𑐔𑐷𑐢𑑄𑐐𑐸 𑐥𑐟𑑂𑐬𑐶𑐎𑐵𑐟𑐫𑑂𑐟 𑐟𑑅𑐢𑑄𑐐𑐸 𑐩𑐵𑐬 !
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐕𑐵𑐥𑐵 𑐥𑐟𑑂𑐬𑐶𑐎𑐵𑐟𑐫𑑂𑐟 𑐳𑐬𑐎𑐵𑐬𑑄 𑐧𑐷𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐮𑑀𑐎 𑐎𑐮𑑂𑐫𑐵𑐞𑐎𑐵𑐬𑐷 𑐰𑐶𑐖𑑂𑐘𑐵𑐥𑐣 𑐠𑑂𑐰𑐴𑐾 𑐖𑐾𑐛 𑐩𑐴𑐶𑐣𑐵𑑄𑐣𑐶𑐳𑐾𑑄 𑐧𑐣𑑂𑐡 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐰𑐶𑐖𑑂𑐘𑐵𑐥𑐣 𑐧𑑀𑐬𑑂𑐜𑑄 𑐩𑑂𑐴𑐷𑐐 𑐕𑐐𑐹 𑐳𑐸𑐔𑑄 𑐥𑐶𑐟 𑐧𑐶𑐳𑐾𑑄 𑐕𑐵𑐥𑐵 𑐥𑐟𑑂𑐬𑐶𑐎𑐵𑐟𑐫𑑂𑐟 𑐄𑐩𑐶𑐐𑐸 𑐰𑐬𑑂𑐐𑐷𑐎𑐬𑐞 𑐎𑐠𑑄 𑐰𑐶𑐖𑑂𑐘𑐵𑐥𑐣 𑐰𑐵𑐥𑐟 𑐥𑐸𑐮𑐾𑐩𑐵𑑅𑐐𑐸 𑐢𑑂𑐫𑐧𑐵 𑐳𑐬𑐎𑐵𑐬𑑄 𑐕𑑂𑐰𑐫𑐵 𑐩𑐴𑑅𑐐𑐸 𑐎𑐵𑐬𑐞𑑄 𑐫𑐵𑐣𑐵𑑅 𑐖𑐾𑐛 𑑑𑑕 𑐐𑐟𑐾 𑐮𑐶𑐥𑐵 𑐰𑐶𑐖𑑂𑐘𑐵𑐥𑐣 𑐧𑐷 𑐩𑐦𑐂𑐐𑐸 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋
𑐮𑑀𑐎𑐎𑐮𑑂𑐫𑐵𑐞𑐎𑐵𑐬𑐷 𑐰𑐶𑐖𑑂𑐘𑐵𑐥𑐣 𑐩𑐧𑐷𑐐𑐸 𑐧𑑀𑐬𑑂𑐜𑐫𑐵 𑐠𑑂𑐰 𑐣𑐶𑐬𑑂𑐞𑐫𑐫𑐵𑐟 𑐥𑐟𑑂𑐬𑐎𑐵𑐬𑐟𑐫𑑂𑐳𑑄 𑐢𑐵𑑅𑐳𑐵 𑐰𑐶𑐬𑑀𑐢 𑐫𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑, 𑐣𑐾𑐰𑐵𑑅 𑐬𑐵𑐲𑑂𑐚𑑂𑐬𑐶𑐫 𑐥𑐟𑑂𑐬𑐎𑐵𑐬 𑐡𑐧𑐹 𑐁𑐡𑐶 𑐳𑑄𑐳𑑂𑐠𑐵𑐟𑐫𑑂𑐳𑑄 𑐩𑑂𑐴𑐶𑐐𑑅 𑐰𑐶𑐖𑑂𑐘𑐵𑐥𑐣 𑐧𑑀𑐬𑑂𑐜𑐫𑐵 𑐖𑑂𑐫𑐵𑐎𑐸𑐠𑐶𑐂 𑐢𑐬𑑂𑐣𑐵 𑐧𑐶𑐳𑐾𑑄 𑐰𑐶𑐖𑑂𑐘𑐵𑐥𑐣 𑐧𑐣𑑂𑐡 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫𑐫𑐵 𑐰𑐶𑐬𑑀𑐢 𑐫𑐵𑑅𑐐𑐸 𑐏𑑅 𑑋 𑐰𑐶𑐖𑑂𑐘𑐵𑐥𑐣 𑐩𑐧𑐷𑐐𑐸 𑐣𑐶𑐬𑑂𑐞𑐫 𑐮𑐶𑐟 𑐎𑐵𑐫𑐾𑐩𑐵𑑅 𑐢𑐎𑐵𑑅 𑐄𑐩𑐶𑐳𑑄 𑐖𑑀𑐜𑐡𑐵𑐬 𑐩𑐵𑐐 𑐫𑐵𑑅𑐐𑐸 𑐏𑑅 𑑋
𑐠𑑂𑐰𑐴𑐾 𑐗𑑂𑐰𑐮𑐫𑑂 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐩𑐴𑐵𑐳𑐔𑐶𑐰 𑐬𑑀𑐳𑐣 𑐥𑐸𑐬𑐷𑑄 𑐣𑑄 𑐩𑑂𑐴𑐶𑐐𑑅 𑐴𑐾 𑐕𑐐𑐹 𑐰𑐎𑑂𑐟𑐰𑑂𑐫 𑐥𑐶𑐟 𑐧𑐶𑐳𑐾𑑄 𑐰𑐶𑐖𑑂𑐘𑐵𑐥𑐣 𑐧𑑀𑐬𑑂𑐜𑐫𑐵 𑐠𑑂𑐰 𑐣𑐶𑐬𑑂𑐞𑐫𑑄 𑐎𑑀𑐬𑑀𑐣𑐵 𑐮𑐶𑐥𑐵 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐕𑐵𑐥𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐀𑐰𑐳𑑂𑐠𑐵𑐫𑐵𑐟 𑐗𑐣𑑂 𑐴𑐾 𑐠𑐵𑐎𑐸𑐎𑐵 𑐧𑐷 𑐢𑐵𑐳𑐾𑑄 𑐰𑐶𑐖𑑂𑐘𑐵𑐥𑐣 𑐧𑐣𑑂𑐡 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐮𑐶𑐟 𑐎𑐵𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐧𑑀𑐬𑑂𑐜𑐫𑐵 𑐠𑑂𑐰 𑐣𑐶𑐬𑑂𑐞𑐫𑑄 𑐔𑐷𑐢𑑄𑐐𑐸 𑐮𑐐𑐵𑐣𑐷 𑐰 𑐳𑑂𑐰𑐬𑑀𑐖𑐐𑐵𑐬𑐩𑐹𑐮𑐎 𑐕𑐵𑐥𑐵 𑐩𑐵𑐢𑑂𑐫𑐩𑐟𑐫𑑂𑐟 𑐳𑑄𑐎𑐚𑐫𑑂 𑐮𑐵𑐎𑐵 𑐧𑐷𑐐𑐸 𑐖𑐹𑐐𑐸𑐮𑐶𑑄 𑐰𑐶𑐖𑑂𑐘𑐵𑐥𑐣 𑐣𑐶𑐬𑐣𑑂𑐟𑐬 𑐖𑐸𑐂𑐩𑐵𑑅𑐐𑐸 𑐩𑐵𑐐 𑐣𑑄 𑐫𑐵𑑅𑐐𑐸 𑐡𑐸 𑑋
𑐀𑐠𑐾𑐴𑐾 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐸𑐮𑐶𑑄 𑐣𑑄 𑐕𑐐𑐹 𑐰𑐎𑑂𑐟𑐰𑑂𑐫 𑐥𑐶𑐟𑐧𑐶𑐳𑐾𑑄 𑐮𑑀𑐎𑐎𑐮𑑂𑐫𑐵𑐞𑐎𑐵𑐬𑐷 𑐰𑐶𑐖𑑂𑐘𑐵𑐥𑐣 𑐧𑐷𑐐𑐸𑐮𑐶𑐂 𑐃 𑐎𑐠𑑄 𑐥𑐬𑐶𑐩𑐵𑐬𑑂𑐖𑐣 𑐫𑐵𑐫𑐾𑐩𑐵𑑅𑐐𑐸𑐮𑐶𑐂 𑐀𑑅𑐏𑐟𑑄 𑐳𑐘𑑂𑐔𑐵𑐬𑐎𑐬𑑂𑐩𑐷𑐟𑐫𑑂 𑐀𑐴𑐶𑐟 𑐖𑐸𑐂𑐎𑐠𑑄 𑐰𑐶𑐖𑑂𑐘𑐵𑐥𑐣 𑐧𑑀𑐬𑑂𑐜𑑄 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐢𑐵𑐳𑐾𑑄 𑐠𑐸𑐎𑐷 𑐠𑑅𑐥𑐶𑐣𑐶 𑐢𑑂𑐫𑐵𑐣𑐵𑐎𑐬𑑂𑐲𑐞 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵 𑐎𑐵𑐬𑐞𑑄 𑐀𑐠𑐾𑑄 𑐣𑑄 𑐳𑐩𑐳𑑂𑐫𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐰𑐶𑐖𑑂𑐘𑐵𑐥𑐣 𑐧𑑀𑐬𑑂𑐜𑑄 𑐢𑑂𑐫𑐧𑐵 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐎𑐵𑐬𑐞𑑄 𑐔𑐶𑐔𑐷𑐢𑑄𑐐𑐸 𑐮𑐐𑐵𑐣𑐷𑐂 𑐔𑐵𑐫𑐾𑐎𑐵𑐟𑑅𑐐𑐸 𑐳𑑂𑐰𑐬𑐵𑐖𑐐𑐵𑐬𑐩𑐹𑐮 𑐕𑐵𑐥𑐵 𑐳𑐘𑑂𑐔𑐵𑐬 𑐠𑐥 𑐢𑐬𑐵𑐳𑐵𑐫𑐷 𑐖𑐸𑐂𑐐𑐸 𑐏𑑃 𑐡𑐧𑐸𑐮𑐶𑑄 𑐢𑐵𑑅𑐐𑐸 𑐡𑐸 𑑋 𑐡𑐧𑐸𑐮𑐶𑑄 𑐰𑐶𑐖𑑂𑐘𑐵𑐥𑐣 𑐧𑑀𑐬𑑂𑐜𑐫𑐵 𑐣𑐶𑐬𑑂𑐞𑐫 𑐟𑐸𑐬𑐸𑐣𑑂𑐟 𑐮𑐶𑐟 𑐎𑐫𑐵𑑅 𑐮𑑀𑐎𑐎𑐮𑑂𑐫𑐵𑐞𑐎𑐵𑐬𑐷 𑐰𑐶𑐖𑑂𑐘𑐵𑐥𑐣𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐣𑐵 𑐢𑐵𑑅𑐐𑐸 𑐡𑐸 𑑋
LEAVE YOUR COMMENTS