𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐠𑑂𑐰 𑐟𑑂𑐬𑐫𑑀𑐡𑐱𑐷 -

𑐡𑐾𑐫𑑂 𑐡𑐧𑐹 𑐫𑐾𑑃𑐫𑐵 𑐣𑑂𑐴𑐵𑐥𑐵𑑄𑐐𑐸 𑐳𑐵𑐢𑐵𑐬𑐞𑐳𑐨𑐵

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵 𑐳𑐩𑐶𑐟𑐶𑐫𑐵 𑐣𑑂𑐴𑐵𑐥𑐵𑑄𑐐𑐸 𑐡𑑃𑐩𑐸𑑃𑐖𑑂𑐫𑐵 𑐰𑑄𑐐𑐸 𑐱𑐣𑐶𑐰𑐵𑑅 𑐠𑐣𑐫𑐵 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐂 𑐖𑐸𑐮 𑑋 𑐡𑐧𑐹𑐫𑐵 𑐫𑐾𑑃 𑐖𑐶𑐮𑑂𑐮𑐵 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐢𑐣𑐧𑐴𑐵𑐡𑐸𑐬 𑐟𑐶𑐩𑐶𑐮𑐵𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐡𑑃𑐩𑐸𑑃𑐖𑑂𑐫𑐵𑐫𑐵 𑐄𑐮𑐾𑐖𑑂𑐫𑐵 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐰𑐵𑐳𑐷 𑐗𑐷 𑐣𑐾𑐰𑐵𑑅𑐟 𑐳𑑂𑐰𑐣𑐶𑐐𑑅 𑐠𑐾𑑄𑐖𑑂𑐫𑐵𑑅𑐐𑐸 𑐗𑐷𑐐𑐸 𑐠𑑅𑐐𑐸 𑐠𑐵𑐳𑐫𑑂 𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣𑐫𑐵 𑐕𑐾𑑃 𑐩𑐡𑐫𑐾𑐎𑐵𑑅 𑐔𑑂𑐰𑑃𑐔𑑂𑐰𑐣𑐾𑐩𑐵𑑅𑐐𑐸 𑐟𑐳𑐎𑑄 𑐡𑐸𑑅𑐏𑐫𑐵 𑐏𑑃 𑐏𑑅 𑐢𑐵𑐳𑐾𑑄 𑐡𑐾𑐫𑑂 𑐡𑐧𑐹𑐫𑐵 𑐠𑑅𑐐𑐸 𑐴𑐾 𑐢𑐳𑑂𑐰𑐵𑐎𑐾𑐟 𑐳𑐎𑐳𑐶𑐣𑑄 𑐠𑑅𑐠𑑅𑐐𑐸 𑐠𑐵𑐳𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐡𑐾𑐫𑑂 𑐡𑐧𑐹𑐫𑐵 𑐠𑑅𑐐𑐸 𑐕𑐾𑑃 𑐕𑐏𑐵 𑐠𑐸𑐐𑐸 𑐴𑐾 𑐎𑐵𑐬𑑂𑐫𑐎𑐵𑐮𑐫𑑂 𑐢𑐳𑑂𑐰𑐵𑐎𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑑅𑐐𑐸 𑐴𑐾 𑐕𑐾𑑃 𑐩𑐡𑐸𑐐𑐸𑐮𑐶𑑄 𑐁𑐥𑐵𑐮𑑄 𑐣𑐾𑐰𑐵𑑅𑐟𑐫𑑂𑐳𑑄 𑐁𑐟𑐎 𑐣𑑄 𑐡𑐾𑐫𑑂 𑐡𑐧𑐹𑐫𑐵 𑐧𑐵𑐬𑐾 𑐧𑐵𑑄𑐮𑐵𑐎 𑐠𑐸𑐂𑐎𑐾𑐐𑐸 𑐰 𑐖𑐵𑐣𑐎𑐵𑐬𑐷 𑐎𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸 𑐏𑑅 𑐢𑐫𑐵𑐡𑐶𑐮 𑑋

𑐳𑑂𑐰𑐣𑐶𑐐𑐮𑐫𑑂 𑐔𑑂𑐰𑑃𑐔𑑂𑐰𑐣𑐵𑐥𑐶𑑄 𑐗𑐷 𑐣𑐾𑐰𑐵𑑅𑐟 𑐠𑐰𑑄𑐠𑐰𑐫𑑂 𑐠𑐷𑐠𑐷 𑐎𑐵𑐬𑐞𑑄 𑐩𑐶𑐮𑐾 𑐖𑐸𑐫𑐵𑑅 𑐰𑐵 𑐕𑐥𑑂𑐥𑑃 𑐖𑐸𑐫𑐵𑑅 𑐔𑑂𑐰𑐣𑐾𑐟 𑐠𑐵𑐎𑐸𑐳𑐵𑑄 𑐐𑐸𑐠𑐶 𑐰𑐶𑐢𑐾𑐫𑐎 𑐰𑐶𑐬𑐸𑐡𑑂𑐢𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐎𑐮𑐾𑑄 𑐣𑐾𑐰𑐵𑑅𑐟 𑐳𑐟𑐎𑐫𑑂 𑐎𑐸𑐴𑐵𑑄 𑐰𑑅𑐐𑐸𑐮𑐶𑑄 𑐳𑑂𑐰𑐣𑐶𑐐𑑅 𑐥𑐶𑐣𑐾 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐕𑐥𑑂𑐥𑑃 𑐖𑐸𑐂𑐐𑐸 𑐴𑑂𑐰𑑅𑐟𑐵𑑅 𑐔𑐹𑐮𑐵𑐎𑐵 𑐧𑐶𑐄𑐐𑐸 𑐏𑑃𑐫𑑂 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑑂𑐰 𑐊𑐎𑐟𑐵𑐫𑐵 𑐮𑑂𑐫𑑄𑐎𑐵 𑐟𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋

𑐫𑐾𑑃 𑐖𑐶𑐮𑑂𑐮𑐵𑐫𑐵 𑐕𑑂𑐫𑐵𑐘𑑂𑐖𑐾 𑐢𑐣𑐰𑐷𑐬 𑐩𑐴𑐬𑑂𑐖𑐣𑑄 𑐰𑐵𑐬𑑂𑐲𑐶𑐎 𑐥𑑂𑐬𑐐𑐟𑐶 𑐰 𑐡𑐵𑑄𑐨𑐬𑐶𑑄 𑐢𑐬𑑂𑐩𑐬𑐵𑐖 𑐱𑐵𑐎𑑂𑐫𑑄 𑐁𑐬𑑂𑐠𑐶𑐎 𑐥𑑂𑐬𑐟𑐶𑐰𑐾𑐡𑐣 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐬𑐵𑐖𑐨𑐵𑐃 𑐖𑐎𑑅𑐩𑐶𑑄 𑐔𑐶𑐣𑐵𑐏𑑃 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐂𑐩𑐾𑐖 𑐚𑐾𑐮𑐶𑐨𑐶𑐖𑐣𑐫𑑂 𑐥𑑂𑐬𑐱𑐵𑐬𑐞 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐮𑑀𑐎𑑄𑐴𑑂𑐰𑐵𑑅𑐐𑐸 ‘𑐏𑑂𑐰𑐟𑐵𑐧𑐖𑐶’ 𑐥𑐸𑐔𑑅𑐫𑐵𑐟 𑐰𑐶𑐱𑐾𑐲 𑐳𑐩𑑂𑐩𑐵𑐣 𑐣𑑄 𑐫𑐵𑑅𑐐𑐸 𑐏𑑅 𑑋