𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐣𑐵𑐐𑐫𑐵 𑐣𑑂𑐴𑐶𑐥𑑂𑐫𑐣𑐫𑑂 𑐮𑐸𑑃 𑐕𑐟𑑂𑐫𑐵𑑅

𑐖𑐶𑐩𑐶 𑐩𑐵𑑄𑐫𑐵 𑐣𑐵𑑄 𑐬𑐵𑐩𑐎𑐸𑐩𑐵𑐬𑐶 𑐩𑐵𑐣𑐣𑑂𑐢𑐬 𑐰 𑐧𑐵𑑅𑐫𑐵 𑐣𑐵𑑄 𑐳𑐸𑐧𑑂𑐧𑐵 𑐐𑐞𑐾𑐱𑐡𑐵𑐳 𑐩𑐵𑐣𑐣𑑂𑐢𑐬 𑐏𑑅 𑑋 𑐖𑐶 𑐰𑐶.𑐳𑑄. 𑑑𑑙𑑙𑑖 𑐳𑐵𑐮𑐫𑑂 𑐩𑐬𑐸 𑐟𑑂𑐰𑐵𑑅𑐫𑐵 𑐟𑐴𑐧𑐶𑐮𑐫𑑂 𑐧𑐹𑐐𑐸 𑑋 𑐖𑐶𑐩𑐶𑐐𑐸 𑐕𑐾𑑃 𑐟𑐴𑐧𑐶𑐮, 𑐩𑐬𑐸𑑄𑐣𑐶𑐳𑐾𑑄 𑐀𑐚𑑂𑐎𑑀𑐣𑐵𑐬𑐵𑐫𑐞 𑐡𑑂𑐫𑑅𑐫𑐵𑐠𑐵𑐫𑑂 𑐟𑐎 𑐕𑐳𑑂𑐰𑐵 𑐖𑐸𑐫𑐵𑑅 𑐮𑐶𑐄𑐣𑐾𑑄 𑐣𑑄 𑐔𑐵𑑅𑐟𑐹, 𑐡𑐠𑐸𑐂 𑐟𑑅𑐎𑐹𑐐𑐸 𑐔𑐸𑐎 𑐡𑐸 𑑋 𑐖𑐶𑐩𑐶 𑐕𑐾𑑃𑐫𑑂 𑐎𑑀𑐛𑐷 𑐡𑐸 𑑋 𑐠𑐷𑐠𑐷 𑐳𑐵𑐩𑐵𑐣𑐫𑐵 𑐰𑑂𑐫𑐵𑐥𑐵𑐬 𑐫𑐵𑐂𑐐𑐸 𑐠𑐵𑐫𑑂, 𑐎𑐬 𑐥𑐸𑐮𑐾𑐐𑐸 𑐀𑐦𑐶𑐳 𑐣𑑄 𑐡𑐸 𑑋 𑐖𑐶𑐩𑐶 𑐧𑐵𑑅 𑐰 𑐎𑐎𑐵𑑄 𑐧𑐣𑐾𑐖𑑂𑐫𑐵 𑐫𑐵𑐂𑐐𑐸 𑑋 𑐖𑑂𑐫𑐵 𑐫𑐵𑐂𑐥𑐶𑑄 𑐨𑐵𑐬𑐡𑐵𑐬𑐟 𑐫𑐎𑑂𑐰 𑐡𑐸 𑑋 𑐂𑐩𑐶𑐳𑑄 𑐔𑐸𑐎𑐫𑑂 𑐔𑑂𑐰𑐣𑐵𑑅 𑐢𑑂𑐫𑐧𑐵 𑐮𑑂𑐫𑐵𑑅 𑐏𑐵𑐣𑐵𑐔𑑂𑐰𑐣𑐷 𑑋

𑐳𑐵𑐩𑐵𑐣 𑐎𑐵𑑅 𑐰𑑅𑐥𑐶𑑄𑐟 𑐳𑐵𑐩𑐵𑐣 𑐣𑑄 𑐧𑐶𑐫𑐵𑐔𑑂𑐰𑐣𑐷 𑑋 𑐡𑐬𑐰𑐵𑐬𑐫𑐵𑐟 𑐩𑐵𑑅𑐐𑐸 𑐳𑐎𑐟𑐵𑑄 𑐳𑐵𑐩𑐵𑐣 𑐖𑐶𑐩𑐶𑐠𑐵𑐳𑑄 𑐎𑐶𑐳𑐶 𑐰 𑐳𑐮 𑐩𑑂𑐴𑐫𑑂 𑐟𑐫𑐵𑑅 𑐫𑑄𑐎𑐷 𑑋 𑐀𑐠𑐾 𑐰𑑂𑐫𑐵𑐥𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐶𑐩𑐶 𑐟𑐵𑐥𑐵𑐧𑐵𑐖𑑂𑐫𑐵, 𑐢𑐩𑑂𑐩𑐵𑑄 𑐳𑐵𑐴𑐸 (𑐳𑐵𑐴𑐸 𑐢𑐬𑑂𑐩𑐣𑐵𑐬𑐵𑐫𑐞)𑐫𑐵 𑐥𑐵𑐮𑑄𑐣𑐶𑐳𑐾𑑄 𑐱𑐸𑐬𑐸 𑐖𑐹𑐐𑐸 𑐢𑐵𑐂 𑑋 𑐖𑐶𑑄 𑐣𑑂𑐫𑐣𑐵 𑐟𑐫𑐵𑐐𑐸 𑐕𑐟𑐵 𑐏𑑃 𑐎𑐣𑐾 𑐢𑐩𑑂𑐩𑐵𑑄 𑐳𑐵𑐴𑐸𑐫𑐵 𑐳𑑂𑐰𑐩𑑂𑐴 𑐎𑐵𑐫𑐥𑐶𑑄, 𑐖𑐾𑐛𑐵𑐩𑑂𑐴 𑐴𑐬𑑂𑐲𑐣𑐵𑐬𑐵𑐫𑐞𑐫𑐵 𑐎𑐵𑐫 𑐕𑐩𑑂𑐴 𑐰 𑐩𑑂𑐴𑑂𑐫𑐵𑐫 𑐕𑐩𑑂𑐴 𑐖𑐎 𑑋

𑐎𑐵𑐫𑐩𑑂𑐴 𑐳𑑂𑐰𑐡𑑃𑐟𑐶 𑐡𑐸𑐧𑐮𑐫𑑂𑐣𑐶𑐳𑐾𑑄 𑐰𑐫𑐵𑐐𑐸 𑐨𑑀𑐚𑑀 𑐮𑑄𑐫𑐵 𑐥𑐸𑐟𑐸𑐂 𑐥𑑁 𑐕𑐥𑑁 𑐑𑐵𑐎𑐵𑑅 𑐳𑐮 𑐩𑑂𑐴𑐫𑑂 𑐟𑐫𑐵𑑅 𑐡𑐬𑐰𑐵𑐬𑐫𑑂 𑐕𑑂𑐰𑐂𑐐𑐸 ! 𑐡𑐬𑐰𑐵𑐬𑐫𑐵 𑐩𑐣𑐹𑐟𑐫𑑂𑐳𑑄 𑐰 𑐥𑑁𑐫𑐵 𑐮𑐶𑐳𑑅 𑐰 𑐠𑐷𑐠𑐷 𑐳𑐵𑐩𑐵𑐣𑐫𑐵 𑐢𑐮𑑅 𑐡𑐫𑐾𑐎𑐵𑑅 𑐰 𑐩𑐔𑐵 (𑐖𑐶𑐩𑐶 𑐟𑑅𑐧𑐵𑑅)𑐫𑐵 𑐨𑑀𑐚𑑀 𑐮𑑄𑐫𑐵 𑐥𑐸𑐟𑐸𑐂 𑐟𑐸𑑄 𑐑𑐵𑐎𑐵𑑅 𑐮𑐶𑐟 𑐕𑑂𑐰𑐫𑐵𑐴𑐂𑐐𑐸 𑑋 𑐢𑐩𑑂𑐩𑐵𑑄 𑐳𑐵𑐴𑐸𑐣𑑄 𑐥𑐸𑐟𑐸𑐂 𑐑𑐵𑐎𑐵𑐴𑑅𑐐𑐸 𑐢𑐮𑑅 𑐳𑑂𑐰𑐫𑐵𑑄 𑐩𑐵𑑅𑐩𑐵𑑅𑐐𑐸 𑐳𑐵𑐩𑐵𑐣𑐟 𑐎𑐶𑐳𑐶 𑐰 𑐳𑐴𑐮 𑐩𑑂𑐴𑐫𑑂 𑐟𑐫𑐵𑑅 𑐡𑐬𑐰𑐵𑐬𑐫𑑂 𑐟𑐫𑐾𑐎𑐾𑐕𑑂𑐰𑐂𑐐𑐸 𑑋 𑐟𑐳𑐎𑑄 𑐴𑐶𑐳𑐶𑐡𑐸𑐩𑑂𑐴 𑐰𑑄 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐡𑐬𑐰𑐵𑐬𑐫𑐵 𑐩𑐣𑐹𑐟𑐫𑑂𑐟 𑐴𑐣𑐵𑐧𑐣𑐵 𑐟𑐫𑐾𑐳𑑅 𑑋

𑐰 𑐩𑐔𑐵 𑐣𑑂𑐫𑐵𑐡𑑃 𑐡𑐸𑐧𑐮𑐫𑑂 𑐴𑐾 𑐩𑑄𑐟 𑑋 𑐰 𑐩𑐔𑐵𑐫𑐵 𑐳𑐵𑐮𑐶𑐎 𑐳𑐶𑑄𑐴𑐳𑐟𑐮𑐫𑑂 𑐡𑐸 𑑋 𑐁𑑅 𑐳𑐶𑑄𑐴𑐳𑐟𑑅𑐫𑐵 𑐧𑐵𑐬𑐾 𑐎𑐣𑐾 𑑋 𑐴𑐬𑑂𑐲𑐣𑐵𑐬𑐵𑐫𑐞𑐫𑐵 𑐫𑐵𑐎𑑅 𑐩𑑂𑐴𑑂𑐫𑐵𑐫𑑂 𑐖𑑀𑐐𑐩𑐵𑐫𑐵𑑄 𑐩𑐬𑐸 𑐳𑐶𑑄𑐴𑐳𑐟𑑅𑐫𑐵 𑐥𑑂𑐫𑑄𑐐𑐹 𑐎𑐸𑐣𑐫𑑂 𑐠𑐷𑐠𑐷 𑐏𑑂𑐰𑐵𑑅𑐫𑐵 𑐥𑑂𑐫𑐩𑑂𑐴 𑐳𑐶𑑄𑐴 𑐟𑐫𑐵𑐧𑐶𑐮, 𑐀𑐧𑐮𑐫𑑂𑐣𑐶𑐳𑐾𑑄 𑐰 𑐳𑐟𑑅𑐫𑐵 𑐣𑐵𑑄 𑐳𑐶𑑄𑐴𑐳𑐟𑑅 𑐖𑐹𑐰𑐣 𑑋
𑐢𑐩𑑂𑐩𑐵𑑄 𑐳𑐵𑐴𑐸𑐫𑐵 𑐩𑐵𑐴𑐶𑐮𑐵𑐩𑑂𑐴 𑐎𑐵𑐫 𑐬𑐵𑐩𑐣𑐵𑐬𑐵𑐫𑐞 𑐖𑐶𑐩𑐶 𑐧𑐵𑐖𑑂𑐫𑐵, 𑐧𑐵𑐖𑑂𑐫𑐵𑐫𑐵 𑐣𑐶𑐩𑑂𑐴 𑐎𑐵𑐫𑐥𑐶𑑄 𑑋 𑐐𑐞𑐾𑐱𑐡𑐵𑐳 𑐰 𑐬𑐟𑑂𑐣𑐡𑐵𑐳 𑑋 𑐐𑐞𑐾𑐱𑐡𑐵𑐳 𑐖𑐶𑐩𑐶 𑐧𑐵𑐖𑑂𑐫𑐵 𑐖𑐸𑐮 𑐖𑐶𑐩𑐶 𑐟𑐵𑐥𑐵𑑅𑐧𑐵𑐖𑑂𑐫𑐵𑐫𑐵 𑐏𑑃 𑐎𑑂𑐰𑐩𑐔𑐵𑑅𑐣𑐶 𑑋

𑐢𑐩𑑂𑐩𑐵𑑄 𑐳𑐵𑐴𑐸 𑐖𑑄𑐐𑐧𑐴𑐵𑐡𑐸𑐬𑐫𑐵 𑐩𑐶𑐮𑐾𑐖𑐹𑐩𑑂𑐴 𑐥𑐵𑐳𑐵 𑑋 𑐕𑐾𑑃𑐫𑑂 𑐣𑑄 𑐰𑐫𑐵𑐔𑑂𑐰𑐣𑐷𑐩𑑂𑐴, 𑐧𑐣𑐾𑐖𑑂𑐫𑐵𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐂𑐩𑑂𑐴, 𑐩𑐬𑐸𑑄 𑐬𑐵𑐩𑐑𑐵𑐚 𑐎𑐸𑐴𑐵𑑄 𑐰𑐣𑐾𑐐𑐸 𑐐𑐮𑑂𑐮𑐷𑐂 𑐔𑑂𑐰𑐣𑐷𑐩𑑂𑐴, 𑐟𑐳𑐎𑑄 𑐖𑐹 𑐩𑑂𑐴𑐶𑐟𑐾𑐩𑐵𑑅𑐩𑑂𑐴 𑑋 𑐟𑐵𑐥𑐵𑑅𑐀𑐖𑐶𑑄 𑐕𑐎𑑅 𑐳𑐶𑐫𑐵𑐟𑑅𑐐𑐸 𑐎𑑅𑐣𑐶𑐩𑐸𑐳𑑂𑐫𑐵 𑐖𑑄𑐐𑐧𑐴𑐵𑐡𑐸𑐬𑐫𑐵𑐟 𑐣 𑐢𑐎𑐵𑑅 𑐧𑐶𑐄𑐧𑐮𑐫𑑂 𑐰𑑄 𑐎𑐵𑐔𑐵𑐎𑑂𑐎 𑐥𑐸𑐣𑐵𑐟𑑅𑐐𑐸 𑐟𑐎𑑂𑐰𑑅𑐟𑐥𑐸𑐮𑐶 𑐟𑑂𑐰𑐫𑐵 𑐦𑐫𑐵𑐎𑐵𑐮 𑐏𑐣𑐷, 𑐟𑐥𑐸𑐮𑐶 𑐴𑐾 𑐴𑑂𑐰𑐵𑐣𑐵 𑐴𑑂𑐰𑐵𑐣𑐵𑐔𑑂𑐫𑐵𑐟 𑐴𑑃 ! 𑐀𑐮𑐾 ‘𑐎𑐵 𑐕 𑐟𑑅𑐢𑑄𑐩𑑂𑐴 𑐩𑐣𑐹 𑐖𑐸𑐂𑐟𑐶𑐣𑐶’ 𑐢𑐎𑐵𑑅 𑐟𑐵𑐥𑐵𑑅𑐀𑐖𑐶𑑄 𑐐𑐠𑐾 𑐢𑐵𑑅𑐐𑐸 𑐏𑑅 𑐀𑐠𑐾 𑐴𑐾 𑐰 𑐮𑐵 𑐮𑐶𑐥𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐴𑐾 𑐖𑐸𑐮 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐩𑐖𑐹𑐣𑐶𑐧𑐮𑐫𑑂 𑐰 𑐖𑐹𑐮𑐫𑑂 𑐧𑐹𑐐𑐸𑐮𑐶𑑄 𑐢𑑂𑐫𑐧𑐵 𑐩𑐧𑐶𑐄 𑐢𑐎𑐵𑑅 𑐟𑑂𑐫𑐵𑑅𑐥𑐶𑑄𑐳𑑄 𑐰𑐫𑐵𑐟 𑐏𑐶𑐥𑐟𑑄 𑐔𑐶𑐣𑐵𑐟𑑅𑐧𑐮𑐫𑑂 𑐢𑐩𑑂𑐩𑐵𑑄 𑐳𑐵𑐴𑐸𑐣𑑄 𑐢𑑂𑐫𑐧𑐵 𑐥𑐸𑐮𑐵𑑅 𑐟𑑂𑐰𑐟𑐎𑐵𑐧𑐶𑐮 𑑋 𑐮𑐶𑐥𑐵 𑐰𑑃𑐫𑑂 𑐖𑐸𑐖𑐸 𑐬𑐞𑐧𑐴𑐵𑐡𑐸𑐬 𑐱𑐵𑐴𑑄 𑐰𑐫𑐵𑐟 𑐫𑐎𑑂𑐰 𑐴𑐾 𑐎𑐳𑐵𑑅 𑐧𑐶𑐮 𑑋 𑐢𑐬𑐴𑐬𑐵𑑄 𑐟𑐶𑑄𑐣𑑂𑐴𑐸𑐂𑐎𑐹𑐧𑐮𑐫𑑂 𑐢𑐩𑑂𑐩𑐵𑑄 𑐳𑐵𑐴𑐸𑐣𑑄 𑐎𑑂𑐰𑐫𑑂 𑐮𑐵𑐳𑐵 𑐮𑐵𑐣𑐵𑑅 𑐧𑐔𑐾 𑐫𑐵𑐟 𑑋 𑐟𑐸𑐠𑐶𑐂 𑐎𑑂𑐰𑐧𑑂𑐰𑐵𑐎𑐾𑐕𑑂𑐰𑑅𑐧𑐮𑐫𑑂 𑐣𑑄 𑐢𑐩𑑂𑐩𑐵 𑐳𑐵𑐴𑐸𑐣𑑄 𑐎𑑂𑐰𑐫𑑂 𑐧𑑀𑐬𑐵 𑐎𑐵 𑐧𑑀𑐬𑐵 𑐎𑐥𑐵𑐫𑑂 𑐮𑐵𑐣𑐵𑐧𑐶𑐫𑐵𑑅 𑐧𑐔𑐾 𑐫𑐵𑐟 𑑋 𑐠𑑅𑐟 𑐐𑐸𑐞 𑐫𑐵𑐣𑐵𑐟𑑅𑐩𑑂𑐴 𑐖𑐸𑐫𑐵𑑅 𑐠𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐂𑐢𑐸𑑄𑐎𑐵𑑅 𑐡𑐾𑐫𑑂𑐫𑐵 𑐧𑐣𑐾𑐖𑑂𑐫𑐵 𑐫𑐵𑐫𑐾𑐐𑐸 𑐖𑐶𑐩𑑂𑐩𑐵 𑐡𑐎𑑂𑐰𑑄 𑐢𑐩𑑂𑐩𑐵𑑄 𑐳𑐵𑐴𑐸𑐫𑐵𑐟 𑐧𑐶𑐮 𑑋

𑐟𑐶𑐧𑑂𑐧𑐟𑐣𑐵𑐥 𑐮𑑂𑐰𑐵𑐥𑐸 𑐖𑐹𑐧𑐮𑐫𑑂 𑐡𑐎𑑂𑐰𑑄 𑐳𑐿𑐣𑐶𑐎𑐟𑐫𑑂𑐟 𑐢𑐩𑑂𑐩𑐵𑑄 𑐳𑐵𑐴𑐸𑐣𑑄 𑐢𑑂𑐫𑐧𑐵 𑐩𑐎𑐵𑐳𑐾 𑐣𑐎𑐾𑐟𑑂𑐰𑑄𑐎𑐾 𑐫𑐵𑐟 𑑋 𑐄𑐎𑐶𑑄 𑐳𑐬𑐎𑐵𑐬𑑄 𑐢𑐩𑑂𑐩𑐵𑑄 𑐳𑐵𑐴𑐸𑐫𑐵𑐟 ‘𑐳𑐸𑐧𑑂𑐧𑐵’𑐫𑐵 𑐡𑐬𑑂𑐖𑐵 𑐧𑐶𑐮 𑑋 𑐀𑐣𑑄 𑐮𑐶𑐥𑐵 𑐢𑐩𑑂𑐩𑐵𑑄 𑐳𑐵𑐴𑐸𑐫𑐵𑐟 𑐡𑐬𑐰𑐵𑐬𑐫𑑂 𑐟𑐳𑐎𑑄 𑐩𑐵𑐣𑐾 𑐫𑐵𑐂𑐐𑐸 𑐖𑐸𑐮 𑑋 𑐀𑐠𑐾 𑐩𑐵𑐣𑐾 𑐫𑐵𑐂𑐐𑐸 𑐏𑐣𑐵𑑅 𑐡𑐬𑐰𑐵𑐬𑐫𑐵 𑐬𑐵𑐣𑐷𑐥𑐶𑑄𑐟 𑐟𑐳𑐎𑑄 𑐂𑐲𑑂𑐬𑑂𑐫𑐵 𑐖𑐸𑐮𑐏𑐣𑐷 𑑋 𑐕𑐎𑑅 𑐢𑐩𑑂𑐩𑐵𑑄 𑐳𑐵𑐴𑐸 𑐡𑐬𑐰𑐵𑐬𑐫𑑂 𑐠𑑅𑐐𑐸 𑐖𑐣𑐶𑐏𑑄 𑐏𑑂𑐰𑐵𑑅 𑐟𑑂𑐰𑐥𑐸𑐫𑐵𑑅 𑐡𑑂𑐫𑐣𑐵𑐔𑑂𑐰𑐣 𑑋 𑐖𑐸𑐖𑐸𑑄 𑐬𑐵𑐣𑐷𑐥𑐶𑑄𑐟 𑐳𑑅𑐟𑐵𑑅 𑐖𑐣𑐷 𑐄𑐮𑐵𑑅 𑐎𑑂𑐫𑑄𑐧𑐮𑐫𑑂 𑐟𑑂𑐰𑐂𑐳𑐾𑐔𑑂𑐰𑑄𑐐𑐸 𑐳𑑂𑐰𑑄 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣 𑑋

