𑐐𑐸𑐠𑐶𑐫𑐵𑐟 𑐎𑐫𑐵𑑅 𑐣𑐐𑐬 𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑐮𑐶𑐳𑐾 𑐀𑐣𑑂𑐟𑐎𑑂𑐬𑑂𑐬𑐶𑐫𑐵
𑐏𑑂𑐰𑐥 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐳𑐸𑐣𑐶𑐮 𑐥𑑂𑐬𑐖𑐵𑐥𑐟𑐶𑐮𑐶𑐳𑐾 𑐧𑐵𑐐𑐷𑐱𑑂𑐰𑐬𑐷 𑐎𑐮𑐾𑐖𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐐𑐸𑐠𑐶 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑑅𑐐𑐸 𑐡𑐸 𑑋 𑐎𑐮𑐾𑐖 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲𑐟𑐎𑑄 𑐖𑐸𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐣𑐐𑐬 𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑐮𑐶𑐳𑐾 𑐎𑐮𑐾𑐖𑐫𑐵 𑐳𑑂𑐣𑐵𑐟𑐎 𑐟𑐴 𑐳𑑂𑐰𑑄𑐐𑐹𑐐𑐸 𑐡𑑃𑐫𑑂 𑐀𑐢𑑂𑐫𑐫𑐣𑐬𑐟 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 ‘𑐐𑐸𑐠𑐶 𑐕𑐐𑐹 𑐳𑐵𑐩𑐵𑐖𑐶𑐎 𑐳𑑄𑐳𑑂𑐠𑐵’ 𑐰𑐶𑐲𑐫𑐫𑑂 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑑅𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐣𑐐𑐬 𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑑄 𑐧𑐾𑐮𑐵𑐫𑐟𑐫𑐵 𑐳𑑄𑐰𑐶𑐢𑐵𑐣𑐫𑑂 𑐠𑐾𑑄 𑐐𑐸𑐠𑐶𑐂 𑐣𑑄 𑐀𑐮𑐶𑐏𑐶𑐟 𑐣𑐶𑐫𑐩, 𑐎𑐵𑐣𑐹𑐣 𑐡𑐸𑐐𑐸 𑐰 𑐠𑐸𑐎𑐠𑑄𑐫𑐵 𑐣𑐶𑐫𑐩 𑐎𑐵𑐣𑐹𑐣 𑐐𑐸𑐠𑐶𑐫𑐵 𑐳𑐎𑐮𑐾𑑄 𑐐𑐸𑐠𑑂𑐫𑐵𑑅𑐟𑐫𑑂 𑐳𑐴𑐩𑐟𑐶𑐂 𑐖𑐎 𑐁𑐰𑐱𑑂𑐫𑐎𑐎𑐠𑑄 𑐳𑐸𑐢𑐵𑐬 𑐰 𑐥𑐬𑐶𑐩𑐵𑐬𑑂𑐖𑐣 𑐫𑐵𑐫𑐾 𑐦𑐂𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐳𑐵𑐩𑐵𑐖𑐶𑐎 𑐳𑑄𑐳𑑂𑐠𑐵𑐫𑐵 𑐬𑐸𑐥𑐫𑑂 𑐳𑑂𑐠𑐵𑐥𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐐𑐸𑐠𑐶𑑄 𑐠𑑅𑐠𑑅𑐐𑐸 𑐐𑐸𑐠𑐶𑐂 𑐁𑐰𑐡𑑂𑐢 𑐖𑐸𑐫𑐵𑐔𑑂𑐰𑑄𑐥𑐶𑑄 𑐳𑐵𑐩𑐵𑐖𑐶𑐎 𑐄𑐡𑑂𑐡𑐾𑐱𑑂𑐫 𑐥𑐹𑐬𑑂𑐟𑐶 𑐫𑐵𑐫𑐾𑐐𑐸 𑐰 𑐳𑑄𑐳𑑂𑐎𑐺𑐟𑐶, 𑐳𑑄𑐳𑑂𑐎𑐵𑐬𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐠𑐷𑐠𑐷𑐎𑐠𑑄𑐫𑐵 𑐐𑐸𑐠𑐶 𑐡𑐂𑐐𑐸 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐰𑐫𑑂𑐎𑐮𑑄 𑐳𑐬𑐎𑐵𑐬𑐷, 𑐣𑐶𑐖𑐷 𑐰 𑐬𑐵𑐖 𑐐𑐸𑐠𑐶 𑐫𑐵𑐣𑐵𑑅 𑐳𑑂𑐰𑐟𑐵𑐖𑐶𑐎𑐠𑑄𑐫𑐵 𑐐𑐸𑐠𑐶 𑐡𑐂𑐐𑐸 𑐰 𑐠𑐸𑐥𑐶𑑄 𑐐𑐸𑐠𑐶𑐟 𑐳𑐩𑐸𑐡𑐵𑐫𑐫𑐵 𑐩𑐾𑐩𑐾𑐐𑐸 𑐳𑑄𑐑𑐳𑑄𑐳𑑂𑐠𑐵 𑐳𑑂𑐰𑐫𑐵𑑄 𑐧𑐶𑐳𑑂𑐎𑑄𑐎𑐠𑑄 𑐳𑑄𑐔𑐵𑐮𑐣 𑐖𑐸𑐂 𑐢𑐵𑐳𑐾𑑄 𑐳𑑄𑐔𑐵𑐮𑐣 𑐖𑐸𑐂𑐐𑐸 𑐟𑐬𑐶𑐎𑐵 𑐧𑐵𑐬𑐾 𑐣𑑄 𑐎𑐣𑐵𑐡𑐷𑐐𑐸 𑐏𑑅 𑑋
𑐐𑐸𑐠𑐶𑑄 𑐫𑐵𑐂𑐐𑐸 𑐖𑑂𑐫𑐵𑐫𑐵 𑐧𑐵𑐬𑐾 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄𑐐𑐸𑐠𑐶𑐫𑐵 𑐖𑑂𑐫𑐵 𑐢𑐂𑐐𑐸 𑐳𑐩𑐸𑐡𑐵𑐫 𑐰 𑐐𑐸𑐠𑑂𑐫𑐵𑑅 𑐡𑐠𑐸𑐂 𑐳𑐶𑐎𑑅𑐧𑐸𑐎𑑅, 𑐳𑐩𑐵𑐖𑐫𑐵 𑐴𑐶𑐟 𑐖𑐸𑐂𑐐𑐸 𑐳𑐩𑐵𑐖𑐫𑐵𑐟 𑐨𑐶𑑄 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐖𑑂𑐫𑐵 𑐫𑐵𑐂 𑐢𑐵𑐳𑐾𑑄 𑐥𑐬𑐵𑐥𑐹𑐬𑑂𑐰𑐎𑐵𑐮𑐣𑐶𑐳𑐾𑑄 𑐔𑐮𑐾 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸, 𑐔𑐮𑐣, 𑐬𑐴𑐣𑐳𑐴𑐣, 𑐣𑐿𑐟𑐶𑐎 𑐀𑐣𑐸𑐱𑐵𑐳𑐣, 𑐥𑐬𑐶𑐰𑐾𑐱𑐫𑐵𑐟 𑐰𑐬𑑂𑐟𑐩𑐵𑐣 𑐂𑐮𑐫𑑂 𑐣𑑄 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑑅 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐴𑐳𑑂𑐟𑐵𑐣𑑂𑐟𑐬𑐞 𑐫𑐵𑐣𑐵 𑐰𑐣𑐾𑐐𑐸 𑐣𑐵𑐥𑑄 𑐳𑐵𑑄𑐳𑑂𑐎𑐺𑐟𑐶𑐎 𑐳𑐩𑑂𑐥𑐡𑐵𑐟 𑐮𑑂𑐫𑑄𑐎𑐵𑐟𑐫𑐾𑐐𑐸 𑐟𑑅𑐢𑑄𑐐𑐸 𑐖𑐶𑐩𑑂𑐩𑐾𑐰𑐵𑐬𑐷𑐧𑑀𑐢 𑐫𑐵𑐣𑐵𑑅 𑐐𑐸𑐠𑐶 𑐳𑑄𑐔𑐵𑐮𑐣 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐐𑐸𑐠𑐶 𑐳𑐸𑑄 𑐣𑑄 𑐰𑑂𑐫𑐎𑑂𑐟𑐶 𑐰𑐶𑐱𑐾𑐲𑐫𑐵 𑐣𑐶𑑄𑐟𑐶𑑄 𑐦𑐵𑐂𑐡𑐵 𑐖𑐸𑐂𑐐𑐸 𑐖𑑂𑐫𑐵 𑐫𑐵𑐂𑐩𑐏𑐸 𑐢𑐵𑐳𑐾𑑄 𑐐𑐸𑐠𑐶𑐫𑐵 𑐖𑑂𑐫𑐵 𑐢𑐂𑐐𑐸 𑐴𑐾 𑐐𑐸𑐠𑑂𑐫𑐵𑑅𑐟𑐫𑑂 𑐴𑐶𑐟𑐫𑑂 𑐖𑑂𑐫𑐵 𑐫𑐵𑐂𑐐𑐸 𑐳𑑄𑐳𑑂𑐠𑐵𑐎𑐠𑑄 𑐠𑐸𑐂𑐎𑐾𑐩𑐵𑑅 𑐢𑐫𑐵𑐡𑐶𑐮 𑑋
𑐎𑐮𑐾𑐖𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐳𑐬𑐮𑐵 𑐮𑐰𑐖𑐸𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐣𑐵 𑐰𑐣𑐩𑐵𑐮𑐵, 𑐬𑐸𑐥𑐵 𑐢𑐶𑐩𑐵𑐮, 𑐥𑑂𑐬𑐣𑐶𑐟𑐵 𑐀𑐢𑐶𑐎𑐵𑐬𑐷, 𑐎𑐵𑐖𑐮 𑐠𑐵𑐥𑐵, 𑐐𑑁𑐬𑐰 𑐮𑐵𑐩𑐶𑐕𑐵𑐣𑐾 𑐮𑐐𑐵𑐫𑐟𑐫𑐵 𑐎𑐮𑐾𑐖𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐠𑑅𑐥𑐶𑑄𑐳𑑄 𑐀𑐰𑐮𑑀𑐎𑐣 𑐫𑐵𑐣𑐵𑐐𑐸 𑐳𑐵𑐩𑐸𑐡𑐵𑐫𑐶𑐎 𑐳𑑄𑐳𑑂𑐠𑐵, 𑐢𑐵𑐬𑑂𑐩𑐶𑐎 𑐳𑑂𑐠𑐮, 𑐧𑑂𑐰𑐣𑐾𑐎𑐸𑐠𑐶, 𑐀𑐳𑑂𑐥𑐟𑐵𑐮𑐫𑐵 𑐧𑐵𑐬𑐾 𑐥𑑂𑐬𑐳𑑂𑐟𑐸𑐟𑐷𑐎𑐬𑐞 𑐧𑐶𑐫𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS