𑐎𑐬𑑀𑐜𑑁𑑄 𑐰𑑄𑐐𑐸 𑐐𑐵𑐜𑐷 𑐣𑑂𑐫𑐵𑐫𑐾𑐟 𑐳𑑂𑐬𑑀𑐟 𑐎𑑂𑐫𑐣𑐾𑐩𑑂𑐰𑐵𑑅, 𑐮𑐵𑐏𑐫𑐵 𑐮𑐸𑑃 𑐣𑑂𑐫𑐵𑐫𑐾𑐟 𑐎𑑂𑐫𑐣𑐾𑐩𑐵𑑅
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐳𑐬𑐎𑐵𑐬𑑄 𑐡𑐫𑐾𑐎𑐷𑐐𑐸 𑐋𑐣, 𑐣𑐶𑐫𑐩𑐫𑑂 𑐳𑐸𑑄 𑐣𑑄 𑐔𑑂𑐰𑐣𑐾𑐟 𑐳𑑂𑐰𑐂𑐩𑐏𑐸, 𑐕𑐐𑐹 𑐣𑑄 𑐕𑐐𑐹 𑐥𑐾𑐱𑐵𑐐𑐟 𑐳𑑄𑐐𑐛𑐣𑑄 𑐄𑐎𑐶𑐫𑐵 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑐣𑐷, 𑐟𑐬 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫𑐷𑐟 𑐕𑐐𑐹 𑐖𑐎 𑐀𑐖𑑂𑐫𑐵𑑅𑐐𑐸 𑐳𑑄𑐐𑐛𑐣 𑐏𑑅 𑑋 𑐐𑐸𑐥𑐶𑑄𑐳𑑄 𑐠𑑅𑐥𑐶𑐣𑐶𑐐𑐸 𑐎𑐵𑐬𑑀𑐧𑐵𑐬𑐫𑐵 𑐣𑐶𑑄𑐟𑐶𑑄 𑐋𑐣 𑐣𑐶𑐫𑐩 𑐩𑐵𑐮 𑐢𑐎𑐵𑑅 𑐡𑑃 𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐴𑐵𑐮𑐵𑐔𑑂𑐰𑑄𑐳𑐵𑑄 𑐳𑐬𑐎𑐵𑐬𑑄 𑐴𑐫𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑐸𑐎𑐶𑐫𑐵 𑐮𑐶𑐄𑐣𑐾 𑐕𑐸𑑄 𑐣𑐶𑐫𑐟 𑐡𑐸𑐐𑐸 𑐏𑑅 𑐰𑐵 𑐳𑐬𑐎𑐵𑐬𑑄 𑐠𑑂𑐰 𑐰𑑂𑐫𑐰𑐳𑐵𑐫𑐫𑐵𑐟 𑐎𑐸𑐡𑐺𑐲𑑂𑐚𑐶 𑐳𑑂𑐰𑐫𑐵𑐔𑑂𑐰𑑄𑐐𑐸 𑐏𑑅 𑐳𑐷𑐎𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑐸𑐐𑐸 𑐏𑑃 𑐠𑐣 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐣𑐵𑐡𑐷𑐥𑐶𑑄 𑐰𑐎𑑂𑐟𑐵𑐥𑐶𑑄𑐳𑑄 𑐢𑐫𑐵𑐡𑐷𑐐𑐸 𑐏𑑅 𑑋
𑐎𑐵𑐛𑐩𑐵𑐜𑑁𑑄 𑐳𑐸𑐣𑐔𑐵𑑃𑐡𑐷 𑐰𑑂𑐫𑐰𑐳𑐵𑐫𑐷 𑐳𑑄𑐑𑐫𑐵 𑐣𑐷𑐎𑑂𑐰𑑅𑐐𑐸 𑐰𑐵𑐬𑑂𑐲𑐶𑐎 𑐳𑐵𑐢𑐵𑐬𑐞𑐳𑐨𑐵𑐫𑑂 𑐣𑐰𑐵𑐣𑐵𑐡𑐷𑐥𑐶𑑄 𑐰𑐎𑑂𑐟𑐵𑐟𑐫𑑂𑐳𑑄 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫𑐫𑐵𑐟 𑐥𑐵𑐬𑐡𑐬𑑂𑐱𑐷 𑐰 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟 𑐁𑐰𑐱𑑂𑐫𑐎 