Read news in NepalBhasa text-- www.hamroschool.com BACK 𑐠𑐵𑐂𑐮𑑂𑐫𑐵𑐣𑑂𑐜𑐫𑐵 𑐐𑐸𑐦𑐵 𑐦𑐳𑐾 𑐖𑐹𑐥𑐶𑑄 𑐳𑐎𑐮𑐾𑑄 𑐩𑐳𑑂𑐟 𑐰 𑐥𑑂𑐬𑐱𑐶𑐎𑑂𑐲𑐎 𑐄𑐡𑑂𑐢𑐵𑐬 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐠𑐵𑐂𑐮𑑂𑐫𑐵𑐣𑑂𑐜𑐫𑐵 𑐐𑐸𑐦𑐵 𑐦𑐳𑐾 𑐖𑐹𑐥𑐶𑑄 𑐳𑐎𑐮𑐾𑑄 𑐩𑐳𑑂𑐟 𑐰 𑐥𑑂𑐬𑐱𑐶𑐎𑑂𑐲𑐎 𑐄𑐡𑑂𑐢𑐵𑐬

𑐊𑐖𑐾𑐣𑑂𑐳𑐷- 𑐄𑐟𑑂𑐟𑐬 𑐠𑐵𑐂𑐮𑑂𑐫𑐵𑐣𑑂𑐜𑐫𑐵 𑐚𑑂𑐫𑐵𑐩 𑐮𑐸𑑄𑐐 𑐣𑐵𑑄𑐫𑐵 𑐕𑐐𑐹 𑐐𑐸𑐦𑐵𑐫𑑂 𑐦𑐳𑐾 𑐖𑐸𑐫𑐵𑐔𑑂𑐰𑑄𑐥𑐶𑑄 𑐳𑐎𑐮𑐾𑑄 𑐩𑐳𑑂𑐟 𑐰 𑐰𑐫𑐵 𑐥𑑂𑐬𑐱𑐶𑐎𑑂𑐲𑐎𑐫𑐵𑐟 𑐳𑐎𑐸𑐱𑐮 𑐄𑐡𑑂𑐢𑐵𑐬 𑐫𑐵𑑅𑐐𑐸 𑐡𑐸 𑑋
𑐠𑐵𑐂𑐮𑑂𑐫𑐵𑐣𑑂𑐜𑐫𑐵 𑐣𑐾𑐰𑐷 𑐳𑐶𑐮𑑄 𑐗𑐶𑑄𑐣𑐶𑐩𑑂𑐴 𑐩𑐳𑑂𑐟 𑐰 𑐰𑐫𑐵 𑐥𑑂𑐬𑐱𑐶𑐎𑑂𑐲𑐎𑐫𑐵𑐟 𑐳𑐸𑐬𑐎𑑂𑐲𑐶𑐟 𑐄𑐡𑑂𑐢𑐵𑐬 𑐫𑐵𑐣𑐵𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑐳𑑂𑐟𑐫𑑂𑐟 𑐐𑐸𑐦𑐵𑑄 𑐥𑐶𑐟 𑐴𑐫𑐾𑐢𑐸𑑄𑐎𑐹𑐳𑐵𑑄 𑐄𑐩𑐶𑐟 𑐄𑐡𑑂𑐢𑐵𑐬 𑐫𑐵𑑅𑐰𑑄𑐥𑐶𑑄 𑐕𑐩𑑂𑐴 𑐔𑐶𑐎𑐶𑐟𑑂𑐳𑐎 𑐰 𑐥𑑂𑐫𑐩𑑂𑐴 𑐜𑐵𑐂𑐨𑐬𑐟 𑐢𑐵𑑅𑐳𑐵 𑐐𑐸𑐦𑐵𑑄 𑐥𑐶𑐴𑐵𑑄 𑐩𑐰𑑅𑐣𑐶𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐄𑐡𑑂𑐢𑐵𑐬𑐫𑐵 𑐗𑑂𑐰𑐮𑐫𑑂 𑐠𑑁𑑄 𑐥𑑂𑐫𑐩𑑂𑐴 𑐩𑐳𑑂𑐟 𑐰 𑐥𑑂𑐬𑐱𑐶𑐎𑑂𑐲𑐎𑐫𑐵𑐟 𑐐𑐸𑐦𑐵𑑄 𑐥𑐶𑐟 𑐴𑑅𑐐𑐸 𑐏𑑅 𑑋 𑐩𑐾𑐥𑐶𑑄 𑐔𑑂𑐫𑐵𑐩𑑂𑐴 𑐩𑐢𑑂𑐫𑐾 𑐥𑑂𑐫𑐩𑑂𑐴𑐾𑐳𑐶𑐟 𑐱𑐣𑐶𑐰𑐵𑑅 𑐰 𑐥𑑂𑐫𑐩𑑂𑐴𑐾𑐳𑐶𑐟 𑐳𑑀𑐩𑐰𑐵𑑅 𑐐𑐸𑐦𑐵𑑄 𑐄𑐡𑑂𑐢𑐵𑐬 𑐫𑐵𑐣𑐵𑐴𑑅𑐐𑐸 𑐏𑑅 𑑋

𑐩𑐳𑑂𑐟𑐫𑑂 𑐳𑐎𑐸𑐱𑐮 𑐄𑐡𑑂𑐢𑐵𑐬 𑐮𑐶𑐥𑐵 𑐠𑐵𑐂𑐮𑑂𑐫𑐵𑐣𑑂𑐜𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑑂𑐬𑐫𑐸𑐟 𑐔𑐵𑐣 𑐌𑐔𑐵𑑄 𑐩𑐳𑑂𑐟𑐫𑑂𑐟 𑐥𑐶𑐟 𑐴𑑅𑐐𑐸 𑐂𑐮𑐫𑑂 𑐳𑐿𑐣𑐶𑐎𑐟𑐫𑑂𑐳𑑄 𑐣𑐂𑐠𑐾𑑄𑐖𑑂𑐫𑐵𑑅𑐐𑐸 𑐰𑐵𑐳𑑅 𑐣𑐎𑐵 𑐴𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐩𑐳𑑂𑐟𑐫𑑂𑐟 𑐧𑐾𑐴𑑀𑐱 𑐫𑐵𑐣𑐵 𑐴𑑅𑐐𑐸 𑐢𑐎𑐵𑑅 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐏𑑃𑐫𑐵 𑐏𑐞𑑂𑐜𑐣 𑐫𑐵𑐳𑐾𑑄 𑐩𑐳𑑂𑐟𑐫𑑂 𑐩𑐐𑑂𑐫𑐵𑐫𑐾𑐩𑐵 𑐢𑐫𑐵𑐐𑐸 𑐮𑑂𑐫𑐵𑐏𑑄 𑐳𑐿𑐣𑐶𑐎𑐟𑐫𑑂𑐳𑑄 𑐣𑐂𑐠𑐾𑑄 𑐖𑑂𑐫𑐵𑑅𑐐𑐸 𑐔𑐶𑐣𑑂𑐟𑐵 𑐣𑐶𑐰𑐵𑐬𑐎 𑐰𑐵𑐳𑑅 𑐣𑐎𑐵 𑐴𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐐𑐸𑐦𑐵𑑄 𑐄𑐡𑑂𑐢𑐵𑐬 𑐫𑐵𑐣𑐵𑐴𑑅𑐥𑐶𑑄 𑐳𑐎𑐮𑐾𑑄 𑐩𑐳𑑂𑐟 𑐱𑐵𑐬𑐷𑐬𑐶𑐎 𑐰 𑐩𑐵𑐣𑐳𑐶𑐎 𑐬𑐸𑐥𑑄 𑐳𑑂𑐰𑐳𑑂𑐠 𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐟𑐬 𑐄𑐩𑐶𑐟 𑐁𑑅 𑐀𑐳𑑂𑐥𑐟𑐵𑐮𑐫𑑂 𑐣𑐫𑐵𑑅 𑐣𑐶𑐐𑐬𑐵𑐣𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐩𑐶𑐟 𑐰𑐫𑐵 𑐩𑐵𑑄𑐀𑐧𑐸𑐥𑐶𑑄𑐟 𑐢𑐵𑑅𑐳𑐵 𑐣𑐵𑐥𑐮𑐵𑐎𑐾 𑐧𑐶𑐄𑐐𑐸 𑐩𑐡𑐸𑐣𑐶 𑑋 𑐩𑐳𑑂𑐟𑐫𑑂𑐟 𑐢𑐵𑑅𑐳𑐵 𑐀𑐳𑑂𑐥𑐟𑐵𑐮 𑐡𑐸𑐣𑑄 𑐩𑐵𑑄𑐀𑐧𑐸𑐥𑐶𑐣𑐶 𑐏𑑂𑐰𑐵𑑅 𑐢𑐵𑑅𑐳𑐵 𑐎𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋
𑐩𑐳𑑂𑐟𑐫𑑂𑐟 𑐕𑐸𑑄 𑐎𑐠𑑄𑐫𑐵 𑐳𑑄𑐎𑑂𑐬𑐩𑐞 𑐩𑐡𑐸 𑐢𑐫𑐵𑐐𑐸 𑐥𑐎𑑂𑐎𑐵 𑐖𑐸𑐮𑐎𑐶 𑐄𑐩𑐶𑐟 𑐩𑐵𑑄𑐀𑐧𑐸 𑐣𑐵𑐥𑐮𑐵𑐎𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐩𑐳𑑂𑐟𑐫𑑂𑐟 𑐐𑐸𑐦𑐵 𑐥𑐶𑐟 𑐴𑑅𑐧𑐮𑐫𑑂 𑐳𑐣𑐐𑑂𑐮𑐵𑐳 𑐟𑐫𑐾𑐎𑐵𑑅, 𑐩𑑂𑐴 𑐕𑐩𑑂𑐴𑑄 𑐎𑐵𑐥𑐟𑑄 𑐨𑐸𑑄𑐎𑐵 𑐴𑑅𑐐𑐸 𑐏𑑅 𑑋 𑐣𑐶𑐰𑐵𑑅 𑐟𑐎 𑐏𑐶𑐄𑑃𑐐𑐸 𑐐𑐸𑐦𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐖𑐹𑐐𑐸𑐮𑐶𑑄 𑐕𑐎𑑂𑐰𑑅 𑐣𑐶𑐨𑐵𑑅 𑐖𑐮𑑄 𑐩𑐠𑐶𑐂𑐩𑐵 𑐢𑐎𑐵𑑅 𑐳𑐣𑐐𑑂𑐮𑐵𑐳 𑐟𑐫𑐾𑐎𑐵 𑐴𑑅𑐐𑐸 𑐏𑑅 𑑋

𑐩𑐳𑑂𑐟𑐫𑑂 𑐄𑐡𑑂𑐢𑐵𑐬𑐫𑐵 𑐣𑐶𑑄𑐟𑐶𑑄 𑐥𑐷𑐩𑑂𑐴 𑐠𑐵𑐂 𑐜𑐵𑐂𑐨𑐬 𑐰 𑐣𑑂𑐫𑐫𑑂𑐩𑑂𑐴 𑐰𑐶𑐡𑐾𑐱𑐷 𑐜𑐵𑐂𑐨𑐬𑐟𑐫𑑂𑐳𑑄 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐄𑐡𑑂𑐢𑐵𑐬 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐄𑐩𑐶𑐳𑑄 𑐮𑑅 𑐡𑐸𑐣𑐾 𑐏𑐶𑐥𑑅 𑐮𑐵𑐫𑐵 𑐫𑑄𑐎𑐵𑑅 𑐏𑐶𑐥𑑅 𑐖𑑂𑐰𑐣𑐵𑑅 𑐖𑑂𑐰𑐣𑐵𑑅 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋

𑐩𑐳𑑂𑐟 𑐔𑑂𑐰𑐣𑐵𑐔𑑂𑐰𑑄𑐠𑐵𑐫𑑂 𑐟𑐎 𑐠𑑂𑐫𑑄𑐎𑐾𑐟 𑐟𑐳𑐎𑑄 𑐠𑐵𑐎𑐸𑐎 𑐰𑐣𑐾𑐩𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐀𑐣 𑐟𑐎 𑐠𑑂𑐫𑑄𑐎𑐾𑐟 𑐐𑐣𑑄 𑐟𑐐𑐵𑑅𑐐𑐸 𑐮𑑅 𑐡𑐸𑐠𑐵𑐳𑑄, 𑐐𑐣𑑄 𑐥𑐵𑐏𑐵𑑅 𑐐𑐫𑐵𑑅, 𑐐𑐣𑑄 𑐩𑐣𑐹 𑐕𑐩𑑂𑐴 𑐴𑐾 𑐣𑑂𑐴𑑂𑐫𑑄𑐎𑐾 𑐠𑐵𑐎𑐸𑐐𑐸 𑐐𑐮𑑂𑐮𑐷 𑐖𑐸𑐫𑐵𑑅 𑐰𑐣𑐾𑐩𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑐳𑑂𑐟𑐫𑑂 𑐡𑐸𑐠𑐵𑐫𑑂 𑐟𑐎 𑐰𑐫𑐾 𑐰𑐣𑐾 𑐫𑐵𑐫𑐾𑐟 𑐜𑐵𑐂𑐨𑐬𑐟𑐫𑑂𑐟 𑐗𑐶𑑄𑐕𑐑𑑁 𑐃 𑐩𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑑂𑐰 𑐐𑐸𑐦𑐵 𑐗𑐶𑐐𑐹 𑐎𑐶𑐮𑑀𑐩𑐶𑐚𑐬 𑐳𑑂𑐰𑐫𑐵𑑄 𑐟𑐵𑑅𑐴𑐵𑐎𑑅 𑐡𑐸𑐐𑐸 𑐏𑑅𑐳𑐵 𑐩𑐳𑑂𑐟 𑐥𑑂𑐫𑑄𑐐𑐹 𑐣𑐶𑐳𑐾𑑄 𑐣𑑂𑐫𑐵𑐐𑐹 𑐎𑐶𑐮𑑀𑐩𑐶𑐚𑐬 𑐟𑐎 𑐡𑐸𑐣𑐾 𑐠𑑂𑐫𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐩𑐳𑑂𑐟𑐫𑑂𑐟 𑐄𑐡𑑂𑐢𑐵𑐬 𑐫𑐵𑑅𑐰𑑄𑐩𑑂𑐴 𑐕𑐩𑑂𑐴 𑐠𑐵𑐂 𑐜𑐵𑐂𑐨𑐬 𑐳𑐷𑐐𑐸 𑐏𑑅 𑑋

𑐩𑐳𑑂𑐟 𑐰 𑐥𑑂𑐬𑐱𑐶𑐎𑑂𑐲𑐎 𑐐𑐸𑐦𑐵 𑐡𑐸𑐴𑐵𑑄 𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐁𑐎𑐵𑐗𑐵𑐎𑐵𑑄 𑐔𑐮𑑅 𑐰𑐫𑐵𑑅 𑐐𑐸𑐦𑐵 𑐩𑐹𑐡𑑂𑐰𑐵𑑅 𑐥𑑂𑐰𑐵𑐟𑐶𑐂𑐰𑑄 𑐩𑐳𑑂𑐟𑐫𑑂 𑐐𑐸𑐦𑐵𑐫𑑂 𑐦𑐳𑐾 𑐖𑐹𑐐𑐸 𑐏𑑅 𑑋 𑐟𑐳𑐎𑑄 𑐰𑐵 𑐰𑐫𑐵 𑐐𑐸𑐦𑐵 𑐡𑐸𑐣𑐾 𑐮𑑅 𑐖𑐵𑐫𑐵 𑐰𑑅𑐮𑐶𑐳𑐾 𑐩𑐳𑑂𑐟 𑐔𑑂𑐰𑐫𑑂 𑐔𑑂𑐰𑐫𑑂 𑐥𑐵𑐏𑐾 𑐠𑐴𑐵𑑄 𑐰𑑄𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS