𑐫𑐸𑐊𑐃𑐫𑐵𑐟 𑐧𑐸𑐎𑐵𑑅 𑐣𑐾𑐥𑐵𑑅 𑐰𑐶𑐱𑑂𑐰𑐎𑐥 𑐕𑐣𑑀𑐚𑐫𑑂 𑐡𑐸𑐴𑐵𑑄 𑐰𑐣
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐁𑐂𑐳𑐶𑐳𑐷 𑐰𑐶𑐱𑑂𑐰𑐎𑐥 𑐮𑐶𑐐 𑑒 𑐫𑐵 𑐧𑐶𑐴𑐶𑐰𑐵𑑅 𑐖𑐹𑐐𑐸 𑐎𑐵𑐳𑐵𑐫𑑂 𑐫𑐸𑐊𑐃𑐫𑐵𑐟 𑐧𑐸𑐎𑐵𑑅 𑐣𑐾𑐥𑐵𑑅 𑐟𑐥𑑂𑐫𑑄𑐎 𑐰𑐶𑐱𑑂𑐰𑐎𑐥 𑐕𑐣𑑀𑐚𑐫𑑂 𑐡𑐸𑐴𑐵𑑄 𑐰𑑄𑐐𑐸 𑐡𑐸 𑑋 𑐟𑑂𑐬𑐶𑐰𑐶 𑐩𑐿𑐡𑐵𑐣𑐫𑑂 𑐖𑐹𑐐𑐸 𑐎𑐵𑐳𑐵𑐫𑑂 𑐣𑐾𑐥𑐵𑐮𑑄 𑐜𑐎𑐰𑐬𑑂𑐠 𑐮𑐾𑐰𑐶𑐳𑐫𑐵 𑐁𑐢𑐵𑐬𑐫𑑂 𑐫𑐸𑐊𑐃𑐫𑐵𑐟 𑐣𑐶𑐐𑐹 𑐬𑐣𑑄 𑐧𑐸𑐎𑐹𑐐𑐸 𑐏𑑅 𑑋
𑐩𑑁𑐳𑐩 𑐧𑐵𑑄𑐩𑐮𑐵𑐣𑐵𑑅 𑐏𑐶𑐄𑑃𑐫𑐵 𑐰𑑅𑐐𑐸𑐮𑐶𑑄 𑐎𑐵𑐳𑐵 𑐡𑐶𑐎𑐵𑑅 𑐜𑐎𑐰𑐬𑑂𑐠 𑐮𑐾𑐰𑐶𑐳 𑐁𑐢𑐵𑐬𑐫𑑂 𑐎𑐵𑐳𑐵𑐫𑐵 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐎𑐵𑐳𑐵 𑐟𑑂𑐫𑐵𑐎𑐾𑐐𑐸 𑐣𑐶𑑄𑐟𑐶𑑄 𑐫𑐸𑐊𑐃 𑐧𑐶𑐄𑐐𑐸 𑑓𑑑𑑑 𑐬𑐣𑐫𑐵 𑐰𑐶𑐱𑐵𑐮 𑐮𑐎𑑂𑐲𑑂𑐫 𑐖𑑂𑐰𑐣𑐵𑑅 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑑄 𑑔𑑔 𑐌𑐨𑐬𑐫𑑂 𑑖 𑐰𑐶𑐎𑐾𑐚𑐫𑐵 𑐎𑑂𑐲𑐟𑐶𑐂 𑑒𑑖𑑙 𑐬𑐣 𑐡𑐫𑐾𑐎𑐹𑐐𑐸 𑐂𑐮𑐫𑑂 𑐡𑑂𑐫𑑅 𑐏𑐶𑐄𑑃𑐫𑐵 𑐰𑐫𑐵𑑅 𑐩𑑂𑐴𑐶𑐟𑐾𑐩𑐦𑐂𑐐𑐸 𑐖𑐹𑐐𑐸𑐮𑐶𑑄 𑐎𑐵𑐳𑐵 𑐡𑐶𑐎𑐵𑑅 𑐜𑐶𑐊𑐮 𑐣𑐶𑐫𑐩𑐫𑐵 𑐁𑐢𑐵𑐬𑐫𑑂 𑐎𑐵𑐳𑐵𑐫𑐵 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐠𑑂𑐰 𑐂𑐮𑐫𑑂 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑑕𑑐 𑐬𑐣 𑐡𑐫𑐾𑐎𑐾𑐢𑐸𑑄𑐎𑐹𑐩𑑂𑐴 𑐐𑐸𑐮𑐗𑐣 𑐗𑐵 𑐰 𑑑𑑐 𑐬𑐣 𑐡𑐫𑐾𑐎𑐵𑑅 𑐡𑐷𑐥𑐾𑐣𑑂𑐡𑑂𑐬 𑐋𑐬𑐷 𑐎𑑂𑐬𑐶𑐖𑐫𑑂 𑐡𑐸𑐐𑐸 𑐏𑑅 𑑋
𑐣𑐾𑐥𑐵𑑅𑐫𑐵 𑐰𑐶𑐖𑐫𑐫𑐵 𑐣𑐶𑑄𑐟𑐶𑑄 𑐨𑐷𑐩 𑐳𑐵𑐬𑑂𑐎𑐶𑑄 𑑖𑑗 𑐬𑐣, 𑐁𑐬𑐶𑐦 𑐱𑐾𑐏𑑄 𑑕𑑒 𑐬𑐣, 𑐎𑐸𑐱𑐮 𑐨𑐸𑐬𑑂𑐟𑐾𑐮𑑄 𑑕𑑐 𑐬𑐣, 𑐎𑐥𑑂𑐟𑐵𑐣 𑐬𑑀𑐴𑐶𑐟 𑐥𑑁𑐜𑐾𑐮𑑄 𑑑𑑖 𑐬𑐣 𑐰 𑐎𑐸𑐱𑐮 𑐩𑐮𑑂𑐮𑑄 𑑕 𑐬𑐣𑐫𑐵 𑐫𑑀𑐐𑐡𑐵𑐣 𑐧𑐶𑐄𑐐𑐸 𑐏𑑅 𑑋 𑐫𑐸𑐊𑐃 𑐣𑐶𑑄𑐟𑐶𑑄 𑐖𑐸𑐣𑐿𑐡 𑐳𑐶𑐡𑑂𑐢𑐶𑐎𑑄 𑐳𑑂𑐰𑑄𑐐𑐹 𑐰𑐶𑐎𑐾𑐚 𑐎𑐵𑑅𑐐𑐸 𑐏𑑅 𑑋
𑐩𑐾𑐏𑐾 𑐚𑐳 𑐟𑑂𑐫𑐵𑐎𑐵𑑅 𑐣𑑂𑐴𑐵𑐥𑐵𑑄 𑐧𑑂𑐫𑐵𑐚𑐶𑐒 𑐫𑐵𑑅𑐐𑐸 𑐫𑐸𑐊𑐃 𑑕𑑐 𑐌𑐨𑐬𑐫𑑂 𑑖 𑐰𑐶𑐎𑐾𑐚𑐫𑐵 𑐎𑑂𑐲𑐟𑐶𑐂 𑑓𑑑𑑐 𑐬𑐣 𑐡𑐫𑐾𑐎𑐹𑐐𑐸 𑐏𑑅 𑑋 𑐊𑐎𑐡𑐶𑐰𑐳𑐷𑐫 𑐎𑑂𑐬𑐶𑐎𑐾𑐚𑐫𑑂 𑐣𑐾𑐥𑐵𑑅𑐰𑐶𑐬𑐸𑐡𑑂𑐢 𑐡𑐫𑐾𑐎𑐹𑐐𑐸 𑐠𑑂𑐰 𑐁𑑅𑐟𑐎𑐫𑐵 𑐡𑐎𑐮𑐫𑑂 𑐄𑐔𑑂𑐔 𑐫𑑀𑐐𑐦𑐮 𑐏𑑅 𑑋 𑐫𑐸𑐊𑐃𑐫𑐵 𑐣𑐶𑑄𑐟𑐶𑑄 𑐁𑐳𑐶𑐦 𑐏𑐵𑐣𑑄 𑑔𑑒 𑐧𑐮𑐫𑑂 𑑑𑑐𑑑 𑐬𑐣𑐫𑐵 𑐀𑐰𑐶𑐖𑐶𑐟 𑐥𑐵𑐬𑐷 𑐩𑑂𑐴𑐶𑐟𑐹𑐐𑐸 𑐏𑑅𑐳𑐵 𑐰𑐺𑐟𑑂𑐫 𑐀𑐬𑐧𑐶𑐣𑑂𑐡𑑄 𑑙𑑔 𑐬𑐣𑐫𑐵 𑐫𑑀𑐐𑐡𑐵𑐣 𑐧𑐶𑐄𑐐𑐸 𑐏𑑅 𑑋
𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐡𑐷𑐥𑐾𑐣𑑂𑐡𑑂𑐬𑐳𑐶𑑄𑐴 𑐋𑐬𑐷𑑄 𑑒, 𑐮𑐮𑐶𑐟𑐣𑐵𑐬𑐵𑐫𑐞 𑐬𑐵𑐖𑐰𑑄𑐱𑐷, 𑐳𑑀𑐩𑐥𑐵𑐮 𑐎𑐵𑐩𑐷 𑐰 𑐳𑐣𑑂𑐡𑐷𑐥 𑐮𑐵𑐩𑐶𑐕𑐵𑐣𑐾𑑄 𑐕𑐐𑐹 𑐕𑐐𑐹 𑐰𑐶𑐎𑐾𑐚 𑐎𑐵𑑅𑐐𑐸 𑐏𑑅 𑑋
LEAVE YOUR COMMENTS