𑐋𑐣 𑐎𑐵𑐣𑐸𑐣 𑐴𑐫𑐾𑐟 𑐢𑐫𑐵𑐔𑑂𑐰𑑄𑐐𑐸 𑐡𑑃𑐡𑑃 𑐡𑐫𑐾𑐢𑐸𑑄𑐎𑐹𑐳𑐵𑑄 𑐐𑐸𑐐𑐸𑑄 𑐣𑑄 𑐳𑐬𑐎𑐵𑐬𑑄 𑐄𑐎𑐶𑐫𑐵𑐟 𑐧𑐾𑐰𑐵𑐳𑑂𑐟𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃𑐫𑑂 𑐀𑐳𑐣𑑂𑐟𑐸𑐲𑑂𑐚𑐶 𑐥𑑂𑐰𑑄𑐎𑐸𑐳𑐾 𑐄𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 𑐴𑐬𑐾𑐎 𑐳𑐬𑐎𑐵𑐬𑐫𑐵𑐟 𑐠𑑅𑐥𑐶𑑄𑐳𑑄 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫𑐫𑐵 𑐣𑐶𑑄𑐟𑐶𑑄 𑐋𑐣 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐫𑐵𑐫𑐾𑐟 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐳𑐵𑑄 𑐳𑐬𑐎𑐵𑐬𑑄 𑐢𑐵𑑅𑐳𑐵 𑐣𑑂𑐴𑐵𑐫𑑂𑐥𑐣𑑄 𑐩𑐟𑐵𑑅 𑐥𑐴 𑐫𑐵𑐣𑐵𑐔𑑂𑐰𑑄𑐐𑐸𑐫𑐵 𑐮𑐶𑐄𑐣𑐾 𑐕𑐸 𑐎𑐵𑐬𑐞 𑐏𑑅 𑐳𑐷𑐎𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑐢𑐫𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐬𑐵𑐲𑑂𑐚𑑂𑐬𑐶𑐫 𑐄𑐥𑐨𑑀𑐎𑑂𑐟𑐵 𑐩𑐘𑑂𑐔𑐫𑐵 𑐎𑐾𑐣𑑂𑐡𑑂𑐬𑐷𑐫 𑐀𑐢𑑂𑐫𑐎𑑂𑐲 𑐥𑑂𑐬𑐾𑐩𑐮𑐵𑐮 𑐩𑐴𑐬𑑂𑐖𑐣𑑄 𑐎𑐬𑑀𑐜𑑁𑑄 𑐟𑐎𑐵 𑐟𑐹𑐐𑐸 𑐐𑐵𑐜𑐷 𑐣𑑂𑐫𑐵𑐫𑐾𑐟 𑐁𑐩𑑂𑐡𑐵𑐣𑐷𑐫𑐵 𑐳𑑂𑐬𑑀𑐟 𑐎𑑂𑐫𑐣𑐾 𑐩𑑂𑐰𑐵𑑅, 𑐟𑐬 𑐕𑐐𑐹 𑐮𑐏𑐫𑐵 𑐮𑐸𑑃𑐰𑐴 𑐰𑐵 𑐟𑐶𑐳𑐵 𑐣𑑂𑐫𑐵𑐫𑐾 𑐩𑐵𑐮 𑐢𑐵𑑅𑐳𑐵 𑐁𑐩𑑂𑐡𑐵𑐣𑐷 𑐳𑑂𑐬𑑀𑐟𑐫𑐵 𑐡𑐎𑑂𑐰𑑄 𑐰𑐶𑐰𑐬𑐞 𑐧𑐷𑐩𑐵𑑅𑐐𑐸 𑐠𑑂𑐰 𑐐𑐖𑑂𑐫𑐵𑑅𑐐𑐸 𑐳𑐬𑐎𑐵𑐬𑐷 𑐣𑐷𑐟𑐶 𑐏𑑅 𑐢𑐎𑐵𑑅 𑐣𑑂𑐴𑑂𑐫𑐳𑑅 𑐟𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐳𑐬𑐎𑐵𑐬𑑄 𑐣𑑂𑐴𑑂𑐫𑐵𑐐𑐸 𑐴𑐾 𑐎𑐠𑑄𑐫𑐵 𑐣𑐷𑐟𑐶, 𑐋𑐣, 𑐎𑐵𑐣𑐹𑐣, 𑐣𑐶𑐬𑑂𑐡𑐾𑐱𑐶𑐎𑐵, 𑐣𑐶𑐫𑐩𑐵𑐰𑐮𑐷 𑐴𑑅𑐳𑐵𑑄 𑐄𑐎𑐶𑐫𑐵𑐟 𑐰𑐶𑐬𑑀𑐢 𑐫𑐵𑐂𑐥𑐶𑑄 𑐡𑐸, 𑐟𑐬 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐰𑑂𑐫𑐰𑐳𑐵𑐫𑐫𑐵 𑐣𑐶𑑄𑐟𑐶𑑄 𑐋𑐣 𑐴𑐵𑐫𑐾 𑐩𑐵𑐮 𑐢𑐫𑐵𑐔𑑂𑐰𑑄𑐐𑐸 𑐡𑑃 𑐡𑑃 𑐡𑐫𑐾𑐢𑐸𑑄𑐎𑐹𑐳𑐵𑑄 𑐧𑐾𑐰𑐵𑐳𑑂𑐟𑐵 𑐫𑐵𑐣𑐵𑐔𑑂𑐰𑑄𑐐𑐸𑐫𑐵 𑐮𑐶𑐄𑐣𑐾 𑐕𑐸𑑄 𑐬𑐴𑐳𑑂𑐫 𑐰𑐵 𑐎𑐵𑐬𑐞 𑐀𑐰𑐱𑑂𑐫 𑐣𑑄 𑐳𑐸𑐮𑐵𑐔𑑂𑐰𑑄𑐐𑐸 𑐡𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋
𑐳𑐸𑐣𑐔𑐵𑑃𑐡𑐷 𑐰𑑂𑐫𑐰𑐳𑐵𑐫𑐷 𑐩𑐴𑐵𑐳𑑄𑐑𑐫𑐵 𑐣𑐵𑐫𑑅 𑐩𑐵𑐞𑐶𑐎𑐬𑐟𑑂𑐣 𑐱𑐵𑐎𑑂𑐫𑑄 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐡𑐾𑐫𑑂𑐫𑐵 𑐀𑐬𑑂𑐠𑐟𑐣𑑂𑐟𑑂𑐬𑐫𑑂 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵𑑄 𑐰𑑂𑐫𑐰𑐳𑐵𑐫𑐷𑐟 𑐣𑐶𑐬𑐵𑐱 𑐖𑐸𑐫𑐵𑐔𑑂𑐰𑑄𑐐𑐸𑐥𑐵𑐏𑐾𑑄 𑐂𑑄𑐐𑐶𑐟 𑐫𑐵𑐳𑐾𑑄 𑐡𑐾𑐫𑑂𑐫𑐵 𑐀𑐬𑑂𑐠𑐟𑐣𑑂𑐟𑑂𑐬𑐫𑐵 𑐎𑐵𑐬𑐞𑑄 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫𑐷𑐟 𑐁𑐟𑑂𑐩𑐴𑐟𑑂𑐫𑐵 𑐫𑐵𑐫𑐾𑐩𑐵𑐮𑐷𑐐𑐸 𑐟𑐎𑐫𑐵 𑐀𑐰𑐳𑑂𑐠𑐵 𑐠𑑂𑐫𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋 𑐧𑐿𑑄𑐎 𑐰 𑐰𑐶𑐟𑑂𑐟𑐷𑐫 𑐳𑑄𑐳𑑂𑐠𑐵𑐫𑐵 𑐎𑐜𑐵𑐂, 𑐳𑐴𑐎𑐵𑐬𑐷 𑐢𑐬𑐵𑐳𑐵𑐫𑐷 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐠𑑅𑐥𑐶𑐣𑐶𑐐𑐸 𑐰𑑂𑐫𑐰𑐳𑐵𑐫𑐫𑑂 𑐣𑑄 𑐳𑑄𑐎𑐸𑐔𑐣 𑐰𑐫𑐵𑐔𑑂𑐰𑑄𑐐𑐸 𑐰 𑐟𑑂𑐬𑐵𑐳𑐫𑐵 𑐰𑐵𑐟𑐵𑐰𑐬𑐞𑐫𑑂 𑐰𑑂𑐫𑐰𑐳𑐵𑐫 𑐫𑐵𑐫𑐾𑐟 𑐧𑐵𑐢𑑂𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋
𑐰𑐫𑑂𑐎𑐮𑑄 𑐰𑐶𑐱𑑂𑐰𑐫𑐵 𑐴𑐬𑐾𑐎 𑐡𑐾𑐱𑑄 𑐳𑐮𑑄𑐳𑑅 𑐚𑐣 𑐮𑐸 𑐴𑑀𑐮𑑂𑐜𑐶𑐒 𑐫𑐵𑐣𑐵 𑐟𑑅𑐐𑐸𑐮𑐶𑑄 𑐴𑐾 𑐣𑐾𑐥𑐵𑑅𑐫𑐵 𑐧𑐖𑐵𑐬𑐫𑑂 𑐖𑐎 𑐰𑐶𑐱𑑂𑐰 𑐧𑐖𑐵𑐬𑐫𑑂 𑐴𑐾 𑐮𑐸𑑃𑐫𑐵 𑐨𑐵𑑅 𑐀𑐳𑑂𑐰𑐵𑐨𑐵𑐰𑐶𑐎 𑐬𑐸𑐥𑑄 𑐠𑐴𑐵𑑄 𑐰𑑄𑐐𑐸 𑐏𑑅 𑐢𑐫𑐵𑐡𑐶𑐮 𑑋
𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑐸𑐮𑐵𑑄𑐩𑑂𑐴 𑐩𑐾𑐫𑐬 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐴𑐬𑐾𑐎 𑐥𑐾𑐱𑐵, 𑐰𑑂𑐫𑐰𑐳𑐵𑐫 𑐰 𑐎𑑂𑐲𑐾𑐟𑑂𑐬𑐫𑑂 𑐳𑐩𑐳𑑂𑐫𑐵 𑐡𑐸 𑑋 𑐠𑐸𑐎𑐷 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫 𑐣𑑄 𑐀𑐕𑐸𑐟 𑐩𑐖𑐹 𑐢𑐵𑐳𑐾𑑄 𑐳𑐎𑐳𑐶𑐣𑑄 𑐠𑑅𑐟 𑐖𑐹𑐐𑐸 𑐳𑐩𑐳𑑂𑐫𑐵 𑐖𑐎 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐫𑐵𑐂 𑑋 𑐟𑐬 𑐳𑐩𑐵𑐢𑐵𑐣𑐫𑐵 𑐮𑑃𑐥𑐸 𑐩𑐵𑐮𑐾𑐐𑐸 𑐳𑐸𑐣𑐵𑐣𑑄 𑐳𑑂𑐰𑐂𑐩𑐏𑐸 𑐢𑐵𑐳𑐾𑑄 𑐳𑐩𑐵𑐢𑐵𑐣𑐫𑐵 𑐣𑐶𑑄𑐟𑐶𑑄 𑐣𑑄 𑐥𑐴𑐮 𑐫𑐵𑐫𑐾𑐟 𑐳𑑂𑐰𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋
𑐳𑐩𑐵𑐢𑐵𑐣𑐫𑐵 𑐣𑐶𑑄𑐟𑐶𑑄 𑐥𑐴𑐮 𑐩𑐫𑐵𑐳𑐾 𑐳𑐩𑐳𑑂𑐫𑐵 𑐖𑐎 𑐣𑑂𑐴𑑂𑐫𑐧𑑂𑐰𑐫𑐾𑐰𑑄 𑐄𑐎𑐶𑑄 𑐳𑐩𑐵𑐢𑐵𑐣𑐫𑐵 𑐮𑑃𑐥𑐸 𑐮𑐸𑐂𑐎𑐾 𑐦𑐂𑐩𑐏𑐸 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐩𑑂𑐴𑐶𑐐𑑅 𑐣𑐾𑐰𑐵𑑅𑐟𑐫𑑂𑐳𑑄 𑐴𑐾 𑐎𑐵𑐮𑐐𑐝𑐷𑐫𑐵 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐠𑑂𑐰 𑐰𑑂𑐫𑐰𑐳𑐵𑐫𑐫𑑂 𑐠𑑁𑑄 𑐰𑐶𑐡𑐾𑐱𑐷𑐟𑐫𑑂𑑄 𑐠𑐵𑐫𑑂 𑐎𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐠𑐾 𑐖𑐸𑐫𑐵 𑐰𑐣 𑐢𑐵𑑅𑐳𑐵 𑐎𑐣𑑂𑐴𑐫𑑂 𑐕𑐣𑑂𑐴𑐸𑐫𑐵 𑐡𑐶𑐣𑐫𑑂 𑐮𑐸𑑃𑐰𑐴𑐫𑐵 𑐰𑑂𑐫𑐰𑐳𑐵𑐫 𑐫𑐵𑐂𑐥𑐶𑑄 𑐣𑑄 𑐂𑐥𑐶𑑄 𑐴𑐾 𑐖𑐸𑐂𑐐𑐸 𑐰 𑐠𑐣𑐫𑐵 𑐣𑐾𑐰𑐵𑑅𑐟 𑐠𑑂𑐰 𑐰𑑂𑐫𑐰𑐳𑐵𑐫𑑄 𑐥𑐶𑐣𑐾 𑐮𑐵𑑅 𑐰𑐣𑐾𑐟 𑐃 𑐎𑐵𑐂𑐩𑐏𑐸 𑑋 𑐂𑐮𑐫𑑂 𑐗𑐷𑐳𑑄 𑐠𑑂𑐰𑐥𑐵𑐏𑐾𑑄 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐁𑐰𑐱𑑂𑐫𑐎 𑐖𑐹 𑑋’
𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡 𑐴𑐬𑐶𑐥𑑂𑐬𑐨𑐵 𑐏𑐜𑑂𑐐𑐷 𑐱𑑂𑐬𑐾𑐲𑑂𑐛𑑄 𑐠𑑅𑐥𑐶𑑄𑐟 𑐖𑐸𑐫𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵 𑐧𑐸𑑃𑐡𑐵𑐐𑐟 𑐬𑐸𑐥𑐫𑑂 𑐧𑐶𑐫𑐵𑐡𑐷𑐟 𑐂𑐣𑐵𑐥 𑐫𑐵𑐳𑐾𑑄 𑐄𑐎𑐶𑐫𑐵𑐟 𑐠𑑅𑐥𑐶𑑄𑐳𑑄 𑐥𑑂𑐬𑐡𑐾𑐱 𑐰 𑐎𑐾𑐣𑑂𑐡𑑂𑐬 𑐳𑐬𑐎𑐵𑐬𑐥𑐵𑐏𑐾𑑄 𑐳𑑄𑐧𑑀𑐢𑐣 𑐫𑐵𑐎𑐾𑐟 𑐥𑐴𑐮 𑐫𑐵𑐫𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋 𑐮𑐸𑑃𑐰𑐴 𑐰𑑂𑐫𑐰𑐳𑐵𑐫𑐫𑐵 𑐏𑑂𑐫𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐫𑐵𑐟 𑐎𑐫𑐵𑑅 𑐥𑑂𑐬𑐡𑐾𑐱𑑄 𑐳𑐩𑐵𑐢𑐵𑐣 𑐫𑐵𑐫𑐾 𑐦𑐂𑐐𑐸 𑐰𑐶𑐲𑐫𑐫 𑐠𑐩𑑂𑐴𑑄 𑐥𑑂𑐬𑐡𑐾𑐱 𑐳𑐬𑐎𑐵𑐬𑐫𑐵 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐫𑐾𑐟 𑐣𑑄 𑐥𑐴𑐮 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋
𑐠𑑁𑑄𑐎𑐣𑑂𑐴𑐫𑑂 𑐟𑑅𑐢𑑄𑐐𑐸 𑐮𑑂𑐫𑐵𑐏𑐫𑑂 𑐮𑑂𑐫𑐵𑐫𑑂𑐩𑑂𑐴𑐟 𑐰𑐶𑐡𑐾𑐱 𑐰𑐣𑐾𑐐𑐸 𑐎𑑂𑐬𑐩 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐏𑑃𑐫𑑂 𑐡𑐸𑑅𑐏 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑐸𑐎𑐶𑐫𑐵𑐟 𑐥𑐣𑐾𑐟 𑐣𑑄 𑐥𑑂𑐬𑐡𑐾𑐱 𑐳𑐬𑐎𑐵𑐬𑐥𑐵𑐏𑐾𑑄 𑐩𑐵𑑅𑐐𑐸 𑐎𑐸𑐟𑑅 𑐣𑑂𑐴𑑂𑐫𑐵𑐎𑐾𑐟 𑐠𑑅 𑐎𑑂𑐬𑐶𑐫𑐵𑐱𑐷𑐮 𑐖𑐸𑐂𑐐𑐸 𑐣𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋
𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐳𑐸𑐬𑐾𑐱 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐴𑐾 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑑄𑐑𑐫𑐵 𑐡𑐸𑐖𑑅𑐮𑐶𑐳𑐾𑑄 𑐳𑐵𑐢𑐵𑐬𑐞𑐳𑐨𑐵𑐫𑐵 𑐎𑐖𑐶 𑐀𑐨𑐶𑐲𑐾𑐎 𑐱𑐵𑐎𑑂𑐫𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅𑑋
𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐑𑐫𑐵 𑐡𑐸𑐖𑑅𑐥𑐶𑐣𑐶 𑐎𑐵𑐫 𑐩𑑂𑐴𑑂𑐫𑐵𑐫𑑂𑐩𑐢𑑂𑐫𑐾 𑑒𑑐𑑗𑑘 𑐳𑐵𑐮𑐫𑐵 𑐊𑐳𑐂𑐂 𑐥𑐬𑐷𑐎𑑂𑐲𑐵𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑐫𑐵𑐡𑐷𑐥𑐶𑑄 𑐬𑐶𑐖𑐾𑐣 𑐱𑑂𑐬𑐾𑐲𑑂𑐛 𑐰 𑐱𑑂𑐬𑐷𑐫𑐵 𑐱𑐵𑐎𑑂𑐫𑐫𑐵𑐟 𑐥𑐡𑐎𑐳𑐴𑐶𑐟 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅𑐳𑐵 𑐩𑐾𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅𑑋 𑐀𑐠𑐾 𑐴𑐾 𑐥𑑀𑐏𑐬𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 ‘𑐎𑐸𑐮𑐥𑐟𑐶 𑐥𑐡𑐎’𑐥𑐵𑐏𑐾𑑄 𑐰𑐶𑐨𑐹𑐲𑐶𑐟 𑐖𑐸𑐫𑐵𑐡𑐷𑐩𑑂𑐴 𑐣𑐶𑐩𑐾𑐲 𑐱𑐵𑐎𑑂𑐫, 𑐳𑑄𑐑𑐫𑐵 𑐎𑐸𑐳𑐸𑐩𑐧𑐶𑐫𑐵𑐮𑐵𑐕𑐶𑐂 𑐔𑑂𑐰𑑄𑐐𑐸 𑐟𑐵𑐮𑐶𑐩 𑐎𑐾𑐣𑑂𑐡𑑂𑐬𑐫𑐵 𑐨𑐰𑐣 𑐣𑐶𑐬𑑂𑐩𑐵𑐞𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐡𑐵𑐟𑐵𑐥𑐶𑑄 𑐟𑐾𑐖𑐬𑐟𑑂𑐣 𑐱𑐵𑐎𑑂𑐫 𑐰 𑐩𑐵𑐞𑐶𑐎𑐬𑐟𑑂𑐣 𑐱𑐵𑐎𑑂𑐫𑐫𑐵𑐟 𑐣𑑄 𑐰𑐶𑐱𑐾𑐲𑐎𑐠𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅𑐳𑐵 𑐳𑑄𑐑𑐫𑐵 𑐮𑐾𑐏𑐵𑐥𑐵𑐮 𑐳𑐸𑐰𑐬𑑂𑐞 𑐳𑑂𑐠𑐵𑐥𑐶𑐟𑐫𑐵𑐟 𑐄𑐟𑑂𑐎𑐺𑐲𑑂𑐚 𑐎𑐬𑑂𑐩𑐔𑐵𑐬𑐷𑐎𑐠𑑄 𑐣𑐐𑐡 𑐳𑐴𑐶𑐟 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋
LEAVE YOUR COMMENTS