𑐳𑐸𑐎𑐸𑐩𑑂𑐧𑐵𑐳𑐷 𑐩𑐔𑐷𑐎𑐾𑐟 𑐀𑐣𑑂𑐟𑐬𑐶𑐩 𑐁𑐡𑐾𑐱
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑐵𑐬𑑂𑐰𑐖𑐣𑐶𑐎 𑐖𑐐𑑂𑐐𑐵 𑐩𑐶𑐔𑐾 𑐫𑐵𑐣𑐵𑑅 𑐡𑐫𑐾𑐎𑐵𑐟𑑅𑐐𑐸 𑐀𑐣𑐢𑐶𑐎𑐺𑐟 𑐳𑑄𑐬𑐔𑐣𑐵 𑐣𑑂𑐴𑐫𑑂𑐣𑑂𑐴𑐸𑐫𑐵 𑐡𑐸𑐣𑐾 𑐔𑐷𑐎𑐾𑐟 𑐧𑐶𑐄𑐐𑐸 𑐳𑐸𑐔𑑄𑐫𑐵𑐟 𑐟𑐟𑑂𑐎𑐵𑐮 𑐎𑐵𑐬𑑂𑐫𑐵𑐣𑑂𑐰𑐫𑐣 𑐩𑐫𑐵𑐫𑐾𑐟 𑐄𑐔𑑂𑐔 𑐀𑐡𑐵𑐮𑐟 𑐫𑐮𑑄 𑐀𑐮𑑂𑐥𑐎𑐵𑐮𑐷𑐣 𑐀𑐣𑑂𑐟𑐬𑐶𑐩 𑐁𑐡𑐾𑐱 𑐧𑐶𑐄𑐐𑐸 𑐡𑐸 𑑋
𑐣𑑂𑐫𑐵𑐫𑐵𑐢𑐷𑐱 𑐢𑐷𑐬𑐧𑐴𑐵𑐡𑐸𑐬 𑐔𑐣𑑂𑐡𑐫𑐵 𑐊𑐎𑐮 𑐂𑐖𑐮𑐵𑐳𑑄 𑐩𑑂𑐴𑐶𑐐𑑅 𑐡𑐬𑑂𑐟𑐵 𑐖𑐹𑐐𑐸 𑐬𑐶𑐚 𑐣𑐶𑐰𑐾𑐡𑐣𑐫𑑂 𑐳𑐸𑐣𑐸𑐰𑐵𑐂 𑐫𑐵𑐳𑐾𑑄 𑐣𑑂𑐴𑐫𑑂𑐣𑑂𑐴𑐸𑐫𑐵 𑐡𑐸𑐣𑐾 𑐩𑐔𑐷𑐎𑐮 𑐢𑐵𑑅𑐳𑐵 𑐩𑐴𑐵𑐣𑐐𑐬 𑐠𑐩𑑂𑐴𑑄 𑐳𑑄𑐬𑐔𑐣𑐵 𑐔𑐷𑐎𑐾𑐐𑐸 𑐖𑐸𑐂 𑐢𑐎𑐵𑑅 𑐖𑐵𑐬𑐷 𑐫𑐵𑑅𑐐𑐸 𑐳𑐸𑐔𑑄 𑐴𑐵𑐮𑐫𑐵𑐟 𑐎𑐵𑐬𑑂𑐫𑐵𑐣𑑂𑐰𑐫𑐣 𑐩𑐫𑐵𑐫𑐾𑐟 𑐁𑐡𑐾𑐱 𑐧𑐶𑐄𑐐𑐸 𑐏𑑅 𑑋 𑐠𑐸𑐐𑐸 𑐁𑐡𑐾𑐱𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸÷𑐩𑐧𑐷𑐐𑐸 𑐧𑐵𑐬𑐾 𑐳𑐴𑐮𑐴 𑐫𑐵𑐫𑐾𑐟 𑐀𑐡𑐵𑐮𑐟𑑄 𑐣𑐶𑐐𑐸𑐮𑐶𑑄 𑐥𑐎𑑂𑐲𑐫𑐵𑐟 𑐔𑐿𑐟 𑑒𑑖 𑐐𑐟𑐾 𑐄𑐥𑐳𑑂𑐠𑐶𑐟 𑐖𑐸𑐂𑐟 𑐣𑐶𑐬𑑂𑐡𑐾𑐱𑐣 𑐧𑐶𑐄𑐐𑐸 𑐡𑐸 𑑋
𑐩𑐴𑐵𑐣𑐐𑐬𑐫𑐵 𑐳𑐸𑐔𑑄𑐥𑐵𑐏𑐾𑑄 𑐥𑑂𑐬𑐨𑐵𑐰𑐶𑐟 𑐖𑐹𑐥𑐶𑑄 𑐰𑐳𑑂𑐟𑐷𑐫𑐵 𑐖𑐵𑐣𑐸𑐎𑐵 𑐥𑐵𑐏𑑂𑐬𑐾𑐮, 𑐱𑐸𑐨𑐩𑐵𑐫𑐵 𑐥𑐬𑐶𑐫𑐵𑐬 (𑐎𑐥𑐵𑐮𑐷), 𑐳𑐵𑐣𑐸 𑐟𑐵𑐩𑐵𑐒, 𑐥𑐰𑐶𑐟𑑂𑐬𑐵 𑐣𑐾𑐥𑐵𑐮𑐷, 𑐗𑐰𑐬𑐮𑐵𑐮 𑐄𑐬𑐵𑐰 𑐰 𑐣𑐾𑐥𑐵𑐮 𑐩𑐴𑐶𑐮𑐵 𑐊𑐎𑐟𑐵 𑐳𑐩𑐵𑐖𑑄 𑐩𑑄𑐎𑐵𑑅 𑐬𑐸𑐥𑑄 𑐰𑑄𑐐𑐸 𑐔𑐿𑐟 𑑑𑑖 𑐐𑐟𑐾 𑐄𑐔𑑂𑐔 𑐀𑐡𑐵𑐮𑐟 𑐫𑐮𑐫𑑂 𑐬𑐶𑐚 𑐡𑐬𑑂𑐟𑐵 𑐫𑐵𑑅𑐐𑐸 𑐏𑑅 𑑋 𑐬𑐶𑐚 𑐣𑐶𑐰𑐾𑐡𑐣𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑐬𑐵𑐲𑑂𑐚𑑂𑐬𑐶𑐫 𑐨𑐹𑐩𑐶 𑐁𑐫𑑀𑐐, 𑐀𑐢𑐶𑐎𑐵𑐬 𑐳𑐩𑑂𑐥𑐣𑑂𑐣 𑐧𑐵𑐐𑐩𑐟𑐶 𑐳𑐨𑑂𑐫𑐟𑐵 𑐊𑐎𑐷𑐎𑐺𑐟 𑐰𑐶𑐎𑐵𑐳 𑐳𑐩𑐶𑐟𑐶, 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐟𑐠𑐵 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑐫𑐵 𑐎𑐵𑐬𑑂𑐫𑐵𑐮𑐫, 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑐰 𑐀𑐢𑐶𑐎𑐵𑐬 𑐁𑐫𑑀𑐐 𑐮𑐐𑐵𑐫𑐟𑐫𑐵𑐟 𑐰𑐶𑐥𑐎𑑂𑐲𑐷 𑐡𑐫𑐾𑐎𑐵 𑐟𑑅𑐐𑐸 𑐡𑐸 𑑋
𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐰𑑄𑐐𑐸 𑐔𑐿𑐟 𑑑𑑑 𑐐𑐟𑐾 𑐏𑐸𑐳𑐶 𑐳𑐶𑐠𑐫𑑂 𑐔𑑂𑐰𑑄𑐐𑐸 𑐰 𑐏𑐸𑐳𑐶 𑐎𑐬𑐶𑐜𑑀𑐬𑐫𑐵 𑐳𑐵𑐬𑑂𑐰𑐖𑐣𑐶𑐎 𑐎𑑂𑐲𑐾𑐟𑑂𑐬𑐫𑑂 𑐀𑐣𑐢𑐶𑐎𑐺𑐟 𑐬𑐸𑐥𑑄 𑐡𑐫𑐾𑐎𑐵𑐟𑑅𑐐𑐸 𑐳𑑄𑐬𑐔𑐣𑐵 𑐔𑐷𑐎𑐶 𑐢𑐵𑐳𑐾𑑄 𑐳𑐸𑐔𑑄 𑐥𑐶𑐠𑑄𑐐𑐸 𑐏𑑅 𑑋 𑐳𑑄𑐬𑐔𑐣𑐵 𑐔𑐷𑐎𑐾𑐟 𑐫𑐾𑑃𑐩𑐣𑐥𑐵𑑄 𑐕𑐰𑐵𑑅𑐫𑐵 𑐃 𑐧𑐶𑐄𑐐𑐸 𑐏𑑅 𑑋
LEAVE YOUR COMMENTS