𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐠𑑂𑐰 𑐟𑑂𑐬𑐫𑑀𑐡𑐱𑐷 -

𑐖𑑂𑐰𑐾𑐮𑑂𑐳 𑐳𑐴𑐎𑐵𑐬𑐷𑐫𑐵 𑐰𑐺𑐴𑐟𑑂 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬

𑐫𑐮 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐖𑑂𑐰𑐾𑐮𑑂𑐳 𑐧𑐔𑐟 𑐟𑐠𑐵 𑐆𑐞 𑐳𑐴𑐎𑐵𑐬𑐷 𑐳𑑄𑐳𑑂𑐠𑐵𑐫𑐵 𑐐𑑂𑐰𑐳𑐵𑐮𑐫𑑂 𑐰𑐺𑐴𑐟 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬 𑐖𑐹𑐐𑐸 𑐡𑐸 𑑋 𑐳𑐴𑐎𑐵𑐬𑐷𑐫𑐵 𑐫𑐮 𑐟𑑅𑐧𑐴𑐵𑑅𑐳𑑂𑐠𑐶𑐟 𑐨𑐰𑐣𑐫𑑂 𑐖𑐹𑐐𑐸 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬 𑐩𑐶𑐳𑐵 𑐮𑑂𑐰𑐫𑑂, 𑐩𑐔𑐵 𑐮𑑂𑐰𑐫𑑂, 𑐕𑑂𑐫𑑄𑐐𑐹 𑐳𑐩𑑂𑐧𑐣𑑂𑐢𑐷 𑐮𑑂𑐰𑐫𑑂, 𑐎𑑂𑐰𑐾𑑃 𑐳𑐩𑑂𑐧𑐣𑑂𑐢𑐷 𑐮𑑂𑐰𑐫𑑂, 𑐣𑑂𑐴𑐵𑐫𑑂, 𑐣𑑂𑐴𑐵𑐫𑑂𑐥𑑄 𑐰 𑐰𑐵, 𑐩𑐶𑐏𑐵𑐫𑐵 𑐣𑐶𑑅𑐱𑐸𑐮𑑂𑐎 𑐥𑐬𑐷𑐎𑑂𑐲𑐞 𑐖𑐹𑐐𑐸 𑐏𑑅 𑑋 𑐀𑐠𑐾𑐴𑐾 𑐂𑐳𑐷𑐖𑐷, 𑐨𑐶𑐜𑐶𑐫𑑀 𑐊𑐎𑑂𑐳𑐾𑐬𑐾, 𑐴𑐶𑐫𑐵 𑐖𑐵𑑃𑐔 𑐣𑑄 𑐣𑐶𑑅𑐱𑐸𑐮𑑂𑐎 𑐫𑐵𑑅𑐐𑐸 𑐏𑑅 𑑋

𑐎𑐵𑐛𑐩𑐵𑐜𑑁𑑄 𑐩𑐾𑐜𑐶𑐎𑐮 𑐎𑐮𑐾𑐖𑐫𑐵 𑐥𑑂𑐬𑐵𑐰𑐶𑐢𑐶𑐎 𑐐𑑂𑐰𑐵𑐴𑐵𑐮𑐶 𑐰 𑐮𑐵𑐂𑐦 𑐮𑐵𑐂𑐣 𑐴𑐾𑐮𑑂𑐠 𑐎𑐾𑐫𑐬𑐫𑐵 𑐐𑑂𑐰𑐵𑐴𑐵𑐮𑐶𑐂 𑐰𑐺𑐴𑐟𑑂 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬 𑐖𑐹𑐐𑐸 𑐏𑑃 𑐳𑐴𑐎𑐵𑐬𑐷𑐫𑐵 𑐎𑑀𑐲𑐵𑐢𑑂𑐫𑐎𑑂𑐲 𑐰 𑐖𑑂𑐫𑐵𑐗𑑂𑐰𑑅 𑐳𑑄𑐫𑑀𑐖𑐎 𑐥𑑂𑐬𑐖𑑂𑐘𑐵𑐬𑐵𑐖 𑐱𑐵𑐎𑑂𑐫𑑄 𑐎𑐣𑐵𑐡𑐶𑐮 𑑋 𑐮𑐵𑐂𑐦 𑐮𑐵𑐂𑐣𑐥𑐵𑐏𑐾𑑄 𑐡𑐕𑐶𑐫𑐵 𑐡𑐸𑐣𑐾 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐦𑐸𑐎𑑂𑐎𑑄 𑐰𑐜𑐵𑐫𑑂 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬 𑐫𑐵𑐫𑐾𑐐𑐸 𑐐𑑂𑐰𑐳𑐵𑑅 𑐎𑐠𑑄 𑐗𑐶𑑄𑐥𑑂𑐫𑑄𑐐𑐹 𑐱𑐶𑐰𑐶𑐬 𑐣𑑂𑐴𑑂𑐫𑐵𑐎𑐾𑐢𑐸𑑄𑐎𑐹𑐐𑐸 𑐣𑑄 𑐱𑐵𑐎𑑂𑐫𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐳𑐩𑐵𑐖𑐳𑐾𑐰𑐷 𑐰 𑐳𑐴𑐎𑐵𑐬𑐷𑐫𑐵 𑐩𑐴𑐶𑐮𑐵 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐩𑑀𑐟𑐶𑐱𑐵𑐣𑑂𑐟𑐶 𑐱𑐵𑐎𑑂𑐫𑐫𑐵 𑐥𑐴𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐰𑐳𑐮𑑄 𑐩𑐮𑑂𑐫𑐵𑐎 𑐳𑐴𑐎𑐵𑐬𑐷𑐫𑐵 𑐡𑐸𑐖𑑅𑐥𑐶𑑄 𑐰 𑐩𑐾𑐩𑐾𑐥𑐶𑑄𑐳𑑄 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵 𑐎𑐵𑑅𑐐𑐸 𑐏𑑅 𑑋 𑐳𑐴𑐎𑐵𑐬𑐷𑑄 𑐠𑑂𑐰𑐫𑐵𑑄 𑐣𑑂𑐴𑑂𑐫𑑅 𑐣𑑄 𑐩𑐶𑐏𑐵, 𑐩𑐶𑐳𑐵 𑐮𑑂𑐰𑐫𑑂, 𑐴𑐶 𑐥𑐬𑐷𑐎𑑂𑐲𑐞 𑐳𑐩𑑂𑐧𑐣𑑂𑐢𑐷 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐴𑐾 𑐱𑐶𑐰𑐶𑐬 𑐣𑑂𑐴𑑂𑐫𑐵𑐎𑐾𑐢𑐸𑑄𑐎𑐹𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐠𑑂𑐰 𑐥𑐵𑐮𑐫𑑂 𑐰𑐺𑐴𑐟𑑂 𑐬𑐸𑐥𑑄 𑐠𑐷𑐠𑐷 𑐮𑑂𑐰𑐫𑑂𑐫𑐵 𑐥𑐬𑐷𑐎𑑂𑐲𑐞 𑐮𑐶𑐳𑐾𑑄 𑐂𑐳𑐷𑐖𑐷, 𑐨𑐶𑐜𑐶𑐫𑑀 𑐊𑐎𑑂𑐳𑐬𑐾, 𑐥𑑂𑐫𑐵𑐠𑑀𑐮𑑀𑐖𑐷𑐫𑐵 𑐳𑐸𑐰𑐶𑐢𑐵 𑐳𑐴𑐶𑐟 𑐱𑐶𑐰𑐶𑐬 𑐣𑑂𑐴𑑂𑐫𑐵𑐎𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐰𑐾𑐮𑑂𑐳 𑐳𑐴𑐎𑐵𑐬𑐷 𑐕𑐸𑑄 𑐣𑑂𑐴𑐶 𑐣𑑂𑐴𑑂𑐫𑐰𑐣𑐶𑐳𑐾𑑄 𑐳𑑂𑐰𑐵𑐳𑑂𑐠𑑂𑐫 𑐧𑐶𑐩𑐵𑐳𑐴𑐶𑐟𑐫𑐵 𑐧𑐔𑐟 𑐫𑑀𑐖𑐣𑐵 𑐣𑑄 𑐴𑑅𑐐𑐸 𑐏𑑃 𑐳𑐴𑐎𑐵𑐬𑐷𑐫𑐵 𑐀𑐢𑑂𑐫𑐎𑑂𑐲 𑐎𑐶𑐬𑐞𑐨𑐵𑐂 𑐧𑐖𑑂𑐬𑐵𑐔𑐵𑐬𑑂𑐫𑑄 𑐎𑐣𑐵𑐡𑐶𑐮 𑑋 𑐳𑐴𑐎𑐵𑐬𑐷𑐂 𑐳𑑂𑐰𑑄𑐐𑐹 𑐮𑐵𑐏 𑐟𑐎 𑐧𑐔𑐟 𑐫𑐵𑐟 𑐢𑐵𑑅𑐳𑐵 𑐡𑑃𑐫𑑂 𑑕𑑐 𑐴𑐖𑐵𑐬 𑐟𑐎𑐵 𑐧𑐬𑐵𑐧𑐬𑐫𑐵 𑐧𑐷𑐩𑐵 𑐖𑐸𑐂𑐐𑐸 𑐏𑑃 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋 𑐳𑐴𑐎𑐵𑐬𑐷𑐂 𑐳𑑂𑐰𑑄𑐐𑐹 𑐮𑐵𑐏𑐫𑐵 𑐧𑐔𑐟 𑐫𑐵𑐟 𑐢𑐵𑑅𑐳𑐵 𑐡𑐕𑐶𑐫𑐵 𑐡𑐸𑐣𑐾 𑐕𑐸𑑄 𑐣𑑄 𑐮𑑂𑐰𑐫𑑂𑐫𑐵 𑐥𑐬𑐷𑐎𑑂𑐲𑐞 𑐫𑐵𑐣𑐵𑑅, 𑐄𑐥𑐔𑐵𑐬 𑐫𑐵𑐣𑐵𑐐𑐸 𑐰𑐵 𑐰𑐵𑐳𑑅 𑐫𑐵𑐣𑐵𑐐𑐸𑐫𑐵 𑐧𑐶𑐮 𑐴𑐮 𑐢𑐵𑑅𑐳𑐵 𑑕𑑐 𑐴𑐖𑐵𑐬 𑐟𑐎𑐵 𑐟𑐎𑐫𑐵 𑐢𑑂𑐫𑐧𑐵 𑐳𑐴𑐎𑐵𑐬𑐷 𑐥𑐸𑐮𑐵𑐧𑐷 𑑋

𑐀𑐠𑐾𑐴𑐾 𑐳𑐴𑐎𑐵𑐬𑐷𑑄 𑑓 𑐰𑐬𑑂𑐲𑐫𑐵 𑐖𑐷𑐰𑐣 𑐧𑐶𑐩𑐵 𑐫𑑀𑐖𑐣𑐵 𑐣𑑄 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐫𑑀𑐖𑐣𑐵 𑐎𑐠𑑄 𑐮𑐫𑑂𑐮𑐫𑑂 𑐥𑐟𑐶𑐎𑑄 𑐣𑐶𑐱𑑂𑐔𑐶𑐟 𑐬𑐎𑐩 𑐧𑐔𑐟 𑐫𑐵𑐟 𑐢𑐵𑑅𑐳𑐵 𑐳𑑂𑐰𑐡𑑃𑐫𑐵 𑐡𑐸𑐣𑐾 𑐧𑐔𑐟𑐎𑐬𑑂𑐟𑐵𑐫𑐵 𑐩𑐺𑐟𑑂𑐫𑐸 𑐖𑐸𑐮 𑐢𑐵𑑅𑐳𑐵 𑐣𑐶𑐱𑑂𑐔𑐶𑐟 𑐧𑐷𑐩𑐵 𑐬𑐎𑐩 𑐮𑐶𑐳𑐾𑑄 𑐧𑐔𑐟 𑐫𑐵𑐣𑐵𑐟𑑅𑐐𑐸 𑐢𑑂𑐫𑐧𑐵 𑐰 𑐧𑑂𑐫𑐵𑐖 𑐮𑐶𑐟 𑐰𑐂𑐐𑐸 𑐏𑑃 𑐣𑑄 𑐣𑐵𑐫𑑅 𑐱𑐵𑐎𑑂𑐫𑑄 𑐎𑐣𑐵𑐡𑐶𑐮 𑑋