Read news in NepalBhasa text-- www.hamroschool.com BACK 𑐰𑐶𑐱𑑂𑐰𑐎𑐥 𑐥𑐸𑐮𑐸𑐥𑐵𑐮𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐰𑐶𑐱𑑂𑐰𑐎𑐥 𑐥𑐸𑐮𑐸𑐥𑐵𑐮𑐸

𑐣𑐾𑐫𑐩𑐵𑐬 𑐨𑐵𑐂𑐬𑐮

𑐦𑐶𑐦𑐵 𑐰𑐶𑐱𑑂𑐰𑐎𑐥 𑐦𑐸𑐚𑐧𑐮𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐣𑑂𑐫𑐵𑐎𑑂𑐰𑑅𑐟𑐎𑐫𑐵 𑐄𑐥𑐵𑐢𑐶 𑐰𑐶𑐖𑐾𑐟𑐵 𑐧𑑂𑐬𑐵𑐖𑐶𑐮 𑐠𑐸𑐐𑐸𑐳𑐷𑐫𑐵 𑐰𑐶𑐱𑑂𑐰𑐎𑐥𑑄 𑐥𑐶𑐴𑐵𑑄 𑐰𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐧𑐾𑐮𑑂𑐖𑐶𑐫𑐩 𑐰𑐶𑐬𑐸𑐡𑑂𑐢𑐫𑐵 𑐎𑑂𑐰𑐵𑐬𑑂𑐚𑐬𑐦𑐵𑐂𑐣𑐮𑐫𑑂 𑑒–𑑑 𑐐𑑀𑐮𑑄 𑐥𑐬𑐵𑐖𑐶𑐟 𑐖𑐸𑐫𑐵𑑅 𑐧𑑂𑐬𑐵𑐖𑐶𑐮𑐫𑐵 𑐰𑐶𑐱𑑂𑐰𑐎𑐥𑐫𑐵 𑐫𑐵𑐟𑑂𑐬𑐵 𑐎𑑂𑐰𑐔𑐵𑑅𑐳𑐵𑑄 𑐰𑐫𑐵 𑐩𑐸𑐏𑑂𑐫 𑐳𑑂𑐚𑑂𑐬𑐵𑐂𑐎𑐬 𑐣𑐾𑐫𑐩𑐵𑐬𑐫𑐵 𑐔𑐬𑑂𑐔𑐵 𑐰𑐶𑐱𑑂𑐰𑐎𑐥𑐫𑑂 𑐁𑐟𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐫𑐩𑐵𑐬𑐫𑐵 𑐔𑐬𑑂𑐔𑐵 𑐰𑐫𑐵𑐐𑐸 𑐏𑐾𑐮 𑐱𑐿𑐮𑐷 𑐰 𑐎𑑁𑐱𑐮𑐟𑐵𑐫𑐵𑐟 𑐎𑐫𑐵𑑅 𑐩𑐏𑐳𑐾 𑐰𑐫𑐵𑐐𑐸 𑐔𑐬𑑂𑐟𑐶𑐎𑐮𑐵𑐫𑐵𑐟 𑐎𑐫𑐵𑑅 𑐏𑑅 𑑋

𑐣𑐾𑐫𑐩𑐵𑐬𑐫𑐵 𑐔𑐬𑑂𑐔𑐵 𑐳𑑂𑐰𑐫𑐵𑑄 𑐰𑐫𑐵𑐟 𑐥𑐵𑐟𑑂𑐬 𑐡𑐫𑐾𑐎𑐵𑑅 𑐔𑐬𑑂𑐔𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐠𑑂𑐰 𑐂𑐮𑐫𑑂 𑐬𑐸𑐳 𑐰𑐶𑐱𑑂𑐰𑐎𑐥𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐫𑐩𑐵𑐬𑑄 𑐫𑐵𑑅𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐴𑐾 𑐀𑐨𑐶𑐣𑐫𑐫𑐵 𑐨𑐶𑐜𑐶𑐫𑑀 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐟𑐫𑐾𑐐𑐸 𑐎𑑂𑐬𑐩 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐕𑐎𑑂𑐰𑐮𑑄 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐧𑐎𑐶 𑐰𑐶𑐱𑑂𑐰𑐎𑐥 𑐦𑐸𑐚𑐧𑐮 𑐠𑑁𑑄 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐳𑐶𑐢𑐫𑐾𑐟𑑂𑐫𑑄𑐐𑐸 𑐡𑐸 𑑋

