𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩

𑐄𑐡𑐵𑐫𑑂 𑐳𑐩𑐵𑐖 𑐫𑐾𑑃 𑐣𑐾𑐥𑐵𑑅𑐥𑐵𑐏𑐾𑑄 𑐰𑑄𑐐𑐸 𑐐𑐸𑑄𑐮𑐵𑐫𑐵 𑐗𑑂𑐰𑐮𑐫𑑂 𑐠𑐸𑐐𑐸𑐳𑐷 𑐣𑐶𑐰𑐵𑑅 𑐫𑑄𑐎𑑄 𑐄𑐡𑐵𑐫𑑂 𑐳𑐩𑐵𑐖𑑄 𑐔𑐮𑐾 𑐫𑐵𑐣𑐵𑐟𑑅𑐐𑐸 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩𑐫𑑂 𑐐𑐸𑑄𑐮𑐵 𑐢𑐬𑑂𑐩 𑐳𑐩𑑂𑐰𑐧𑐣𑑂𑐢𑐷 𑐠𑐷𑐠𑐷 𑐎𑐠𑑄𑐫𑐵 𑐧𑑂𑐰𑐖𑑂𑐫𑐵 𑐖𑐸𑐮 𑑋 𑐕𑐰𑐵𑑅 𑐧𑑂𑐰𑐖𑑂𑐫𑐵 𑐫𑐵𑐫𑐾𑐐𑐸 𑐢𑐵𑑅𑐳𑐵𑑄 𑐄𑐐𑐸 𑐧𑑂𑐰𑐖𑑂𑐫𑐵𑐫𑐵 𑐩𑐴𑐟𑑂𑐰 𑐰 𑐠𑐷𑐠𑐷 𑐳𑑂𑐎𑐸𑐮 𑐎𑐮𑐾𑐖𑑄 𑐣𑑄 𑐧𑑂𑐰𑐖𑑂𑐫𑐵 𑐳𑑂𑐰𑐫𑐾𑐟 𑐰𑑅𑐥𑐶𑑄 𑐰 𑐰𑐂𑐥𑐶𑑄 𑐩𑐳𑑂𑐟 𑐀𑐥𑑂𑐰𑐫𑐵 𑐰𑐣𑐾𑐰𑑄 𑐠𑑂𑐰 𑐧𑑂𑐰𑐖𑑂𑐫𑐵 𑐣𑐶𑐰𑐵𑑅 𑐟𑐵𑑅𑐴𑐵𑐎 𑐖𑐹𑐰𑑄𑐐𑐸 𑐏𑑅 𑑋

𑐠𑑂𑐰 𑐩𑑂𑐫𑐸𑐖𑐶𑐫𑐩 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐳𑑂𑐠𑐵𑐥𑐣𑐵 𑐳𑑂𑐰𑐫𑐵𑑄 𑐫𑐎𑑂𑐰 𑐮𑐶𑐥𑐵 𑐳𑐸𑐬𑐸 𑐖𑐹𑐐𑐸 𑐏𑑅 𑑋 𑐄𑐡𑐵𑐫𑑂 𑐳𑐩𑐵𑐖 𑐢𑐎𑐵𑑅 𑑒𑑐𑑑𑑔 𑐳𑐵𑐮𑑄 𑐴𑐾 𑐳𑑂𑐠𑐵𑐥𑐣𑐵 𑐖𑐹𑐐𑐸 𑐏𑑅 𑑋 𑐟𑐬 𑐄𑐡𑐵𑐫𑑂 𑐳𑐩𑐵𑐖𑑄 𑐩𑑂𑐫𑐸𑐖𑐶𑐫𑐩 𑐢𑐵𑑅𑐳𑐵 𑑒𑑐𑑗𑑑 𑐳𑐵𑐮𑐥𑐵𑐏𑐾𑑄 𑐳𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐣𑑂𑐴𑐵𑐥𑐵𑑄 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐕𑐐𑐹 𑐳𑐎𑑂𑐬𑐶𑐫 𑐥𑐸𑐔𑑅 𑐩𑐶𑐳𑐵 𑐥𑐸𑐔𑑅𑐫𑐵 𑐠𑐷𑐠𑐷 𑐳𑐵𑐩𑐵𑐣 𑐧𑑂𑐰𑐫𑐾𑐐𑐸 𑐎𑐠𑑄 𑐠𑑂𑐰 𑐩𑑂𑐫𑐸𑐖𑐶𑐫𑐩𑐫𑐵 𑐥𑐬𑐶𑐎𑐮𑑂𑐥𑐣𑐵 𑐖𑐹𑐐𑐸 𑐏𑑅 𑑋

𑑒𑑐𑑗𑑑 𑐩𑐵𑐑𑑄 𑐳𑐸𑐬𑐸 𑐖𑐹𑐐𑐸 𑐠𑑂𑐰 𑐩𑑂𑐫𑐸𑐖𑐶𑐫𑐩𑐫𑑂 𑑒𑑐𑑗𑑒 𑐳𑐵𑐮𑐫𑐵 𑐟𑑅𑐨𑐸𑐏𑐵𑐫𑑂 𑐧𑑂𑐰𑐫𑐵𑑅 𑐁𑐥𑐵𑐮𑑄 𑐳𑐵𑐩𑐵𑐣 𑐳𑑂𑐫𑐣 𑑋 𑐣𑑂𑐴𑐵𑐥𑐵 𑐴𑐾 𑐥𑐡𑑂𑐩𑐖𑑂𑐫𑑀𑐟𑐶, 𑐬𑐸𑐥𑐖𑑂𑐫𑑀𑐟𑐶 𑐰 𑐴𑐬𑑂𑐲𑐖𑑂𑐫𑑀𑐟𑐶𑐫𑐵 𑐣𑐶𑐣𑐶𑐥𑐶𑑄 𑐮𑐎𑑂𑐲𑑂𑐩𑐷𑐥𑑂𑐬𑐨𑐵 𑐰 𑐬𑐟𑑂𑐣 𑐖𑐵𑐣𑐵𑑅 𑐠𑑂𑐰 𑐕𑐾𑑃 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐥𑑂𑐬𑐫𑑀𑐖𑐣𑐫𑐵 𑐮𑐵𑐐𑐶𑑄 𑐮𑑅𑐮𑑂𑐴𑐵𑐣𑐵𑐟𑑅𑐐𑐸 𑐏𑑅 𑑋 𑐀𑐳𑑄 𑐟𑑂𑐰𑐵𑐮𑐫𑑂 𑐮𑐵𑑅𑐐𑐸 𑐠𑑂𑐰 𑐠𑐵𑐫𑑂 𑐳𑐸𑐬𑐎𑑂𑐲𑐵𑐫𑐵 𑐮𑑂𑐫𑐵𑐏𑑄 𑐣𑑄 𑐟𑐳𑐎𑑄 𑐥𑐵𑐫𑑂𑐕𑐶 𑐠𑐵𑐫𑑂 𑐏𑑅 𑑋

