𑐕𑐰𑐵𑑅𑐫𑑄𑐎𑑄 𑐰𑐶𑐱𑑂𑐰 𑐬𑐎𑑂𑐟𑐡𑐵𑐟𑐵 𑐡𑐶𑐰𑐳 𑐴𑐣𑐷𑐐𑐸
𑐫𑐾𑑃- 𑐣𑐾𑐥𑐵𑐮 𑐧𑑂𑐮𑐜 𑐜𑑀𑐣𑐬𑑂𑐳 𑐊𑐱𑑀𑐳𑐶𑐫𑐳𑐣 (𑐧𑑂𑐮𑑀𑐡𑐵𑐣𑑄) 𑐕𑐰𑐵𑑅𑐫𑑄𑐎𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐰𑐶𑐱𑑂𑐰 𑐬𑐎𑑂𑐟𑐡𑐵𑐟𑐵 𑐡𑐶𑐰𑐳 𑐴𑐣𑐷𑐐𑐸 𑐖𑐹𑐐𑐸 𑐡𑐸 𑑋 𑐧𑑂𑐮𑑀𑐡𑐵𑐣𑑄 𑐁𑑅 𑐣𑐎𑐟𑐶𑐣𑐶 𑐕𑐐𑐹 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣 𑐫𑐵𑐳𑐾𑑄 𑐄𑐎𑐶𑐫𑐵 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋
𑐧𑑂𑐮𑑀𑐡𑐵𑐣𑐫𑐵 𑐩𑐴𑐵𑐳𑐔𑐶𑐰 𑐃. 𑐳𑐵𑐣𑐸𑐧𑐵𑐧𑐸 𑐥𑑂𑐬𑐖𑐵𑐥𑐟𑐶𑑄 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐳𑑂𑐰𑐫𑐩𑐳𑐾𑐰𑐷 𑐴𑐶𑐡𑐵𑐣𑐫𑑂 𑐧𑑂𑐮𑑀𑐡𑐵𑐣 𑐰 𑐧𑑂𑐮𑑀𑐡𑐵𑐣𑐫𑐵 𑐨𑐹𑐩𑐶𑐎𑐵 𑐰𑐶𑐲𑐫𑐫𑑂 𑐕𑐐𑐹 𑐖𑑂𑐫𑐵𑐥𑑁 𑐣𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐩𑐣𑐹𑐟 𑐴𑐶 𑐰𑐶𑐣𑐵 𑐩𑑂𑐰𑐵𑐫𑐾 𑐩𑐦𑐂𑐐𑐸 𑐰 𑐄𑐥𑐔𑐵𑐬𑐫𑐵 𑐗𑑂𑐰𑐮𑐫𑑂 𑐴𑐶𑐫𑐵 𑐁𑐰𑐱𑑂𑐫𑐎 𑐖𑐸𑐂𑐥𑐶𑑄 𑐩𑐣𑐹𑐟𑐫𑑂𑐟 𑐩𑐣𑐹𑐫𑐵 𑐴𑐾 𑐴𑐶 𑐧𑐵𑐴𑐾𑐎𑑄 𑐩𑐾𑐥𑐶𑑄 𑐳𑐸𑐣𑐵𑐣𑑄 𑐧𑐔𑐾 𑐫𑐵𑐫𑐾 𑐦𑐂𑐐𑐸𑐮𑐶𑑄 𑐴𑐶𑐡𑐵𑐣𑐫𑐵 𑐩𑐴𑐟𑑂𑐰 𑐁𑐥𑐵𑐮𑑄 𑐡𑐸 𑐢𑐫𑐵𑐡𑐶𑐮 𑑋
𑐧𑑂𑐮𑑀𑐡𑐵𑐣𑑄 𑐴𑐶𑐡𑐵𑐣 𑐫𑐵𑐂𑐥𑐶𑑄 𑐳𑑄𑐳𑑂𑐠𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐥𑐴𑐮 𑐫𑐵𑐫𑐾𑐐𑐸, 𑐳𑐬𑑀𑐎𑐵𑐬𑐰𑐵𑐮𑐵 𑐡𑐎𑑂𑐰𑑄 𑐣𑐶𑐎𑐵𑐫𑐫𑐵 𑐳𑐴𑐨𑐵𑐐𑐶𑐟𑐵𑐫𑑂 𑐂𑐮𑐫𑑂𑐰𑑂𑐫𑐮𑐫𑑂
𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐰 𑐳𑐩𑐣𑑂𑐰𑐫 𑐫𑐵𑐫𑐾𑐐𑐸, 𑐴𑐶𑐡𑐵𑐣 𑐳𑐩𑑂𑐧𑐣𑑂𑐢𑐷 𑐄𑐟𑑂𑐥𑑂𑐬𑐾𑐬𑐞𑐵 𑐧𑐷𑐩𑐵𑑅𑐐𑐸, 𑐱𑐮𑑂𑐫𑐎𑑂𑐬𑐶𑐫𑐵 𑐫𑐵𑐂𑐐𑐸 𑐀𑐳𑑂𑐥𑐟𑐵𑐮𑐟𑐫𑑂𑐳𑑄 𑐣𑑄 𑐴𑐶𑐡𑐵𑐣𑐫𑐵 𑐣𑐶𑑄𑐟𑐶𑑄 𑐰𑐶𑐱𑐾𑐲 𑐥𑐴𑐮 𑐫𑐵𑐫𑐾𑐩𑐵𑑅𑐐𑐸 𑐠𑑁𑑄𑐫𑐵 𑐁𑐰𑐱𑑂𑐫𑐎 𑐖𑐹𑐐𑐸 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋
𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐧𑑂𑐮𑑀𑐡𑐵𑐣𑐫𑐵 𑐎𑐾𑐣𑑂𑐡𑑂𑐬𑐷𑐫 𑐎𑐵𑐬𑑂𑐫𑐰𑐵𑐴𑐎 𑐀𑐢𑑂𑐫𑐎𑑂𑐲 𑐬𑐩𑐾𑐱𑐢𑑂𑐰𑐖 𑐧𑐳𑑂𑐣𑐾𑐟𑑄 𑐰𑐶𑐣𑐵 𑐱𑑀𑐢𑐨𑐬𑑂𑐣𑐵 𑐴𑐶 𑐄𑐥𑐮𑐧𑑂𑐢 𑐫𑐵𑐎𑐾𑐟 𑐠𑑅𑐥𑐶𑑄 𑐳𑐦𑐮 𑐖𑐹𑐳𑐵𑑄 𑐣𑑄 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐴𑐶𑐡𑐵𑐣 𑐫𑐵𑐂𑐥𑐶𑐣𑐶𑐐𑐸 𑐮𑑂𑐫𑐵𑑅 𑐩𑑂𑐴𑑀 𑐖𑐹𑐐𑐸 𑐰 𑐴𑐶𑐫𑐵 𑐩𑐵𑐐 𑐢𑐵𑑅𑐳𑐵 𑐀𑐥𑑂𑐰𑑅𑐐𑐸𑐮𑐶𑑄 𑐫𑐵𑐣𑐵𑑅 𑐄𑐎𑐶𑐫𑐵 𑐥𑐹𑐬𑐵 𑐫𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋
𑐬𑐶𑐥𑑀𑐬𑑂𑐚𑐳 𑐎𑑂𑐮𑐧𑐫𑐵 𑐀𑐢𑑂𑐫𑐎𑑂𑐲 𑐆𑐲𑐶 𑐢𑐩𑐮𑐵𑑄 𑐁𑐰𑑄𑐮𑐶𑑄 𑐠𑐩𑑂𑐴𑑄 𑐣𑑄 𑐳𑑂𑐰𑐮𑐵𑐫𑑂 𑐕𑐎𑑅 𑐴𑐶𑐡𑐵𑐣 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑐳𑐾𑑄 𑐴𑐬𑐾𑐎 𑐰𑐵𑐮𑐫𑑂 𑐬𑐶𑐥𑑀𑐬𑑂𑐚𑐳 𑐎𑑂𑐮𑐧𑐫𑑂 𑐴𑐶𑐡𑐵𑐣 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵𑐗𑑂𑐰𑑅𑐟 𑐟𑐫𑐵 𑐰𑐣𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋
𑐧𑑂𑐮𑑀𑐡𑐵𑐣𑐫𑐵 𑐎𑑀𑐲𑐵𑐢𑑂𑐫𑐎𑑂𑐲 𑐩𑐔𑐎𑐵𑐖𑐷 𑐩𑐴𑐬𑑂𑐖𑐣𑑄 𑐰𑐶𑐱𑑂𑐰 𑐬𑐎𑑂𑐟𑐡𑐵𑐟𑐵 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐳𑑄𑐳𑑂𑐠𑐵𑐥𑐵𑐏𑐾𑑄 𑐖𑐸𑐂𑐐𑐸 𑐕𑐰𑐵𑑅𑐫𑑄𑐎𑑄𑐫𑐵 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋
𑐧𑑂𑐮𑑀𑐡𑐵𑐣𑐫𑐵 𑐳𑑄𑐳𑑂𑐠𑐵𑐥𑐎 𑐡𑐸𑐖𑑅 𑐀𑐬𑑂𑐖𑐸𑐣𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑑄 𑐠𑐩𑑂𑐴𑑄 𑐁𑐟𑐎 𑑑𑑖𑑓 𑐎𑑂𑐰𑑅 𑐴𑐶𑐡𑐵𑐣 𑐫𑐵𑐫𑐾𑐢𑐸𑑄𑐐𑐸 𑐟𑐬 𑐠𑑅𑐟 𑐀𑐖𑑂𑐫𑐵𑑅𑐐𑐸 𑐕𑐸𑑄 𑐣𑑄 𑐎𑐩𑐖𑑀𑐬𑐷𑐫𑐵 𑐀𑐣𑐸𑐨𑐰 𑐩𑐖𑐹𑐐𑐸 𑐢𑐵𑐳𑐾𑑄 𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑐶𑑄 𑑔𑑕𑑐 𑐥𑑂𑐰𑐵𑐂𑐣𑑂𑐚 𑐴𑐶𑐫𑐵 𑐩𑐵𑐐 𑐖𑐸𑐫𑐵𑐔𑑂𑐰𑑄𑐐𑐸 𑐟𑐬 𑐴𑐶 𑐳𑑄𑐎𑐮𑐣 𑐢𑐵𑑅𑐳𑐵 𑑑𑑐𑑐 𑐥𑑂𑐰𑐵𑐂𑐣𑑂𑐚 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐱𑑀𑐢𑐨𑐬𑑂𑐣𑐵𑐫𑐵 𑐰𑐶𑐎𑐮𑑂𑐥 𑐩𑐡𑐸 𑐢𑐫𑐵𑐡𑐶𑐮 𑑋
LEAVE YOUR COMMENTS