𑐖𑐵𑐬𑐷 𑐰𑐶𑐱𑑂𑐰𑐎𑐥𑐫𑑂 𑐣𑐾𑐫𑐩𑐵𑐬 𑐀𑐣𑐵𑐰𑐱𑑂𑐫𑐎 𑐬𑐸𑐥𑑄 𑐩𑐿𑐡𑐵𑐣𑐫𑑂 𑐐𑑂𑐰𑐵𑐬𑐵 𑐐𑑂𑐰𑐵𑐬𑐵 𑐟𑐹𑐐𑐸 𑐑𑐚𑐣𑐵 𑐫𑐎𑑂𑐰𑐳𑐶𑐣𑑄 𑐰𑐫𑐵𑐟 𑐎𑐵𑐳𑐵𑐩𑐶 𑐩𑐏𑐳𑐾 𑐎𑐮𑐵𑐎𑐵𑐬’𑐫𑐵 𑐬𑐸𑐥𑐫𑑂 𑐰𑑂𑐫𑑄𑐐𑑂𑐫 𑐫𑐵𑐣𑐵𑑅 𑐣𑐵𑐚𑐎 𑐫𑐵𑑅𑐐𑐸 𑐢𑐵𑐳𑐾𑑄 𑐁𑐮𑑀𑐔𑐣𑐵 𑐫𑐵𑐣𑐵 𑐴𑐫𑐵𑐔𑐰𑑄𑐐𑐸 𑐡𑐸 𑑋 𑐀𑐗 𑐀𑐦𑑂𑐬𑐶𑐎𑐵𑐫𑐵 𑐕𑐐𑐹 𑐎𑐩𑑂𑐥𑐣𑐷𑑄 𑐮𑐵 𑐣𑐾𑐫𑐩𑐵𑐬𑐫𑐵 𑐄𑐐𑐸 𑐣𑐵𑐚𑐎𑐫𑐵𑐟 𑐎𑐫𑐵𑑅 𑐕𑐐𑐹 𑐰𑐶𑐖𑑂𑐘𑐵𑐥𑐣 𑐴𑐾 𑐡𑐫𑐾𑐎𑐹𑐐𑐸 𑐡𑐸 𑑋 𑐩𑐾𑐩𑑂𑐴 𑐕𑐩𑑂𑐴𑐾𑐳𑐶𑐣𑑄 𑐮𑐵 𑐣𑐾𑐫𑐩𑐵𑐬 𑐳𑑂𑐰𑐫𑐵𑑄 𑐣𑑄 𑐀𑐥𑑂𑐰𑑅 𑐏𑐶𑐔𑐵 𑐐𑑂𑐰𑐵𑐬𑐵𑐐𑑂𑐰𑐵𑐬𑐵 𑐟𑐸𑐮𑐷𑐐𑐸 𑐖𑐎 𑐩𑐏𑐳𑐾 𑐔𑐵𑐔𑐵𑑅𑐟𑐸𑐮𑐵𑑅 𑐰𑐣𑐵𑐔𑑂𑐰𑑄𑐐𑐸 𑐨𑐶𑐜𑐶𑐫𑑀 𑐡𑐫𑐾𑐎𑐵 𑐥𑑀𑐳𑑂𑐚 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐎𑐵𑐳𑐵 𑐕𑐐𑐹, 𑐑𑐚𑐣𑐵 𑑓𑑘𑑗 !

𑐰𑐶𑐱𑑂𑐰 𑐦𑐸𑐚𑐧𑐮𑐫𑐵 𑐂𑐟𑐶𑐴𑐵𑐳𑐫𑑂 𑐂𑑄𑐐𑑂𑐮𑑂𑐫𑐵𑐞𑑂𑐜𑐫𑐵 𑐳𑐩𑐬𑑂𑐠𑐎𑐟𑐫𑑂 𑐕𑐰𑐶 𑐄𑐮𑐶 𑐧𑐵𑑄𑐮𑐵𑑅 𑐩𑐖𑐹 𑑋 𑐰𑐶𑐱𑑂𑐰 𑐦𑐸𑐚𑐧𑐮𑐫𑑂 𑐂𑑄𑐐𑑂𑐮𑑂𑐫𑐵𑐞𑑂𑐜𑐫𑐵 𑐳𑐩𑐬𑑂𑐠𑐎𑐟𑐫𑑂𑐟 𑐡𑐎𑐮𑐫𑑂 𑐄𑐔𑑂𑐕𑐺𑑄𑐏𑐮, 𑐀𑐳𑐨𑑂𑐫, 𑐴𑐸𑐮𑑂𑐫𑐵𑐴𑐵𑐫𑐵 𑐬𑐸𑐥𑐫𑑂 𑐎𑐵𑐫𑐾𑐐𑐸 𑐫𑐵𑑅 𑑋 𑐐𑐣 𑐂𑑄𑐐𑑂𑐮𑑂𑐫𑐵𑐞𑑂𑐜𑐫𑐵 𑐳𑐩𑐬𑑂𑐠𑐎 𑐡𑐂, 𑐀𑐣 𑐴𑐸𑐮𑐡𑑄𑐐𑐵 𑐖𑐸𑐂 𑐢𑐎𑐵𑑅 𑐣𑑄 𑐢𑐵𑑅 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐰𑐶𑐱𑑂𑐰𑐎𑐥𑐫𑑂 𑐂𑑄𑐐𑑂𑐮𑑂𑐫𑐵𑐞𑑂𑐜𑐫𑐵 𑐳𑐩𑐬𑑂𑐠𑐎𑐟𑐫𑑂𑐟 𑐳𑑄𑐫𑐩𑐶𑐟 𑐖𑐸𑐫𑐵𑐔𑑂𑐰𑐣𑐾𑐟 𑐥𑑂𑐬𑐴𑐬𑐷𑑄 𑐏𑑂𑐫𑐵𑐔𑑂𑐰𑑅 𑐣𑑄 𑐧𑐶𑐂𑐐𑐸 𑐫𑐵𑐂 𑑋

𑐑𑐚𑐣𑐵 𑐂𑑄𑐐𑑂𑐮𑑂𑐫𑐵𑐞𑑂𑐜𑐫𑐵 𑐴𑐾 𑐏𑑅 𑑋 𑐂𑑄𑐐𑑂𑐮𑑂𑐫𑐵𑐞𑑂𑐜 𑐰𑐶𑐬𑐸𑐡𑑂𑐢 𑐳𑑂𑐰𑐷𑐜𑐾𑐣 𑐡𑐠𑐸𑐂 𑐖𑐹𑐐𑐸 𑐎𑐵𑐳𑐵𑐫𑑂 𑐎𑐵𑐣𑐸𑐣 𑐀𑑅𑐏𑑅 𑑓𑑘𑑗 𑐐𑐹 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐄𑐔𑑂𑐕𑐺𑑄𑐏𑐮 𑐑𑐚𑐣𑐵 𑐖𑐸𑐮 𑑋 𑐀𑐖𑑂𑐫𑐵𑑅𑐐𑐸 𑐑𑐚𑐣𑐵 𑐣𑑂𑐫𑑄𑐎𑐹𑐐𑐸 𑐡𑑂𑐰𑐥𑐣𑐫𑑂 𑑗𑑐 𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑑅𑐳𑐶𑐟 𑐥𑑂𑐬𑐴𑐬𑐷𑑄 𑐣𑐶𑐫𑐣𑑂𑐟𑑂𑐬𑐞𑐫𑑂 𑐣𑑄 𑐎𑐵𑑅𑐐𑐸 𑐏𑑅 𑑋 𑐠𑑅𑐐𑐸 𑐴𑐾 𑐡𑐾𑐱𑐫𑑂 𑐕𑐣𑑂𑐴𑐸𑑄 𑐴𑐾 𑐗𑐞𑑂𑐜𑐿 𑐥𑑂𑐫𑐳𑑅 𑐎𑐵𑐣𑐸𑐣 𑐀𑑅𑐏𑑅𑐫𑐵 𑐑𑐚𑐣𑐵 𑐖𑐸𑐂𑐰𑑄 𑐰𑐶𑐱𑑂𑐰𑐎𑐥𑐫𑐵 𑐂𑐮𑐫𑑂 𑐳𑑄𑐫𑐩𑐶𑐟 𑐖𑐸𑐂𑐟 𑐢𑐵𑐳𑐾𑑄 𑐂𑑄𑐐𑑂𑐮𑐶𑐱 𑐳𑐩𑐬𑑂𑐠𑐎𑐟𑐫𑑂𑐟 𑐥𑑂𑐬𑐴𑐬𑐷𑑄 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐏𑑅 𑑋

