𑐫𑐾𑑃 𑐩𑐴𑐵𑐣𑐐𑐬𑐫𑐵 𑐖𑑂𑐫𑐵𑐎𑐹 𑐎𑐵𑐛𑐩𑐵𑐜𑑁𑑄 𑐥𑑂𑐮𑐵𑐖𑐵𑐫𑑂 𑐟𑐂𑐐𑐸
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐎𑐵𑐛𑐩𑐵𑐜𑑁𑑄 𑐥𑑂𑐮𑐵𑐖𑐵 𑐧𑐵𑐮𑑄 𑐎𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐩𑐴𑐵𑐣𑐐𑐬𑑄 𑐎𑐵𑐛𑐩𑐵𑐜𑑁𑑄 𑐥𑑂𑐮𑐵𑐖𑐵 𑐧𑐵𑐮𑑄 𑐎𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑐾𑐥𑐵𑐮 𑐚𑑂𑐬𑐲𑑂𑐚𑐮𑐶𑐳𑐾 𑐕𑐐𑐹 𑐳𑐩𑑂𑐗𑑁𑐟𑐵 𑐣𑑄 𑐫𑐵𑑅𑐐𑐸 𑐡𑐸 𑑋 𑐰𑑄𑐐𑐸 𑐧𑐸𑐢𑐰𑐵𑑅 𑐚𑑂𑐬𑐲𑑂𑐚𑐫𑐵 𑐳𑐔𑐶𑐰 𑐳𑐬𑐖𑐸𑐎𑐸𑐩𑐵𑐬 𑐰𑐿𑐡𑑂𑐫𑐫𑐵 𑐄𑐥𑐳𑑂𑐠𑐶𑐟𑐶𑐂 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑐰𑐳𑐣𑑂𑐟 𑐀𑐢𑐶𑐎𑐵𑐬𑐷 𑐰 𑐚𑑂𑐬𑐲𑑂𑐚𑐫𑐵 𑐳𑐴𑐳𑐔𑐶𑐰 𑐰𑐶𑐲𑑂𑐞𑐸𑐎𑐸𑐩𑐵𑐬 𑐝𑐎𑐵𑐮𑑄 𑐳𑐩𑑂𑐗𑑁𑐟𑐵 𑐥𑐟𑐷 𑐮𑑂𑐴𑐵𑑅𑐔𑐶𑑄 𑐟𑐫𑐵𑐡𑐷𑐐𑐸 𑐏𑑅 𑑋
𑐳𑐩𑑂𑐗𑑁𑐟𑐵 𑐮𑐶𑐥𑐵 𑐩𑐴𑐵𑐣𑐐𑐬𑐫𑐵 𑐕𑐸𑑄 𑐕𑐸𑑄 𑐰𑐶𑐨𑐵𑐐 𑐰 𑐰𑐶𑐨𑐵𑐐 𑐀𑐣𑑂𑐟𑐬𑑂𑐐𑐟𑐫𑐵 𑐖𑑂𑐫𑐵𑐎𑐹 𑐎𑐵𑐛𑐩𑐵𑐜𑑁𑑄 𑐥𑑂𑐮𑐵𑐖𑐵𑐫𑑂 𑐳𑑂𑐠𑐵𑐣𑐵𑐣𑑂𑐟𑐬𑐞 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐰𑐶𑐨𑐵𑐐 𑐰 𑐰𑐶𑐨𑐵𑐐 𑐀𑐣𑑂𑐟𑐬𑑂𑐐𑐟𑐫𑐵 𑐖𑑂𑐫𑐵𑐎𑐹𑐥𑐵𑐏𑐾𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐳𑐾𑐰𑐵𑐫𑑂 𑐳𑐩𑐳𑑂𑐫𑐵 𑐩𑐖𑐸𑐂𑐎 𑐖𑑂𑐫𑐵𑐎𑐹𑐟 𑐥𑑂𑐮𑐵𑐖𑐵𑐫𑑂 𑐳𑑂𑐠𑐵𑐣𑐵𑐣𑑂𑐟𑐬𑐞 𑐫𑐵𑐣𑐵 𑐫𑑄𑐎𑐾𑐐𑐸 𑐫𑑀𑐖𑐣𑐵 𑐡𑐸𑐐𑐸 𑐩𑐴𑐵𑐣𑐐𑐬𑐫𑐵 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑐀𑐢𑐶𑐎𑐵𑐬𑐷𑑄 𑐎𑐣𑐵𑐡𑐷𑐐𑐸 𑐡𑐸 𑑋
𑐳𑐩𑑂𑐗𑑁𑐟𑐵𑐎𑐠𑑄 𑐥𑑂𑐮𑐵𑐖𑐵𑐫𑐵 𑐗𑑂𑐫𑐵𑑅, 𑐏𑐵𑐥𑐵, 𑐮𑐸𑐏𑐵, 𑐮𑐶𑐦𑑂𑐚𑐮𑐶𑐳𑐾𑑄 𑐳𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑑄𑐬𑐔𑐣𑐵 𑐩𑐴𑐵𑐣𑐐𑐬𑑄 𑐩𑐬𑑂𑐩𑐟 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐄𑐎𑐠𑑄𑐫𑐵 𑐳𑑄𑐬𑐔𑐣𑐵 𑐩𑐬𑑂𑐩𑐟 𑐰𑐵𑐥𑐟 𑐖𑐹𑐐𑐸 𑐏𑐬𑑂𑐔 𑐩𑐴𑐵𑐣𑐐𑐬𑑄 𑐧𑐵𑐮𑑄 𑐰𑐵𑐥𑐟𑐫𑐵 𑐢𑑂𑐫𑐧𑐵𑐫𑑂 𑐎𑐚𑐾 𑐫𑐵𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐠𑑂𑐰 𑐧𑐵𑐴𑐾𑐎𑑄 𑐩𑐾𑐩𑐾𑐐𑐸 𑐁𑐰𑐱𑑂𑐫𑐎𑐟𑐵𑐎𑐠𑑄𑐫𑐵 𑐳𑑄𑐬𑐔𑐣𑐵𑐫𑐵 𑐣𑑄 𑐩𑐬𑑂𑐩𑐟 𑐣𑑄 𑐩𑐴𑐵𑐣𑐐𑐬𑑄 𑐴𑐾 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑐸𑐎𑐠𑑄𑐫𑐵 𑐩𑐬𑑂𑐩𑐟 𑐫𑐵𑐂𑐐𑐸 𑐂𑐮𑐫𑑂 𑐥𑑂𑐮𑐵𑐖𑐵𑐫𑐵 𑐥𑐶𑐣𑐾𑐫𑐵 𑐳𑑄𑐬𑐔𑐣𑐵𑐫𑑂 𑐢𑐵𑑅𑐳𑐵 𑐐𑐸𑐐𑐸𑑄 𑐣𑑄 𑐴𑐾𑐬𑐦𑐾𑐬 𑐫𑐵𑐂𑐩𑐏𑐸 𑑋
𑐨𑐰𑐣𑐫𑐵 𑐥𑑂𑐬𑐫𑑀𑐐 𑐰𑐵𑐥𑐟 𑐖𑐸𑐂𑐐𑐸 𑐮𑑅, 𑐩𑐟𑐮𑐶𑐳𑐾𑑄 𑐩𑐾𑐩𑐾𑐐𑐸 𑐳𑐸𑐰𑐶𑐢𑐵𑐫𑐵 𑐧𑐶𑐮𑐫𑐵 𑐨𑐸𑐎𑑂𑐟𑐵𑐣𑐷 𑐣𑑄 𑐩𑐴𑐵𑐣𑐐𑐬𑑄 𑐴𑐾 𑐫𑐵𑐂 𑑋 𑐠𑑅𑐐𑐸 𑐎𑑂𑐲𑐾𑐟𑑂𑐬𑑄 𑐥𑐶𑐣𑐾 𑐮𑐵𑑅𑐐𑐸 𑐀𑐢𑐶𑐎𑐵𑐬 𑐰𑐵 𑐥𑑂𑐬𑐫𑑀𑐖𑐣𑐫𑑂 𑐩𑐡𑐸𑐐𑐸 𑐕𑐸𑑄 𑐣𑑄 𑐳𑑄𑐬𑐔𑐣𑐵𑐫𑐵 𑐚𑐸𑐚𑐦𑐸𑐚 𑐖𑐹𑐳𑐵 𑐄𑐎𑐶𑐫𑐵 𑐣𑑄 𑐏𑐬𑑂𑐔 𑐩𑐴𑐵𑐣𑐐𑐬𑑄 𑐴𑐾 𑐫𑐵𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐠𑑂𑐰 𑐧𑐵𑐴𑐾𑐎𑑄 𑐠𑑅𑐐𑐸 𑐣𑐶𑐫𑐣𑑂𑐟𑑂𑐬𑐞𑑄 𑐥𑐶𑐣𑐾 𑐮𑐵𑑅𑐐𑐸 𑐥𑐬𑐶𑐳𑑂𑐠𑐶𑐟𑐶 𑐩𑐾𑐐𑐸 𑐕𑐸𑑄 𑐣𑑄 𑐎𑐠𑑄𑐫𑐵 𑐳𑑄𑐬𑐔𑐣𑐵 𑐩𑐬𑑂𑐩𑐟 𑐳𑐩𑑂𑐨𑐵𑐬 𑐩𑐴𑐵𑐣𑐐𑐬𑑄 𑐩𑐫𑐵𑐫𑐾𑐐𑐸 𑐣𑑄 𑐳𑐩𑑂𑐗𑑁𑐟𑐵 𑐥𑐟𑐷 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋
𑐳𑐩𑑂𑐗𑑁𑐟𑐵 𑐮𑐶𑐥𑐵 𑐄𑐐𑐸 𑐨𑐰𑐣 𑐩𑐴𑐵𑐣𑐐𑐬𑑄 𑐠𑑅𑐐𑐸 𑐥𑑂𑐬𑐫𑑀𑐖𑐣𑐫𑑂 𑐴𑐂𑐐𑐸 𑐖𑐹𑐐𑐸 𑐡𑐸 𑑋 𑐕𑐸𑑄 𑐎𑐵𑐬𑐞𑐰𑐱 𑐨𑐰𑐣 𑐟𑑂𑐰𑑅𑐟𑐾 𑐩𑐵𑐮 𑐰 𑐟𑑂𑐰𑑅𑐟𑐎𑐾 𑐩𑐵𑐮𑐢𑐵𑑅𑐳𑐵 𑑑𑑘𑑐 𑐣𑑂𑐴𑐸 𑐣𑑂𑐴𑑂𑐫𑑅 𑐴𑐾 𑐕𑐐𑐹 𑐥𑐎𑑂𑐲𑑄 𑐩𑐾𑐐𑐸 𑐥𑐎𑑂𑐲𑐫𑐵𑐟 𑐖𑐵𑐣𑐎𑐵𑐬𑐷 𑐧𑐷𑐩𑐵𑑅𑐐𑐸 𑐣𑑄 𑐳𑐩𑑂𑐗𑑁𑐟𑐵 𑐥𑐟𑐷 𑐢𑐫𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐳𑐩𑑂𑐗𑑁𑐟𑐵 𑑑𑑐 𑐡𑑃𑐫𑐵 𑐣𑐶𑑄𑐟𑐶𑑄 𑐏𑑅𑐳𑐵 𑐣𑑂𑐫𑐵𑐡𑑃 𑐮𑐶𑐥𑐵 𑑑𑑐 𑐥𑑂𑐬𑐟𑐶𑐱𑐟𑑄 𑐧𑐵𑑅 𑐰𑐺𑐡𑑂𑐢𑐶 𑐫𑐵𑐫𑐾𑐐𑐸 𑐣𑑄 𑐳𑐩𑑂𑐗𑑁𑐟𑐵 𑐥𑐟𑐷 𑐢𑐫𑐵𑐟𑑅𑐐𑐸 𑐡𑐸 𑑋
𑑒𑑐𑑗𑑒 𑐳𑐵𑐮𑐫𑑂 𑐨𑐸𑐏𑐵𑐫𑑂 𑐧𑑂𑐰𑐫𑐵𑑅 𑐧𑐵𑐐𑐡𑐬𑐰𑐵𑐬 𑐎𑑂𑐲𑐟𑐶 𑐖𑐸𑐂𑐰𑑄 𑐕𑐸𑑄 𑐃 𑐬𑐵𑐲𑑂𑐚𑑂𑐬𑐶𑐫 𑐳𑐨𑐵𑐐𑐺𑐴𑐥𑐵𑐏𑐾𑑄 𑐳𑐾𑐰𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑑁𑑄𑐎𑐣𑑂𑐴𑐫𑑂 𑐧𑐵𑐐𑐡𑐬𑐰𑐵𑐬 𑐮𑐶𑐎𑑂𑐎𑑄 𑐔𑑂𑐰𑑄𑐐𑐸 𑐖𑐾𑐜𑐷𑐊 𑐎𑐩𑑂𑐥𑑂𑐮𑐾𑐎𑑂𑐳𑑄 𑐳𑐾𑐰𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐴𑐵𑐣𑐐𑐬𑐫𑐵 𑐡𑐎𑑂𑐰𑑄 𑐰𑐶𑐨𑐵𑐐 𑐕𑐐𑐹 𑐠𑐵𑐳𑐫𑑂 𑐟𑐫𑐾𑐐𑐸 𑐳𑐩𑑂𑐨𑐰 𑐩𑐖𑐸𑐂𑐰𑑄 𑐠𑐷𑐠𑐷 𑐠𑐵𑐳𑐫𑑂 𑐟𑐫𑐵𑑅 𑐳𑐾𑐰𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐁𑑅 𑐠𑐸𑐎𑐠𑑄 𑐠𑐷𑐠𑐷 𑐠𑐵𑐳𑐫𑑂 𑐣𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐎𑑂𑐰𑑄 𑐳𑑄𑐬𑐔𑐣𑐵, 𑐳𑐾𑐰𑐵 𑐰 𑐖𑑂𑐫𑐵𑐎𑐹𑐫𑐵𑐟 𑐕𑐐𑐹 𑐴𑐾 𑐠𑐵𑐳𑐫𑑂 𑐟𑐫𑐵𑑅 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐎𑐵𑐛𑐩𑐵𑐜𑑁𑑄 𑐥𑑂𑐮𑐵𑐖𑐵𑐫𑐵 𑐨𑐰𑐣 𑐧𑐵𑐮𑑄 𑐎𑐵𑑅𑐐𑐸 𑐏𑑅 𑑋
LEAVE YOUR COMMENTS