𑐂𑐟𑐸𑑄𑐧𑐴𑐵𑐮𑐫𑑂 𑐮𑐶𑐥𑐶 𑐳𑑂𑐫𑑄𑐥𑐶𑑄𑐟 𑐡𑐳𑐶𑐥𑑁 𑐮𑑅𑐮𑑂𑐴𑐵𑐟

𑐫𑐾𑑃 – 𑐂𑐟𑐸𑑄𑐧𑐴𑐵𑑅 𑐳𑐸𑐢𑐵𑐬 𑐳𑐩𑐶𑐟𑐶 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑔 𑐰𑐜𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐣𑐾𑐥𑐵𑐮 𑐐𑐸𑐠𑐶𑐥𑐵𑐏𑐾𑑄 𑐣𑑂𑐴𑐫𑐵𑐎𑐹𑐐𑐸 𑐮𑐕𑐶𑐫𑑄𑐎𑑄𑐫𑐵 𑐣𑐾𑐥𑐵𑐮 𑐮𑐶𑐥𑐶 𑐳𑑂𑐫𑐣𑐾𑐖𑑂𑐫𑐵𑐫𑑂 𑐟𑐵𑑅𑐮𑐵𑑅𑐥𑐶𑑄𑐟 𑐱𑐣𑐶𑐰𑐵𑑅 𑐂𑐟𑐸𑑄𑐧𑐴𑐵𑐮𑐫𑑂 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐡𑐳𑐶𑐥𑑁 𑐰 𑐩𑐾𑐜𑐮 𑐂𑐣𑐾𑐖𑑂𑐫𑐵 𑐖𑐸𑐮 𑑋𑐳𑐩𑐶𑐟𑐶𑐫𑐵 𑐣𑐵𑐫𑑅 𑐩𑐣𑑀𑐖 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐡𑐾𑐱 𑐣𑑄. 𑑓 𑐫𑐵 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫 𑐩𑐹𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐟𑐵𑑅𑐮𑐵𑑅𑐥𑐶𑑄 𑐳𑐎𑐳𑐶𑐟𑑄 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐱𑐵𑐎𑑂𑐫, 𑐳𑐵𑑄𑐳𑐡 𑐱𑐵𑐎𑑂𑐫, 𑑒𑑔 𑐰𑐜𑐵𑐫𑐵 𑐣𑐵𑐫𑑅 𑐧𑐵𑐮𑐎𑐺𑐲𑑂𑐞 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐵𑐩𑑂𑐬𑐵𑐎𑐵𑐬𑐥𑐶𑑄𑐳𑑄 𑐡𑐳𑐶𑐥𑑁, 𑐩𑐾𑐜𑐮 𑐰 𑐮𑐶𑐔𑑂𑐰𑑅𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐮𑐶𑐥𑐶 𑐎𑐎𑑂𑐲𑐫𑑂 𑐥𑑂𑐬𑐱𑐶𑐮 𑐱𑐵𑐎𑑂𑐫 𑐣𑑂𑐴𑐵𑐥, 𑐣𑐶𑐮𑐶𑐩𑐵 𑐩𑐴𑐬𑑂𑐖𑐣 𑐮𑐶𑐄 𑐰 𑐳𑐡𑐶𑐎𑑂𑐲𑐵 𑐱𑐵𑐎𑑂𑐫 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅 𑑋𑐖𑑂𑐫𑐵𑐗𑑂𑐰𑐮𑐫𑑂 𑐮𑐶𑐥𑐵 𑐳𑑂𑐫𑐣𑐵𑐩𑐶 𑐱𑐬𑐡 𑐎𑐳𑐵𑑅𑐫𑐵𑐟 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐱𑐵𑐎𑑂𑐫𑑄 𑐴𑐣𑐵𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾 𑐧𑑂𑐰𑑃𑐩𑐶𑐥𑐶𑐣𑐶𑐥𑐵𑐏𑐾𑑄 𑐣𑑄 𑐳𑑂𑐫𑐣𑐵𑐩𑐶𑐫𑐵𑐟 𑐧𑐸𑐡𑑂𑐢𑐫𑐵 𑐩𑐹𑐬𑑂𑐟𑐶 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐮𑐶𑐥𑐶 𑐳𑑂𑐫𑐣𑐾𑐖𑑂𑐫𑐵𑐫𑑂 𑐰𑐶𑐱𑐾𑐲 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐐𑐸𑐠𑐶𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐥𑑂𑐬𑐟𑐵𑐥𑐩𑐵𑐣 𑐱𑐵𑐎𑑂𑐫, 𑐡𑐸𑐖𑑅𑐥𑐶𑑄 𑐥𑐸𑐲𑑂𑐥𑐬𑐟𑑂𑐣 𑐟𑐸𑐮𑐵𑐢𑐬, 𑐮𑐸𑐩𑐶𑐣 𑐟𑐵𑐩𑑂𑐬𑐵𑐎𑐵𑐬 𑐰 𑐂𑐟𑐸𑑄𑐧𑐴𑐵𑑅 𑐩𑐶𑐳𑐵 𑐥𑐸𑐔𑑅𑐫𑐵 𑐣𑐎𑐶𑑄 𑐨𑐸𑐰𑐣 𑐴𑐾𑐬𑐵 𑐱𑐵𑐎𑑂𑐫𑐫𑐵𑐟 𑐣𑑄 𑐮𑐸𑐩𑐣𑑂𑐟𑐶 𑐔𑐶𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐀𑐠𑐾𑐴𑐾 𑐮𑐶𑐥 𑐳𑑂𑐫𑐣𑐾𑐖𑑂𑐫𑐵𑐫𑑂 𑐠𑐷𑐠𑐷 𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄𑐟 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑑅 𑐴𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐳𑐩𑐶𑐟𑐶𑐫𑐵 𑐣𑑂𑐰𑐎𑐸 𑐬𑐟𑑂𑐣𑐵𑐎𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑑂𑐴𑑂𑐫𑐵𑐎𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐕𑑂𑐫𑐵𑐘𑑂𑐖𑐾 𑐳𑐣𑐩 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐣𑑂𑐰𑐔𑐸 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐡𑐵𑑄𑐨𑐬𑐶 𑐴𑐶𑐟𑐾𑐳 𑐱𑐵𑐎𑑂𑐫𑑄 𑐥𑐵𑐴𑐵𑑃𑐥𑐶𑑄𑐟 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑑅 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋𑐳𑐩𑐶𑐟𑐶𑐥𑐵𑐏𑐾𑑄 𑐖𑐾𑐛 𑑑𑑕 𑐐𑐟𑐾 𑐣𑐶𑐳𑐾𑑄 𑐬𑐘𑑂𑐖𑐣𑐵 𑐮𑐶𑐥 𑐳𑑂𑐫𑐣𑐾𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑐎𑐷𑐐𑐸 𑐖𑐹𑐐𑐸 𑐡𑐸 𑑋