Read news in NepalBhasa text-- www.hamroschool.com BACK 𑐀𑐩𑐾𑐬𑐶𑐎𑐵𑐫𑐵𑐟 𑐖𑐷 𑐳𑐾𑐨𑐣𑐥𑐵𑐏𑐾𑑄 𑐰𑑂𑐫𑐵𑐥𑐵𑐬 𑐫𑐸𑐡𑑂𑐢 𑐖𑐸𑐂𑐐𑐸 𑐏𑑂𑐫𑐵𑐔𑑂𑐰𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐀𑐩𑐾𑐬𑐶𑐎𑐵𑐫𑐵𑐟 𑐖𑐷 𑐳𑐾𑐨𑐣𑐥𑐵𑐏𑐾𑑄 𑐰𑑂𑐫𑐵𑐥𑐵𑐬 𑐫𑐸𑐡𑑂𑐢 𑐖𑐸𑐂𑐐𑐸 𑐏𑑂𑐫𑐵𑐔𑑂𑐰𑑅

𑐊𑐖𑐾𑐣𑑂𑐳𑐷÷ 𑐱𑐎𑑂𑐟𑐶𑐱𑐵𑐮𑐷 𑐡𑐾𑐫𑑂𑐟𑐫𑑂 𑐳𑑄𑐐𑐛𑐣 𑐖𑐷 𑐳𑐾𑐨𑐾𑐣𑐫𑐵 𑐀𑐬𑑂𑐠𑐩𑐣𑑂𑐟𑑂𑐬𑐷𑐟𑐫𑑂𑐳𑑄 𑐀𑐩𑐾𑐬𑐶𑐎𑐵𑐫𑐵𑐟 𑐁𑑅 𑐰𑑂𑐫𑐵𑐥𑐵𑐬 𑐫𑐸𑐡𑑂𑐢 𑐖𑐸𑐂𑐐𑐸 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐡𑐸 𑑋 𑐎𑑂𑐫𑐵𑐣𑐜𑐵𑐫𑐵 𑐰𑐶𑐳𑑂𑐮𑐬𑐫𑑂 𑐖𑐹𑐐𑐸 𑐖𑐷 𑐳𑐾𑐨𑐾𑐣𑐫𑐵 𑐧𑐿𑐛𑐎𑐫𑑂 𑐀𑐩𑐾𑐬𑐶𑐎𑐵𑑄 𑐳𑑂𑐚𑐶𑐮 𑐰 𑐊𑐮𑑂𑐩𑐸𑐣𑐶𑐫𑐩𑐫𑑂 𑐎𑐬 𑐀𑐥𑑂𑐰𑐫𑐾𑐎𑐹𑐐𑐸 𑐏𑑃𑐫𑐵𑐟 𑐎𑐫𑐵𑑅 𑐀𑐬𑑂𑐠𑐩𑐣𑑂𑐟𑑂𑐬𑐷𑐟𑐫𑑂𑐳𑑄 𑐠𑑂𑐰 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐡𑐸 𑑋 𑐖𑐷 𑐳𑐾𑐨𑐾𑐣𑐫𑑂 𑐡𑐸𑐠𑑂𑐫𑐵𑑅𑐐𑐸 𑐣𑑂𑐴𑐫𑑂𑐐𑐹 𑐡𑐾𑐫𑑂𑐫𑐵 𑐀𑐬𑑂𑐠𑐩𑐣𑑂𑐟𑑂𑐬𑐷𑐟𑐫𑑂 𑐧𑐿𑐛𑐎𑐫𑑂 𑐀𑐩𑐾𑐬𑐶𑐎𑐵 𑐮𑐶𑐳𑐾 𑐰𑑂𑐫𑐵𑐥𑐵𑐬 𑐫𑐸𑐡𑑂𑐢 𑐥𑐣𑐾𑐐𑐸 𑐣𑐶𑑄𑐟𑐶𑑄 𑐕𑐸𑑄 𑐃 𑐖𑐎 𑐮𑑂𑐫𑑄 𑐡𑐣𑐶𑐐𑐸 𑐏𑑂𑐫𑐵𑐔𑑂𑐰𑑅 𑐣𑑄 𑐧𑐶𑐄𑐐𑐸 𑐏𑑅 𑑋
𑐧𑐿𑐛𑐎𑐫𑑂 𑐂𑐫𑐸 𑐰 𑐎𑑂𑐫𑐵𑐣𑐜𑐵𑑄 𑐣𑑄 𑐀𑐩𑐾𑐬𑐶𑐎𑐷 𑐣𑐷𑐟𑐶𑐫𑐵 𑐥𑑂𑐬𑐟𑐶𑐎𑐵𑐬 𑐫𑐵𑐫𑐾𑐐𑐸 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐏𑑅𑐳𑐵 𑐦𑑂𑐬𑐵𑐣𑑂𑐳𑑄 𑐕𑐸𑑄 𑐣𑑂𑐴𑐶 𑐮𑐶𑐥𑐵 𑐴𑐾 𑐰𑑂𑐫𑐵𑐥𑐵𑐬 𑐫𑐸𑐡𑑂𑐢 𑐳𑐸𑐬𑐸 𑐖𑐸𑐂𑐐𑐸 𑐥𑑂𑐬𑐟𑐶 𑐳𑐎𑐳𑐶𑐫𑐵 𑐢𑑂𑐫𑐵𑐣𑐎𑐬𑑂𑐲𑐞 𑐫𑐵𑐎𑐹𑐐𑐸 𑐏𑑅 𑑋
𑐩𑐾𑐏𑐾 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐚𑑂𑐬𑐩𑑂𑐥𑑄 𑐢𑐵𑑅𑐳𑐵 𑐀𑐗 𑐣𑑄 𑐠𑑅𑐐𑐸 𑐣𑐶𑐬𑑂𑐞𑐫𑐫𑐵 𑐧𑐔𑐵𑐄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐚𑑂𑐬𑐩𑑂𑐥𑑄 𑐟𑑅𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐩𑐾𑐩𑐾𑐐𑐸 𑐡𑐾𑐱𑑄 𑐰𑑂𑐫𑐵𑐥𑐵𑐬 𑐏𑑂𑐫𑐮𑐫𑑂 𑐀𑐩𑐾𑐬𑐶𑐎𑐵𑐫𑐵 𑐱𑑀𑐲𑐞 𑐫𑐵𑐣𑐵𑐔𑑂𑐰𑑄𑐐𑐸 𑐚𑑂𑐰𑐶𑐚 𑐫𑐵𑑅𑐐𑐸 𑐡𑐸 𑑋 𑐚𑑂𑐬𑐩𑑂𑐥𑑄 𑐁𑑅𑐫𑐵 𑐎𑐬 𑐣𑐷𑐟𑐶𑑄 𑐀𑐩𑐾𑐬𑐶𑐎𑐷 𑐳𑑂𑐚𑐶𑐮 𑐄𑐟𑑂𑐥𑐵𑐡𑐎𑐟𑐫𑑂𑐟 𑐳𑑄𑐬𑐎𑑂𑐲𑐞 𑐫𑐵𑐂𑐐𑐸 𑐣𑑂𑐴𑑂𑐫𑐠𑑃𑐳𑐾𑑄 𑐠𑑂𑐰 𑐬𑐵𑐲𑑂𑐚𑑂𑐬𑐶𑐫 𑐳𑐸𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐟𑐬 𑐧𑐿𑐛𑐎𑐫𑑂 𑐳𑐴𑐨𑐵𑐐𑐷 𑐀𑐩𑐾𑐬𑐶𑐎𑐷 𑐀𑐬𑑂𑐠𑐩𑐣𑑂𑐟𑑂𑐬𑐷𑑄 𑐢𑐵𑑅𑐳𑐵 𑐀𑐩𑐾𑐬𑐶𑐎𑐵𑑄 𑐰𑐶𑐱𑑂𑐰 𑐀𑐬𑑂𑐠𑐟𑐣𑑂𑐟𑑂𑐬𑐫𑐵 𑐣𑐾𑐟𑐺𑐟𑑂𑐰 𑐟𑑂𑐰𑑅𑐟𑐹𑐐𑐸 𑐩𑐡𑐸𑐣𑐶 𑐢𑐵𑐳𑐾𑑄 𑐩𑐾𑐩𑐾𑐐𑐸 𑐡𑐾𑐱𑑄 𑐎𑐫𑐵𑐔𑑂𑐰𑑄𑐐𑐸 𑐔𑐶𑐣𑑂𑐟𑐵𑐫𑐵𑐟 𑐬𑐵𑐲𑑂𑐚𑑂𑐬𑐥𑐟𑐶 𑐚𑑂𑐬𑐩𑑂𑐥𑐫𑐵𑐠𑐵𑐫𑑂 𑐠𑑂𑐫𑑄𑐎𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐧𑐶𑐴𑐷𑐰𑐵 𑐖𑐎 𑐀𑐩𑐾𑐬𑐶𑐎𑐷 𑐰𑐵𑐞𑐶𑐖𑑂𑐫𑐩𑐣𑑂𑐟𑑂𑐬𑐷𑑄 𑐳𑑂𑐚𑐶𑐮𑐫𑑂 𑑒𑑕 𑐥𑑂𑐬𑐟𑐶𑐱𑐟 𑐰 𑐊𑐮𑑂𑐩𑐸𑐣𑐶𑐫𑐩𑐫𑑂 𑑑𑑐 𑐥𑑂𑐬𑐟𑐶𑐱𑐟 𑐎𑐬 𑐀𑐥𑑂𑐰𑐫𑐾𑐎𑐵𑐐𑐸 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐰𑑅𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋
𑐂𑐫𑐸, 𑐎𑑂𑐫𑐵𑐣𑐜𑐵 𑐰 𑐩𑐾𑐎𑑂𑐳𑐶𑐎𑑀𑑄 𑐠𑐐𑐸𑐣𑐾 𑐠𑑂𑐫𑑄𑐩𑐠𑑂𑐫𑑄 𑑒𑑓 𑐀𑐬𑑂𑐧 𑐜𑐮𑐬 𑐧𑐬𑐵𑐧𑐬𑐫𑐵 𑐳𑑂𑐚𑐶𑐮 𑐰 𑐊𑐮𑑂𑐩𑐸𑐣𑐶𑐫𑐩 𑐀𑐩𑐾𑐬𑐶𑐎𑐵𑐫𑑂 𑐣𑐶𑐬𑑂𑐫𑐵𑐟 𑐫𑐵𑑅𑐐𑐸 𑐏𑑅 𑑋 𑐠𑑂𑐰 𑐠𑑂𑐰𑐫𑐵𑑄 𑐣𑑂𑐴𑑂𑐫𑑅 𑐣𑐶𑐬𑑂𑐫𑐵𑐟 𑐫𑐵𑑅𑐐𑐸 𑑔𑑘 𑐀𑐬𑑂𑐧 𑐜𑐮𑐬𑐫𑐵 𑐠𑑂𑐫𑑄𑐩𑐠𑑂𑐫𑑄 𑐧𑐕𑐶
𑐖𑐎 𑐏𑑅 𑑋
𑐚𑑂𑐬𑐩𑑂𑐥𑑄 𑐥𑑂𑐬𑐱𑐵𑐳𑐣𑑄 𑐊𑐮𑑂𑐩𑐸𑐣𑐶𑐫𑐩 𑐰 𑐳𑑂𑐚𑐶𑐮𑐫𑑂 𑐎𑐬 𑐀𑐥𑑂𑐰𑐫𑐾𑐎𑐹𑐐𑐸 𑐎𑐵𑐬𑐞𑑄 𑐂𑐫𑐸, 𑐎𑑂𑐫𑐵𑐣𑐜𑐵 𑐰 𑐩𑐾𑐎𑑂𑐳𑐶𑐎𑑀𑑄 𑐣𑑄 𑐠𑑅𑐠𑐵𑐫𑑂 𑐀𑐩𑐾𑐬𑐶𑐎𑐵𑑄 𑐰𑐂𑐐𑐸 𑐳𑐵𑐩𑐵𑐣𑐫𑑂 𑐎𑐬 𑐀𑐥𑑂𑐰𑐫𑐾𑐎𑐾𑐐𑐸 𑐑𑑀𑐲𑐞𑐵 𑐫𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS