Read news in NepalBhasa text-- www.hamroschool.com BACK 𑐡𑐶𑐥𑐵 𑐩𑐴𑐬𑑂𑐖𑐣𑐫𑐵 𑐫𑐵𑐎𑑅 𑐱𑐵𑐾, 𑐎𑐮𑐵𑐎𑐵𑐬 𑐳𑑂𑐰𑐵𑐳𑑂𑐠𑑂𑐫 𑐎𑑀𑐲𑐫𑑂 𑐣𑑂𑐫𑐵𑐐𑐹 𑐮𑐵𑐏𑑄 𑐩𑐮𑑂𑐫𑐵𑐎 𑐡𑐵𑑄 𑐩𑐸𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐡𑐶𑐥𑐵 𑐩𑐴𑐬𑑂𑐖𑐣𑐫𑐵 𑐫𑐵𑐎𑑅 𑐱𑐵𑐾, 𑐎𑐮𑐵𑐎𑐵𑐬 𑐳𑑂𑐰𑐵𑐳𑑂𑐠𑑂𑐫 𑐎𑑀𑐲𑐫𑑂 𑐣𑑂𑐫𑐵𑐐𑐹 𑐮𑐵𑐏𑑄 𑐩𑐮𑑂𑐫𑐵𑐎 𑐡𑐵𑑄 𑐩𑐸𑐣

𑐫𑐾𑑃 𑐍  𑐎𑐮𑐵𑐎𑐵𑐬𑐟𑐫𑑂 𑐄𑐥𑐔𑐵𑐬𑐫𑐵 𑐣𑐶𑑄𑐟𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐟𑐵𑑅 𑐟𑐫𑐵𑑅 𑐣𑐷𑐳𑑂𑐰𑑄𑐐𑐸 ‘𑐣𑐾𑐥𑐵𑑅 𑐁𑐬𑑂𑐚𑐶𑐳𑑂𑐚 𑐴𑐾𑐮𑑂𑐠 𑐦𑐞𑑂𑐜’ 𑐣𑐶𑑄𑐟𑐶𑑄 𑐣𑑂𑐫𑐵𑐐𑐹 𑐮𑐵𑐏𑑄 𑐩𑐮𑑂𑐫𑐵𑐎 𑐡𑐵𑑄 𑐩𑐸𑑄𑐐𑐸 𑐡𑐸 𑑋 𑐎𑑀𑐲𑐫𑐵 𑐐𑑂𑐰𑐵𑐴𑐵𑐮𑐶𑐫𑐵 𑐣𑐶𑑄𑐟𑐶𑑄 𑐱𑐣𑐶𑐰𑐵𑑅 𑐠𑐣𑐫𑐵 𑐥𑐵𑑃𑐔𑐟𑐵𑐬𑐾 𑐴𑑀𑐚𑐮 𑐫𑐵𑐎 𑐊𑐞𑑂𑐜 𑐫𑐟𑐶𑐂 𑐖𑐹𑐐𑐸 𑐩𑐾𑐮𑑀𑐜𑐶 𑐎𑑂𑐰𑐷𑐣 𑐡𑐶𑐥𑐵 𑐩𑐴𑐬𑑂𑐖𑐣𑐫𑐵 ‘𑐮𑐵𑐂𑐨 𑐩𑑂𑐫𑐸𑐖𑐶𑐎𑐮 𑐂𑐨𑐾𑐣𑑂𑐚’𑐫𑑂 𑐴𑐾 𑐠𑐷𑐠𑐷 𑐰𑑂𑐫𑐎𑑂𑐟𑐶𑐥𑐶𑑄𑐳𑑄 𑐎𑑀𑐲𑐫𑑂 𑐡𑐵𑑄 𑐟𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐳𑐸𑐏𑐵𑐰𑐟𑐶 𑐩𑐮𑑂𑐚𑐶 𑐥𑑂𑐬𑑀𑐜𑐎𑑂𑐳𑐣𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐱𑑀𑐮𑐫𑑂 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐩𑐴𑐬𑑂𑐖𑐣𑑄 𑐣𑐾𑐰𑐵𑑅 𑐰 𑐏𑐳 𑐣𑐾𑐥𑐵𑐮𑐷 𑐫𑐵𑐣𑐵𑑅 𑐗𑐶𑑄𑐥𑑂𑐫𑐥𑐸 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐡𑐶𑐥𑐵𑐫𑐵 𑐫𑐵𑐎𑑅 𑐱𑑀𑐮𑐫𑑂 𑐰𑐫𑑂𑐎𑑅𑐫𑐵𑐟 𑐐𑐵𑐫𑐎𑐥𑐶𑑄 𑐳𑐵𑐣𑐸𑐧𑐵𑐧𑐸 𑐩𑐴𑐬𑑂𑐖𑐣, 𑐳𑐟𑐶𑐳 𑐩𑐴𑐬𑑂𑐖𑐣, 𑐣𑐷𑐮 𑐱𑐵𑐎𑑂𑐫, 𑐬𑐵𑐖𑐾𑐱 𑐩𑐴𑐬𑑂𑐖𑐣 𑐰 𑐬𑐵𑐎𑐾𑐱 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐳𑑄 𑐳𑐵𑐠 𑐧𑐶𑐄𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐏𑑂𑐫𑐵𑐮𑐶 𑐖𑐸𑐖𑐸 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑑄 𑐣𑑄 𑐣𑐶𑐥𑐸 𑐣𑐾𑐰𑐵𑑅 𑐩𑑂𑐫𑐾𑑃 𑐰 𑐣𑐶𑐥𑐸 𑐏𑐳 𑐣𑐾𑐥𑐵𑐮𑐷 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐠𑑅 𑐖𑐴𑐵𑐣 𑐩𑐡𑐸𑐐𑐸 𑐮𑐕𑐶 𑐴𑐾 𑐩𑐡𑐸𑐣𑐶𑐰𑑄 𑐳𑑂𑐚𑐾𑐖𑐫𑑂 𑐡𑑄 𑐗𑐵𑑅𑐩𑑂𑐴 𑐏𑑂𑐫𑐵𑐮𑐶 𑐖𑐸𑐖𑐸 𑐱𑑂𑐬𑐾𑐲𑑂𑐛𑑄 𑐠𑑂𑐰 𑐡𑐸𑑅𑐏𑐫𑐵 𑐂𑐮𑐫𑑂 𑐣𑑄 𑐠𑐣 𑐰𑐫𑐵𑑅 𑐠𑑅𑐐𑐸 𑐡𑐸𑑅𑐏 𑐮𑑂𑐰𑑅𑐩𑑄𑐐𑐸 𑐡𑐸 𑐢𑐵𑐳𑐾𑑄 𑐢𑐫𑐵𑐡𑐶𑐮, ‘𑐩𑐡𑐸𑐩𑑂𑐴 𑐖𑐶 𑐖𑐴𑐵𑐣𑑄 𑐣𑑄 𑐣𑑂𑐴𑑂𑐫𑐵𑐠𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸𑐳𑐵𑑄 𑐖𑐶 𑐠𑐣 𑐰𑐫𑐵𑐐𑐸 𑐏𑐣𑐵𑑅 𑐮𑐫𑑂𑐟𑐵𑐫𑐵𑐔𑑂𑐰𑑄𑐐𑐸 𑐡𑐸 𑐖𑐸𑐂 𑑋 𑐣𑑂𑐴𑐶𑐎𑐾𑐐𑐸 𑐣𑑂𑐴𑐶𑐮𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐩𑑂𑐴 𑐖𑐶 𑐠𑐣 𑐰𑐮 𑐢𑐎𑐵𑑅 𑐰 𑐟𑑄𑐔𑐵𑐂 𑐩𑐏𑐸 𑐖𑐸𑐂 𑑋’

𑐖𑑂𑐫𑐵𑐗𑑂𑐰𑑅𑐫𑐵 𑐀𑐣𑑂𑐟𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐩𑐹 𑐥𑐵𑐴𑐵𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐰𑐶𑐡𑑂𑐫𑐵 𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐠𑑅 𑐖𑐴𑐵𑐣 𑐩𑐡𑐸𑐐𑐸 𑐡𑐸𑑅𑐏𑐫𑐵 𑐂𑐮𑐫𑑂 𑐣𑑄 𑐳𑐎𑐳𑐶𑐟𑑄 𑐣𑑂𑐴𑐶𑐎𑐾𑐟 𑐰𑐫𑐾𑐦𑐸𑐩𑑂𑐴 𑐏𑑂𑐫𑐵𑐮𑐶 𑐖𑐸𑐖𑐸 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑐥𑐵𑐏𑐾𑑄 𑐳𑐎𑐳𑐶𑐣𑑄 𑐥𑑂𑐬𑐾𑐬𑐞𑐵 𑐎𑐵𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋 𑐎𑐮𑐵𑐎𑐵𑐬𑐟𑐫𑑂 𑐳𑑂𑐰𑐵𑐳𑑂𑐠𑑂𑐫𑐫𑐵 𑐣𑐶𑑄𑐟𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐎𑑀𑐲 𑐡𑐫𑐾𑐎𑐾𑐐𑐸 𑐠𑐾𑑄 𑐖𑑂𑐫𑐵𑑅𑐐𑐸 𑐕𑐐𑐹 𑐧𑐵𑑄𑐮𑐵𑑅𑐐𑐸 𑐄𑐡𑑂𑐡𑐾𑐱𑑂𑐫𑐫𑐵 𑐣𑐶𑑄𑐟𑐶𑑄 𑐳𑑂𑐚𑐾𑐖𑐫𑑂 𑐡𑑄 𑐗𑐵𑑅𑐐𑐸 𑐏𑐣𑐵𑑅 𑐣𑑂𑐴𑑂𑐫𑐵𑐠𑐵𑐫𑑂 𑐡𑐸𑐳𑐵𑑄 𑐰𑐫𑑂𑐎𑑅𑐫𑐵 𑐟𑐶𑐬𑐶𑐩𑐫𑑂𑐖𑐸 𑐣𑑄 𑐮𑐫𑑂 𑐴𑐾 𑐟𑐵𑑅𑐐𑐸 𑐡𑐂 𑐖𑐸𑐂𑐩𑐵𑑅 𑐢𑐫𑐵𑐡𑐶𑐳𑐾𑑄 𑐩𑐾𑐫𑐬 𑐱𑐵𑐎𑑂𑐫𑑄 𑐖𑐷𑐰𑐣𑐫𑐵𑐟 𑐠𑐹𑐩𑑂𑐴 𑐩𑐡𑐣𑐡𑐵𑐃𑐥𑐵𑐏𑐾𑑄 𑐗𑐷𑐳𑑄 𑐣𑑄 𑐥𑑂𑐬𑐾𑐬𑐞𑐵 𑐎𑐵𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋 𑐀𑐠𑐾 𑐴𑐾 𑐰𑐫𑑂𑐎𑐮𑑄 𑐎𑐮𑐵𑐎𑐵𑐬𑐟𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐥𑐰𑐶𑐟𑑂𑐬 𑐄𑐡𑑂𑐡𑐾𑐱𑑂𑐫 𑐖𑑂𑐰𑐣𑐵𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑐸𑐏𑐵𑐰𑐟𑐶 𑐩𑐮𑑂𑐚𑐶 𑐥𑑂𑐬𑑀𑐜𑐎𑑂𑐳𑐣𑐫𑐵 𑐖𑑂𑐫𑐵 𑐳𑐸𑐠𑐵𑑄 𑐮𑐵𑐫𑐾𑐩𑐵𑑅 𑐢𑐎𑐵𑑅 𑐨𑐶𑑄𑐟𑐸𑐣𑐵 𑐡𑐾𑐕𑐵𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐸𑐬𑐸𑐂 𑐏𑑂𑐫𑐵𑐮𑐶 𑐖𑐸𑐖𑐸 𑐱𑑂𑐬𑐾𑐲𑑂𑐛𑑄 𑐎𑐮𑐵𑐎𑐵𑐬 𑐳𑑂𑐰𑐵𑐳𑑂𑐠𑑂𑐫 𑐎𑑀𑐲𑐫𑐵 𑐮𑑀𑐐𑑀 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐗𑑂𑐰𑐮𑐫𑑂 𑐴𑐾 𑐎𑑀𑐲𑐫𑐵 𑐣𑐶𑑄𑐟𑐶𑑄 𑑔 𑐮𑐵𑐏 𑑕𑑙 𑐴𑐖𑐵𑐬, 𑑙𑑙𑑙 𑐟𑐎𑐵 𑐡𑐵𑑄 𑐩𑐸𑑄𑐐𑐸 𑐏𑑃 𑐳𑐸𑐏𑐵𑐰𑐟𑐶𑐫𑐵 𑐣𑐵𑐫𑑅 𑐳𑐸𑐬𑐾𑐣𑑂𑐡𑑂𑐬 𑐟𑐸𑐮𑐵𑐢𑐬𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐎𑑀𑐲 𑐳𑐸𑐏𑐵𑐰𑐟𑐶𑐥𑐵𑐏𑐾𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐕𑐐𑐹 𑐮𑐵𑐏 𑐟𑐎𑐵 𑐡𑐵𑑄 𑐟𑐫𑐵𑑅 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐴𑐾 𑐳𑐩𑐵𑐖 𑐳𑐾𑐰𑐷 𑐰𑐶𑐱𑑂𑐰𑐬𑐟𑑂𑐣 𑐟𑐸𑐮𑐵𑐢𑐬𑑄 𑑑,𑑑𑑑,𑑑𑑑𑑑𑑋–, 𑐣𑐾𑐥𑐵𑐮 𑐔𑐮𑐔𑐶𑐟𑑂𑐬 𑐳𑐩𑐵𑐖𑐫𑐵 𑐳𑐔𑐶𑐰 𑐊𑐳 𑐎𑐾 𑐱𑑂𑐬𑐾𑐲𑑂𑐛𑑄 𑑑,𑑑𑑐,𑑐𑑐𑑐𑑋–, 𑐩𑐴𑐬𑑂𑐖𑐣 𑐎𑐩𑑂𑐥𑑂𑐮𑐾𑐎𑑂𑐳𑐫𑐵 𑐎𑐺𑐲𑑂𑐞 𑐮𑐵𑐮 𑐩𑐴𑐬𑑂𑐖𑐣𑐥𑐵𑐏𑐾𑑄 𑑕𑑕,𑑕𑑕𑑕𑑋–, 𑐔𑐮𑐔𑐶𑐟𑑂𑐬 𑐰𑐶𑐟𑐬𑐎 𑐐𑑀𑐥𑐵𑐮𑐎𑐵𑐖𑐷 𑐎𑐵𑐫𑐳𑑂𑐠𑑄 𑐮𑐵𑐏𑐾𑐨𑐵𑐖𑐸 𑐳𑑄𑐎𑐶𑐥𑐵𑐥𑐵𑐏𑐾𑑄 𑑓𑑓,𑑓𑑓𑑓𑑋–, 𑐀𑐩𑐾𑐬𑐶𑐎𑐵, 𑐧𑑀𑐳𑑂𑐚𑐣𑐫𑐵 𑐩𑐢𑐸𑐎𑐬 𑐱𑑂𑐬𑐾𑐲𑑂𑐛𑑄 𑑗𑑕,𑑐𑑐𑑐𑑋–, 𑐣𑑂𑐫𑐹 𑐖𑐾𑐣𑐶𑐠 𑐂𑑄𑐐𑑂𑐮𑐶𑐳 𑐳𑑂𑐎𑐸𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐬𑐵𑐖𑐸 𑐩𑐴𑐬𑑂𑐖𑐣𑐥𑐵𑐏𑐾𑑄 𑑒𑑕,𑑐𑑐𑑐𑑋–, 𑐁𑐬 𑐧𑐷 𑐦𑐶𑐮𑑂𑐩𑑂𑐳𑐫𑐵 𑐬𑐰𑐶𑐣𑑂𑐡𑑂𑐬 𑐳𑐵𑐴𑐷𑐥𑐵𑐏𑐾𑑄 𑑒𑑕𑑐𑑐𑑐𑑋–, 𑐱𑐵𑐴𑐷 𑐰𑐵𑐳 𑐂𑐣𑑂𑐜𑐳𑑂𑐚𑑂𑐬𑐶𑐖𑐫𑐵 𑐨𑐬𑐟 𑐳𑐵𑐥𑐎𑑀𑐚𑐵𑐥𑐵𑐏𑐾𑑄 𑑒𑑕𑑐𑑐𑑐𑑋– 𑐟𑐎𑐵 𑐡𑐵𑑄 𑐟𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐔𑐮𑐔𑐶𑐟𑑂𑐬 𑐰𑐶𑐟𑐬𑐎 𑐐𑑀𑐥𑐵𑐮𑐎𑐵𑐖𑐷 𑐱𑑂𑐬𑐾𑐲𑑂𑐛𑑄 𑐐𑐵𑐫𑐶𑐎𑐵 𑐩𑐴𑐬𑑂𑐖𑐣𑐫𑐵𑐟 𑐠𑑅𑐐𑐸 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐦𑐶𑐮𑑂𑐩𑐫𑑂 𑐩𑑂𑐫𑐾 𑐴𑐵𑐫𑐾𑐎𑐾𑐐𑐸 𑐧𑐔𑑄 𑐣𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐀𑐣𑑂𑐟𑑂𑐫𑐫𑑂 𑐐𑐵𑐫𑐶𑐎𑐵 𑐩𑐴𑐬𑑂𑐖𑐣𑐫𑐵𑐟 ‘𑐳𑐬𑐥𑑂𑐬𑐵𑐂𑐖’ 𑐧𑐶𑐂𑐐𑐸 𑐗𑑂𑐰𑐮𑐫𑑂 𑐣𑐵𑐫𑑅 𑐟𑐸𑐮𑐵𑐢𑐬𑑄 𑐩𑐫𑑂𑐖𑐸 𑐩𑐴𑐬𑑂𑐖𑐣𑐫𑐵 𑐕𑐐𑐹 𑐊𑐮𑑂𑐧𑐩 𑐳𑐸𑐏𑐵𑐰𑐟𑐶 𑐥𑐵𑐏𑐾𑑄 𑐥𑐶𑐠𑐣𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑑂𑐰 𑐊𑐮𑑂𑐧𑐩𑐫𑑂𑐳𑑄𑐐𑐷𑐟 𑐐𑐸𑐖𑑂𑐫𑐾 𑐩𑐵𑐮𑐵𑐎𑐵𑐬 𑐰 𑐣𑐶𑐮 𑐱𑐵𑐎𑑂𑐫𑐫𑐵, 𑐧𑐵𑐖𑑄 𑐐𑑂𑐰𑐳𑐵𑑅 (𑐊𑐬𑐾𑐣𑑂𑐖) 𑐖𑐷𑐰𑐶𑐟 𑐖𑐮𑑂𑐩𑐷 𑐰 𑐨𑐸𑐥𑐾𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫 𑐡𑐂𑐐𑐸 𑐰 𑐩𑑂𑐫𑐾𑑃𑐫𑐵 𑐬𑐾𑐎𑐬𑑂𑐜 𑐴𑐬𑐶𑐱𑐬𑐞 𑐳𑐵𑐫𑑂𑐩𑐶, 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑐫𑐵 𑐳𑑂𑐚𑐸𑐜𑐶𑐫𑑀𑐫𑑂 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾𑐴𑐾 𑐊𑐮𑑂𑐧𑐩𑐫𑑂 𑐡𑐸𑐠𑑂𑐫𑐵𑑅𑐐𑐸 𑐦𑐸𑐎𑑂𑐎 𑐩𑑂𑐫𑐾𑑃𑐫𑐵 𑐩𑑂𑐫𑐸𑐖𑐶𑐎 𑐨𑐶𑐜𑐶𑐫𑑀 𑐡𑐫𑐾𑐎𑐾𑐐𑐸 𑐏𑑃 𑐣𑑄 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS