𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐠𑑁𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐎𑐵𑐂𑐐𑐸, 𑐗𑐶𑐐𑐹 𑐡𑐮𑐫𑐵 𑐳𑐩𑐬𑑂𑐠𑐣
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷ 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮𑑄 𑐠𑑁𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐎𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐥𑐟𑐶 𑐣𑐶𑐬𑑂𑐰𑐵𑐔𑐣 𑐮𑐶𑐥𑐵 𑐣𑐾𑐎𑐥𑐵 𑐊𑐩𑐵𑐮𑐾 𑐰 𑐬𑐵𑐥𑑂𑐬𑐥𑐵𑑄 𑐳𑐬𑐎𑐵𑐬𑐫𑐵𑐟 𑐧𑐶𑐫𑐵𑐟𑑅𑐐𑐸 𑐳𑐩𑐬𑑂𑐠𑐣 𑐮𑐶𑐟 𑐎𑐵𑐫𑐾𑐰𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐠𑑁𑑄 𑐴𑐵𑐎𑐣𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐎𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐠𑑁𑑄 𑑑 𑐧𑐖𑐾 𑐔𑑂𑐰𑐣𑐶𑐐𑐸 𑐥𑑂𑐬𑐟𑐶𑐣𑐶𑐢𑐶𑐳𑐨𑐵𑐫𑐵 𑐧𑐿𑐛𑐎𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐰𑐶𑐱𑑂𑐰𑐵𑐳 𑐩𑐟 𑐎𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋
𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳, 𑐬𑐵𑐳𑑂𑐰𑐥𑐵 𑐰 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐳𑐩𑐵𑐖𑐰𑐵𑐡𑐷 𑐮𑐶𑐳𑐾𑑄 𑐗𑐶𑐐𑐹 𑐡𑐮𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐖𑐹𑐐𑐸 𑐡𑐸 𑑋 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳𑐫𑐵 𑐳𑑄𑐳𑐡𑐷𑐫 𑐡𑐮𑐫𑐵 𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐧𑐿𑐛𑐎𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑐳𑐾𑑄 𑐳𑐵𑑄𑐳𑐡𑐟𑐫𑑂𑐟 𑐴𑑂𑐰𑐷𑐥 𑐖𑐵𑐬𑐷 𑐫𑐵𑑅𑐐𑐸 𑐡𑐸 𑑋 𑐎𑐵𑑄𑐐𑑂𑐬𑐾𑐳𑑄 𑐳𑐬𑐎𑐵𑐬𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐮𑐶𑐳𑐾𑑄 𑐳𑐬𑐎𑐵𑐬𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋
𑐄𑐎𑐠𑑄 𑐴𑐾 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑑄 𑐣𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋 𑐮𑑀𑐳𑐥𑐵𑐫𑐵 𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐳𑑄𑐳𑐡𑐷𑐫 𑐡𑐮𑐫𑐵 𑐧𑐿𑐛𑐎𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸𑐫𑐵 𑐮𑐶𑐳𑐾𑑄 𑐳𑐬𑐎𑐵𑐬𑐫𑑂 𑐰𑐣𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐖𑐵𑐣𑐎𑐵𑐬𑐷 𑐥𑐵𑐬𑑂𑐚𑐷𑐫𑐵 𑐰𑐬𑐶𑐲𑑂𑐛 𑐣𑐾𑐟𑐵 𑐬𑐵𑐖𑐾𑐣𑑂𑐡𑑂𑐬 𑐩𑐴𑐟𑑀𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋 𑐥𑐟𑑂𑐬𑐎𑐵𑐬𑐟 𑐮𑐶𑐳𑐾 𑐏𑑃 𑐮𑑂𑐴𑐵𑐫𑐾𑐐𑐸 𑐮𑑂𑐴𑐵𑐫𑐾𑐐𑐸 𑐗𑑂𑐰𑐮𑐫𑑂 𑐩𑐴𑐟𑑀𑑄 𑐢𑐫𑐵𑐡𑐶𑐮, ‘𑐥𑐵𑐬𑑂𑐚𑐷𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐢𑐸𑑄𑐎𑐵𑑅 𑐳𑐬𑐎𑐵𑐬𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐮𑑃𑐥𑐸 𑐔𑐵𑐮𑐷 𑑋’
𑐀𑐠𑐾 𑐴𑐾 𑐬𑐵𑐲𑑂𑐚𑑂𑐬𑐶𑐫 𑐳𑑂𑐰𑐟𑐣𑑂𑐟𑑂𑐬 𑐥𑐵𑐬𑑂𑐚𑐷𑑄 𑐣𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋 𑐬𑐵𑐳𑑂𑐰𑐥𑐵𑐫𑐵 𑐎𑐾𑐣𑑂𑐡𑑂𑐬𑐷𑐫 𑐳𑐩𑐶𑐟𑐶 𑐰 𑐳𑑄𑐳𑐡𑐷𑐫 𑐡𑐮𑐫𑐵 𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐩𑑄𑐎𑐵𑑅 𑐧𑐿𑐛𑐎𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐄𑐎𑐠𑑄 𑐴𑐾 𑐣𑐾𑐎𑐥𑐵 𑐊𑐎𑐷𑐎𑐺𑐟 𑐳𑐩𑐵𑐖𑐰𑐵𑐡𑐷 𑐣𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑐫𑐵𑐟 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋 𑐣𑐾𑐎𑐥𑐵 𑐊𑐳𑑄 𑐣𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐶𑐫𑐵𑑅 𑐳𑐬𑐎𑐵𑐬𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋
𑐠𑑂𑐰𑐴𑐾 𑐗𑑂𑐰𑐮𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐠𑑁𑑄𑐫𑐵 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐧𑐿𑐛𑐎𑐫𑑂 𑐠𑑅𑐟 𑐱𑐟𑐥𑑂𑐬𑐟𑐶𑐱𑐟 𑐳𑐵𑑄𑐳𑐡𑐥𑐶𑐳𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐷𑐐𑐸 𑐁𑐱𑐵 𑐟𑐫𑐵𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐧𑐿𑐛𑐎𑑄 𑐥𑐶𑐴𑐵𑑄 𑐰𑐫𑐾𑐐𑐸 𑐗𑑂𑐰𑐮𑐫𑑂 𑐳𑐘𑑂𑐔𑐵𑐬𑐎𑐬𑑂𑐩𑐷𑐟 𑐮𑐶𑐳𑐾 𑐏𑑃 𑐮𑑂𑐴𑐵𑐫𑐾𑐐𑐸 𑐗𑑂𑐰𑐮𑐫𑑂 𑐄𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋
𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐠𑐟 𑑙𑑙.𑑒𑑕 𑐥𑑂𑐬𑐟𑐶𑐱𑐟 𑐳𑐵𑑄𑐳𑐡𑐟𑐫𑑂𑐳𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐧𑐶𑐄𑐐𑐸 𑐏𑑃 𑐢𑐵𑐳𑐾𑑄 𑐠𑑁𑑄 𑑑 𑐳𑐫 𑐥𑑂𑐬𑐟𑐶𑐱𑐟 𑐩𑐟 𑐰𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS