𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐠𑑂𑐰 𑐟𑑂𑐬𑐫𑑀𑐡𑐱𑐷 -

𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑑂 𑐡𑐾 𑐁𑐔𑐵𑐐𑐹

𑐩𑐸𑐣𑐶𑐣𑑂𑐡𑑂𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫

𑐣𑐾𑐥𑐵𑑅 𑐧𑑁𑐡𑑂𑐢 𑐨𑐹𑐩𑐶 𑐡𑐾𑐫𑑂 𑐏𑑅 𑑋 𑐠𑐣𑐫𑐵 𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶 𑐥𑐬𑐵𑐥𑐹𑐬𑑂𑐰𑐎𑐵𑐮𑐣𑐶𑐳𑐾𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐸𑐫𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐧𑑁𑐡𑑂𑐢𑐟 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐩𑐴𑐵𑐫𑐵𑐣𑐷 𑐧𑑁𑐡𑑂𑐢 𑐢𑐬𑑂𑐩𑐵𑐰𑐮𑐩𑑂𑐧𑐶 𑐖𑐎 𑐏𑑅 𑑋 𑐮𑐶𑐥𑐵 𑐣𑐾𑐥𑐵𑑅 𑐡𑐸𑐣𑐾 𑐱𑑂𑐬𑐵𑐰𑐎𑐫𑐵𑐣 𑐢𑐎𑐵𑑅 𑐳𑑂𑐠𑐰𑐶𑐬𑐰𑐵𑐡𑐫𑐵 𑐨𑐶𑐎𑑂𑐲𑐸𑐥𑐶𑑄 𑐣𑑄 𑐁𑐥𑐵𑐮𑑄 𑐡𑐫𑐵𑐰𑐮 𑑋 𑐰𑐖𑑂𑐬𑐫𑐵𑐣𑐷 𑐧𑑁𑐡𑑂𑐢𑐎𑐠𑑄 𑐁𑐔𑐵𑑅 𑐮𑐸𑐫𑐵𑑅 𑐎𑐬𑑂𑐩𑐎𑐵𑐞𑑂𑐜 𑐥𑐹𑐖𑐵 𑐥𑐵𑐛 𑐫𑐵𑐂𑐥𑐶𑑄 𑐰𑐖𑑂𑐬𑐵𑐔𑐵𑐬𑑂𑐫 𑐐𑐸𑐬𑐸𑐖𑐸𑐥𑐶𑑄 𑐖𑐸𑐮𑐳𑐵 𑐨𑐶𑐎𑑂𑐲𑐸 𑐮𑐸𑐫𑐵𑑅 𑐱𑐵𑐎𑑂𑐫𑐥𑐶𑑄 𑐖𑐸𑐮 𑑋 𑐧𑑁𑐡𑑂𑐢 𑐢𑐬𑑂𑐩𑐫𑑂 𑐰𑐖𑑂𑐬𑐫𑐵𑐣𑐫𑐵 𑐰𑐶𑐎𑐵𑐳 𑐫𑐵𑐫𑐾𑐟 𑐰𑐖𑑂𑐬𑐵𑐔𑐵𑐬𑑂𑐫, 𑐱𑐵𑐎𑑂𑐫 𑐰 𑐀𑐣𑑂𑐫 𑐖𑐵𑐟𑐶𑐫𑐵 𑐨𑐹𑐩𑐶𑐎𑐵 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹 𑑋 𑐰𑐖𑑂𑐬𑐫𑐵𑐣 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐩𑐹 𑐮𑑃𑐥𑐸 𑐠𑑅 𑐖𑐎 𑐩𑐸𑐎𑑂𑐟 𑐖𑐸𑐂𑐐𑐸 𑐩𑐏𑐸 𑐳𑑄𑐳𑐵𑐬𑐫𑐵 𑐡𑐎𑑂𑐰 𑐥𑑂𑐬𑐵𑐞𑐷𑐥𑐶𑑄𑐟 𑐩𑐸𑐎𑑂𑐟 𑐫𑐵𑐫𑐾𑐐𑐸 𑐰 𑐳𑐩𑐫 𑐥𑐬𑐶𑐳𑑂𑐠𑐶𑐟𑐶𑐎𑐠𑑄 𑐧𑑁𑐡𑑂𑐢 𑐁𑐔𑐬𑐞𑐫𑑂 𑐥𑐬𑐶𑐰𑐬𑑂𑐟𑐣 𑐫𑐵𑐣𑐵 𑐰𑐣𑐾𑐐𑐸 𑐠𑐸𑐎𑐶𑐫𑐵 𑐳𑐶𑐡𑑂𑐢𑐵𑐣𑑂𑐟 𑐏𑑅 𑑋 𑐄𑐎𑐶𑑄 ‘𑐳𑐬𑑂𑐰𑐥𑑂𑐬𑐎𑐵𑐬𑑄 𑐖𑐐𑐟𑑀 𑐴𑐶𑐟𑐵𑐫’ 𑐢𑐎𑐵𑑅 𑐩𑐣𑑄 𑐟𑐸𑐣𑐾𑐐𑐸 𑐴𑐾 𑐰𑐖𑑂𑐬𑐫𑐵𑐣𑐷 𑐢𑐬𑑂𑐩 𑐏𑑅 𑑋 𑐄𑐎𑐶𑑄 𑐕𑐠𑑂𑐰𑑅 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐱𑐵𑐎𑑂𑐫 𑐖𑐵𑐟𑐶𑐥𑐶𑐣𑐶 𑐥𑑂𑐫𑐣𑑂𑐴𑐸 𑐖𑐎 𑐖𑐹𑐳𑐵𑑄 𑐰𑐖𑑂𑐬𑐫𑐵𑐣, 𑐩𑐴𑐵𑐫𑐵𑐣 𑐳𑐶𑐡𑑂𑐢𑐵𑐣𑑂𑐟𑐎𑐠𑑄 𑐳𑐩𑑂𑐫𑐎 𑐳𑐩𑑂𑐧𑑀𑐢𑐶 𑐖𑑂𑐘𑐵𑐣 𑐎𑐵𑐫𑐾𑐐𑐸 𑐣𑐶𑐟𑐶𑑄 𑐠𑑅 𑐩𑐳𑑂𑐟𑐫𑑂𑐟 𑐔𑐸𑐜𑐵𑐎𑐬𑑂𑐩 (𑐧𑐬𑐾 𑐕𑐸𑐫𑐾𑐐𑐸) 𑐫𑐵𑐂 𑑋

𑐰𑐖𑑂𑐬𑐵𑐔𑐵𑐬𑑂𑐫𑐟𑐫𑑂 𑐢𑐵𑑅𑐳𑐵 𑐰𑐖𑑂𑐬𑐵𑐔𑐵𑐬𑑂𑐫𑐵𑐨𑐶𑐲𑐾𑐎 𑐎𑐫𑐵𑑅 𑐰𑐖𑑂𑐬𑐳𑐟𑑂𑐰 𑐎𑐸𑐮𑐫𑐵 𑐳𑑄𑐬𑐎𑑂𑐲𑐎 𑐖𑐸𑐫𑐵𑑅 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑑄𑐑𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑐣𑐷 𑑋 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐧𑐴𑐵𑑅 𑐧𑐴𑐷 𑐡𑐫𑐾𑐎𑐵𑑅 𑐰𑐶𑐡𑑂𑐫𑐵𑐀𑐨𑑂𑐫𑐵𑐳 𑐰 𑐢𑐬𑑂𑐩𑐵𑐨𑑂𑐫𑐵𑐳𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑑅 𑐠𑑅𑐥𑐶𑐣𑐶𑐐𑐸 𑐖𑐷𑐰𑐣 𑐣𑐶𑐬𑑂𑐰𑐵𑐴 𑐫𑐵𑐣𑐵𑐔𑑂𑐰𑐣 𑑋 𑐰𑐖𑑂𑐬𑐵𑐔𑐵𑐬𑑂𑐫𑐟𑐫𑑂 𑐩𑐹𑐮 𑐰𑐵𑐳𑐳𑑂𑐠𑐵𑐣 𑐴𑐾 𑐠𑑅𑐠𑑅𑐐𑐸 𑐰𑐶𑐴𑐵𑐬 𑐰 𑐰𑐴𑐷 𑐏𑑅 𑑋 𑐠𑐖𑐵𑑅𑐐𑐸 𑐰𑐶𑐴𑐵𑐬 𑐰 𑐰𑐴𑐷 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐠𑐷𑐠𑐷 𑐠𑐵𑐫𑑂 𑐫𑐾𑑃, 𑐫𑐮, 𑐏𑑂𑐰𑐥, 𑐠𑐶𑐩𑐶, 𑐳𑐎𑑂𑐰, 𑐧𑐣𑐾𑐥𑐵, 𑐎𑐶𑐥𑐹 𑐰 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐣𑑄 𑐣𑑂𑐫𑐣𑐵𑐰𑐣 𑑋 𑐀𑐮𑐾 𑐠𑐰𑑄𑐠𑐰𑐫𑑂 𑐳𑑄𑐐𑐛𑐶𑐟 𑐖𑐸𑐂𑐟 𑐳𑑄𑐑 𑐥𑐬𑐩𑑂𑐥𑐬𑐵 𑐳𑑂𑐠𑐵𑐥𑐣𑐵 𑐫𑐵𑐣𑐵𑑅 𑐡𑐾 𑐁𑐔𑐵𑐐𑐹𑐫𑐵 𑐬𑐸𑐥𑐫𑑂 𑐳𑐬𑑂𑐰𑐳𑑄𑐑 𑐩𑐸𑐣𑐾𑐐𑐸 𑐥𑐬𑐩𑑂𑐥𑐬𑐵 𑐡𑐫𑐾𑐎𑐵 𑐰𑐣 𑑋 𑐠𑑂𑐰 𑐡𑐾 𑐁𑐔𑐵𑐐𑐹 𑐧𑑁𑐡𑑂𑐢 𑐳𑑄𑐑𑐫𑐵 𑐬𑐸𑐥𑐫𑑂 𑐟𑑅𑐢𑑄𑐐𑐸 𑐨𑐾𑐮𑐵 𑐫𑐵𑐣𑐵𑑅 𑐐𑐸𑐠𑐶 𑐣𑑂𑐫𑐵𑐫𑐾𑐎𑐵 𑐰𑐫𑐵𑐔𑑂𑐰𑐣 𑑋

𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐳𑑂𑐰𑐣𑐶𑐐𑑅 𑐫𑐾𑑃, 𑐫𑐮 𑐰 𑐏𑑂𑐰𑐥𑑅, 𑐠𑐶𑐩𑐶 𑐰 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐣𑑄 𑐡𑐾 𑐁𑐔𑐵𑐬𑑂𑐫 𑐐𑐸𑐠𑐶 𑐰𑐵 𑐁𑐔𑐵𑐬𑑂𑐫 𑐳𑑄𑐑 𑐡𑐸 𑑋 𑐡𑑃𑐫𑑂𑐡𑐳𑑄 𑐠𑑅𑐠𑑅𑐥𑐶𑐣𑐶𑐐𑐸 𑐂𑐮𑐵𑐎𑐵𑐫𑑂 𑐳𑑄𑐑𑐷𑐫 𑐨𑐾𑐮𑐵 𑐖𑐸𑐫𑐵𑑅 𑐡𑐾 𑐁𑐔𑐵𑐐𑐹 𑐣𑑂𑐫𑐵𑐫𑐾𑐎𑐾𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐫𑐾𑑃 𑐡𑐾𑐫𑐵 𑐡𑐾 𑐁𑐔𑐵𑐐𑐹 𑐣𑑂𑐴𑐵𑐥𑐵𑐣𑐶𑐳𑐾𑑄 𑐩𑐡𑐶𑐎𑑂𑐎 𑐣𑑂𑐫𑐵𑐫𑐾𑐎𑐵 𑐰𑐫𑐵𑐔𑑂𑐰𑑄𑐐𑐸 𑐐𑐸𑐠𑐶 𑐏𑑅 𑑋 𑐡𑐾 𑐁𑐔𑐵 𑐐𑐸𑐠𑐶𑐫𑐵𑐟 𑐥𑑂𑐫𑑄𑐐𑐹 𑐥𑐸𑑃𑐂 𑐢𑐎𑐵𑑅 𑐥𑑂𑐫𑑄𑐐𑐹 𑐳𑑄𑐑𑐫𑑂 𑐧𑑂𑐰𑐠𑐮𑐵 𑐟𑐮 𑑋 𑐠𑐸𑐐𑐸 𑐥𑑂𑐫𑑄𑐐𑐹 𑐥𑑃𑐸𑐂𑐫𑐵 𑐥𑑂𑐫𑐩𑑂𑐴 𑐥𑑂𑐬𑐳𑐶𑐡𑑂𑐢 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐟 𑐥𑑂𑐫𑐹𑐠𑐵𑑄 𑐢𑐎𑐵𑑅 𑐥𑑂𑐫𑑄𑐐𑑅𑐠𑐵𑑄𑐎𑐠𑑄 𑐴𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑅𑐣𑐾 𑐥𑐸𑑃𑐂𑐫𑐵 𑐰𑐵𑐎𑐰𑐖𑑂𑐬, 𑐡𑐠𑐸 𑐥𑑃𑐸𑐂𑐫𑐵 𑐳𑐸𑐬𑐟𑐰𑐖𑑂𑐬, 𑐮𑐵𑐫𑑂𑐎𑐹 𑐥𑑃𑐸𑐂𑐫𑐵 𑐮𑐶𑐮𑐵𑐰𑐖𑑂𑐬 𑐰 𑐎𑑂𑐰𑑅𑐣𑐾 𑐥𑐸𑑃𑐂𑐫𑐵 𑐩𑐘𑑂𑐖𑐸𑐰𑐖𑑂𑐬 (𑐖𑐵𑐩𑐣𑑅 𑐐𑐸𑐨𑐵𑐖𑐸) 𑐏𑑅 𑑋 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐳𑑂𑐰𑐣𑐶𑐐𑑅𑐫𑐵 𑐫𑐾𑑃𑐫𑐵𑐟 𑐥𑑂𑐫𑑄𑐐𑐹 𑐂𑐮𑐵𑐎𑐵 𑐥𑑃𑐸𑐂𑐮𑐫𑑂 𑐰𑐶𑐨𑐵𑐖𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐐𑐸𑐸𑐐𑐸 𑐠𑐠𑐾 𑐡𑐸 𑑅𑑅 𑐠𑐠𑐸 𑐥𑑃𑐸𑐂 𑐄𑐟𑑂𑐟𑐬𑐥𑐵𑐏𑐾 𑐠𑑃𑐴𑐶𑐟𑐶𑐣𑐶𑐳𑐾𑑄 𑐀𑐳𑑄𑐫𑐵 𑐣𑑂𑐫𑐵𑐮𑑂𑐰𑐴𑑃 𑐟𑐎𑐫𑐵 𑐎𑑂𑐰𑐵𑑅𑐧𑐴𑐵𑑅, 𑐗𑑂𑐰𑐵𑑅𑐧𑐴𑐵𑑅, 𑐢𑑂𑐰𑐵𑐏𑐵𑐧𑐴𑐵𑑅 𑐰 𑐐𑑄𑐧𑐴𑐵𑑅 𑐮𑐵𑑅 𑑋

𑐡𑐠𑐸 𑐥𑐸𑑃𑐂 𑐣𑑂𑐫𑐵𑐮𑑂𑐰𑐴𑑄𑐣𑐶𑐳𑐾𑑄 𑐥𑐱𑑂𑐔𑐶𑐩 𑐡𑐎𑑂𑐲𑐶𑐞 𑐳𑐶𑑄𑐴𑐳𑐟𑑅𑐟𑐎𑐫𑐵 𑐟𑐎𑑂𑐲𑐾𑐧𑐴𑐵𑑅, 𑐖𑐣𑐧𑐴𑐵𑑅, 𑐂𑐟𑐸𑑄𑐧𑐴𑐵𑑅, 𑐩𑐹𑐧𑐴𑐵𑑅, 𑐳𑐧𑐮𑐧𑐴𑐵𑑅, 𑐩𑐏𑑄𑐧𑐴𑐵𑑅 𑐰 𑐟𑐾𑐧𑐴𑐵𑑅 𑐮𑐵𑑅 𑑋 𑐀𑐠𑐾𑐴𑐾 𑐮𑐵𑐫𑑂𑐎𑐹 𑐥𑐸𑑃𑐂 𑐢𑐎𑐵𑑅 𑐳𑐶𑑄𑐴𑐳𑐟𑑅𑐣𑐶𑐳𑐾𑑄 𑐔𑐶𑐎𑑄𑐩𑐹 𑐟𑐎𑐫𑐵 𑐮𑐵𑐐𑐵 𑐮𑐵𑑅 𑑋 𑐠𑐣 𑐕𑐐𑐹 𑐴𑐾 𑐖𑐎 𑐧𑐴𑐵 𑐳𑐶𑐏𑑂𑐰𑑄𑑄𑐩𑐹 𑐧𑐴𑐵𑑅 𑐡𑐸 𑑋 𑐠𑑂𑐰𑐫𑐵𑐟 ‘𑐮𑐵𑐫𑐎𑐹 𑐥𑐸𑑃𑐂‘ 𑐣𑑄 𑐢𑐵𑑅 𑑋 𑐠𑐣𑑄 𑐎𑑂𑐰𑐫𑑂 𑐡𑐎𑑂𑐲𑐶𑐞𑐥𑐵𑐏𑐾𑐫𑐵 𑐮𑐵𑐐𑐵𑐫𑐵𑐟 𑐎𑑂𑐰𑐠𑐸 𑐥𑐸𑐂𑑃 𑐢𑐵𑐂 𑑋 𑐎𑑂𑐰𑐠𑐸 𑐥𑐸𑑃𑐂𑐮𑐫𑑂 𑐏𑐸𑐸𑐐𑐹 𑐧𑐴𑐵𑑅 𑐮𑐵 𑑋 𑐐𑐠𑐾𑐎𑐶 𑐌𑐩𑐧𑐴𑐵𑑅, 𑐂𑐎𑐸𑐧𑐴𑐵𑑅, 𑐩𑐶𑐏𑐵𑐧𑐴𑐵𑑅, 𑐮𑐐𑑄𑐧𑐴𑐵𑑅 𑐰 𑐩𑐸𑐳𑐸𑑄𑐧𑐴𑐵𑑅𑐫𑐵 𑐣𑐶𑐐𑐹 𑐡𑐸 𑑋 𑐕𑐐𑐹 𑐖𑐵𑐥𑐵𑐟𑐸𑑄 𑐩𑐸𑐳𑐸𑑄𑐧𑐴𑐵𑑅 (𑐩𑐞𑐶𑐳𑐶𑑄𑐴) 𑐏𑑅𑐳𑐵 𑐩𑐾𑐐𑐸 𑐖𑐵𑐥𑐵𑐟𑐸𑑄 𑐥𑐶𑐣𑐾𑐫𑐵 𑐩𑐸𑐸𑐸𑐸𑐳𑐸𑑄𑐧𑐴𑐵𑑅 (𑐩𑐸𑐣𑐶𑐳𑑄𑐑) 𑐏𑑅 𑑋 𑐠𑐸𑐥𑐶𑑄 𑐥𑑂𑐫𑐐𑐹 𑐥𑐸𑐂𑑃𑐳 𑐠𑑅𑐠𑑅𑐥𑐶𑐣𑐶𑐐𑐸 𑐳𑐬𑑂𑐰𑐳𑑄𑐑 𑐩𑐸𑐣𑐵𑑅 𑐁𑐔𑐵𑐐𑐹 𑐣𑑂𑐫𑐵𑐫𑐾𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐴𑐾 𑐳𑑂𑐰𑐬𑐸𑐥𑐎𑐠𑑄 𑐠𑐸𑐐𑐸 𑐥𑑂𑐫𑑄𑐐𑐹 𑐥𑑃𑐸𑐂𑐫𑐵 𑐳𑐎𑐮 𑐰𑐖𑑂𑐬𑐵𑐔𑐵𑐬𑑂𑐫 𑐳𑑄𑐑 𑐕𑐠𑐵𑐫𑑂 𑐩𑐸𑐣𑐵𑑅 𑐡𑐾 𑐁𑐔𑐵𑐐𑐹 𑐣𑑂𑐫𑐵𑐫𑐾𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐡𑐾 𑐁𑐔𑐵𑐐𑐹 𑐦𑐵𑐐𑐸𑐣 𑐀𑐳𑑂𑐟𑐩𑐶 𑐰 𑐣𑐰𑐩𑐶𑐎𑐸𑐣𑑂𑐴𑐸 𑐣𑐶𑐣𑑂𑐴𑐸𑐫𑑄𑐎𑑄 𑐣𑑂𑐴𑑂𑐫𑐵𑐂 𑑋 𑐠𑑅𑐣𑐾 𑐥𑐸𑑃𑐂 𑐰 𑐡𑐠𑐸 𑐥𑐸𑑃𑐂𑐫𑐵 𑐥𑐵𑐮𑐵𑑅𑐥𑐶𑑄𑐳𑑄 𑐳𑑂𑐰𑐫𑐩𑑂𑐨𑐹 𑐱𑐵𑐣𑑂𑐟𑐶𑐥𑐸𑐮𑐶𑐂 𑐳𑐬𑑂𑐰𑐳𑑄𑐑𑐫𑐵𑐟 𑐳𑑅𑐟𑐵𑑅 𑐡𑐵𑐣𑐥𑑂𑐬𑐡𑐵𑐣 𑐫𑐵𑐣𑐵𑑅 𑐐𑐸𑐠𑐶 𑐥𑐵𑑅 𑐦𑐂𑐳𑐵 𑐮𑐵𑐫𑑂𑐎𑐹 𑐥𑐸𑑃𑐂 𑐰 𑐎𑑂𑐰𑑅𑐣𑐾 𑐥𑐸𑑃𑐂𑐫𑐵 𑐥𑐵𑑅𑐮𑐵𑑅𑐟𑐳𑐾𑑄 𑐕𑐾𑑃 𑐠𑐵𑐫𑑂 𑐢𑐎𑐵 𑐠𑐸𑐠𑐵𑐫𑑂 𑐴𑐣𑐸𑐩𑐵𑐣𑐢𑑂𑐰𑐵𑐏𑐵𑐫𑐵 𑐣𑐵𑐳𑑅 𑐔𑐸𑐎𑐫𑑂 𑐳𑐬𑑂𑐰𑐳𑑄𑐑𑐫𑐵𑐥𑐶𑑄 𑐩𑐸𑐣𑐵𑑅 𑐁𑐔𑐵𑐐𑐹 𑐐𑐸𑐠𑐶 𑐣𑑂𑐫𑐵𑐫𑐾𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐱𑐵𑐣𑑂𑐟𑐶𑐥𑐸𑐮𑐶𑐂 𑐡𑐾 𑐁𑐔𑐵𑐐𑐹 𑐣𑑂𑐫𑐵𑐫𑐾𑐎𑐷𑐧𑐮𑐫𑑂 𑐳𑑂𑐰𑐫𑐩𑑂𑐨𑐹 𑐩𑐴𑐵𑐔𑐿𑐟𑑂𑐫𑐫𑐵 𑐀𑐩𑐶𑐟𑐵𑐩𑑂𑐨 𑐧𑐸𑐡𑑂𑐢𑐫𑐵 𑐣𑑂𑐴𑑂𑐫𑑅𑐣𑐾 𑐩𑐹𑐮𑐐𑐸𑐬𑐸 𑐰𑐖𑑂𑐬𑐵𑐔𑐵𑐬𑑂𑐫𑐥𑐵𑐏𑐾𑑄 𑐥𑐹𑐖𑐵 𑐫𑐵𑐣𑐵 𑐥𑑄𑐔𑐬𑐎𑑂𑐲𑐵 𑐳𑐹𑐟𑑂𑐬 𑐥𑐵𑐛 𑐫𑐵𑐂𑐳𑐵 𑐩𑐾𑐩𑐾𑐥𑐶𑑄 𑐗𑐶𑑄𑐔𑑂𑐫𑐵𑐐𑐹 𑐩𑐴𑐵𑐰𑐶𑐴𑐵𑐬𑐫𑐵 𑐠𑐵𑐫𑑂𑐥𑐵𑐥𑐶𑑄𑐳𑑄𑑄 𑐐𑐸𑐬𑐸𑐩𑐞𑑂𑐜𑐮 𑐢𑐮𑑄 𑐡𑐣𑐾𑐐𑐸 𑐫𑐵𑐂 𑑋 𑐣𑐵𑐥𑑄 𑐄𑐐𑐸 𑐡𑑃𑐫𑑂 𑐔𑐹𑐜𑐵𑐎𑐬𑑂𑐩 𑐫𑐵𑑅𑐥𑐶𑑄 𑐎𑐸𑐮𑐥𑐸𑐟𑑂𑐬𑐥𑐶𑑄𑐟 𑐐𑑂𑐰𑐫𑑂𑐡𑐵𑑄 𑐟𑐫𑐾𑐎𑐵𑑅 𑐐𑐸𑐠𑐶𑐫𑐵 𑐳𑐬𑑂𑐰𑐳𑑄𑐑𑐫𑑂 𑐡𑐸𑐎𑐵𑐂 𑑋 𑐀𑐠𑐾𑐴𑐾 𑐔𑐎𑑂𑐬𑐳𑐩𑑂𑐰𑐬 𑐳𑑂𑐠𑐵𑐥𑐣𑐵 𑐫𑐵𑐳𑐾 𑐩𑐴𑐵𑐐𑐞𑐔𑐎𑑂𑐬 𑐥𑐹𑐖𑐵 𑐫𑐵𑐫𑐾𑐐𑐸 𑐣𑐵𑐥𑑄 𑐔𑐔𑐵 𑐴𑐵𑐮𑐾𑐐𑐸 𑐣𑑄 𑐫𑐵𑐂 𑑋 𑐥𑐵𑑅𑐮𑐵𑑅𑐥𑐶𑑄𑐳𑑄𑑄 𑐡𑐵𑐣 𑐥𑑂𑐬𑐡𑐵𑐣 𑐫𑐵𑐂 𑑋 𑐠𑐷𑐠𑐷 𑐐𑐸𑐠𑐶𑐥𑐵𑐏𑐾𑑄 𑐁𑐬𑐷, 𑐠𑑂𑐰𑑃, 𑐀𑐫𑑂𑐮𑐵𑑅, 𑐧𑐖𑐶 𑐟𑐫𑐾𑐐𑐸 𑐫𑐵𑐂 𑑋

𑐰𑐖𑑂𑐬𑐵𑐔𑐵𑐬𑑂𑐫 𑐳𑑄𑐬𑐎𑑂𑐲𑐞 𑐐𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐸𑐂𑐐𑐸 𑐡𑐾 𑐁𑐔𑐵𑐐𑐹𑐫𑐵 𑐣𑑂𑐴𑐵𑐥𑐵𑐐𑐸 𑐡𑐶𑐣𑐫𑑂 𑐠𑐸𑐐𑐸 𑐡𑑃𑐫𑑂 𑐊𑐳𑐂𑐂𑐣𑐶𑐳𑐾𑑄 𑐥𑐶𑐊𑐔𑐜𑐷 𑐫𑐵𑐣𑐵𑐡𑐷𑐥𑐶𑑄 𑐎𑐸𑐮𑐥𑐸𑐟𑑂𑐬 𑐎𑐸𑐮𑐥𑐸𑐟𑑂𑐬𑐷𑐥𑐶𑑄𑐟 𑐴𑐣𑐵𑐥𑑁 𑐰 𑐥𑐡𑐎 𑐂𑐣𑐾𑐐𑐸 𑐣𑐵𑐥𑑄 𑐠𑐷𑐠𑐷𑐎𑐠𑑄𑐫𑐵 𑐴𑐣𑐵𑐥𑑁 𑐮𑑅𑐮𑑂𑐴𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐂 𑑋 𑐳𑑂𑐰𑐫𑐩𑑂𑐨𑐹𑐫𑐵 𑐎𑑂𑐰𑐳𑑄 𑐨𑐸𑐂𑐏𑑂𑐫𑐮𑐫𑑂 𑐐𑐞𑐔𑐎𑑂𑐬 𑐫𑐵𑐣𑐵𑑅 𑐔𑐔𑐵 𑐴𑐵𑐮𑐷 𑑋 𑐁𑐎𑐶𑐰𑑄 𑐐𑐸𑐠𑐶 𑐣𑑂𑐫𑐵𑐫𑐾𑐎𑐷𑐥𑐶𑑄 𑐥𑑂𑐫𑑄𑐐𑐹 𑐥𑐸𑑃𑐂𑐫𑐵 𑐔𑐹𑐜𑐵𑐎𑐬𑑂𑐩 𑐫𑐵𑐫𑐾𑐢𑐸𑑄𑐎𑐹𑐥𑐶𑑄 𑐖𑐾𑐲𑑂𑐛𑐎𑑂𑐬𑐩𑐵𑐣𑐸𑐳𑐵𑐬 𑐥𑑂𑐫𑐩𑑂𑐴𑐾𑐳𑐶𑐟 𑐥𑐵𑑅 𑐧𑐷 𑑋 𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐀𑐬𑑂𑐠𑐵𑐟 𑐣𑐰𑐩𑐶𑐫𑐵 𑐡𑐶𑐣𑐫𑑂 𑐴𑐣𑐸𑐩𑐵𑐣𑐢𑑂𑐰𑐵𑐏𑐵𑐫𑐵 𑐣𑐵𑐳𑑅𑐔𑐸𑐎𑐫𑑂 𑐣𑑄 𑐳𑐬𑑂𑐰𑐳𑑄𑐑 𑐨𑐾𑐮𑐵 𑐖𑐸𑐂 𑑋 𑐠𑐣 𑐣𑑄 𑐐𑐞𑐔𑐎𑑂𑐬 𑐥𑐹𑐖𑐵 𑐫𑐵𑐂 𑑋 𑐰𑐖𑑂𑐬𑐳𑐟𑑂𑐰𑐫𑐵 𑐐𑐸𑐴𑑂𑐫𑐥𑑂𑐫𑐵𑐏𑑄 𑐴𑐸𑐮𑐷 𑑋 𑐔𑐔𑐵 𑐴𑐵𑐮𑐾𑐐𑐸 𑐫𑐵𑐂 𑑋 𑐠𑐷𑐠𑐷 𑐐𑐸𑐠𑐶 𑐰 𑐥𑐵𑐮𑐵𑑅𑐥𑐵𑐏𑐾𑑄 𑐡𑐵𑐣 𑐥𑑂𑐬𑐡𑐵𑐣 𑐫𑐵𑐂 𑑋 𑐔𑑂𑐫𑐵𑐐𑐸𑐠𑐶𑑄 𑐧𑐖𑐶 𑐧𑐶𑐫𑐵𑑅 𑐔𑑂𑐫𑐵 𑐟𑑂𑐰𑑄𑐎𑐷 𑑋 𑐠𑐸𑐠𑐵𑐫𑑂 𑐰𑐖𑑂𑐬𑐵𑐔𑐵𑐬𑑂𑐫 𑐎𑑂𑐮𑐧𑑄 𑐣𑑄 𑐕𑐐𑐹 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐥𑐵𑑅𑐮𑐵𑑅 𑐰 𑐳𑐴𑐫𑑀𑐐𑐷𑐥𑐶𑑄𑐟 𑐴𑐣𑐾𑐐𑐸 𑐣𑐵𑐥𑑄 ‘𑐱𑐵𑐣𑑂𑐟𑐶𑐥𑐸𑐬’ 𑐣𑐵𑑄𑐫𑐵 𑐥𑐟𑑂𑐬𑐶𑐎𑐵 𑐣𑑄 𑐥𑐶𑐠𑐣𑐾𑐐𑐸 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐡𑐾 𑐁𑐔𑐵𑐐𑐹𑐫𑐵 𑐢𑐵𑐬𑑂𑐩𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎 𑐥𑐬𑐩𑑂𑐥𑐬𑐵 𑐰 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵 𑐰𑑂𑐫𑐰𑐳𑑂𑐠𑐵𑐥𑐣𑐫𑐵𑐟 𑐀𑐣𑐸𑐱𑐷𑐮𑐣 𑐫𑐵𑐣𑐵 𑐳𑑂𑐰𑐟 𑐢𑐵𑑅𑐳𑐵 𑐠𑑂𑐰 𑐣𑐾𑐥𑐵𑑅𑐫𑐵 𑐕𑐐𑐹 𑐖𑐵𑐟𑐷𑐫 𑐥𑐴𑐶𑐔𑐵𑐣 𑐖𑐎 𑐩𑐏𑐸, 𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶𑐫𑐵 𑐬𑐎𑑂𑐲𑐵𑐬𑑂𑐠 𑐖𑐸𑐫𑐵𑐔𑑂𑐰𑑄𑐐𑐸 𑐕𑐐𑐹 𑐀𑐢𑐶𑐰𑐾𑐱𑐣 𑐣𑑄 𑐏𑑅 𑑋 𑐣𑐾𑐥𑐵𑑅𑐫𑐵 𑐧𑑁𑐡𑑂𑐢𑐖𑐣𑐫𑐵 𑐥𑐸𑐬𑑀𑐴𑐶𑐟 𑐖𑐸𑐫𑐵𑑅 𑐳𑐎𑐳𑐶𑐐𑐸𑑄 𑐂𑐔𑑂𑐕𑐵, 𑐁𑐎𑐵𑑄𑐎𑑂𑐲𑐵, 𑐳𑑄𑐎𑐚, 𑐁𑐥𑐡𑑂 𑐰𑐶𑐥𑐡𑑂, 𑐰𑐶𑐢𑐶 𑐰𑑂𑐫𑐰𑐴𑐵𑐬, 𑐎𑐬𑑂𑐩𑐎𑐵𑐞𑑂𑐜 𑐫𑐵𑐣𑐵𑑅 𑐰𑐖𑑂𑐬𑐫𑐵𑐣𑐫𑐵 𑐳𑑄𑐬𑐎𑑂𑐲𑐞 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐖𑐵𑐟𑐶 𑐏𑑅 𑑋

𑐣𑑂𑐴𑐵𑐥𑐵𑐫𑐵 𑐡𑐹𑐬𑐡𑐬𑑂𑐱𑐷 𑐁𑐖𑐸 𑐰𑐬𑐵𑐖𑐸 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐳𑑄 𑐢𑐬𑑂𑐩 𑐬𑐎𑑂𑐲𑐵𑐫𑐵 𑐮𑐵𑐐𑐶 𑐠𑐖𑐵𑑅𑐐𑐸 𑐐𑑀𑐲𑑂𑐛𑐷 𑐰𑐵 𑐐𑐸𑐠𑐶𑐫𑐵𑐟 𑐡𑑂𑐰𑑅𑐧𑐡𑑂𑐰𑑅 𑐣𑑂𑐴𑑂𑐫𑑅 𑐴𑐾 𑐳𑐶𑐬𑑂𑐖𑐣𑐵 𑐫𑐵𑐣𑐵𑐠𑐎𑐹𑐐𑐸 𑐏𑑅 𑑋 𑐠𑑁𑑄𑐟𑐎 𑐣𑑄 𑐰𑐖𑑂𑐬𑐵𑐔𑐵𑐬𑑂𑐫 𑐖𑐵𑐟𑐶𑐥𑐶𑑄𑐳𑑄 𑐕𑐐𑐹 𑐖𑐵𑐟𑐷𑐫 𑐊𑐎𑐟𑐵𑐫𑐵 𑐮𑐵𑐐𑐶 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐐𑐸𑐠𑐶 𑐥𑐬𑐩𑑂𑐥𑐬𑐵𑐎𑐠𑑄 𑐣𑑂𑐫𑐵𑐫𑐾𑐎𑐵 𑐰𑐫𑐵𑐔𑑂𑐰𑐣 𑑋 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐣𑑂𑐴𑑂𑐫𑐵𑐠𑐾𑑄𑐖𑐵𑑅𑐐𑐸 𑐬𑐵𑐖𑐣𑐷𑐟𑐶𑐎, 𑐳𑐵𑐩𑐵𑐖𑐶𑐎, 𑐁𑐬𑑂𑐠𑐶𑐎 𑐥𑐬𑐶𑐳𑑂𑐠𑐶𑐟𑐶𑐂 𑐴𑐶𑐄𑐥𑐵𑑅 𑐰𑑅𑐳𑐵𑑄 𑐠𑑂𑐰 𑐡𑐾 𑐁𑐔𑐵𑐐𑐹𑐫𑐵 𑐳𑑄𑐑 𑐨𑐾𑐮𑐵 𑐩𑐡𑐶𑐎𑑂𑐎 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐂𑐟𑐶𑐴𑐵𑐳 𑐡𑐸 𑑋

𑐰𑐖𑑂𑐬𑐵𑐔𑐵𑐬𑑂𑐫𑐟𑐳𑐾𑑄 𑐣𑐾𑐥𑐵𑑅𑐫𑐵 𑐧𑑁𑐡𑑂𑐢 𑐢𑐬𑑂𑐩𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐧𑐡𑑂𑐬𑑂𑐢𑐣 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐖𑑂𑐬𑐵𑐔𑐵𑐬𑑂𑐫 𑐣𑐾𑐰𑐵𑑅 𑐳𑐩𑐵𑐖𑐫𑐵 𑐮𑐵𑐐𑐶 𑐕𑐐𑐹 𑐩𑐡𑐫𑐾𑐎 𑐩𑐐𑐵𑑅𑐐𑐸 𑐖𑐵𑐟𑐶 𑐏𑑅 𑑋 𑐟𑐬 𑐠𑑁𑑄 𑐳𑑂𑐰𑐫𑑂𑐩 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐳𑑄 ‘𑐖𑐶 𑐕𑐩𑑂𑐴 𑐣𑑄 𑐰𑐖𑑂𑐬𑐵𑐔𑐵𑐬𑑂𑐫 𑐏𑑅’ 𑐢𑐂𑐐𑐸 𑐏𑑃 𑐠𑐸𑐂𑐎𑐾𑐐𑐸 𑐮𑑂𑐰𑑅𑐩𑑄𑐎𑐵𑑅 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐳𑑄 𑐢𑐵𑐬𑑂𑐩𑐶𑐎 𑐁𑐳𑑂𑐠𑐵 𑐟𑑂𑐰𑑅𑐟𑐵𑑅 𑐐𑐸𑐠𑐶𑐐𑐞𑐫𑑂 𑐳𑐴𑐨𑐵𑐐𑐷 𑐖𑐸𑐂𑐐𑐸𑐮𑐶𑐂 𑐄𑐡𑐵𑐳𑐷𑐣𑐟𑐵 𑐎𑑂𑐫𑐣𑐵 𑐔𑑂𑐰𑐣 𑑋 𑐄𑐎𑐶𑑄 𑐳𑐎𑐮 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐳𑑄 𑐠𑐸𑐏𑐾𑐥𑐵𑐏𑐾 𑐣𑑄 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐳𑑂𑐠𑐶𑐟𑐶 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

(𑐔𑑂𑐰𑐩𑐶 𑐰𑐖𑑂𑐬𑐵𑐔𑐵𑐬𑑂𑐫 𑐳𑑄𑐬𑐎𑑂𑐲𑐞 𑐐𑐸𑐠𑐶𑐫𑐵 𑐩𑐴𑐵𑐳𑐔𑐶𑐰 𑐏𑑅 )