𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐣𑑂𑐴𑐵𑐥𑐵𑑄𑐐𑐸 𑐩𑐵𑐟𑐺𑐨𑐵𑐲𑐵 (𑐬𑐵𑐲𑑂𑐚𑑂𑐬𑐨𑐵𑐲𑐵) 𑐥𑐟𑑂𑐬𑐎𑐵𑐬𑐶𑐟𑐵 𑐳𑐩𑑂𑐩𑐾𑐮𑐣 — 𑐫𑐾𑑃 𑐑𑑀𑐲𑐞𑐵𑐥𑐟𑑂𑐬

𑐣𑐾𑐥𑐵𑐮𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑑒𑑖 𑐐𑐹 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬𑐟𑐫𑑂 𑐳𑐴𑐨𑐵𑐐𑐶𑐟𑐵𑐫𑑂 ‘𑐳𑑄𑐑𑐷𑐫 𑐳𑑄𑐬𑐔𑐣𑐵𑐫𑑂 𑐳𑑄𑐔𑐵𑐬— 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐁𑐢𑐵𑐬’ 𑐢𑐂𑐐𑐸 𑐩𑐹𑐮 𑐣𑐵𑐬𑐵𑐮𑐶𑐳𑐾𑑄 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐸𑐮𑐶𑑄 𑐣𑐾𑐥𑐵𑐮 𑐁𑐡𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 (𑐦𑑀𑐣𑐶𑐖) 𑐮𑐶𑐳𑐾 𑐳𑑄𑐫𑑀𑐖𑐣 𑐫𑐵𑐣𑐵𑑅 𑐣𑐾.𑐳𑑄. 𑑑𑑑𑑓𑑘 𑐀𑐣𑐮𑐵𑐠𑑂𑐰 𑐥𑐵𑐬𑐸 (𑐳𑐣𑑂 𑑒𑑐𑑑𑑘 𑐩𑐃 𑑑𑑖)𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 𑐣𑐾𑐥𑐵𑐮 𑐥𑐬𑑂𑐫𑐚𑐣 𑐧𑑀𑐬𑑂𑐜, 𑐫𑐾𑑃𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐩𑐵𑐟𑐺𑐨𑐵𑐲𑐵 (𑐬𑐵𑐲𑑂𑐚𑑂𑐬𑐨𑐵𑐲𑐵) 𑐥𑐟𑑂𑐬𑐎𑐵𑐬𑐶𑐟𑐵 𑐳𑐩𑑂𑐩𑐾𑐮𑐣𑐫𑐵 𑐖𑐶𑐥𑐶𑑄 𑐳𑐴𑐨𑐵𑐐𑐶𑐥𑐶𑑄,

𑐣𑐾𑐥𑐵𑐮𑐫𑑂 𑐰𑑄𑐐𑐸 𑑙𑑓 𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐣𑐶𑐬𑐣𑑂𑐟𑐬𑐟𑐵 𑐎𑐫𑐵 𑐰𑐫𑐵𑐔𑑂𑐰𑑄𑐐𑐸 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐮𑐴𑐬 𑐰𑐂𑐐𑐸 𑐡𑐶𑐣𑐫𑑂 𑐠𑐥 𑐳𑐱𑐎𑑂𑐟 𑐫𑐵𑐣𑐵 𑐫𑑄𑐎𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐀𑐣𑐸𑐨𑐰 𑐫𑐵𑐳𑐾𑑄, 𑐎𑐬𑐶𑐧 𑐕𑐐𑐹 𑐱𑐟𑐵𑐧𑑂𑐡𑐷 𑐟𑐵𑑅𑐴𑐵𑐎𑑅𑐐𑐸 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐬𑐵𑐖𑑂𑐫𑐫𑐵 𑐩𑐶𑐏𑐵𑐫𑑂 𑐳𑐎𑐵𑐬𑐵𑐟𑑂𑐩𑐎 𑐳𑑄𑐬𑐎𑑂𑐲𑐎𑐟𑑂𑐰, 𑐥𑑂𑐬𑑀𑐟𑑂𑐳𑐵𑐴𑐣, 𑐥𑑂𑐬𑐵𑐠𑐩𑐶𑐎𑐟𑐵𑐫𑐵 𑐰𑐶𑐲𑐫𑐰𑐳𑑂𑐟𑐸 𑐖𑐸𑐂 𑐩𑐦𑐸𑐐𑐸 𑐎𑐵𑐬𑐞 𑐥𑐬𑐶𑐥𑐎𑑂𑐰, 𑐳𑐸𑐰𑐶𑐢𑐵𑐫𑐸𑐎𑑂𑐟, 𑐄𑐬𑑂𑐧𑐬 𑐰 𑐰𑐶𑐎𑐳𑐶𑐟 𑐖𑐸𑐂𑐩𑐦𑐸𑐐𑐸 𑐟𑐠𑑂𑐫𑐫𑐵𑐟 𑐁𑐟𑑂𑐩𑐳𑐵𑐟𑑂 𑐫𑐵𑐳𑐾𑑄,

𑐧𑐴𑐸𑐖𑐵𑐟𑐷𑐫, 𑐧𑐴𑐸𑐨𑐵𑐲𑐶𑐎 𑐰 𑐧𑐴𑐸𑐢𑐵𑐬𑑂𑐩𑐶𑐎 𑐳𑑄𑐑𑐷𑐫 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐐𑐞𑐟𑐣𑑂𑐟𑑂𑐬𑐵𑐟𑑂𑐩𑐎 𑐳𑑄𑐬𑐔𑐣𑐵𑐫𑑂 𑐡𑐸𑐴𑐵𑑄 𑐰𑐣𑐾𑐐𑐸 𑐢𑐸𑑄𑐎𑐹𑐐𑐸 𑐣𑐾𑐥𑐵𑑅𑐫𑐵𑐟 𑐳𑐩𑐵𑐰𑐾𑐱𑐷, 𑐳𑐴𑐨𑐵𑐐𑐶𑐟𑐵𑐩𑐹𑐮𑐎 𑐰 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐩𑐹𑐮𑑂𑐫𑐩𑐵𑐣𑑂𑐫𑐟𑐵𑐫𑑂 𑐁𑐢𑐵𑐬𑐶𑐟 𑐖𑐵𑐟𑐷𑐫 𑐰𑐶𑐰𑐶𑐢𑐵𑑄 𑐫𑐸𑐎𑑂𑐟 𑐖𑐷𑐰𑐣𑑂𑐟 𑐬𑐵𑐲𑑂𑐚𑑂𑐬𑐫𑐵 𑐬𑐸𑐥𑐫𑑂 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐎𑐾𑐟 𑐳𑑄𑐔𑐵𑐬𑐩𑐵𑐢𑑂𑐫𑐩 𑐥𑐹𑐬𑑂𑐞 𑐳𑐩𑐵𑐰𑐾𑐱𑐷 𑐖𑐸𑐂𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐁𑐢𑐵𑐬𑐫𑐵 𑐬𑐸𑐥𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑐩𑐸𑐡𑐵𑐫 𑐡𑐠𑐸𑐂 𑐀𑐨𑑂𑐫𑐵𑐳𑐫𑐵 𑐬𑐸𑐥𑐫𑑂 𑐡𑐸𑐐𑐸 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵𑐟 𑐠𑐥 𑐳𑐱𑐎𑑂𑐟, 𑐄𑐥𑐮𑐧𑑂𑐢𑐶𑐩𑐹𑐮𑐎, 𑐰𑑂𑐫𑐵𑐰𑐳𑐵𑐫𑐶𑐎 𑐰 𑐳𑐶𑐬𑑂𑐖𑐣𑐱𑐷𑐮 𑐡𑐫𑐾𑐎𑐾𑐟 𑐧𑐴𑐸𑐨𑐵𑐲𑐶𑐎 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐣𑐶𑑄𑐟𑐶𑑄 𑐳𑐩𑐵𑐰𑐾𑐱𑐷 𑐳𑑄𑐔𑐵𑐬 𑐣𑐷𑐟𑐶𑐫𑐵 𑐀𑐰𑐶𑐮𑐩𑑂𑐧 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐳𑐾𑑄 𑐎𑑂𑐰𑐫𑑂 𑐣𑑂𑐴𑑂𑐫𑐠𑐣𑐵𑐎𑐠𑑄𑐫𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐣𑐶𑐲𑑂𑐎𑐬𑑂𑐲𑐫𑑂 𑐠𑑂𑐫𑐣𑐵𑐐𑐸 𑐡𑐸 𑑅

# 𑐣𑐾𑐥𑐵𑐮𑐷 𑐳𑑄𑐔𑐵𑐬 𑐖𑐐𑐟𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐣𑑂𑐫𑐹𑐣 𑐄𑐥𑐳𑑂𑐠𑐶𑐟𑐶𑐫𑐵𑐟 𑐣𑐷𑐟𑐶 𑐣𑐶𑐬𑑂𑐩𑐵𑐞 𑐟𑐴𑑄 𑐳𑐩𑐳𑑂𑐫𑐵𑐫𑐵 𑐬𑐸𑐥𑐫𑑂 𑐁𑐟𑑂𑐩𑐳𑐵𑐟𑑂 𑐫𑐵𑐫𑐾𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐳𑐩𑐵𑐢𑐵𑐣𑐫𑐵 𑐣𑐶𑑄𑐟𑐶𑑄 𑐧𑐴𑐸𑐁𑐫𑐵𑐩𑐶𑐎 𑐳𑐎𑐵𑐬𑐵𑐟𑑂𑐩𑐎 𑐥𑐴𑐮 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸,

# 𑐴𑐵𑐮 𑐐𑑀𑐬𑐏𑐵𑐥𑐟𑑂𑐬 𑐣𑑂𑐴𑐶𑐥𑐟𑐶𑑄 𑐀𑐨𑑂𑐫𑐵𑐳 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐧𑐴𑐸𑐨𑐵𑐲𑐶𑐎 𑐥𑐟𑑂𑐬𑐎𑐵𑐬𑐶𑐟𑐵𑐫𑐵𑐟 𑐳𑐩𑐵𑐰𑐾𑐱𑐷 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐕𑐐𑐹 𑐣𑐩𑐹𑐣𑐵𑐫𑐵 𑐬𑐸𑐥𑐫𑑂 𑐎𑐫𑐵𑑅 𑐥𑑂𑐬𑐟𑑂𑐫𑐾𑐎 𑐥𑑂𑐬𑐡𑐾𑐱𑐫𑐵 𑐖𑐣𑐳𑑄𑐏𑑂𑐫𑐵, 𑐨𑐵𑐲𑐵, 𑐳𑐵𑑄𑐳𑑂𑐎𑐺𑐟𑐶𑐎 𑐧𑐵𑐴𑐸𑐮𑑂𑐫𑐟𑐵𑐫𑐵 𑐮𑐶𑐢𑑄𑐳𑐵𑐫𑑂 𑐩𑐵𑐟𑐺𑐨𑐵𑐲𑐷 𑐳𑑄𑐔𑐵𑐬𑐎𑑅𑐩𑐶𑐟𑐫𑑂𑐐𑐸 𑐳𑐎𑑂𑐬𑐶𑐫 𑐳𑐴𑐨𑐵𑐐𑐶𑐟𑐵 𑐳𑐸𑐣𑐶𑐱𑑂𑐔𑐶𑐟 𑐫𑐵𑐫𑐾𑐐𑐸𑐫𑐵 𑐣𑐵𑐥𑑄 𑐳𑐬𑐎𑐵𑐬𑐷 𑐳𑑄𑐔𑐵𑐬𑐩𑐵𑐢𑑂𑐫𑐩𑐫𑑂 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐖𑐣𑐱𑐎𑑂𑐟𑐶𑐫𑐵 𑐥𑐾𑐱𑐵𑐐𑐟 𑐳𑐸𑐣𑐶𑐱𑑂𑐔𑐶𑐟𑐟𑐵 𑐎𑐵𑐫𑐩 𑐫𑐵𑐫𑐾𑐩𑐵𑑅𑐐𑐸,

# 𑐣𑐷𑐟𑐶 𑐣𑐶𑐬𑑂𑐩𑐵𑐞 𑐟𑐴𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐳𑐸𑐣𑐶𑐱𑑂𑐔𑐶𑐟 𑐫𑐵𑐫𑐾𑐩𑐵𑑅𑐐𑐸,

# 𑐣𑐾𑐥𑐵𑐮𑐷 𑐳𑑄𑐔𑐵𑐬𑐩𑐵𑐢𑑂𑐫𑐩𑐫𑐵 𑐀𑐣𑑂𑐟𑐬𑐰𑐳𑑂𑐟𑐸𑐂 𑐣𑐾𑐥𑐵𑑅𑐫𑐵 𑐰𑐶𑐰𑐶𑐢𑐟𑐵 𑐥𑑂𑐬𑐟𑐶𑐰𑐶𑐩𑑂𑐧𑐶𑐟 𑐖𑐸𑐂𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐳𑐩𑐵𑐔𑐵𑐬𑐎𑐎𑑂𑐲𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑐩𑐸𑐡𑐵𑐫𑐫𑐵 𑐳𑐩𑐵𑐣𑐸𑐥𑐵𑐟𑐶𑐎 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐖𑐸𑐂𑐩𑐵𑑅𑐐𑐸,

# 𑐐𑐿𑐬 𑐩𑐵𑐟𑐺𑐨𑐵𑐲𑐷 𑐳𑑄𑐔𑐵𑐬 𑐎𑑂𑐲𑐾𑐟𑑂𑐬𑐫𑑂 𑐳𑑄𑐮𑐐𑑂𑐣 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑑄𑐔𑐵𑐬𑐎𑑅𑐩𑐶𑐟𑐫𑑂𑐟 𑐠𑑂𑐰 𑐎𑑂𑐲𑐾𑐟𑑂𑐬𑐫𑑂 𑐥𑐬𑐶𑐔𑐵𑐮𑐶𑐟 𑐖𑐸𑐂𑐟 𑐥𑑂𑐬𑑀𑐟𑑂𑐳𑐵𑐴𑐶𑐟 𑐰 𑐁𑐎𑐬𑑂𑐲𑐶𑐟 𑐫𑐵𑐫𑐾𑐩𑐵𑑅𑐐𑐸,

# 𑐖𑐣𑐖𑐵𑐟𑐶 𑐳𑑄𑐔𑐵𑐬𑐎𑑅𑐩𑐶𑐫𑐵 𑐎𑑂𑐲𑐩𑐟𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐖𑑂𑐫𑐵𑐗𑑂𑐰𑑅𑐟 𑐳𑑄𑐔𑐵𑐮𑐣 𑐫𑐵𑐫𑐾𑐩𑐵𑑅𑐐𑐸

# 𑐥𑐟𑑂𑐬𑐎𑐵𑐬𑐶𑐟𑐵𑐫𑐵𑐟 𑐳𑐩𑐵𑐣𑐵𑐟𑐵 𑐰 𑐳𑐵𑐩𑐵𑐖𑐶𑐎 𑐣𑑂𑐫𑐵𑐫, 𑐥𑐴𑐶𑐔𑐵𑐣𑐫𑐵 𑐣𑐶𑑄𑐟𑐶𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐁𑐣𑑂𑐡𑑀𑐮𑐣𑐫𑐵𑐟 𑐀𑐨𑐶𑐣𑑂𑐣 𑐀𑑄𑐐𑐫𑐵 𑐬𑐸𑐥𑐫𑑂 𑐁𑐟𑑂𑐩𑐳𑐵𑐟 𑐫𑐵𑐫𑐾𑐩𑐵𑑅𑐐𑐸

# 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑑄𑐔𑐵𑐬 𑐥𑐴𑐮𑐫𑐵 𑐣𑐶𑑄𑐟𑐶𑑄 𑐰𑐶𑐱𑐾𑐲 𑐳𑐸𑐰𑐶𑐢𑐵 𑐰 𑐥𑑂𑐬𑑀𑐟𑑂𑐳𑐵𑐴𑐣𑐫𑐵 𑐰𑑂𑐫𑐰𑐳𑑂𑐠𑐵 𑐖𑐸𑐂𑐩𑐵𑑅𑐐𑐸,

# 𑐬𑐵𑐖𑑂𑐫𑑄 𑐳𑐩𑐵𑐣𑐸𑐥𑐵𑐟𑐶𑐎 𑐰 𑐳𑐩𑐵𑐣𑐟𑐵𑐫𑐵 𑐮𑐶𑐢𑑄𑐳𑐵𑐫𑑂 𑐀𑐣𑐸𑐡𑐵𑐣 𑐰𑐶𑐟𑐬𑐞 𑐥𑑂𑐬𑐞𑐵𑐮𑐷 𑐳𑑄𑐔𑐵𑐮𑐣 𑐫𑐵𑐫𑐾𑐩𑐵𑑅𑐐𑐸

# 𑐬𑐵𑐖𑑂𑐫𑑄 𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑑂 𑐥𑑂𑐬𑐟𑑂𑐫𑐾𑐎 𑐡𑑃𑐫𑑂 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐡𑐶𑐰𑐳 𑐐𑑂𑐰𑐳𑐵𑑅 𑐐𑑂𑐰𑐫𑐾𑐩𑐵𑑅𑐐𑐸 𑑋

𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐰𑐶𑐎𑐵𑐳𑑄 𑐥𑑂𑐬𑐾𑐳 𑐰 𑐀𑐨𑐶𑐰𑑂𑐫𑐎𑑂𑐟𑐶 𑐳𑑂𑐰𑐟𑐣𑑂𑐟𑑂𑐬𑐟𑐵𑐫𑐵 𑐄𑐔𑑂𑐔𑑂𑐟𑐩 𑐀𑐨𑑂𑐫𑐵𑐳 𑐫𑐵𑐎𑐷𑐐𑐸 𑐰 𑐣𑐾𑐥𑐵𑐮𑐷 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐥𑐬𑐶𑐨𑐵𑐲𑐵𑐫𑐵𑐟 𑐰𑑂𑐫𑐵𑐥𑐎𑐟𑐵 𑐧𑐷𑐐𑐸 𑐖𑐹𑐐𑐸𑐮𑐶𑑄 𑐁𑐩𑐳𑑄𑐔𑐵𑐬𑐫𑑂 𑐳𑐎𑐳𑐶𑐐𑐸𑑄 𑐥𑐴𑐸𑑃𑐔 𑐳𑐸𑐣𑐶𑐱𑑂𑐔𑐶𑐟𑐟𑐵 𑐫𑐵𑐫𑐾𑐟 𑐠𑐣 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐧𑐸𑑃𑐡𑐵𑐟 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐴𑐫𑐾𑐟 𑐳𑐩𑑂𑐰𑐡𑑂𑐢 𑐣𑐶𑐎𑐵𑐫𑐫𑐵𑐟 𑐁𑐰𑑂𑐴𑐵𑐣 𑐫𑐵𑐣𑐵𑐔𑑂𑐰𑐣𑐵 𑑋