𑐧𑑂𑐬𑐶𑐚𑐶𑐱 𑐳𑑄𑐐𑑂𑐬𑐴𑐵𑐮𑐫𑐫𑑂 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐰𑐮𑑂𑐬𑑂𑐜 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐳𑐣 (𑐜𑐧𑑂𑐮𑐸𑐊𑐣𑐌)𑐫𑐵 𑐁𑐴𑑂𑐰𑐵𑐣𑐫𑑂 𑐡𑑃𑐫𑑂𑐡𑐳𑑄 𑐠𑐾𑑄 𑐠𑐸𑐐𑐸𑐳𑐷 𑐣𑑄 𑐩𑐵𑐬𑑂𑐔 𑐩𑐴𑐶𑐣𑐵𑐫𑐵 𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐱𑐣𑐶𑐰𑐵𑑅𑐰𑐶𑐱𑑂𑐰𑐣𑑂𑐫𑑄𑐎𑑄 𑐣𑑂𑐫𑐣𑐵 𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐠𑑅𑐐𑐸 𑐴𑐾 𑐎𑐠𑑄 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳 𑐴𑐣 𑑋 𑐜𑐧𑑂𑐮𑐸𑐊𑐣𑐌𑐫𑐵 𑐁𑐴𑑂𑐰𑐵𑐣𑐎𑐠𑑄 𑐰𑑄𑐐𑐸 𑐩𑐵𑐬𑑂𑐔 𑑒𑑓 𑐱𑐣𑐶𑐰𑐵𑑅𑐎𑐸𑐣𑑂𑐴𑐸 𑐏𑐸𑐎𑑂𑐰𑑅𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳 𑐴𑑄𑐐𑐸 𑐏𑑅 𑑋
𑐀𑐩𑐾𑐬𑐶𑐎𑐵𑐫𑐵 𑐰𑐵𑐱𑐶𑑄𑐐𑐚𑐣 𑐜𑐶𑐳𑐷, 𑐧𑐵𑐮𑑂𑐚𑐶𑐩𑑀𑐬, 𑐩𑐾𑐬𑐶𑐮𑑂𑐫𑐵𑐞𑑂𑐜, 𑐳𑐶𑐫𑐵𑐚𑐮, 𑐧𑑀𑐳𑑂𑐚𑐣, 𑐣𑑂𑐫𑐹𑐫𑑀𑐬𑑂𑐎, 𑐱𑐶𑐎𑐵𑐐𑑀, 𑐥𑑀𑐬𑑂𑐚𑐮𑑂𑐫𑐵𑐞𑑂𑐜 𑐮𑐶𑐳𑐾𑑄 𑐩𑐾𑐩𑐾𑐐𑐸 𑐬𑐵𑐖𑑂𑐫 𑐰 𑐳𑐴𑐬𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐥𑐬𑐩𑑂𑐥𑐬𑐵𑐐𑐟 𑐬𑐸𑐥𑑄 𑐣𑐾𑐰𑐵𑑅 𑐨𑑂𑐰𑐫𑑂, 𑐣𑐾𑐰𑐵𑑅 𑐣𑐳𑐵 𑐖𑑂𑐰𑐮𑑄 𑐣𑐫𑐾𑐐𑐸, 𑐣𑐾𑐰𑐵 𑐥𑑂𑐫𑐵𑐏𑑄 𑐳𑑂𑐰𑐫𑐾𑐐𑐸, 𑐣𑐾𑐰𑐵𑑅 𑐮𑑀𑐎𑐳𑑄𑐐𑐷𑐟𑐫𑐵 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐠𑐷𑐠𑐷 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸, 𑐐𑑀𑐲𑑂𑐛𑐶 𑐳𑐴𑐮𑐴 𑐁𑐡𑐶 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐠𑑂𑐰 𑐡𑐶𑐰𑐳𑐫𑐵𑐟 𑐠𑑅𑐠𑑅𑐐𑐸 𑐴𑐾 𑐎𑐠𑑄 𑐴𑑄𑐐𑐸 𑐏𑑅 𑑋
𑐠𑐸𑐎𑐠𑑄 𑐴𑐾 𑐎𑑂𑐫𑐵𑐣𑐵𑐜𑐵, 𑐣𑑂𑐫𑐸𑐖𑐶𑐮𑑂𑐫𑐵𑐞𑑂𑐜, 𑐳𑑂𑐥𑐾𑐣, 𑐥𑑀𑐬𑑂𑐔𑐸𑐐𑐮, 𑐂𑐖𑐬𑐵𑐫𑐮, 𑐳𑑄𑐫𑐸𑐎𑑂𑐟 𑐀𑐬𑐧 𑐂𑐩𑐶𑐬𑐾𑐚𑑂𑐳, 𑐴𑐒𑐎𑐒, 𑐖𑐬𑑂𑐩𑐣 𑐮𑐐𑐵𑐫𑐟 𑐡𑐬𑑂𑐖𑐣𑑁𑑄 𑐡𑐾𑐫𑑂 𑐔𑑂𑐰𑑄𑐥𑐶𑑄𑐳𑑄 𑐣𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐠𑑂𑐰 𑐡𑐶𑐰𑐳𑐫𑐵𑐟 𑐴𑑄𑐐𑐸 𑐡𑐸𑐳𑐵 𑐫𑐾𑑃𑐫𑑂 𑐣𑑄 𑐰𑐳𑐣𑑂𑐟𑐥𑐸𑐮𑐶𑐂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮𑐫𑐵 𑐥𑑂𑐬𑐩𑐸𑐏 𑐁𑐟𑐶𑐠𑑂𑐫𑐟𑐵𑐫𑑂 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐠𑑂𑐰 𑐡𑐶𑐰𑐳 𑐴𑑄𑐐𑐸 𑐏𑑅 𑑋 𑐫𑐾𑑃 𑐧𑐵𑐴𑐾𑐎𑑄 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐡𑑂𑐰𑐵𑐮𑑂𑐏𑐵, 𑐔𑐶𑐟𑐰𑐣, 𑐥𑑀𑐏𑐬𑐵 𑐁𑐡𑐶 𑐠𑐵𑐳𑐫𑑂 𑐣𑑄 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳 𑐴𑑄𑐐𑐸 𑐡𑐸 𑑋
𑐠𑐸𑐏𑐾 𑐧𑐾𑐮𑐵𑐫𑐟𑐫𑑂 𑐣𑐾𑐰𑐵𑑅 𑐩𑐳𑑂𑐟𑐫𑑂𑐟 𑐣𑐾𑐰𑐵𑑅 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐮𑑂𑐫𑐵𑐏𑑄 𑐮𑐣𑑂𑐡𑐣𑐳𑑂𑐠𑐶𑐟 𑐧𑑂𑐬𑐶𑐚𑐶𑐱 𑐳𑑄𑐐𑑂𑐬𑐴𑐵𑐮𑐫𑐫𑐵 𑐨𑑂𑐬𑐩𑐞 𑐫𑐵𑐎𑐹𑐐𑐸 𑐡𑐸 𑑋 𑐠𑑂𑐰 𑐕𑐐𑐹 𑐀𑐖𑑂𑐫𑐵𑑅𑐐𑐸 𑐳𑑄𑐐𑑂𑐬𑐴𑐵𑐮𑐫 𑐏𑑅 𑐐𑐣, 𑐡𑑃𑐫𑑂𑐡𑐳𑑄 𑐰𑐶𑐱𑑂𑐰𑐫𑐵 𑐏𑑂𑐰𑐷𑐐𑐹 𑐮𑐏 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐀𑐰𑐮𑑀𑐎𑐣𑐎𑐬𑑂𑐟𑐵𑐟 𑐰𑐫𑐾𑐐𑐸 𑐫𑐵𑑅 𑑋 𑐠𑐷𑐠𑐷 𑐰𑐳𑑂𑐟𑐸𑐫𑐵 𑑘𑑐 𑐐𑐹 𑐮𑐏 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐀𑐨𑐶𑐮𑐏𑐾 𑐰 𑐔𑐫𑑂𑐡𑑂𑐰𑑅 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐠𑐷𑐠𑐷 𑐎𑐮𑐵𑐫𑐵 𑐰𑐳𑑂𑐟𑐸 𑐳𑑂𑐰𑐫𑐾𑐟 𑐳𑑄𑐐𑑂𑐬𑐴𑐵𑐮𑐫 𑐰𑐫𑐾𑐐𑐸 𑐫𑐵𑑅 𑑋
𑐠𑐸𑐐𑐸 𑐳𑑄𑐐𑑂𑐬𑐴𑐵𑐮𑐫𑐫𑑂 𑐣𑐾𑐥𑐵𑑅𑐫𑐵 𑐖𑐎 𑐣𑐷𑐣𑑂𑐫𑐵𑐳𑑅 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐰𑐳𑑂𑐟𑐸, 𑐀𑐨𑐶𑐮𑐾𑐏, 𑐳𑐵𑑄𑐳𑑂𑐎𑐺𑐟𑐶𑐎, 𑐳𑐵𑐩𑐵𑐖𑐶𑐎, 𑐥𑐸𑐬𑐵𑐟𑐵𑐟𑑂𑐰𑐶𑐎 𑐠𑐷𑐠𑐷 𑐩𑐴𑐟𑑂𑐰𑐫𑐵 𑐰𑐳𑑂𑐟𑐸𑐟 𑐡𑐸𑐐𑐸 𑐰𑐶𑐱𑑂𑐰𑐵𑐳 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐄𑐎𑐷𑐩𑐢𑑂𑐫𑐾 𑑒𑑓 𑐐𑐹 𑐢𑐵𑐟𑐸 𑐰 𑐮𑑂𑐰𑐴𑑄𑐫𑐵 𑐩𑐹𑐬𑑂𑐟𑐶𑐟 𑐁𑑅 𑐣𑑄 𑐠𑐣 𑐥𑑂𑐬𑐡𑐬𑑂𑐱𑐣𑐫𑑂 𑐟𑐫𑐵𑐟𑑅𑐐𑐸 𑐡𑐸 𑑋
𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑑂𑐟𑐬𑐫𑑂 𑐣𑐾𑐥𑐵𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐂𑐐𑐸 𑐠𑐸𑐥𑐶𑑄 𑐡𑐎𑑂𑐰𑑄 𑐎𑐮𑐵𑐫𑐵 𑐰𑐳𑑂𑐟𑐸𑐟 𑐳𑑂𑐰𑐣𑐶𑐐𑑅𑐫𑐵 𑐏𑐫𑐾𑐩𑐵𑑅 𑐢𑐎𑐵𑑅 𑐜𑐧𑑂𑐮𑐸𑐊𑐣𑐌𑐫𑐵 𑐣𑐵𑐫𑑅 𑐳𑑄𑐫𑐸𑐎𑑂𑐟 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐜𑐧𑑂𑐮𑐸𑐊𑐣𑐌 𑐫𑐸𑐎𑐾 𑐔𑑂𑐫𑐵𑐥𑑂𑐚𑐬𑑄 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐳𑑄𑐐𑑂𑐬𑐴𑐵𑐮𑐫 𑐀𑐰𑐮𑑀𑐎𑐣𑐫𑐵 𑐂𑐮𑐫𑑂 𑑒𑑐 𑐩𑑂𑐴 𑐩𑐳𑑂𑐟𑐫𑑂 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐩𑐳𑑂𑐟𑐫𑑂𑐟 𑐳𑑄𑐐𑑂𑐬𑐴𑐵𑐮𑐫 𑐀𑐰𑐮𑑀𑐎𑐣 𑐫𑐵𑐎𑐾𑐐𑐸 𑐣𑐵𑐥𑑄 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋
𑐄𑐐𑐸 𑐂𑐮𑐫𑑂 𑐣𑐾𑐥𑐵𑑅𑐮𑐶𑐳𑐾 𑐖𑑅𑐮𑐵𑐏𑑅𑐮𑐵 𑐡𑐾𑐫𑑂 𑐨𑐵𑐬𑐟, 𑐔𑐷𑐣, 𑐟𑐶𑐧𑑂𑐧𑐟, 𑐥𑐵𑐎𑐶𑐳𑑂𑐟𑐵𑐣𑐮𑐶𑐳𑐾𑐫𑐵 𑐎𑐮𑐵𑐫𑐵 𑐳𑐩𑑂𑐧𑐣𑑂𑐢, 𑐧𑑁𑐡𑑂𑐢 𑐎𑐮𑐵𑐎𑐺𑐟𑐶 𑐰 𑐳𑐩𑑂𑐥𑐡𑐵, 𑐩𑐴𑐵𑐥𑐸𑐬𑐸𑐲𑐫𑐵𑐟 𑐩𑑂𑐴𑐳𑐷𑐎𑐾𑐐𑐸 𑐰 𑐂𑐩𑐶𑐐𑐸 𑐮𑐎𑑂𑐲𑐞 𑐁𑐡𑐶 𑐧𑐵𑐬𑐾 𑐎𑐾𑐣𑑂𑐡𑑂𑐬𑐷𑐟 𑐖𑐸𑐫𑐵𑑅 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑑅𑐐𑐸 𑐏𑑅 𑑋
𑐜𑐧𑑂𑐮𑐸𑐊𑐣𑐌𑐫𑐵 𑐣𑐵𑐫𑑅 𑐱𑑂𑐬𑐾𑐲𑑂𑐛𑑄 𑐐𑑂𑐰𑐳𑐵𑑅 𑐐𑑂𑐰𑐫𑐵𑐡𑐷𑐐𑐸 𑐳𑑄𑐐𑑂𑐬𑐴𑐵𑐮𑐫 𑐀𑐰𑐮𑑀𑐎𑐣𑐫𑐵 𑐂𑐮𑐫𑑂 𑐊𑐳𑐌𑐊𑐊𑐳 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐰𑐬𑐶𑐲𑑂𑐛 𑐮𑐾𑐎𑑂𑐔𑐬𑐬 𑐜𑐵. 𑐳𑑂𑐚𑐾𑐦𑐵𑐣𑐷 𑐮𑑀𑐚𑐬, 𑐫𑐸𑐣𑐶𑐨𑐬𑑂𑐳𑐶𑐚𑐷 𑐎𑐮𑐾𑐖 𑐀𑐦 𑐮𑐣𑑂𑐡𑐣𑐫𑐵 𑐜𑐵. 𑐄𑐩𑐵 𑐥𑑂𑐬𑐢𑐵𑐣, 𑐁𑐬𑑂𑐎𑐶𑐚𑐾𑐎𑑂𑐚 𑐨𑐰𑐾𑐱 𑐥𑑂𑐬𑐢𑐵𑐣𑑄 𑐳𑐴𑐖𑐷𑐎𑐬𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS