𑐮𑐸𑑃𑐫𑐵 𑐨𑐵𑑅 𑐠𑐴𑐵𑑄 𑐰𑐣𑐵𑑅 𑐳𑑂𑐰𑐣𑐶𑐐𑑅𑐫𑐵 𑐮𑐸𑑃𑐖𑑂𑐫𑐵𑐳𑑅 𑐥𑑂𑐬𑐨𑐵𑐰𑐶𑐟
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐮𑐸𑑃 𑐰𑐴𑑅 𑐧𑐖𑐵𑐬𑐫𑑂 𑐨𑐵𑑅 𑐠𑐴𑐵𑑄 𑐰𑐣𑐾𑐰𑑄 𑐣𑐾𑐥𑐵𑐮𑐫𑑂 𑐮𑐸𑑃𑐫𑐵 𑐰𑑂𑐫𑐰𑐳𑐵𑐫 𑐛𑐥𑑂𑐥 𑐖𑐹𑐐𑐸 𑐏𑑃 𑐮𑐸𑑃𑐰𑐴𑑅 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋
𑐦𑐵𑐐𑐸𑐣 𑐩𑐴𑐶𑐣𑐵𑐫𑑂 𑐂𑐴𑐶𑐥𑐵𑐫𑐵 𑐮𑐐𑐣 𑐎𑑂𑐰𑐔𑐵𑐫𑐾𑐢𑐸𑑄𑐎𑐹𑐐𑐸 𑐰 𑐰𑐿𑐱𑐵𑐏𑐫𑑂 𑐣𑑄 𑐮𑐶𑐥𑐵𑑄𑐐𑐸 𑐰𑐵𑐮𑐫𑑂 𑐖𑐎 𑐮𑐐𑐣 𑐡𑐸𑐐𑐸 𑐎𑐵𑐬𑐞𑑄 𑐫𑐵𑐣𑐵𑑅 𑐠𑑁𑑄 𑐎𑐣𑑂𑐴𑐫𑑂 𑐮𑐸𑑃𑐫𑐵 𑐧𑐖𑐵𑐬 𑐛𑐥𑑂𑐥 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑐾𑐥𑐵𑐮 𑐳𑐸𑐣𑐔𑐵𑑃𑐡𑐷 𑐰𑑂𑐫𑐰𑐳𑐵𑐫𑐷 𑐩𑐴𑐵𑐳𑑄𑐑𑐫𑐵 𑐥𑐸𑐮𑐵𑑄𑐩𑑂𑐴 𑐀𑐢𑑂𑐫𑐎𑑂𑐲 𑐮𑐶𑐳𑐾𑑄 𑐧𑐖𑐵𑐬 𑐰𑐶𑐱𑑂𑐮𑐾𑐲𑐎 𑐟𑐾𑐖𑐬𑐟𑑂𑐣 𑐱𑐵𑐎𑑂𑐫𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑐹𑐳𑐟𑐎 𑐮𑐵𑐐𑐵𑐫𑑂 𑐔𑑂𑐰𑑄𑐐𑐸 𑐧𑐖𑐵𑐬𑐫𑑂 𑐕𑐸𑑄 𑐨𑐔𑐵 𑐰𑑂𑐫𑐵𑐥𑐵𑐬 𑐡𑐸𑐳𑐵𑑄 𑐩𑐸𑐎𑑂𑐎𑑄 𑐮𑐸𑑃 𑐥𑐳𑑅𑐫𑐵 𑐰𑑂𑐫𑐵𑐥𑐵𑐬 𑐢𑐵𑑅𑐳𑐵 𑐛𑐥𑑂𑐥 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐧𑐖𑐵𑐬𑐫𑑂 𑐮𑐸𑑃 𑐥𑑂𑐬𑐟𑐶 𑐍𑑄𑐱 𑑒𑑙𑑑𑑔 𑐜𑐮𑐬 𑐟𑐎𑐵 𑐎𑐵𑐫𑐩 𑐖𑐸𑐫𑐵𑑅 𑐣𑑂𑐴𑐹𑐐𑐸 𑐬𑐾𑐎𑐬𑑂𑐜 𑐟𑑅𑐐𑐸 𑐏𑑅𑐳𑐵 𑐰𑐫𑐵𑑄 𑐮𑐶𑐥𑐵 𑐮𑐸𑑃𑐂 𑐮𑐐𑐵𑐣𑐷 𑐫𑐵𑑅𑐥𑐶𑑄𑐳𑑄 𑐴𑐵𑐎𑐣𑑄 𑐮𑐸𑑃 𑐩𑐷𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐰𑑄 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐧𑐖𑐵𑐬𑐫𑑂 𑐮𑐸𑑃 𑐥𑑂𑐬𑐟𑐶𑐍𑑄𑐱 𑑑𑑙𑑐𑑖 𑐜𑐮𑐬 𑐟𑐎 𑐎𑐸𑐴𑐵𑑄 𑐰𑑅𑐐𑐸 𑐏𑑅 𑑋 𑐰𑐫𑐵𑑄 𑐮𑐶𑐥𑐵 𑐮𑐸𑑃𑐫𑐵 𑐨𑐵𑑅 𑐠𑐴𑐵𑑄 𑐰𑐣𑐵𑑅 𑐩𑑂𑐴𑐶𑐐𑑅 𑐮𑐸𑑃 𑐥𑑂𑐬𑐟𑐶𑐍𑑄𑐱 𑑑𑑙𑑙𑑒 𑐜𑐮𑐬 𑐎𑐵𑐫𑐩 𑐖𑐹𑐐𑐸 𑐏𑑅 𑑋 𑐀𑐩𑐾𑐬𑐶𑐎𑐵 𑐮𑐶𑐳𑐾𑑄 𑐠𑐷𑐠𑐷 𑐡𑐾𑐫𑑂𑐫𑐵 𑐧𑐿𑑄𑐎𑐟 𑐟𑐵𑐠 𑐥𑐮𑑂𑐚𑐾 𑐖𑐸𑐂𑐰𑑄 𑐮𑐐𑐵𑐣𑐷𑐎𑐬𑑂𑐟𑐵𑐟 𑐮𑐸𑑃𑐂 𑐁𑐎𑐬𑑂𑐲𑐶𑐟 𑐖𑐹𑐐𑐸 𑐏𑑅 𑑋
𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐧𑐖𑐵𑐬𑐫𑑂 𑐮𑐸𑑃𑐫𑐵 𑐨𑐵𑑅 𑐠𑐴𑐵𑑄 𑐰𑐣𑐾𑐰𑑄 𑐩𑑂𑐴𑐶𑐐𑑅 𑐣𑐾𑐥𑐵𑐮𑐫𑑂 𑐣𑑄 𑐮𑐸𑑃𑐫𑐵 𑐨𑐵𑑅 𑐠𑐴𑐵𑑄 𑐰𑑄𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐣𑐾𑐥𑐵𑐮𑐫𑑂 𑐮𑐸𑑃 𑐟𑑀𑐮𑐵𑑄 𑑑 𑐮𑐵𑐏 𑑙𑑐𑑐𑑒 𑐟𑐎𑐵 𑐎𑐵𑐫𑐩 𑐖𑐹𑐐𑐸 𑐏𑑅 𑑋 𑐩𑑂𑐴𑐶𑐐𑑅 𑐮𑐸𑑃 𑐟𑑀𑐮𑐵𑑄 𑐡𑑂𑐰𑑅𑐕𑐶 𑐟𑐎𑐵 𑐠𑐴𑐵𑑄 𑐰𑑄𑐐𑐸 𑐏𑑅 𑑋
𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐬𑐸𑐥𑑄 𑐰𑐫𑐵𑐔𑑂𑐰𑑄𑐐𑐸 𑐁𑐬𑑂𑐠𑐶𑐎 𑐩𑐣𑑂𑐡𑐷𑐫𑐵 𑐎𑐵𑐬𑐞𑑄 𑐣𑑄 𑐮𑐐𑐵𑐣𑐷𑐎𑐬𑑂𑐟𑐵𑐟 𑐠𑑁𑑄𑐎𑐣𑑂𑐴𑐫𑑂 𑐮𑐸𑑃𑐂 𑐮𑐐𑐵𑐣𑐷 𑐫𑐵𑐫𑐾𑐟 𑐂𑐔𑑂𑐕𑐸𑐎 𑐖𑐸𑐫𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐮𑐸𑑃𑐫𑐵 𑐨𑐵𑑅 𑐀𑐗 𑐣𑑄 𑐠𑐴𑐵𑑄 𑐰𑐣𑐾𑐦𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐮𑐸𑑃𑐫𑐵 𑐧𑐖𑐵𑐬𑐫𑑂 𑐮𑐸𑑃 𑐥𑑂𑐬𑐟𑐶𑐍𑑄𑐱 𑑒 𑐴𑐖𑐵𑐬 𑐜𑐮𑐬 𑐟𑐎 𑐠𑑂𑐫𑐣𑐾𑐦𑐂𑐐𑐸 𑐀𑐣𑐸𑐩𑐵𑐣 𑐫𑐵𑐣𑐵𑐟𑑅𑐐𑐸 𑐏𑑅𑐳𑐵𑑄 𑐰𑑄𑐐𑐸 𑐕𑐰𑐵𑑅 𑐣𑑂𑐴𑑂𑐫𑑅 𑑒𑑐𑑑𑑔 𑐜𑐮𑐬 𑐠𑑂𑐫𑐣𑐵𑑅 𑐣𑑂𑐴𑐵𑐥𑐵 𑐫𑐵𑐣𑐵𑐟𑑅𑐐𑐸 𑐥𑑂𑐬𑐎𑑂𑐲𑐾𑐥𑐞 𑐳𑐩𑐾𑐟 𑐴𑐵𑐔𑐵𑑄 𑐐𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐳𑑂𑐠𑐶𑐬 𑐖𑐸𑐫𑐵𑐔𑑂𑐰𑑄𑐐𑐸 𑐩𑐸𑐡𑑂𑐬𑐵 𑐳𑑂𑐦𑐷𑐟𑐶 𑐠𑐸𑐎𑐠𑑄 𑐴𑐾 𑐎𑐵𑐫𑐩 𑐖𑐸𑐂𑐐𑐸 𑐏𑑅𑐳𑐵 𑐀𑐗 𑐣𑑄 𑐮𑐸𑑃𑐫𑐵 𑐨𑐵𑑅 𑐠𑐴𑐵𑑄 𑐰𑐣𑐾𑐦𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐮𑐸𑑃𑐫𑐵 𑐧𑐖𑐵𑑅 𑐩𑐡𑐫𑐵𑑅 𑐧𑐿𑑄𑐎𑐟𑐫𑑂𑐳𑑄 𑐁𑐫𑐵𑐟 𑐫𑐵𑐣𑐵𑐟𑑅𑐐𑐸 𑑒 𑐎𑐾𑐖𑐷 𑐮𑐸𑑃 𑐣𑑄 𑐧𑐿𑑄𑐎𑐫𑑂 𑐟𑐸𑑄 𑐠𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐣𑑂𑐴𑐵𑐥𑐵 𑐮𑐸𑑃 𑐣𑑂𑐫𑐵𑐣𑐵𑐟𑑅𑐥𑐶𑑄𑐳𑑄 𑐁𑑅 𑐰𑐫𑐵𑑅 𑐮𑐸𑑃 𑐩𑐷𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐣𑑄 𑐧𑐖𑐵𑐬𑐫𑑂 𑐮𑐸𑑃 𑐀𑐨𑐵𑐰 𑐩𑐖𑐹𑐐𑐸 𑐏𑑃 𑐱𑐵𑐎𑑂𑐫𑑄 𑐎𑐣𑐵𑐡𑐶𑐮 𑑋
LEAVE YOUR COMMENTS