𑐐𑐞𑑂𑐜𑐎𑐷 𑐣𑐵𑑄 𑐰𑐶𑐬𑐸𑐡𑑂𑐢 𑐠𑑁𑑄 𑐥𑑂𑐬𑐡𑐾𑐱 𑐣𑑄. 𑑔 𑐧𑐣𑑂𑐡
𑐫𑐾𑑃 – 𑐥𑑂𑐬𑐡𑐾𑐱 𑐣𑑄. 𑑔 𑐫𑐵 𑐣𑐵𑑄 𑐐𑐞𑑂𑐜𑐎𑐷 𑐥𑑂𑐬𑐡𑐾𑐱 𑐟𑑅𑐐𑐸 𑐰𑐶𑐬𑐸𑐡𑑂𑐢 𑐟𑐩𑐸𑐰𑐵𑐣 𑐩𑐐𑐬𑐵𑐟 𑐳𑑄𑐑𑐬𑑂𑐲 𑐳𑐩𑐶𑐟𑐶 𑐰 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑𑑄 𑐠𑑁𑑄 𑐥𑑂𑐬𑐡𑐾𑐱 𑐣𑑄. 𑑔 𑐧𑐣𑑂𑐡 𑐫𑐵𑑅𑐐𑐸 𑐡𑐸 𑑋 𑐧𑐣𑑂𑐡𑐫𑐵 𑐗𑑂𑐰𑐮𑐫𑑂 𑐥𑑀𑐏𑐬𑐵𑐫𑑂 𑐳𑐵𑐬𑑂𑐰𑐖𑐣𑐶𑐎 𑐫𑐵𑐟𑐵𑐫𑐵𑐟 𑐰 𑐱𑐿𑐎𑑂𑐲𑐶𑐎 𑐳𑑄𑐳𑑂𑐠𑐵𑐟 𑐥𑐹𑐰𑑄𑐎 𑐧𑐣𑑂𑐡 𑐖𑐹𑐐𑐸 𑐡𑐸𑐳𑐵 𑐕𑐸𑑄 𑐕𑐸𑑄 𑐳𑐬𑐎𑐵𑐬𑐷 𑐖𑑂𑐫𑐵𑐎𑐹 𑐖𑐎 𑐔𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐾𑐩𑐾𑐠𑐵𑐫𑑂 𑐣𑑄 𑐁𑑄𑐱𑐶𑐎 𑐥𑑂𑐬𑐨𑐵𑐰 𑐮𑐵𑑅𑐐𑐸 𑐡𑐸 𑑋 𑐧𑐣𑑂𑐡 𑐁𑐴𑑂𑐰𑐵𑐣 𑐫𑐵𑐳𑐾𑑄 𑐳𑑄𑐑𑐬𑑂𑐲 𑐳𑐩𑐶𑐟𑐶 𑐰 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑𑐫𑐵 𑐎𑐵𑐬𑑂𑐫𑐎𑐬𑑂𑐟𑐵𑐟 𑐥𑑀𑐏𑐬𑐵 𑐔𑑀𑐎 𑐔𑑀𑐎𑐫𑑂 𑐰𑐫𑐵𑑅 𑐥𑑂𑐬𑐡𑐬𑑂𑐱𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐥𑑂𑐬𑐡𑐾𑐱 𑐣𑑄. 𑑔 𑐫𑐵 𑐣𑐵𑑄 𑐐𑐞𑑂𑐜𑐎𑐷 𑐟𑑅𑐐𑐸 𑐰𑐶𑐬𑐸𑐡𑑂𑐢 𑐟𑐩𑐸𑐰𑐵𑐣–𑐩𑐐𑐬𑐵𑐟 𑐳𑑄𑐑𑐬𑑂𑐲 𑐳𑐩𑐶𑐟𑐶𑑄 𑐰𑐶𑐬𑑀𑐢 𑐥𑑂𑐬𑐬𑑂𑐡𑐱𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑑋 𑐳𑐩𑐶𑐟𑐶𑑄 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐐𑐞𑑂𑐜𑐎𑐷 𑐟𑑅𑐐𑐸 𑐏𑑃𑐫𑑂 𑐀𑐳𑐴𑐩𑐟𑐶 𑐎𑑂𑐫𑑃𑐳𑐾𑑄 𑐩𑑂𑐴𑐶𑐐𑑅 𑐟𑐣𑐴𑐸𑑃𑐫𑐵 𑐡𑐩𑑁𑐮𑐷𑐂 𑐥𑑂𑐬𑐡𑐬𑑂𑐱𑐣 𑐫𑐵𑑅𑐐𑐸 𑐏𑑅 𑑋 𑐥𑑂𑐬𑐡𑐬𑑂𑐱𑐣𑐫𑐵 𑐗𑑂𑐰𑐮𑐫𑑂 𑐐𑐞𑑂𑐜𑐎𑐷 𑐣𑐵𑑄 𑐏𑐵𑐬𑐾𑐖 𑐫𑐵𑐫𑐾 𑐩𑐵𑑅 𑐢𑐫𑐵𑐐𑐸 𑐣𑐵𑐬𑐵 𑐠𑑂𑐰𑐫𑐾𑐎𑐸𑐳𑐾𑑄 𑐳𑐶𑐛𑑂𑐛𑐷 𑐖𑐸𑐮𑐸𑐳 𑐥𑐶𑐎𑐵𑑅𑐐𑐸 𑐏𑑅 𑑋
𑐖𑐸𑐮𑐸𑐳 𑐮𑐶𑐥𑐵 𑐎𑑀𑐞 𑐳𑐨𑐵𑐫𑑂 𑐣𑑂𑐰𑐰𑐵𑐫𑐾 𑐐𑐸 𑐗𑑂𑐰𑐮𑐫𑑂 𑐳𑑄𑐑𑐬𑑂𑐲 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐳𑐶𑐡𑑂𑐢𑐵𑐣𑑂𑐟 𑐠𑐵𑐥𑐵𑑄 𑐟𑐩𑐸𑐰𑐵𑐣 𑐩𑐐𑐬𑐵𑐟 𑐣𑐵𑐩𑐵𑐎𑐬𑐞 𑐩𑐫𑐵𑐟𑐢𑐵𑑅𑐳𑐵 𑐎𑐜𑐵 𑐁𑐣𑑂𑐡𑑀𑐮𑐣 𑐫𑐵𑐫𑐾𑐐𑐸 𑐏𑑂𑐫𑐵𑐔𑑂𑐰𑑅 𑐣𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋
𑐠𑑂𑐰𑐴𑐾 𑐗𑑂𑐰𑐮𑐫𑑂 𑐣𑐫𑐵𑑃𑐱𑐎𑑂𑐟𑐶 𑐣𑐾𑐥𑐵𑐮𑐫𑐵 𑐬𑐵𑐲𑑂𑐚𑑂𑐬𑐶𑐫 𑐩𑐵𑐩𑐶𑐮𑐵 𑐳𑑄𑐫𑐣𑑂𑐟𑑂𑐬𑐫𑐵 𑐳𑑄𑐫𑑀𑐖𑐎 𑐴𑐶𑐳𑐶𑐮𑐵 𑐫𑐩𑐶𑑄 𑐱𑐣𑐶𑐰𑐵𑑅 𑐕𑐐𑐹 𑐥𑑂𑐬𑐾𑐳 𑐰𑐎𑑂𑐟𑐰𑑂𑐫 𑐖𑐵𑐬𑐷 𑐫𑐵𑐳𑐾𑑄 𑐐𑐞𑑂𑐜𑐎 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑐎𑐬𑐞𑐫𑐵 𑐰𑐶𑐬𑑀𑐢 𑐫𑐵𑐣𑐵𑐡𑐷𑐐𑐸 𑐡𑐸 𑑋
𑐥𑑂𑐬𑐾𑐳 𑐰𑐎𑑂𑐟𑐰𑑂𑐫𑐫𑑂 𑐳𑑄𑐰𑐶𑐢𑐵𑐣𑐳𑐨𑐵𑑄 𑐖𑐵𑐬𑐷 𑐫𑐵𑑅𑐐𑐸 𑐣𑐾 𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑐫𑐵 𑐥𑑂𑐬𑐳𑑂𑐟𑐵𑐰𑐣𑐵𑐫𑑂 𑐴𑐾 𑐧𑐴𑐸𑐖𑐵𑐟𑐶, 𑐧𑐴𑐸𑐨𑐵𑐲𑐶𑐎, 𑐧𑐴𑐸𑐢𑐵𑐬𑑂𑐩𑐶𑐎, 𑐧𑐴𑐸𑐳𑐵𑑄𑐳𑑂𑐎𑐺𑐟𑐶𑐎 𑐰 𑐨𑑁𑐐𑑀𑐮𑐶𑐎 𑐰𑐶𑐱𑐾𑐲𑐟𑐵𑑄 𑐖𑐵𑑅𑐐𑐸 𑐡𑐾𑐫𑑂 𑐢𑐫𑐵𑐟𑑅𑐐𑐸 𑐦𑐸𑐎𑐳𑑂𑐫𑐵𑑄 𑐳𑐶𑐄𑐐𑐸 𑐏𑑃 𑐢𑐵𑐳𑐾𑑄 𑐠𑐸𑐎𑐶𑐫𑐵𑐟 𑐥𑐸𑐲𑑂𑐚𑐶 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐬𑐵𑐖𑑂𑐫 𑐥𑐸𑐬𑑂𑐣𑐳𑑄𑐬𑐔𑐣𑐵 𑐳𑐩𑐶𑐟𑐶 𑐰 𑐁𑐫𑑀𑐐 𑐣𑐶𑐐𑐸𑐮𑐶𑑄 𑐳𑐩𑐶𑐟𑐶𑑄 𑐟𑐎𑑄 𑐣𑐾𑐥𑐵𑑅𑐫𑐵 𑐳𑑄𑐑𑐷𑐫𑐟𑐵𑐫𑐵 𑐁𑐢𑐵𑐬 𑐣𑑂𑐫𑐵𑐐𑐹 𑐥𑐴𑐶𑐔𑐵𑐣 𑐰 𑐥𑑂𑐫𑑄𑐐𑐹 𑐁𑐢𑐵𑐬 𑐫𑐵𑐟 𑐕𑐏𑐾 𑐟𑐫𑐵𑑅 𑐳𑑄𑐰𑐶𑐢𑐵𑐣𑐫𑐵 𑐩𑐹𑐮 𑐩𑐬𑑂𑐩 𑐀𑑅𑐏𑑅 𑐐𑐞𑑂𑐜𑐎 𑐥𑑂𑐬𑐡𑐾𑐱 𑐣𑐵𑐩𑐵𑐎𑐬𑐞 𑐫𑐵𑑅𑐐𑐸𑐮𑐶𑑄 𑐠𑐸𑐎𑐶𑐫𑐵 𑐰𑐶𑐬𑑀𑐢 𑐫𑐵𑐣𑐵 𑐢𑐎𑐵𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋
LEAVE YOUR COMMENTS