𑐠𑑃𑐧𑐴𑐶𑐮𑐶𑐂 𑐳𑐸𑐔𑐸𑐎𑐸𑐔𑐸 𑐀𑐨𑐶𑐫𑐵𑐣
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐬𑐵𑐖𑐢𑐵𑐣𑐷𑐫𑐵 𑐥𑑂𑐬𑐩𑐸𑐏 𑐥𑐬𑑂𑐫𑐚𑐎𑐷𑐫 𑐮𑐵𑐐𑐵 𑐠𑑃𑐧𑐴𑐷 𑐳𑐸𑐔𑐸𑐎𑐸𑐔𑐸 𑐫𑐵𑐫𑐾𑐐𑐸 𑐀𑐨𑐶𑐫𑐵𑐣 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐡𑐾𑐫𑑂𑐫𑐵 𑐴𑐾 𑐥𑑂𑐬𑐩𑐸𑐏 𑐥𑐬𑑂𑐫𑐚𑐎𑐷𑐫 𑐮𑐵𑐐𑐵 𑐠𑑃𑐧𑐴𑐷𑐫𑐵𑐟 𑐳𑐦𑐵, 𑐳𑑂𑐰𑐔𑑂𑐕 𑐰 𑐥𑐬𑑂𑐫𑐚𑐎𑐩𑐿𑐟𑑂𑐬𑐷 𑐡𑐫𑐾𑐎𑐾𑐐𑐸 𑐮𑑂𑐫𑐵𑐏𑑄 𑐠𑑂𑐰 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋
𑐛𑐩𑐾𑐮 𑐥𑐬𑑂𑐫𑐚𑐣 𑐰𑐶𑐎𑐵𑐳 𑐥𑐬𑐶𑐲𑐡𑑂𑐫𑐵 𑐳𑐎𑑂𑐬𑐶𑐫𑐟𑐵𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑐣𑐾𑐥𑐵𑐮 𑐥𑑂𑐬𑐴𑐬𑐷 𑐠𑑃𑐧𑐴𑐷 𑐮𑐵𑐐𑐵 𑐥𑐬𑑂𑐫𑐚𑐣 𑐰𑑂𑐫𑐰𑐳𑐵𑐫𑐷, 𑐳𑑂𑐠𑐵𑐣𑐷𑐫 𑐎𑑂𑐮𑐧, 𑐳𑑄𑐑𑐳𑑄𑐳𑑂𑐠𑐵𑐮𑐶𑐳𑐾𑑄 𑐳𑑂𑐠𑐵𑐣𑐷𑐫𑐰𑐵𑐳𑐷 𑐠𑑃𑐧𑐴𑐷 𑐮𑐵𑐐𑐵 𑐳𑐸𑐔𑐸𑐎𑐸𑐔𑐸 𑐫𑐵𑐫𑐾𑐐𑐸 𑐀𑐨𑐶𑐫𑐵𑐣𑐫𑑂 𑐮𑐐𑐾 𑐖𑐹𑐐𑐸 𑐏𑑅 𑑋
‘𑐗𑐷𑐐𑐸 𑐠𑑃𑐧𑐴𑐷, 𑐳𑐦𑐵 𑐠𑑃𑐧𑐴𑐷’𑐫𑐵 𑐣𑐵𑐬𑐵 𑐧𑐶𑐫𑐵𑑅 𑐰𑑄𑐐𑐸 𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐠𑑂𑐰 𑐠𑑃𑐧𑐴𑐷 𑐳𑐸𑐔𑐸𑐎𑐸𑐔𑐸 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑑋 𑐀𑐨𑐶𑐫𑐵𑐣𑐫𑐵 𑐗𑑂𑐰𑐮𑐫𑑂 𑐠𑑃𑐧𑐴𑐷𑐫𑐵 𑐩𑐸𑐏𑑂𑐫 𑐳𑐟𑐎 𑐎𑑂𑐲𑐾𑐟𑑂𑐬 𑐮𑐶𑐳𑐾𑑄 𑐐𑐮𑑂𑐮𑐷, 𑐡𑐸𑐣𑐾𑐫𑐵 𑐔𑐸𑐎𑐫𑑂 𑐣𑑄 𑐳𑐸𑐔𑐸𑐎𑐸𑐔𑐸 𑐫𑐵𑑅𑐐𑐸 𑐏𑑅 𑑋 𑐠𑑃𑐧𑐴𑐷𑐫𑐵𑐟 𑐳𑐦𑐵 𑐰 𑐥𑐬𑑂𑐫𑐚𑐎𑐩𑐿𑐟𑑂𑐬𑐷 𑐡𑐫𑐾𑐎𑐾𑐐𑐸 𑐀𑐨𑐶𑐫𑐵𑐣𑐎𑐠𑑄 𑐳𑐸𑐔𑐸𑐎𑐸𑐔𑐸 𑐖𑑂𑐫𑐵𑐗𑑂𑐰𑑅 𑐳𑑄𑐔𑐵𑐮𑐣 𑐫𑐵𑐣𑐵𑐐𑐸 𑐥𑐬𑐶𑐲𑐡𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋
𑐀𑐨𑐶𑐫𑐵𑐣𑐫𑐵 𑐳𑐩𑐷𑐎𑑂𑐲𑐵 𑐫𑐵𑐣𑐵𑑅 𑐰𑐂𑐐𑐸 𑐡𑐶𑐣𑐫𑑂 𑐐𑐸𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐰 𑐠𑑃𑐧𑐴𑐷𑐫𑐵𑐟 𑐀𑐗 𑐐𑐸𑐎𑐠𑑄 𑐳𑐱𑐎𑑂𑐟 𑐰 𑐥𑑂𑐬𑐨𑐵𑐰𑐎𑐵𑐬𑐷 𑐫𑐵𑐫𑐾 𑐦𑐂 𑐢𑐂𑐐𑐸 𑐏𑑃𑐫𑑂 𑐠𑑃𑐧𑐴𑐷𑐫𑐵 𑐥𑐬𑑂𑐫𑐚𑐣 𑐰𑑂𑐫𑐰𑐳𑐵𑐫𑐷 𑐰 𑐕𑐾𑑃𑐠𑐸𑐰𑐵𑑅𑐫𑐵 𑐳𑐮𑑂𑐮𑐵𑐴 𑐳𑐸𑐗𑐵𑐰𑐫𑐵 𑐮𑐶𑐢𑑄𑐳𑐵𑐫𑑂 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐥𑐬𑐶𑐲𑐡𑑄 𑐢𑐵𑑅𑐐𑐸 𑐡𑐸 𑑋
𑐠𑑃𑐧𑐴𑐷𑐫𑐵𑐟 𑐥𑐬𑑂𑐫𑐚𑐎𑐩𑐿𑐟𑑂𑐬𑐷 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐠𑐷𑐠𑐷 𑐠𑐵𑐳𑐫𑑂 𑐳𑐷𑐳𑐷 𑐎𑑂𑐫𑐵𑐩𑐬𑐵 𑐖𑐜𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋
LEAVE YOUR COMMENTS