𑐎𑐶𑐥𑐹𑐫𑐵 𑐧𑐵𑐡𑐾𑐐𑐵𑑄 𑐢𑐵𑑅 𑐧𑐵𑐖𑐵 𑐏𑐮𑑅 𑐡𑐸𑐣𑐾 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞

𑐐𑐸𑐬𑐸𑐥𑐶𑑄 𑐧𑐬𑐶𑐲𑑂𑐛 𑐐𑐸𑐬𑐸 𑐖𑑀𑐐𑐩𑐵𑐣 𑐩𑐴𑐬𑑂𑐖𑐣𑐫𑐵 𑐮𑐶𑐳𑐾𑑄 𑐣𑑂𑐴𑐹𑐥𑐸𑐳𑑂𑐟𑐵𑐫𑐵 𑐫𑐸𑐰𑐵 𑐐𑐸𑐬𑐸𑐥𑐶𑑄 𑐎𑐰𑐶𑐣 𑐩𑐴𑐬𑑂𑐖𑐣 𑐰 𑐬𑐵𑐖𑐣 𑐩𑐴𑐬𑑂𑐖𑐣

𑐎𑐶𑐥𑐹 𑐮𑐵𑐐𑐵𑐫𑑂 𑐢𑐵𑑅 𑐧𑐵𑐖𑐵𑐫𑐵 𑐥𑐸𑐮𑐵𑑄𑐩𑑂𑐴 𑐐𑐸𑐬𑐸 𑐐𑑅𑐕𑐾𑑃 𑐟𑑂𑐰𑐵𑑅𑐫𑐵 𑐖𑑀𑐐𑐩𑐵𑐣 𑐩𑐴𑐬𑑂𑐖𑐣 𑐩𑐹 𑐐𑐸𑐬𑐸 𑐖𑐸𑐫𑐵𑑅 𑐎𑐶𑐥𑐹𑐫𑐵 𑑙 𑐰𑐜𑐵𑐫𑑂 𑐔𑑂𑐰𑑄𑐐𑐸 𑐧𑐵𑐡𑐾𑐐𑐵𑑄 (𑐧𑐵𑐴𑐶𑐐𑐵𑑄) 𑐢𑐵𑑅 𑐧𑐵𑐖𑐵 𑐏𑐮𑑅 𑐡𑐸𑐣𑐾 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞 𑐧𑐶𑐂𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐄𑐐𑐸 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐎𑐶𑐥𑐹 𑐮𑐵𑐐𑐵𑐫𑐵 𑐳𑐎𑑂𑐬𑐶𑐫 𑐣𑑂𑐴𑐹𑐥𑐸𑐳𑑂𑐟𑐵𑐫𑐵 𑐫𑐸𑐰𑐵𑑅 𑐐𑐸𑐬𑐸𑐥𑐶𑑄 𑐎𑐶𑐥𑐹 𑑑𑑐 𑐰𑐜𑐵 𑐳𑐣𑐳𑑂𑐚𑐵𑐬 𑐎𑑂𑐮𑐧𑐫𑐵 𑐎𑐰𑐶𑐣 𑐩𑐴𑐬𑑂𑐖𑐣 𑐰 𑐬𑐵𑐖𑐣 𑐩𑐴𑐬𑑂𑐖𑐣𑐥𑐶𑐣𑑂𑐳𑑄 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞 𑐧𑐶𑐂𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑑄𑐐𑐸 𑐩𑑄𑐳𑐷𑐬 𑑙 𑐐𑐟𑐾𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐄𑐐𑐸 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐰𑐷𑐩𑑂𑐴 (𑑓𑑐 𑐩𑑂𑐴) 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑐣𑑂𑐳𑑄 𑐧𑑂𑐰𑐟𑐶 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐸 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐣𑑂𑐴𑐶𑐠𑑄 𑐳𑐣𑐶𑐮𑐫𑐵 𑑗 𑐟𑐵 𑐃𑐣𑐶𑐳𑐾𑑄 𑐧𑐴𑐣𑐷 𑑙 𑐟𑐵 𑐃𑐟𑐎 𑐥𑑂𑐬𑐱𑐶𑐎𑑂𑐲𑐞 𑐧𑐶𑐂𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐄𑐐𑐸 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐣𑐶𑐮𑐵 𑐥𑐸𑐮𑐵𑑅 𑐧𑐵𑑅𑐥𑐹𑐖𑐵 𑐟𑐎𑑄 𑐫𑐵𑐫𑐾𑐢𑐸𑑄𑐎𑐹𑐐𑐸 𑐰 𑐁𑑅 𑐢𑐵𑑅 𑐧𑐵𑐖𑐵 𑐠𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐖𑐸𑐂𑐢𑐸𑑄𑐎𑐹𑐐𑐸 𑐖𑐵𑐣𑐎𑐵𑐬𑐷 𑐢𑐵𑑅𑐧𑐵𑐖𑐵 𑐐𑐸𑐬𑐸 𑐎𑐰𑐶𑐣 𑐩𑐴𑐬𑑂𑐖𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐁𑑅 𑐰𑐂𑐐𑐸 𑑒𑑐𑑗𑑙 𑐳𑐵𑐮𑐫𑐵 𑐎𑐶𑐥𑐹𑐫𑐵 𑐳𑐵𑐥𑐵𑐬𑐸𑐫𑐵 𑐣𑐶𑐟𑐶𑑄 𑐄𑐐𑐸 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑑅𑐐𑐸 𑐏𑑅𑐳𑐵 𑑒𑑐𑑗𑑙 𑐳𑐵𑐮𑐫𑐵 𑐳𑐵𑐥𑐵𑐬𑐸 𑐥𑐵𑑅 𑐎𑐶𑐥𑐹𑐫𑐵 𑑙 𑐰𑐜𑐵 𑐧𑐵𑐡𑐾𑐐𑐵𑑄 (𑐧𑐵𑐴𑐶𑐐𑐵𑑄)𑐫𑐵 𑐥𑐵𑑅 𑐮𑐵𑑅𑐐𑐸 𑐡𑐸 𑑋

𑐄𑐐𑐸 𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞𑐫𑑂 𑐧𑐵𑐡𑐾𑐐𑐵𑑄 (𑐧𑐵𑐴𑐶𑐐𑐵𑑄) 𑐮𑐵𑐐𑐵𑐫𑐵 𑐥𑑂𑐬𑐟𑑂𑐫𑐾𑐎 𑐟𑑂𑐰𑐵𑑅𑐥𑐵𑐏𑐾𑑄 𑐧𑐵𑐖𑑄 𑐠𑐵𑐂𑐥𑐶𑑄 𑐫𑐸𑐰𑐵𑐥𑐶𑑄 𑐩𑐸𑑄𑐎𑐵𑑅 𑐥𑑂𑐬𑐱𑐶𑐎𑑂𑐲𑐞 𑐧𑐶𑐂𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐩𑐾𑐩𑑂𑐴 𑐐𑐸𑐬𑐸 𑐬𑐵𑐖𑐣 𑐩𑐴𑐬𑑂𑐖𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐢𑐵𑑅 𑐧𑐵𑐖𑐵 𑐥𑑂𑐬𑐱𑐶𑐎𑑂𑐲𑐞𑐫𑐵 𑐣𑐶𑐟𑐶𑑄 𑐎𑐶𑐥𑐹𑐫𑐵 𑐐𑑅𑐕𑐾𑑃 𑐡𑐵𑐦𑐵 𑐏𑐮𑑅, 𑐟𑑅𑐣𑐣𑐷 𑐡𑐵𑐦𑐵 𑐏𑐮𑑅, 𑐟𑐸𑑃𑐗𑑂𑐰𑑅 𑐡𑐵𑐦𑐵 𑐏𑐮𑑅 𑐰 𑐳𑐣𑐳𑑂𑐚𑐵𑐬 𑐎𑑂𑐧𑐮𑐥𑐵𑐏𑐾𑑄 𑐢𑐵𑑅 𑐧𑐵𑐖𑐵 𑐄𑐥𑐮𑐧𑑂𑐢 𑐫𑐵𑐎𑐹𑐐𑐸 𑐡𑐸 𑑋

