𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐠𑑂𑐰 𑐟𑑂𑐬𑐫𑑀𑐡𑐱𑐷 -

𑐊𑐨𑑂𑐬𑐶𑐚𑐶𑐒 𑐊𑐨𑑂𑐬𑐶𑐴𑑂𑐰𑐾𑐫𑐬 𑐀𑐮 𑐊𑐚 𑐰𑐣𑑂𑐳𑐫𑐵𑐟 𑐣𑑂𑐴𑐫𑑂𑐐𑐹 𑐌𑐳𑑂𑐎𑐵𑐬

𑐊𑐖𑐾𑐣𑑂𑐳𑐷- 𑐕𑐩𑑂𑐴 𑐔𑐶𑐣𑐶𑐫𑐵 𑐩𑐹𑐮𑐫𑐵 𑐀𑐩𑐾𑐬𑐶𑐎𑐵 𑐧𑑂𑐫𑐵𑐥𑐵𑐬𑐷 𑐠𑑅 𑐮𑐾𑐏𑐵𑐥𑐬𑐷𑐎𑑂𑐲𑐎𑐮𑐶𑐳𑐾 𑐫𑐵𑐂𑐐𑐸 𑐳𑑄𑐑𑐬𑑂𑐲𑐫𑐵 𑐧𑐵𑐏𑑄 𑐡𑐸𑐐𑐸 𑐦𑐶𑐮𑑂𑐩 ‘𑐊𑐨𑑂𑐬𑐶𑐠𑐶𑐒 𑐊𑐨𑑂𑐬𑐶𑐴𑑂𑐰𑐾𑐫𑐬 𑐀𑐮 𑐊𑐚 𑐰𑐣𑑂𑐳𑑄’ 𑐠𑐸𑐐𑐸𑐳𑐷𑐫𑐵 𑐌𑐳𑑂𑐎𑐵𑐬 𑐀𑐰𑐵𑐬𑑂𑐜𑐫𑑂 𑐣𑑂𑐴𑐫𑑂𑐐𑐹 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐠𑑂𑐰 𑐦𑐶𑐮𑑂𑐩𑑄 𑐳𑐬𑑂𑐰𑑀𑐎𑐺𑐲𑑂𑐚 𑐦𑐶𑐮𑑂𑐩, 𑐳𑐬𑑂𑐰𑑀𑐟𑑂𑐎𑐺𑐲𑑂𑐚 𑐣𑐶𑐬𑑂𑐡𑐾𑐱𑐎, 𑐳𑐬𑑂𑐰𑑀𑐎𑐺𑐲𑑂𑐚 𑐀𑐨𑐶𑐣𑐾𑐟𑑂𑐬𑐷, 𑐳𑐬𑑂𑐰𑑀𑐎𑐺𑐲𑑂𑐚 𑐳𑐴𑐀𑐨𑐶𑐣𑐾𑐟𑐵, 𑐳𑐬𑑂𑐰𑑀𑐎𑐺𑐲𑑂𑐚 𑐳𑐴𑐀𑐨𑐶𑐣𑐾𑐟𑑂𑐬𑐷, 𑐳𑐬𑑂𑐰𑐱𑑂𑐬𑐾𑐲𑑂𑐛 𑐩𑑁𑐮𑐶𑐎 𑐥𑐚𑐎𑐠𑐵 𑐰 𑐳𑐬𑑂𑐰𑐱𑑂𑐬𑐾𑐲𑑂𑐛 𑐳𑐩𑑂𑐥𑐵𑐡𑐣 𑐫𑐵𑐣𑐵𑑅 𑐣𑑂𑐴𑐫𑑂𑐐𑐹 𑐀𑐰𑐵𑐬𑑂𑐜 𑐮𑑂𑐴𑐵𑐟𑐫𑑂 𑐮𑐵𑐎𑐹𑐐𑐸 𑐏𑑅 𑑋

𑐂𑐣𑑂𑐜𑐷 𑐳𑑂𑐚𑐸𑐜𑐶𑐫𑑀 𑐊 𑐚𑑂𑐰𑐵𑐣𑑂𑐚𑐷 𑐦𑑀𑐬𑑄 𑐡𑐫𑐾𑐎𑐹𑐐𑐸 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂𑐡𑐾𑐱𑐎 𑐜𑑂𑐫𑐵𑐣𑐶𑐫𑐮 𑐎𑑂𑐰𑐵𑐣 𑐰 𑐜𑑂𑐫𑐵𑐣𑐶𑐫𑐮 𑐳𑐶𑐣𑐬𑑂𑐚 𑐏𑑅 𑑋 𑐦𑐶𑐮𑑂𑐩𑑄 𑐳𑐬𑑂𑐰𑑀𑐟𑑂𑐎𑐺𑐲𑑂𑐚 𑐀𑐨𑐶𑐣𑐾𑐟𑑂𑐬𑐷𑐫𑐵 𑐳𑐶𑐬𑐥𑐵𑑅 𑐟𑑂𑐫𑐵𑐎𑐹𑐩𑑂𑐴 𑐎𑐮𑐵𑐎𑐵𑐬 𑐩𑐶𑐳𑐾𑐮 𑐫𑑀𑐴 𑐠𑑂𑐰 𑐰𑐶𑐢𑐵𑐫𑑂 𑐀𑐰𑐵𑐬𑑂𑐜 𑐟𑑂𑐫𑐵𑐎𑐹𑐩𑑂𑐴 𑐣𑑂𑐴𑐵𑐥𑐵𑑄𑐩𑑂𑐴 𑐊𑐱𑐶𑐫𑐵𑐮𑐷 𑐀𑐨𑐶𑐣𑐾𑐟𑑂𑐬𑐷 𑐖𑐹𑐐𑐸 𑐡𑐸 𑑋 𑐫𑑀𑐴 𑐌𑐳𑑂𑐎𑐵𑐬 𑐟𑑂𑐫𑐵𑐎𑐹𑐐𑐸 𑐩𑐵𑐬𑑂𑐳𑐮 𑐁𑐬𑑂𑐚 𑐦𑐶𑐮𑑂𑐩 𑐎𑑂𑐬𑐵𑐄𑐔𑐶𑐒 𑐚𑐵𑐂𑐐𑐬 𑐴𑐶𑐜𑐣 𑐜𑑂𑐫𑑂𑐬𑐵𑐐𑐣𑐫𑐵 𑐀𑐨𑐶𑐣𑐾𑐟𑑂𑐬𑐷 𑐏𑑅 𑑋

𑐳𑐬𑑂𑐰𑐾𑐱𑑂𑐬𑐾𑐲𑑂𑐛 𑐀𑐨𑐶𑐣𑐾𑐟𑐵 𑐥𑐵𑐏𑐾 𑐢𑐵𑑅𑐳𑐵 𑐡 𑐴𑑂𑐰𑐾𑐮 𑐦𑐶𑐮𑑂𑐩 𑐧𑑂𑐬𑐾𑐣𑑂𑐜𑐣 𑐦𑑂𑐬𑐾𑐖𑐬 𑐳𑐶𑐬𑐥𑐵 𑐟𑑂𑐫𑐵𑐎𑐮 𑑋 𑐳𑐬𑑂𑐰𑐱𑑂𑐬𑐾𑐲𑑂𑐛 𑐀𑐨𑐶𑐣𑐾𑐟𑐵𑐫𑐵 𑐀𑐰𑐵𑐬𑑂𑐜 𑐎𑐾 𑐴𑐸𑐊 𑐎𑑂𑐰𑐵𑐣 𑐰 𑐳𑐬𑑂𑐰𑐱𑑂𑐬𑐾𑐲𑑂𑐛 𑐀𑐨𑐶𑐣𑐾𑐟𑑂𑐬𑐷𑐫𑐵 𑐀𑐰𑐵𑐬𑑂𑐜 𑐖𑐾𑐩𑐷 𑐮𑐶 𑐎𑑀𑐬𑑂𑐚𑐶𑐳𑑄 𑐟𑑂𑐫𑐵𑐎𑐹𑐐𑐸 𑐡𑐸 𑑋

𑐡𑐎𑑂𑐲𑐶𑐞 𑐨𑐵𑐬𑐟𑐷𑐫 𑐦𑐶𑐮𑑂𑐩 ‘𑐁𑐬𑐁𑐬𑐁𑐬’𑐫𑐵 𑐩𑑂𑐫𑐾 ‘𑐣𑐵𑐚𑐸 𑐣𑐵𑐚𑐸’ 𑐣𑑄 𑐳𑐬𑑂𑐰𑐱𑑂𑐬𑐾𑐲𑑂𑐛 𑐩𑑁𑐮𑐶𑐎 𑐩𑑂𑐫𑐾𑐫𑐵 𑐌𑐳𑑂𑐎𑐵𑐬 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐣𑐵𑑄𑐖𑐵𑑅𑐩𑑂𑐴 𑐣𑐶𑐬𑑂𑐡𑐾𑐱𑐎 𑐳𑑂𑐚𑐶𑐦𑐣 𑐳𑑂𑐥𑐶𑐮𑐰𑐬𑑂𑐐𑐫𑐵 𑐀𑐰𑐟𑐵𑐬 𑑅 𑐡 𑐰𑐾 𑐀𑐦 𑐰𑐵𑐚𑐬𑑄 𑐢𑐵𑑅𑐳𑐵 𑐳𑐬𑑂𑐰𑐱𑑂𑐬𑐾𑐲𑑂𑐛 𑐨𑐶𑐖𑐸𑐀𑐮 𑐂𑐨𑐾𑐎𑑂𑐚 𑐰𑐶𑐢𑐵𑐫𑑂 𑐕𑐐𑐹 𑐖𑐎 𑐀𑐰𑐵𑐬𑑂𑐜 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑐟 𑑋 𑐜𑐎𑐸𑐩𑐾𑐣𑑂𑐚𑑂𑐬𑐷 𑐳𑐬𑑂𑐚 𑐦𑐶𑐮𑑂𑐩𑐫𑐵 𑐀𑐰𑐵𑐬𑑂𑐜 𑐡 𑐊𑐮𑐶𑐦𑐾𑐣𑑂𑐚 𑐰𑐶𑐴𑑂𑐳𑑂𑐥𑐬𑑂𑐳𑑄 𑐟𑑂𑐫𑐵𑐎𑐮𑐫𑐵 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐦𑐶𑐔𑐬 𑐦𑐶𑐮𑑂𑐩𑐫𑐵 𑐀𑐰𑐵𑐬𑑂𑐜 𑐖𑐬𑑂𑐩𑐣𑐷𑐫𑐵 𑐀𑐮 𑐎𑑂𑐰𑐵𑐂𑐚 𑐀𑐣 𑐡 𑐰𑐾𑐳𑑂𑐚𑐬𑑂𑐣 𑐦𑑂𑐬𑐣𑑂𑐚𑑄 𑐟𑑂𑐫𑐵𑐎𑐹𑐐𑐸 𑐡𑐸 𑑋 𑐀𑐠𑐾𑐴𑐾 𑐜𑐎𑐸𑐩𑐾𑐣𑑂𑐚𑑂𑐬𑐷 𑐦𑐶𑐔𑐬 𑐦𑐶𑐮𑑂𑐩𑐫𑐵 𑐀𑐰𑐵𑐬𑑂𑐜 𑐣𑐵𑐨𑐵𑐮𑑂𑐣𑐷𑑄 𑐟𑑂𑐫𑐵𑐎𑐮𑐳𑐵 𑐳𑐬𑑂𑐰𑐱𑑂𑐬𑐾𑐲𑑂𑐛 𑐊𑐣𑐶𑐩𑐾𑐚𑐾𑐜 𑐦𑐶𑐔𑐬 𑐦𑐶𑐮𑑂𑐩 𑐐𑐸𑐂𑐮𑐾𑐩𑑀 𑐜𑐾𑐮 𑐚𑑀𑐬𑐵𑐎𑑀 𑐥𑐶𑐣𑑀𑐔𑐶𑐫𑑀 𑐖𑐹𑐐𑐸 𑐡𑐸 𑑋