𑐂𑑄𑐐𑑂𑐮𑐶𑐱 𑐳𑐩𑐬𑑂𑐠𑐎𑐟 𑐀𑐥𑑂𑐰𑑅𑐠𑐾𑑄 𑐀𑐫𑑂𑐮𑐵𑑅 𑐟𑑂𑐰𑐣𑐵𑑅 𑐴𑑀𑐴𑐮𑑂𑐮𑐵 𑐫𑐵𑐫𑐾𑐐𑐸 𑐰 𑐴𑐸𑐮𑐡𑑄𑐐𑐵 𑐫𑐵𑐫𑐾𑐐𑐸𑐮𑐶𑐂 𑐩𑐵𑐴𑐶𑐬 𑑋 𑐳𑑂𑐰𑐷𑐜𑐾𑐣 𑐰𑐶𑐬𑐸𑐡𑑂𑐢𑐫𑐵 𑐎𑐵𑐳𑐵𑐫𑑂 𑐰𑐶𑐖𑐫 𑐥𑑂𑐬𑐵𑐥𑑂𑐟 𑐫𑐵𑐫𑐾𑐰𑑄 𑐳𑐩𑐬𑑂𑐠𑐎𑐟𑐫𑑂𑐳𑑄 𑐮𑐞𑑂𑐜𑐣 𑐧𑑂𑐬𑐶𑐖𑐫𑑂 𑐕𑐐𑑅 𑐊𑐩𑑂𑐧𑐸𑐮𑐾𑐣𑑂𑐳 𑐟𑑀𑐜𑐦𑑀𑐜 𑐫𑐵𑐣𑐵 𑐧𑐶𑐄𑐐𑐸 𑐏𑑅𑐳𑐵 𑐳𑐟𑐎 𑐀𑐰𑐬𑐸𑐡𑑂𑐢 𑐫𑐵𑐣𑐵𑑅 𑐧𑐳, 𑐎𑐵𑐬𑐫𑐵 𑐔𑑂𑐰𑐫𑑂 𑐐𑐫𑐵𑑅 𑐟𑐶𑑄𑐣𑑂𑐴𑐸𑐂𑐐𑐸, 𑐚𑑂𑐫𑐵𑐎𑑂𑐳𑐷 𑐟𑑀𑐜𑐦𑑀𑐜 𑐫𑐵𑐣𑐵 𑐧𑐶𑐄𑐐𑐸 𑐏𑑅 𑑋

𑐳𑐩𑐬𑑂𑐠𑐎𑐟𑐫𑑂𑐟 𑐚𑐶𑐫𑐬 𑐐𑑂𑐫𑐵𑐳

𑐰𑐶𑐱𑑂𑐰𑐎𑐥 𑐀𑐣𑑂𑐟𑐶𑐩 𑐔𑐬𑐞𑐫𑑂 𑐠𑑂𑐫𑑄𑐮𑐶𑐳𑐾𑑄 𑐬𑑀𑐩𑐵𑐘𑑂𑐔𑐎 𑐖𑐸𑐫𑐵 𑐰𑐂 𑐀𑐮𑐾 𑐦𑐵𑐂𑐣𑐮𑐫𑑂 𑐟𑐎 𑐠𑑂𑐫𑐣𑐷𑐧𑐮𑐫𑑂 𑐗𑐣 𑐀𑐥𑑂𑐰𑐂 𑑋 𑐳𑐸𑐣𑐵𑑄 𑐄𑐥𑐵𑐢𑐶 𑐟𑑂𑐫𑐵𑐎𑐷 𑐢𑐂𑐐𑐸 𑐎𑑁𑐟𑐸𑐴𑐮𑐟𑐵 𑐡𑐫𑐵𑐔𑑂𑐰𑐣𑐷 𑑋 𑐣𑐎𑐁𑐄𑐚𑐣𑐶𑐳𑐾𑑄 𑐦𑐵𑐂𑐣𑐮 𑐟𑐎 𑐠𑑂𑐫𑐣𑐾𑐟 𑐳𑐦𑐮 𑐰 𑐀𑐳𑐦𑐮 𑐣𑐶𑐐𑐸𑐮𑐶𑑄 𑐚𑐶𑐩𑐫𑐵 𑐳𑐩𑐬𑑂𑐠𑐎𑐟𑐫𑑂 𑐩𑐶𑐏𑐵𑑄 𑐏𑑂𑐰𑐧𑐶 𑐣𑑄 𑐥𑐶𑐴𑐵𑑄 𑐰𑐂 𑑋 𑐟𑑂𑐫𑐵𑑅𑐐𑐸 𑐚𑐶𑐩 𑐰 𑐰𑐫𑐵 𑐳𑐩𑐬𑑂𑐠𑐎𑐟 𑐮𑐳𑐟𑐵𑑄 𑐏𑑂𑐰𑐂, 𑐥𑐬𑐵𑐖𑐫 𑐦𑑅𑐐𑐸 𑐚𑐶𑐩𑑄 𑐰𑐶𑐫𑑀𑐐, 𑐰𑐾𑐡𑐣𑐵 𑐰 𑐡𑐸𑑅𑐏𑐷 𑐖𑐸𑐫𑐵𑑅 𑐏𑑂𑐰𑐂 𑑋

𑐠𑑂𑐰 𑐗𑑂𑐰𑐮𑐫𑑂 𑑑𑑒 𑐡𑑃 𑐮𑐶𑐥𑐵 𑐰𑐶𑐱𑑂𑐰𑐎𑐥𑐫𑐵 𑐦𑐵𑐂𑐣𑐮𑐫𑑂 𑐠𑑂𑐫𑑄𑐐𑐸 𑐮𑐳𑐟𑐵𑐫𑑂 𑐴𑐣𑐵𑐔𑑂𑐰𑑄𑐥𑐶𑑄 𑐳𑐩𑐬𑑂𑐠𑐎𑐫𑑂𑐟 𑐥𑐾𑐬𑐶𑐳𑐫𑑂 𑐚𑐶𑐫𑐬 𑐐𑑂𑐫𑐵𑐳 𑐥𑑂𑐬𑐴𑐵𑐬 𑐖𑐹𑐐𑐸 𑐡𑐸 𑑋 𑑑𑑒 𑐡𑑃 𑐮𑐶𑐥𑐵 𑐰𑐶𑐱𑑂𑐰𑐎𑐥𑐫𑐵 𑐦𑐵𑐂𑐣𑐮𑐫𑑂 𑐠𑑂𑐫𑐣𑐾𑐟 𑐳𑐦𑐮 𑐦𑑂𑐬𑐵𑐣𑑂𑐳𑐫𑐵 𑐳𑐩𑐬𑑂𑐠𑐎𑐟 𑐄𑐔𑑂𑐕𑐺𑑄𑐏𑐮 𑐖𑐸𑐫𑐵𑑅 𑐮𑐳𑐟𑐵 𑐴𑐣𑐾𑐐𑐸 𑐗𑑂𑐰𑐮𑐫𑑂 𑐟𑑀𑐜𑐦𑐵𑐜𑐫𑑂 𑐟𑐎𑑄 𑐎𑐸𑐴𑐵𑑄 𑐰𑐫𑐾𑐰𑑄 𑐂𑐩𑐶𑐐𑐸 𑐮𑐳𑐟𑐵𑐫𑐵 𑐏𑑂𑐰𑐧𑐶 𑐚𑐶𑐫𑐬 𑐐𑑂𑐫𑐵𑐳𑐫𑐵 𑐏𑑂𑐰𑐧𑐶𑐂 𑐴𑐶𑐄𑐐𑐸 𑐏𑑅 𑑋

𑐰𑐶𑐖𑐫𑐫𑐵 𑐮𑐳𑐟𑐵 𑐴𑐣𑐾𑐟 𑐥𑐾𑐬𑐶𑐳𑐫𑑂 𑐩𑐸𑐣𑐵𑐔𑑂𑐰𑑄𑐥𑐶𑑄 𑐳𑐩𑐬𑑂𑐠𑐎𑐟𑐫𑑂𑐳𑑄 𑐥𑑂𑐬𑐴𑐬𑐷𑐫𑐵𑐟 𑐴𑐾 𑐀𑐥𑐵 𑐰 𑐳𑐶𑐩𑐾𑐣𑑂𑐚𑐫𑐵 𑐎𑐸𑐔𑐵𑑄 𑐟𑐎 𑐥𑑂𑐬𑐴𑐵𑐬 𑐫𑐵𑐫𑐾𑐰𑑄 𑐳𑑂𑐠𑐶𑐟𑐶 𑐟𑐣𑐵𑐰𑐐𑑂𑐬𑐳𑑂𑐟 𑐖𑐸𑐮 𑑋 𑐰𑐫𑐵𑑄 𑐮𑐶𑐥𑐵 𑐥𑑂𑐬𑐴𑐬𑐷𑑄 𑐳𑑂𑐠𑐶𑐟𑐶 𑐣𑐶𑐫𑐣𑑂𑐟𑑂𑐬𑐞𑐫𑑂 𑐎𑐵𑐫𑐾𑐟 𑐚𑐶𑐫𑐬 𑐐𑑂𑐫𑐵𑐳 𑐎𑐫𑐾𑐎𑐹𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS