𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐠𑑂𑐰 𑐟𑑂𑐬𑐫𑑀𑐡𑐱𑐷 -

𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬𑐫𑐵 𑐗𑐶𑑄𑐳𑑂𑐰𑐎𑑂𑐰𑑅𑐐𑐸 𑐟𑑃𑐩𑐸𑑃𑐖𑑂𑐫𑐵

𑐏𑑂𑐰𑐥(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐠𑐣𑐫𑐵 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐳𑐵𑐴𑐶𑐟𑑂𑐫𑐶𑐎 𑐳𑑄𑐳𑑂𑐠𑐵 𑐣𑐾𑐥𑐵𑐮 𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬𑐫𑐵 𑐗𑐶𑑄𑐳𑑂𑐰𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵 𑐱𑐣𑐶𑐰𑐵𑑅 𑐖𑐸𑐮 𑑋 𑐏𑑁𑐩𑐵𑐫𑑂 𑐔𑑂𑐰𑑄𑐐𑐸 𑐖𑐵𑐐𑐺𑐟𑐶 𑐩𑐵𑐰𑐶𑐂 𑐖𑐹𑐐𑐸 𑐟𑑅𑐩𑐸𑑃𑐖𑑂𑐫𑐵𑐫𑑂 𑐳𑑄𑐳𑑂𑐠𑐵𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅𑐮𑐶𑐳𑐾𑑄 𑐳𑑄𑐬𑐎𑑂𑐲𑐎 𑐳𑐵𑐴𑐶𑐟𑑂𑐫𑐎𑐵𑐬 𑐟𑐶𑐮𑐎𑐥𑑂𑐬𑐎𑐵𑐱 𑐎𑐵𑐫𑐳𑑂𑐠𑐫𑐵𑐟 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄𑐮𑐶𑐳𑐾𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐵𑐥𑑁 𑐡𑐾𑐕𑐵𑐳𑐾 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬𑐫𑐵 𑐣𑐵𑐫𑑅 𑐀𑐐𑐶𑐧 𑐧𑐣𑐾𑐥𑐵𑐮𑐷𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐐𑐟𑐶𑐱𑐷𑐮 𑐰𑐬𑐶𑐲𑑂𑐛 𑐎𑐰𑐶 𑐜𑐵. 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐎𑐰𑐶 𑐜𑐵. 𑐥𑑂𑐬𑐢𑐵𑐣𑑄 𑑒𑑐𑑑𑑗 𑐳𑐵𑐮𑐫𑑂 𑐀𑐳𑐴𑐖 𑐥𑐬𑐶𑐳𑑂𑐠𑐶𑐟𑐶𑐂 𑐣𑑄 𑐠𑑅𑐐𑐸 𑐬𑐵𑐖𑐣𑐷𑐟𑐶𑐎 𑐀𑐜𑐵𑐣 𑐎𑐵𑐫𑐩 𑐫𑐵𑐣𑐵𑑅 𑐨𑐵𑐲𑐵 𑐰 𑐳𑐵𑐴𑐶𑐟𑑂𑐫𑐫𑑂 𑐮𑐐𑐾 𑐖𑐸𑐫𑐵𑐡𑐷𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐎𑐵𑐫𑐳𑑂𑐠 𑐟𑐟𑑂𑐎𑐵𑐮𑐷𑐣 𑐬𑐵𑐖𑐣𑐷𑐟𑐶𑐎 𑐰 𑐳𑐵𑐩𑐵𑐖𑐶𑐎 𑐖𑐷𑐰𑐣𑐫𑐵 𑐕𑐩𑑂𑐴 𑐀𑐣𑐸𑐎𑐬𑐞𑐷𑐫 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑐢𑐫𑐵𑐡𑐶𑐮 𑑋

𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰 𑐎𑐵𑐫𑐳𑑂𑐠𑑄 𑐣𑐾𑐥𑐵𑐮 𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬𑐫𑐵 𑐂𑐟𑐶𑐴𑐵𑐳𑐫𑐵𑐟 𑐎𑐸𑐮𑐵𑐡𑐶𑐳𑐾𑑄 𑐳𑐵𑐩𑐵𑐖𑐶𑐎 𑐳𑑄𑐑𑐳𑑄𑐳𑑂𑐠𑐵 𑐢𑐂𑐐𑐸 𑐴𑐾 𑐩𑐡𑐸𑐣𑐶𑐐𑐸 𑐂𑐮𑐫𑑂 𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬𑑄 𑐬𑐵𑐖𑐣𑐷𑐟𑐶 𑐮𑐶𑐳𑐾𑑄 𑐳𑐵𑐩𑐵𑐖𑐶𑐎 𑐎𑑂𑐲𑐾𑐟𑑂𑐬𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐴𑐬𑑂𑐲𑐮𑐵𑐮 𑐮𑐸𑐩𑐣𑑂𑐟𑐶 𑐎𑑀𑐲𑐫𑐵 𑐳𑑄𑐬𑐎𑑂𑐲𑐎 𑐎𑐺𑐲𑑂𑐞𑐮𑐵𑐮 𑐌𑐗𑐵𑑄𑐠𑐵𑐕𑐾𑑃 𑐥𑑂𑐬𑐢𑐵𑐣𑑄 𑐣𑑂𑐴𑐵𑐥𑐵 𑐠𑑅𑐥𑐶𑑄𑐳𑑄 𑐎𑐵𑐳𑐵 𑐏𑑂𑐫𑐮𑐫𑑂 𑐰 𑐮𑐶𑐥𑐵 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵𑐫𑐵 𑐏𑑂𑐫𑐮𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐳𑑄𑐳𑑂𑐠𑐵𑐫𑐵 𑐳𑐔𑐶𑐰 𑐴𑐬𑐶𑐱𑐬𑐞 𑐬𑐵𑐖𑑀𑐥𑐵𑐢𑑂𑐫𑐵𑐫𑑄 𑐰𑐵𑐬𑑂𑐲𑐶𑐎 𑐥𑑂𑐬𑐐𑐟𑐶 𑐰𑐶𑐰𑐬𑐞 𑐰 𑐡𑐵𑑄𑐨𑐬𑐶𑑄 𑐨𑐵𑐰𑐣𑐵 𑐖𑑀𑐱𑐷 𑐎𑐵𑐫𑐳𑑂𑐠𑑄 𑐁𑐬𑑂𑐠𑐶𑐎 𑐰𑐶𑐰𑐬𑐞 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐮𑐫𑑂 𑐣𑐾𑐰𑐵𑑅 𑐖𑐵𑐐𑐬𑐞 𑐩𑐘𑑂𑐔𑐫𑐵 𑐣𑐵𑐫𑑅 𑐌𑐩𑐔𑐬𑐞 𑐀𑐩𑐵𑐟𑑂𑐫, 𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐣𑐮 𑐐𑐸𑐠𑐶 (𑐰𑐶𑐬𑐵𑐚 𑐐𑐸𑐠𑐶)𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐣𑑄 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐳𑑄𑐳𑑂𑐠𑐵𑐫𑐵 𑐣𑑂𑐰𑐎𑐸 𑐰𑐶𑐎𑑂𑐬𑐩𑐧𑐴𑐵𑐡𑐸𑐬 𑐎𑐵𑐫𑐳𑑂𑐠𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑐴𑑂𑐫𑐾𑐱𑑂𑐰𑐬𑐷 𑐱𑐵𑐎𑑂𑐫𑑄 𑐨𑐶𑑄𑐟𑐸𑐣𑐵 𑐩𑑂𑐫𑐾𑑃 𑐰 𑐩𑐵𑐞𑐶𑐎𑐧𑐵𑐧 𑐐𑑂𑐰𑐐𑑄𑐮𑑄 𑐨𑐶𑑄𑐟𑐸𑐣𑐵 𑐔𑐶𑐣𑐵𑐏𑑃 𑐣𑑂𑐫𑑄𑐎𑐵𑐡𑐐𑐶𑐸 𑐏𑑅 𑑋 𑐳𑑄𑐳𑑂𑐠𑐵𑐫𑐵 𑐳𑑄𑐬𑐎𑑂𑐲𑐎 𑐟𑐎𑑄 𑐖𑐸𑐫𑐵𑐡𑐷𑐩𑑂𑐴 𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰 𑐎𑐵𑐫𑐳𑑂𑐠𑑄 𑐠𑑅 𑐁𑐰𑑄𑐮𑐶𑑄 𑐳𑑄𑐳𑑂𑐠𑐵𑐫𑐵 𑐳𑑄𑐬𑐎𑑂𑐲𑐎𑐫𑑂 𑐩𑐔𑑂𑐰𑐣𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