𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐎𑐺𑐟𑐶𑐩 𑐎𑐸𑐩𑐵𑐬𑐷𑐟𑑂𑐰

𑐠𑑂𑐰 𑐎𑐺𑐟𑐶𑐩 𑐢𑐂𑐐𑐸 𑐣𑑄 𑐟𑐳𑐎𑑄 𑐀𑐖𑐹 𑐔𑐵𑐫𑐵𑐥𑐸 𑑋 𑐣𑑂𑐴𑑂𑐫𑐵𑐠𑐵𑐫𑑂 𑐳𑑂𑐰𑑅𑐳𑐵𑑄 𑐎𑐺𑐟𑐶𑐩 𑐀𑐬𑑂𑐠𑐵𑐟 𑐣𑐎𑑂𑐎𑐮𑐶 𑑋 𑐎𑐺𑐟𑐶𑐩 𑐀𑐨𑐵𑐰, 𑐎𑐺𑐟𑐶 𑐰𑐳𑑅, 𑐎𑐺𑐟𑐶𑐩 𑐖𑐵𑐎𑐶, 𑐎𑐺𑐟𑐶𑐩 𑐩𑐣𑐹 𑐁𑐡𑐶 𑐂𑐟𑑂𑐫𑐵𑐡𑐶 𑑋 𑐏𑑃 𑐮𑑂𑐴𑐵𑐣𑐵𑑄 𑐩𑐧𑑂𑐫𑐵𑑅 𑑋 𑐠𑑂𑐰 𑐗𑑂𑐰𑐮𑐫𑑂 𑐣𑑂𑐴𑐹𑐐𑐸 𑐎𑐺𑐟𑐶𑐩𑐫𑐵 𑐔𑐬𑑂𑐔𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐰 𑐏𑑅 𑐎𑐺𑐟𑐶𑐩 𑐎𑐸𑐩𑐵𑐬𑐶𑐟𑑂𑐰 𑑋 𑐂𑐳𑑂𑐮𑐵𑐩𑐶𑐎 𑐎𑐚𑑂𑐚𑐬𑐥𑐣𑑂𑐠𑐷 𑐡𑐾𑐫𑑂 𑐂𑐬𑐵𑐣𑐫𑑂 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐎𑐺𑐟𑐶𑐩 𑐎𑐸𑐩𑐵𑐬𑐶𑐟𑑂𑐰𑐫𑐵 𑐥𑑂𑐬𑐔𑐮𑐣 𑐟𑐷𑐰𑑂𑐬 𑐬𑐸𑐥𑑄 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐂𑐬𑐵𑐣 𑐀𑐠𑐾𑑄 𑐣𑑄 𑐰𑐶𑐱𑑂𑐰 𑐬𑐵𑐖𑐣𑐷𑐟𑐶𑐎 𑐖𑐐𑐟𑐫𑑂 𑐔𑐬𑑂𑐔𑐵𑐫𑑂 𑐰𑐫𑐵𑐔𑑂𑐰𑑄𑐐𑐸 𑐕𑐐𑐹 𑐡𑐾𑐫𑑂 𑐏𑑅 𑑋 𑐁𑐞𑐰𑐶𑐎 𑐮𑑂𑐰𑐵𑐨𑑅𑐫𑐵 𑐎𑐵𑐬𑐞𑑄 𑐔𑐬𑑂𑐔𑐵𑐫𑐵 𑐔𑑂𑐰𑐎𑐵𑐫𑑂 𑐠𑑂𑐫𑐣𑐵𑐔𑑂𑐰𑑄𑐐𑐸 𑐂𑐬𑐵𑐣𑐫𑐵𑐟 𑐁𑐥𑐵𑐮𑑄 𑐡𑐾𑐱𑑄 𑐁𑐬𑑂𑐠𑐶𑐎 𑐣𑐵𑐎𑐵𑐧𑐣𑑂𑐡𑐷𑐟𑐎𑑄 𑐟𑐫𑐵𑐟𑑅𑐐𑐸 𑐡𑐸 𑑋 𑐎𑐚𑑂𑐚𑐬𑐥𑐣𑑂𑐠𑐷 𑐂𑐳𑑂𑐮𑐵𑐩𑐶𑐎 𑐡𑐾𑐫𑑂𑐫𑐵 𑐬𑐸𑐥𑐫𑑂 𑐠𑑅𑐐𑐸 𑐕𑐵𑐥 𑐟𑑂𑐰𑑅𑐟𑐾𑐟 𑐳𑐦𑐮 𑐠𑑂𑐰 𑐴𑐾 𑐂𑐬𑐵𑐣𑐫𑑂 𑐀𑐣𑐔𑑂𑐰𑑄𑐥𑐶𑑄 𑐣𑑂𑐴𑐹 𑐥𑐸𑐳𑑂𑐟𑐵 𑐢𑐵𑑅𑐳𑐵 𑐳𑑂𑐰𑐟𑐣𑑂𑐟𑑂𑐬𑐟𑐵𑐫𑐵 𑐥𑐎𑑂𑐲𑐫𑑂 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐀𑐣 𑐬𑐸𑐝𑐷𑐰𑐵𑐡𑐷 𑐥𑐬𑐩𑑂𑐥𑐬𑐵𑐐𑐟 𑐳𑑀𑐔 𑐣𑑄 𑐄𑐟𑑂𑐟𑐶𑐎𑑄 𑐴𑐵𑐰𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐗𑑂𑐰𑐮𑐫𑑂 𑐮𑐶𑐥𑐵𑑄𑐐𑐸 𑐕𑐐𑐹 𑐡𑐳𑐸 𑐏𑑅 𑐎𑐸𑐩𑐵𑐬𑐶𑐟𑑂𑐰𑐫𑐵 𑐥𑐬𑐷𑐎𑑂𑐲𑐞 𑑋

𑐕𑐐𑐹 𑐂𑐮𑐫𑑂 𑐂𑐬𑐵𑐣𑐫𑑂 𑐎𑐸𑐩𑐵𑐬𑐶𑐟𑑂𑐰𑐫𑐵 𑐥𑐬𑐷𑐎𑑂𑐲𑐞 𑐫𑐵𑐫𑐾𑐩𑐵𑐮 𑐢𑐵𑑅𑐳𑐵 𑐟𑐸𑐫𑐸𑐐𑐸 𑐎𑐵𑐥𑑅𑐫𑐵 𑐥𑑂𑐬𑐫𑑀𑐐 𑐖𑐸𑐂𑐐𑐸 𑐏𑑅 𑑋 𑐟𑐬 𑐴𑐶𑐮𑐵 𑐰𑑄𑐐𑐸 𑐃 𑐰 𑐥𑐬𑐶𑐳𑑂𑐠𑐶𑐟𑐶𑐮𑐶𑐳𑐾𑑄 𑐩𑐶𑐖𑑄 𑐥𑐎𑑂𑐲𑑄 𑐂𑐴𑐶𑐥𑐵 𑐣𑑂𑐴𑑂𑐫𑑅 𑐩𑐶𑐳𑐵𑐫𑐵 𑐎𑐸𑐩𑐵𑐬𑐶𑐟𑑂𑐰𑐫𑐵 𑐥𑑂𑐬𑐩𑐵𑐞 𑐦𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐩𑐶𑐖𑑄 𑐥𑐎𑑂𑐲𑑄 𑐎𑐸𑐩𑐵𑐬𑐶𑐟𑑂𑐰𑐫𑐵 𑐥𑑂𑐬𑐩𑐵𑐞𑐥𑐟𑑂𑐬 𑐩𑐵𑐐 𑐫𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐠𑐖𑑂𑐫𑐵𑑅𑐐𑐸 𑐳𑑂𑐠𑐶𑐟𑐶𑐂 𑐎𑐺𑐟𑐶𑐩 𑐎𑐸𑐩𑐵𑐬𑐶𑐟𑑂𑐰 𑐥𑑂𑐬𑐵𑐥𑑂𑐟 𑐫𑐵𑐫𑐾𑐐𑐸 𑐔𑐮𑐣 𑐣𑑄 𑐄𑐟𑑂𑐟𑐶𑐎𑑄 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑐎𑐚𑑂𑐚𑐬𑐥𑐣𑑂𑐠𑐷 𑐂𑐳𑑂𑐮𑐵𑐩𑐶𑐎 𑐡𑐾𑐫𑑂 𑐂𑐬𑐵𑐣𑐫𑑂 𑑋

𑐏𑐟𑐸𑑄 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐂𑐬𑐵𑐣𑐫𑑂 𑐕𑐸𑑄 𑐕𑐸𑑄 𑐳𑐵𑐩𑐵𑐖𑐶𑐎 𑐴𑐶𑐄𑐥𑐵𑑅 𑐴𑐫𑐾𑐐𑐸 𑐣𑐶𑑄𑐟𑐶𑑄 𑐎𑐸𑐟𑑅 𑐴𑐾 𑐩𑐖𑐹𑐐𑐸 𑐢𑐵𑑅𑐳𑐵 𑐩𑐏𑐸, 𑐀𑐫𑑂 𑐣𑑄 𑐕𑐸𑑄 𑐕𑐸𑑄 𑐥𑐸𑐮𑐵𑑄𑐐𑐸 𑐳𑑀𑐔 𑐡𑐸𑐥𑐶𑐣𑐶𑐐𑐸 𑐳𑑀𑐔 𑐎𑐠𑑄 𑐴𑐾 𑐀𑐣𑐫𑐵 𑐳𑐩𑐵𑐖 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐂𑐴𑐶𑐥𑐵 𑐣𑑂𑐴𑑂𑐫𑑅 𑐩𑐶𑐳𑐵𑐫𑐵 𑐎𑐸𑐩𑐵𑐬𑐶𑐟𑑂𑐰𑐫𑐵 𑐥𑑂𑐬𑐩𑐵𑐞𑐥𑐟𑑂𑐬 𑐩𑐵𑐐 𑐫𑐵𑐫𑐾𑐐𑐸 𑐎𑑂𑐬𑐩 𑐀𑐥𑑂𑐰𑐫𑐵 𑐰𑐫𑐾𑐰𑑄 𑐳𑐩𑐵𑐖𑐫𑐵 𑐩𑐶𑐳𑐵𑐟𑐫𑑂𑐳𑑄 𑐠𑑅𑐐𑐸 𑐐𑑀𑐥𑑂𑐫 𑐀𑑄𑐐𑐫𑐵 𑐥𑑂𑐮𑐵𑐲𑑂𑐚𑐶𑐎 𑐳𑐬𑑂𑐖𑐬𑐷 𑐟𑐎𑑄 𑐫𑐵𑐫𑐾𑐐𑐸 𑐫𑐵𑐣𑐵 𑐴𑐫𑐵𑐔𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 ‘𑐴𑐵𑐂𑐩𑑂𑐣𑑀𑐥𑑂𑐮𑐵𑐲𑑂𑐚𑐶’ 𑐢𑐎𑐵𑑅 𑐢𑐵𑐂 𑑋 𑐠𑐸𑐎𑐶𑑄 𑐩𑐶𑐳𑐵𑐫𑐵 𑐎𑐸𑐩𑐵𑐬𑐶𑐟𑑂𑐰𑐫𑐵𑐟 𑐴𑐵𑐎𑐣𑑄 𑐎𑐵𑐫𑐩 𑐫𑐵𑐂 𑑋