𑐣𑐾. 𑐳𑑄. 𑑑𑑑𑑔𑑓 𑐘𑐮𑐵𑐐𑐵 𑐡𑐸𑐟𑐶𑐫𑐵 - 𑐩𑐴𑐵𑐎𑐧𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸 𑐧𑐸𑐡𑐶𑑄

𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐏𑐸𑐫𑐵 𑐫𑑄𑐎𑐹𑐐𑐸 𑐟𑑂𑐰𑐬𑑄 𑐮𑐶𑐟 𑐧𑐶𑐮

𑐫𑐮(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐠𑐣𑐫𑐵 𑐮𑐵𑐫𑑂𑐎𑐸𑐮𑐶𑐂 𑐔𑑂𑐰𑑄𑐐𑐸 𑐬𑐟𑑂𑐣𑐾𑐱𑑂𑐰𑐬 𑐡𑐾𑐐𑐮𑑄 𑐏𑐸𑐫𑐵 𑐫𑑄𑐎𑐹𑐐𑐸 𑐕𑐐𑑅 𑐟𑑂𑐰𑑅𑐬𑑄 𑐣𑐾𑐥𑐵𑑅𑐫𑐵𑐟 𑐮𑐶𑐟 𑐧𑐶𑐄𑐐𑐸 𑐡𑐸 𑑋 𑐀𑐳𑑂𑐚𑑂𑐬𑐾𑐮𑐶𑐫𑐵𑐫𑐵 𑐁𑐬𑑂𑐚 𑐐𑑂𑐫𑐵𑐮𑐬𑐷 𑐣𑑂𑐫𑐸 𑐳𑐵𑐄𑐠 𑐰𑐾𑐮𑑂𑐳𑐫𑐵 𑐣𑐶𑐬𑑂𑐡𑐾𑐱𑐣 𑐩𑐵𑐂𑐎𑐮 𑐧𑑂𑐬𑐵𑐣𑑂𑐜𑑄 𑐠𑐣 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐄𑐐𑐸 𑐟𑑂𑐰𑐬𑑄 𑐡𑐾𑐐𑑅𑐫𑐵 𑐩𑐸𑐏𑑂𑐫 𑐥𑐸𑐖𑐵𑐬𑐷 𑐴𑐾𑐬𑐩𑑂𑐧𑐬𑐵𑐖 𑐬𑐵𑐖𑑀𑐥𑐵𑐢𑑂𑐫𑐵𑐫𑐫𑐵𑐟 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐟𑑂𑐰𑐬𑑄 𑐮𑑅𑐮𑑂𑐴𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐣𑐾𑐥𑐵𑑅 𑐨𑑂𑐬𑐩𑐞𑐫𑑂 𑐰𑐫𑐵𑐔𑑂𑐰𑑄𑐩𑑂𑐴 𑐀𑐳𑑂𑐚𑐾«𑐮𑐶𑐫𑐵𑐫𑐵 𑐳𑐴𑐵𑐫𑐎 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐚𑐶𑐩 𑐰𑐵𑐚𑑂𑐳𑑄 𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐄𑐔𑑂𑐔 𑐣𑐿𑐟𑐶𑐎 𑐰𑑂𑐫𑐰𑐴𑐵𑐬 𑐰 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐹𑐮𑑂𑐫 𑐩𑐵𑐣𑑂𑐫𑐟𑐵𑐎𑐠𑑄 𑐖𑑂𑐫𑐵 𑐫𑐵𑐫𑐾𑐟 𑐥𑑂𑐬𑐟𑐶𑐰𑐡𑑂𑐢 𑐡𑐸 𑐢𑐂𑐐𑐸 𑐟𑐠𑑂𑐫𑐫𑐵𑐟 𑐥𑑂𑐬𑐡𑐬𑑂𑐱𑐣 𑐫𑐵𑑅𑐐𑐸 𑐡𑐸 𑐢𑐵𑐳𑐾𑑄 𑐠𑑂𑐰 𑐴𑐾𑐺 𑐀𑐳𑑂𑐚𑐾«𑐮𑐶𑐫𑐵𑐮𑐷 𑐖𑐣𑐟𑐵𑐫𑐵 𑐰 𑐰𑐶𑐱𑑂𑐰𑐫𑐵 𑐠𑑅𑐥𑐶𑑄𑐥𑑂𑐬𑐟𑐶𑐫𑐟 𑐁𑐱𑐵 𑐏𑑅 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐁𑐬𑑂𑐚 𑐐𑑂𑐫𑐵𑐮𑐬𑐷𑐫𑐵𑐟 𑐣𑑄 𑐔𑑂𑐰𑐕𑐵𑐫𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐣𑐾𑐥𑐵𑑅 𑐰 𑐀𑐳𑑂𑐚𑑂𑐬𑐾𑐮𑐶𑐫𑐵𑐫𑐵 𑐳𑐩𑑂𑐧𑐣𑑂𑐢 𑐣𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑑂𑐰 𑐃 𑐕𑐐𑐹 𑐄𑐟𑑂𑐳𑐰𑐎𑐠𑑄 𑐴𑐣𑐾𑐐𑐸 𑐡𑐶𑑄 𑐣𑑄 𑐏𑑅 𑐢𑐫𑐵𑐡𑐶𑐮 𑑋

𑐁𑐬𑑂𑐚 𑐐𑑂𑐫𑐵𑐮𑐬𑐷 𑐣𑑂𑐫𑐸 𑐳𑐵𑐄𑐠 𑐰𑐾𑐮𑑂𑐳𑐫𑐵 𑐣𑐶𑐬𑑂𑐡𑐾𑐱𑐎 𑐩𑐵𑐂𑐎𑐮 𑐧𑑂𑐬𑐵𑐣𑑂𑐜𑑄 𑐀𑐳𑑂𑐚𑑂𑐬𑐾𑐮𑐶𑐫𑐵𑐮𑐷 𑐳𑐬𑐎𑐵𑐬𑐮𑐶𑐳𑐾 𑐳𑐴𑐎𑐵𑐬𑑂𑐫 𑐫𑐵𑐣𑐵𑑅 𑐣𑐾𑐥𑐵𑑅𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐳𑐩𑑂𑐥𑐡𑐵 𑐣𑐾𑐥𑐵𑑅𑐫𑐵 𑐠𑑅𑐐𑐸 𑐴𑐾 𑐠𑐵𑐳𑐫𑑂 𑐣𑐾𑐥𑐵𑑅𑐩𑐶 𑐖𑐣𑐟𑐵𑐫𑐵 𑐡𑐠𑐸𑐂 𑐮𑐶𑐟 𑐧𑐷 𑐏𑑄𑐐𑐸𑐮𑐶𑑄 𑐮𑐳𑐟𑐵 𑐰𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐧𑑂𑐬𑐵𑐣𑑂𑐜𑑄 𑐣𑐾𑐥𑐵𑑅𑐫𑐵 𑐥𑑂𑐬𑐵𑐔𑐷𑐣 𑐢𑐬𑑀𑐴𑐬𑐫𑐵 𑐬𑐸𑐥𑐫𑑂 𑐡𑐸𑐐𑐸 𑐱𑐶𑐮𑑂𑐥𑐎𑐮𑐵𑐫𑐵 𑐳𑐩𑑂𑐥𑐡𑐵 𑐣𑐾𑐥𑐵𑑅𑐫𑐵𑐟 𑐮𑐶𑐟 𑐧𑐷𑐐𑐸 𑐏𑑄𑐐𑐸 𑐠𑑅𑐐𑐸 𑐣𑐶𑑄𑐟𑐶𑑄 𑐟𑐳𑐎𑑄 𑐮𑐳𑐟𑐵𑐫𑐵 𑐏𑑃 𑐖𑐹𑐐𑐸 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮, 𑐳𑐩𑑂𑐥𑐡𑐵𑐰𑐶𑐡𑑂 𑐬𑐰𑐶𑐣𑑂𑐡𑑂𑐬 𑐥𑐸𑐬𑐷, 𑐳𑑄𑐳𑑂𑐎𑐺𑐟𑐶, 𑐥𑐬𑑂𑐫𑐚𑐣 𑐟𑐠𑐵 𑐣𑐵𑐐𑐬𑐶𑐎 𑐄𑐜𑑂𑐜𑐫𑐣 𑐩𑐣𑑂𑐟𑑂𑐬𑐵𑐮𑐫𑐫𑐵 𑐳𑐔𑐶𑐰 𑐳𑐸𑐬𑐾𑐱 𑐀𑐢𑐶𑐎𑐵𑐬𑐷𑐫𑐵 𑐣𑑄 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅𑑋

𑐠𑐣𑐶𑑄 𑐥𑐷𑐔𑑂𑐫𑐵𑐡𑑃 𑐣𑑂𑐴𑑂𑐫𑑅 𑐳𑐣𑑂 𑑑𑑙𑑗𑑕 𑐫𑑂 𑐫𑐮 𑐮𑐵𑐫𑐎𑐹𑐫𑐵 𑐬𑐟𑑂𑐣𑐾𑐱𑑂𑐰𑐬 𑐡𑐾𑐐𑐮𑑄 𑐏𑐸𑐫𑐵 𑐫𑑄𑐎𑐹𑐐𑐸 𑑑𑑓 𑐍𑑄 𑐱𑐟𑐵𑐧𑑂𑐡𑐷𑐫𑐵 𑐄𑐐𑐸 𑐟𑑂𑐰𑐬𑑄 𑐀𑐳𑑂𑐚𑐾«𑐮𑐶𑐫𑐵𑐫𑐵 𑐳𑐶𑐜𑑂𑐣𑐷𑐂 𑐔𑑂𑐰𑑄𑐐𑐸 𑐁𑐬𑑂𑐚 𑐐𑑂𑐫𑐵𑐮𑐬𑐷𑑄 𑐎𑐬𑐶𑐧 𑐣𑐶𑐐𑐹 𑐡𑐱𑐎 𑐣𑑂𑐴𑑂𑐫𑑅 𑐡𑐵𑐣𑐫𑐵 𑐬𑐸𑐥𑐫𑑂 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐏𑑅 𑑋 𑐳𑐣𑑂 𑑒𑑐𑑑𑑙 𑐫𑑂 𑐖𑐹𑐐𑐸 𑐕𑐐𑐹 𑐎𑐮𑐵 𑐧𑑂𑐰𑐖𑑂𑐫𑐵𑐫𑐵 𑐂𑐮𑐫𑑂 𑐄𑐐𑐸 𑐟𑑂𑐰𑐬𑑄 𑐣𑐾𑐥𑐵𑑅𑐫𑐵 𑐖𑐹𑐐𑐸 𑐢𑐂𑐐𑐸 𑐥𑐟𑑂𑐟𑐵 𑐮𑐐𑐾 𑐖𑐹𑐐𑐸 𑐏𑑅 𑑋 𑐣𑐾𑐥𑐵𑐮𑑄 𑐏𑐸𑐫𑐵 𑐴𑑅𑐐𑐸 𑐰 𑐣𑐾𑐥𑐵𑑅𑐫𑐵 𑐳𑐩𑑂𑐥𑐟𑑂𑐟𑐶 𑐢𑐂𑐐𑐸 𑐏𑑃 𑐳𑐷𑐰𑑄 𑐄𑐎𑐶𑐫𑐵𑐟 𑐮𑐶𑐟 𑐧𑐷𑐐𑐸 𑐥𑑂𑐬𑐎𑑂𑐬𑐶𑐫𑐵 𑐱𑐸𑐬𑐸 𑐖𑐹𑐐𑐸 𑐏𑑅 𑑋

𑐀𑐳𑑂𑐚𑑂𑐬𑐾𑐮𑐶𑐫𑐵𑑄𑐫𑐵 𑐳𑐴𑐵𑐫𑐎 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐰𑐵𑐚𑑂𑐳 𑐣𑐾𑐥𑐵𑑅 𑐨𑑂𑐬𑐩𑐞𑐫𑑂 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐮𑐵𑐎𑐵𑑅 𑐕𑐐𑐹 𑐍𑐥𑐔𑐵𑐬𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐰𑑄𑐐𑐸 𑐩𑑄𑐐𑐮𑐰𑐵𑑅 𑐄𑐐𑐸 𑐟𑑂𑐰𑐬𑑄 𑐣𑐾𑐥𑐵𑑅𑐫𑐵𑐟 𑐮𑐶𑐟 𑐧𑐶𑐄𑐐𑐸 𑐏𑑅 𑑋