𑐀𑐧𑐮𑐫𑑂𑐣𑐶𑐳𑐾𑑄 𑐢𑐩𑑂𑐩𑐵𑑄 𑐳𑐵𑐴𑐸𑐫𑐵𑐟 ‘𑐐𑐞𑐾𑐡𑑂𑐫𑑅’ 𑐢𑐎𑐵𑑅 𑐗𑐣 𑐩𑐵𑐣𑐾 𑐫𑐵𑐟 𑑋 𑐰 𑐂𑐮𑐫𑑂𑐫𑐵 𑐩𑐾𑐐𑐸 𑐕𑐟𑐵 𑐏𑑃 𑐣𑑄 𑐎𑐣𑐾 𑑋 𑐖𑐶𑐩𑐶𑐐𑐸 𑐕𑐾𑑃 𑐟𑐴𑐧𑐶𑐮, 𑐧𑐣𑐾𑐖𑑂𑐫𑐵𑐫𑐵 𑐢𑑂𑐫𑐧𑐵 𑐳𑑂𑐰𑐠𑐣𑐷𑐐𑐸 𑐠𑐵𑐫𑑂 𑐖𑐹𑐐𑐸𑐮𑐶𑑄 ‘𑐟𑐴𑐧𑐶𑐮’ 𑐣𑐵𑑄 𑐖𑐹𑐐𑐸 𑐢𑐵𑐂 𑑋 𑐢𑑂𑐫𑐧𑐵 𑐳𑑂𑐰𑐠𑐣𑐷𑐐𑐸 𑐠𑐵𑐫𑑂 𑐢𑐸𑐎𑐹 𑐡𑐸, 𑐕𑐾𑑃𑐫𑐵 𑐄𑐟𑑂𑐟𑐬𑐥𑐵𑐏𑐾 𑐮𑐵𑑅 𑑋 𑐀𑐣𑐫𑐵 𑐳𑐾𑐦𑐫𑑂 𑐣𑑂𑐴𑐶𑑄𑐣𑑂𑐴𑐶𑑄 𑐡𑑂𑐫𑑅 𑐥𑐸𑐖𑑂𑐫𑐵𑐫𑐾𑐐𑐸 𑐔𑐮𑐣 𑑋 𑐳𑐾𑐦 𑐮𑐶𑐎𑑂𑐎 𑐣𑐵𑐐 𑐕𑐩𑑂𑐴 𑐔𑑂𑐰𑑃𑐔𑑂𑐰𑐣𑐷𑐐𑐸 𑑋 𑐰 𑐣𑐵𑐐𑐫𑐵 𑐣𑑂𑐴𑐶𑐥𑑂𑐫𑑄 𑐔𑑂𑐰𑐎𑐵𑐫𑐾 𑐮𑐸𑑃 𑐕𑐟𑑂𑐫𑐵𑑅𑐔𑐵 𑐡𑐫𑐵𑐔𑑂𑐰𑐣𑐷 𑑋

𑐀𑐣 𑐡𑐸𑐣𑐾 𑐡𑑂𑐫𑑅 𑐥𑐸𑐖𑑂𑐫𑐵𑐂𑐩𑑂𑐴𑐾𑐳𑐶𑐣𑑄 𑐡𑑂𑐫𑑅 𑐥𑐸𑐖𑑂𑐫𑐵𑐫𑐾𑐢𑐸𑑄𑐎𑐵𑑅 𑐰 𑐣𑐵𑐐𑐫𑐵 𑐣𑑂𑐴𑐶𑐥𑑂𑐫𑑄 𑐔𑑂𑐰𑐎𑐵𑐫𑑂 𑐡𑐸𑐐𑐸 𑐮𑐸𑑃𑐟𑑂𑐫𑐵𑑅 𑐧𑐕𑐶 𑐖𑐎 𑐢𑑂𑐫𑐣𑐵𑑅 𑐎𑐵𑐂𑐐𑐸 𑐔𑐮𑐣 𑑋 𑐮𑐸𑑃 𑐕𑐟𑑂𑐫𑐵𑐔𑐵𑐫𑑂 𑐧𑐕𑐶 𑐖𑐎 𑐢𑑂𑐫𑐣𑐵 𑐎𑐵𑐫𑐾𑐐𑐸 𑐢𑐎𑐵𑑅 𑐕𑐾𑑃𑐫𑑂 𑐡𑐎𑑂𑐰𑐳𑐶𑐣𑑄 𑐳𑐶𑐄 𑑋 𑐕𑐎𑑅 𑐡𑐹 𑐩𑐵𑑅𑐧𑐮𑐫𑑂 𑐧𑐶𑐫𑐵𑐕𑑂𑐰𑐫𑐾𑐢𑐸𑑄𑐎𑐹𑐩𑑂𑐴 𑐕𑐩𑑂𑐴 𑐩𑑂𑐴𑑂𑐫𑐵𑐫𑑂𑐩𑐔𑐵𑐫𑐵𑐟 𑐳𑑅𑐟𑐵𑑅 𑐢𑐸𑐎𑐸𑐟𑐶𑐂 𑐡𑑂𑐫𑑅 𑐥𑐸𑐖𑑂𑐫𑐵𑐎𑐾𑐧𑐶𑐮 𑑋

𑐡𑑂𑐫𑑅 𑐥𑐸𑐖𑑂𑐫𑐵𑑅𑐰𑑅𑐩𑐴 𑐩𑑂𑐴𑑂𑐫𑐵𑐫𑑂𑐩𑐔𑐵𑑄 𑐡𑐹 𑐧𑑂𑐫𑐣𑐷𑐐𑐸 𑐕𑐣𑑂𑐴𑐸 𑐣𑑂𑐴𑑂𑐫𑑅 ‘𑐁𑑅 𑐎𑐣𑑂𑐴𑐫𑑂𑐣𑐶𑐳𑐾𑑄 𑐖𑐶𑐟𑑅 𑐠𑐣 𑐡𑑂𑐫𑑅 𑐥𑐸𑐖𑑂𑐫𑐵𑐎𑐷 𑐣𑑄 𑐩𑐏𑐸𑐟, 𑐣𑑂𑐴𑐶𑑄𑐣𑑂𑐴𑐶𑑄 𑐮𑐸𑑃 𑐕𑐟𑑂𑐫𑐵𑑅𑐔𑐵 𑐎𑐫𑐵𑐔𑑂𑐰𑐣𑐵𑐐𑐸 𑐣𑑄 𑐎𑐵𑐫𑐾𑐏𑐣𑐷 𑐩𑐏𑐸𑐟, 𑐧𑐬𑐸 𑐠𑑁𑑄 𑐴𑐾 𑐦𑐸𑐎𑑂𑐎𑑄 𑐢𑑂𑐫𑐣𑐵 𑐎𑐵𑐫𑐾’ 𑐢𑐎𑐵𑑅 𑐡𑑂𑐫𑑅 𑐥𑐸𑐖𑑂𑐫𑐵𑐫𑐾𑐢𑐸𑑄𑐎𑐵𑑅 𑐣𑐵𑐐𑐫𑐵 𑐣𑑂𑐴𑐶𑐥𑑂𑐫𑑄 𑐔𑑂𑐰𑐎𑐵𑐫𑑂 𑐡𑐸𑐐𑐸 𑐮𑐸𑑃 𑐕𑐟𑑂𑐫𑐵𑑅𑐔𑐵 𑐦𑐸𑐎𑑂𑐎𑑄 𑐢𑑂𑐫𑐣𑐵𑐎𑐵𑐮 𑑋 𑐧𑐕𑐶 𑐖𑐎 𑐢𑑂𑐫𑐣𑐵 𑐎𑐵𑐫𑐾𑐐𑐸 𑐢𑐎𑐵𑑅 𑐳𑐶𑐄𑐳𑐵𑑄 𑐮𑑀𑐨𑐷 𑐖𑐸𑐫𑐵𑑅 𑐦𑐸𑐎𑑂𑐎𑑄 𑐢𑑂𑐫𑐣𑐵 𑐎𑐵𑑅𑐧𑐮𑐫𑑂 𑐣𑐵𑐐𑐫𑐵 𑐣𑑂𑐴𑐶𑐥𑑂𑐫𑐣𑑄 𑐴𑐶 𑐰𑐮 𑑋 𑐀𑐮𑐾 𑐰 𑐣𑐵𑐐𑑄 ‘𑐠𑑂𑐰 𑐟𑐴𑐧𑐶𑐮𑐫𑐵 𑐩𑑂𑐴𑑂𑐫𑐵𑐫𑑂𑐩𑐳𑑂𑐟𑐫𑑂𑐟 𑐐𑐧𑐮𑐾𑑄 𑐔𑐶𑐟𑐵𑐳𑐹 𑐩𑐡𑐫𑐾𑐩𑐵’ 𑐢𑐎𑐵𑑅 𑐳𑐬𑐵𑑅 𑐧𑐶𑐮 𑑋

𑐀𑐧𑐮𑐫𑑂𑐣𑐶𑐳𑐾𑑄 𑐢𑐸𑐎𑐸𑐟𑐶𑐂 𑐣𑐵𑐐 𑐣𑑄 𑐔𑑂𑐰𑑄 𑐩𑐰𑐮 𑑋 𑐖𑐶𑐩𑐶 𑐧𑐵𑑅𑐫𑐵 𑐥𑐵𑐮𑐫𑑂 𑐧𑐣𑐾𑐖𑑂𑐫𑐵 𑐳𑑂𑐫𑐣𑐵𑑅 𑐖𑐶𑐩𑐶𑐐𑐸 𑐕𑐾𑑃 𑐟𑐵𑐂𑐖𑐵𑐟 𑐖𑐸𑐮, 𑐳𑐬𑐎𑐵𑐬𑑄 𑐕𑐾𑑃𑐫𑑂 𑐟𑐵𑐮𑑄 𑐐𑑂𑐰𑐫𑐵𑐧𑐶𑐮 𑑋 𑐖𑐶𑐥𑐶𑑄 𑐳𑐎𑐮𑐾𑑄 𑐧𑐵𑑅 𑐣𑑄 𑐴𑐾 𑐡𑐫𑐾𑐎𑐹𑐐𑐸 𑐚𑐾𑐎𑐸 𑐡𑑀𑐨𑐵𑐣𑐫𑐵 𑐳𑐟𑐮𑐫𑑂 𑐔𑑂𑐰𑑄 𑐰𑐣𑐾𑐩𑐵𑐮 𑑋 𑐕𑐐𑐹 𑐮𑐵𑐏 𑐏𑑂𑐰𑐷𑐡𑑂𑐰𑑅 𑐥𑐸𑐮𑐾𑐩𑐵𑑅𑐐𑐸 𑐏𑑅, 𑐏𑑂𑐰𑐷𑐡𑑂𑐰𑑅 𑐥𑐸𑐮𑐾 𑐮𑑂𑐫𑑄 𑐡𑐸𑐧𑐮𑐫𑑂 𑐟𑐵𑐂𑐖𑐵𑐟𑐷 𑐮𑐶𑐟𑐎𑐵𑐮 𑑋 𑐟𑐬 𑐖𑐶𑐩𑐶 𑐧𑐵𑑅 𑐟𑐴𑐧𑐶𑐮𑐫𑑂 𑐩𑐔𑑂𑐰𑑃𑐳𑐾 𑐩𑐬𑐸𑐴𑐶𑐟𑐶𑐂 𑐳𑐵 𑐮𑐴𑐷𑐐𑐸 𑐳𑐵𑐐𑐮𑐫𑑂 𑐔𑑂𑐰𑑄 𑐰𑐣 𑑋 𑑕 𑐳𑐵𑐮𑐫𑑂 𑐧𑐵𑑅 𑐀𑐣 𑐴𑐾 𑐩𑑄𑐟 𑑋

𑐀𑐧𑐮𑐫𑑂 𑐣𑑂𑐴𑐫𑑂𑐳𑑅 𑐳𑐵𑐫𑑂𑐩𑐶 𑐳𑐣𑐵𑑄 𑐔𑑂𑐰𑐫𑐾𑐎𑐮, 𑐡𑐎𑑂𑐰𑑄 𑐳𑐣𑐵𑑅 𑐰𑐮 𑑋 𑐖𑐶𑐩𑐶 𑐩𑐵𑑄 𑐣𑑂𑐴𑐵𑐥𑐵 𑐴𑐾 𑐩𑐡𑐸𑐐𑐸 𑑋 𑐖𑐶 𑐟𑑅𑐢𑐶𑐎𑑅 𑐖𑐸𑐂𑐎𑐵𑑅𑐟𑐶𑐣𑐶 𑐎𑐵𑐣𑑂𑐟𑐶 𑐃𑐱𑑂𑐰𑐬𑐷 𑐳𑑂𑐎𑐸𑐮𑐫𑑂 𑐁𑐏𑑅 𑐧𑑂𑐰𑑄 𑐰𑐣𑐵 𑑋 𑑑𑑙 𑐳𑐵𑐮𑐫𑑂 𑐊𑐳𑐊𑐮𑐳𑐷 𑐥𑐵𑐳 𑐫𑐵𑐣𑐵𑑅 𑐁𑐂𑐊 𑐟𑐎 𑐧𑑂𑐰𑐣𑐵 𑑋 𑐥𑑂𑐬𑑁𑐝 𑐎𑐎𑑂𑐲𑐵𑐫𑑂 𑐁𑐏𑑅 𑐧𑑂𑐰𑑄𑐎𑐵𑐧𑐮𑐫𑑂 𑐮𑐕𑐶𑐫𑐵 𑐣𑐷𑐣𑑂𑐫𑐵𑐟𑐎𑐵 𑐟𑐮𑐧 𑑋 𑐖𑐶𑐩𑐶 𑐩𑐬𑐸𑐴𑐶𑐟𑐶𑐂 𑐮𑑅 𑐎𑐵𑑅𑐰𑐣𑐾𑐐𑐸 𑑋

𑐩𑐬𑐸𑐳𑐟𑑅 𑐟𑑅𑐮𑐫𑑂 𑐥𑐸𑐏𑐹 𑐡𑐸 𑑋 𑐀𑐣𑐫𑐵 𑐮𑑅 𑐩𑐬𑐸𑐴𑐶𑐟𑐶𑐂 𑐰𑐣𑐷𑐐𑐸 𑐢𑐵𑐂 𑑋 𑐰 𑐥𑐸𑐏𑐹 𑐟𑑂𑐰𑑅𑐥𑐸𑐣𑐵𑑅 𑐡𑑂𑐫𑑅𑐣𑐾 𑐩𑐣𑑂𑐡𑑅 𑐔𑑂𑐰𑐫𑐵𑑅 𑐕𑐩𑐵 𑐳𑐶𑐩𑐵𑐫𑐵 𑐳𑐶𑑄 𑐡𑐫𑐾𑐎𑐹𑐐𑐸 𑐳𑐟𑑅 𑐖𑐹𑐐𑐸𑐮𑐶𑑄 𑐎𑐵𑐲𑑂𑐛𑐩𑐞𑑂𑐜𑐥 𑐣𑑄 𑐢𑐵𑑅 𑑋𑐣𑑂𑐴𑐵𑐥𑐵 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐹𑐎𑐸𑐣𑑂𑐴𑐸 𑐎𑐵𑐲𑑂𑐛𑐩𑐞𑑂𑐜𑐥 𑐥𑐶𑐣𑐾 𑐳𑑂𑐰𑐵𑐴𑐵𑐣𑐾 𑐟𑐫𑐵𑑅 𑐩𑐣𑐹 𑐕𑐩𑑂𑐴 𑐔𑑂𑐰𑐫𑑂 𑐠𑐴𑐵𑑄 𑐰𑐣𑐵𑑅 𑐥𑑂𑐫𑐏𑐾𑐬𑑄 𑐫𑑅𑐩𑐬𑐶 𑐎𑐸𑐬𑑂𑐎𑐷𑐐𑐸 𑐔𑐮𑐣 𑐡𑐸𑐐𑐸, 𑐁𑑅 𑐰 𑐔𑐮𑐣 𑐩𑐡𑐫𑐾𑐢𑐸𑑄𑐎𑐮 𑑋