𑐠𑐣𑑄 𑐣𑑂𑐴𑐶𑐫𑐵 𑐣𑑂𑐴𑐶𑐠𑑄 𑐮𑐏𑑁𑑄 𑐴𑐾 𑐢𑐂𑐠𑐾𑑄 𑐩𑐣𑐹𑐟 𑐂𑐬𑐸𑐠𑐶𑐬𑐸 𑐖𑐸𑐫𑐵𑐔𑑂𑐰𑐣𑐷 𑑋 𑐀𑐳𑑄 𑐠𑐾𑑄𑐖𑑂𑐫𑐵𑑅𑐐𑐸 𑐠𑑂𑐰 𑐧𑑂𑐫𑐳𑑂𑐟𑐐𑐸 𑐠𑐵𑐳𑐫𑑂 𑐮𑐵𑐣𑐵𑑅 𑐣𑑄 𑐠𑑂𑐰 𑐩𑑂𑐫𑐸𑐖𑐶𑐫𑐩 𑐔𑑂𑐰𑐣𑐵𑐔𑑂𑐰𑑄𑐐𑐸 𑐠𑐵𑐫𑑂 𑐢𑐵𑑅𑐳𑐵 𑐄𑐮𑐶 𑐴𑐾 𑐱𑐵𑐣𑑂𑐟 𑑋 𑐣𑑂𑐴𑐵𑐥𑐵 𑐴𑐾 𑐠𑑂𑐰 𑐕𑐐𑐹 𑐮𑑂𑐫𑐵𑐏𑑄 𑐄𑐡𑐵𑐫𑑂 𑐕𑐾𑑃 𑐏𑑅 𑑋 𑐄𑐡𑐵𑐫𑑂 𑐳𑐩𑐵𑐖𑐫𑑂 𑐡𑐸𑐠𑑂𑐫𑐵𑑅𑐥𑐶𑑄 𑐠𑐷𑐠𑐷 𑐏𑐮𑑅 𑐩𑐢𑑂𑐫𑐾 𑐎𑑄𑐳𑐵𑐎𑐵𑐬 𑐰𑐵 𑐎𑐳𑐵𑑅𑐟𑐫𑑂𑐳𑑄 𑐠𑑂𑐰 𑐕𑐾𑑃 𑐡𑐵𑐣 𑐧𑐶𑐫𑐵𑐟𑑅𑐐𑐸 𑐏𑑅 𑑋 𑐠𑑂𑐰 𑐂𑐟𑐶𑐴𑐵𑐳𑐫𑐵𑐟 𑐎𑐸𑐮𑐵 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐬𑐵𑐞𑐵𑐎𑐵𑐮𑐣𑐶𑐳𑐾𑑄𑐫𑐵 𑐡𑐳𑑂𑐟𑐵𑐰𑐾𑐖𑐟 𑐮𑐸𑐫𑐵𑐰𑐂 𑑋

𑐄𑐡𑐵𑐫𑑂 𑐳𑐩𑐵𑐖 𑐩𑐸𑐎𑑂𑐎𑑄 𑐧𑑁𑐡𑑂𑐢 𑐢𑐬𑑂𑐩𑐵𑐧𑐮𑐩𑑂𑐰𑐶𑐟 𑐏𑑅 𑑋 𑐄𑐎𑐶𑑄 𑐴𑐾 𑐣𑑄 𑐠𑐸𑐐𑐸𑐳𑐷 𑐳𑐩𑐵𑐖𑐥𑐵𑐏𑐾𑑄 𑐣𑑂𑐴𑐵𑐥𑐵𑑄𑐏𑐸𑐳𑐶 𑐐𑐸𑑄𑐮𑐵 𑐰𑐶𑐱𑐾𑐲 𑐥𑑂𑐬𑐡𑐬𑑂𑐱𑐣 𑐣𑑄 𑐖𑐹𑐐𑐸 𑐏𑑅 𑑋 𑐄𑐡𑐵𑐫𑑂 𑐳𑐩𑐵𑐖𑐫𑑂 𑐐𑐸𑑄𑐐𑐹 𑐠𑐬𑐷 𑐰 𑐗𑐶𑐐𑐹 𑐏𑐮𑑅 𑐡𑐸 𑑋 𑐀𑐳𑑄 𑐟𑐸𑐮𑐵𑐢𑐬 𑐰 𑐣𑑂𑐫𑐟𑐫𑐵 𑐟𑐸𑐮𑐵𑐢𑐬 𑐫𑐵𑐣𑐵𑑅 𑐟𑐸𑐮𑐵𑐢𑐬𑐟 𑐖𑐎 𑐣𑐶𑐠𑐷 𑐡𑐸 𑑋 𑐀𑐠𑐾 𑐴𑐾 𑐟𑐵𑐩𑑂𑐬𑐵𑐎𑐵𑐬, 𑐳𑑂𑐠𑐵𑐥𑐶𑐟, 𑐧𑐣𑐶𑐫𑐵𑑃, 𑐎𑑄𑐳𑐵𑐎𑐵𑐬, 𑐱𑐶𑐮𑐵𑐎𑐵𑐬, 𑐳𑐶𑐏𑑂𑐬𑐵𑐎𑐵𑐬, 𑐳𑐶𑐣𑑂𑐡𑐸𑐬𑐵𑐎𑐵𑐬 𑐰 𑐳𑐾𑐮𑐵𑐮𑐶𑐎 𑑋

𑐣𑐾𑐰𑐵𑑅 𑐳𑐩𑐸𑐡𑐵𑐫 𑐡𑐸𑐣𑐾𑐫𑐵 𑐠𑑂𑐰 𑐖𑐵𑐟𑐶 𑐰𑐵 𑐳𑐩𑐸𑐡𑐵𑐫 𑐐𑐣𑑄 𑐰𑐮, 𑐕𑐸 𑐫𑐵𑐂𑐥𑐶𑑄, 𑐠𑐸𑐩𑐶𑐐𑐸 𑐥𑐸𑐮𑐵𑑄𑐐𑐸 𑐥𑐬𑐩𑑂𑐥𑐬𑐵𑐐𑐟 𑐖𑑂𑐫𑐵 𑐕𑐸 𑐐𑐖𑑂𑐫𑐵𑑅𑐐𑐸 𑐏𑑅 𑐰 𑐥𑐬𑐩𑑂𑐥𑐬𑐵𑐐𑐟 𑐧𑑂𑐫𑐰𑐳𑐵𑐫 𑐕𑐸 𑐐𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐡𑐸 𑐢𑐂𑐐𑐸 𑐢𑑂𑐰𑐵𑐠𑐸𑐂𑐎𑐾𑐟 𑐰𑑄𑐐𑐸 𑐐𑐸𑑄𑐮𑐵𑑄 𑐱𑐷𑐥, 𑐎𑐮𑐵 𑐰 𑐰𑐳𑑂𑐟𑐸 𑐣𑐵𑐥𑑄 𑐱𑐵𑐳𑑂𑐟𑑂𑐬𑐷𑐫 𑐬𑐸𑐥𑑄 𑐀𑐟𑐶 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐐𑐸𑑄𑐮𑐵 𑐮𑐔𑑂𑐕𑐶 𑐟𑐎 𑐩𑐵𑑅𑐐𑐸 𑐴𑐮𑑄𑐖𑑂𑐰𑐮𑑄 𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐩𑐶𑐳𑑂𑐟 𑐟𑐳𑐎𑑄 𑐴𑐾 𑐳𑐎𑑂𑐬𑐶𑐫 𑐖𑐸𑐫𑐵𑐔𑑂𑐰𑑄𑐐𑐸 𑐠𑑂𑐰 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩𑐫𑐵 𑐮𑐵𑐐𑐶𑑄 𑐩𑐳𑑂𑐟𑐫𑑂𑐳𑑄 𑐴𑐾 𑐥𑐴𑐮 𑐫𑐵𑐣𑐵𑑅 𑐠𑐵𑐫𑑂 𑐠𑐵𑐳𑑄 𑐠𑐷𑐠𑐷 𑐳𑐵𑐩𑐐𑑂𑐬𑐷 𑐩𑐸𑑄𑐎𑐵𑑅 𑐠𑑂𑐰 𑐩𑑂𑐫𑐸𑐖𑐶𑐫𑐩𑐫𑐵 𑐀𑐰𑐢𑐵𑐬𑐞𑐵 𑐣𑑂𑐴𑑂𑐫𑑅𑐣𑐾 𑐴𑑅𑐐𑐸 𑐏𑑅 𑑋 𑐳𑐵𑐩𑐵𑐣 𑐩𑐸𑑄𑐎𑐾𑐐𑐸 𑐰 𑐩𑑂𑐫𑐸𑐖𑐶𑐫𑐩𑐫𑑂 𑐟𑐫𑐾𑐟 𑐳𑐵𑐩𑐐𑑂𑐬𑐷 𑐁𑐴𑑂𑐰𑐵𑐣 𑐖𑐎 𑐖𑐸𑐂𑐰𑑄 𑐴𑐾 𑐡𑐬𑐵𑐖𑐫𑑂 𑐖𑐎𑑄 𑐟𑐫𑐵𑑄 𑐟𑐫𑐾𑐐𑐸 𑐠𑐵𑐫𑑂 𑐩𑐡𑐫𑐾𑐎 𑐳𑐵𑐩𑐐𑑂𑐬𑐷 𑐩𑐸𑐸𑑄𑐰𑐮 𑑋 𑐣𑑂𑐴𑐵𑐥𑐵 𑐡𑐬𑐵𑐖 𑐕𑐐𑑅 𑐖𑐎 𑐡𑐸𑐠𑐵𑐫𑑂 𑐮𑐶𑐥𑐵 𑐗𑐶𑐐𑐹 𑐎𑐰𑑅𑐫𑐵 𑐗𑐶𑐐𑑅 𑐴𑐾 𑐡𑐬𑐵𑐖 𑐡𑐫𑐾𑐎𑐾𑐐𑐸 𑐫𑐵𑐟 𑑋

𑐡𑐬𑐵𑐖 𑐣𑑄 𑐠𑑅𑐠𑑅𑐐𑐸 𑐏𑐮𑑅 𑐥𑐸𑐔𑐮𑑄 𑐴𑐾 𑐡𑐫𑐾𑐎𑐵𑑅 𑐟𑐫𑐾𑐴𑐮 𑑋 𑐠𑑅𑐥𑐶𑑄𑐠𑐵𑐫𑑂 𑐡𑐸𑐐𑐸 𑐥𑐸𑐮𑐵𑑄𑐐𑐸 𑐰 𑐳𑑄𑐬𑐎𑑂𑐲𑐞 𑐫𑐵𑐣𑐵𑐟𑐫𑐾𑐧𑐴𑐐𑐸 𑐠𑐷𑐠𑐷 𑐎𑐠𑑄𑐫𑐵 𑐋𑐟𑐶𑐴𑐵𑐳𑐶𑐎 𑐰 𑐥𑐸𑐬𑐵𑐟𑐵𑐟𑑂𑐰𑐶𑐎 𑐩𑐴𑐟𑑂𑐰𑑄 𑐖𑐵𑑅𑐐𑐸 𑐳𑐵𑐩𑐵𑐣𑐟 𑐣𑑄 𑐢𑐩𑐵𑐢𑐩 𑐩𑐸𑐣𑐾𑐐𑐸 𑐎𑑂𑐬𑐩 𑐣𑑄 𑐖𑐵𑐬𑐷 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐥𑐸𑐮𑐵𑑄𑐐𑐸 𑐳𑐵𑐩𑐵𑐣 𑐣𑑄 𑐢𑐩𑐵𑐢𑐩 𑐩𑐸𑐣𑐾𑐐𑐸 𑐎𑑂𑐬𑐩 𑐖𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋
𑐡𑐵𑐣 𑐰𑑅𑐐𑐸 𑐳𑐵𑐩𑐵𑐣𑐟 𑐖𑐎 𑐩𑐸𑐣𑐵 𑐟𑐫𑐾𑐟 𑐣𑑄 𑐠𑐵𑐫𑑂 𑐁𑐥𑐵𑐮𑑄 𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑐮 𑑋

𑐁𑑅 𑐮𑐵 𑐠𑐣 𑐩𑐔𑐵 𑐧𑐸𑐳𑐵𑑄𑐣𑐶𑐳𑐾𑑄 𑐖𑑂𑐫𑐵𑑅𑐖𑑄𑐎𑐸 𑐫𑐵𑐣𑐵𑑅 𑐳𑐶𑐣𑐵 𑐰𑐣𑐾 𑐢𑐸𑑄𑐎𑐵𑑅 𑐟𑐎𑑄 𑐩𑐵𑑅𑐐𑐸 𑐴𑐮𑑄𑐖𑑂𑐰𑐮𑑄𑐟 𑐧𑑂𑐰𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐧𑑂𑐧𑐖𑑂𑐫𑐵 𑐢𑐵𑑅𑐳𑐵 𑐳𑑂𑐠𑐵𑐫𑐷 𑐥𑑂𑐬𑐎𑐺𑐟𑐶𑐫𑐵 𑐧𑑂𑐰𑐖𑑂𑐫𑐵 𑐏𑑅 𑑋 𑐰𑑄𑐐𑐸 𑐐𑐸𑑄𑐮𑐵𑑄 𑐖𑐹𑐐𑐸 𑐧𑑂𑐰𑐖𑑂𑐫𑐵 𑐕𑐐𑐹 𑐮𑑂𑐫𑐵𑐏𑑄 𑐀𑐳𑑂𑐠𑐵𑐫𑐷 𑐥𑑂𑐬𑐎𑐺𑐟𑐶𑐫𑐵 𑐧𑑂𑐰𑐖𑑂𑐫𑐵 𑐏𑑅𑐳𑐵 𑐮𑐶𑐥𑐵 𑐢𑐵𑑅𑐳𑐵 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩 𑐡𑐸𑐣𑐾 𑐦𑐸𑐎𑑂𑐎 𑐴𑐾 𑐳𑐸𑐰𑐶𑐢𑐵 𑐧𑐶𑐫𑐾𑐐𑐸 𑐟𑐵𑑅 𑐟𑐫𑐵𑐟𑑅𑐐𑐸 𑐡𑐸 𑑋

𑐣𑐾𑐰𑐵𑑅 𑐳𑐩𑐵𑐖𑐫𑑂 𑐏𑐵𑐳 𑐫𑐵𑐣𑐵𑑅 𑐖𑑂𑐫𑐵𑐥𑐸 𑐳𑐩𑐸𑐡𑐵𑐫 𑐰 𑐟𑐵𑐩𑑂𑐬𑐵𑐎𑐵𑐬, 𑐳𑑂𑐠𑐵𑐥𑐶𑐟 𑐰 𑐟𑐸𑐮𑐵𑐢𑐬𑐟𑐫𑑂 𑐡𑐠𑐸𑐂 𑐨𑐔𑐵 𑐨𑐔𑐵 𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬 𑐥𑐵𑑅 𑑋 𑐖𑐷𑐰𑐣 𑐔𑐎𑑂𑐬𑐫𑐵 𑐳𑑀𑐔 𑐟𑐫𑐾𑐧𑐮𑐫𑑂 𑐩𑐔𑐵𑐧𑐸 𑐧𑑂𑐫𑑄𑐎𑐾, 𑐣𑐶𑐡𑑃 𑐡𑑃 𑐧𑐸𑐡𑐶𑑄 𑐴𑐣𑐾𑐖𑑂𑐫𑐵, 𑐖𑑄𑐎𑑂𑐰𑑅 𑐫𑐵𑐂𑐮𑐧𑐫𑑂𑐫𑐵 𑐟𑐶𑐳𑐵 𑐰𑐳𑑅 𑐁𑐡𑐶 𑐡𑐱 𑐎𑐬𑑂𑐩 𑐫𑐵𑐂𑐐𑐸 𑐂𑐮𑐫𑑂 𑐕𑐸 𑐐𑐖𑑂𑐫𑐵𑑅𑐐𑐸 𑐔𑐷𑐖 𑐖𑐸𑐂 𑐢𑐂𑐐𑐸 𑐀𑐣 𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐂𑐴𑐶, 𑐧𑑂𑐫𑐵𑐴𑐵 𑐮𑐐𑐵𑐫𑐟𑐫𑐵 𑐠𑐷𑐠𑐷 𑐎𑐠𑑄𑐫𑐵 𑐥𑐹𑐖𑐵𑐁𑐖𑐵 𑐫𑐵𑐂𑐧𑐮𑐫𑑂 𑐣𑑄 𑐧𑐖𑑂𑐬𑐫𑐵𑐣 𑐢𑐬𑑂𑐩 𑐳𑐩𑑂𑐥𑑂𑐬𑐡𑐵𑐫𑐣𑐵𑐥𑑄 𑐖𑑂𑐰𑑅𑐮𑐵𑑅𑐐𑐸 𑐎𑐠𑑄 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐠𑑂𑐰 𑐠𑐵𑐳𑐫𑑂 𑐣𑑄 𑐄𑐎𑐠𑑄 𑐴𑐾 𑐧𑑂𑐰𑐖𑑂𑐫𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐠𑐸𑐮𑐶 𑐖𑐎 𑐩𑐏𑐸 𑐎𑐶 𑐠𑐣 𑐧𑑂𑐰𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩 𑐳𑑂𑐰𑐫𑐾𑐢𑐸𑑄𑐎𑐵𑑅 𑐠𑑂𑐰 𑐕𑐐𑐹 𑐮𑑂𑐫𑐵𑐏𑑄 ‘𑐜𑑀𑐬 𑐰𑐾 𑐚𑐸 𑐣𑐾𑐰𑐵𑑅 𑐎𑐮𑑂𑐔𑐬’ 𑐀𑐬𑑂𑐠𑐵𑐟𑑂 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐂 𑐥𑑂𑐬𑐰𑐾𑐱 𑐖𑐸𑐫𑐾𑐐𑐸 𑐕𑐐𑐹 𑐮𑐸𑐏𑐵 𑐠𑐾𑑄 𑐴𑐾 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐐𑐸𑑄𑐐𑐹 𑐠𑐬𑐷 𑐰 𑐗𑐶𑐐𑐹 𑐏𑐮𑑅 𑐡𑐸𑐐𑐸 𑐠𑑂𑐰 𑐄𑐡𑐵𑐫𑑂 𑐳𑐩𑐵𑐖 𑐡𑐸𑐣𑐾 𑐴𑐾 𑐣𑑄 𑐕𑐸𑑄 𑐕𑐸𑑄 𑐔𑐮𑐣 𑐥𑐵𑑅 𑑋 𑐣𑐾𑐰𑐵𑑅 𑐳𑐩𑐵𑐖 𑐡𑐸𑐣𑐾𑐫𑐵 𑐠𑐷𑐠𑐷 𑐖𑐵𑐟𑐶 𑐡𑐸𑐣𑐾 𑐮𑐵 𑐁𑐥𑐵𑐮𑑄 𑐴𑐾 𑐥𑐵𑐂𑐐𑐸 𑐖𑐸𑐮 𑑋 𑐕𑐐𑐹 𑐂𑐮𑐫𑑂 𑐥𑑂𑐬𑐵. 𑐜𑐵. 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬𑑄 𑐕𑐶𑐩𑐶 𑐠𑑂𑐰 𑐫𑐵𑐂𑐐𑐸 𑐩𑐶𑐮𑐾 𑐩𑐖𑐹, 𑐰 𑐫𑐵𑐂𑐐𑐸 𑐩𑐶𑐮𑐾 𑐩𑐖𑐹 𑐢𑐫𑐵𑐡𑐶𑐮 𑑋 𑐟𑐬 𑐦𑐸𑐎𑑂𑐎𑑄 𑐔𑐷𑐖 𑐩𑐵𑐣𑐣𑑂𑐢𑐬𑐟𑐫𑑂 𑐠𑐾𑑄 𑐫𑐵𑐫𑐾𑐩𑐵𑑅𑐐𑐸 𑐣𑑄 𑐩𑐡𑐫𑐵𑐔𑑂𑐰𑐣 𑑋 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐣𑑄 𑐠𑑅𑐥𑐶𑐣𑐶 𑐣𑐏𑑅𑐔𑐏𑑅 𑐥𑐵𑑅 𑑋

𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶 𑐩𑐵𑐣𑐾 𑐫𑐵𑐂𑐧𑐮𑐫𑑂 𑐣𑑄 𑐕𑐸𑑄 𑐕𑐸𑑄 𑐥𑐵𑑅 𑑋 𑐫𑐾𑑃𑐫𑑂 𑐫𑐾𑑃𑐫𑐵𑑅 𑐖𑐵𑐟𑑂𑐬𑐵𑐫𑐵𑐟 𑐟𑑅𑐖𑐶𑐎 𑐴𑐣𑐷 𑑋 𑐏𑑂𑐰𑐥𑐫𑑂 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵𑐫𑐵𑐟 𑐩𑐹 𑐖𑐵𑐟𑑂𑐬𑐵 𑐎𑐠𑑄 𑐴𑐣𑐷𑐳𑐵 𑐫𑐮𑐫𑑂 𑐧𑐸𑑄𑐐𑑅𑐡𑑂𑐫𑑅𑐫𑐵 𑐬𑐠 𑐳𑐵𑐮𑐷𑐐𑐸 𑐖𑐵𑐟𑑂𑐬𑐵𑐫𑐵𑐟 𑐡𑐎𑑂𑐎𑐮𑐫𑑂 𑐀𑐥𑑂𑐰𑑅 𑐩𑐵𑐣𑐾 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾𑑄𑐟𑐸𑑄 𑐏𑑂𑐰𑐥𑐫𑑂 𑐖𑐎 𑐴𑐾 𑐠𑑅𑐣𑐾 𑐰 𑐎𑑂𑐰𑑅𑐣𑐾 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐖𑐵𑐟𑐶 𑐡𑐸𑐣𑐾𑐫𑐵 𑐠𑐷𑐠𑐷 𑐔𑐵𑐮 𑐔𑐮𑐣 𑐨𑐔𑐵 𑐨𑐔𑐵 𑐥𑐵𑑅 𑑋

𑐀𑐠𑐾 𑐴𑐾 𑐟𑐸𑑄 𑐄𑐡𑐵𑐫𑑂 𑐳𑐩𑐸𑐡𑐵𑐫 𑐡𑐸𑐣𑐾 𑐣𑑄 𑐠𑑅 𑐠𑑅𑐐𑐸 𑐠𑐬𑐷 𑐡𑐸𑐣𑐾 𑐩𑐣𑑂𑐡𑑅 𑐥𑐵𑑅, 𑐥𑐹𑐖𑐵𑐰𑐶𑐢𑐶 𑐣𑑄 𑐨𑐔𑐵 𑐨𑐔𑐵 𑐥𑐵𑑅 𑑋 𑐀𑐠𑐾 𑐖𑐸𑐫𑐵𑑅 𑐴𑐾 𑐧𑐺𑐴𑐟 𑐬𑐸𑐥𑑄 𑐠𑑅𑐥𑐶𑐣𑐶𑐐𑐸 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐧𑐵𑐬𑐾 𑐀𑐣𑐸𑐳𑐣𑑂𑐢𑐵𑐣 𑐫𑐵𑐣𑐵𑑅 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐟𑐵𑑅 𑐏𑑅 𑑋 𑐄𑐡𑐵𑐫𑑂 𑐳𑐩𑐵𑐖 𑐡𑐸𑐣𑐾 𑐴𑐾 𑐳𑐶𑐣𑑂𑐡𑐸𑐬𑐵𑐎𑐵𑐬 𑐔𑑂𑐰𑐂𑐥𑐶𑐣𑐶 𑐥𑐸𑐬𑑂𑐏𑑁𑐮𑐷 𑐖𑑂𑐫𑐵 𑐕𑐸 𑐏𑑅 𑐢𑐎𑐵𑑅 𑐩𑐵𑐮𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐡𑐸 𑑋

𑐗𑐚𑑂𑐚 𑐳𑑂𑐰𑐫𑐾𑐐𑐸 𑐂𑐮𑐫𑑂 𑐠𑐸𑐥𑐶𑑄 𑐳𑐶𑐣𑑂𑐴𑑅𑐮𑐶𑐳𑐾𑑄 𑐳𑐩𑑂𑐧𑐣𑑂𑐢𑐶𑐟 𑐏𑑅𑐮𑐵 𑐢𑐂𑐠𑐾𑑄 𑐔𑑂𑐰𑐣𑐷 𑑋 𑐟𑐬 𑐩𑐏𑐸 𑑋 𑐄𑐩𑐶𑐐𑐸 𑐥𑐸𑐮𑐵𑑄𑐐𑐸 𑐖𑑂𑐫𑐵 𑐕𑐸 𑐢𑐎𑐵𑑅 𑐩𑐵𑐩𑐵𑑄 𑐰𑐣𑐾𑐐𑐸 𑐂𑐮𑐫𑑂 𑐧𑑂𑐮𑐎 𑐰𑐵 𑐩𑑀𑐮𑑂𑐜 𑐡𑐫𑐾𑐎𑐵𑑅 𑐩𑐷𑐥𑐶𑑄 𑐢𑐂𑐐𑐸 𑐎𑑂𑐫𑑄 𑑋 𑐔𑐠𑐵𑑅 𑐥𑐹𑐖𑐵𑐫𑐵 𑐳𑐳𑐸𑐡𑑂𑐫𑑅 𑐡𑐫𑐾𑐎𑐾𑐐𑐸 𑐩𑑀𑐮𑑂𑐜, 𑐳𑐵𑐥𑐵𑐬𑐸𑐫𑐵 𑐳𑐵𑐫𑐵 𑐏𑑂𑐰𑐵𑑅𑐥𑐵𑑅 𑐡𑐫𑐾𑐎𑐾𑐐𑐸 𑐩𑑀𑐮𑑂𑐜, 𑐠𑐷𑐠𑐷 𑐖𑐵𑐟𑑂𑐬𑐵 𑐰 𑐣𑐏𑑅𑐔𑐏𑑅 𑐴𑐣𑐾𑐐𑐸 𑐂𑐮𑐫𑑂 𑐩𑐵𑐮𑐷𑐐𑐸 𑐕𑐵𑐥𑐵 𑐔𑑂𑐰𑐫𑐾𑐟 𑐩𑐵𑑅𑐐𑐸 𑐧𑑂𑐮𑐎 𑐰𑐵 𑐩𑑀𑐮𑑂𑐜 𑐠𑑂𑐰 𑐳𑐶𑐣𑑂𑐡𑐸𑐬𑐵𑐎𑐵𑐬 𑐖𑐵𑐟𑐶𑑄 𑐡𑐫𑐎𑐷 𑑋

𑐄𑐡𑐵𑐫𑑂 𑐳𑐩𑐵𑐖𑐫𑐵 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐥𑐬𑐥𑐩𑑂𑐥𑐬𑐵𑐐𑐟 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐖𑑂𑐘𑐵𑐣 𑐳𑐣𑑂𑐡𑐾𑐱 𑐧𑐶𑐫𑐾𑐐𑐸 𑐮𑑂𑐫𑐵𑐏𑑄 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐖𑑂𑐫𑐵𑐎𑐹 𑐖𑐸𑐫𑐵𑐔𑑂𑐰𑑄𑐐𑐸 𑐠𑑂𑐰 𑐠𑐵𑐳𑐫𑑂 𑐴𑐾 𑐳𑑂𑐠𑐵𑐫𑐷 𑐬𑐸𑐥𑑄 𑐄𑐡𑐵𑐫𑑂 𑐩𑑂𑐫𑐸𑐣𑐶𑐫𑐩 𑐔𑐮𑐾 𑐫𑐵𑐣𑐵𑑅 𑐧𑑂𑐰𑐖𑑂𑐫𑐵 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐣𑑄 𑐁𑐥𑐵𑐮𑑄 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐡𑐸𑐖𑑅𑐟, 𑐳𑑂𑐠𑐵𑐣𑐷𑐫 𑐣𑐾𑐰𑐵𑑅 𑐳𑐩𑐸𑐡𑐵𑐫 𑐰 𑐁𑑅 𑐰𑐫𑐵𑑅 𑐰𑐶𑐡𑐾𑐱𑐷 𑐥𑐵𑐴𑐵𑑄𑐥𑐶𑑄 𑐟𑐎𑑄 𑐰𑐫𑐵𑑅 𑐠𑐣 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣𑐫𑐵 𑐮𑐵𑐐𑐶𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐥𑐸𑐮𑐵𑑄 𑐥𑐸𑐮𑐵𑑄𑐥𑐶𑑄 𑐩𑐣𑐹𑐟𑐫𑑂𑐳𑑄 𑐥𑐹𑐖𑐵 𑐐𑐠𑐾 𑐫𑐵𑐣𑐵𑑅 𑐫𑐵𑐫𑐾𑐐𑐸, 𑐕𑐸 𑐕𑐸 𑐰𑐶𑐢𑐶 𑐏𑑅 𑐢𑐂𑐐𑐸 𑐎𑐠𑑄 𑐴𑐾 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐩𑐵𑐬𑑂𑐦𑐟𑑂 𑐳𑐣𑑂𑐡𑐾𑐱 𑐧𑐶𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑑄𑐐𑐸 𑐡𑑃𑐫𑑂 𑐣𑑄 𑐄𑐡𑐵𑐫𑑂 𑐳𑐩𑐵𑐖𑑄 𑐫𑐾𑑃𑐫𑐵𑑅 𑐖𑐵𑐟𑑂𑐬𑐵𑑄 𑐕𑐸 𑐕𑐸 𑐖𑐸𑐂𑐐𑐸 𑐢𑐂𑐐𑐸 𑐎𑐠𑑄 𑐰𑐶𑐡𑑂𑐰𑐵𑐣𑐟𑐫𑑂𑐟 𑐳𑑅𑐟𑐵 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋 𑐠𑑂𑐰 𑐮𑑂𑐫𑐵𑐏𑑄 𑐄𑐡𑐵𑐫𑑂 𑐳𑐩𑐵𑐖 𑐣𑐾𑐰𑐵𑑅 𑐳𑐩𑐵𑐖𑐫𑐵 𑐕𑐐𑐹 𑐀𑐨𑐶𑐣𑑂𑐣 𑐀𑑄𑐐 𑐖𑐸𑐫𑐵𑑅 𑐣𑑂𑐴𑑂𑐫𑐔𑐶𑐮𑐵𑐔𑑂𑐰𑑄𑐐𑐸 𑐡𑐸 𑑋

𑐄𑐡𑐵𑐫𑑂 𑐳𑐩𑐵𑐖 𑐡𑐸𑐣𑐾 𑐣𑑄 𑐠𑐷𑐠𑐷 𑐐𑐸𑐠𑐶𑐐𑐵𑐣𑐵 𑐡𑐸 𑑋 𑐄𑐎𑐷 𑐩𑐢𑑂𑐫𑐾 𑐣𑐵𑐐𑐥𑐘𑑂𑐔𑐩𑐷 𑐐𑐸𑐠𑐶, 𑐐𑐸𑑄𑐮𑐵 𑐢𑐬𑑂𑐩 𑐐𑐸𑐠𑐶, 𑐳𑑂𑐰𑐫𑐩𑑂𑐨𑐹 𑐰𑐣𑐾 𑐐𑐸𑐠𑐶, 𑐟𑑅 𑐔𑐟𑑄 𑐐𑐸𑐠𑐶, 𑐟𑑅𑐢𑑄 𑐐𑐸𑐠𑐶, 𑐥𑑂𑐬𑐖𑑂𑐘𑐵 𑐥𑐵𑐬𑐩𑐶𑐟𑐵 𑐐𑐸𑐠𑐶, 𑐔𑐷𑐨𑐵𑑅 𑐐𑐸𑐠𑐶 𑐁𑐡𑐶 𑑋 𑐐𑐸𑑄𑐮𑐵𑐧𑐮𑐫𑑂 𑐰𑐵 𑐥𑐘𑑂𑐔𑐡𑐵𑐣𑐧𑐮𑐫𑑂 𑐩𑑂𑐴𑑂𑐫𑐵𑐫𑑂𑐩𑐳𑑂𑐟 𑐳𑑅𑐟𑐵𑑅 𑐐𑐸𑐮𑑅 𑐔𑐶𑐣𑐷𑐐𑐸 𑐐𑐸𑐠𑐶 𑐣𑑄 𑐔𑐮𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐖𑑂𑐫𑐵𑑅𑐐𑐸 𑐰𑐶𑐱𑐾𑐲 𑐎𑐠𑑄𑐫𑐵 𑐖𑐵𑐟𑐶 𑐖𑐹𑐐𑐸 𑐮𑑂𑐫𑐵𑐏𑑄 𑐣𑑄 𑐠𑑂𑐰 𑐂𑐮𑐫𑑂 𑐄𑐡𑐵𑐫𑑂 𑐳𑐩𑐵𑐖 𑐡𑐸𑐣𑐾𑐫𑐵 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶 𑐳𑐫𑐾𑐎𑐾𑐐𑐸 𑐮𑑂𑐫𑐵𑐏𑑄 𑐂𑐚𑐵𑐮𑐶𑐣𑐶𑐳𑐾𑑄 𑐠𑐣 𑐰𑐫𑐵𑑅 𑐠𑐸𑐩𑐶𑐐𑐸 𑐳𑑄𑐳𑑂𑐎𑐵𑐬𑐫𑐵 𑐧𑐵𑐬𑐾 𑐠𑐸𑐂𑐎𑐾𑐟 𑐰𑑅𑐩𑑂𑐴 𑐮𑐶𑐞𑑂𑐜𑐵 𑐬𑑀𑐖𑐶𑐫𑑀 𑐢𑐵𑑅𑐩𑑂𑐴𑐾𑐳𑐶𑐣𑑄 𑐣𑑂𑐴𑐹𑐐𑐸 𑐰𑐾𑐧𑐳𑐵𑐂𑐚 𑐩𑐵𑐬𑑂𑐦𑐟𑑂 𑐂𑐣𑑂𑐳𑑂𑐚𑐵𑐐𑑂𑐬𑐵𑐩 𑐟𑐫𑐵𑐬 𑐫𑐵𑐣𑐵𑑅 𑐠𑑂𑐰 𑐦𑐸𑐎𑑂𑐎𑑄 𑐎𑐠𑑄𑐫𑐵 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐜𑐎𑐸𑐩𑐾𑐣𑑂𑐚 𑐟𑐫𑐵𑐬 𑐫𑐵𑐫𑐾𑐐𑐸 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐩𑐾𑐩𑑂𑐴 𑐕𑐩𑑂𑐴 𑐰𑐶𑐡𑐾𑐱𑐷 𑐥𑐵𑐴𑐵𑑄 𑐩𑐵𑐬𑑂𑐎𑑀 𑐨𑐾𑐣𑑂𑐳𑐾𑐣𑑂𑐖𑐷𑐥𑐵𑐏𑐾𑑄 𑐣𑑄 𑐁𑑅 𑐫𑑅𑐩𑐬𑐷 𑐡𑐫𑐾𑐎𑐾𑐐𑐸, 𑐎𑑂𑐰𑐵𑐟𑐶 𑐡𑐫𑐾𑐎𑐾𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐖𑑂𑐫𑐵 𑐳𑐫𑐾𑐎𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐣𑐫𑐵 𑐐𑐸𑑄𑐮𑐵 𑐥𑐬𑑂𑐰 𑐳𑐩𑑂𑐧𑐣𑑂𑐢𑐷 𑐧𑑂𑐰𑐖𑑂𑐫𑐵 𑐳𑑂𑐰𑐫𑐾 𑐢𑐸𑑄𑐎𑐵𑑅 𑐰𑐫𑐎𑑅 𑐩𑐾𑐐𑐸 𑐥𑑂𑐬𑑀𑐖𑐾𑐎𑑂𑐚𑐫𑑂 𑐖𑑂𑐫𑐵 𑐳𑐣𑐵 𑐔𑑂𑐰𑐣𑐵𑐡𑐷𑐩𑑂𑐴 𑐴𑐾 𑐠𑐣 𑐁𑐎𑐬𑑂𑐲𑐶𑐟 𑐖𑐸𑐫𑐵𑑅 𑐠𑑅𑐐𑐸 𑐰𑐶𑐲𑐫 𑐥𑐬𑐶𑐰𑐬𑑂𑐟𑐣 𑐫𑐵𑐣𑐵𑑅 𑐄𑐡𑐵𑐫𑑂𑐟𑐫𑑂 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐳𑑄𑐮𑐐𑑂𑐣 𑐖𑐹𑐰𑑅𑐩𑑂𑐴 𑐏𑑅 𑑋

𑐄𑐡𑐵𑐫𑑂 𑐳𑐩𑐵𑐖𑑄 𑐁𑑅 𑐩𑐳𑑂𑐟𑐫𑑂𑐟 𑐐𑐠𑐾 𑐠𑑅𑐥𑐶𑐣𑐶 𑐩𑑂𑐫𑐸𑐖𑐶𑐫𑐩𑐮𑐶𑐳𑐾𑑄 𑐳𑑂𑐰𑐵𑐫𑐾𑐐𑐸 𑐢𑐂𑐐𑐸 𑐏𑑃𑐫𑑂 𑐢𑑂𑐫𑐵𑐣 𑐟𑐫𑐵𑑅 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑐫𑐵 𑐮𑐵𑐐𑐶𑑄 𑐳𑐩𑐵𑐖𑐫𑑂 𑐧𑑂𑐰𑐫𑐵𑐟𑑅𑐐𑐸 𑐠𑑂𑐰 𑐳𑑄𑐳𑑂𑐎𑐺𑐟𑐶 𑐳𑐩𑑂𑐧𑐣𑑂𑐢𑐷 𑐰𑐳𑑂𑐟𑐸𑐫𑐵 𑐔𑐶𑐟𑑂𑐬 𑐔𑑂𑐰𑐎𑐾𑐐𑐸, 𑐀𑐣 𑐟𑐫𑐵𑑅 𑐴𑐾 𑐄𑐩𑐶𑐟 𑐠𑑅𑐥𑐶𑐣𑐶𑐐𑐸 𑐳𑑄𑐳𑑂𑐎𑐵𑐬 𑐧𑐵𑐬𑐾 𑐰𑐵𑑅 𑐔𑐵𑐫𑐾𑐎𑐾 𑐧𑐶𑐫𑐾𑐐𑐸 𑐎𑐠𑑄 𑐳𑑂𑐎𑐸𑐮 𑐳𑑂𑐎𑐸𑐮𑑄 𑐩𑐳𑑂𑐟 𑐨𑑂𑐬𑐩𑐞 𑐫𑐵𑐎𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋

𑐄𑐎𑐶𑑄 𑐩𑐔𑐵𑐫𑐾𑐎𑑄 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐠𑑅𑐥𑐶𑐣𑐶 𑐳𑑄𑐳𑑂𑐎𑐵𑐬 𑐢𑑂𑐰𑐵𑐠𑐸𑐂𑐎𑐾𑐐𑐸 𑐖𑑂𑐫𑐵𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐥𑐎𑑂𑐎𑐵 𑐡𑐸 𑑋 𑐁𑑅 𑐟𑐎𑑄 𑐁𑐣𑐣𑑂𑐡𑐎𑐸𑐚𑐷 𑐰𑐶𑐴𑐵𑐬𑐫𑐵 𑐩𑐳𑑂𑐟, 𑐧𑐵𑐮𑐳𑐾𑐰𑐵 𑐗𑑀𑐕𑐾𑑃𑐫𑐵 𑐩𑐳𑑂𑐟, 𑐥𑑂𑐬𑐨𑐵𑐟 𑐩𑐵𑐰𑐶 𑐱𑑂𑐬𑐷𑐑𑑅 𑐣𑐑𑑅𑐫𑐵 𑐩𑐳𑑂𑐟 𑐠𑐠𑐾 𑐨𑑂𑐬𑐩𑐞𑐫𑑂 𑐰𑑅𑐐𑐸 𑐡𑐸 𑑋 𑐄𑐩𑐶𑐳𑑄 𑐖𑑅𑐳𑐶, 𑐦𑑀𑐳𑐶, 𑐴𑐵𑐳𑐶, 𑐧𑐵𑐟𑐵 𑐕𑐸 𑐐𑐠𑐾 𑐏𑑅 𑐢𑐂𑐐𑐸 𑐖𑐶𑐖𑑂𑐘𑐵𑐳𑐵 𑐫𑐵𑐂𑐐𑐸 𑐰 𑐀𑐮𑐾 𑐳𑑅𑐳𑐶𑐄𑐥𑐶𑐳𑑄 𑐄𑐎𑐶𑐫𑐵𑐟 𑐢𑑂𑐰𑐵𑐠𑐸𑐂𑐎𑐵 𑐧𑐷𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐳𑑄𑐐𑑂𑐬𑐴𑐵𑐮𑐫𑐫𑐵 𑐥𑑂𑐬𑐩𑐸𑐏 𑐜𑐵. 𑐳𑐸𑐩𑐣𑐎𑐩𑐮 𑐟𑐸𑐮𑐵𑐢𑐬𑑄 𑐎𑐣𑐵𑐡𑐶𑐮 𑑋

𑐩𑐳𑑂𑐟𑐫𑑂 𑐡𑐠𑐸𑐂 𑐴𑐾 𑐑𑑁𑐕𑐶 𑐣𑐶𑐑𑑁 𑐟𑐎 𑐳𑑄𑐐𑑂𑐬𑐴𑐵𑐮𑐫 𑐀𑐰𑐮𑑀𑐎𑐣 𑐫𑐵𑐫𑐾 𑐢𑐸𑑄𑐎𑐵𑑅 𑐟𑐸𑐬𑐸𑐣𑑂𑐟 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵 𑐫𑐵𑐫𑐾𑐐𑐸, 𑐀𑐣𑑂𑐟𑐰𑐵𑐬𑑂𑐟𑐵 𑐎𑐵𑐫𑐾𑐐𑐸 𑐣𑐵𑐥𑑄 𑐔𑐶𑐟𑑂𑐬𑐎𑐮𑐵 𑐰 𑐧𑑁𑐡𑑂𑐢𑐶𑐎 𑐥𑐬𑐵𑐩𑐬𑑂𑐱 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐏𑐵𑐳 𑐫𑐵𑐣𑐵𑑅 𑐱𑐶𑐎𑑂𑐲𑐵, 𑐣𑐳𑐵𑐖𑑂𑐰𑐮𑑄, 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐰 𑐀𑐣𑐸𑐳𑐣𑑂𑐢𑐵𑐣 𑐠𑐾𑑄𑐖𑑂𑐫𑐵𑑅𑐐𑐸 𑐖𑑂𑐫𑐵𑐫𑑂 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐠𑑂𑐰 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩𑑄 𑐧𑑅 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐫𑐵𑐣𑐵𑑅 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐳𑐫𑐾𑐎𑐾𑐟 𑐣𑑄 𑐄𑐮𑐶 𑐴𑐾 𑐦𑐵𑐂𑐡𑐵 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐳𑐣𑐫𑐵 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐖𑑂𑐫𑐵𑐗𑑂𑐰𑑅 𑐖𑐸𑐫𑐵𑐔𑑂𑐰𑑄𑐐𑐸 𑐠𑐵𑐳𑑄 𑐂𑐎𑑀 𑐨𑑂𑐫𑐵𑐮𑐷 𑐖𑑂𑐫𑐵𑐗𑑂𑐰𑐮𑐫𑑂 𑐰𑑅𑐥𑐶𑑄𑐟 𑐠𑐣 𑐴𑐫𑐵𑑅 𑐣𑑄 𑐀𑐰𑐮𑑀𑐎𑐣 𑐫𑐵𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐁𑑅 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐠𑐾𑑄𑐖𑑂𑐫𑐵𑑅𑐐𑐸 𑐣𑐾𑐰𑐵𑑅𑐟𑐫𑑂 𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑑄 𑐟𑐎𑑄 𑐠𑐣 𑐰𑐫𑐵𑑅 𑐠𑐸𑐐𑐸 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩𑐫𑐵 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐮𑐵𑐐𑐶𑑄 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑑒𑑐𑑗𑑖 𑐱𑑂𑐬𑐵𑐰𑐞 𑑒𑑔 𑐐𑐟𑐾𑐣𑐶𑐳𑐾𑑄 𑐳𑐸𑐬𑐸 𑐖𑐹𑐐𑐸 𑐐𑐸𑑄𑐮𑐵 𑐥𑐬𑑂𑐰𑐫𑐵 𑐂𑐮𑐫𑑂 𑐳𑐸𑐬𑐸 𑐖𑐹𑐐𑐸 𑐧𑑂𑐰𑐖𑑂𑐫𑐵𑐫𑑂 𑐣𑑄 𑐁𑐣𑐣𑑂𑐡𑐎𑐸𑐚𑐷𑐫𑐵 𑐳𑑂𑐰𑐷𑐩𑑂𑐴, 𑐧𑐵𑐮𑐳𑐾𑐰𑐵𑐫𑐵 𑐣𑐷𑐐𑐸𑐩𑑂𑐴, 𑐥𑑂𑐬𑐨𑐵𑐟𑐫𑐵 𑐳𑑂𑐰𑐷𑐩𑑂𑐴 𑐰 𑐂𑐎𑑀 𑐨𑑂𑐫𑐵𑐮𑐷𑐂 𑐳𑐴𑐨𑐵𑐐𑐷 𑑑𑑗𑑕 𑐩𑑂𑐴𑐾𑐳𑐶𑐣𑑄 𑐧𑐵𑑄𑐮𑐵𑐎 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐰𑐣𑐾 𑐢𑐸𑑄𑐎𑐹𑐐𑐸 𑐡𑐸 𑑋

𑐠𑐖𑑂𑐫𑐵𑑅𑐐𑐸 𑐥𑑂𑐬𑐔𑐵𑐬𑐵𑐟𑑂𑐩𑐎 𑐖𑑂𑐫𑐵𑐫𑑂 𑐡𑐸𑐠𑑂𑐫𑐵𑑅𑐐𑐸 𑐩𑐶𑐳𑐵 𑐥𑐸𑐔𑑅𑐥𑐵𑐏𑐾𑑄 𑐔𑐮𑐾 𑐫𑐵𑐣𑐵𑐔𑑂𑐰𑑄𑐐𑐸 𑐠𑑂𑐰 𑐳𑐎𑐟𑐵𑑄 𑐎𑐠𑑄𑐫𑐵 𑐳𑐵𑐩𑐐𑑂𑐬𑐷 𑐳𑐴𑐶𑐟𑐫𑐵 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩𑐫𑑂 𑑑𑑐 𑐴𑐖𑐵𑐬𑑄 𑐀𑐥𑑂𑐰𑑅 𑐡𑐵𑑄 𑐐𑑂𑐰𑐵𑐴𑐵𑐮𑐶 𑐫𑐵𑑅𑐥𑐶𑑄𑐟 𑐴𑐣𑐾𑐐𑐸, 𑐩𑐶𑐳𑑂𑐟𑐫𑑂 𑐕𑐾𑑃𑐫𑑂 𑐖𑑂𑐫𑐵 𑐫𑐵𑐫𑐵𑑄 𑐣𑑄 𑐠𑐷𑐠𑐷 𑐳𑐵𑐩𑐵𑐣 𑐡𑐵𑐣 𑐎𑐠𑑄 𑐧𑐷𑐥𑐶𑑄 𑐡𑐟 𑐢𑐵𑑅𑐳𑐵 𑐎𑐵𑑅𑐰𑐣𑐾𑐐𑐸 𑐰 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣𑐫𑐵 𑐖𑑂𑐫𑐵𑐫𑑂 𑐴𑐾 𑐧𑑅 𑐧𑐶𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐄𑐡𑐵𑐫𑑂 𑐩𑑂𑐫𑐸𑐖𑐶𑐫𑐩 𑐣𑑂𑐴𑐵𑐥𑐵𑑄 𑐩𑐶𑐳𑐵 𑐥𑐸𑐔𑑅𑐫𑐵 𑐴𑐾 𑐗𑐶𑐡𑑂𑐰𑑅 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐟𑐫𑐵𑑅 𑐳𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐄𑐎𑐶𑑄 𑐳𑐶𑐡𑑂𑐢𑐵𑐬𑑂𑐠𑐩𑐵𑐣 𑐟𑐸𑐮𑐵𑐢𑐬𑑄 𑑗 𑐮𑐵𑐏 𑐡𑐵𑑄 𑐟𑐫𑐵𑐡𑐶𑐮 𑑋 𑐄𑐐𑐸 𑐡𑐵𑐩𑐫𑑂 𑐄𑐡𑐵𑐫𑑂 𑐳𑐩𑐵𑐖𑑄 𑐴𑐾 𑐳𑑂𑐰𑑄𑐐𑐹 𑐮𑐵𑐏 𑐡𑐵𑑄 𑐟𑐣𑐵𑐧𑐶𑐮 𑑋 𑐣𑐵𑐥𑑄 𑐳𑐬𑑂𑐰𑐳𑐵𑐢𑐵𑐬𑐞𑐥𑐵𑐏𑐾𑑄 𑐣𑑄 𑐣𑑂𑐫𑐵𑐡𑑂𑐰𑑅, 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐐𑑂𑐰𑐵𑐴𑐵𑐮𑐶 𑐔𑐹𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐨𑐶𑑄𑐐𑐸 𑐖𑑂𑐫𑐵 𑐫𑐵𑐣𑐵𑐰𑐣𑐾𑐐𑐸 𑐏𑑅𑐳𑐵 𑐐𑑂𑐰𑐵𑐴𑐵𑐮𑐶 𑐣𑑄 𑐔𑐹𑐮𑐵𑑅 𑐢𑐂𑐐𑐸 𑐠𑐸𑐐𑐸 𑐑𑐚𑐣𑐵𑑄 𑐎𑑂𑐫𑑄 𑑋

𑐰𑐜𑐵 𑐖𑑂𑐫𑐵𑐎𑐸𑐠𑐶 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑐣 𑐰𑐜𑐵 𑐀𑐢𑑂𑐫𑐎𑑂𑐲 𑐣𑐶𑐮𑐎𑐵𑐖𑐷 𑐱𑐵𑐎𑑂𑐫𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋 𑐀𑐠𑐾 𑐴𑐾 𑑓 𑐣𑐩𑑂𑐧𑐬 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫𑐥𑐵𑐏𑐾𑑄 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐁𑐱𑑂𑐰𑐵𑐳𑐣 𑐰𑑅𑐐𑐸 𑐡𑐸 𑑋 𑐠𑐠𑐾 𑐐𑑂𑐰𑐵𑐴𑐵𑐮𑐶 𑐔𑐹𑐮𑐵𑐟 𑐢𑐵𑑅𑐳𑐵 𑐀𑐳𑑄𑐫𑐵 𑐴𑐾 𑐡𑐎𑑂𑐎𑐮𑐫𑑂 𑐳𑐎𑑂𑐬𑐶𑐫 𑐳𑑄𑐳𑑂𑐠𑐵 𑐀𑐳𑑄 𑐳𑐾𑐰𑐵 𑐳𑐩𑐶𑐟𑐶 𑐣𑐵𑐥𑑄 𑐖𑐵𑐣𑐵𑑅 𑐄𑐡𑐵𑐫𑑂 𑐳𑐩𑐵𑐖𑑄 𑐁𑑅 𑐰𑐂𑐐𑐸 𑐨𑐶𑐖𑐶𑐚 𑐣𑐾𑐥𑐵𑐮 𑑒𑑐𑑒𑑐 𑐫𑑂 𑐀𑐳𑑄 𑐮𑐵𑐐𑐵𑐫𑑂 𑐎𑐾𑐣𑑂𑐡𑑂𑐬𑐰𑐶𑐣𑑂𑐡𑐸 𑐫𑐵𑐣𑐵𑑅 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐣𑑄 𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐳𑑄𑐫𑐵𑐟 𑐥𑐬𑑂𑐫𑐚𑐣 𑐎𑐾𑐣𑑂𑐡𑑂𑐬 𑐡𑐫𑐾𑐎𑐾𑐐𑐸 𑐎𑐸𑐟𑑅 𑐎𑐠𑑄 𑐠𑑂𑐰 𑐖𑑂𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬𑐎𑐵𑐬𑐷 𑐧𑐖𑐵𑑅 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐣𑐵𑑅 𑐖𑐵𑐩 𑐩𑐸𑐎𑑂𑐟 𑐫𑐵𑐫𑐾𑐐𑐸 𑐰 𑐨𑐵𑐲𑐵, 𑐮𑐶𑐥𑐶 𑐰 𑐳𑑄𑐳𑑂𑐎𑐺𑐟𑐶 𑐳𑑄𑐳𑑂𑐎𑐵𑐬 𑐳𑐫𑐾𑐎𑐾𑐟 𑐰𑐂𑐥𑐶𑑄 𑐳𑑂𑐰𑐡𑐾𑐱𑐷 𑐰 𑐰𑐶𑐡𑐾𑐱𑐷 𑐣𑑂𑐴𑑂𑐫𑐵𑐩𑑂𑐴𑐾𑐳𑐶𑐟 𑐴𑐾 𑐠𑐸𑐐𑐸 𑐩𑑂𑐫𑐸𑐖𑐶𑐫𑐩𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐔𑑂𑐰𑐣𑐷𑐐𑐸 𑐏𑐣𑐾𑐡𑐸 𑑋