𑐧𑐳𑐣𑑂𑐟𑐥𑐸𑐮𑐶𑐂 𑐧𑑂𑐫𑐵𑐣𑐬 𑐧𑑂𑐰𑐫𑐵𑑅 𑐴𑐵𑐎𑐸𑐐𑐸 𑐣𑑂𑐴𑐶
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐰𑐶.𑐳𑑄. 𑑒𑑐𑑕𑑖 𑐳𑐵𑐮 𑐖𑐾𑐛 𑑑𑑘 𑐐𑐟𑐾 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑑄 𑐕𑐐𑐹 𑐦𑐿𑐳𑐮𑐵 𑐫𑐵𑐳𑐾𑑄 𑐟𑐟𑑂𑐎𑐵𑐮𑐷𑐣 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐧𑐶𑐫𑐵 𑐟𑑅𑐐𑐸 𑐩𑐵𑐣𑑂𑐫𑐟𑐵 𑐏𑐵𑐬𑐾𑐖 𑐫𑐵𑐣𑐵 𑐧𑐶𑐄𑐐𑐸 𑐰𑐶𑐬𑑀𑐢𑐫𑑂 𑐩𑑂𑐴𑐶𑐐𑑅 𑐫𑐾𑑃𑐫𑑂 𑐴𑐵𑐎𑐸𑐐𑐸 𑐣𑑂𑐴𑐶 𑐴𑐣 𑑋 𑐄𑐐𑐸 𑐦𑐿𑐳𑐮𑐵 𑐖𑐹𑐐𑐸 𑐣𑑂𑐴𑐶 𑐖𑐾𑐛 𑑑𑑘 𑐫𑐵𑐟 𑐣𑐾𑐰𑐵𑑅 𑐮𑐐𑐵𑐫𑐟𑐫𑐵 𑐖𑐣𑐖𑐵𑐟𑐶𑐟𑐫𑑂𑐳𑑄 ‘𑐴𑐵𑐎𑐸𑐐𑐸 𑐣𑑂𑐴𑐶’ 𑐫𑐵 𑐬𑐸𑐥𑐫𑑂 𑐮𑐸𑐩𑑄𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐁𑐴𑑂𑐰𑐵𑐣𑐫𑑂 𑐩𑑂𑐴𑐶𑐐𑑅 𑐧𑐳𑐣𑑂𑐟𑐥𑐹𑐫𑐵 𑐥𑐸𑑄 𑐡𑐾𑐐𑐮𑐫𑑂 𑐠𑐷𑐠𑐷 𑐏𑐮𑑅 𑐥𑐸𑐔𑑅𑐟𑐫𑑂𑐳𑑄 𑐧𑑂𑐫𑐵𑐣𑐬 𑐧𑑂𑐰𑐫𑐵𑑅 𑐴𑐵𑐎𑐸𑐐𑐸 𑐣𑑂𑐴𑐶 𑐴𑑄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐁𑐥𑐵𑐮𑑄 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋
𑐧𑑂𑐫𑐵𑐣𑐬 𑐧𑑂𑐰𑐖𑑂𑐫𑐵𑐫𑑂 𑐳𑐩𑑂𑐧𑑀𑐢𑐣 𑐫𑐵𑐳𑐾𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐡𑐾𑐱𑐫𑑂 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐰𑑅𑐳𑐵𑑄 𑐣𑐾𑐰𑐵𑑅𑐟𑐫𑑂𑐳𑑄 𑐔𑐵𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐀𑐢𑐶𑐎𑐵𑐬 𑐀𑐗 𑐣𑑄 𑐩𑐰𑑅𑐣𑐶𑐐𑐸 𑐖𑐸𑐫𑐵𑑅 𑐠𑑂𑐰 𑐴𑐵𑐎𑐸𑐐𑐸 𑐣𑑂𑐴𑐶 𑐴𑐣𑐵𑐫𑐵 𑐳𑐵𑐬𑑂𑐠𑐎𑐟𑐵 𑐀𑐗𑑄 𑐡𑐣𑐶 𑐢𑐫𑐵𑐡𑐶𑐮 𑑋
LEAVE YOUR COMMENTS