𑐢𑐩𑑂𑐩𑐵𑐰𑐟𑐷 𑐐𑐸𑐬𑐸𑐩𑐵𑑄𑐫𑐵𑐟 𑐰𑐶𑐱𑐾𑐲 𑐳𑐩𑑂𑐩𑐵𑐣

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐠𑐾𑐬𑐰𑐵𑐡 𑐧𑐸𑐡𑑂𑐢 𑐱𑐵𑐳𑐣𑐶𑐎 𑐏𑑂𑐫𑑅𑐫𑐵 𑐀𑐟𑐶𑐎𑑄 𑐣𑐵𑑄𑐖𑐵𑑅𑐩𑑂𑐴 𑐱𑑂𑐬𑐡𑑂𑐢𑐾𑐫 𑐢𑐩𑑂𑐩𑐵𑐰𑐟𑐷 𑐐𑐸𑐬𑐸𑐩𑐵𑑄𑐫𑐵𑐟 𑐰𑐶𑐱𑐾𑐲 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐡𑐸 𑑋 𑐮𑐸𑐩𑑂𑐧𑐶𑐣𑐷 𑐰𑐶𑐎𑐵𑐳 𑐎𑑀𑐲𑑄 𑐱𑐵𑐳𑐣𑐢𑐖 𑐢𑐩𑑂𑐩𑐔𑐬𑐷𑐫 𑐀𑐐𑑂𑐐𑐩𑐴𑐵𑐐𑐣𑑂𑐠𑐰𑐵𑐔𑐎 𑐱𑑂𑐬𑐡𑑂𑐢𑐾𑐫 𑐀𑐣𑐵𑐐𑐵𑐬𑐶𑐎𑐵 𑐢𑐩𑑂𑐩𑐵𑐰𑐟𑐷 𑐐𑐸𑐬𑐸𑐩𑐵𑑄𑐫𑐵𑐟 𑐰𑐶𑐱𑐾𑐲 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋

𑐎𑑀𑐲𑑄 𑐧𑐸.𑐳𑑄. 𑑒𑑕𑑖𑑗 𑐎𑑂𑐰𑑅𑐐𑐸 𑐳𑑂𑐰𑐵𑑄𑐫𑐵𑑅𑐥𑐸𑐣𑑂𑐴𑐶 𑐰 𑐮𑐸𑐩𑑂𑐧𑐶𑐣𑐷 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐰𑐳𑐥𑑀𑐮 𑐐𑐸𑐬𑐸𑐩𑐵𑑄𑐫𑐵𑐟 𑐴𑐣𑐵𑐥𑑁 𑐡𑐾𑐕𑐵𑐳𑐾 𑐰𑐶𑐱𑐾𑐲 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋 𑐰𑐳𑐥𑑀𑐮 𑐢𑐩𑑂𑐩𑐵𑐰𑐟𑐷 𑐐𑐸𑐬𑐸𑐩𑐵𑑄 𑐔𑑂𑐰𑐣𑐵𑐧𑐶𑐖𑑂𑐫𑐵𑑅𑐐𑐸 𑐠𑐣𑐫𑐵 𑐢𑐬𑑂𑐩𑐎𑐷𑐬𑑂𑐟𑐶 𑐰𑐶𑐴𑐵𑐬𑐫𑑂 𑐎𑑀𑐲𑐫𑐵 𑐥𑐸𑐮𑐵𑑄𑐩𑑂𑐴 𑐄𑐥𑐵𑐢𑑂𑐫𑐎𑑂𑐲 𑐨𑐶𑐎𑑂𑐲𑐸 𑐣𑐶𑐐𑑂𑐬𑑀𑐢 𑐩𑐴𑐵𑐳𑑂𑐠𑐰𑐶𑐬𑑄 𑐴𑐣𑐵𑐥𑑁 𑐡𑐾𑐕𑐵𑐣𑐵𑐧𑐶𑐖𑑂𑐫𑐵𑐳𑐾𑑄 𑐴𑐣𑐾𑐖𑑂𑐫𑐵 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸

𑐧𑐸𑐡𑑂𑐢 𑐱𑐵𑐳𑐣𑐫𑐵𑐟 𑐔𑐷𑐬 𑐳𑑂𑐠𑐵𑐫𑐷 𑐫𑐵𑐫𑐾𑐐𑐸 𑐣𑐵𑐥𑑄 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐰 𑐧𑐸𑐡𑑂𑐢𑐫𑐵 𑐄𑐥𑐡𑐾𑐱𑐫𑐵𑐟 𑐰𑐶𑐱𑑂𑐰𑐫𑑂 𑐣𑑂𑐫𑑄𑐎𑐾𑐐𑐸 𑐖𑑂𑐫𑐵𑐫𑑂 𑐰𑐳𑐥𑑀𑐮 𑐐𑐸𑐬𑐸𑐩𑐵𑑄 𑐣𑑄 𑐧𑐶𑐫𑐵𑐧𑐶𑐖𑑂𑐫𑐵𑑅𑐐𑐸 𑐖𑑂𑐰𑑅𑐩𑐡𑐸𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐎𑑀𑐲𑑄 𑐄𑐎𑐠𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐏𑐟𑐸𑑄 𑐰𑐳𑐥𑑀𑐮𑐫𑐵𑐟 𑐰𑑄𑐐𑐸 𑐳𑑂𑐰𑐵𑑄𑐫𑐵𑑅𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐴𑐾 𑐮𑐸𑐩𑑂𑐧𑐶𑐣𑐷𑐂 𑐖𑐹𑐐𑐸 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑐮𑐫𑑂 𑐴𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐟𑐫𑐵𑐟𑑅𑐐𑐸 𑐏𑑅 𑑋

𑐮𑐸𑐩𑑄𑐎𑐾𑐧𑐴𑐖𑐹, 𑐰𑑄𑐐𑐸 𑐧𑐿𑐱𑐵𑐏𑐫𑑂 𑐖𑐎 𑐰𑐳𑐥𑑀𑐮 𑐐𑐸𑐬𑐸𑐩𑐵𑑄𑐫𑐵𑐟 𑐠𑐣𑐫𑐵 𑐬𑐵𑐲𑑂𑐚𑑂𑐬𑐶𑐫 𑐳𑐨𑐵𑐐𑐺𑐴𑐫𑑂 𑐖𑐹𑐐𑐸 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐡𑐠𑐸𑐂 𑐢𑐩𑑂𑐩𑐥𑐸𑐖𑐵 𑐥𑑁 𑐮𑑅𑐮𑑂𑐴𑐵𑐳𑐾 𑐳𑐵𑐬𑑂𑐰𑐖𑐣𑐶𑐎 𑐬𑐸𑐥𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