𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐠𑑂𑐰 𑐟𑑂𑐬𑐫𑑀𑐡𑐱𑐷 -

𑐥𑐹𑐬𑑂𑐰𑐫𑐵 𑐰𑐜𑐵 𑐖𑑂𑐫𑐵𑐎𑐸𑐠𑐷 𑐟𑐵𑐮𑐵𑐧𑐣𑑂𑐡𑐷, ‘𑐎𑑀𑐱𑐷’ 𑐣𑐵𑐩𑐵𑐎𑐬𑐞 𑐰𑐶𑐬𑐸𑐡𑑂𑐢 𑐠𑑁𑑄 𑐫𑐾𑑃𑐫𑑂 𑐥𑐴𑐶𑐔𑐵𑐣𑐰𑐵𑐡𑐷𑐟𑐫𑑂 𑐥𑑂𑐬𑐡𑐬𑑂𑐱𑐣

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- ‘𑐎𑑀𑐱𑐷 𑐥𑑂𑐬𑐡’ 𑐣𑐵𑑄 𑐏𑐵𑐬𑐾𑐖 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐫𑐵𑐳𑐾𑑄 𑐩𑑂𑐴𑐶𑐐𑑅 𑐢𑐬𑐵𑐣 𑐄𑐥𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰 𑐀𑐣𑐫𑐵 𑐣𑐷𑐐𑐸𑐮𑐶𑑄 𑐰𑐜𑐵𑐫𑑂 𑐟𑐵𑐮𑑄 𑐐𑑂𑐰𑐫𑐵 𑐧𑐶𑐮 𑑋 𑐥𑐴𑐶𑐔𑐵𑐣𑐰𑐵𑐡𑐷 𑐳𑑄𑐳𑑂𑐠𑐵𑐟 𑐎𑐶𑐬𑐵𑐟 𑐫𑐵𑐎𑑂𑐠𑐸𑐒 𑐔𑐸𑐩𑑂𑐮𑐸𑐒, 𑐎𑐶𑐬𑐵𑐟 𑐬𑐵𑐃 𑐫𑐵𑐫𑑀𑐎𑑂𑐏𑐵, 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑 𑐮𑐐𑐵𑐫𑐟 𑐖𑐵𑐣𑐵𑑅 𑐀𑐣 𑐟𑐵𑐮𑑄 𑐐𑑂𑐰𑑅𑐐𑐸 𑐏𑑅 𑑋 𑐁𑐣𑑂𑐡𑑀𑐮𑐣– 𑐎𑐵𑐬𑐷𑐟𑐫𑑂𑐳𑑄 𑐀𑐣 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐥𑐶𑑄 𑐎𑐬𑑂𑐩𑐔𑐵𑐬𑐷𑐟𑐫𑑂𑐟 𑐖𑑂𑐫𑐵𑐎𑐸𑐠𑐶𑑄 𑐥𑐶𑐎𑐫𑐵𑑅𑐮𑐶 𑐀𑐣 𑐟𑐵𑐮𑑄 𑐐𑑂𑐰𑐫𑐵 𑐧𑐶𑐄𑐐𑐸 𑐏𑑅 𑑋

𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑐣𑐐𑐬𑐥𑐵𑐮𑐶𑐎𑐵 𑐖𑑂𑐫𑐵𑐎𑐸𑐠𑐷 𑐟𑐵𑐮𑑄 𑐐𑑂𑐰𑑅 𑐰𑐫𑐾 𑐕𑐑𑑁 𑐣𑑂𑐴𑑂𑐫𑑅 𑐴𑐾 𑐀𑐣 𑐳𑐸𑐬𑐎𑑂𑐲𑐵𑐎𑐬𑑂𑐩𑐷𑐟 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐹 𑐢𑑂𑐰𑐵𑐏𑐵𑐫𑑂 𑐟𑐵𑐮𑑄 𑐐𑑂𑐰𑐫𑐵𑑅 𑐎𑑀𑐞𑐳𑐨𑐵 𑐫𑐵𑑅𑐐𑐸 𑐏𑑅𑐳𑐵 𑐢𑐬𑐵𑐣 𑐄𑐥𑐩𑐣𑐥𑐵𑐫𑑂 𑐟𑐫𑐵𑐟𑑅𑐐𑐸 ‘𑐎𑑀𑐱𑐷 𑐥𑑂𑐬𑐡𑐾𑐱’ 𑐔𑑂𑐰𑐫𑐵𑐟𑑅𑐐𑐸 𑐕𑐵𑐥 𑐰 𑐮𑐾𑐚𑐬𑐥𑑂𑐫𑐵𑐜 𑐔𑑂𑐫𑐵𑐎𑐵 𑐧𑐶𑐄𑐐𑐸 𑐏𑑅 𑑋

𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑐢𑐬𑐵𑐣𑐫𑐵 𑐰𑐜𑐵 𑑕 𑐰 𑑑𑑕 𑐫𑐵 𑐖𑑂𑐫𑐵𑐎𑐸𑐠𑐷 𑐣𑑄 𑐟𑐵𑐮𑑄 𑐐𑑂𑐰𑐫𑐵 𑐧𑐶𑐄𑐐𑐸 𑐏𑑅 𑑋 𑐳𑑄𑐑𑐷𑐫 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐬𑐵𑐲𑑂𑐚𑑂𑐬𑐶𑐫 𑐩𑐘𑑂𑐔 𑐳𑐸𑐣𑐳𑐬𑐷𑐫𑐵 𑐀𑐢𑑂𑐫𑐎𑑂𑐲 𑐀𑐩𑐬 𑐂𑐖𑐩𑐫𑐵 𑐎𑐠𑑄 𑐣𑐶𑐐𑐹𑐐𑐸 𑐔𑐬𑐞𑐫𑐵 𑐁𑐣𑑂𑐡𑑀𑐮𑐣 𑐀𑐣𑑂𑐟𑐬𑑂𑐐𑐟 𑐔𑐿𑐟 𑑑𑑔 𑐣𑐶𑐳𑐾𑑄 𑑑𑑗 𑐐𑐟𑐾 𑐟𑐎 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐠𑐷𑐠𑐷 𑐰𑐜𑐵 𑐳𑐩𑐶𑐟𑐶𑐫𑐵 𑐖𑑂𑐫𑐵𑐎𑐸𑐠𑐷 𑐟𑐵𑐮𑑄 𑐐𑑂𑐰𑐫𑐵𑑅 𑐴𑐵𑐎𑐸𑐐𑐸 𑐢𑑂𑐰𑐵𑑃𑐫𑑂 𑐧𑑂𑐰𑐫𑐾𑐎𑐾𑐐𑐸, 𑐎𑑀𑐱𑐷 𑐥𑑂𑐬𑐡𑐾𑐱 𑐔𑑂𑐰𑐫𑐵𑐟𑑅𑐐𑐸 𑐧𑑀𑐬𑑂𑐜 𑐔𑐷𑐎𑐾𑐐𑐸 𑐰 𑐮𑐾𑐚𑐬𑐥𑑂𑐫𑐵𑐜 𑐔𑑂𑐫𑐵𑐎𑐾𑐐𑐸 𑐖𑑂𑐫𑐵𑐗𑑂𑐰𑑅 𑐡𑐸 𑑋 𑐎𑑀𑐱𑐷 𑐥𑑂𑐬𑐡𑐾𑐱𑐫𑐵 𑐰𑐶𑐬𑐸𑐡𑑂𑐢 𑐗𑐶𑑄𑐥𑑂𑐫𑑄𑐐𑐸𑐮𑐶𑑄 𑐖𑐶𑐮𑑂𑐮𑐵𑐫𑐵 𑐳𑑂𑐠𑐵𑐣𑐷𑐫 𑐟𑐴 𑐰 𑐰𑐜𑐵 𑐳𑐩𑐶𑐟𑐶𑐂 𑐟𑐵𑐮𑑄 𑐐𑑂𑐰𑐫𑐾𑐐𑐸 𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑐩𑐡𑐸𑐩𑑂𑐴 𑐥𑐡𑑂𑐩 𑐮𑐶𑐩𑑂𑐧𑐸𑐫𑐵𑐟 𑐱𑐴𑐶𑐡 𑐑𑑀𑐲𑐞𑐵 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐣𑑄 𑐫𑐵𑑅𑐐𑐸 𑐡𑐸 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐥𑐴𑐶𑐔𑐵𑐣𑐰𑐵𑐡𑐷𑐟𑐫𑑂 𑐁𑐣𑑂𑐡𑑀𑐮𑐣𑐫𑐵 𑐎𑐵𑐬𑐞𑑄 𑐫𑐵𑐣𑐵𑑅 𑐎𑑀𑐱𑐷 𑐥𑑂𑐬𑐡𑐾𑐱𑐳𑐨𑐵𑐫𑐵 𑐧𑐿𑐛𑐎 𑐣𑑄 𑐀𑐣𑐶𑐱𑑂𑐔𑐶𑐟 𑐖𑐹𑐐𑐸 𑐡𑐸 𑑋 𑐥𑐴𑐶𑐔𑐵𑐣𑐰𑐵𑐡𑐷𑐟𑐫𑑂𑐳𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐳𑐵𑑄𑐳𑐡 𑐰 𑐩𑐣𑑂𑐟𑑂𑐬𑐷𑐫𑐵𑐟 𑐁𑐎𑑂𑐬𑐩𑐞 𑐫𑐵𑐫𑐾 𑐦𑐂𑐐𑐸 𑐁𑐱𑑄𑐎𑐵 𑐫𑐵𑐳𑐾𑑄 𑐥𑑂𑐬𑐡𑐾𑐱𑐫𑐵 𑐧𑐿𑐛𑐎 𑐟𑐫𑐾𑐟 𑐳𑐨𑐵𑐩𑐸𑐏 𑐴𑐾 𑐟𑐫𑐵𑐬 𑐩𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐰𑑄𑐐𑐸 𑐮𑐕𑐶 𑐣𑑂𑐴𑑂𑐫𑑅 𑐳𑑂𑐠𑐐𑐶𑐟 𑐖𑐹𑐐𑐸 𑐎𑑀𑐱𑐷 𑐥𑑂𑐬𑐡𑐾𑐱𑐳𑐨𑐵𑐫𑐵 𑐧𑐿𑐛𑐎 𑐁𑑅 𑐐𑐧𑐮𑐫𑑂 𑐔𑑂𑐰𑐣𑐾𑐐𑐸 𑐢𑐂𑐐𑐸 𑐀𑐣𑐶𑐱𑑂𑐔𑐶𑐟 𑐖𑐹𑐐𑐸 𑐡𑐸 𑑋 𑐰𑑄𑐐𑐸 𑐦𑐵𑐐𑐸𑐣 𑑑𑑗 𑐐𑐟𑐾 𑐥𑑂𑐬𑐡𑐾𑐱𑐳𑐨𑐵𑑄 ‘𑐎𑑀𑐱𑐷 𑐥𑑂𑐬𑐡𑐾𑐱’ 𑐣𑐵𑐩𑐵𑐎𑐬𑐞 𑐫𑐵𑐫𑐾𑐢𑐸𑑄𑐎𑐵𑑅𑐮𑐶 𑐁𑑅 𑐟𑐎 𑐕𑐐𑐹 𑐣𑑄 𑐧𑐿𑐛𑐎 𑐔𑑂𑐰𑐣𑐾 𑐦𑐸𑐐𑐸 𑐩𑐡𑐸𑐣𑐶 𑑋

𑐳𑐨𑐵𑐩𑐸𑐏 𑐧𑐵𑐧𑐸𑐬𑐵𑐩 𑐐𑑁𑐟𑐩𑑄 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑑄𑐎𑐬𑐞𑐫𑐵𑐟 𑐎𑐫𑐵𑑅 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑑄𑐥𑐶𑑄𑐮𑐶𑐳𑐾 𑐰𑐵𑐬𑑂𑐟𑐵 𑐫𑐵𑐫𑐾𑐩𑐵𑑅𑐐𑐸 𑐖𑐸𑐫𑐵𑑅 𑐧𑐿𑐛𑐎 𑐩𑐟𑐫𑐵𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐥𑐴𑐶𑐔𑐵𑐣 𑐁𑐣𑑂𑐡𑑀𑐮𑐣 𑐩𑐟𑑂𑐠𑐬 𑐖𑐸𑐂𑐰𑑄 𑐧𑐿𑐛𑐎 𑐟𑐫𑐾𑐦𑐂𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐠𑑁𑑄 𑐣𑑂𑐴𑐶𑐣𑐫𑑂 𑑒 𑐧𑐖𑐾 𑐫𑐾𑑃𑐫𑑂 𑐣𑑄 ‘𑐎𑑀𑐱𑐷 𑐥𑑂𑐬𑐡𑐾𑐱’ 𑐣𑐵𑐩𑐵𑐎𑐬𑐞𑐫𑐵 𑐰𑐶𑐬𑐸𑐡𑑂𑐢 𑐥𑑂𑐬𑐡𑐬𑑂𑐱𑐣 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐥𑑂𑐬𑐡𑐾𑐱 𑐣𑐵𑐩𑐵𑐎𑐬𑐞 𑐰𑐶𑐬𑐸𑐡𑑂𑐢𑐫𑐵 𑐩𑑄𑐎𑐵𑑅 𑐳𑑄𑐑𑐬𑑂𑐲 𑐳𑐩𑐶𑐟𑐶𑐫𑐵 𑐂𑐣𑐵𑐥𑐫𑑂 𑐠𑐣𑐫𑐵 𑐦𑐶𑐧𑑂𑐰 𑐏𑑂𑐫𑑅 𑐰 𑐱𑐵𑐣𑑂𑐟𑐶𑐧𑐵𑐚𑐶𑐎𑐵𑐫𑑂 𑐥𑑂𑐬𑐡𑐬𑑂𑐱𑐣 𑐫𑐵𑐳𑐾𑑄 𑐳𑑄𑐳𑐡 𑐨𑐰𑐣 𑐟𑐎 𑐩𑐵𑐬𑑂𑐔 𑐥𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐟𑐫𑐵𑐟𑑅𑐐𑐸 𑐡𑐸 𑑋

𑐣𑐾𑐥𑐵𑐮 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷 𑐳𑐩𑐬𑑂𑐠𑐶𑐟 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑑄𑐑 𑐳𑑄𑐳𑑂𑐠𑐵𑑄 𑐎𑑀𑐱𑐷 𑐥𑑂𑐬𑐡𑐾𑐱𑐫𑐵 𑐰𑐶𑐬𑑀𑐢 𑐫𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮 𑐳𑐩𑐵𑐖𑐰𑐵𑐡𑐷 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐀𑐣𑐸𑐥 𑐳𑐶𑑄𑐴 𑐳𑐸𑐰𑐵𑐮, 𑐣𑐾𑐥𑐵𑐮 𑐳𑐩𑐵𑐖𑐰𑐵𑐡𑐷 𑐣𑐾𑐰𑐵𑑅 𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐩𑐵𑐢𑐰 𑐱𑑂𑐬𑐾𑐲𑑂𑐛, 𑐠𑐵𑐬𑐸 𑐳𑑄𑐑𑐫𑐵 𑐥𑐶𑐟𑐵𑐩𑑂𑐧𑐬 𑐩𑐴𑐟𑑀, 𑐩𑐐𑐬 𑐳𑑄𑐑𑐫𑐵 𑐎𑑀𑐩𑐮 𑐩𑐐𑐬, 𑐟𑐩𑐸 𑐳𑑄𑐑𑐫𑐵 𑐬𑐵𑐩 𑐐𑐸𑐬𑐸𑐒, 𑐟𑐵𑐩𑐵𑐒 𑐳𑑄𑐑𑐫𑐵 𑐬𑐵𑐡𑐶𑐥 𑐮𑐵𑐩𑐵 𑐰 𑐮𑐶𑐩𑑂𑐧𑐸 𑐳𑑄𑐑𑐫𑐵 𑐚𑐶𑐎𑐵 𑐎𑐣𑑂𑐡𑐒𑑂𑐰𑐵 𑐥𑐶𑐳𑑄 𑐩𑑂𑐴𑐶𑐐𑑅 𑐩𑑄𑐎𑐵𑑅 𑐰𑐶𑐖𑑂𑐘𑐥𑑂𑐟𑐶 𑐥𑐶𑐟𑐧𑐶𑐳𑐾𑑄 𑐰𑐶𑐬𑑀𑐢 𑐥𑑂𑐰𑑄𑐎𑐹𑐐𑐸 𑐏𑑅 𑑋