𑐣𑐾. 𑐳𑑄. 𑑑𑑑𑑔𑑓 𑐘𑐮𑐵𑐐𑐵 𑐡𑐸𑐟𑐶𑐫𑐵 - 𑐩𑐴𑐵𑐎𑐧𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸 𑐧𑐸𑐡𑐶𑑄

𑐋𑐟𑐶𑐴𑐵𑐳𑐶𑐎 𑐦𑐮𑑂𑐔𑐵𑐫𑐵 𑐱𑐶𑐮𑐵𑐣𑑂𑐫𑐵𑐳

𑐏𑑂𑐰𑐥(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐠𑐣𑐫𑐵 𑐰𑐜𑐵 𑐣𑑄. 𑑘 𑐳𑐵𑑅𑐎𑑂𑐰𑐮𑐵𑐣 𑐟𑑂𑐰𑐵𑐮𑐫𑑂 𑐔𑑂𑐰𑑄𑐐𑐸 𑐋𑐟𑐶𑐴𑐵𑐳𑐶𑐎 𑐥𑐵𑐮𑐶𑐦𑑅 𑐦𑐮𑑂𑐔𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐱𑐶𑐮𑐵𑐣𑑂𑐫𑐵𑐳 𑐫𑐵𑑅𑐐𑐸 𑐡𑐸 𑑋 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐳𑐸𑐣𑐶𑐮 𑐥𑑂𑐬𑐖𑐵𑐥𑐟𑐶𑑄 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐄𑐐𑐸 𑐋𑐟𑐶𑐴𑐵𑐳𑐶𑐎 𑐦𑐮𑑂𑐔𑐵𑐫𑐵 𑐱𑐶𑐮𑐵𑐣𑑂𑐫𑐵𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐐𑐬 𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑑄 𑐰𑐶𑐱𑑂𑐰𑐫𑐵 𑐣𑐶𑑄𑐟𑐶𑑄 𑐩𑑄𑐎𑐵𑑅 𑐳𑐩𑑂𑐥𑐟𑑂𑐟𑐶 𑐏𑑅𑐳𑐵 𑐳𑑂𑐠𑐵𑐣𑐷𑐫 𑐖𑐣𑐟𑐵𑐫𑐵 𑐟𑐶𑐳𑐵 𑐏𑑅 𑐢𑐵𑐳𑐾𑑄 𑐳𑐩𑑂𑐥𑐡𑐵𑐫𑐵 𑐩𑐴𑐟𑑂𑐰𑐫𑐵𑐟 𑐠𑐸𑐂𑐎𑐾 𑐩𑐦𑐸𑐐𑐸𑐮𑐶𑑄 𑐴𑐾 𑐋𑐟𑐶𑐴𑐵𑐳𑐶𑐎, 𑐥𑐸𑐬𑐟𑐵𑐟𑑂𑐰𑐶𑐎 𑐢𑐵𑐬𑑂𑐩𑐶𑐎 𑐩𑐴𑐟𑑂𑐰𑐫𑐵 𑐩𑐹𑐬𑑂𑐟𑐶𑐫𑐵𑐟 𑐳𑐵𑐩𑐵𑐣𑑂𑐫 𑐮𑑂𑐰𑐴𑑄 𑐟𑐵𑐫𑐾𑐎𑐵𑑅 𑐩𑑂𑐴𑐶𑐟𑐾𑐐𑐸 𑐰 𑐣𑑂𑐴𑑂𑐫𑐂𑐥𑐸𑐎𑐾𑐐𑐸 𑐰𑐫𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋 𑐳𑐩𑑂𑐥𑐡𑐵𑐫𑐵 𑐩𑐴𑐟𑑂𑐰 𑐠𑐸𑐂 𑐢𑐸𑑄𑐎𑐵𑑅 𑐖𑐎 𑐄𑐎𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐮𑐐𑐾 𑐖𑐸𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐫𑐎𑑂𑐰𑐳𑐶𑐫𑐵 𑐀𑐣𑐸𑐨𑐰 𑐡𑐸𑐐𑐸 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋

𑐏𑑂𑐰𑐥 𑐡𑐾𑐱𑐫𑑂 𑐳𑐩𑑂𑐥𑐡𑐵 𑐥𑐸𑐣𑑅𑐣𑐶𑐬𑑂𑐩𑐵𑐞 𑐰 𑐩𑐾𑐩𑐾𑐩𑐾𑐐𑐸 𑐰𑐶𑐎𑐵𑐳 𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐳𑑂𑐠𑐵𑐣𑐷𑐫 𑐖𑐣𑐟𑐵𑐫𑐵 𑐳𑐴𑐨𑐵𑐐𑐶𑐟𑐵𑐫𑑂 𑐄𑐥𑐨𑑀𑐎𑑂𑐟𑐵 𑐳𑐩𑐶𑐟𑐶 𑐐𑐛𑐣 𑐫𑐵𑐣𑐵𑑅 𑐫𑐵𑐫𑐾𑐐𑐸 𑐖𑐹𑐐𑐸𑐮𑐶𑑄 𑐣𑑂𑐴𑐵𑐥𑐵 𑐠𑐾𑑄 𑐴𑐾 𑐧𑐮𑑂𑐮𑐵𑑅𑐐𑐸, 𑐩𑑁𑐮𑐶𑐎 𑐳𑑄𑐬𑐔𑐣𑐵𑐫𑑂 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐰 𑐀𑐥𑐣𑐟𑑂𑐰 𑐣𑑄 𑐩𑐴𑐳𑐸𑐳 𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑑙 𑐰𑐜𑐵𑐀𑐢𑑂𑐫𑐎𑑂𑐲 𑐬𑐰𑐶𑐣𑑂𑐡𑑂𑐬 𑐖𑑂𑐫𑐵𑐏𑑂𑐰𑑄 𑐦𑐮𑑂𑐔𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐳𑑂𑐠𑐵𑐣𑐷𑐫𑐮𑐶𑐳𑐾 𑐟𑑅𑐎𑑂𑐰𑑅 𑐳𑐴𑐮𑐴 𑐫𑐵𑐣𑐵𑐎𑐠𑑄 𑐩𑑁𑐮𑐶𑐎 𑐱𑐿𑐮𑐷𑐂 𑐳𑐸𑐬𑑂𑐎𑐷 𑐔𑐸𑐣𑐵 𑐥𑑂𑐬𑐫𑑀𑐐 𑐫𑐵𑐣𑐵𑑅 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑐫𑐾 𑐟𑑂𑐫𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐄𑐥𑐨𑑀𑐎𑑂𑐟𑐵 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐰𑐶𑐲𑑂𑐞𑐸𑐧𑐴𑐵𑐡𑐸𑐬 𑐩𑐵𑐣𑐣𑑂𑐢𑐬𑑄 𑐥𑐵𑐮𑐶𑐦𑑅 𑐦𑐮𑑂𑐔𑐵𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐋𑐟𑐶𑐴𑐵𑐳𑐶𑐎 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐶𑐩𑐶𑐟𑑂𑐟 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟𑐮𑐶𑐳𑐾𑑄 𑐳𑐩𑑂𑐥𑐡𑐵 𑐱𑐵𑐏𑐵 𑐥𑑂𑐬𑐩𑐸𑐏 𑐬𑐵𑐩𑐐𑑀𑐰𑐶𑐣𑑂𑐡 𑐱𑑂𑐬𑐾𑐲𑑂𑐛, 𑐥𑐸𑐮𑐵𑑄𑐩𑑂𑐴 𑐰𑐜𑐵𑐀𑐢𑑂𑐫𑐎𑑂𑐲𑐮𑐶𑐳𑐾𑑄 𑐣𑐾𑐩𑐎𑐶𑐥𑐵 𑑙 𑐰𑐜𑐵 𑐳𑐩𑐶𑐟𑐶𑐫𑐵 𑐄𑐥𑐵𑐢𑑂𑐫𑐎𑑂𑐲 𑐖𑑂𑐘𑐵𑐣𑐳𑐵𑐐𑐬 𑐥𑑂𑐬𑐖𑐵𑐥𑐟𑐶, 𑐄𑐥𑐨𑑀𑐎𑑂𑐟𑐵 𑐳𑐩𑐶𑐟𑐶𑐫𑐵 𑐳𑐔𑐶𑐰 𑐀𑐲𑑂𑐚𑐮𑐵𑐮 𑐩𑐵𑐣𑐣𑑂𑐢𑐬 𑐰 𑐟𑐸𑐮𑐳𑐷𑐎𑐵𑐖𑐷 𑐩𑐵𑐣𑐣𑑂𑐢𑐬𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