𑐣𑑂𑐫𑐵𑐫𑐶𑐎 𑐳𑐩𑐶𑐟𑐶 𑐳𑐩𑑂𑐩𑐾𑐮𑐣 𑐎𑑂𑐰𑐔𑐵𑐮, 𑑑𑑑 𑐐𑐹 𑐧𑐸𑑃𑐡𑐵𑐫𑐵 𑐑𑑀𑐲𑐞𑐵𑐥𑐟𑑂𑐬 𑐖𑐵𑐬𑐷
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐣𑑂𑐫𑐵𑐫𑐶𑐎 𑐳𑐩𑐶𑐟𑐶 𑐣𑑂𑐴𑐵𑐥𑐵𑑄𑐐𑐸 𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐩𑐾𑐮𑐣 𑐎𑑂𑐰𑐔𑐵𑐮 𑑋 𑐣𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐳𑐩𑑂𑐩𑐾𑐮𑐣 𑑑𑑑 𑐐𑐹 𑐧𑐸𑑃𑐡𑐵𑐫𑐵 𑐣𑑂𑐫𑐵𑐫𑐶𑐎 𑐳𑐩𑐶𑐟𑐶 𑐫𑐾𑑃 𑐑𑑀𑐲𑐞𑐵𑐥𑐟𑑂𑐬 𑐖𑐵𑐬𑐷 𑐫𑐵𑐳𑐾 𑐎𑑂𑐰𑐔𑐵𑑅𑐐𑐸 𑐏𑑅 𑑋
𑐔𑐿𑐟 𑑑𑑕 𑐰 𑑑𑑖 𑐣𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐳𑐩𑑂𑐩𑐾𑐮𑐣𑐫𑐵 𑐄𑐮𑐾𑐖𑑂𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐥𑑂𑐬𑐔𑐞𑑂𑐜𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐳𑐩𑑂𑐩𑐾𑐮𑐣𑐫𑐵 𑐣𑐶𑐣𑑂𑐴𑐸𑐫𑐵 𑐡𑐶𑑄 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐎𑐵𑐫𑐩𑐩𑐸𑐎𑐵𑐫𑐩 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐶𑐱 𑐴𑐬𑐶𑐎𑐺𑐲𑑂𑐞 𑐎𑐵𑐬𑑂𑐎𑐷 𑐗𑐵𑐫𑐵𑐡𑐷𑐐𑐸 𑐏𑑅 𑑋
𑐳𑐩𑑂𑐩𑐾𑐮𑐣𑐫𑑂 𑐠𑐷𑐠𑐷 𑐣𑑂𑐫𑐵𑐐𑐹 𑐰𑐶𑐲𑐫𑐫𑑂 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅𑐳𑐵 𑐄𑐎𑐶𑐫𑐵𑐟 𑐳𑐩𑐹𑐴𑐐𑐟 𑐬𑐸𑐥𑑄 𑐳𑐴𑐮𑐴 𑐧𑑂𑐫𑐵𑐎𑐹𑐐𑐸 𑐏𑑅 𑑋 𑐰𑐫𑐵𑑄 𑐮𑐶𑐥𑐵 𑐳𑐩𑑂𑐩𑐾𑐮𑐣 𑐩𑐹𑐮 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐮𑐶𑐳𑐾𑑄 𑐫𑐾𑑃 𑐩𑐴𑐵𑐣𑐐𑐬 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑑑𑑑 𑐐𑐹 𑐧𑐸𑑃𑐡𑐵𑐫𑐵 𑐫𑐾𑑃 𑐑𑑀𑐲𑐞𑐵 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋
𑑑𑑑 𑐐𑐹 𑐧𑐸𑑃𑐡𑐵𑐫𑐵 𑐑𑑀𑐲𑐞𑐵𑐥𑐟𑑂𑐬𑐫𑑂 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣, 𑐥𑑂𑐬𑐔𑐮𑐶𑐟 𑐎𑐵𑐣𑐹𑐣, 𑐣𑑂𑐫𑐵𑐫𑐫𑐵 𑐩𑐵𑐣𑑂𑐫 𑐳𑐶𑐡𑑂𑐢𑐵𑐣𑑂𑐟𑐫𑐵 𑐮𑐶𑐢𑑄𑐳𑐵𑐫𑑂 𑐳𑑂𑐠𑐵𑐣𑐷𑐫𑐳𑑂𑐟𑐬𑐫𑑂 𑐧𑑂𑐰𑐮𑐣𑐷𑐐𑐸 𑐰𑐶𑐰𑐵𑐡𑐫𑐵 𑐳𑐬𑑂𑐰𑐳𑐸𑐮𑐨, 𑐫𑐵𑐎𑐣𑑄, 𑐣𑐶𑐲𑑂𑐥𑐎𑑂𑐲, 𑐥𑑂𑐬𑐨𑐵𑐰𑐎𑐵𑐬𑐷 𑐰 𑐖𑐣𑐄𑐟𑑂𑐟𑐬𑐡𑐵𑐫𑐷 𑐰𑐶𑐢𑐶𑐥𑐵𑐏𑐾𑑄 𑐳𑑄𑐧𑑀𑐢𑐣 𑐰 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸, 𑐰𑐶𑐰𑐵𑐡𑐫𑐵𑐟 𑐦𑐟𑑂𑐟𑐮𑐾 𑐩𑐾𑐮𑐩𑐶𑐮𑐵𑐥𑐫𑐵 𑐩𑐵𑐢𑑂𑐫𑐩𑑄 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐰𑐜𑐵𑐳𑑂𑐟𑐬𑐷𑐫𑑂 𑐩𑐾𑐮𑐩𑐶𑐮𑐵𑐥 𑐎𑐾𑐣𑑂𑐡𑑂𑐬 𑐳𑐎𑑂𑐬𑐶𑐫 𑐬𑐸𑐥𑑄 𑐳𑑄𑐔𑐵𑐮𑐣 𑐰 𑐎𑑂𑐬𑐶𑐫𑐵𑐱𑐷𑐮 𑐫𑐵𑐫𑐾𑐐𑐸, 𑐳𑐩𑐶𑐟𑐶𑐥𑐵𑐏𑐾𑑄 𑐖𑐹𑐐𑐸 𑐩𑐶𑐮𑐵𑐥𑐟𑑂𑐬 𑐰 𑐣𑐶𑐬𑑂𑐞𑐫 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐣𑐶𑑄𑐟𑐶𑑄 𑐰𑐶𑐱𑐾𑐲 𑐥𑑂𑐬𑐵𑐠𑐩𑐶𑐎𑐟𑐵 𑐧𑐷𑐐𑐸, 𑐡𑐎𑑂𑐲 𑐖𑐣𑐱𑐎𑑂𑐟𑐶, 𑐣𑐶𑐫𑐩𑐶𑐟 𑐥𑑂𑐬𑐱𑐶𑐎𑑂𑐲𑐞, 𑐥𑐵𑐬𑐡𑐬𑑂𑐱𑐷𑐟𑐵𑐫𑐵 𑐣𑐶𑑄𑐟𑐶𑑄 𑐐𑐵𑑄 𑐣𑐐𑐬𑐥𑐵𑐏𑐾𑑄 𑐄𑐥𑐫𑐸𑐎𑑂𑐟 𑐎𑐵𑐬𑑂𑐫𑐎𑑂𑐬𑐩 𑐰 𑐧𑐖𑐾𑐚𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸 𑐰𑐶𑐲𑐫 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋
𑐠𑐸𑐎𑐠𑑄 𑐴𑐾 𑐰𑐶𑐰𑐵𑐡 𑐣𑐶𑐬𑐸𑐥𑐞 𑐰 𑐣𑑂𑐫𑐵𑐫 𑐳𑐩𑑂𑐥𑐵𑐡𑐣 𑐫𑐵𑐫𑐾𑐧𑐮𑐫𑑂 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣, 𑐥𑑂𑐬𑐔𑐮𑐶𑐟 𑐎𑐵𑐣𑐹𑐣, 𑐎𑐵𑐬𑑂𑐫𑐰𑐶𑐢𑐶, 𑐣𑑂𑐫𑐵𑐫𑐫𑐵 𑐩𑐵𑐣𑑂𑐫 𑐳𑐶𑐡𑑂𑐢𑐵𑐣𑑂𑐟𑐫𑐵 𑐥𑐬𑐶𑐥𑐵𑐮𑐣𑐵 𑐫𑐵𑐫𑐾𑐐𑐸, 𑐣𑑂𑐫𑐵𑐫𑐶𑐎 𑐳𑐩𑐶𑐟𑐶𑐫𑐵 𑐁𑐔𑐵𑐬𑐳𑑄𑐴𑐶𑐟𑐵 𑐖𑐵𑐬𑐷 𑐫𑐵𑐣𑐵𑑅 𑐥𑐬𑐶𑐥𑐵𑐮𑐣𑐵 𑐫𑐵𑐫𑐾𑐐𑐸, 𑐳𑐩𑐶𑐟𑐶𑐫𑐵 𑐎𑑂𑐲𑐾𑐟𑑂𑐬𑐵𑐢𑐶𑐎𑐵𑐬𑐫𑐵𑐟 𑐠𑐥 𑐳𑑂𑐥𑐲𑑂𑐚 𑐫𑐵𑐫𑐾𑐟 𑐳𑑄𑐑𑐷𑐫 𑐳𑐬𑐎𑐵𑐬 𑐰 𑐳𑑄𑐑𑐷𑐫 𑐳𑑄𑐳𑐡𑐫𑐵𑐎𑐾 𑐩𑐵𑐐 𑐫𑐵𑐫𑐾𑐐𑐸, 𑐳𑐩𑐶𑐟𑐶𑐫𑐵 𑐥𑐡𑐵𑐢𑐶𑐎𑐵𑐬𑐷 𑐡𑐠𑐸𑐂 𑐣𑐶𑐫𑐩𑐶𑐟 𑐳𑐩𑑂𑐥𑐬𑑂𑐎, 𑐳𑐩𑐣𑑂𑐰𑐫, 𑐳𑐩𑑂𑐧𑐣𑑂𑐢, 𑐳𑐴𑐎𑐵𑐬𑑂𑐫 𑐳𑑄𑐔𑐵𑐬 𑐰 𑐎𑐵𑐬𑑂𑐫 𑐳𑐩𑑂𑐥𑐵𑐡𑐣𑐫𑑂 𑐊𑐎𑐬𑐸𑐥𑐟𑐵 𑐎𑐵𑐫𑐩 𑐫𑐵𑐫𑐾𑐐𑐸, 𑐬𑐵𑐲𑑂𑐚𑑂𑐬𑐶𑐫, 𑐥𑑂𑐬𑐡𑐾𑐱 𑐰 𑐖𑐶𑐮𑑂𑐮𑐵𑐳𑑂𑐟𑐬𑐫𑑂 𑐩𑐘𑑂𑐔𑐫𑐵 𑐳𑑄𑐬𑐔𑐣𑐵 𑐥𑑂𑐬𑐧𑐣𑑂𑐢 𑐫𑐵𑐫𑐾𑐐𑐸 𑐮𑐐𑐵𑐫𑐟𑐫𑐵 𑐧𑐸𑐡𑐵𑑃𑐟 𑐡𑐸𑐠𑑂𑐫𑐵𑐎𑐵𑑅 𑐑𑑀𑐲𑐞𑐵𑐥𑐟𑑂𑐬 𑐖𑐵𑐬𑐷 𑐫𑐵𑑅𑐐𑐸 𑐏𑑅 𑑋
LEAVE YOUR COMMENTS