𑐊𑐎𑐾𑐡𑐩𑐶𑐥𑐵𑐏𑐾𑑄 𑐳𑑂𑐰𑑄𑐐𑐹 𑐳𑐦𑐹 𑐥𑐶𑐟𑐧𑑂𑐰𑐖𑑂𑐫𑐵

𑐫𑐮 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐩𑐶𑐫𑐵 𑐐𑑂𑐰𑐳𑐵𑐮𑐫𑑂 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐳𑑂𑐰𑑄𑐐𑐹 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐖𑐸𑐮 𑑋 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐊𑐎𑐾𑐡𑐩𑐶𑐫𑐵 𑐳𑑄𑐬𑐎𑑂𑐲𑐎 𑐰𑐵𑐧𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐜𑐵. 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐊𑐎𑐾𑐡𑐩𑐶𑐫𑐵 𑐄𑐥𑐎𑐸𑐮𑐥𑐟𑐶𑐣𑐵𑐥𑑄 𑐳𑐵𑐴𑐶𑐟𑑂𑐫𑐎𑐵𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐖𑑀𑐱𑐷𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐳𑐵𑐩𑐵𑐖𑐶𑐎 𑐰𑐶𑐎𑐵𑐳 𑐩𑐣𑑂𑐟𑑂𑐬𑐵𑐮𑐫𑐫𑐵 𑐐𑑂𑐰𑐵𑐴𑐵𑐮𑐶𑑄 𑐥𑐶𑐡𑑄𑐐𑐸 𑐊𑐎𑐾𑐡𑐩𑐶𑐫𑐵 𑐏𑑂𑐰𑐵𑑅𑐥𑑁 ‘𑐣𑐾𑐰𑐵𑑅 𑐥𑑂𑐬𑐖𑑂𑐘𑐵’ 𑐥𑑂𑐫𑑄𑐐𑐹𑐐𑐸 𑐮𑑂𑐫𑐵𑑅 𑐔𑑂𑐰𑐩𑐶 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑐫𑐵 𑐧𑐵𑐏𑑄 𑐩𑐸𑐣𑐵 𑐳𑐦𑐹 ‘𑐔𑑄𑐀𑐖𑐶’ 𑐰 𑐥𑑂𑐬𑐵. 𑐜𑐵. 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐩𑐵𑐮𑑀𑐔𑐣𑐵 𑐔𑑂𑐰𑐳𑐸 𑐩𑐸𑐣𑐵 𑐳𑐦𑐹 ‘𑐮𑑂𑐴𑐵𑑅𑐔𑐶𑑄’𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄 𑐖𑑀𑐱𑐷𑐫𑐵 𑐣𑐶𑐰𑐵𑐳𑐳𑑂𑐠𑐵𑐣𑐫𑑂 𑐡𑐫𑐾𑐎𑐵𑐔𑑂𑐰𑑄𑐐𑐸 𑐣𑐶𑐬𑑂𑐩𑐵𑐞𑐵𑐢𑐷𑐣 𑐮𑑀𑐎 𑐳𑐵𑐴𑐶𑐟𑐫 𑐥𑐬𑐶𑐲𑐡𑑂𑐫𑐵 𑐨𑐰𑐣𑐫𑑂 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋 𑐊𑐎𑐾𑐡𑐩𑐶𑐫𑐵 𑐥𑑂𑐬𑐵𑐖𑑂𑐘 𑐡𑐸𑐖𑑅 𑐰𑐶𑐖𑐫𑐬𑐟𑑂𑐣 𑐀𑐳𑑄𑐧𑐬𑐾 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐖𑑀𑐱𑐷𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫 𑐣𑑄 𑐰𑐶𑐱𑑂𑐰𑐫𑐵 𑐐𑐸𑐐𑐸𑑄 𑐣𑑄 𑐡𑐾𑐫𑑂 𑐰 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫 𑐳𑑂𑐰𑐫𑐵𑑄 𑐩𑑂𑐴𑑀 𑐩𑐖𑐹 𑐢𑐵𑐳𑐾𑑄 𑐣𑐾𑐰𑐵𑑅 𑐳𑐵𑐴𑐶𑐟𑑂𑐫𑐫𑐵𑐟 𑐣𑑄 𑐰𑐶𑐱𑑂𑐰𑐫𑐵 𑐩𑐾𑐩𑐾𑐐𑐸 𑐨𑐵𑐳𑑄 𑐨𑐵𑐫𑑂 𑐴𑐶𑐮𑐵𑑅 𑐰𑐶𑐱𑑂𑐰 𑐳𑐵𑐴𑐶𑐟𑑂𑐫𑐫𑐵 𑐏𑑂𑐫𑐮𑐫𑑂 𑐠𑑂𑐫𑑄𑐎𑐾 𑐮𑐶𑐧𑐵𑐫𑐾𑐢𑐸𑑄𑐎𑐹𑐐𑐸 𑐏𑑃 𑐎𑐸𑐮𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶 𑐢𑐵𑐏𑑂𑐰𑐵𑑄 𑐀𑑄𑐐𑑂𑐬𑐾𑐖𑐷 𑐨𑐵𑐳𑑄 𑐩𑑀𑐜𑐬𑑂𑐣 𑐳𑑂𑐚𑑀𑐬𑐷 𑐢𑐎𑐵𑑅 𑐢𑐵𑐂𑐐𑐸𑐫𑐵𑐟 𑐴𑐾 𑐗𑐷𑐳𑑄 𑐔𑐶𑐧𑐵𑐏𑑄 𑐢𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵 𑐢𑐵𑐳𑐾𑑄 𑐠𑑂𑐰 𑐣𑐶𑐐𑐹𑐮𑐶𑑄 𑐕𑐐𑐹 𑐩𑐏𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐧𑐵𑐏𑑄𑐫𑐵 𑐥𑐬𑐶𑐨𑐵𑐲𑐵 𑐣𑑂𑐴𑑂𑐫𑐵𑐐𑐸 𑐴𑐾 𑐖𑐹𑐳𑐵𑑄 𑐩𑐹 𑐏𑑃 𑐧𑐵𑐏𑑄 𑐔𑑂𑐰𑐫𑐾𑐐𑐸 𑐏𑑅 𑐢𑐫𑐵𑐡𑐶𑐮 𑑋 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐳𑐦𑐹𑐫𑐵 𑐔𑑂𑐰𑐩𑐶 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐳𑐶𑐡𑑂𑐢𑐵𑐣𑑂𑐟𑐫𑐵 𑐧𑐵𑐬𑐾 𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐶𑐬𑑂𑐩𑐵𑐞𑐵𑐢𑐷𑐣 𑐮𑑀𑐎 𑐳𑐵𑐴𑐶𑐟𑑂𑐫 𑐨𑐰𑐣𑐫𑐵 𑐣𑐶𑑄𑐟𑐶𑑄 𑐳𑐩𑐵𑐖𑐳𑐾𑐰𑐷 𑐩𑑀𑐟𑐶𑐮𑐵𑐮 𑐱𑐶𑐮𑐥𑑂𑐎𑐵𑐬𑑄 𑐣𑑂𑐫𑐫𑐫𑑂𑐕𑐡𑑂𑐰𑑅 𑐟𑐎𑐵 𑐰 𑐄𑐥𑐎𑐸𑐮𑐥𑐟𑐶 𑐢𑐵𑐏𑑂𑐰𑐵𑑄 𑐕𑐐𑐹 𑐮𑐵𑐏 𑐟𑐎𑐵 𑐐𑑂𑐰𑐵𑐴𑐵𑐮𑐶 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