𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐐𑐵 𑐥𑐵𑐬𑐹 -

𑐥𑐸𑐣𑑅𑐣𑐶𑐬𑑂𑐩𑐵𑐞 𑐖𑐹𑐐𑐸 𑐳𑐩𑑂𑐥𑐡𑐵𑐫𑐵 𑐰𑐶𑐰𑐬𑐞 𑐕𑑂𑐰𑐫𑐵 𑐴𑐫𑐾𑐟 𑐂𑐣𑐵𑐥

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐥𑐸𑐣𑑅𑐣𑐶𑐬𑑂𑐩𑐵𑐞 𑐖𑐸𑐂𑐢𑐸𑑄𑐎𑐹𑐐𑐸 𑐳𑐩𑑂𑐥𑐡𑐵𑐫𑐵 𑐰𑐶𑐰𑐬𑐞 𑐩𑐴𑐵𑐣𑐐𑐬𑐫𑑂 𑐕𑑂𑐰𑐫𑐵 𑐴𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑑄 𑑒𑑐𑑗𑑒 𑐳𑐵𑐮𑐫𑐵 𑐰𑐶𑐣𑐵𑐱𑐎𑐵𑐬𑐷 𑐟𑑅𑐨𑐸𑐏𑐵𑐔𑑄 𑐖𑐷𑐬𑑂𑐞 𑐫𑐵𑑅𑐐𑐸 𑐳𑐩𑑂𑐥𑐡𑐵𑐩𑐢𑑂𑐫𑐾 𑐥𑐸𑐣𑑅𑐣𑐶𑐬𑑂𑐩𑐵𑐞 𑐖𑐸𑐂𑐢𑐸𑑄𑐎𑐹𑐐𑐸 𑐳𑐩𑑂𑐥𑐡𑐵𑐫𑐵 𑐢𑐮𑑅 𑐩𑐴𑐵𑐣𑐐𑐬𑐫𑑂 𑐕𑑂𑐰𑐫𑐵 𑐴𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐀𑐢𑐶𑐎𑐵𑐬 𑐳𑐩𑑂𑐥𑐣𑑂𑐣 𑐧𑐵𑐐𑐩𑐟𑐶 𑐳𑐨𑑂𑐫𑐟𑐵 𑐊𑐎𑐷𑐎𑐺𑐟 𑐰𑐶𑐎𑐵𑐳 𑐳𑐩𑐶𑐟𑐶𑐫𑐵𑐟 𑐚𑐾𑐎𑐸 𑐡𑑀𑐨𑐵𑐣𑐏𑐞𑑂𑐜𑐫𑑂 𑐥𑐸𑐣𑑅𑐣𑐶𑐬𑑂𑐩𑐵𑐞 𑐖𑐹𑐐𑑂𑐸 𑐳𑐩𑑂𑐥𑐡𑐵𑐫𑐵 𑐰𑐶𑐰𑐬𑐞 𑐩𑐴𑐵𑐣𑐐𑐬𑐫𑑂 𑐕𑑂𑐰𑐫𑐵 𑐴𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑑒𑑐𑑗𑑒 𑐳𑐵𑐮𑐫𑐵 𑐰𑐶𑐣𑐵𑐱𑐎𑐵𑐬𑐷 𑐨𑐸𑐏𑐵𑐔𑑄 𑐖𑐷𑐬𑑂𑐞 𑐖𑐸𑐫𑐵𑑅 𑐥𑐸𑐣𑑅𑐣𑐶𑐬𑑂𑐩𑐵𑐞 𑐎𑑂𑐰𑐔𑐵𑐫𑐾𑐎𑐵𑑅 𑐴𑐳𑑂𑐟𑐵𑐣𑑂𑐟𑐬𑐞 𑐖𑐹𑐐𑐸 𑐳𑐩𑑂𑐥𑐡𑐵 𑐰 𑐄𑐎𑐶𑐫𑐵 𑐄𑐥𑐫𑑀𑐐 𑐰𑐶𑐲𑐫𑐫𑑂 𑐖𑐹𑐐𑐸 𑐳𑐵𑐗𑐾𑐡𑐵𑐬𑐟𑐫𑑂 𑐧𑐿𑐛𑐎𑐫𑑂 𑐄𑐎𑐠𑑄 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐧𑐿𑐛𑐎𑐫𑑂 𑐄𑐥𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐳𑐩𑑂𑐥𑐡𑐵 𑐎𑑂𑐲𑐾𑐟𑑂𑐬𑐫𑐵 𑐳𑑄𑐬𑐎𑑂𑐲𑐞, 𑐰𑑂𑐫𑐰𑐳𑑂𑐠𑐵𑐥𑐣, 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐩𑐴𑐵𑐣𑐐𑐬𑐫𑐵 𑐏𑑅 𑐢𑐵𑐳𑐾𑑄 𑐳𑐩𑐶𑐟𑐶𑐫𑐵𑐎𑐾 𑐡𑐸𑐐𑐸 𑐀𑐖𑑂𑐫𑐵𑑅𑐐𑐸 𑐎𑑂𑐲𑐾𑐟𑑂𑐬𑐫𑐵 𑐳𑐩𑑂𑐥𑐡𑐵 𑐰 𑐥𑐸𑐣𑑅𑐣𑐶𑐬𑑂𑐩𑐵𑐞𑐳𑐩𑑂𑐧𑐣𑑂𑐢𑐷 𑐰𑐶𑐰𑐬𑐞 𑐩𑐴𑐵𑐣𑐐𑐬𑐫𑑂 𑐕𑑂𑐰𑐫𑐵 𑐴𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐊𑐱𑐶𑐫𑐵𑐮𑐷 𑐰𑐶𑐎𑐵𑐳 𑐧𑐿𑑄𑐎𑐫𑐵 𑐟𑑂𑐫𑐵𑐳𑐵 𑐐𑑂𑐰𑐵𑐴𑐵𑐮𑐶𑐥𑐵𑐏𑐾𑑄 𑐠𑐵𑐥𑐵𑐠𑐮𑐷𑐣𑐶𑐳𑐾𑑄 𑐚𑐾𑐎𑐸 𑐡𑑀𑐨𑐵𑐣𑐟𑐎 𑐳𑑂𑐰𑑄𑐐𑐹 𑐔𑐬𑐞𑐫𑑂 𑐏𑐸𑐳𑐶 𑐳𑐸𑐢𑐵𑐬 𑐥𑐬𑐶𑐫𑑀𑐖𑐣𑐵 𑐀𑐣𑑂𑐟𑐬𑑂𑐐𑐟 𑐣𑑂𑐴𑐵𑐥𑐵𑑄𑐐𑐸 𑐔𑐬𑐞𑐫𑑂 𑐚𑐾𑐎𑐸 𑐡𑑀𑐨𑐵𑐣𑐣𑐶𑐳𑐾𑑄 𑐚𑐾𑐎𑐸𑐫𑐵 𑐟𑐵𑑃𑐟𑐎 𑐖𑐷𑐬𑑂𑐞 𑐳𑐩𑑂𑐥𑐡𑐵 𑐥𑐸𑐣𑑅𑐣𑐶𑐬𑑂𑐩𑐵𑐞 𑐰 𑐩𑐬𑑂𑐩𑐟 𑐳𑐩𑑂𑐨𑐵𑐬𑐫𑐵 𑐖𑑂𑐫𑐵 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐣𑑂𑐴𑐵𑐥𑐵𑑄𑐐𑐸 𑐔𑐬𑐫𑐞𑐫𑑂 𑐠𑑂𑐰 𑐮𑐵𑐐𑐵𑐫𑐵 𑑑𑑑 𑐐𑐹 𑐳𑐩𑑂𑐥𑐡𑐵 𑐐𑐸𑐠𑐶 𑐳𑑄𑐳𑑂𑐠𑐵𑐣 𑐰 𑐣𑐶𑐖𑐷 𑐐𑐸𑐠𑐶𑐫𑐵𑐟 𑐴𑐳𑑂𑐟𑐵𑐣𑑂𑐟𑐬𑐞 𑐟𑐎𑑄 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋
𑐠𑐸𑐎𑐠𑑄 𑐴𑐾 𑐣𑐶𑐐𑐹𑐐𑐸 𑐰 𑐳𑑂𑐰𑑄𑐐𑐹𑐐𑐸 𑐔𑐬𑐞𑐫𑑂 𑐚𑐾𑐎𑐸 𑐟𑐵𑑃𑐣𑐶𑐳𑐾𑑄 𑐟𑐸𑐎𑐸𑐔𑐵 𑐧𑐵𑐐𑐩𑐟𑐶 𑐡𑑀𑐨𑐵𑐣 𑐖𑐸𑐫𑐵𑑅 𑐠𑐵𑐥𑐵𑐠𑐵𑐮𑐷 𑐟𑐵𑑃𑐟𑐎𑐫𑐵 𑐏𑐞𑑂𑐜𑐫𑑂 𑐮𑐵𑑅𑐐𑐸 𑐳𑐩𑑂𑐥𑐡𑐵 𑐥𑐸𑐣𑑅𑐣𑐶𑐬𑑂𑐩𑐵𑐞, 𑐩𑐬𑑂𑐩𑐟 𑐳𑐩𑑂𑐨𑐵𑐬 𑐰 𑐏𑐸𑐳𑐶𑐫𑐵 𑐖𑑅𑐏𑑅 𑐳𑐸𑐣𑑂𑐡𑐬𑐟𑐵 𑐴𑐫𑐾𑐐𑐸 𑐮𑑂𑐫𑐵𑐏𑑄 𑐥𑐹𑐬𑑂𑐰𑐵𑐢𑐵𑐬 𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐣𑑂𑐴𑐵𑐥𑐵𑑄𑐐𑐸 𑐔𑐬𑐞𑐫𑑂 𑑓𑑗 𑐐𑐹, 𑐣𑐶𑐐𑐹 𑐔𑐬𑐞𑐫𑐵 𑐖𑑂𑐫𑐵 𑐫𑐵𑐫𑐾𑐟 𑑔𑑐 𑐐𑐹 𑐰 𑐳𑑂𑐰𑑄𑐐𑐹𑐐𑐸 𑐔𑐬𑐞𑐫𑑂 𑑓𑑕 𑐐𑐹 𑐎𑐬𑑀𑐛 𑐮𑐵𑐐𑐟 𑐟𑐸𑐂𑐐𑐸 𑐀𑐣𑐸𑐩𑐵𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐧𑐿𑐛𑐎𑐫𑑂 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑐰𑐳𑐣𑑂𑐟 𑐀𑐢𑐶𑐎𑐵𑐬𑐷𑑄 𑐩𑐴𑐵𑐣𑐐𑐬 𑐡𑐸𑐣𑐾 𑐔𑑂𑐰𑑄𑐐𑐸 𑐳𑐩𑑂𑐥𑐡𑐵𑐫𑐵 𑐊𑐎𑐷𑐎𑐺𑐟 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐫𑐾𑑃 𑐩𑐴𑐵𑐣𑐐𑐬 𑐏𑑅 𑐢𑐵𑐳𑐾𑑄 𑐄𑐎𑐶𑐫𑐵 𑐖𑐶𑐩𑑂𑐩𑐵 𑐠𑑅𑐥𑐶𑑄𑐳𑑄 𑐎𑐵𑐫𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐥𑐸𑐣𑑅𑐣𑐶𑐬𑑂𑐩𑐵𑐞 𑐎𑑂𑐰𑐔𑐵𑐫𑐾𑐢𑐸𑑄𑐎𑐹𑐐𑐸 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐩𑐾𑐩𑐾𑐐𑐸 𑐳𑐩𑑂𑐥𑐡𑐵𑐫𑐵𑐟 𑐀𑐠𑐾𑑄 𑐟𑑂𑐰𑑅𑐟𑐾 𑐩𑐶𑐮𑐾 𑐩𑐖𑐹 𑐢𑐵𑐳𑐾𑑄 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐁𑑄𑐱𑐶𑐎 𑐩𑐏𑐳𑐾 𑐊𑐎𑐷𑐎𑐺𑐟 𑐬𑐸𑐥𑑄 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞 𑐰 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐖𑑂𑐫𑐵 𑐫𑐵𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋𑐧𑐿𑐛𑐎 𑐮𑐶𑐥𑐵 𑐳𑐴𑐨𑐵𑐐𑐶 𑐳𑐎𑐳𑐶𑐣𑑄 𑐥𑐸𑐣𑑅𑐣𑐶𑐬𑑂𑐩𑐵𑐞 𑐖𑐹𑐐𑐸 𑐳𑐩𑑂𑐥𑐡𑐵𑐫𑐵 𑐀𑐰𑐮𑑀𑐎𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