 𑐫𑐵𑐫𑐵𑑄 𑐂𑐥𑐶𑑄 𑐥𑐶𑐴𑐵𑑄 𑐰𑐮 𑑋

𑐟𑐬 𑐠𑑂𑐰 𑐕𑐸 … 𑐳𑑂𑐰𑑅𑐳𑑂𑐰𑑅𑐠𑐵𑐫𑑂 𑐏𑐶𑐄𑑃𑐳𑐾 𑐔𑑂𑐰𑑄 𑑋 𑐎𑐵𑑄 𑐠𑐾𑑄 𑐏𑐶𑐄𑑃𑐳𑐾 𑐔𑑂𑐰𑐣𑐵𑐔𑑂𑐰𑑄𑐐𑐸 𑐄𑐐𑐸 𑐂𑐮𑐫𑑂 𑐦𑑂𑐫𑐵𑐎𑐢𑑀𑑄𑐟𑐫𑑂𑐳𑑄 𑐕𑐸𑑄 𑐏𑑄𑐎𑐾𑐩𑐦𑐸𑐟 𑐀𑐮𑐾 𑐂𑐥𑐶𑑄 𑐱𑐶𑐎𑐵𑐬𑐷𑐟𑐫𑑂𑐐𑐸 𑐖𑐵𑐮𑐫𑑂 𑐎𑑂𑐫𑐣 𑑋 𑐧𑐳𑑂𑐟𑐷𑐫𑐵𑐥𑐶𑑄 𑐦𑑂𑐫𑐵𑐎𑐢𑑀𑑄𑐟 𑐡𑐎𑑂𑐰𑐳𑐶𑐟 𑐖𑐵𑐮𑑄 𑐨𑐸𑐣𑐵𑑅 𑐱𑐶𑐎𑐵𑐬𑐷𑐟𑐫𑑂𑐳𑑄 𑐖𑑂𑐰𑐣𑐵𑐰𑐣 𑑋 𑐦𑑂𑐫𑐵𑐎𑐢𑑀𑑄𑐟 𑐠𑑅𑐥𑐶𑑄𑐟 𑐏𑐹𑐧 𑐔𑐮𑐵𑐏 𑐟𑐵𑐫𑐾𑐎𑐷𑐥𑐶𑑄 𑐏𑑅 𑑋 𑐟𑐬 𑐔𑐸𑐮𑐶𑐔𑐵 𑐐𑑂𑐰𑑄𑐐𑐮𑑄 𑐂𑐩𑐶𑐟 𑐩𑐵𑐠 𑐫𑐵𑐣𑐵𑐧𑐶𑐮 𑑋

𑐦𑑂𑐫𑐵𑐎𑐢𑑀𑑄𑐟𑐫𑑂𑐟 𑐖𑑂𑐰𑐣𑐵𑑅 𑐱𑐶𑐎𑐵𑐬𑐷𑐟 𑐟𑐵𑐥𑐵𑐎 𑐰𑐣𑐾 𑐢𑐸𑑄𑐎𑐹𑐳𑐾𑑄𑐮𑐶 𑐔𑐸𑐮𑐶𑐔𑐵 𑐐𑑂𑐰𑑄𑐐𑑅𑐫𑐵 𑐣𑑄 𑐳𑐵𑐳𑑅 𑐠𑐴𑐵𑑄 𑐰𑐮 𑑋 𑐳𑐸𑐠 𑐖𑐸𑐂 𑐣𑑂𑐴𑑂𑐫𑑅 𑐴𑐾 𑐰 𑐠𑑅𑐐𑐸 𑐕𑐾𑑃𑐥𑐵𑐏𑐾 𑐳𑑂𑐰𑐫𑐵𑑅 𑐰𑐣𑐵𑐕𑑂𑐰𑐟 𑑋