𑐎𑐶𑐥𑐹 𑐮𑐵𑐐𑐵𑐫𑑂 𑐁𑑅𑐟𑐎𑐫𑐵 𑐡𑐸𑐣𑐾 𑐕𑐩𑑂𑐴 𑐫𑐵𑑄 𑐕𑐩𑑂𑐴 𑐖𑐎 𑐥𑐸𑐮𑐵𑑄𑐩𑑂𑐴 𑐧𑐬𑐶𑐲𑑂𑐛 𑐢𑐵𑑅 𑐧𑐵𑐖𑐵 𑐐𑐸𑐬𑐸 𑐡𑐣𑐷, 𑐰𑐫𑑂𑐎𑑅 𑐏𑑅 𑐎𑐶𑐥𑐹𑐫𑐵 𑐐𑑅𑐕𑐾𑑃 𑐟𑑂𑐰𑐵𑑅𑐫𑐵 𑐐𑐸𑐬𑐸 𑐖𑑀𑐐𑐩𑐵𑐣 𑐩𑐴𑐬𑑂𑐖𑐣 𑑋 𑐰𑐫𑑂𑐎𑑅 𑐐𑐸𑐬𑐸𑐫𑐵𑐎𑐾 𑐡𑐹𑐐𑐸 𑐖𑑂𑐘𑐵𑐣 𑐳𑐎𑐮 𑐎𑐶𑐥𑐹𑐫𑐵 𑐢𑐵𑑅 𑐧𑐵𑐖𑐵𑐴𑑂𑐫𑑅𑐩𑐶 𑐫𑐸𑐰𑐵𑐥𑐸𑐳𑑂𑐟𑐵𑐫𑐵𑐟 𑐮𑑅𑐮𑑂𑐴𑐵𑐫𑐾𑐐𑐸 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐐𑐸𑐬𑐸 𑐖𑑀𑐐𑐩𑐵𑐣 𑐩𑐴𑐬𑑂𑐖𑐣𑐫𑐵 𑐧𑐵𑐖𑐵𑐥𑑂𑐬𑐟𑐶𑐫𑐵 𑐮𑐐𑐵𑐰 𑐰 𑐖𑑂𑐘𑐵𑐣𑐫𑐵𑐟 𑐎𑐡𑐬 𑐫𑐵𑐣𑐵𑑅 𑐄𑐐𑐸 𑐖𑑂𑐘𑐵𑐣𑐫𑐵 𑐮𑐶𑐥𑐶𑐧𑐡𑑂𑐢 𑐰 𑐳𑑄𑐔𑐫 𑐫𑐵𑐫𑐾𑐩𑐵𑑅𑐐𑐸 𑐠𑑁𑑄𑐫𑐵 𑐁𑐰𑐱𑑂𑐫𑐎𑐟𑐵 𑐏𑑅𑐳𑐵 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑑄 𑐠𑐸𑐎𑐷 𑐢𑑂𑐫𑐵𑐣 𑐧𑐶𑐂𑐩𑐵𑑅𑐐𑐸 𑐏𑐣𑐾𑐡𑐸 𑑋

𑐀𑐠𑐾𑐴𑐾, 𑐣𑑂𑐴𑐹𑐥𑐸𑐳𑑂𑐟𑐵𑐫𑐵 𑐎𑐶𑐥𑐹 𑐮𑐵𑐐𑐵𑐫𑐵 𑐢𑐵𑑅 𑐧𑐵𑐖𑐵 𑐐𑐸𑐬𑐸𑐥𑐶𑑄 𑐎𑐰𑐶𑐣 𑐩𑐴𑐬𑑂𑐖𑐣 𑐰 𑐬𑐵𑐖𑐣 𑐩𑐴𑐬𑑂𑐖𑐣𑑄 𑐣𑑂𑐴𑐹𑐝𑑄𑐐𑑄 𑐧𑐵𑐖𑑄 𑐳𑑂𑐫𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑑂𑐎𑑅𑐥𑐶𑐣𑑂𑐟 𑐣𑑄 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑑄 𑐰𑐫𑑂𑐎𑑅𑐥𑐶𑐣𑐶𑐐𑐸 𑐎𑐮𑐵 𑐳𑑄𑐳𑑂𑐎𑐺𑐟𑐶 𑐰 𑐥𑐬𑐩𑑂𑐥𑐬𑐵𑐥𑑂𑐬𑐟𑐶𑐫𑐵 𑐗𑐸𑐎𑐵𑐰 𑐰 𑐖𑑂𑐘𑐵𑐣𑐫𑐵𑐟 𑐎𑐡𑐬 𑐫𑐵𑐳𑐾𑑄 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑑄 𑐰𑐵𑑅 𑐔𑐵𑐫𑐾𑐎𑐵𑑅 𑐎𑐶𑐥𑐹𑐫𑐵 𑐎𑐮𑐵 𑐳𑑄𑐳𑑂𑐎𑐺𑐟𑐶 𑐰 𑐥𑐬𑐩𑑂𑐥𑐬𑐵 𑐮𑑂𑐫𑑄𑐎𑐵𑐟𑐫𑐾𑐐𑐸 𑐥𑐮𑐵𑑅𑐫𑐵𑐟 𑐴𑑅𑐥𑐵𑑅 𑐧𑐶𑐂𑐩𑐵𑑅𑐐𑐸 𑐣𑑄 𑐠𑑁𑑄𑐎𑐣𑑂𑐴𑐫𑑂 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐥𑐬𑐶𑐳𑑂𑐠𑐶𑐟𑐶𑐫𑐵 𑐩𑐵𑐐 𑐏𑑅 𑑋