𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐶𑐟𑐫𑐵 𑐮𑑂𑐫𑐵𑑅 𑐴𑐵𑐣𑑄 𑐀𑐥𑑂𑐰𑐮
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐾𑐥𑐵𑐮𑐫𑑂 𑐎𑐵𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑑄𑐎𑑂𑐬𑐩𑐞 𑐠𑐴𑐵𑑄 𑐰𑐣𑐾𑐐𑐸 𑐎𑑂𑐬𑐩 𑐴𑐵𑐣𑑄 𑐣𑐶𑐬𑐣𑑂𑐟𑐬 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐖𑐎 𑐣𑐾𑐥𑐵𑐮𑐫𑑂 𑑑𑑔𑑒 𑐩𑑂𑐴 𑐎𑑀𑐬𑑀𑐣𑐵 𑐨𑐵𑐂𑐬𑐳 𑐳𑑄𑐎𑑂𑐬𑐩𑐞 𑐖𑐹𑐥𑐶𑑄 𑐮𑐹𑐐𑐸 𑐡𑐸 𑑋 𑐳𑑂𑐰𑐵𑐳𑑂𑐠𑑂𑐫 𑐟𑐠𑐵 𑐖𑐣𑐳𑑄𑐏𑑂𑐫𑐵 𑐩𑐣𑑂𑐟𑑂𑐬𑐵𑐮𑐫𑐫𑐵 𑐎𑐠𑑄 𑑑𑑐𑑗𑑙 𑐩𑑂𑐴𑐾𑐳𑐶𑐫𑐵 𑐣𑐩𑐸𑐣𑐵 𑐥𑐬𑐷𑐎𑑂𑐲𑐞 𑐫𑐵𑑅𑐧𑐮𑐫𑑂 𑑑𑑔𑑒 𑐩𑑂𑐴 𑐳𑑄𑐎𑑂𑐬𑐩𑐶𑐟 𑐮𑐹𑐐𑐸 𑐏𑑅 𑑋
𑐩𑐣𑑂𑐟𑑂𑐬𑐵𑐮𑐫𑐫𑐵 𑐎𑐠𑑄 𑐁𑐬𑐚𑐷 𑐥𑐷𑐳𑐷𑐁𑐬 𑐰𑐶𑐢𑐶𑑄 𑑓𑑘𑑑 𑐰 𑐊𑐣𑑂𑐚𑐷𑐖𑐾𑐣 𑐰𑐶𑐢𑐶𑑄 𑑖𑑙𑑘 𑐩𑑂𑐴𑐾𑐳𑐶𑐫𑐵 𑐥𑐬𑐷𑐎𑑂𑐲𑐞 𑐫𑐵𑑅𑐐𑐸𑐮𑐷 𑑑𑑔𑑒 𑐩𑑂𑐴 𑐳𑑄𑐎𑑂𑐬𑐩𑐞 𑐮𑐹𑐐𑐸 𑐏𑑅 𑑋 𑐄𑐎𑐷 𑐩𑐢𑑂𑐫𑐾 𑐁𑐬𑐚𑐷 𑐥𑐷𑐳𑐷𑐁𑐬 𑐰𑐶𑐢𑐶𑑄 𑑔𑑔 𑐰 𑐊𑐣𑑂𑐚𑐷𑐖𑐾𑐣 𑐰𑐶𑐢𑐶𑑄 𑑙𑑘 𑐩𑑂𑐴 𑐳𑑄𑐎𑑂𑐬𑐩𑐞 𑐥𑐸𑐲𑑂𑐚𑐶 𑐖𑐹𑐐𑐸 𑐩𑐣𑑂𑐟𑑂𑐬𑐵𑐮𑐫𑑄 𑐢𑐵𑑅𑐐𑐸 𑐡𑐸 𑑋 𑐠𑑁𑑄𑐎𑐣𑑂𑐴𑐫𑑂 𑐡𑐾𑐫𑑂𑐣𑑂𑐫𑑄𑐎𑑄 𑑑𑑖𑑓 𑐩𑑂𑐴 𑐳𑑄𑐎𑑂𑐬𑐩𑐶𑐟 𑐡𑐸𑐐𑐸 𑐏𑑃 𑐣𑑄 𑐩𑐣𑑂𑐟𑑂𑐬𑐵𑐮𑐫𑑄 𑐢𑐵𑑅𑐐𑐸 𑐡𑐸 𑑋
𑐠𑑂𑐰𑐴𑐾 𑐗𑑂𑐰𑐮𑐫𑑂 𑐰𑐶𑐎𑑂𑐬𑐩 𑐳𑑄𑐰𑐟𑑂𑐫𑐵 𑐣𑑂𑐴𑐹𑐡𑑃 𑐴𑐣𑐾𑐟 𑐨𑐵𑐬𑐟𑑄 𑐣𑐾𑐥𑐵𑑅 𑐮𑐶𑐴𑐵𑑄 𑐰𑐫𑐵𑐔𑑂𑐰𑑄𑐥𑐶𑑄 𑐣𑐾𑐥𑐵𑑅𑐩𑐶𑐟𑐫𑑂𑐎𑐾 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑑄𑐎𑑂𑐬𑐩𑐞 𑐖𑐸𑐫𑐵𑐔𑑂𑐰𑑄𑐐𑐸 𑐮𑐹𑐐𑐸 𑐏𑑃 𑐣𑑄 𑐳𑐷𑐡𑐸𑐐𑐸 𑐡𑐸 𑑋 𑐨𑐵𑐬𑐟𑐫𑑂 𑐣𑑄 𑐠𑑁𑑄𑐎𑐣𑑂𑐴𑐫𑑂𑑂 𑐣𑑂𑐴𑐶𑐠𑑄 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑑄𑐎𑑂𑐬𑐩𑐶𑐟𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋
LEAVE YOUR COMMENTS