𑐫𑐾𑑃𑐫𑑂 𑐥𑐴𑐶𑐔𑐵𑐣𑐰𑐵𑐡𑐷 𑐥𑑂𑐬𑐡𑐬𑑂𑐱𑐣
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐥𑑂𑐬𑐡𑐾𑐱 𑑑 𑐫𑐵 𑐣𑐵𑑄 ‘𑐎𑑀𑐱𑐷 𑐥𑑂𑐬𑐡𑐾𑐱’ 𑐟𑐫𑐾𑐰𑑄 𑐠𑑂𑐰 𑐣𑐵𑑄 𑐏𑐵𑐬𑐾𑐖 𑐫𑐵𑐫𑐾𑐩𑐵𑑅 𑐢𑐵𑐳𑐾𑑄 𑐩𑑂𑐴𑐶𑐐𑑅 𑐫𑐾𑑃𑐫𑑂 𑐣𑑄 𑐥𑑂𑐬𑐡𑐬𑑂𑐱𑐣 𑐖𑐹𑐐𑐸 𑐡𑐸 𑑋 𑐎𑑀𑐱𑐷 𑐥𑑂𑐬𑐡𑐾𑐱 𑐣𑐵𑑄 𑐏𑐵𑐬𑐾𑐖𑐷𑐫𑐵 𑐩𑐵𑐐 𑐫𑐵𑐳𑐾𑑄 𑐩𑑂𑐴𑐶𑐐𑑅 𑐥𑐴𑐶𑐔𑐵𑐣𑐰𑐵𑐡𑐷 𑐳𑑄𑐑𑐳𑑄𑐳𑑂𑐠𑐵𑐟𑐫𑑂𑐳𑑄 𑐫𑐾𑑃𑐫𑐵 𑐦𑐶𑐧𑑂𑐰 𑐏𑑂𑐫𑐮𑑄𑐣𑐶𑐳𑐾𑑄 𑐳𑑄𑐳𑐡 𑐨𑐰𑐣 𑐟𑐎 𑐬𑑂𑐫𑐵𑐮𑐷 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋
𑐟𑐬 𑐧𑐵𑐣𑐾𑐱𑑂𑐰𑐬𑐫𑐵 𑐮𑑃𑐫𑑂 𑐟𑐸𑑄 𑐥𑑂𑐬𑐴𑐬𑐷𑐟𑐫𑑂𑐳𑑄 𑐣𑐶𑐲𑐾𑐢𑐶𑐟 𑐎𑑂𑐲𑐾𑐟𑑂𑐬 𑐢𑐎𑐵𑑅 𑐧𑐵𑐬𑑄 𑐑𑐾𑐬𑐾 𑐫𑐵𑐣𑐵 𑐟𑑅𑐐𑐸𑐮𑐶𑑄 𑐥𑑂𑐬𑐡𑐬𑑂𑐱𑐣 𑐀𑐣𑑄 𑐔𑑂𑐰𑐫𑑂 𑐣𑑂𑐴𑑂𑐫𑐵𑑅 𑐰𑐣𑐾 𑐩𑐦𑐸𑐟 𑑋 𑐄𑐎𑐶𑑄 𑐀𑐣 𑐴𑐾 𑐳𑐨𑐵 𑐫𑐵𑐳𑐾𑑄 𑐖𑑂𑐫𑐵𑐗𑑂𑐰𑑅 𑐎𑑂𑐰𑐔𑐵𑐫𑐾𑐎𑐹𑐐𑐸 𑐏𑑅 𑑋
𑐥𑑂𑐬𑐡𑐬𑑂𑐱𑐣𑐎𑐵𑐬𑐷𑐟𑐫𑑂𑐳𑑄 𑐎𑑀𑐱𑐷 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐋𑐟𑐶𑐴𑐵𑐳𑐶𑐎 𑐥𑐴𑐶𑐔𑐵𑐣𑐫𑐵 𑐁𑐢𑐵𑐬𑐫𑑂 𑐴𑐵𑐎𑐣𑑄 𑐣𑐵𑐩𑐵𑐎𑐬𑐞 𑐫𑐵𑐫𑐾𑐩𑐵𑑅𑐐𑐸, 𑐥𑑂𑐬𑐡𑐬𑑂𑐱𑐣𑐫𑐵 𑐗𑑂𑐰𑐮𑐫𑑂 𑐳𑐷𑐩𑑂𑐴 𑐥𑐡𑐩 𑐮𑐶𑐩𑑂𑐧𑐸𑐫𑐵𑐟 𑐱𑐴𑐶𑐡 𑐑𑑀𑐲𑐞𑐵 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐫𑐵𑑅𑐐𑐸 𑐏𑑅 𑑋
𑐥𑑂𑐬𑐡𑐬𑑂𑐱𑐣𑐫𑑂 𑐳𑐔𑐾𑐟 𑐥𑐴𑐶𑐔𑐵𑐣𑐰𑐵𑐡𑐷 𑐳𑑄𑐑𑐬𑑂𑐲 𑐳𑐩𑐶𑐟𑐶, 𑐎𑐶𑐬𑐵𑑃𑐟 𑐫𑐵𑐎𑑂𑐠𑐸𑐒 𑐔𑐸𑐩𑑂𑐮𑐸𑐒 𑐣𑐵𑐥𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹, 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑 𑐮𑐐𑐵𑐫𑐟𑐫𑐵 𑐥𑐴𑐶𑐔𑐵𑐣𑐰𑐵𑐡𑐷 𑐳𑑄𑐑𑐳𑑄𑐳𑑂𑐠𑐵𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐣𑐾𑐰𑐵𑑅 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 ‘𑐧𑐵𑐐𑐩𑐟𑐶’ 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐣𑑄 𑐳𑑂𑐰𑐷𑐎𑐵𑐬𑑂𑐫 𑐩𑐖𑐹 𑐢𑐵𑐳𑐾𑑄 𑐠𑑂𑐰 𑐣𑐵𑑄 𑐣𑑄 𑐴𑐶𑐮𑐵𑑅 𑐥𑐴𑐶𑐔𑐵𑐣𑐰𑐵𑐡𑐷 𑐣𑐵𑑄 𑐟𑐫𑐾𑐩𑐵𑑅 𑐢𑐎𑐵𑑅 𑐣𑐵𑐬𑐵 𑐠𑑂𑐰𑐫𑐾𑐎𑐷𑐐𑐸 𑐏𑑅 𑑋
𑐥𑐹𑐬𑑂𑐰𑐫𑑂 𑐎𑐶𑐬𑐵𑐟𑐷 𑐖𑐣𑐟𑐵𑑄 𑐥𑐴𑐶𑐔𑐵𑐣𑐫𑐵 𑐳𑑅 𑐠𑑂𑐰𑐫𑐾𑐎𑐵𑑅 𑐁𑐣𑑂𑐡𑑀𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐴𑐾 𑐂𑐮𑐫𑑂 𑐁𑑅 𑐬𑐵𑐖𑐢𑐵𑐣𑐷 𑐫𑐾𑑃𑐫𑑂 𑐣𑑄 𑐣𑐶𑐬𑐣𑑂𑐟𑐬 𑐁𑐣𑑂𑐡𑑀𑐮𑐣 𑐫𑐵𑐣𑐵 𑐰𑐣𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐠𑑂𑐰𑐴𑐾 𑐗𑑂𑐰𑐮𑐫𑑂 𑐥𑑂𑐬𑐡𑐾𑐱 𑑑 𑐫𑐵 𑐠𑐷𑐠𑐷 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐫𑐵 𑐰𑐜𑐵 𑐎𑐵𑐬𑑂𑐫𑐵𑐮𑐫𑐫𑑂 𑐰𑐣𑐵𑑅 𑐎𑐶𑐬𑐵𑐟𑐣𑐷 𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑐐𑑂𑐰𑑅𑐐𑐸 𑐟𑐵𑑅𑐦𑑂𑐰𑑅 𑐩𑑂𑐴𑐶𑐐𑑅 𑐥𑑂𑐬𑐴𑐬𑐷 𑐰𑐫𑐵𑑅
𑐟𑐕𑑂𑐫𑐵𑐣𑐵 𑐧𑐶𑐄𑐐𑐸 𑐡𑐸 𑑋
LEAVE YOUR COMMENTS