𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐐𑐵 𑐥𑐵𑐬𑐹 -

𑐳𑑂𑐠𑐵𑐥𑐶𑐟 𑐏𑐮𑑅𑐫𑐵 𑐗𑐶𑑄𑐥𑑂𑐫𑐎𑑂𑐰𑑅𑐐𑐸 𑐡𑑃𑐩𑐸𑑃𑐖𑑂𑐫𑐵

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)( 𑐳𑑂𑐠𑐵𑐥𑐶𑐟 𑐏𑐮𑑅𑐫𑐵 𑐗𑐶𑑄𑐥𑑂𑐫𑐎𑑂𑐰𑑅𑐐𑐸 𑐡𑑃𑐩𑐸𑑃𑐖𑑂𑐫𑐵 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐄𑐡𑐵𑐫 𑐳𑐩𑐸𑐡𑐵𑐫 𑐡𑐸𑐣𑐾 𑐠𑐷𑐠𑐷 𑐎𑐰𑑅𑐩𑐢𑑂𑐫𑐾 𑐕𑐐𑐹 𑐳𑑂𑐠𑐵𑐥𑐶𑐟 𑐏𑐮𑑅𑐫𑐵 𑐡𑑃𑐩𑐸𑑃𑐖𑑂𑐫𑐵 𑐠𑐣𑐫𑐵 𑐥𑐔𑐮𑐷 𑐨𑐿𑐬𑐰 𑐡𑑂𑐫𑑅𑐫𑐵𑐠𑐵𑐫𑑂 𑐖𑐹𑐐𑐸 𑐏𑑅 𑑋

𑐏𑐮𑑅𑐫𑐵 𑐣𑐵𑐫𑑅 𑐡𑐷𑐥𑐎 𑐳𑑂𑐠𑐵𑐥𑐶𑐟𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐏𑐮𑑅𑐫𑐵 𑐳𑐮𑑂𑐮𑐵𑐴𑐎𑐵𑐬 𑐎𑐺𑐲𑑂𑐞𑐴𑐬𑐷 𑐳𑑂𑐠𑐵𑐥𑐶𑐟𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐡𑑃𑐩𑐸𑑃𑐖𑑂𑐫𑐵𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐠𑐵𑐥𑐶𑐟 𑐳𑐩𑐸𑐡𑐵𑐫𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐐𑐟𑐶𑐰𑐶𑐢𑐶 𑐰 𑐖𑑂𑐫𑐵𑐗𑑂𑐰𑑅𑐫𑐵𑐟 𑐎𑑅𑐑𑐵𑐣𑐵 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐳𑐩𑑂𑐥𑐵𑐡𑐣 𑐫𑐵𑐣𑐵𑑅 𑐟𑐫𑐵𑐬 𑐫𑐵𑐣𑐵𑐡𑐷𑐐𑐸 𑐏𑐮𑑅𑐫𑐵 𑐏𑑂𑐰𑐵𑑅𑐥𑑁𑐫𑐵 𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐏𑐮𑑅𑐫𑐵 𑐡𑐸𑐖𑑅 𑐥𑑂𑐬𑐩𑐶𑐮 𑐳𑑂𑐠𑐵𑐥𑐶𑐟𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐕𑐶𑐫𑐵 𑐡𑐸𑐣𑐾 𑐡𑐶𑐰𑑄𑐐𑐟 𑐖𑐸𑐫𑐵𑐡𑐷𑐥𑐶𑑄 𑐏𑐮𑑅𑐫𑐵 𑐖𑑅𑐥𑐶𑐣𑐶𑐐𑐸 𑐮𑐸𑐩𑐣𑑂𑐟𑐶𑐂 𑐕𑐐𑐹 𑐩𑐶𑐣𑐾𑐚 𑐩𑑁𑐣 𑐢𑐵𑐬𑐞 𑐣𑑄 𑐫𑐵𑑅𑐐𑐸 𑐏𑑅 𑑋 𑐡𑑃𑐩𑐸𑑃𑐖𑑂𑐫𑐵𑐫𑑂 𑐏𑐮𑑅𑐫𑐵 𑐕𑑂𑐫𑐵𑐘𑑂𑐖𑐾 𑐖𑑂𑐘𑐵𑐣𑐾𑐣𑑂𑐡𑑂𑐬 𑐳𑑂𑐠𑐵𑐥𑐶𑐟𑑄 𑐥𑑂𑐬𑐐𑐟𑐶 𑐰𑐶𑐰𑐬𑐞 𑐰 𑐡𑐵𑑄𑐨𑐬𑐶𑑄 𑐮𑐎𑑂𑐲𑑂𑐩𑐞 𑐳𑑂𑐠𑐵𑐥𑐶𑐟𑑄 𑐁𑐬𑑂𑐠𑐶𑐎 𑐰𑐶𑐰𑐬𑐞 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄, 𑐏𑐮𑑅𑐫𑐵 𑐣𑐵𑐫𑑅𑐮𑐶𑐳𑐾𑑄 𑐳𑐸𑐰𑐬𑑂𑐞𑐎𑐵𑐖𑐷 𑐳𑑂𑐠𑐵𑐥𑐶𑐟, 𑐥𑐾𑑂𑐬𑐩𑐎𑐵𑐖𑐷 𑐳𑑂𑐠𑐵𑐥𑐶𑐟, 𑐣𑐣𑑂𑐡𑐬𑐟𑑂𑐣 𑐳𑑂𑐠𑐵𑐥𑐶𑐟, 𑐱𑑂𑐬𑐷𑐡𑐶𑐐𑐸𑐏𑑂𑐫𑑅 𑐐𑐸𑐠𑐶𑐫𑐵 𑐕𑑂𑐫𑐵𑐘𑑂𑐖𑐾 𑐥𑑂𑐬𑐖𑑂𑐘𑐵𑐬𑐟𑑂𑐣 𑐟𑐸𑐮𑐵𑐢𑐬, 𑐟𑐧𑑅 𑐳𑐩𑐵𑐖𑐫𑐵 𑐣𑐵𑐫𑑅 𑐳𑐸𑐬𑑂𑐫𑐬𑐟𑑂𑐣 𑐟𑐵𑐩𑑂𑐬𑐵𑐎𑐵𑐬𑑄 𑐨𑐶𑑄𑐟𑐸𑐣𑐵 𑐣𑑂𑐰𑐔𑐸𑐮𑐶𑐳𑐾𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐳𑑂𑐠𑐵𑐥𑐶𑐟 𑐳𑐩𑐸𑐡𑐵𑐫𑐫𑐵 𑐖𑑂𑐫𑐵𑐠𑑅𑐖𑐶𑐠𑐶𑐥𑐶𑑄𑐟 𑐴𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐜𑐵. 𑐥𑑂𑐬𑐾𑐩𑐬𑐟𑑂𑐣 𑐳𑑂𑐠𑐵𑐥𑐶𑐟, 𑐖𑑂𑐘𑐵𑐣𑐮𑐎𑑂𑐲𑑂𑐩𑐷 𑐳𑑂𑐠𑐵𑐥𑐶𑐟, 𑐥𑐹𑐞𑐬𑑂𑐬𑐟𑑂𑐣 𑐳𑑂𑐠𑐵𑐥𑐶𑐟, 𑐬𑐟𑑂𑐣𑐱𑑀𑐨𑐵 𑐳𑑂𑐠𑐵𑐥𑐶𑐟, 𑐬𑐸𑐥𑐾𑐣𑑂𑐡𑑂𑐬𑐬𑐟𑑂𑐣 𑐳𑑂𑐠𑐵𑐥𑐶𑐟, 𑐳𑐵𑐣𑐸𑐬𑐟𑑂𑐣 𑐳𑑂𑐠𑐵𑐥𑐶𑐟, 𑐩𑐵𑐞𑐶𑐎𑐬𑐟𑑂𑐣 𑐳𑑂𑐠𑐵𑐥𑐶𑐟, 𑐀𑐩𑐮𑐱𑑀𑐨𑐵 𑐳𑑂𑐠𑐵𑐥𑐶𑐟, 𑐣𑐣𑑂𑐡𑐩𑐵𑐣 𑐳𑑂𑐠𑐵𑐥𑐶𑐟 𑐳𑐸𑐱𑐶𑐮𑐵 𑐳𑑂𑐠𑐵𑐥𑐶𑐟𑐫𑐵𑐟 𑐣𑐾𑐰𑐵𑑅 𑐥𑐬𑐩𑑂𑐥𑐬𑐵𑐎𑐠𑑄 𑐏𑑂𑐫𑐾𑑄 𑐳𑐐𑑄𑐮𑐶𑐳𑐾𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅, 𑐡𑐾𑐕𑐵 𑐡𑐾𑐕𑐵𑐣𑐵𑑅 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐡𑑃𑐩𑐸𑑃𑐖𑑂𑐫𑐵𑐫𑐵 𑐗𑑂𑐰𑐮𑐫𑑂 𑐱𑐶𑐎𑑂𑐲𑐵 𑐏𑑂𑐫𑐮𑐫𑑂 𑐄𑐟𑑂𑐎𑐺𑐲𑑂𑐚 𑐮𑑂𑐫𑐵𑑅 𑐴𑐫𑐵𑐡𑐷𑐥𑐶𑑄𑐟 𑐥𑐡𑐎 𑐰 𑐳𑐶𑐬𑐥𑐵𑑅 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐊𑐳𑐂𑐂𑐣𑐶𑐳𑐾𑑄 𑐰𑐶𑐡𑑂𑐫𑐵𑐰𑐵𑐬𑐶𑐢𑐷 𑐫𑐵𑐣𑐵𑐡𑐷𑐥𑐶𑑄𑐟 𑐳𑑄𑐑𑐬𑐟𑑂𑐣 𑐡𑐵𑐣𑐩𑐵𑐫𑐵 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐎𑐾𑐱𑐰𑐡𑐵𑐳 𑐴𑐶𑐬𑐵𑐡𑐾𑐰𑐷 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐡𑐵𑐣𑐬𑐟𑑂𑐣 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐖𑑂𑐫𑑀𑐟𑐶𑐬𑐟𑑂𑐣 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐩𑑀𑐴𑐣𑐩𑐵𑐣 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐳𑐵𑐣𑐸𑐬𑐟𑑂𑐣 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐬𑐟𑑂𑐣𑐎𑐵𑐖𑐷 𑐳𑐹𑐬𑑂𑐫𑐡𑐾𑐰𑐷 𑐴𑐣𑐵 𑐳𑑂𑐩𑐺𑐟𑐶 𑐳𑐶𑐬𑐥𑐵𑑅, 𑐖𑑂𑐘𑐵𑐣𑐱𑑀𑐨𑐵 𑐳𑐬𑐎𑐵𑐬𑐷 𑐖𑐵𑐐𑐷𑐬 𑐴𑐣𑐵 𑐰 𑐳𑐸𑐰𑐞𑐬𑑂𑐮𑐎𑑂𑐲𑑂𑐩𑐷 𑐳𑑂𑐩𑐺𑐟𑐶 𑐡𑐸𑐖𑑅 𑐴𑐣𑐵 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐠𑐸𑐎𑐠𑑄 𑐴𑐾 𑐣𑑂𑐫𑐟 𑐟𑐸𑐮𑐵𑐢𑐬 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐡𑐵𑐫 𑐎𑑂𑐬𑐶𑐎𑐾𑐚𑐫𑑂 𑐣𑑂𑐴𑐵𑐥 𑐮𑐵𑐎𑐾𑐟 𑐟𑐵𑑅𑐮𑐵𑑅𑐥𑐶𑑄 𑐏𑐮𑑅𑐫𑐵 𑐎𑐵𑐳𑐵𑐥𑐶𑑄𑐟 𑐣𑑄 𑐏𑑂𑐫𑐾𑑄 𑐳𑐐𑑄 𑐧𑐶𑐫𑐵𑑅 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐠𑐷𑐠𑐷 𑐰𑐶𑐴𑐵𑐬𑐫𑑂 𑐐𑐸𑐮𑐸𑐥𑐵𑑅 𑐡𑐵𑐣 𑐫𑐵𑐣𑐵𑐡𑐷𑐩𑑂𑐴 𑐐𑐸𑐮𑐸𑐥𑐵𑑅𑐬𑐟𑑂𑐣𑐫𑐵 𑐣𑐵𑐩𑑄 𑐩𑑂𑐴𑐳𑐶𑐄𑐩𑑂𑐴 𑐖𑐷𑐰𑐬𑐟𑑂𑐣 𑐳𑑂𑐠𑐵𑐥𑐶𑐟𑐫𑐵 𑐕𑐾𑑃𑐖𑑅𑐥𑐵𑐏𑐾𑑄 𑐖𑑂𑐫𑐵𑐠𑑅𑐖𑐶𑐠𑐶𑐥𑐶𑑄 𑐳𑐎𑐳𑐶𑐟𑑄 𑐐𑐸𑐮𑐸𑐥𑐵𑑅 𑐕𑐐𑑅 𑐕𑐐𑑅 𑐣𑑄 𑐡𑐾𑐕𑐵𑑅𑐐𑐸 𑐏𑑅 𑑋