𑐣𑐾𑐥𑐵𑑅𑐫𑐵 𑐬𑐵𑐖𑑂𑐫𑐳𑐟𑑂𑐟𑐵𑐫𑑂 𑐴𑐾 𑐣𑑂𑐴𑑂𑐫𑐳𑑅
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)-𑐣𑐎𑑂𑐎𑐮𑐷 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷 𑐥𑑂𑐬𑐎𑐬𑐞𑐫𑐵 𑐎𑐵𑐬𑐞𑑄 𑐫𑐵𑐣𑐵𑑅 𑐣𑐾𑐥𑐵𑑅𑐫𑐵 𑐬𑐵𑐖𑑂𑐫 𑐳𑐟𑑂𑐟𑐵 𑐰 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷 𑐁𑐣𑑂𑐡𑑀𑐮𑐣 𑐣𑐶𑐟𑐵𑑄𑐫𑐵 𑐰𑐶𑐱𑑂𑐰𑐣𑐷𑐫𑐟𑐵 𑐢𑑂𑐰𑐳𑑂𑐟 𑐖𑐹𑐐𑐸 𑐏𑑃 𑐢𑐫𑐵𑐴𑑅𑐐𑐸 𑐡𑐸 𑑋
𑐣𑐾𑐥𑐵𑐮𑐫𑑂 𑐬𑐵𑐖𑑂𑐫𑐳𑐟𑑂𑐟𑐵𑐫𑑂𑑂 𑐠𑑂𑐫𑑄𑐥𑐶𑑄𑐳𑑄 𑐴𑐾 𑐐𑐿𑐬 𑐎𑐵𑐣𑐸𑐣𑐷 𑐖𑑂𑐫𑐵 𑐫𑐵𑐂𑐐𑐸 𑐏𑑃 𑐠𑑂𑐰 𑐥𑑂𑐬𑐎𑐬𑐞𑑄 𑐥𑑂𑐬𑐩𑐵𑐞𑐶𑐟 𑐫𑐵𑐣𑐵 𑐧𑐶𑐄𑐐𑐸 𑐡𑐸𑐳𑐵 𑐠𑐸𑐎𑐶𑑄 𑐫𑐵𑐣𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐖𑐐𑐟𑐫𑑂 𑐣𑐾𑐥𑐵𑑅𑐫𑐵 𑐬𑐵𑐖𑑂𑐫𑐳𑐟𑑂𑐟𑐵𑐫𑐵 𑐰𑐶𑐱𑑂𑐰𑐳𑐣𑐷𑐫𑐟𑐵 𑐐𑐸𑐩𑐾 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐁𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐏𑑂𑐫𑐮𑑄 𑐣𑐾𑐥𑐵𑑅𑐫𑐵 𑐬𑐵𑐖𑑂𑐫𑑄 𑐴𑐾 𑐫𑐵𑑅𑐐𑐸 𑐖𑑂𑐫𑐵𑐏𑑃 𑐳𑐩𑐾𑐟 𑐎𑐵𑐣𑐸𑐣 𑐳𑐩𑑂𑐩𑐟 𑐖𑐹 𑐮𑐵𑐎𑐶 𑐩𑐖𑐹, 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐹𑐮𑑂𑐫 𑐩𑐵𑐣𑑂𑐫𑐟𑐵 𑐀𑐣𑐸𑐬𑐸𑐥 𑐖𑐹 𑐮𑐵𑐎𑐶 𑐩𑐖𑐹 𑐢𑐎𑐵𑑅 𑐱𑑄𑐎𑐵𑐫𑐵 𑐩𑐶𑐏𑐵𑑄 𑐳𑑂𑐰𑐂𑐐𑐸 𑐏𑑃 𑐣𑑄 𑐰𑐶𑐖𑑂𑐘𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋
𑐠𑑂𑐰 𑐥𑑂𑐬𑐎𑐬𑐞𑐫𑑂 𑐖𑑂𑐰𑑄𑐥𑐶𑑄 𑐄𑐔𑑂𑐔𑐥𑐡𑐳𑑂𑐠 𑐣𑐾𑐟𑐵 𑐰 𑐳𑐬𑐎𑐵𑐬𑐷 𑐥𑐡𑐵𑐢𑐶𑐎𑐵𑐬𑐷𑐟𑐫𑑂𑐳𑑄 𑐥𑑂𑐬𑐴𑐬𑐷𑐫𑐵𑐟 𑐧𑐶𑐄𑐐𑐸 𑐧𑐫𑐵𑐣𑐫𑑂 𑐠𑑅𑐥𑐶𑑄𑐳𑑄 𑐫𑐵𑐣𑐵𑐐𑐸 𑐀𑐥𑐬𑐵𑐢𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑐣𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐩𑐶𑐳𑑄 𑐥𑑂𑐬𑐴𑐬𑐷𑐫𑐵𑐟 𑐧𑐶𑐄𑐐𑐸 𑐧𑐫𑐵𑐣 𑐣𑑄 𑐢𑐩𑐵𑐢𑐩 𑐳𑐵𑐬𑑂𑐰𑐖𑐣𑐶𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐠𑐵𑐥𑐶 𑐀𑐡𑐵𑐮𑐟𑐫𑑂 𑐧𑐷𑐐𑐸 𑐧𑐫𑐵𑐣𑐫𑑂 𑐄𑐩𑐶𑐳𑑄 𑐠𑑅𑐥𑐶𑑄𑐳𑑄 𑐥𑑂𑐬𑐴𑐬𑐷𑐫𑐵𑐟 𑐢𑐫𑐵𑐐𑐸 𑐏𑑃 𑐳𑑂𑐰𑐷𑐎𑐵𑐬 𑐫𑐵𑐂 𑐰𑐵 𑐫𑐵𑐂 𑐩𑐏𑐸𑐣𑐶 𑐢𑐂𑐐𑐸 𑐏𑑃 𑐳𑑂𑐥𑐲𑑂𑐚 𑐩𑐖𑐹𑐣𑐶 𑑋 𑐀𑐫𑑂𑐣𑑄 𑐄𑐩𑐶𑐳𑑄 𑐠𑑅𑐥𑐶𑐣𑐶 𑐀𑐥𑐬𑐵𑐢 𑐳𑑂𑐰𑐷𑐎𑐵𑐬 𑐫𑐵𑐣𑐵 𑐴𑐫𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐫𑐵𑐣𑐵𑑅 𑐣𑐾𑐥𑐵𑑅𑐫𑐵 𑐬𑐵𑐖𑑂𑐫 𑐳𑐟𑑂𑐟𑐵𑐫𑑂 𑐠𑑂𑐫𑐣𑐷𑐥𑐶𑑄 𑐩𑐣𑐹𑐟𑐫𑑂𑐳𑑄 𑐣𑐷𑐟𑐶𑐐𑐟 𑐨𑑂𑐬𑐲𑑂𑐚𑐵𑐔𑐵𑐬 𑐫𑐵𑐣𑐵𑑅 𑐐𑐿𑐬𑐎𑐵𑐣𑐸𑐣𑐷 𑐖𑑂𑐫𑐵 𑐫𑐵𑐂𑐐𑐸 𑐖𑐸𑐫𑐵𑐔𑑂𑐰𑐣 𑐢𑐂𑐐𑐸 𑐏𑑃 𑐥𑑂𑐬𑐩𑐵𑐞𑐶𑐟 𑐖𑐹𑐐𑐸 𑐏𑑃 𑐣𑑄 𑐰𑐶𑐖𑑂𑐘 𑐳𑐹𑐟𑑂𑐬𑑄 𑐢𑐵𑑅𑐐𑐸 𑐡𑐸 𑑋
𑐀𑐠𑐾 𑐴𑐾 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷𑐟𑐫𑑂 𑐣𑐾𑐟𑐵 𑐚𑐾𑐎𑐣𑐵𑐠 𑐬𑐶𑐖𑐵𑐮𑑄 𑐣𑑄 𑐥𑑂𑐬𑐴𑐬𑐷 𑐳𑐩𑐎𑑂𑐲 𑐠𑑅𑐟 𑐰𑑅𑐐𑐸 𑐡𑑂𑐰𑐥𑑄𑐫𑐵𑐟 𑐁𑑄𑐱𑐶𑐎 𑐬𑐸𑐥𑑄 𑐳𑑂𑐰𑐷𑐎𑐵𑐬 𑐫𑐵𑑅𑐐𑐸 𑐡𑐸 𑑋 𑐬𑐶𑐖𑐵𑐮𑑄 𑐥𑑂𑐬𑐴𑐬𑐷𑐫𑐵𑐟 𑐧𑐫𑐵𑐣 𑐧𑐷𑐐𑐸 𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵 𑐐𑐶𑐬𑑀𑐴𑑄 𑐣𑐾𑐥𑐵𑑅𑐩𑐶𑐟𑐫𑑂𑐟 𑐣𑑄 𑐣𑐎𑑂𑐎𑐮𑐷 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷 𑐡𑐫𑐾𑐎𑐵𑑅 𑐰𑐶𑐡𑐾𑐱 𑐕𑑂𑐰𑐫𑐾 𑐢𑐎𑐵𑑅 𑐥𑑂𑐬𑐳𑑂𑐟𑐵𑐰 𑐟𑑅𑐧𑐮𑐫𑑂 𑐠𑐩𑑂𑐴𑑄 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷𑐫𑐵𑐟 𑐳𑐩𑐳𑑂𑐫𑐵 𑐩𑐰𑐂𑐐𑐸 𑐏𑑅𑐳𑐵 𑐕𑑂𑐰𑑅𑐳𑐵𑑄 𑐖𑐶𑐄 𑐢𑐎𑐵𑑅 𑐳𑑂𑐰𑐷𑐎𑐺𑐟𑐶 𑐧𑐶𑐫𑐵𑐐𑐸 𑐏𑑃 𑐎𑑄𑐐𑐸 𑐡𑐸 𑑋 𑐄𑐮𑐶 𑐖𑐎 𑐩𑐏𑐸 𑐬𑐶𑐖𑐵𑐮𑑄 𑐣𑐾𑐥𑐵𑑅𑐩𑐶𑐟𑐫𑑂𑐟 𑐣𑐎𑑂𑐎𑐮𑐷 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷 𑐏𑑅 𑐢𑐎𑐵𑑅 𑐥𑑂𑐬𑐩𑐵𑐞𑐶𑐟 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐁𑐰𑐱𑑂𑐫𑐎 𑐳𑐶𑐦𑐵𑐬𑐶𑐳 𑐳𑐩𑐾𑐟 𑐎𑐫𑐵 𑐧𑐶𑐫𑐵𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋
𑐬𑐶𑐖𑐵𑐮𑐫𑐵 𑐠𑑂𑐰 𑐨𑐹𑐩𑐶𑐎𑐵𑑄 𑐫𑐵𑐣𑐵𑑅 𑐁𑑅 𑐨𑐸𑐚𑐵𑐣𑐷 𑐖𑐣𑐟𑐵𑑄 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰 𑐩𑐵𑐣𑐰 𑐀𑐢𑐶𑐎𑐵𑐬𑐫𑐵 𑐁𑐣𑑂𑐡𑑀𑐮𑐣𑐫𑐵 𑐰𑐶𑐱𑑂𑐰𑐳𑐣𑐷𑐫𑐟𑐵 𑐳𑐩𑐾𑐟 𑐐𑐸𑐩𑐾 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐨𑐸𑐚𑐵𑐣 𑐥𑐶𑐥𑐸𑐮𑑂𑐳 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵 𑐰𑐶𑐱𑑂𑐰𑐣𑐵𑐠 𑐥𑑁𑐜𑐾𑐮𑑄 𑐮𑐵 𑐠𑑂𑐰 𑐥𑑂𑐬𑐎𑐬𑐞𑑄 𑐫𑐵𑐣𑐵𑑅 𑐁𑑅 𑐨𑐸𑐚𑐵𑐣 𑐳𑐬𑐎𑐵𑐬𑑄 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐴𑐾 𑐣𑐾𑐥𑐵𑑅𑐫𑐵 𑐗𑐵𑐥𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐱𑐬𑐞𑐵𑐬𑑂𑐠𑐷 𑐦𑐸𑐎𑑂𑐎𑑄 𑐨𑐸𑐚𑐵𑐣𑐷 𑐩𑐏𑐸, 𑐄𑐎𑐷 𑐣𑐾𑐥𑐵𑑅𑐩𑐶𑐟𑐫𑑂𑐟 𑐣𑑄 𑐑𑐸𑐳𑐥𑐿𑐛 𑐫𑐵𑐎𑐵𑑅 𑐟𑐫𑐵𑐟𑑅𑐐𑐸 𑐡𑐸 𑐢𑐎𑐵𑑅 𑐧𑐶𑐫𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐥𑐸𑐲𑑂𑐚𑐶 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐁𑑅 𑐨𑐸𑐚𑐵𑐣𑐫𑐵 𑐣𑑂𑐴𑑂𑐫𑑅𑐣𑐾 𑐣𑐾𑐥𑐵𑑅 𑐰 𑐨𑐸𑐚𑐵𑐣𑐷 𑐱𑐬𑐞𑐵𑐬𑑂𑐠𑐷 𑐣𑐾𑐟𑐵𑐟𑐫𑑂𑐳𑑄 𑐏𑑃 𑐮𑑂𑐴𑐵𑐫𑐾𑐐𑐸 𑐣𑐿𑐟𑐶𑐎𑐟𑐵 𑐳𑐩𑐾𑐟 𑐟𑑄𑐎𑐾 𑐩𑐵𑐮𑐷𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋
𑐄𑐎𑐶𑑄 𑐠𑑂𑐰 𑐥𑑂𑐬𑐎𑐬𑐞𑐫𑐵𑐟 𑐣𑐾𑐥𑐵𑑅𑐫𑐵 𑐕𑐐𑐹 𑐨𑑂𑐬𑐲𑑂𑐚𑐵𑐔𑐵𑐬𑐫𑐵 𑐎𑐾𑐱 𑐖𑐎 𑐢𑐫𑐵𑑄 𑐩𑐐𑐵𑑅, 𑐠𑐸𑐎𑐶𑑄 𑐣𑐾𑐥𑐵𑑅 𑐰 𑐨𑐸𑐚𑐵𑐣𑐷 𑐥𑑂𑐬𑐎𑐬𑐞𑐫𑐵𑐟 𑐟𑐵𑑅𑐃 𑐟𑐎 𑐴𑐾 𑐮𑐶𑐔𑑂𑐰𑑅 𑐮𑐵𑐎𑐷 𑐎𑐠𑑄 ‘𑐜𑐾𑐩𑐾𑐖’ 𑐫𑐵𑐣𑐵 𑐧𑐷𑐐𑐸 𑐏𑑃 𑐣𑑄 𑐰𑐶𑐖𑑂𑐘𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐥𑑂𑐬𑐴𑐬𑐷𑐫𑐵 𑐖𑑂𑐫𑐵 𑐮𑐶𑐥𑐵 𑐁𑑅 𑐀𑐨𑐶𑐫𑐸𑐎𑑂𑐟𑐟𑐫𑑂𑐟 𑐀𑐡𑐵𑐮𑐟𑐥𑐵𑐏𑐾𑑄 𑐧𑐫𑐵𑐣 𑐎𑐵𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐷
LEAVE YOUR COMMENTS